1 Samuel 13

Romani Baltic Latin (Biblija - Pe Baltitko Romani čib (Romanes) 2019)

← Chapter 12 Jump to: Chapter 14 →

1Berš sys Saulóskire kralipnaske, i javír berš jov kralindia pe Izrailjo, syr vykedyjá Sáulo péske trin tysjoncy manušén Izrail'tianendyr:

2duj tysjoncy sys Saulosa dro Mihmasa i pe Viefiljoskiri bérga, tysjonco sys Ionafanosa dro Vieniaminoskiri Givá; a javír manušén jov otmekciá pir péskire kherá.

3I rozmardiá Ionafáno Filistimijákire-rakhibnaritko otriado, savó sys dre Givá; i šundlé pal davá Filistimliáni, a Sáulo phurdyja rogosa (trubasa) pir sarí rig, dyi gódla: “Mek te šunén Judy!”

4Kiéli saró Izrailjo šundiá, so rozmardiá Sáulo Filistimijakiro rakhibnaritko otriado, i, so Izrailjo kerdiápe na pir iló Filistimlianenge, tedy manušá skedynépe ke Sáulo dro Galgálo.

5I skedynépe Filistimliáni pe maribén proti Izrailjo: trijánda tysjoncy maribnýtka vurdená i šov tysjoncy uklisté, i but manušén, syr isyn práho pe morjoskiro (derjavéskiro) brégo; i javné i terdiné lodesa (stanósa) dre Mihmasa, Bief-Avienoskire vastočnone rigátyr.

6Izrail'tiáni, dykhí, so jone sys dro bída, pal-dová so manušá sys stasade, garadyne dro gebara – (pieščery) i dro bergitka loščyny, i maškír bérgi, i dro vučardia (bašni), i dro rovy;

7a vari-savé Judendyr piriginé pal Iordáno, pe Gadóskiri i Galaadoskiri rigá; Sáulo sys dro Galgálo, i saré manušá, savé sys lésa, sys dro dar.

8I užakirdia jov eftá dyvesá, ke časo, savó uphendia Samuílo, a Samuílo na javdiá dro Galgálo; i lyné manušá te našén léstyr.

9I phendiá Sáulo: “Janén ke me, so uphendló vaš svénto janybén i vaš mírno svénto dyibén.” I ĥazdyjá célo shačkiribén.

10Ne nábut so jov končyndia te ĥazdel celoné-shačkiribnaskiro, ĥáda, džála Samuílo; i vygijá Sáulo ke jov gil, sob (kaj) del ‘“dobridim” léske.

11Ne Samuílo phendiá: “So tu kerdián?” Sáulo otphendiá: “Me dykhcjom, so manušá našéna mándyr, a tu javdián ke uphendló časo; Filistimliáni skedynépe dro Mihmasa”;

12tedy mánge javdiá myslia: “Kakaná javéna pe mánde Filistimliáni dro Galgálo, a me iščo (inké) na phucjom Rastyr-Devlestyr”, i pal-dová skedyjompe te janav célo shačkiribén.”

13I phendiá Samuílo Saulóske: “Dylynes kerdián tu, so tu na spolnindian Ráskire Devléskire, tyré Devléskiro uphenybén, savó sys dynó túke, pal-dová so kakaná zoraliakirelas by Raj Devél tyró kralipén pe Izrailjo pe viéki;

14ne kakaná te na uterdjol tyré kralipnaske; Raj Devél lathéla Péske muršés pir Péskiro iló, i phenéla léske Raj Devél te javél Péskire manušénge lydžaibnarisa, adiáke syr tu na spolnindian dová, so phendiá túke Raj Devél.”

15I uštyjá Samuílo i gijá Galgalostyr dro Givá Vieniaminoskiri; a lésa, ke šovšelá manušá.

16Sáulo péskire čhavésa Ionafanosa i manušénca, savé sys pašýl lénde, bešné dro Vieniaminoskiri Givá; Filistimliáni sys terdé stanósa dre Mihmasa.

17I vyginé Filistimijákire stanostyr trin otriády te čhučakiren phuv: jekh gijá pirí drom ke Ofra, dro obgiiben Sual',

18I javír otriado gijá pir drom Vieforoskiro, a tríto gijá pir drom ke kustýk (granica) dro Cevoimoskiro dólo pe čhučí phuv.

19Petalengiren (kuzniecen) na sys pe sarí Izrailjoskiri phuv; pal-dová so Filistimliáni dardepe, sob (kaj) Judy te na kerén kurtála ci čhurdypnytko bust (kop'jo).

20I lénge treindiá te psirén sarénge ke Filistimliáni te den čol (vojstrinen) péskire sošniki (plugi), i péskire zastupy (motygi), i péskire tovera, i péskire kirki,

21kiéli kerélape ščerbina pe čhinybnytko (ostrijo) dro sošniki, i dro zastupy, i pe bustiá (vily), i pe tovera, ci trej te popravinen rožno.

22Paldavá dro maribnaskiro časo na sys ni kurtála, ni maribnýtko bust saré manušénde, savé sys Saulosa i Ionafanosa, a jekhende jone lathnepe Sauloste i Ionafanoste, léskire čhavéste.

23I vygijá fedyršo Filistimijakiro otriado ke Mihmasoko pe piriprava.

← Chapter 12 Jump to: Chapter 14 →