Revelation 20

Quechuan QXO (Biblia en Quechua del sur de Conchucos)

← Chapter 19 Jump to: Chapter 21 →

1Tsaynöllam ciëlupita juk ángel uraykämuqta rikarqä. Tsay angelmi wanwanyaykaq patsapa shiminpa llävinta y jatunkaray cadënata aptashqa urämurqan.

2Dragonta tsariskirmi waranqa (1,000) wata wataränanpä cadënawan watarqan. Tsay dragonmi diablu niyanqan Satanás y unay culebra karqan.

3Wanwanyaykaq patsapa shiminpa jitarpurmi pitapis manana engañananpä punkunta wichqaskir sëllaskirqan. Waranqa wata cumpliskiptinnam pöcu tiempulla libri kananpä dëjanqa.

4Tsaypitanam trönukunata rikarqä. Tsay trönukunamanmi juzgaqkuna jamayarqan. Tsaynöllam tsaytsika almakunatapis rikarqä. Tsay almakunam kayarqan Jesucristuman criyikur Tayta Diospa willakuyninta willakuyanqanpita kunkankunatapis roquypa wanutsiyanqan runakunapa almankuna. Paykuna manam anticristuta ni ïduluntapis adorayarqantsu. Tsaynöllam anticristupa señalninwan urkunmanpis ni makinmanpis señalatsikuyarqantsu. Tsay runakuna kawaskamurmi waranqa (1,000) wata Jesucristuwan mandayanqa.

5Paykunaqa puntatam kawayämunqa. Peru wakin wanuqkunam sïqa waranqa wata cumpliptinrä kawayämunqa.

6Puntata kawamuqkunaqa kushishqam kayanqa. Paykunaqa Tayta Dios kuyanqan santu runakunam kayanqa. Tsaymi qepa kaq wanuyman chäyanqatsu. Tsaypa rantinqa Tayta Diosta y Jesucristuta sirviq sacerdötikuna karmi Jesucristuwan waranqa wata mandayanqa.

7Waranqa (1,000) wata päsaskiptinnam prësu kaykaq Satanásta dëjanqa.

8Tsaymi llapan nación runakunata engañananpä maytsaypapis purir Gog nacionpa y Magog nacionpa soldädunkunatapis guërrata rurayänanpä qorinqa. Lamar kuchunchö arënanömi tsay soldädukunapis atskaq kayanqa.

9Tsay soldädukuna maytsaypita shamurmi Dios kuyanqan markachö criyikuq runakunapa campamentunta tumaypa jirurupäyanqa. Tsaynö jiruruparaykäyaptinmi Tayta Dios ciëlupita ninata shushutsimur tsay soldädukunata ushakätsinqa.

10Tsaypitanam runakunata engañaq diabluta azufriyuq nina rupaykaq qochaman qaykunqa. Tsaychömi anticristo y llullakuq profëtapis qaykuräyanqana. Tsaychömi diablupis paqaspa junaqpa imayyaqpis paykunawan ñakanqa.

11Tsaypitanam jatunkaray yuraq trönunchö Tayta Dios jamaraykaqta rikarqä. Paypa puntanpitam kay patsapis y ciëlupis illakaskiyarqan. Mananam mas rikakäyarqannatsu.

12Tsaynöllam rikarqä llapan wanuq runakuna, yachaq mana yachaqpis, Tayta Diospa puntanchö ichiraykaqta. Tsaypita librukunata kicharmi Libru de la Vïdatapis Tayta Dios kicharqan. Tsay librukunata rikaykurmi allita o mana allita rurayanqanman runakunata juzgarqan.

13Tsay runakunam kayarqan lamarchö wanuqkuna, pamparaqkuna y maytsaychö wanuqkunapis. Llapantam imatapis rurayanqanman Tayta Dios juzgarqan.

14Tsaypitanam wanuytapis Hadestapis nina qochaman jitarqan. Tsay nina qochaqa qepa kaq wanuymi.

15Tsaymanmi Libru de la Vïdachö jutinkuna mana qellqashqa kaqkunatapis jitarqan.

← Chapter 19 Jump to: Chapter 21 →