bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Quechuan
/
Quechuan QXO (Biblia en Quechua del sur de Conchucos)
/
Judges 8
Judges 8
Quechuan QXO (Biblia en Quechua del sur de Conchucos)
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 9 →
1
Efraín trïbu runakunanam pasaypa rabyarnin Gedeónta niyarqan: «Madianita runakunaman pelyaq aywar ¿imanirtä noqakunataqa qayatsiyämarqaykitsu?»
2
Peru Gedeónnam nirqan: «Mana qayatsiptïpis madianita runakunapa mandaqnin reykunata wanutsirmi noqapita mas allita rurayarquyki. Wallkallata ruranqaykita yarparpis noqakunapita masmi rurayarquyki.
3
Madianita runakunapa mandaqninkuna rey Orebta y rey Zeebta wanutsiyänaykipäqa Tayta Diosmi makikikunaman churamushqa. Paykunata wanutsirqa noqakunapita masmi rurayarquyki». Gedeón tsaynö niptinmi Efraín trïbu runakuna rabyanaykäyanqanpita kushikuyarqan.
4
Tsaypitanam pasaypa ajyashqa kaykarpis pelyaman compañaq kimsa pachak (300) runakunawan Jordán mayuta Gedeón päsayarqan madianita runakunata qatiparnin.
5
Sucotman chaykurnam tsaychö täraq runakunata Gedeón rugakur nirqan: «Madianita runakunapa mandaqninkuna rey Zebata y rey Zalmunata qatiparmi aywaykäyä. Yanapamaq runakuna pasaypa ajyashqanam kayan. Imallaykikunapis mikuyänanpä qarapaykayällamay».
6
Tsaynö nir rugakuptinmi Sucot markachö täraq mayor runakuna niyarqan: «Pachaykikunata qarayänäpaqa ¿Zebata y Zalmunata prësunaku tsararaykäyanki?»
7
Tsaynö niyaptinmi Gedeón nirqan: «Zebata y Zalmunata prësu tsariyämunäpä Tayta Dios makïman entregamaptinqa kutiykamurmi qaraykikunatapis kashakunawan asutayäshayki».
8
Tsaypita päsar Penielman charpis Sucotchö mañakunqannöllam Gedeón mañakurqan. Peniel runakunapis Sucot runakuna niyanqannöllam niyarqan.
9
Tsaymi pasaypa rabyar Peniel runakunata Gedeón nirqan: «Llapanta vinciskir kutimurmi kay törrikikunatapis juchutsishä».
10
Tsayyaqmi rupay yarqamunan lädupita shamuq soldädunkunawan Zeba y Zalmuna Carcorman chäyarqan. Gedeónpa yanapaqnin runakuna pachak ishkay chunka waranqata (120,000) wanutsiyashqa kaptinmi chunka pitsqa waranqa (15,000) soldädunkunallawanna kayarqan.
11
Gedeónnam yanapaqnin runakunawan desiertuman aywaq nänipa qatipar madianita runakunata illaqpita atacayarqan. Tsay näniqa Nobapita y Jogbeha lädupam päsarqan. Tsay läduqa rupay yarqamunan kaqpam karqan.
12
Atacayaptinmi Zeba y Zalmuna qeshpiykäyaptin Gedeón taripaykur prësu tsarirqan. Ishkan reykunata prësu tsariptinmi soldädunkunapis mantsakar maytsaypa qeshpir aywakuyarqan.
13
Gedeónqa pelyanqanpita kutir Heresta päsaykanqanchömi
14
Sucotchö täraq jövinta prësu tsariskir tapurqan tsaychö täraq mayor runakunapa jutinkunata. Tsaymi qanchis chunka qanchis (77) mayor runakunapa jutinkunata qellqaskir jövin entregarqan.
15
Tsaymi Sucotman chaykur runakunata Gedeón nirqan: «Zebata y Zalmunata qatipäyaptï manakaqman churayämarmi niyämarqayki: «Zebata y Zalmunata manarä wanutsiptikiqa manam pachaykikunata qarayäshaykitsu». Kanan rikayay Zebata y Zalmunata prësu apaykäyanqäta».
16
Tsaynö nirmi Gedeónqa Sucotchö täraq mayor runakunata kashawan y shirakawan asutarqan.
17
Tsaypita päsar Penielman chaykurnam törrinta juchuskatsir tsay markachö täraq runakunata wanutsirqan.
18
Tsaypitam Zebata y Zalmunata Gedeón tapurqan: «Taborchö wanutsiyanqayki runakuna ¿pï runanötä kayarqan?» Tsaymi niyarqan: «Qam niraqllam llapanpis kayarqan. Cada ünunmi reypa tsurinkunanölla kayarqan».
19
Tsaynö niyaptinmi Gedeón jinchipa nirqan: «¡Paykunaqa wawqïkunam kayashqa! Mamäpa wamrankunatam wanutsiyarquyki. Kananmi sï kikikikunatapis wanutsiyäshayki. Wawqïkunata mana wanutsiyashqa kayaptikiqa manam wanutsïmantsu karqan».
20
Tsaynö nirmi mayor tsurin Jeterta nirqan: «Kay runakunata wanutsiy». Tsaynö niptinmi wamrallarä kar wanutsiyta valurarqantsu.
21
Tsaymi Gedeónta Zeba y Zalmuna niyarqan: «Alli chölu karqa kikiki wanutsiyämay». Tsaynö niyaptinmi Gedeónqa paykunata wanuskatsir Zebapa y Zalmunapa camëllunkunapa kuyayllapä wallqankunata apakurqan.
22
Tsaypitanam Israel runakuna Gedeónta niyarqan: «Madianita runakunapa poderninpitam salvayämarquyki. Kananqa mandayämaqnï rey kaykullay. Qam wanuptiki tsurikipis reymi kanqa y tsuriki wanuptinnam willkaykipis rey kanqa».
23
Tsaynö niyaptinmi Gedeón nirqan: «Noqapis ni tsurïkunapis manam mandaqnikikuna rey kayämantsu. Mandamaqnintsik reyqa Tayta Diosmi.
24
Peru imanö kaptinpis rugakuyäshayki guërrachö qoriyämunqaykipita cada ünuykikuna juk sortïjaykikunata qarayämänaykipä». Tsaynö mañakurqan Ismael runakuna qori sortïjata jatiräyaptinmi.
25
Tsaynö niptinmi Israel runakuna «taytay, allim kanqa» nir jakuta mashtaykur cada ünun juk sortïjata churayarqan.
26
Tsay chaskinqan qori sortïjakunata pësaptinmi chunka isqun kïlunö karqan. Tsay jananmanmi Gedeón qorirqan wallqakunata, alhäjakunata, reykuna jatiräyanqan granäti röpakunata y camëllukunapa kunkanchö adornukunatapis.
27
Tsay qorikunapita juk efodta ruraskirmi markan Oframan Gedeón churarqan. Tsaypitanam Israel runakuna Tayta Diosta mana cäsur tsay efodta adorayarqan. Tsaymi tsay efodqa imayka trampanö karqan Gedeónpä y castankunapäpis.
28
Madianita runakunata tsaynö vinciyaptinmi Israel runakunata achäquita ashipäyarqannatsu. Gedeón kawanqanyaqmi chusku chunka (40) wata Israel runakuna tranquïlu kawakuyarqan.
29
Tsaypitanam Joáspa tsurin Jerobaal niyanqan Gedeónqa wayinpa kutikurqan.
30
Warminkuna atska kaptinmi ollqu tsurinkunapis qanchis chunka (70) kayarqan.
31
Siquemchö concubïna warmin Gedeónpa tsurinta qeshyakuskiptinmi jutinta churarqan Abimelecta.
32
Gedeónqa pasaypa rukuyanqanyaqmi kawarqan. Wanuskiptinmi papänin Joás pamparanqan kaqllaman pampayarqan. Tsayqa Abiezer casta täyanqan Ofra markachömi karqan.
33
Gedeón wanuskiptinnam Israel runakuna yapay Baal dioskunata adorar Baal-berit ïdulutana akrayarqan diosnin kananpä.
34
Llapan contrankunapita Tayta Dios salvaykaptinpis paytaqa qonqaskiyarqanmi.
35
Tsaynöllam Jerobaal niyanqan Gedeón tsayläya yanapashqa kaykaptinpis paypa tsurinkunata Israel runakuna cäsuyarqantsu.
← Chapter 7
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 9 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21