1 Samuel 3

Romani Baltic Latin (Biblija - Pe Baltitko Romani čib (Romanes) 2019)

← Chapter 2 Jump to: Chapter 4 →

1Ternó manúš Samuílo dynarindiá Ráske-Devléske angíl Ilijoste; Devléskiro lav sys na často dro dolé dyvesá, dykhibén sys na často.

2I sys dro dová časo (cýro), kiéli Ilijo sys paštó pe péskiro štéto, léskire jakhá lyné te začhakirenpe, i jov na mogindiá te dykhél,

3i Ráskire-Devléskiro momolýtko (svietíl'niko) iščo (inké) na murdija, i Samuílo sys paštó dre Ráskire-Devléskiri Khangirí, kaj sys Ráskire-Devléskiro kovčego;

4I khardiá Raj Devél Samuilos, i jov otphendiá: “Ĥáda, me som!”

5I jov prastándyja ke Ilijo, i phendiá: “Ĥáda, me! Tu khardian man.” Ne odová phendiá: “Me na khardjom tut, džá pale, pasjov.” I jov gijá i pasijá.

6Ne Raj Devél dro javír mólo khardiá Samuilos. Jov uštyjá, i javdiá ke Ilijo javír mólo, i phendiá: “Ĥáda, me som!” Ne odová phendiá: “Me na khardjom tut, miro čhavó; džá pale, pasjov.”

7O Samuílo tedy na džindiá Ráskire-Devléskiri zan (glos), i iščo (inké) na otčhakirelaspe léske Ráskire-Devléskiro lav.

8I khardiá Raj Devél Samuilos dro tríto mólo. Jov uštyjá, i javdiá ke Ilijo, i phendiá: “Ĥáda, me! Tu khardian man. Tedy ĥalyjá Ilijo, so Raj Devél kharéla terné-beršengires (terné manušés).

9I phendiá Ilijo Samuiloske: “Džá pale i pasjov, i, kiéli kon kharéla tut, tu phen: ‘Rákir, Rajo Dévla, pal-dová so šunéla Tyró pishári.’” I gijá Samuílo, i pasijá pe péskiro štéto.

10I javdiá Raj Devél, i terdijá, i khardiá, syr dro dová i javír mólo: “Samuilie, Samuile!” I phendiá Samuílo: “Rákir, Rajo Dévla, pal-dová so šunéla Tyró pishári.”

11I phendiá Raj Devél Samuiloske: “Ĥáda, Me keráva réndo dro Izrailjo, pal savó, kóli vari-kon šunéla, odoléste kuduniakirela (zvieninela) dre duj kaná;

12dro dová dyvés Me keráva pe Ilijoste saró dová, so Me rakirdjom pal léskiro kher; Me láva i keráva;

13Me dyjom te džinél léske, so Me čhuváva kára pe léskiro kher pe viéki pal doiá bang, so jov džindiá, syr léskire čhavé kerénas fujes, i jov na obrikirdia len;

14i paldavá sovlahava Ilijoskire kheréske, so Ilijaskire-kheréskiri bang na zlelape ni sventoné janybnasa Ráske-Devléske, ni marune janybnasa dro viéko.”

15I sutia Samuílo ke zlóko, i otčhakirdiá Ráskire-Devléskire Khereskire vudará; i Samuílo dardiape (darandyja) te del te džinél davá dykhibén Ilijoske.

16Ne Ilijo khardiá Samuilos i phendiá: “Miro čhava, Samuilie!” Odová phendiá: “Ĥáda, me som!”

17I phendiá Ilijo: “So sys phendló túke? Na garav mándyr; dová i dová keréla túsa Raj Devél, i iščo (inké) butýr keréla, kóli tu garavesa mándyr vari-so saréstyr doléstyr, so sys phendló túke.”

18I dyjá te džinél léske Samuílo saró, i na garadia léstyr ničý. Tedy phendiá Ilijo: “Jov, Raj Devél; so Léske trej, dová mek te kerél.”

19I vybarija Samuílo, i Raj Devél sys lésa; i na jaciápe nijékh léskire lavéndyr, savó na kerdiápe dro čačipén.

20I udžindiá saró Izrailjo Danostyr ke Virsava, so Samuílo sys čhudo te javél Ráskire-Devléskire prorokosa.

21I paló (poslie) dová Raj Devél duredýr javélas dro Silómo, syr otčhakirdiá [sykadyjá-ju.o.] Samuiloske Pes dro Silómo pirdál Ráskire-Devléskiro lav.

← Chapter 2 Jump to: Chapter 4 →