Revelation 14

Quechuan QXO (Biblia en Quechua del sur de Conchucos)

← Chapter 13 Jump to: Chapter 15 →

1Tsaypitanam Sión jirkanchö Cordëru ichiraykaqta rikarqä. Paypa puntanchömi pachak chusku chunka chusku waranqa (144,000) runakuna kaykäyarqan. Paykunapa urkunkunachömi Cordërupa jutin y Cordërupa Papäninpa jutin qellqashqa karqan.

2Ciëlupitanam wiyakämurqan atska yaku raqrapa aywar qayaraqnö y maqakuy bunruruqnö. Tsaynöllam tsaytsika arpakunata tukayämunqannö wiyakämurqan.

3Tsayqa mushuq alabanzata cantayanqanmi karqan. Tsaytam cantayarqan Tayta Diospa trönun puntanchö, chusku kawaqkunapa puntanchö y tsaychö kaq ishkay chunka chusku (24) mayor runakunapa puntanchö. Wakin runakuna manam tsay alabanzata yachakuyta puëdiyarqantsu. Tsaypa rantinqa tsay pachak chusku chunka chusku waranqa (144,000) salvashqa runakunallam yachayarqan.

4Paykunaqa warmiwan mana kakuq runakuna karmi virgen jipashnö püru kayan. Imanö ñakarpis Cordëru munanqannömi kawayarqan. Paykunatam salvarqan Tayta Diospä y Cordërupä primicianö kayänanpä.

5Imaypis mana llullakurmi jutsaynaq kayan.

6Tsaypitanam juk ángel junishpa päriykaqta rikarqä. Paymi mana ushakaq alli willakuyta apamurqan. Tsay willakuymi kaykan maytsay nación runakunapä, maytsay trïbu runakunapä, ima idiömata parlaqkunapä y maychö täraqkunapäpis.

7Tsay angelmi jinchipa nimurqan: «¡Tayta Diosta mantsapakur payta alabayay! ¡Höra chämushqanam llapan runakunata juzgananpä! ¡Ciëluta, kay patsata, lamarta y pashtaq yakukunatapis kamaq Tayta Diosta adorayay!»

8Tsay angelpa qepanta aywarmi juk angelpis nirqan: «¡Ushakashqanam, ushakashqanam jatunkaray Babilonia marka! ¡Babiloniam vïnuwan machätsiqnöpis llapan nación runakunata mana alli costumbrinkunata yachatsirqan!»

9Tsay angelpa qepantanam mas juk angelpis aywar jinchipa nirqan: «Mayqanpis anticristuta y ïdulunta adorar señalninta urkunman o makinman churatsikuq kaqkunataqa

10cöpa junta wiñaraykaq rabyaynintam Tayta Dios mana kuyapaypa uputsinqa. Cordëru y santu angelninkunapis rikaykäyaptinmi tsay runakuna azufrintin ninachö rupar ñakayanqa.

11Paqaspa junaqpa mana upiypa rupaptinmi imaypis qoshni shäriykanqa. Tsaynöllam anticristuta y ïdulunta adorar señalninta churatsikuqkunapis paqaspa junaqpapis ñakayanqa».

12Tsay ángel ninqannö kananpä kaykaptinqa Jesucristuman criyikuqkuna Tayta Diospa mandamientunkunata cäsur mana ajayaypa payman yärakuyätsun.

13Tsaypitanam ciëlupita nimuqta wiyarqä: «Kay ninqäta qellqay: «Kananpitaqa Jesucristuman criyikuykar wanuqkuna kushishqam kayanqa». Espíritu Santum nirqan: «¡Awmi, paykunaqa mananam ñakayanqanatsu, sinöqa yamayllam kawayanqa! Payman criyir allita rurayanqanpitam Tayta Dios qonqanqatsu».

14Rikachakunqächömi yuraq pukutay jananchö runapa tsurinnö jamaraykaqta rikarqä. Paymi qori corönashqa y afilashqa ösin aptashqa kaykarqan.

15Tsaypitanam ciëluchö kaykaq templupita juk ángel yarqaskamur pukutay jananchö jamaraykaqta jinchipa nirqan: «¡Cosëcha poqushqanam! ¡Cosechanaykipä tiempu chämushqanam! ¡Ösikita aptakurkur cosechamunaykipä ayway!»

16Tsaynö niptinmi pukutay jananchö jamaykanqanpita shamur ösinta aptakurkur kay patsachö runakunata qorimurqan.

17Tsaypitanam mas juk ángel ciëluchö kaykaq templupita alli afilashqa ösin aptashqa yarqamurqan.

18Altarchö kaykanqanpitam yapay mas juk angelpis yarqamurqan. Paymi altarchö ninata cuidaq karqan. Tsay angelmi ösin aptashqa angelta jinchipa qayar nirqan: «¡Üva poqushqanam kaykan! ¡Ösikiwan llapanta qorimuy!»

19Tsaynö niptinmi tsay ángel ösinwan kay patsachö üvata qorirqan. Qoriskirnam üvata jarukunan jatunkaray pözuman wiñarqan. Tsay pözuqa Tayta Diospa rabyayninmi.

20Markapita jukläman jipiskirmi üvata jaruqnö runakunata wanutsirqan. Runakunapa yawarninmi caballupa shiminman töpanqanyaq y joqta chunka (60) lëwayaq aywarqan.

← Chapter 13 Jump to: Chapter 15 →