1 Samuel 2

Romani Baltic Latin (Biblija - Pe Baltitko Romani čib (Romanes) 2019)

← Chapter 1 Jump to: Chapter 3 →

1I mangdiápe Anna i rakirdiá: “Obradyndiape miro iló dro Raste-Devléste; ĥazdyi šyng miro dro miré Raste-Devléste; buĥles rosčhakirdepe miré uštá pe miré vergénde (vrogende); pal-dová so me radynavape pal Tyró zrakhibén.

2Nane dasaves sventones, syr Raj Devél; pal-dová so nane javirés, apríč Túte; i nane tvardedyr, syr amaró Raj Devél.

3Na rakirén but phut'kirdé lavá; nalačhé lavá mek te na vydžán tumaré uštendyr; pal-dová so Raj Devél isyn dykhib-naskiro Devél, i réndy Léste sykade.

4Lúko zoralengiro phadjola, a bizorjákire podphandenape zorjása;

5čale keréna butý marestyr, a bokhalé otkinjona, adiáke-pac' džuvliá, savé na moginéna te mainen čhavorén bijanena eftá móly, a džuvlý, saví moginéla te mainel but čhavén, na moginéla.

6Raj Devél muliakiréla i otdžidiakirela, zlydžala pe do svéto i vylydžala;

7Devél keréla čororesa i barvaliakirela, teliakirela i ĥazdéla.

8Prahostyr Jov podĥazdela čorores, brienijatyr ĥazdéla bogos, čhuvéla te bešél thagar'jenca, i slavakiro štéto déla lénge dro meknó mištypén (nasliedstvo) pal-dová so Raste-Devléste osnovanijo (fundámiento) phuvjákiro, i Jov sozdyjá pe lénde saró svéto.

9Péskire sventonengire ĥerá (stopy) Jov rakhéla, savé na pir zakóno dživéna, dro kalypén xasjona; pal-dová so na zorjása manúš isyn zoraló.

10Raj Devél trinskirela krig manušés, savó košelape Lésa; bolybnástyr Jov grymitinela pe lénde. Raj Devél javéla te sendiakirél phuvjákire jagóry (kraí), i Jov déla zor Péskire kralíske, i ĥazdéla Péskire pomakhibnariskiro šyng (rógo).”

11I gijá Jelkana dre Ráma dro péskiro kher, a ternó manúš jaciápe te dynarinél Ráskire-Devléskiri angíl rašaste Ilijoste.

12Ilijoskire čhavé sys nalačhé manušá; jone na džindlé Ras-Devlés

13i so trej rašange te otlydžanpe ke dová manušá. Kiéli, kon janéla svénto dyibén Ráske-Devléske, to rašángiro ternó manúš, dro maseskiro keraibnaskiro časo (cýro), javélas péskiro vast phusadiasa (vilkasa)

14i obmekela la dro kakávi (kotlo), ci dro čaró, ci pe xič (skoroviéda) ci dre pirí, i so vylela phusady, dová léla péske rašái. Adiáke jone kerdé saré Izrail'tianenca, savé javénas odorík dro Silómo.

15Kóli angledýr, syr shačkirdé čekén (túko), javélas rašángiro ternó manúš i rakirélas manušéske, savó jandiá svénto dyibén Ráske-Devléske: “De mas pe žarjonka rašáske; jov na léla túte kerado mas, a de syrovo.”

16I kóli vari-kon rakirdiá léske: “Mek te shačkiren angledýr túko, syr trej te javél i tén'či (potom) lésa péske, ci but zakaméla tyró di.” Tedy jov rakirdiá: “Nad, kakaná de, a kóli nad, tedy Me láva zorjása.”

17I grého dalé terné-manušéngiro sys drieván baró angíl Raste-Devléste, pal-dová so jone otriskirena manušén sventoné janybnastyr Ráske-Devléske.

18Ternó-beršengiro Samuílo dynarindiá angíl Raste-Devléste, i sys uridó dro parkalitko efódo.

19Upratuno tyknó uribén kerdiá léske daj léskiri i janéla léske kažno (sváko) berš, kiéli joj iavéla péskire romesa, vaš savó trej svénto janybén Ráske-Devléske.

20I bahtiakirdiá Ilijo Jelkana i leskirja romniá, i phendiá: “Mek te del túke Raj Devél čhavén adalé romniatyr zamiést adaleste, savés tu otdyjan Ráske-Devléske!” I giné jone pe péskiro štéto.

21I javdiá Raj Devél ke Anna, i zapharija joi, i bijandiá trinen čhavén i dujén čhajén; a terneb manušéngiro Samuílo barija Raste-Devléste.

22Ilijo sys drieván phuró i šundiá saró, syr keréna léskire čhavé saré Izrail'tianenca, i so jone sys suté džuvliénca, savé skedenaspe pašýl zagiibén dro skedyibnáskiri skínija.

23I phendiá lénge: “Vaš so tumé keréna dasavé réndy? Pal-dová so me šunava nalačhé lavá pal tuménde saré manušéndyr.

24Nad, miré čhavale isyn nalačhi mavlýn (sláva), saví me šunava; tumé zmarena čačuné droméstyr Ráskire-Devléskire manušén;

25kóli manúš keréla grého manušéske, tedy pomangenape pal léste Ráske-Devléske; kóli manúš keréla grého proti Raste-Devléste, tedy kon javéla te mangélpe pal léste?” Ne jone na šundlé péskire-dadéskiri zan (glos), pal-dová so Raj Devél skedyjape te otdél len meribnáske.

26Ternó manúš Samuílo butýr i butýr barjolas i dro láska Raste-Devléste i manušénde.

27I javdiá Ráskire-Devloskiro manúš ke Ilijo, i phendiá léske: “Adiáke rakiréla Raj Devél: ‘Ci na otčhakirdjompe Me tyré dadéskire kheréske, kiéli jone sys dro Jegípto, dro faraonóskiro kher?

28I ci na vykedyjom Me les saréndyr Izrailjoskire rodendyr Péske dro rašaste, sob jov te poddžál ke Miro altárjo (žertvieniko), sob (kaj) te xačkirel fimiámo, sob te lydžál efódo angíl Mánde? I ci na dyjom Me tyré dadéskire kheréske saré shačkirdé jagása Izrailjoskire čhavéngiro sventoné dyibnendyr Ráske-Devléske?

29Vaš so tumé čhurdena ĥerénca Miré svénta janybená Ráskire-Devléskiri i Miro marunó janybén, savé Me phendjom vaš Miro kher, i sóske tu kamésa péskire čhavén butýr syr Man, thuliakiri pes anglatuné načatkenca saré janybnendyr Miré Izrailjoskire manušéngire?’

30Paldavá adiáke rakiréla Raj Devél, Raj Devél Izrailjoskiro: ‘Me phendjom tedy: ‘Tyró kher i tyré-dadéskiro kher javéna te psirén angíl Miro muj dro viéko.’ Ne kakaná rakirdiá Raj Devél: ‘Mek te na javél adiáke, pal-dová so Me proslavinava manušén, savé slavinena Man, a kon na slavinela Man, odolé javéna ladžakirdé.

31Ĥáda, džána dyvesá, dro savé Me podčingirava tyrí myšca (masny) i tyré-dadéskiri kheréskiri myšca adiáke, so na javéla bogos dro tyró kher;

32i tu javésa te dykhés bída Miré kheréskiri, na dykhí pe saró davá, so Devléske isyn drógo Izrailjo, i na javéla dro tyró kher bogos dro saré dyvesá.

33Me na tradava krig túte sarén Miré altarjostyr (žertvienikostyr), sob te khiniakires tyré jakhá i te menčynes tyró di; ne saró tyré kheréskiro ródo javéla te merél dro maškiratune beršá.

34I ĥáda, túke ĥiertýk (znamiénijo), saví džála duje tyré čhavénca, Ofnisa i Finiejesosa: jone dujdžiné meréna dro jekh dyvés.

35I čhuváva Me Péske čačunés rašás; jov javéla te kerél pir Miro iló i pir Miro di; i léskiro kher Me keráva zoralesa, i jov javéla te psirél angíl Miré pomakhibnariste dro saré dyvesá;

36i kažno (sváko), kon jaciápe tyré kheréstyr, javéla léske te mangélpe pal giera rup i kotér (kusko) maró, i phenéla: “De mánge vari-saví Lievitengiri butý, sob (kaj) te zakerav pe džiibén.’”

← Chapter 1 Jump to: Chapter 3 →