2 Kings 19

Shan

← Chapter 18 Jump to: Chapter 20 →

1ၶုၼ်လူင် ႁေႇၸၵီႉ ငိၼ်းၵႂၢမ်းၼၼ်ႉသေယဝ်ႉ၊ ၸၵ်ႉသိၵ်ႇၶူဝ်းၼုင်ႈမၼ်းသေလႄႈ ဢဝ်ၶူဝ်းၼုင်ႈၼင်ပေႃၼုင်ႈမႆလႄႈၶဝ်ႈၵႂႃႇၵႃႈၼႂ်းပိၵ်ႈမၢၼ်ႇထႃႇဝရႃႉၽြႃးဢေႃႈ။-

2မၼ်းပွႆႇၸႂ်ႉ ဢေးလျႃႇၵိမ်ႇ ၵေႃႉဢၼ်ဢုပ်ႉၵႃႈၼိူဝ်ႁေႃၶမ်း ဢိၵ်ႇတင်းၸရေးလူင် သေႇပၼႃႉ ၊ ယိတ်ႈပရေႃးႁဵၵ်ႈဢၼ်ဢသၢၵ်ႈယႂ်ႇတင်းလၢႆ ဢၼ်ၼုင်ႈမႆၶူဝ်းၼုင်ႈၼင်ပေႃၸိူဝ်းၼၼ်ႉ ၵႂႃႇၵႃႈတီႈပရေႃးၽႅတ်ႈ ဢီႉသႃႇယႃႉ လုၵ်ႈၸၢႆး ဢႃႇမုတ်ႉ ၼၼ်ႉဢေႃႈ။-

3ၶဝ်ၼၼ်ႉလၢတ်ႈတီႈမၼ်းၼၼ်ႉလႄႈဝႃႈ၊ ၶုၼ်လူင် ႁေႇၸၵီႉ သင်ႇလၢတ်ႈမႃးလႄႈဝႃႈၸမ်ႉ၊ ဝၼ်းမိူဝ်ႈၼႆႉပဵၼ်ဝၼ်းတုၵ်ႉၶႃႉ၊ ဝၼ်းဢၼ်လႆႈၶၢမ်ႇတၢင်းဢၼ်သင်ႇသွၼ်သုင်းမႃႉ၊ ဝၼ်းဢၼ်လႆႈၶၢမ်ႇတၢင်းဢၼ်သႄႉဢၼ်သွမ်းဢေႃႈ။ ႁွတ်ႈထိုင်ၶိင်ႇဢၼ်ၵိူတ်ႇလဵင်ႉလုၵ်ႈလႄႈ ဢမ်ႇမီးႁႅင်းဢၼ်ႁႂ်ႈပေႃးၵိူတ်ႇလဵင်ႉလုၵ်ႈလႆႈ။-

4ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈမႂ်း ငိၼ်းၵႂၢမ်း ရႃႇပသႃႇၶႃႉ ဢၼ်ၸဝ်ႈမၼ်း ၶုၼ်ႁေႃၶမ်း ဢႃႇသူႉရီႉ ပွႆႇၸႂ်ႉမႃးႁႂ်ႈလႆႈသႄႉသွမ်းၽြႃးပဵၼ်ၸဝ်ႈ ဢၼ်ဢသၢၵ်ႈလိပ်းယူႇၼၼ်ႉတင်းသဵင်ႈတင်းလူင်သေလႄႈ ၵႄႈလိတ်ႈၵႂၢမ်းဢၼ် ထႃႇဝရႃႉၽြႃး ၽြႃးပဵၼ်ၸဝ်ႈမႂ်းငိၼ်းၼၼ်ႉသေၵမ်းလူၺ်ႈ။ မႂ်းၵေႃႈသူးတွင်းႁဵတ်းပထၼႃႇပုၼ်ႈၶဝ်ၸိူဝ်းဢၼ်ယင်းၵိုတ်းယင်းၵျၢၼ်ႇဝႆႉၼၼ်ႉသေၵမ်း၊ ဝႃႈၼင်ႇၼႆဢေႃႈ။-

5ၼင်ႇၼၼ်လႄႈ ၶႃႈၶုၼ်လူင် ႁေႇၸၵီႉ ၸိူဝ်းၼၼ်ႉ ႁွတ်ႈထိုင်ၵႃႈတီႈ ဢီႉသႃႇယႃႉ သေယဝ်ႉ၊-

6ဢီႉသႃႇယႃႉ ၶိုၼ်းလၢတ်ႈတီႈၶဝ်လႄႈဝႃႈ၊ ဢွၼ်ၵၼ်ၶိုၼ်းလဝ်ႊလၢတ်ႈတီႈၸဝ်ႈသူလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ယႃႇပေၵူဝ်ပေႁႄ ၵွပ်ႈပိူဝ်ႈၵႂၢမ်းဢၼ်မႂ်းလႆႈငိၼ်းလႄႈ ၶႃႈၶုၼ်ႁေႃၶမ်း ဢႃႇသူႉရီႉ သႄႉသွမ်းၵဝ်ၼၼ်ႉ။-

7ၵဝ်တၵ်းဢဝ်ၸႂ်သၽေႃးတၢင်ႇၸိူဝ်ႉတၢင်ႇဢၼ်သႂၢင်းသႂ်ႇပၼ်ၵႃႈၼႂ်းမၼ်းၼၼ်ႉလႄႈ၊ မၼ်းတၵ်းငိၼ်းသတၢင်းသဵင်ၶၢဝ်ႇသေလႄႈ ၶိုၼ်းမိူဝ်းၵႂႃႇၵႃႈတီႈမိူင်းတူဝ်ၸဝ်ႈၵဝ်ႇဢေႃႈ။ ၵဝ်တၵ်းႁႂ်ႈမၼ်းသုမ်းလူၺ်ႈလၢပ်ႇလူၺ်ႈလႅဝ်းၵႃႈၼႂ်းမိူင်းတီႈယူႇမၼ်းၼၼ်ႉဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

8မိူဝ်ႈၼၼ်ႉ ရႃႇပသႃႇၶႃႉ ၼၼ်ႉငိၼ်းလွင်ႈဢၼ် ၶုၼ်ႁေႃၶမ်း ဢႃႇသူႉရီႉ ဢွၵ်ႇသေၵႃႈတီႈဝဵင်း လႃႇၶီႉသႃႉ ၵႂႃႇၼၼ်ႉသေယဝ်ႉ၊ ၶိုၼ်းမိူဝ်းၵႂႃႇလႄႈ ႁူပ်ႉထူပ်းၶုၼ်ႁေႃၶမ်းၼၼ်ႉ တိုၵ်းတေႃးဝဵင်း လီႉပၼႃႉ ယူႇဢေႃႈ။-

9လိုၼ်းၼၼ်ႉၶုၼ်ႁေႃၶမ်းၼၼ်ႉ ငိၼ်းပိူၼ်ႈလဝ်ႊလၢတ်ႈလွင်ႈ တီႉရိၵ်ႉၵႃႉ ၶုၼ်လူင် ၵူႉသႃႉ ၼၼ်ႉလႄႈဝႃႈ၊ တူၺ်းတီႈၶႃႈလူး၊ မၼ်းၼၼ်ႉၶီႇသိုၵ်းမႃး ႁႂ်ႈလႆႈတိုၵ်းတေႃးၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းသမ်ႉပွႆႇၸႂ်ႉတမၢၼ်ႇတင်းလၢႆမႃးၵႃႈတီႈ ၶုၼ် ႁေႇၸၵီႉ လႄႈ သင်ႇလၢတ်ႈဝႃႈ၊-

10ၵႂၢမ်းဢၼ်သူတၵ်းလႆႈလၢတ်ႈတီႈ ႁေႇၸၵီႉ ၶုၼ်လူင် ယူႉတႃႉ ၼၼ်ႉၸမ်ႉ၊ ယႃႇပေႁႂ်ႈၽြႃးဢၼ်မႂ်းဢိင်ပိုင်ႈၼၼ်ႉပႅတ်ႉလႅၼ်မႂ်းလႄႈဝႃႈ၊ ဝဵင်း ယေႇရူႉသလႅမ်ႇ ဢမ်ႇလႆႈႁွတ်ႈထိုင်ၵႃႈၼႂ်းမိုဝ်းၶုၼ်ႁေႃၶမ်း ဢႃႇသူႉရီႉ ၵူၺ်ႉ၊ ဝႃႈၼင်ႇၼႆၼၼ်ႉသေၵမ်း။-

11တူၺ်းလူး၊ မႂ်းလႆႈငိၼ်းလွင်ႈဢၼ်ၶုၼ်ႁေႃၶမ်း ဢႃႇသူႉရီႉ တင်းလၢႆႁဵတ်းတီႈမိူင်းတင်းသဵင်ႈတင်းလူင်လႄႈ ယႃႉပႅတ်ႈမူတ်းမူတ်းသဵင်ႈသဵင်ႈယဝ်ႉၼၼ်ႉယဝ်ႉဢေႃႈ။ တူဝ်မႂ်းတၵ်းလွတ်ႈႁိုဝ်။-

12ၽြႃးၵူၼ်းၵူႈၸိူဝ်ႉၵူႈမဵဝ်းၸိူဝ်းၼၼ်ႉယၢမ်ႈၵႄႇသႄႇၼုၵ်ႈဢဝ်ၶဝ်ၸိူဝ်းဢၼ် ပူႇၵဝ်မွၼ်ႇၵဝ်ယႃႉပႅတ်ႈဢၼ်ဝႃႈ ၵူၼ်းမဵဝ်း ၵေႃးၸၼ်ႇ ၊ ၵူၼ်းမဵဝ်း ၶႃႇရၢၼ်ႇ ၊ ၵူၼ်းမဵဝ်း ရေႇၸပ်ႉ ၊ ၵူၼ်းမဵဝ်း ဢေႇတိၼ်ႇ ဢၼ်မီးၵႃႈတီႈဝဵင်း တေႇလၸႃႇ ၸိူဝ်းၼၼ်ႉယဝ်ႉႁိုဝ်။-

13ၶုၼ်လူင်ဝဵင်း ႁႃႇမတ်ႉ ၊ ၶုၼ်လူင်ဝဵင်း ဢႃႇပတ်ႉ ၊ ၶုၼ်လူင်ဢၼ်ဢုပ်ႉပိူင်ႇဝဵင်း သေႇၽရႃႉဝိမ်း ၊ ၶုၼ်လူင်ဝဵင်း ႁေႇၼႃႉ ၊ ၶုၼ်လူင်ဝဵင်း ဢီႉဝႃႇ ၸိူဝ်းၼၼ်ႉမီးၵႃႈလႂ်၊ ဝႃႈၼင်ႇၼႆဢေႃႈ။-

14လိၵ်ႈၼၼ်ႉၸိုင် ႁေႇၸၵီႉ ႁပ်ႉၶၢမ်ႇဢဝ် ၵႃႈတီႈမိုဝ်းတမၢၼ်ႇၸိူဝ်းၼၼ်ႉလႄႈ ၽတ်းသေယဝ်ႉ၊ ႁေႇၸၵီႉ ၶိုၼ်ႈၸူးၵႃႈတီႈပိၵ်ႈမၢၼ်ႇထႃႇဝရႃႉၽြႃးလႄႈ ဢဝ်ၽႄႇၵီႈဝႆႉၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

15မိူဝ်ႈၼၼ်ႉၶုၼ်လူင် ႁေႇၸၵီႉ သူးတွင်းၵႃႈတီႈၽၢႆႇၼႃႈထႃႇဝရႃႉၽြႃးလႄႈဝႃႈၸမ်ႉ၊ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢၼ်ၼင်ႈယူႇၵႃႈၼိူဝ် ၶေႇရူႉၽဵမ်ႇ ၼၼ်ႉတီႈၶႃႈ၊ ၸဝ်ႈႁဝ်းပဵၼ်ၽြႃးပဵၼ်ၸဝ်ႈတီႈၶႃႈဢေႃႈ။ ၸဝ်ႈႁဝ်းသူႇလဵဝ်ပႃးလဵဝ်ၵူၺ်း ပဵၼ်ၽြႃးပဵၼ်ၸဝ်ႈၵူႈသိုင်ႇၵူႈမိူင်း ၵႃႈဢၼ်မီးယူႇၵႃႈၼိူဝ်လိၼ်မိူင်းၼႆႉတီႈၶႃႈဢေႃႈ။ ၸဝ်ႈႁဝ်းႁဵတ်းပဵၼ်ၽႃႉၵၢင်ႁၢဝ်တင်းလိၼ်မိူင်းတီႈၶႃႈဢေႃႈ။-

16ထႃႇဝရႃႉၽြႃးတီႈၶႃႈ၊ ၶႅၼ်းတေႃႈႁေႈႁူၸဝ်ႈႁဝ်းလႄႈ ထွမ်ႇငိၼ်းသေၵမ်းတီႈၶႃႈ။ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈၽုၺ်ႇတႃမိုၼ်းတႃၸဝ်ႈႁဝ်းလႄႈ လူတူၺ်းသေၵမ်းတီႈၶႃႈ။ ထွမ်ႇငိၼ်းၵႂၢမ်း သၼႃႇၶရိပ်ႉ ဢၼ်ပွႆႇၸႂ်ႉမၼ်းၼႆႉမႃး ႁႂ်ႈလႆႈသႄႉသွမ်းၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇၼၼ်ႉသေၵမ်းတီႈၶႃႈ။-

17ထႃႇဝရႃႉၽြႃးတီႈၶႃႈ၊ ၶုၼ်ႁေႃၶမ်း ဢႃႇသူႉရီႉ ၸိူဝ်းၼၼ်ႉ ယႃႉၵူၼ်းၵူႈသိုင်ႇၵူႈမိူင်း ဢိၵ်ႇတင်းၼမ်ႉၶဝ်လိၼ်ၶဝ်ပႅတ်ႈ ဢမၢၼ်ႇၶၼ်ပဵၼ်လႄႈ၊-

18ဢဝ်ၽြႃးၶဝ်တင်းလၢႆထိမ်ႈတူၵ်းသႂ်ႇၵႃႈၼႂ်းၽႆးတီႈၶႃႈယဝ်ႉ။ ၵွပ်ႈပိူဝ်ႈဢၼ်ၸိူဝ်းၼၼ်ႉဢမ်ႇပဵၼ်ၽြႃး။ ပဵၼ်မႆႉတင်းမၢၵ်ႇႁိၼ် ဢၼ်ၵူၼ်းဢဝ်မိုဝ်းႁဵတ်းၼၼ်ႉလႄႈ ၶဝ်ၼၼ်ႉလႆႈယႃႉၶဝ်ပႅတ်ႈတီႈၶႃႈယဝ်ႉ။-

19တေႃႈလဵဝ်ၼႆႉထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၶႃႈတီႈၶႃႈ၊ လွင်ႈၼင်ႇႁိုဝ်ၵူႈသိုင်ႇၵူႈမိူင်း ၵႃႈဢၼ်မီးၵႃႈၼိူဝ်လိၼ်မိူင်းၼႆႉၸိူဝ်းၼၼ်ႉ တၵ်းႁူႉလွင်ႈဢၼ်ၸဝ်ႈႁဝ်းထႃႇဝရႃႉၽြႃးဢၼ်ဝႃႈ ၸဝ်ႈႁဝ်းသူႇလဵဝ်ပႃးလဵဝ်ၵူၺ်း ပဵၼ်ၽြႃးပဵၼ်ၸဝ်ႈၸိုင်၊ ၶႅၼ်းတေႃႈၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းၶဝ် ဢွၵ်ႇသေၵႃႈၼႂ်းမိုဝ်းၶုၼ်ၼၼ်ႉသေၵမ်းတီႈၶႃႈ။ ၶႃႈၸဝ်ႈတွင်းပၢၼ်ႇတီႈၶႃႈဢေႃႈ၊ ဝႃႈၼင်ႇၼႆဢေႃႈ။

20မိူဝ်ႈၼၼ်ႉ ဢီႉသႃႇယႃႉ လုၵ်ႈၸၢႆး ဢႃႇမုတ်ႉ ၼၼ်ႉ ပွႆႇၸႂ်ႉၸူးၵႃႈတီႈၶုၼ် ႁေႇၸၵီႉ လႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉလႄႈဝႃႈၸမ်ႉ၊ ၵွပ်ႈပိူဝ်ႈဢၼ်မႂ်းႁဵတ်းပထၼႃႇတီႈၵဝ် လူၺ်ႈလွင်ႈ သၼႃႇၶရိပ်ႉ ၶုၼ်ႁေႃၶမ်း ဢႃႇသူႉရီႉ ၼၼ်ႉလႄႈ ၵဝ်ထွမ်ႇဢဝ်ၵႂၢမ်းမႂ်းယဝ်ႉ။-

21ၵႂၢမ်းဢၼ်ထႃႇဝရႃႉၽြႃးမီးဢမိင်ႉလူၺ်ႈလွင်ႈမၼ်းၼၼ်ႉၸမ်ႉ၊ ၵၼ်ႇၺႃႇလုၵ်ႈယိင်းသၢဝ် ၸီႉဢုၼ်ႇ ႁဵတ်းဢမ်ႇပေႃးၼင်ႇႁိုဝ်တီႈမႂ်းလႄႈ ႁဵတ်းပျၢၵ်ႈၶူဝ်မႂ်းယူႇဢေႃႈ။ လုၵ်ႈယိင်းဝဵင်း ယေႇရူႉသလႅမ်ႇ ငွၵ်းႁူဝ်ၶွၼ်းႁူဝ်တေႃႇမႂ်းဢေႃႈ။-

22မႂ်းသႄႉသွမ်းလႄႈလႃႇလင်ၽူႈလႂ်။ မႂ်းဢဝ်သဵင်မႂ်းသႅၼ်ႇႁွင်ႉႁႃၽူႈလႂ်လႄႈ မိုၼ်းတႃပူၵ်းပႅၼ်ၽႅၼ်သုင်ယူႇ။ တေႃႈၵႃႈ ၽြႃးဢၼ်မူတ်းၸၢင်ႇမဵဝ်း ဢီႉသရေႇလႃႉ ၼၼ်ႉ မႂ်းယင်းႁဵတ်းတေႃႇယူႇလူင်ပႄႇ။-

23မႂ်းဢဝ်တမၢၼ်ႇမႂ်းၸိူဝ်းၼၼ်ႉ သႄႉသွမ်းထႃႇဝရႃႉၽြႃးလႄႈလၢတ်ႈလႄႈဝႃႈ၊ ၵဝ်ပႃးဢဝ်လေႃႉရထႃးၵဝ်ၼမ်ၼႃႇသေလႄႈ ၶိုၼ်ႈၵႃႈၼိူဝ်ပၢႆၸိၵ်းလွႆတင်းလၢႆ၊ ၵႃႈၼိူဝ်ပဵမ်ႉလွႆ လေႇပၼုၼ်ႇ ၸိူဝ်းၼၼ်ႉယဝ်ႉ။ ၵဝ်ပမ်ႈတူၼ်ႈ ဢႃႇရိတ်ႉ မၼ်းဢၼ်သုင်ဢၼ်ယၢဝ်းတင်းလၢႆဢိၵ်ႇတင်းတူၼ်ႈမႆႉပႅၵ်ႇမၼ်းဢၼ်လီၼႃႇၸိူဝ်းၼၼ်ႉလူမ်ႉယဝ်ႉ။ ၵဝ်ၶဝ်ႈႁွတ်ႈၶဝ်ႈထိုင်ၵႃႈၼႂ်းတီႈဢၼ်သွၼ်ႈဢၼ်ပိုင်ႈ ဢၼ်လိုၵ်ႉၼႃႇသေပိူၼ်ႈ ၵႃႈတီႈတီႈထိူၼ်ႇမၼ်းဢၼ်မီးမၢၵ်ႇမီးဝၢၵ်ႇလိူင်ႇၼမ်ၼႃႇၼၼ်ႉယဝ်ႉ။-

24ၵဝ်လႆႈၶုတ်းၶုမ်ၶုတ်းလုၵ်းလႄႈ ၵိၼ်ၼမ်ႉဢၼ်ဢမ်ႇတွၼ်ႉယၢမ်ႈလႆႈၸိမ်းတူၺ်းၼၼ်ႉယဝ်ႉ။ ၵဝ်တၵ်းဢဝ်တင်းၽႃႇတိၼ်ၵဝ်ႁႂ်ႈၼမ်ႉၵႃႈဢၼ်မီးၵႃႈၼႂ်းၼမ်ႉႁွင်ႈၼမ်ႉၵႄးမိူင်း ဢေႇၵိပ်ႉတူႉ ၸိူဝ်းၼၼ်ႉႁႅင်ႈႁွင်ၵႂႃႇဢေႃႈ၊ ဝႃႈၼင်ႇၼႆလူင်ပႄႇ။-

25မႂ်းဢမ်ႇလႆႈငိၼ်းလွင်ႈဢၼ် ၵဝ်ၸီႇယၢင်ႇဢမူႉၼႆႉမိူဝ်ႈဢွၼ်တၢင်းၼၼ်ႉ ဢိၵ်ႇတင်းလွင်ႈဢၼ်ၵဝ်ပွင်မႄးဝႆႉမိူဝ်ႈဢွၼ်ၼႆႉၼၼ်ႉႁိုဝ်။ မိူဝ်ႈလဵဝ်ၼႆႉၵေႃႈ ၵဝ်ၸီႇယၢင်ႇဝႆႉႁႂ်ႈမႂ်းပဵၼ် ၵေႃႉဢၼ်ယႃႉၽဵဝ်ႈဝဵင်းဢၼ်မၼ်ႈၶိူင်ႇတင်းလၢႆပႅတ်ႈလႄႈ ႁႂ်ႈပဵၼ်ၵွင်မၢၵ်ႇႁိၼ်ဝႆႉၼၼ်ႉယဝ်ႉ။-

26ပိူဝ်ႈၼႆလႄႈၵူၼ်းဝဵင်းၸိူဝ်းၼၼ်ႉ ႁႅင်းလဵၵ်ႉႁႅင်းၵေႇလႄႈ မီးတၢင်းဢၼ်ၵႂင်ၸႂ်ယုင်ႈၸႂ်လႄႈ ၸႂ်လူႉယူႇဢေႃႈ။ ၶဝ်ပဵၼ်ၸိူဝ်ႉၼင်ႇ တူၼ်ႈယိူဝ်ႈယႃႈၵႃႈၼႂ်းထိူၼ်ႇ တင်းတူၼ်ႈၶဝ်ႈဢၼ်ၶဵဝ်ၼၼ်ႉ ဢိၵ်ႇတင်းၸိူဝ်ႉၼင်ႇတူၼ်ႈယိူဝ်ႈဢၼ်ဢွၵ်ႇၵႃႈၼိူဝ်မုင်းႁိူၼ်း တင်းတူၼ်ႈၶဝ်ႈဢၼ်တၢႆ ၸူဝ်ႈဢၼ်ဢမ်ႇပႆႇတၼ်းယႂ်ႇတၼ်းထူၼ်ႈၼၼ်ႉဢေႃႈ။-

27ၵဝ်ႁူႉတၢင်းဢၼ်မႂ်းၼင်ႈ၊ တၢင်းဢၼ်မႂ်းၶဝ်ႈမႂ်းဢွၵ်ႇ၊ တၢင်းဢၼ်မႂ်းၸႂ်မႆႈၶႆႈၸႃႉႁွင်ႉႁိုတ်းတီႈၵဝ်ၸိူဝ်းၼၼ်ႉယူႇဢေႃႈ။-

28ၵွပ်ႈပိူဝ်ႈတၢင်းဢၼ်မႂ်းၸႂ်မႆႈၶႆႈၸႃႉ ႁွင်ႉႁိုတ်းတီႈၵဝ်၊ တၢင်းဢၼ်မႂ်းၸွၵ်ႇၵႃးၸႂ်သုင်ၼၼ်ႉ ၶိုၼ်ႈႁွတ်ႈၶိုၼ်ႈထိုင်ၵႃႈၼႂ်းႁူၵဝ်ၼၼ်ႉလႄႈ ၵဝ်တၵ်းဢဝ်သၢႆလင်သူၼ်သႂ်ႇၵႃႈတီႈၶူႈလင်မႂ်းလႄႈ ဢဝ်ၵၵ်ႉဢုမ်ႇသႂ်ႇၵႃႈၼႂ်းသူပ်းမႂ်းသေလႄႈ ႁႂ်ႈမႂ်းၶိုၼ်းမိူဝ်းၵႂႃႇၸွမ်းသဵၼ်ႈတၢင်းဢၼ်မႂ်းမႃးၼၼ်ႉဢေႃႈ။

29ၼီႉမိၵ်ႈလၢၵ်ႈၶၼႃႇဢၼ်မႂ်းတၵ်းလႆႈမၢတ်ႈတွင်းဝႆႉၸမ်ႉ၊ သူတၵ်းလႆႈၵိၼ်မၢၵ်ႇႁူင်းဢၼ်ယႂ်ႇၵႄႇမႃးၵူၺ်းမၼ်းၼၼ်ႉပီႊၼႆႉ ဢိၵ်ႇတင်းဢၼ်ဢွၵ်ႇပဵၼ်မႃးမိူၼ်ၸိူဝ်ႉၼင်ႇၼၼ်ၼႂ်းပီႊတူႉတီႉယႃႉၼၼ်ႉဢေႃႈ။ ၼႂ်းပီႊတႃႉတီႉယႃႉၼၼ်ႉ ဝၢၼ်ႇၸိူဝ်ႉဝၢၼ်ႇၽၼ်းလႄႈ ပၢတ်ႇၶဝ်ႈတႃႉ။ သူၼ်ဢူးယဵၼ်ႇၸပိတ်ႈၵေႃႈၽုၵ်ႇလႄႈၵိၼ်မၢၵ်ႇမၼ်းတႃႉ။-

30ၵူၼ်းမဵဝ်း ယူႉတႃႉ ဢၼ်လွတ်ႈၽေးလႄႈၵိုတ်းၵျၢၼ်ႇဝႆႉၸိူဝ်းၼၼ်ႉ တၵ်းသမ်ႉယင်ႇႁၢၵ်ႈၵႃႈတႂ်ႈလႄႈမၢၵ်ႇမၢၵ်ႇၵႃႈၼိူဝ်လူးၵွၼ်ႇဢေႃႈ။-

31ၶဝ်ၸိူဝ်းဢၼ်ၵိုတ်းၵျၢၼ်ႇဝႆႉၼၼ်ႉ တၵ်းပေႃႇမႃးၵႃႈၼႂ်းဝဵင်း ယေႇရူႉသလႅမ်ႇ လႄႈ၊ ၶဝ်ၸိူဝ်းဢၼ်လွတ်ႈၽေးၼၼ်ႉ တၵ်းပေႃႇမႃးၵႃႈတီႈလွႆ ၸီႉဢုၼ်ႇ ဢေႃႈ။ ဢလူဝ်း၊ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးၼၼ်ႉ ႁႅင်းယႂ်ႇၼႃႇလူင်လၢင်လႄႈ ၸီႇယၢင်ႇႁဵတ်းဢမူႉၼၼ်ႉဢေႃႈ။-

32ပိူဝ်ႈၼႆလႄႈ ထႃႇဝရႃႉၽြႃးမီးဢမိင်ႉလူၺ်ႈလွင်ႈၶုၼ်ႁေႃၶမ်း ဢႃႇသူႉရီႉ လႄႈဝႃႈၸမ်ႉ၊ မၼ်းၼၼ်ႉဢမ်ႇလႆႈၶဝ်ႈၵႃႈၼႂ်းဝဵင်းၼႆႉ၊ ဢမ်ႇလႆႈယိုဝ်းပိုၼ်ၶဝ်ႈၵႃႈၼႂ်းဝဵင်း။ ဢမ်ႇလႆႈၼႄပျႃးၶိူင်ႈဢၼ်ႁႄႉလၢၵ်ႈၼၢၵ်ႈ ၵႃႈတီႈၽၢႆႇၼႃႈဝဵင်း။ ဢမ်ႇလႆႈၵေႃႇလႆႈၵွင်တႅၼ်ႈလိၼ်ၵႃႈတီႈၼွၵ်ႈဝဵင်း။-

33မၼ်းတၵ်းလႆႈၶိုၼ်းမိူဝ်းၵႂႃႇၸွမ်းသဵၼ်ႈတၢင်းဢၼ်မၼ်းမႃးၼၼ်ႉဢေႃႈ။ မၼ်းဢမ်ႇလႆႈၶဝ်ႈၵႃႈၼႂ်းဝဵင်းၼႆႉ။ ထႃႇဝရႃႉၽြႃးမီးဢမိင်ႉဢေႃႈ။-

34ၵဝ်တၵ်းထွၵ်ႈလူၺ်ႈၼႃႈၵဝ်တင်းၼႃႈၶႃႈၵဝ် တႃႇဝိတ်ႈ ၼၼ်ႉသေလႄႈ မုင်းႁူမ်ႇဝဵင်းၼႆႉယူႇႁႂ်ႈလႆႈၵႄႇသႄႇၶျွတ်ႈဢဝ်ဝဵင်းၼႆႉဢေႃႈ၊ ဝႃႈၼင်ႇၼႆဢေႃႈ။

35ၼႂ်းၶိုၼ်းၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃး ဢွၵ်ႇလႄႈပၼ်တၢမ်ႇ ဢဝ်ၵူၼ်းၼႂ်းတပ်ႉ ဢႃႇသူႉရီႉ တၢႆ သႅၼ်ၼိုင်ႈပႅတ်ႇမိုၼ်ႇပၢႆႁႃႈႁဵင်လႄႈ မိူဝ်ႈဢၼ်ထိုင်ၶိင်ႇဢၼ်ၵူၼ်းလုၵ်ႉၵၢင်ၼႂ်ၸဝ်ႉၸဝ်ႉၼၼ်ႉၸိုင်၊ ၶဝ်ၼၼ်ႉပဵၼ်တူဝ်တၢႆၵႂႃႇတင်းသဵင်ႈတင်းလူင်ဢေႃႈ။-

36ၼင်ႇၼၼ်လႄႈ သၼႃႇၶရိပ်ႉ ၶုၼ်ႁေႃၶမ်း ဢႃႇသူႉရီႉ ၼၼ်ႉ လုၵ်ႉဢွၵ်ႇသေၵႃႈတီႈၼၼ်ႈလႄႈ ၵႂႃႇသေယဝ်ႉ၊ ၶိုၼ်းမိူဝ်းလႄႈ ယူႇၵႃႈတီႈဝဵင်း ၼီႉၼေႇဝူၺ်ႇ ဢေႃႈ။-

37လိုၼ်းၼၼ်ႉ ၼႂ်းမိူဝ်ႈဢၼ်မၼ်းယင်းတိုၵ်ႉၵူဝ်းၵႂၢႆႇၵႃႈၼႂ်းပိၵ်ႈမၢၼ်ႇ ၼီႉသရွၵ်ႉ ၽြႃးမၼ်းၼၼ်ႉယူႇၼၼ်ႉၸိုင်၊ လုၵ်ႈၸၢႆးမၼ်း ဢႃႇတြမ်ႇမလႅၵ်ႉ တင်း သရေႇၸႃႇ ၸိူဝ်းၼၼ်ႉ ဢဝ်မၼ်းတၢႆလူၺ်ႈလၢပ်ႇလူၺ်ႈလႅဝ်းသေလႄႈ ဢွၵ်ႇပၢႆႈၵႂႃႇၵႃႈတီႈမိူင်း ဢႃႇရရတ်ႉ ဢေႃႈ။ လုၵ်ႈၸၢႆးမၼ်း ဢေႇသရႃႇႁတ်ႉတုၼ်ႇ ၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

← Chapter 18 Jump to: Chapter 20 →