2 Kings 10 — Shan

1ပိူဝ်ႈဢၼ် ဢႃႇႁပ်ႉ မီးလုၵ်ႈၸၢႆးၸဝ်ႈၸဵတ်းသိပ်းၵေႃႉ ၵႃႈၼႂ်းဝဵင်း သမႃႇရီႉ ၼၼ်ႉလႄႈ ယေႇႁူႉ ၼၼ်ႉတႅမ်ႈလိၵ်ႈလႄႈပၼ်ၵႂႃႇတီႈဝဵင်း သမႃႇရီႉ ၸူးၵႃႈတီႈမဵဝ်ႉဢုၵ်ႉ ဝဵင်း ယေႇၸရေႇလႃႉ ဢၼ်ဝႃႈၵူၼ်းဢၼ်ပဵၼ်ၵႄႇပဵၼ်ႁူဝ်တင်းလၢႆ ဢိၵ်ႇတင်းၶဝ်ၸိူဝ်းဢၼ်ႁဵတ်းလဵင်ႉႁဵတ်းလူ လုၵ်ႈၸၢႆးၸဝ်ႈ ဢႃႇႁပ်ႉ ၸိူဝ်းၼၼ်ႉၼၼ်ႉလႄႈဝႃႈ၊-

2ၶိင်ႇမိူဝ်ႈဢၼ်လိၵ်ႈၼႆႉႁွတ်ႈထိုင်တီႈသူၼၼ်ႉၵမ်းလဵဝ်၊ ပိူဝ်ႈဢၼ်လုၵ်ႈၸၢႆးၸဝ်ႈသူတင်းလၢႆ မီးလူၺ်ႈၵၼ်တင်းသူလႄႈ၊ ၵူၼ်းသိုၵ်းၶီႇလေႃႉရထႃးလႂ်၊ ၵူၼ်းသိုၵ်းၶီႇမႃႉလႂ်၊ ဝဵင်းဢၼ်မၼ်ႈၶိူင်ႇ၊ လၢၵ်ႈၼၢၵ်ႈၸုမ်ႇလႂ် မီးတီႈသူၼၼ်ႉလႄႈ၊-

3ဢွၼ်ၵၼ်လိူၵ်ႈၵဵပ်းဢဝ်ၵေႃႉဢၼ်ယဵင်ႈၶႅၼ်းလီမျၢတ်ႈထုၵ်ႇဢၢပ်ႈၼၼ်ႉ ၵႃႈၼႂ်းလုၵ်ႈၸၢႆးၸဝ်ႈသူၸိူဝ်းၼၼ်ႉသေလႄႈ ဢဝ်တၢင်ႇၵႃႈၼိူဝ်ရႃႇၸႃႉပလၢင်ႇၸဝ်ႈပေႃႈမၼ်းသေလႄႈ တိုၵ်းသိုၵ်းပုၼ်ႈမဵဝ်းၸိူဝ်ႉၶိူဝ်းၸဝ်ႈသူတႃႉ၊ ဝႃႈၼင်ႇၼႆဢေႃႈ။-

4ၶဝ်ၼၼ်ႉၵူဝ်ၼႃႇလူင်လၢင်လႄႈလၢတ်ႈလႄႈဝႃႈ၊ တေႃႈၵႃႈၶုၼ်ႁေႃၶမ်းသွင်ပႃး ဢမ်ႇၸုၵ်းဢမ်ႇၶၢမ်ႇၵႃႈတီႈၽၢႆႇၼႃႈမၼ်းလႆႈလႄႈ၊ ႁဝ်းၼႆႉတၵ်းၸုၵ်းၶၢမ်ႇယူႇလႆႈၸိူဝ်ႉၼင်ႇႁိုဝ်။ ဝႃႈၼင်ႇၼႆဢေႃႈ။-

5ၵေႃႉဢၼ်ဢုပ်ႉၵႃႈၼိူဝ်ႁေႃၸဝ်ႈ၊ မဵဝ်ႉဢုၵ်ႉ၊ ၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်တင်းလၢႆ၊ ၶဝ်ၸိူဝ်းဢၼ်ႁဵတ်းလဵင်ႉႁဵတ်းလူတီႈလုၵ်ႈၸၢႆး ဢႃႇႁပ်ႉ ၸိူဝ်းၼၼ်ႉၼၼ်ႉ ဢွၼ်ၵၼ်ၶိုၼ်းလဝ်ႊလၢတ်ႈၵႂႃႇတီႈ ယေႇႁူႉ လႄႈဝႃႈ၊ ၶႃႈၸဝ်ႈၸိူဝ်းၼႆႉပဵၼ်ၶႃႈၸဝ်ႈႁဝ်းလႄႈ၊ တၵ်းဢွၼ်ၵၼ်ႁဵတ်းၸွမ်းၵႃႈဢၼ် ၸဝ်ႈႁဝ်းမီးဢမိင်ႉၼၼ်ႉတီႈၶႃႈဢေႃႈ။ ၶႃႈၸဝ်ႈၸိူဝ်းၼႆႉတၵ်းဢမ်ႇဢဝ်ၽူႈလႂ်သေၵေႃႉသေၵူၼ်းႁဵတ်းၶုၼ်ႁေႃၶမ်းတီႈၶႃႈ။ ႁဵတ်းၸွမ်းၵႃႈဢၼ်ထုၵ်ႇတႃၸဝ်ႈႁဝ်းၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

6မၼ်းၵေႃႈသမ်ႉတႅမ်ႈလိၵ်ႈပၼ်ၵႂႃႇထႅင်ႈလႄႈဝႃႈ၊ ပေႃးသူယူႇၽၢႆႇၵဝ်လႄႈထွမ်ႇဢဝ်ၵႂၢမ်းၵဝ်ၸိုင် သူဢွၼ်ၵၼ်ဢဝ်ၵွၵ်းႁူဝ်ၶဝ်ၸိူဝ်းဢၼ်ပဵၼ်လုၵ်ႈၸၢႆးၸဝ်ႈသူၼၼ်ႉသေလႄႈ မႃးၵႃႈတီႈၵဝ်ၵႃႈၼႂ်းဝဵင်း ယေႇၸရေႇလႃႉ ၼႆႉဝၼ်းမိူဝ်ႈၽုၵ်ႈ၊ မိူဝ်ႈၶိင်ႇၼႆႉၼၼ်ႉတႃႉ၊ ဝႃႈၼင်ႇၼႆဢေႃႈ။ လုၵ်ႈၸၢႆးၶုၼ်ႁေႃၶမ်းၸိူဝ်းၼၼ်ႉ ၼပ်ႉပွင်းၵၼ်မီးၸဵတ်းသိပ်းၵေႃႉလႄႈ ဢွၼ်ၵၼ်မီးယူႇၵႃႈတီႈၵူၼ်းယႂ်ႇၵူၼ်းလူင် ၵူၼ်းဝဵင်းဢၼ်လဵင်ႉလူၶဝ်ၼၼ်ႉဢေႃႈ။-

7မိူဝ်ႈဢၼ်လိၵ်ႈၼၼ်ႉႁွတ်ႈထိုင်တီႈၶဝ်ၼၼ်ႉၸိုင်၊ ၶဝ်ၼၼ်ႉဢွၼ်ၵၼ်ဢဝ်လုၵ်ႈၸၢႆးၶုၼ်ႁေႃၶမ်းၸိူဝ်းၼၼ်ႉတၢႆတင်းၸဵတ်းသိပ်းၵေႃႉလႄႈ ဢဝ်ၵွၵ်းႁူဝ်ၶဝ်သႂ်ႇၵႃႈၼႂ်းပဵတ်ႈၼႂ်းၵူၺ်သေလႄႈ ပၼ်ၵႂႃႇတီႈမၼ်းၵႃႈၼႂ်းဝဵင်း ယေႇၸရေႇလႃႉ ဢေႃႈ။

8ၵူၼ်းဢွၼ်ႇၵေႃႉၼိုင်ႈ မႃးလဝ်ႊလၢတ်ႈတီႈမၼ်းလႄႈဝႃႈ၊ ၶဝ်ဢွၼ်ၵၼ်ဢဝ်ၵွၵ်းႁူဝ်လုၵ်ႈၸၢႆးၶုၼ်ႁေႃၶမ်းၸိူဝ်းၼၼ်ႉမႃးတီႈၶႃႈယဝ်ႉ၊ ဝႃႈၼင်ႇၼႆသေယဝ်ႉ၊ မၼ်းလၢတ်ႈလႄႈဝႃႈ၊ ဢဝ်ၵွင်ႁဵတ်းသွင်ၵွင်ဝႆႉၵႃႈတီႈ ႁူးၽၵ်းတူဝဵင်း ႁႂ်ႈတေႃႇထိုင်ႁွတ်ႈၶိင်ႇၵၢင်ၼႂ်တႃႉ၊ ဝႃႈၼင်ႇၼႆဢေႃႈ။-

9ႁွတ်ႈထိုင်ၶိင်ႇၵၢင်ၼႂ်သေယဝ်ႉ၊ မၼ်းဢွၵ်ႇလႄႈၸုၵ်းလၢတ်ႈတေႃႇၵူၼ်းတင်းသဵင်ႈတင်းလူင်လႄႈဝႃႈ၊ သူပဵၼ်ၵူၼ်းဢၼ်သိုဝ်ႈဢၼ်တေႃႇဢေႃႈ။ ၵဝ်လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းၸဝ်ႈၵဝ်သေလႄႈ ဢဝ်မၼ်းတၢႆယဝ်ႉ။ ၶဝ်တင်းသဵင်ႈတင်းလူင်ၼႆၸမ်ႉ၊ ၽူႈလႂ်ဢဝ်တၢႆ။-

10သူဢွၼ်ၵၼ်ႁူႉၸႅင်ႈမၢတ်ႈတွင်းလွင်ႈဢၼ်ၵႂၢမ်းထႃႇဝရႃႉၽြႃး၊ ဢၼ်ထႃႇဝရႃႉၽြႃး မီးဢမိင်ႉဝႆႉလူၺ်ႈလွင်ႈမဵဝ်းၸိူဝ်ႉၶိူဝ်း ဢႃႇႁပ်ႉ ၼၼ်ႉ ဢမ်ႇလႆႈတူၵ်းၵႃႈတီႈလိၼ်သေၶေႃႈသေၵမ်းၼၼ်ႉဝႆႉတႃႉ။ ထႃႇဝရႃႉၽြႃးႁဵတ်းၸွမ်းၵႃႈဢၼ်မၼ်းၸဝ်ႈ ဢဝ်ၶႃႈမၼ်းၸဝ်ႈ ဢေးလီႉယႃႉ မီးဢမိင်ႉဝႆႉၼၼ်ႉယဝ်ႉ၊ ဝႃႈၼင်ႇၼႆသေယဝ်ႉ၊-

11ယေႇႁူႉ ဢဝ်မဵဝ်းၸိူဝ်ႉၶိူဝ်း ဢႃႇႁပ်ႉ ၵႃႈဢၼ်ၵိုတ်းဢၼ်ၵျၢၼ်ႇ ၵႃႈၼႂ်းဝဵင်း ယေႇၸရေႇလႃႉ ဢိၵ်ႇတင်းၵူၼ်းယႂ်ႇၵူၼ်းလူင်မၼ်းတင်းသဵင်ႈတင်းလူင်၊ ပီႈၼွင်ႉမၼ်းတင်းလၢႆ၊ ယိတ်ႈပရေႃးႁဵၵ်ႈမၼ်းတင်းလၢႆ တၢႆထၼ်ႈပေႃး ဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းဢေႃႈ။

12လိုၼ်းၼၼ်ႉမၼ်းလုၵ်ႉဢွၵ်ႇလႄႈၵႂႃႇ ၵႃႈတီႈဝဵင်း သမႃႇရီႉ ဢေႃႈ။ မိူဝ်ႈဢၼ်မၼ်းႁွတ်ႈထိုင်ၵႃႈတီႈၸရွပ်ႈ တီႈဢၼ်ၵႅတ်းႁႆးၶူၼ်သူဝ်းဢၼ်မီးၵႃႈတီႈႁိမ်းသဵၼ်ႈတၢင်းၼၼ်ႉၸိုင်၊-

13မၼ်းထူပ်းႁၼ်ပီႈၼွင်ႉၸိူဝ်ႉၶိူဝ်း ဢႃႇၶၸီႉ ၶုၼ်ႁေႃၶမ်း ယူႉတႃႉ ၼၼ်ႉသေယဝ်ႉ၊ ထၢမ်လႄႈဝႃႈ၊ သူပဵၼ်ၽူႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ ၶဝ်ၼၼ်ႉလၢတ်ႈလႄႈဝႃႈ၊ ႁဝ်းပဵၼ်ပီႈၼွင်ႉၸိူဝ်ႉၶိူဝ်း ဢႃႇၶၸီႉ ဢေႃႈ။ ႁဝ်းလူင်းၵႂႃႇႁႂ်ႈလႆႈတၵ်ႉလႆႈလၢတ်ႈလုၵ်ႈၸၢႆးၶုၼ်ႁေႃၶမ်းလႂ် တင်းလုၵ်ႈၸၢႆးၼၢင်းႁေႃၶမ်းလႂ်ဢေႃႈ၊ ဝႃႈၼင်ႇၼႆဢေႃႈ။-

14မၼ်းၵေႃႈဝႃႈ၊ တီႉဢဝ်တူဝ်လိပ်းၶဝ်တႃႉ၊ ဝႃႈၼင်ႇၼႆလႄႈ၊ ၶဝ်ဢွၼ်ၵၼ်တီႉဢဝ်တူဝ်လိပ်းၶဝ်ၼၼ်ႉလႄႈ ဢဝ်ၶဝ်သီႇသိပ်းပၢႆသွင်ၵေႃႉၼၼ်ႉတၢႆ ၵႃႈတီႈၶုမ်ႁူးဢၼ်မီးၵႃႈတီႈၸရွပ်ႈၵႅတ်းႁႆးၶူၼ်သူဝ်းၼၼ်ႉလႄႈ ဢမ်ႇႁႂ်ႈလႆႈၵိုတ်းၵျၢၼ်ႇဝႆႉသေၵေႃႉသေၵူၼ်း။

15မိူဝ်ႈဢၼ်မၼ်းဢွၵ်ႇသေၵႃႈတီႈၼၼ်ႈၵႂႃႇၸိုင်၊ မၼ်းထူပ်းႁၼ် ယေႃးၼတပ်ႉ လုၵ်ႈၸၢႆး ရေႇၶပ်ႉ မႃးႁႂ်ႈလႆႈႁပ်ႉႁူဝ်တၢင်းမၼ်းလႄႈ၊ မၼ်းတၵ်ႉလၢတ်ႈမၼ်းၼၼ်ႉသေယဝ်ႉ၊ ထၢမ်လႄႈဝႃႈ၊ ႁူဝ်ၸႂ်မႂ်းသိုဝ်ႈလီယူဝ်းလီမိူၼ်ၸိူဝ်ႉၼင်ႇဢၼ် ႁူဝ်ၸႂ်ၵဝ်သိုဝ်ႈလီယူဝ်းလီတေႃႇႁူဝ်ၸႂ်မႂ်းၼၼ်ႉႁိုဝ်၊ ဝႃႈၼင်ႇၼႆသေယဝ်ႉ၊ ယေႃးၼတပ်ႉ ၶိုၼ်းလဝ်ႊလၢတ်ႈလႄႈဝႃႈ၊ သိုဝ်ႈယူဝ်းယူႇတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းလၢတ်ႈလႄႈဝႃႈ၊ ပေႃးၸိုဝ်ႈၸႂ်ႈၸိူဝ်ႉၼင်ႇၼၼ်ၸိုင်၊ ပၼ်မိုဝ်းမႂ်းမႃးတီႈၵဝ်တႃႉ၊ ဝႃႈၼင်ႇၼႆလႄႈ၊မၼ်းၼၼ်ႉပၼ်မိုဝ်းတီႈမၼ်းလႄႈ၊ မၼ်းတိုတ်ႉဢဝ်မၼ်းၼၼ်ႉတၢင်ႇသႂ်ႇၵႃႈၼိူဝ်လေႃႉရထႃး ၵႃႈတီႈႁိမ်းမၼ်းသေလႄႈဝႃႈ၊-

16ၸွမ်းလူၺ်ႈၵၼ်တင်းၵဝ်လႄႈ လူတူၺ်းလွင်ႈဢၼ်ႁူဝ်ၸႂ်ၵဝ်ႁႅင်းယႂ်ႇ ၽၢႆႇထႃႇဝရႃႉၽြႃးၼႆႉတႃႉ၊ ဝႃႈၼင်ႇၼႆသေယဝ်ႉ၊ ႁႂ်ႈမၼ်းၼၼ်ႉၶီႇလေႃႉရထႃးမၼ်းဢေႃႈ။-

17မိူဝ်ႈဢၼ်မၼ်းႁွတ်ႈထိုင်ၵႃႈတီႈ ဝဵင်း သမႃႇရီႉ ၼၼ်ႉၸိုင်၊ မၼ်းဢဝ်မဵဝ်းၸိူဝ်ႉၶိူဝ်း ဢႃႇႁပ်ႉ ၵႃႈဢၼ်ၵိုတ်းဢၼ်ၵျၢၼ်ႇ ၵႃႈၼႂ်းဝဵင်း သမႃႇရီႉ ၼၼ်ႉတၢႆ တေႃႇထိုင်ႁွတ်ႈထၼ်ႈပေႃးလူႉလႅဝ်ပႅတ်ႈတင်းသဵင်ႈတင်းမူတ်း ၸွမ်းၵႃႈၼင်ႇၵႂၢမ်းဢၼ်ထႃႇဝရႃႉၽြႃးမီးဢမိင်ႉတီႈ ဢေးလီႉယႃႉ ၼၼ်ႉဢေႃႈ။

18လႆႈသမ်ႉ ယေႇႁူႉ ႁႂ်ႈၵူၼ်းတင်းသဵင်ႈတင်းလူင်ၸူႉၵၼ်တုမ်ၵၼ်လႄႈ လၢတ်ႈတီႈၶဝ်လႄႈဝႃႈ၊ ဢႃႇႁပ်ႉ ၼၼ်ႉ ႁဵတ်းဝၢတ်ႈတီႈ ၽြႃးပႃႇလႃႉ ဢိတ်းဢွၼ်ႇၼိုင်ႈၵူၺ်းဢေႃႈ။ ယေႇႁူႉ ၼႆႉၸမ်ႉ၊ တၵ်းႁဵတ်းဝၢတ်ႈၼမ်ၼႃႇဢေႃႈ။-

19ပိူဝ်ႈဢၼ်ပဵၼ်ၼင်ႇၼႆလႄႈ ႁွင်ႉဢဝ်ပရေႃးၽႅတ်ႈ ၽြႃးပႃႇလႃႉ တင်းသဵင်ႈတင်းလူင်ဢၼ်ဝႃႈ၊ ၶဝ်ၵႃႈဢၼ်ပႂ်ႉဢမူႉမၼ်း ဢိၵ်ႇတင်းယိတ်ႈပရေႃးႁဵၵ်ႈမၼ်းတင်းသဵင်ႈတင်းလူင်မႃးတႃႉ။ ယႃႇပေႁႂ်ႈၵိုတ်းၵျၢၼ်ႇဝႆႉသေၵေႃႉသေၵူၼ်း။ ၵဝ်တၵ်းပုၵ်ႈၸေႃႇယိတ်ႈလူင် တီႈ ၽြႃးပႃႇလႃႉ ဢေႃႈ။ ၵေႃႉဢၼ်ၵိုတ်းဢၼ်ၵျၢၼ်ႇဝႆႉၼၼ်ႉၸမ်ႉ၊ ဢသၢၵ်ႈဢမ်ႇလႆႈလိပ်း၊ ဝႃႈၼင်ႇၼႆဢေႃႈ။ မိူဝ်ႈဢၼ်ဝႃႈၸိူဝ်ႉၼင်ႇၼၼ်ၼၼ်ႉၸိုင်၊ ယေႇႁူႉ ႁဵတ်းပရီႉယႄႇလႄႈ ၵျၢမ်ႇပွင်တၵ်းယႃႉပႅတ်ႈၶဝ်ၸိူဝ်းဢၼ်ၵူဝ်းၵႂၢႆႇ ၽြႃးပႃႇလႃႉ ၼၼ်ႉပႅတ်ႈဢေႃႈ။-

20ယေႇႁူႉ သမ်ႉၸီႇယၢင်ႇထႅင်ႈလႄႈဝႃႈ၊ ဢွၼ်ၵၼ်မႄးႁႅၼ်းပွႆးထမ်ႇမႃႉပုၼ်ႈ ၽြႃးပႃႇလႃႉ တႃႉ၊ ဝႃႈၼင်ႇၼႆလႄႈ၊ ၶဝ်ဢွၼ်ၵၼ်ပၢဝ်ႇသေႃႇဢေႃႈ။-

21ယေႇႁူႉ ပွႆႇၸႂ်ႉၵႃႈၼႂ်းမိူင်း ဢီႉသရေႇလႃႉ ၵူႈတီႈၵူႈလႅၼ်လႄႈ တပႄး ပႃႇလႃႉ ၵႃႈမီးၼၼ်ႉ ယင်းဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်းလႄႈ ဢွၼ်ၵၼ်မႃးဢေႃႈ။ ၶဝ်ဢွၼ်ၵၼ်ၶဝ်ႈၵႃႈၼႂ်းၵျွင်း ပႃႇလႃႉ လႄႈ၊ ၵျွင်း ပႃႇလႃႉ ၼၼ်ႉသတ်ႉတဵမ်ဝႆႉယူႇ ၸႃႉၸဵမ်ၽၢႆႇၼိုင်ႈ တေႃႇထိုင်ႁွတ်ႈၽၢႆႇၼိုင်ႈဢေႃႈ။-

22မၼ်းလၢတ်ႈတီႈၵေႃႉဢၼ်ပႂ်ႉထိင်းတိူၵ်ႈၶူဝ်းတိူၵ်ႈလဵင်းၼၼ်ႉလႄႈဝႃႈ၊ ဢဝ်ၶူဝ်းလဵင်းတၢင်းမႆ ဢွၵ်ႇပုၼ်ႈတပႄး ၽြႃးပႃႇလႃႉ ၵႃႈမီးၼႆႉတႃႉ၊ ဝႃႈၼင်ႇၼႆလႄႈ၊ မၼ်းၼၼ်ႉဢဝ်ၶိူင်ႈၼုင်ႈတၢင်းမႆဢွၵ်ႇဢေႃႈ။-

23ယေႇႁူႉ ၶဝ်ႈၵႃႈၼႂ်းၵျွင်း ပႃႇလႃႉ လူၺ်ႈၵၼ်တင်း ယေႃးၼတပ်ႉ လုၵ်ႈၸၢႆး ရေႇၶပ်ႉ လႄႈ လၢတ်ႈတီႈတပႄး ပႃႇလႃႉ ၸိူဝ်းၼၼ်ႉလႄႈဝႃႈ၊ ဢွၼ်ၵၼ်ႁႃလႄႈ လူတူၺ်းႁႂ်ႈဢမ်ႇလႆႈပႃးတပႄး ထႃႇဝရႃႉၽြႃးသေၵေႃႉသေၵူၼ်းလႄႈ ႁႂ်ႈမီးတပႄး ၽြႃးပႃႇလႃႉ ၵူၺ်းလွၼ်ႉလွၼ်ႉတႃႉ၊ ဝႃႈၼင်ႇၼႆဢေႃႈ။-

24ၼင်ႇၼၼ်လႄႈ ၶဝ်ဢွၼ်ၵၼ်ၶဝ်ႈၵႃႈၼႂ်းၵျွင်းႁႂ်ႈလႆႈပုၵ်ႈၸေႃႇၸႃႉၸဵမ်ယိတ်ႈဢၼ်တုတ်ႇၽႆးလႄႈ မဵဝ်းယိတ်ႈတင်းလၢႆဢေႃႈ။ ယေႇႁူႉ ဝႆႉၵူၼ်းပႅတ်ႇသိပ်းၵေႃႉၵႃႈတီႈၼွၵ်ႈသေလႄႈ ၸီႇယၢင်ႇလႄႈဝႃႈ၊ ပေႃးၶဝ်ၸိူဝ်းဢၼ်ၵဝ်ဢဝ်မႃးသႂ်ႇပၼ်ၵႃႈၼႂ်းမိုဝ်းသူၸိူဝ်းၼႆႉ လႆႈလွတ်ႈၵႂႃႇသေၵေႃႉသေၵူၼ်းၸိုင် ဢသၢၵ်ႈၵေႃႉဢၼ်ႁႂ်ႈလွတ်ႈၼၼ်ႉ တၵ်းလႆႈပဵၼ်ပုၼ်ႈဢသၢၵ်ႈၵေႃႉၼၼ်ႉဢေႃႈ၊ ဝႃႈၼင်ႇၼႆလႄႈ၊-

25မိူဝ်ႈဢၼ်မၼ်းႁဵတ်းတၢင်းဢၼ်ပုၵ်ႈၸေႃႇယိတ်ႈၼၼ်ႉယဝ်ႉတူဝ်ႈယဝ်ႉၼၼ်ႉၸိုင်၊ ယေႇႁူႉ လၢတ်ႈတီႈၵူၼ်းသိုၵ်းပႂ်ႉႁၢင်ႈပႂ်ႉႁေႃတင်းလၢႆ ဢိၵ်ႇတင်းတပ်ႉမူးၸိူဝ်းၼၼ်ႉလႄႈဝႃႈ၊ ၶဝ်ႈၵႃႈၼႂ်းလႄႈဢဝ်ၶဝ်တၢႆတႃႉ။ ယႃႇပေႁႂ်ႈလႆႈဢွၵ်ႇသေၵေႃႉသေၵူၼ်း၊ ဝႃႈၼင်ႇၼႆလႄႈ ၶဝ်ဢွၼ်ၵၼ်ဢဝ်ၶဝ်ၼၼ်ႉတၢႆလူၺ်ႈၶူမ်းလၢပ်ႇၶူမ်းလႅဝ်းလႄႈ ၵူၼ်းသိုၵ်းပႂ်ႉႁၢင်ႈပႂ်ႉႁေႃတင်းလၢႆ ဢိၵ်ႇတင်းတပ်ႉမူးၸိူဝ်းၼၼ်ႉ ဢွၼ်ၵၼ်ဢဝ်ၶဝ်ဢွၵ်ႇပႅတ်ႈသေယဝ်ႉ၊ ၵႂႃႇၵႃႈတီႈဝဵင်းဢၼ်ၸၢပ်ႈသႅင်ႇၵၼ်တင်းၵျွင်း ၽြႃးပႃႇလႃႉ ၼၼ်ႉသေလႄႈ၊-

26ဢဝ်သဝ်တီႈၵူဝ်းၵႂၢႆႇတင်းလၢႆ ဢၼ်မီးၵႃႈၼႂ်းၵျွင်း ပႃႇလႃႉ ၼၼ်ႉဢွၵ်ႇလႄႈတုတ်ႇၽႆးပႅတ်ႈဢေႃႈ။-

27ၶဝ်ဢွၼ်ၵၼ်ၵိူၼ်ႇယႃႉသဝ်တီႈၵူဝ်းၵႂၢႆႇ ပႃႇလႃႉ ပႅတ်ႈလႄႈ ၵိူၼ်ႇယႃႉၵျွင်း ပႃႇလႃႉ ပႅတ်ႈႁႂ်ႈပဵၼ်ႁိူၼ်းယေႇဢဵင်ႇယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

28ၼင်ႇၼၼ်လႄႈ ယေႇႁူႉ ပႄႇၽဵဝ်ႈ ပႃႇလႃႉ ပႅတ်ႈသေၵႃႈၼႂ်းမိူင်း ဢီႉသရေႇလႃႉ ဢေႃႈ။

29ၼႂ်းဝႃႈၼၼ်သေၵေႃႈ ယေႇႁူႉ ဢမ်ႇၸုၼ်ႉတူႉၸရိူၵ်ႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ဢၼ်မၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈ ဢၼ်ဝႃႈဝူဝ်းၶမ်းဢွၼ်ႇ ဢၼ်မီးၵႃႈတီႈဝဵင်း ပေႇသလႃႉ တင်းဝဵင်း တၢၼ်ႇ ၼၼ်ႉပႅတ်ႈ။-

30ထႃႇဝရႃႉၽြႃးၵေႃႈမီးဢမိင်ႉတီႈ ယေႇႁူႉ လႄႈဝႃႈၸမ်ႉ၊ ၵွပ်ႈပိူဝ်ႈဢၼ်မႂ်း ၵမ်ၵျၢင်ႉတၢင်းၵမ်တၢင်းၵျၢင်ႉဢၼ်သိုဝ်ႈတေႃႇ သိုဝ်ႈၼႃႈတႂ်ႈတႃၵဝ်လႄႈ ႁဵတ်းလီလီငၢမ်းငၢမ်းၼၼ်ႉ ဢိၵ်ႇတင်းၵွပ်ႈပိူဝ်ႈဢၼ်မႂ်းၸီႇယၢင်ႇတီႈမဵဝ်းၸိူဝ်ႉၶိူဝ်း ဢႃႇႁပ်ႉ ၸွမ်းၵႃႈၼင်ႇဢၼ် ၵဝ်မီးဢလူဝ်ႇၼၼ်ႉလႄႈ ၸူဝ်ႈလုၵ်ႈပၢၼ်လၢၼ်မႂ်း တၵ်းလႆႈၼင်ႈၵႃႈၼိူဝ်ရႃႇၸႃႉပလၢင်ႇမိူင်း ဢီႉသရေႇလႃႉ တေႃႇထိုင်ႁွတ်ႈသီႇသိုပ်ႇဢေႃႈ၊ ဝႃႈၼင်ႇၼႆသေၵေႃႈ၊-

31ယေႇႁူႉ ဢမ်ႇႁဵတ်းသတီႉ ႁႂ်ႈလႆႈပႃးတင်းႁူဝ်ၸႂ်သဵင်ႈသဵင်ႈသေလႄႈၸွမ်းသဵၼ်ႈတၢင်းတြႃးထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ။ မၼ်းဢမ်ႇၸုၼ်ႉတူႉၸရိူၵ်ႈ ယေႇရူဝ်းပုမ်ႇ ဢၼ်မၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉပႅတ်ႈ။

32ၼႂ်းၶိင်ႇၵႃႇလႃႉၼၼ်ႉ၊ ထႃႇဝရႃႉၽြႃးၸႃႉတႅပ်းမိူင်း ဢီႉသရေႇလႃႉ ႁႂ်ႈပွတ်းၵႂႃႇဢေႃႈ။-

33ႁႃႇၸေႇလႃႉ တိုၵ်းတေႃးယႃႉၶဝ်ႈၵႃႈၼႂ်းၼမ်ႉၼႂ်းလိၼ် ဢီႉသရေႇလႃႉ ဢဝ်ၵႃႈတီႈၼမ်ႉႁွင်ႈ ယေႃးတၢၼ်ႇ ၵႂႃႇၽၢႆႇဝၼ်းဢွၵ်ႇ၊ မိူင်း ၵီႉလတ်ႉ တင်းသဵင်ႈတင်းမူတ်း၊ ၵူၼ်းမဵဝ်း ၵၢတ်ႉ ၊ ၵူၼ်းမဵဝ်း ရူႉပိၼ်ႇ ၊ ၵူၼ်းမဵဝ်း မၼႃႇသေႇ တင်းလၢႆ ဢဝ်ၵႃႈတီႈဝဵင်း ဢႃႇရေႃႇ ဢၼ်မီးၵႃႈၼႂ်းပၢင်ႇႁူၺ်ႈ ဢႃႇၼုၼ်ႇ ၵႂႃႇဢၼ်ဝႃႈ မိူင်း ၵီႉလတ်ႉ တင်းမိူင်း ပႃႇသၢၼ်ႇ ၸိူဝ်းၼၼ်ႉပႅတ်ႈဢေႃႈ။

34လွင်ႈတၢင်း ယေႇႁူႉ ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းၵႃႈဢၼ်မၼ်းႁဵတ်း၊ လွင်ႈတၢင်းဢၼ်တၼ်းၶူဝ်းမၼ်းယႂ်ႇၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။-

35ယေႇႁူႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶဝ်ဢဝ်မၼ်းသၢင်းၵျူဝ်ႇၵႃႈၼႂ်းဝဵင်း သမႃႇရီႉ ဢေႃႈ။ ယေႃးၶတ်ႉ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။-

36ၶိင်ႇၵႃႇလႃႉၸူဝ်ႈပၢၼ် ဢၼ် ယေႇႁူႉ ယူႇၵႃႈၼႂ်းဝဵင်း သမႃႇရီႉ လႄႈ ဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ ၼၼ်ႉၸမ်ႉ၊ ပဵၼ်သၢဝ်းပၢႆပႅတ်ႇပီႊ ဢေႃႈ။