Revelation 7

Quechuan QXO (Biblia en Quechua del sur de Conchucos)

← Chapter 6 Jump to: Chapter 8 →

1Tsaypitanam chusku angelkuna kay patsapa chuskun kuchunchö ichiraykaqta rikarqä. Tsay angelkunam vientuta tsaparäyarqan kay patsamanpis ni lamarmanpis ni ima jachamanpis mana vientumunanpä.

2Paykunam poderyuq kayarqan kay patsatapis lamartapis castigayänanpä. Tsaynöllam rikarqä rupay yarqamunan kaqpita imayyaqpis kawaq Tayta Diospa sëllun aptashqa juk ángel shamuykaqta. Tsay angelmi patsapa kuchunkunachö kaykaq chusku angelkunaman fuertipa qayakur

3nirqan: «¡Tayta Diosnintsikpa sirviqninkunata urkunkunachö manarä señalaptïqa kay patsachö kaqkunata, lamarchö kaqkunata ni jachakunatapis ama ushakätsiyayrätsu!»

4Tsaypitanam ayka runakunata señalanqanta wiyarqä. Tsay runakunam pachak chusku chunka chusku waranqa (144,000) kayarqan. Llapanpis Israel trïbu runakunapitam kayarqan:

5Judá trïbupitam chunka ishkay waranqa (12,000) kayarqan. Rubén trïbupitam chunka ishkay waranqa (12,000) kayarqan. Gad trïbupitam chunka ishkay waranqa (12,000) kayarqan.

6Aser trïbupitam chunka ishkay waranqa (12,000) kayarqan. Neftalí trïbupitam chunka ishkay waranqa (12,000) kayarqan. Manasés trïbupitam chunka ishkay waranqa (12,000) kayarqan.

7Simeón trïbupitam chunka ishkay waranqa (12,000) kayarqan. Leví trïbupitam chunka ishkay waranqa (12,000) kayarqan. Isacar trïbupitam chunka ishkay waranqa (12,000) kayarqan.

8Zabulón trïbupitam chunka ishkay waranqa (12,000) kayarqan. José trïbupitam chunka ishkay waranqa (12,000) kayarqan. Benjamín trïbupitam chunka ishkay waranqa (12,000) kayarqan.

9Tsaypitam rikarqä Tayta Dios jamaranqan trönupa puntanchö y Cordërupa puntanchö yupaytapis mana atipaypä tsaytsika runakuna palman aptashqa y yuraq röpankuna jatishqa kaykäyaqta. Paykunam kayarqan maytsay nación runakuna, maytsay trïbu runakuna, maytsay marka runakuna y tukuy idiömata parlaq runakuna.

10Paykunam jinchipa niyarqan: «¡Trönuchö jamaraykaq Tayta Dios y ñöpaykichö kaykaq Cordëru, qamkunam salvayämarquyki!»

11Tsaymi Tayta Diospa puntanchö kaykaq chusku kawaqkuna, ishkay chunka chusku (24) mayor runakuna y llapan angelkunapis lätaykur Tayta Diosta alabar

12niyarqan: «¡Amén! ¡Tayta Diosnintsik alabashqa kaykullätsun! ¡Payllam llapantapis musyan! ¡Imayyaqpis payta agradëcikushun! ¡Pay japallanmi llapanpä poderyuq! ¡Imayyaqpis payta alabashun! ¡Amén!»

13Tsaymi Tayta Diospa puntanchö kaykaq ishkay chunka chusku (24) mayor runakunapita juknin tapumarqan: «¿Pikunatä tsay yuraq röpan jatishqakuna kaykäyan? ¿Maypitatä shayämushqa?»

14Tsaymi nirqä: «Taytay, qammi musyanki». Tsaynö niptïmi nimarqan: «Paykunaqa pasaypa ñakaykunata päsaq runakunam kayan. Cordëru yawarninta jichar wanunqanpitam perdonashqana kayan. Cordërupa yawarninwan taqshakushqa kayaptinmi röpankunapis yuraq kaykan.

15Tsay runakunaqa Tayta Dios jamaranqan trönun puntanchömi kayan. «Paqasta junaqtam templunchö alabayan. Trönuchö jamaraykaq Tayta Diosmi paykunata imaypis rikanqa.

16Paykunaqa imaypis mananam mallaqäyanqatsu ni yakunäyanqatsu. Rupaypis paykunata manam rupanqatsu. Achaypis mananam ajayätsinqatsu.

17Tayta Dios jamaranqan trönun ñöpanchö Cordërum paykunata mitsinqa. Imaypis mana yakunäyänanpämi kawatsikuq yakuman pushanqa. Kikin Tayta Diosmi shoqar weqinkunatapis pitsanqa».

← Chapter 6 Jump to: Chapter 8 →