Judges 16

Quechuan QXO (Biblia en Quechua del sur de Conchucos)

← Chapter 15 Jump to: Chapter 17 →

1Juk kutichömi filisteo runakunapa markan Gazaman Sansón aywarqan. Tsaychömi prostitüta warmipa wayinman yaykur paywan punurqan.

2Tsaychö täraq runakunanam markankunachö Sansón kaykanqanta musyaskir Gaza runakuna jiruruypa churanakur markaman yaykuna punkuchö täpar niyarqan: «Patsa waraskiptinmi wanuratsishun».

3Sansónqa pullan paqasyaqllam punurqan. Tsay höra shärikuskir aywakurmi markaman yaykuna sawan punku wichqaraykaqta tarirqan. Tsaymi punkuta jipiskir marcuntinta cerröjuntinta umrukurkur Hebrón tsimpan jirkanyaq aparqan.

4Tsaypitanam Sansónqa Sorec pampachö täraq Dalilatana kuyakurkurqan.

5Tsayta musyaskirmi filisteo runakunapa mandaqninkuna aywaykur Dalilata niyarqan: «Sansónpa kallpan tsayläya kanqanta y payta imanö vincinantsikpä kanqantapis musyanantsikpä kuyaqnölla tapumuy. Willayämaptikiqa imanöpapis prësu tsariykurmi watayäshä. Tsaypitam cada ünükuna waranqa pachak (1,100) siclo qellayta pägayäshayki».

6Tsaymi Sansónta Dalila tapurqan: «¿Imanöpatä kallpasapa kanki? ¿Imawan watayäshuptikitä kallpaynaq tikrankiman?»

7Sansónnam nirqan: «Flëchapä rurashqa qanchis manarä tsakiq awriwan watayämaptinmi kallpä manana kanmantsu. Tsaynöpam wakin runakunanöllana käman».

8Sansón ninqanta willaykuptinmi filisteo runakunapa mandaqninkuna payman apayarqan manarä tsakiq qanchis awrikunata. Tsaywanmi Sansónta Dalila watarqan.

9Manarä watarmi Dalilaqa runakunata wayinman pakarqan. Tsaymi Sansónta wataskir jinchipa nirqan: «¡Sansón, filisteo runakuna janaykichönam!» Tsaynö niptinmi Sansónqa lliptashqa jïlutanö awrikunata rachiskirqan. Tsaymi filisteo runakunaqa musyayarqantsu imanöpa dominayänanpä kanqantapis.

10Tsaypitanam Sansónta Dalila nirqan: «¡Imanirtä llullapämarquyki! Kananqa rasun kaqta willamay. ¿Imanö watayäshuptikitä qeshpinkimantsu?»

11Tsaymi Sansón nirqan: «Manarä imatapis watayanqan mushuq waskakunawan watayämaptin kallpä manana kaptinmi wakin runanöllana kashä».

12Tsaymi Dalilaqa mushuq waskakunawan watarkur jinchipa nirqan: «¡Sansón, filisteo runakuna janaykichönam!» Tsay hörapis Dalilaqa runakunata wayinchömi pakaraykätsirqan. Filisteo runakuna jananchö kanqanta niptinmi Sansónqa llanu jïluta rachiqnö waskakunatapis rachiskirqan.

13Tsaypitanam Sansónta Dalila yapay nirqan: «¡Yapaymi engañamar llullapämarquyki! Kananqa rasun kaqta willamay. ¿Imanö wataptïtä qeshpinkimantsu?» Sansónnam nirqan: «Kallwawan awanqaykiman qanchis pillta aqtsäta shumaq awarkur jawiraykaq estäcaman awata shumaq watanki».

14Tsaynö niptinmi estäcaman wataskir jinchipa nirqan: «¡Sansón, filisteo runakuna janaykichönam!» Tsaynö niptinmi Sansónqa punuykanqanpita shärir clävaraykaq estäcantinta aqtsanta sutaskirqan.

15Tsaymi Dalila nirqan: «Rasun kaqta mana willaykämarqa ¿imanirtä «kuyämi wayllümi» nimanki? Kimsa kutinam llullapämar imanöpa kallpayki tsayläya kanqanta willamankitsu».

16Qoyay qoyay Dalila tsaynö tapupaptinmi Sansónqa wanuyparä llakikurqan.

17Tsaymi Dalilata rasun kaqta willar nirqan: «Manarä yuriptïmi nazareo kanäpä Tayta Dios akramashqa. Tsaymi llullu kanqäpita aqtsäta pipis rutumashqatsu. Aqtsäta pipis rutuptinqa mananam kallpä kanqanatsu. Tsaymi wakin runakunanöllana kashä».

18Rasun kaqta willanqanta musyaskirmi filisteo runakunapa mandaqninkunaman Dalila willakatsirqan: «¡Kanan sï llapayki shäyämuy! ¡Rasun kaqtam Sansón willamashqa!» Tsaymi mandaqkuna ofreciyanqannölla qellayta apakurkur Dalilaman aywayarqan.

19Tsaypitanam millqayninchö Sansónta Dalila punukätsirqan. Punukaskiptinmi juk runata qayaskir Sansónpa qanchis pilltankunata ruturatsirqan. Tsaymi Sansón kallpaynaq tikraskiptin

20jinchipa nirqan: «¡Sansón, filisteo runakuna janaykichönam!» Tsaymi Sansónqa rikchaskamur yarparqan imaypis salvakunqannölla salvakuyta. Peru manam musyarqantsu Tayta Dios manana yanapanqanta.

21Tsaynam filisteo runakunaqa jinan höra Sansónta prësu tsariskir ñawinkunatapis jipiskiyarqan. Gaza markaman prësu apaykurmi bronci cadënawan watayarqan carcelchö rumi mulinuta tumatsinanpä.

22Tsaychö prësu kaykaptinmi aqtsan yapay wiñarqan.

23Tsaypitam filisteo runakunapa mandaqninkuna qorikarnin diosninkuna Dagónpä sacrificiukunata rupatsiyarqan. Tsaychö kushikurmi tsay mandaqkuna niyarqan: «¡Contrantsik Sansóntam diosnintsik Dagón makintsikman churamushqa!»

24Sansónta rikaykurmi runakuna diosninkunata alabar niyarqan: «¡Mikuynintsikta ushakätsiq y wanutsimaqnintsik Sansóntaqa diosnintsik Dagónmi podernintsikman churamushqa!»

25Tsaynö kushikurmi niyarqan: «¡Sansónta pukllapänantsikpä carcelpita apayämuy!» Tsaymi carcelpita apaykuyaptin pasaypa burlakurnin templu tukmaraq ishkay jorcun chawpinman ichïtsiyarqan.

26Tsaymi janchaqnin jövinta Sansón nirqan: «Templu tsararaq columnakunata tukmakunäpä yatatsimay».

27Tsay höram templu rurinchö filisteo runakunapa mandaqninkunawan atska runakuna kaykäyarqan. Templu jananchönam Sansónta burlakuyanqanta rikäkur warmipis ollqupis kimsa waranqanö (3,000) kaykäyarqan.

28Tsaymi Sansónqa Tayta Diosta mañakur nirqan: «Tayta Dios, kananllana kallpä yurinanpä yanapaykallämay. Tsaynöpam ishkan ñawïta jipiyanqanpita filisteo runakunata juklla ushakäratsishä».

29Tsaynö mañakuskirmi templuta tsararaq ishkan columnakunaman tukmakurqan itsuq makinwan jukninman y derëcha kaq makinwan jukninman.

30Tsaypitam jinchipa nirqan: «¡Filisteo runakunawan juntu ushakäshä!» Tsaynö nir llapan kallpanwan columnakunata tanqaskiptinmi templu juchur llapan runakunatawan mandaqninkunata ñitirqan. Filisteo runakunata puntata wanutsinqanpitapis tsay höram mas atska runakunata Sansón wanutsirqan.

31Tsaypitam Sansónpa wawqinkunawan llapan castankuna aywar ayanta pampayänanpä apakuyarqan. Papänin Manoa pamparanqan kaqman apaykurmi Sansónta pampayarqan. Tsayqa Zora y Estaol markakuna chawpinchömi kaykan. Sansónqa Israel runakunapa juezninkuna karqan ishkay chunka (20) watam.

← Chapter 15 Jump to: Chapter 17 →