2 Kings 23

Shan

← Chapter 22 Jump to: Chapter 24 →

1မိူဝ်ႈၼၼ်ႉၶုၼ်ႁေႃၶမ်းပွႆႇၸႂ်ႉလႄႈ ႁႂ်ႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼႂ်းၵူၼ်းမိူင်း ယူႉတႃႉ တင်းဝဵင်း ယေႇရူႉသလႅမ်ႇ တင်းသဵင်ႈတင်းလူင်ၸူႉၵၼ်တုမ်ၵၼ်မႃးလႄႈ၊-

2ၶုၼ်ႁေႃၶမ်းၶိုၼ်ႈၵႃႈၼိူဝ်ႁိူၼ်းထႃႇဝရႃႉၽြႃး ဢိၵ်ႇလူၺ်ႈၵၼ်တင်းၵူၼ်းမိူင်း ယူႉတႃႉ တင်းသဵင်ႈတင်းလူင်၊ ၵူၼ်းဝဵင်း ယေႇရူႉသလႅမ်ႇ တင်းသဵင်ႈတင်းလူင်၊ ယိတ်ႈပရေႃးႁဵၵ်ႈလႂ်၊ ပရေႃးၽႅတ်ႈလႂ်၊ ၵူၼ်းတင်းသဵင်ႈတင်းလူင်ၸဵမ်လဵၵ်ႉၸဵမ်ယႂ်ႇၸိူဝ်းၼၼ်ႉလႄႈ၊ ဢဝ်ၵႂၢမ်းၵျၢမ်းလိၵ်ႈပတီႉၺိၺ်ႇတြႃး ဢၼ်ထူပ်းႁၼ်ၵႃႈတီႈႁိူၼ်းထႃႇဝရႃႉၽြႃးၼၼ်ႉၵႃႈမီး ၽတ်းႁႂ်ႈႁူၶဝ်လႆႈငိၼ်းဢေႃႈ။-

3ၶုၼ်ႁေႃၶမ်းၵေႃႈၸုၵ်းယူႇၵႃႈတီႈႁိမ်းသဝ်သေလႄႈ ႁဵတ်းတိၵ်ႈထၢၼ်ႇၵႃႈတီႈၽၢႆႇၼႃႈထႃႇဝရႃႉၽြႃး လူၺ်ႈလွင်ႈဢၼ်မၼ်းတၵ်းၸွမ်းလင်ထႃႇဝရႃႉၽြႃးလႄႈ ဢဝ်တင်းႁူဝ်ၸႂ်သဵင်ႈသဵင်ႈ ပႂ်ႉၵမ်ပႂ်ႉၸွမ်းပိင်းၺၢပ်ႈတြႃးမၼ်းၸဝ်ႈ၊ သၢၵ်ႈသေႇမၼ်းၸဝ်ႈ၊ ထုင်းၽိင်ႈတြႃးမၼ်းၸဝ်ႈ ၸိူဝ်းၼၼ်ႉသေလႄႈ ႁႂ်ႈၵႂၢမ်းပတီႉၺိၺ်ႇဢၼ်ပႃးၵႃႈၼႂ်းၵျၢမ်းလိၵ်ႈၼႆႉ လႆႈတႄႇယူႇၼၼ်ႉဢေႃႈ။ ၵူၼ်းတင်းသဵင်ႈတင်းလူင်ၵေႃႈ ဢွၼ်ၵၼ်ႁပ်ႉတုင်းဢဝ် တၢင်းဢၼ်ႁဵတ်းတိၵ်ႈထၢၼ်ႇဢေႃႈ။-

4လိုၼ်းၼၼ်ႉၶုၼ်ႁေႃၶမ်းၸီႇယၢင်ႇ ႁႂ်ႈၶုၼ်ယိတ်ႈပရေႃးႁဵၵ်ႈ ႁီႉလၶီႉ ဢိၵ်ႇတင်းယိတ်ႈပရေႃးႁဵၵ်ႈမုၵ်ႉၸိူဝ်းတူႉတီႉယႃႉတင်းလၢႆ တင်းၶဝ်ၸိူဝ်းဢၼ်ပႂ်ႉၽၵ်းတူၼၼ်ႉ ဢဝ်ၶိူင်ႈယိပ်းၶိူင်ႈၵႅမ်းၵႃႈဢၼ်ႁဵတ်းပုၼ်ႈ ၽြႃးပႃႇလႃႉ ၊ တူၼ်ႈ ဢႃႇသရႃႉ ၶိူင်ႈပိူင်ၽႃႉၵၢင်ႁၢဝ်ၸိူဝ်းၼၼ်ႉဢွၵ်ႇသေၵႃႈၼႂ်းပိၵ်ႈမၢၼ်ႇထႃႇဝရႃႉၽြႃးသေလႄႈ ဢဝ်တုတ်ႇၽႆး ၵႃႈၼွၵ်ႈဝဵင်း ယေႇရူႉသလႅမ်ႇ ၵႃႈတီႈၵၢင်ပၢင်ႇ ၵီႉတြုၼ်ႇ လႄႈ ဢဝ်တဝ်ႈမၼ်းၵႂႃႇၵႃႈတီႈဝဵင်း ပေႇသလႃႉ ဢေႃႈ။-

5မၼ်းပႄႇၽဵဝ်ႈယိတ်ႈပရေႃးႁဵၵ်ႈ ဢၼ်ၶုၼ်ႁေႃၶမ်း ယူႉတႃႉ ၶၢၼ်းဝႆႉ ႁႂ်ႈလႆႈဢဝ်ၼၢမ်ႇသႃႇတုတ်ႇၽႆးၵႃႈတီႈထႃႇၼႃႉတီႈသုင်ၵႃႈၼႂ်း ဝၢၼ်ႈဝဵင်း ယူႉတႃႉ တင်းလၢႆ တင်းၵႃႈတီႈႁိမ်းဝဵင်း ယေႇရူႉသလႅမ်ႇ ၸိူဝ်းၼၼ်ႉ ဢိၵ်ႇတင်းၶဝ်ၸိူဝ်းဢၼ်ဢဝ်ၼၢမ်ႇသႃႇတုတ်ႇၽႆးတီႈၽြႃး ပႃႇလႃႉ ၊ တီႈၸႃႉၸဵမ်ၵၢင်ဝၼ်း၊ လိူၼ်၊ ၵျူဝ်ႇ၊ ရႃႇသီႇလႄႈ ၶိူင်ႈပိူင်ၽႃႉၵၢင်ႁၢဝ်တင်းသဵင်ႈတင်းလူင်ၸိူဝ်းၼၼ်ႉပႅတ်ႈဢေႃႈ။-

6တူၼ်ႈ ဢႃႇသရႃႉ တင်းလၢႆၵေႃႈ မၼ်းဢဝ်ဢွၵ်ႇသေၵႃႈၼႂ်းႁိူၼ်းထႃႇဝရႃႉၽြႃးလႄႈ ဢဝ်ၵႂႃႇၵႃႈၼွၵ်ႈဝဵင်း ယေႇရူႉသလႅမ်ႇ ၵႃႈတီႈၼမ်ႉႁွင်ႈ ၵီႉတြုၼ်ႇ လႄႈ တုတ်ႇၽႆးပႅတ်ႈၵႃႈတီႈၼမ်ႉႁွင်ႈ ၵီႉတြုၼ်ႇ ၼၼ်ႉသေယဝ်ႉ၊ တွႆႇလႅဝ်တမ်လႅဝ်သေလႄႈ ဢဝ်မုၼ်ႈမၼ်းၽွင်မၼ်းဢွႆပိုၼ်သႂ်ႇၵႃႈၼိူဝ်သၢင်းၶႅင်းၶႃႈဝၢၼ်ႈၵူၼ်းမိူင်းတင်းလၢႆဢေႃႈ။-

7ႁိူၼ်းတီႈယူႇၵူၼ်း ဢၼ်ၸၢင်ႈၸွမ်းဢလူဝ်ႇၵူၼ်းၸၢႆးၼင်ႇၵၼ် ၵႃႈၼႂ်းႁိူၼ်းထႃႇဝရႃႉၽြႃး တီႈဢၼ်မႄႈယိင်းတင်းလၢႆ တေႃးၽႃႈၵင်ႈပုၼ်ႈတူၼ်ႈ ဢႃႇသရႃႉ ၼၼ်ႉၵေႃႈ မၼ်းယႃႉတူၵ်းပႅတ်ႈဢေႃႈ။-

8မၼ်းႁွင်ႉဢဝ်ယိတ်ႈပရေႃးႁဵၵ်ႈတင်းသဵင်ႈတင်းလူင် သေၵႃႈၼႂ်းဝၢၼ်ႈဝဵင်း ယူႉတႃႉ ၸိူဝ်းၼၼ်ႉမႃးလႄႈ ႁႂ်ႈထႃႇၼႃႉတီႈသုင် တီႈဢၼ်ယိတ်ႈပရေႃးႁဵၵ်ႈတင်းလၢႆဢဝ်ၼၢမ်ႇသႃႇတုတ်ႇၽႆးၸိူဝ်းၼၼ်ႉၵူဝ်ႈၵိူၵ်ႇ ဢဝ်ၵႃႈတီႈၸႃႉၸဵမ်ဝဵင်း ၵေႇပႃႉ တေႃႇထိုင်ႁွတ်ႈ ဝဵင်း ပေႇရသေႇၽႃႉ ၼၼ်ႉဢေႃႈ၊ ထႃႇၼႃႉတီႈသုင်ႁူးၽၵ်းတူ ၵႃႈတီႈဢၼ်ၶဝ်ႈႁူးၽၵ်းတူ ယေႃးသူႉ ဝုၼ်ႇဝဵင်း ယေႇရူႉသလႅမ်ႇ ဢၼ်မီးၽၢႆႇတၢင်းသၢႆႉ ၵႃႈတီႈၽၵ်းတူဝဵင်းၼၼ်ႉၵေႃႈ မၼ်းၵိူၼ်ႇယႃႉပႅတ်ႈဢေႃႈ။-

9ယိတ်ႈပရေႃးႁဵၵ်ႈ ဢၼ်ၸၢပ်ႈသႅင်ႇၵၼ်တင်းထႃႇၼႃႉတီႈသုင်တင်းလၢႆၸိူဝ်းၼၼ်ႉယင်းဢမ်ႇလႆႈသုတ်ႉၸပ်းသုတ်ႉၸူး ၵႃႈတီႈႁိမ်းယိတ်ႈပလၢင်ႇထႃႇဝရႃႉၽြႃး ၵႃႈတီႈဝဵင်း ယေႇရူႉသလႅမ်ႇ လႄႈ မီးဢၶႂၢင်ႉဢၼ်လႆႈၵိၼ်ၶဝ်ႈမုၼ်းဢၼ်ဢမ်ႇပႃးၸိူဝ်ႉပႅင်ႈ လူၺ်ႈၵၼ်တင်းပီႈၼွင်ႉၶဝ်ၵူၺ်းဢေႃႈ။-

10မၼ်းႁႂ်ႈၵူဝ်ႈၵိူၵ်ႇတီႈ တေႃးၽႅတ်ႉ ဢၼ်မီးၵႃႈၼႂ်းၶူင်ႈႁူၺ်ႈလုၵ်ႈၸၢႆး ႁိၼ်ႇၼုမ်ႇ ၼၼ်ႉ ႁႂ်ႈၽူႈလႂ်ဢမ်ႇလႆႈဢဝ်လုၵ်ႈၸၢႆးမၼ်း၊ လုၵ်ႈယိင်းမၼ်းပၼ်လႄႈ ႁႂ်ႈၶဝ်လႆႈၶၢမ်ႇတၢင်းဢၼ်ဢဝ်ၽႆးပုၵ်ႈၸေႃႇတီႈၽြႃး မူးလွၵ်ႉ ဢေႃႈ။-

11မႃႉဢၼ်ၶုၼ်ႁေႃၶမ်း ယူႉတႃႉ တင်းလၢႆ ဢဝ်ပုၵ်ႈၸေႃႇတီႈၵၢင်ဝၼ်းလႄႈ ဝႆႉၵႃႈတီႈႁူးၽၵ်းတူဝၢင်းႁိူၼ်းထႃႇဝရႃႉၽြႃး ၵႃႈတီႈႁိမ်းႁိူၼ်း ၼႃႇသမ်ႇမေႇလႅၵ်ႉ ၵေႃႉဢၼ်လႆႈပႂ်ႉလႆႈထိင်းၼၼ်ႉ ၵႃႈၼႂ်းဝၢင်းၸဝ်ႈၸိူဝ်းၼၼ်ႉၵေႃႈ၊ မၼ်းပႄႇပႅတ်ႈလႄႈ ဢဝ်လေႃႉရထႃးၵၢင်ဝၼ်းၸိူဝ်းၼၼ်ႉတုတ်ႇၽႆးပႅတ်ႈဢေႃႈ။-

12ယိတ်ႈပလၢင်ႇဢၼ်မီးၵႃႈၼိူဝ် ဢၼ်မုင်းႁၢၼ်ႉၼိူဝ်တိူၵ်ႈၶုၼ် ဢႃႇၶတ်ႉ လႄႈ၊ ၶုၼ်ႁေႃၶမ်း ယူႉတႃႉ ဢွၼ်ၵၼ်တႄႇဝႆႉႁဵတ်းဝႆႉၸိူဝ်းၼၼ်ႉ ဢိၵ်ႇတင်းယိတ်ႈပလၢင်ႇ ဢၼ် မၼႃႇသေႇ တႄႇဝႆႉႁဵတ်းဝႆႉ ၵႃႈၼႂ်းတမ်ႇတိူင်းႁိူၼ်းထႃႇဝရႃႉၽြႃးသွင်တီႈၼၼ်ႉၸိူဝ်းၼၼ်ႉၵေႃႈ၊ ၶုၼ်ႁေႃၶမ်းၵိူၼ်ႇယႃႉတူၵ်းလႄႈ တွႆႇလႅဝ်တမ်လႅဝ်သေလႄႈ ဢဝ်မုၼ်ႈမၼ်းၽွင်မၼ်း ပႅတ်ႈတူၵ်းသႂ်ႇၵႃႈၼႂ်းၼမ်ႉႁွင်ႈ ၵီႉတြုၼ်ႇ သေဢေႃႈ။-

13ထႃႇၼႃႉတီႈသုင်ဢၼ်မီးၵႃႈတီႈၽၢႆႇၼႃႈဝၼ်းဢွၵ်ႇဝဵင်း ယေႇရူႉသလႅမ်ႇ ၵႃႈတီႈၽၢႆႇတၢင်းၶႂႃလွႆ တၢင်းဢၼ်ယႃႉပႅတ်ႈ ဢၼ် သေႃးလမုၼ်ႇ ၶုၼ်ႁေႃၶမ်း ဢီႉသရေႇလႃႉ တႄႇႁဵတ်းပုၼ်ႈ ဢႃႇသတရိၵ်ႉ ၽြႃး ၸီႉတုၼ်ႇ ဢၼ်လီႁင်ႈဢဵတ်ႇသဵတ်ႇ၊ ၶႄးမူႉသႃႉ ၽြႃး မေႃႇၽႃႉ ဢၼ်လီႁင်ႈဢဵတ်ႇသဵတ်ႇ၊ မီႉလႃႉၵုမ်း ၽြႃး ဢမ်ႇမုၼ်ႇ ဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉၵေႃႈ ၶုၼ်ႁေႃၶမ်းႁဵတ်းႁႂ်ႈၵူဝ်ႈၵိူၵ်ႇသေဢေႃႈ။-

14မၼ်းႁၵ်းႁဵၵ်းသဝ်တီႈၵူဝ်းၵႂၢႆႇတင်းလၢႆပႅတ်ႈလႄႈၽၼ်းတူၼ်ႈ ဢႃႇသရႃႉ ၸိူဝ်းၼၼ်ႉလူမ်ႉပႅတ်ႈသေယဝ်ႉ၊ ႁႂ်ႈတီႈဢၼ်တႄႇႁဵတ်းၶဝ်ဝႆႉၸိူဝ်းၼၼ်ႉ တဵမ်ဝႆႉတင်းလုပ်ႇၵူၼ်းတၢႆတင်းလၢႆဢေႃႈ။-

15ယိတ်ႈပလၢင်ႇဢၼ်မီးၵႃႈတီႈဝဵင်း ပေႇသလႃႉ ဢိၵ်ႇတင်းထႃႇၼႃႉတီႈသုင်ဢၼ် ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ဢၼ်ႁႂ်ႈ မဵဝ်း ဢီႉသရေႇလႃႉ ၽိတ်းပိူင်ႈၼၼ်ႉ တႄႇႁဵတ်းဝႆႉဢၼ်ဝႃႈယိတ်ႈပလၢင်ႇ ဢိၵ်ႇတင်းထႃႇၼႃႉတီႈသုင်ၼၼ်ႉၵေႃႈ၊ မၼ်းၵိူၼ်ႇယႃႉတူၵ်းလႄႈ ဢဝ်ၽႆးတုတ်ႇထႃႇၼႃႉတီႈသုင်ၼၼ်ႉသေယဝ်ႉ၊ တွႆႇလႅဝ်တမ်လႅဝ်ပႅတ်ႈလႄႈ ဢဝ်ၽႆးတုတ်ႇတူၼ်ႈ ဢႃႇသရႃႉ တင်းလၢႆပႅတ်ႈဢေႃႈ။-

16ယူဝ်းသီႉယႃႉ ၼၼ်ႉ ဝၢႆႇၶိုၼ်းလႄႈထူပ်းႁၼ်သၢင်းၶႅင်းဢၼ်မီးၵႃႈၼိူဝ်လွႆၼၼ်ႉၸိူဝ်းၼၼ်ႉသေယဝ်ႉ၊ ပွႆႇၸႂ်ႉၵူၼ်းလႄႈဢဝ်လုပ်ႇၵူၼ်းတၢႆ ဢၼ်မီးၵႃႈၼႂ်းသၢင်းၶႅင်းၸိူဝ်းၼၼ်ႉဢွၵ်ႇသေလႄႈ ဢဝ်တုတ်ႇၽႆးၵႃႈၼိူဝ်ယိတ်ႈပလၢင်ႇလႄႈ ႁႂ်ႈၵူဝ်ႈၵိူၵ်ႇပႅတ်ႈၸွမ်းၵႃႈၼင်ႇၵႂၢမ်းထႃႇဝရႃႉၽြႃး ဢၼ်ၵူၼ်းၽြႃးပဵၼ်ၸဝ်ႈ ဢၼ်လႆႈဢဝ်လွင်ႈဢမူႉၼႆႉ ၽုၺ်ႇဢွၵ်ႇၼႄပျႃးၼၼ်ႉ သင်ႇလၢတ်ႈဝႆႉၼၼ်ႉဢေႃႈ။-

17မိူဝ်ႈၼၼ်ႉမၼ်းထၢမ်လႄႈဝႃႈ မၢၵ်ႇႁိၼ်တီႈမၢတ်ႈတီႈတွင်းဢၼ်ၵဝ်ႁၼ်ၼႆႉၸမ်ႉ၊ ပဵၼ်ၵႃႈသင်၊ ဝႃႈၼင်ႇၼႆသေယဝ်ႉ၊ ၵူၼ်းဝဵင်းၸိူဝ်းၼၼ်ႉ ၶိုၼ်းလဝ်ႊလၢတ်ႈလႄႈဝႃႈ၊ ပဵၼ်သၢင်းၶႅင်းၵူၼ်းၽြႃးပဵၼ်ၸဝ်ႈ ဢၼ်လုၵ်ႉသေၵႃႈတီႈမိူင်း ယူႉတႃႉ မႃးလႄႈ ၽုၺ်ႇဢွၵ်ႇၼႄပျႃးလွင်ႈတၢင်းဢၼ် ၸဝ်ႈႁဝ်းလႆႈႁဵတ်းတီႈယိတ်ႈပလၢင်ႇ ပေႇသလႃႉ ၼၼ်ႉၸိူဝ်းၼၼ်ႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

18မၼ်းလၢတ်ႈလႄႈဝႃႈ၊ ယႃႇမၼ်းတႃႉ။ ယႃႇပေႁႂ်ႈၽူႈလႂ်ဢဝ်လုပ်ႇၵေႃႉၼၼ်ႉၶၢႆႉတီႈမၼ်း၊ ဝႃႈၼင်ႇၼႆလႄႈ၊ ၶဝ်ၼၼ်ႉႁႂ်ႈလုပ်ႇမၼ်းၼၼ်ႉ ဢိၵ်ႇတင်းလုပ်ႇပရေႃးၽႅတ်ႈဢၼ်လုၵ်ႉသေၵႃႈတီႈဝဵင်း သမႃႇရီႉ မႃးၼၼ်ႉၸိူဝ်းၼၼ်ႉ ၵိုတ်းဝႆႉယူႇဢေႃႈ။-

19ႁိူၼ်းၵႃႈၼိူဝ်ထႃႇၼႃႉတီႈသုင် ၵႃႈတီႈဝၢၼ်ႈဝဵင်း သမႃႇရီႉ ဢၼ်ၶုၼ်ႁေႃၶမ်း ဢီႉသရေႇလႃႉ တင်းလၢႆ တႄႇႁဵတ်းဝႆႉ ႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉၸဝ်ႈၵႃႈမီးၼၼ်ႉၵေႃႈ ၶုၼ် ယူဝ်းသီႉယႃႉ ပႄႇၽဵဝ်ႈပႅတ်ႈလႄႈ ႁဵတ်းတီႈဢၼ်ၸိူဝ်းၼၼ်ႉ ၸွမ်းၵႃႈၼင်ႇဢၼ် မၼ်းႁဵတ်းၵႃႈတီႈဝဵင်း ပေႇသလႃႉ ၼၼ်ႉဢေႃႈ။-

20ယိတ်ႈပရေႃးႁဵၵ်ႈ ၵႃႈဢၼ်ၸၢပ်ႈသႅင်ႇၵၼ်တင်းထႃႇၼႃႉတီႈသုင်ၸိူဝ်းၼၼ်ႉၵေႃႈ မၼ်းဢဝ်တၢႆပႅတ်ႈၵႃႈၼိူဝ်ယိတ်ႈပလၢင်ႇၸိူဝ်းၼၼ်ႉလႄႈ ဢဝ်လုပ်ႇၵူၼ်းတၢႆတုတ်ႇၽႆးၵႃႈၼိူဝ်ယိတ်ႈပလၢင်ႇၸိူဝ်းၼၼ်ႉသေယဝ်ႉ ၸင်ႇၶိုၼ်းမႃးၵႃႈတီႈဝဵင်း ယေႇရူႉသလႅမ်ႇ ဢေႃႈ။

21လႆႈသမ်ႉ ၶုၼ်ႁေႃၶမ်းၵေႃႈမီးဢမိင်ႉတီႈၵူၼ်းတင်းသဵင်ႈတင်းလူင်လႄႈဝႃႈ၊ ဢွၼ်ၵၼ်ပႂ်ႉၵမ်ပႂ်ႉၸွမ်းပွႆးပႃႉသၶႃႇထႃႇဝရႃႉၽြႃး ၽြႃးပဵၼ်ၸဝ်ႈသူ ၸွမ်းၵႃႈၼင်ႇဢၼ်တႅမ်ႈဝႆႉမီးယူႇၵႃႈၼႂ်းၵျၢမ်းလိၵ်ႈပတီႉၺိၺ်ႇတြႃးၼႆႉတႃႉ၊ ဝႃႈၼင်ႇၼႆဢေႃႈ။-

22ၸႃႉၸဵမ်ၸူဝ်ႈပၢၼ်ၵူၼ်းလူင်ၸီႇယၢင်ႇတြႃး ဢၼ်ဢုပ်ႉပိူင်ႇမဵဝ်း ဢီႉသရေႇလႃႉ တင်းလၢႆၼၼ်ႉလႄႈ၊ ၸူဝ်ႈပၢၼ်ၶုၼ်ႁေႃၶမ်း ဢီႉသရေႇလႃႉ တင်းၶုၼ်ႁေႃၶမ်း ယူႉတႃႉ ၸိူဝ်းၼၼ်ႉတဵမ်တဵမ်၊ ဢမ်ႇပဵၼ်တၢင်းဢၼ်ပႂ်ႉၵမ်ပႂ်ႉၸွမ်းပွႆးပႃႉသၶႃႇၸိူဝ်ႉၼင်ႇၼၼ်သေပွၵ်ႈ။-

23ၼႂ်းပီႊဢၼ်ၶုၼ်လူင် ယူဝ်းသီႉယႃႉ ၸၢမ်ႇႁၢင်ႈၸၢမ်ႇႁေႃသိပ်းပၢႆပႅတ်ႇပီႊၼၼ်ႉ ၶဝ်ဢွၼ်ၵၼ်ပႂ်ႉၵမ်ပႂ်ႉၸွမ်းပွႆးပႃႉသၶႃႇၼၼ်ႉ တီႈထႃႇဝရႃႉၽြႃး ၵႃႈၼႂ်းဝဵင်း ယေႇရူႉသလႅမ်ႇ ဢေႃႈ။

24ၼွၵ်ႈသေၼၼ်ႉ ယူဝ်းသီႉယႃႉ ပႄႇၽဵဝ်ႈ ၸႃႉၸဵမ်ၽိူဝ်ႉၶဝ်လႂ်၊ ၽီၶဝ်လႂ်၊ ရုၵ်ႈထူႉ တေႇရပ်ႉ လႂ်လႄႈ ရုၵ်ႈထူႉသၢင်းထူႉတင်းလၢႆ ဢိၵ်ႇတင်းလွင်ႈတၢင်းဢၼ်လီႁင်ႈဢဵတ်ႇသဵတ်ႇ ၵႃႈဢၼ်ထူပ်းႁၼ်ၵႃႈၼႂ်းမိူင်း ယူႉတႃႉ တင်းဝဵင်း ယေႇရူႉသလႅမ်ႇ ၸိူဝ်းၼၼ်ႉပႅတ်ႈ ႁႂ်ႈလႆႈပႂ်ႉၵမ်ပႂ်ႉၸွမ်း ၵႃႈၼင်ႇၵႂၢမ်းတြႃးပိင်းၺၢပ်ႈတီႉ ဢၼ်တႅမ်ႈဝႆႉမီးယူႇၵႃႈၼႂ်းၵျၢမ်းလိၵ်ႈ ဢၼ်ယိတ်ႈပရေႃးႁဵၵ်ႈ ႁီႉလၶီႉ ထူပ်းႁၼ်ၵႃႈၼႂ်းႁိူၼ်းထႃႇဝရႃႉၽြႃးၼၼ်ႉဢေႃႈ။-

25ၶုၼ်ႁေႃၶမ်းဢၼ်ဢဝ်ႁူဝ်ၸႂ်သဵင်ႈသဵင်ႈ တင်းတၢင်းၵတ်ႉတၢင်းၶၼ်ၵႃႈမီး ၶၢႆႉပုတ်ႈမႃးၵႃႈတီႈထႃႇဝရႃႉၽြႃး ၸွမ်းၼင်ႇၵႃႈဢၼ်မီးၵႃႈၼႂ်းတြႃး မူဝ်းသေႇ ၼၼ်ႉလႄႈ မိူၼ်ၼင်ႇ ယူဝ်းသီႉယႃႉ ၼၼ်ႉ ဢမ်ႇယၢမ်ႈတွၼ်ႉမီးတွၼ်ႉပဵၼ်သေၸဝ်ႈသေပႃး။ လိုၼ်းမၼ်းၵေႃႈ ဢမ်ႇတွၼ်ႉပေႃႇဢမ်ႇတွၼ်ႉမီး။-

26ၼႂ်းဝႃႈၼၼ်သေၵေႃႈ ထႃႇဝရႃႉၽြႃးဢမ်ႇဝၢႆႇၶိုၼ်းသေၵႃႈတီႈတၢင်းၸႂ်မႆႈၶႆႈၸႃႉ ဢၼ်ႁႅင်းယႂ်ႇၼႃႇလူင်လၢင်လႄႈ၊ မၼ်းၸဝ်ႈ ၸႂ်မႆႈၶႆႈၸႃႉတီႈမဵဝ်း ယူႉတႃႉ ၵွပ်ႈပိူဝ်ႈဢပႅတ်ႈဢၼ် မၼႃႇသေႇ ၽိတ်းပိူင်ႈႁႂ်ႈလႆႈတိုၵ်းယူင်း တၢင်းၸႂ်မႆႈၶႆႈၸႃႉထႃႇဝရႃႉၽြႃးၸိူဝ်းၼၼ်ႉၼၼ်ႉ။-

27ထႃႇဝရႃႉၽြႃးမီးဢမိင်ႉလႄႈဝႃႈ၊ ၵဝ်တၵ်းပႄႇပႅတ်ႈမဵဝ်း ယူႉတႃႉ သေၵႃႈတီႈသိုဝ်ႈၼႃႈတႂ်ႈတႃၵဝ် မိူၼ်ၸိူဝ်ႉၼင်ႇဢၼ် ၵဝ်ပႄႇပႅတ်ႈမဵဝ်း ဢီႉသရေႇလႃႉ ၼၼ်ႉလႄႈ တၵ်းၸုၼ်ႉပႅတ်ႈဢၼ်ၵဝ်လိူၵ်ႈၵဵပ်းဢဝ်ၼႆႉ ဢၼ်ဝႃႈဝဵင်း ယေႇရူႉသလႅမ်ႇ ဢိၵ်ႇတင်းႁိူၼ်းၸဝ်ႈ ဢၼ်ၵဝ်လၢတ်ႈလႄႈဝႃႈ၊ ၼႃႇမႃႉၸိုဝ်ႈသဵင်ၵဝ်တၵ်းလႆႈတႄႇယူႇၵႃႈတီႈၼၼ်ႈဢေႃႈ၊ ဝႃႈၼင်ႇၼႆၼၼ်ႉဢေႃႈ၊ ဝႃႈၼင်ႇၼႆဢေႃႈ။

28လွင်ႈတၢင်း ယူဝ်းသီႉယႃႉ ဢၼ်ယင်းၵိုတ်းယင်းၵျၢၼ်ႇ ဢိၵ်ႇတင်းလွင်ႈတၢင်းၵႃႈဢၼ်မၼ်းႁဵတ်းၼၼ်ႉၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ ဢေႃႈ။-

29ၼႂ်းၸူဝ်ႈပၢၼ်မၼ်းၼၼ်ႉ ၽႃႇရေႃး ၼေႇၶေႃႇ ၶုၼ်ႁေႃၶမ်း ဢေႇၵိပ်ႉတူႉ ၶီႇသိုၵ်းၶိုၼ်ႈၸူးၶုၼ်ႁေႃၶမ်း ဢႃႇသူႉရီႉ တေႃႇထိုင်ႁွတ်ႈၼမ်ႉႁွင်ႈလူင် ဢူႉၽရတ်ႉ လႄႈ ၶုၼ်လူင် ယူဝ်းသီႉယႃႉ ဢွၵ်ႇၵႂႃႇ ႁႂ်ႈလႆႈႁႄႉတၢင်းမၼ်းၼၼ်ႉလႄႈ၊ ၼႂ်းမိူဝ်ႈဢၼ်ၶုၼ်ၼင်ႇၵၼ် ႁူပ်ႉထူပ်းၵၼ်ၼၼ်ႉယူႇၼၼ်ႉၸိုင် ၶုၼ်ၼၼ်ႉၶႃႈၽၼ်းဢဝ်မၼ်းတၢႆၵႃႈတီႈဝဵင်း မေႇၵိတ်ႉတေႃႇ သေဢေႃႈ။-

30ၶႃႈမၼ်းၵူၼ်းမၼ်းၸိူဝ်းၼၼ်ႉဢဝ်မၼ်းတၢင်ႇၵႃႈၼိူဝ် လေႃႉရထႃးၸဝ်ႈသေလႄႈ ဢွၼ်ၵၼ်လုၵ်ႉသေၵႃႈတီႈဝဵင်း မေႇၵိတ်ႉတေႃႇ ဢဝ်တူဝ်တၢႆမၼ်းၵႂႃႇၵႃႈတီႈဝဵင်း ယေႇရူႉသလႅမ်ႇ လႄႈ သၢင်းၵျူဝ်ႇၵႃႈၼႂ်းသၢင်းၶႅင်းမၼ်းဢေႃႈ။ ၵူၼ်းဝၢၼ်ႈၵူၼ်းမိူင်းတင်းလၢႆ ဢွၼ်ၵၼ်ဢဝ် ယေႃးၶတ်ႉ လုၵ်ႈၸၢႆးၸဝ်ႈ ယူဝ်းသီႉယႃႉ ၼၼ်ႉ ပၼ်ၽိၵ်ႈသိၵ်ႈသေလႄႈ ႁႂ်ႈမၼ်းပဵၼ်ၶုၼ်ႁေႃၶမ်း တၢင်တူဝ်ၸဝ်ႈပေႃႈမၼ်းဢေႃႈ။

31ယေႃးၶတ်ႉ ၼၼ်ႉ မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈသၢဝ်းပၢႆသၢမ်ပီႊလႄႈ မၼ်းဢုပ်ႉပိူင်ႇၸၢမ်ႇၸႃး ယူႇၵႃႈၼႂ်းဝဵင်း ယေႇရူႉသလႅမ်ႇ သၢမ်လိူၼ်ဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ႁႃႇမူႉတလႃႉ လုၵ်ႈယိင်း ယေႇရမီႉ ၵူၼ်းဝဵင်း လီႉပၼႃႉ ဢေႃႈ။-

32မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃး ၸွမ်းၵႃႈဢၼ်ပူႇမၼ်းမွၼ်ႇမၼ်းႁဵတ်းၼၼ်ႉဢေႃႈ။-

33ၽႃႇရေႃး ၼေႇၶေႃႇ ၼၼ်ႉ ဢဝ်မၼ်းတူၵ်းၵိၼ်းဝႆႉ ၵႃႈတီႈဝဵင်း ရီႉပလႃႉ မိူင်း ႁႃႇမတ်ႉ ႁႂ်ႈမၼ်းဢမ်ႇလႆႈၼင်ႈႁၢင်ႈၼင်ႈႁေႃ ၵႃႈၼႂ်းဝဵင်း ယေႇရူႉသလႅမ်ႇ ၼၼ်ႉသေလႄႈ ယွၼ်းဢဝ်ၶွၼ်ႇငိုၼ်းပၢၵ်ႇ တလၢၼ်ႇတၢၼ်ႇ ၊ ၶမ်း တလၢၼ်ႇတၢၼ်ႇ ၼိုင်ႈ ၵႃႈတီႈမိူင်း ယူႉတႃႉ ဢေႃႈ။-

34ၽႃႇရေႃး ၼေႇၶေႃႇ ၼၼ်ႉ ဢဝ် ဢေးလျႃႇၵိမ်ႇ လုၵ်ႈၸၢႆး ယူဝ်းသီႉယႃႉ ႁႂ်ႈၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်း ယူဝ်းသီႉယႃႉ လႄႈ တၢင်ႇပၼ်ၸိုဝ်ႈမႂ်ႇသဵင်မႂ်ႇ ယေႃးယၵိမ်း ဢေႃႈ။ မၼ်းၼၼ်ႉဢဝ် ယေႃးၶတ်ႉ ၵႂႃႇလႄႈ မၼ်းႁွတ်ႈထိုင် ၵႃႈတီႈမိူင်း ဢေႇၵိပ်ႉတူႉ သေယဝ်ႉ၊ တၢႆၵႃႈတီႈၼၼ်ႈဢေႃႈ။

35ယေႃးယၵိမ်း ၽႃႇဢဝ်ၵဵပ်းဢဝ်ငိုၼ်း ၵႃႈၼႂ်းမိူင်းတင်းမိူင်း ႁႂ်ႈလႆႈသၢၵ်ႈပၼ်ၸွမ်းၵႃႈၼင်ႇဢၼ် ဢမိင်ႉ ၽႃႇရေႃး မီးၼၼ်ႉလႄႈ လႆႈသၢၵ်ႈၶွၼ်ႇငိုၼ်းၶွၼ်ႇၶမ်းတီႈ ၽႃႇရေႃး ဢေႃႈ။ မၼ်းယွၼ်းဢဝ်ငိုၼ်းၶမ်းႁိပ်ႈၼႃႇမႆႈၼႃႇ တီႈၵူၼ်းဝၢၼ်ႈၵူၼ်းမိူင်းတင်းလၢႆ ၸွမ်းၵႃႈၼင်ႇ တၢင်းဢၼ်ၽႃႇဢဝ်ၵဵပ်းဢဝ်တူၵ်းႁင်းၽႂ်ႁင်းမၼ်း ႁႂ်ႈလႆႈသၢၵ်ႈပၼ်တီႈ ၽႃႇရေႃး ၼေႇၶေႃႇ ဢေႃႈ။-

36ယေႃးယၵိမ်း ၼၼ်ႉ၊ မိူဝ်ႈဢၼ် ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ ဢသၢၵ်ႈမၼ်းလႆႈသၢဝ်းပၢႆႁႃႈပီႊလႄႈ မၼ်းဢုပ်ႉပိူင်ႇၸၢမ်ႇၸႃး ယူႇၵႃႈၼႂ်းဝဵင်း ယေႇရူႉသလႅမ်ႇ သိပ်းပၢႆဢဵတ်းပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ၸေႇပူႉတႃႉ လုၵ်ႈယိင်း ပေႇတႃႇယႃႉ ၵူၼ်းဝဵင်း ရူးမႃႉ ဢေႃႈ။-

37မၼ်းႁဵတ်းတူႉၸရိူၵ်ႈ သိုဝ်ႈၼႃႈတႂ်ႈတႃ ထႃႇဝရႃႉၽြႃး ၸွမ်းၵႃႈၼင်ႇဢၼ် ပူႇမၼ်းမွၼ်ႇမၼ်းႁဵတ်းၼၼ်ႉဢေႃႈ။

← Chapter 22 Jump to: Chapter 24 →