2 Kings 2

Shan

← Chapter 1 Jump to: Chapter 3 →

1မိူဝ်ႈဢၼ်ၸမ်ၶိင်ႇဢၼ်ထႃႇဝရႃႉၽြႃး တၵ်းဢဝ်တင်းလူမ်းၽိဝ်ႇႁုင်ယွင်ႈဢဝ် ဢေးလီႉယႃႉ ၶိုၼ်ႈၵႃႈၼိူဝ်ၵၢင်ႁၢဝ်ၼၼ်ႉၸိုင်၊ ဢေးလီႉယႃႉ ၼၼ်ႉ ၵႂႃႇၵႃႈတီႈဝဵင်း ၵီႉလႃႉၵႃႇလႃႉ ႁူမ်ႈလူၺ်ႈၵၼ်တင်း ဢေးလီႉသႄး ဢေႃႈ။-

2ဢေးလီႉယႃႉ ၵေႃႈလၢတ်ႈတီႈ ဢေးလီႉသႄး လႄႈဝႃႈ၊ မႂ်းၵိုတ်းယူႇၵႃႈတီႈၼႆႈတႃႉ၊ ထႃႇဝရႃႉၽြႃးပွႆႇၸႂ်ႉၵဝ်ၵႂႃႇ ၵႃႈတီႈဝဵင်း ပေႇသလႃႉ ပုၼ်ႉဢေႃႈ၊ ဝႃႈၼင်ႇၼႆသေယဝ်ႉ၊ ဢေးလီႉသႄး ၶိုၼ်းလၢတ်ႈလႄႈဝႃႈ၊ ၵႃႈၼင်ႇဢၼ်ဢသၢၵ်ႈထႃႇဝရႃႉၽြႃးယင်းလိပ်းယူႇ၊ ၵႃႈၼင်ႇဢၼ်ၸဝ်ႈႁဝ်းဢသၢၵ်ႈယင်းလိပ်းယူႇၼၼ်ႉ၊ ၵဝ်ၶႃႈဢမ်ႇၽၢတ်ႇယၢၼ်ၵၼ်တင်းၸဝ်ႈႁဝ်းၶႃႈၵူၺ်ႉ၊ ဝႃႈၼင်ႇၼႆသေလႄႈ၊ သွင်ၶႃဢွၼ်ၵၼ်လူင်းၸူးၵႃႈတီႈ ဝဵင်း ပေႇသလႃႉ ဢေႃႈ။-

3ၵူၼ်းမဵဝ်းပရေႃးၽႅတ်ႈဢၼ်မီးၵႃႈတီႈဝဵင်း ပေႇသလႃႉ ၸိူဝ်းၼၼ်ႉ ဢွၼ်ၵၼ်ဢွၵ်ႇမႃးႁႂ်ႈလႆႈႁပ်ႉႁူဝ်တၢင်း ဢေးလီႉသႄး လႄႈထၢမ်ဝႃႈ၊ ၸဝ်ႈႁူႉလွင်ႈဢၼ်ထႃႇဝရႃႉၽြႃး တၵ်းၼုၵ်ႈဢဝ်ၸဝ်ႈ ၸဝ်ႈႁဝ်းၽၢတ်ႇသေၵႃႈၼိူဝ်ႁူဝ်ၸဝ်ႈႁဝ်းၵႂႃႇ ဝၼ်းမိူဝ်ႈၼႆႉၼၼ်ႉၶႃႈႁိုဝ်။ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ၸႂ်ႈယဝ်ႉ၊ ၵဝ်ႁူႉယူႇဢေႃႈ။ ဢွၼ်ၵၼ်ယူႇတဵတ်ႇတဵတ်ႇယူႇတႃႉ၊ ဝႃႈၼင်ႇၼႆဢေႃႈ။-

4ဢေးလီႉယႃႉ ၵေႃႈလၢတ်ႈတီႈမၼ်းလႄႈဝႃႈ၊ ဢေးလီႉသႄး ဢိူၺ်း၊ မႂ်းၵိုတ်းယူႇၵႃႈတီႈၼႆႈတႃႉ။ ထႃႇဝရႃႉၽြႃးပွႆႇၸႂ်ႉၵဝ်ၵႂႃႇ ၵႃႈတီႈဝဵင်း ယေႇရီႉၶူဝ်း ပုၼ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၶိုၼ်းလၢတ်ႈလႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇ၊ ၵႃႈၼင်ႇဢၼ်ၸဝ်ႈႁဝ်းဢသၢၵ်ႈလိပ်းယူႇၼၼ်ႉ ၵဝ်ၶႃႈဢမ်ႇၽၢတ်ႇယၢၼ်ၵၼ်တင်းၸဝ်ႈႁဝ်းၶႃႈ၊ ဝႃႈၼင်ႇၼႆသေလႄႈ၊ သွင်ၶႃဢွၼ်ၵၼ်ၵႂႃႇၵႃႈတီႈဝဵင်း ယေႇရီႉၶူဝ်း ဢေႃႈ။-

5ၵူၼ်းမဵဝ်းပရေႃးၽႅတ်ႈဢၼ်မီးၵႃႈတီႈဝဵင်း ယေႇရီႉၶူဝ်း ၸိူဝ်းၼၼ်ႉ ဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈ ဢေးလီႉသႄး လႄႈထၢမ်ဝႃႈ၊ ၸဝ်ႈႁူႉလွင်ႈဢၼ်ထႃႇဝရႃႉၽြႃး တၵ်းၼုၵ်ႈဢဝ်ၸဝ်ႈ ၸဝ်ႈႁဝ်းၽၢတ်ႇသေၵႃႈၼိူဝ်ႁူဝ်ၸဝ်ႈႁဝ်းၵႂႃႇ ဝၼ်းမိူဝ်ႈၼႆႉၼၼ်ႉၶႃႈႁိုဝ်။ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ၸႂ်ႈယဝ်ႉ၊ ၵဝ်ႁူႉယူႇဢေႃႈ။ ဢွၼ်ၵၼ်ယူႇတဵတ်ႇတဵတ်ႇတႃႉ၊ ဝႃႈၼင်ႇၼႆဢေႃႈ။-

6ဢေးလီႉယႃႉ ၵေႃႈလၢတ်ႈတီႈမၼ်းလႄႈဝႃႈ၊ မႂ်းၵိုတ်းယူႇၵႃႈတီႈၼႆႈတႃႉ၊ ထႃႇဝရႃႉၽြႃးပွႆႇၸႂ်ႉၵဝ်ၵႂႃႇ ၵႃႈတီႈၼမ်ႉႁွင်ႈ ယေႃးတၢၼ်ႇ ပုၼ်ႉဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၶိုၼ်းလၢတ်ႈလႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇ၊ ၵႃႈၼင်ႇဢၼ် ၸဝ်ႈႁဝ်းဢသၢၵ်ႈလိပ်းယူႇၼၼ်ႉ၊ ၵဝ်ၶႃႈဢမ်ႇၽၢတ်ႇယၢၼ်ၵၼ်တင်းၸဝ်ႈႁဝ်းၶႃႈ၊ ဝႃႈၼင်ႇၼႆသေလႄႈ၊ သွင်ၶႃၵႂႃႇလူၺ်ႈၵၼ်ဢေႃႈ။-

7ၵူၼ်းမဵဝ်းပရေႃးၽႅတ်ႈႁႃႈသိပ်းဢွၼ်ၵၼ်ၵႂႃႇလႄႈ ၸုၵ်းယူႇၵႃႈတီႈဢၼ်ၵႆၵၼ်တင်းသွင်ၶႃၼၼ်ႉဢေႃႈ။ သွင်ၶႃၼၼ်ႉၸုၵ်းယူႇၵႃႈတီႈႁိမ်းၼမ်ႉႁွင်ႈ ယေႃးတၢၼ်ႇ ဢေႃႈ။-

8ဢေးလီႉယႃႉ ဢဝ်ၽႃႈဝႆမၼ်းၵဵၼ်ႁမ်းသေလႄႈ ပေႃႉယႅၼ်ႉသႂ်ႇၼမ်ႉလႄႈ ၼမ်ႉၼၼ်ႉတႅၵ်ႇဢႃႈပဵၼ်သွင်ၽၢၵ်ႇၵႂႃႇလႄႈ သွင်ၶႃၼၼ်ႉပႆၵႃႈၼိူဝ်လိၼ်ႁႅင်ႈၶၢမ်ႈၵႂႃႇဢေႃႈ။

9မိူဝ်ႈဢၼ်ၶၢမ်ႈၼမ်ႉႁွင်ႈၼၼ်ႉၵႂႃႇယဝ်ႉၼၼ်ႉၸိုင်၊ ဢေးလီႉယႃႉ လၢတ်ႈတီႈ ဢေးလီႉသႄး လႄႈဝႃႈ၊ ၸူဝ်ႈဢၼ်ၵဝ်ဢမ်ႇပႆႇလႆႈၶၢမ်ႇတၢင်းဢၼ်ၼုၵ်ႈဢဝ်သေၵႃႈတီႈမႂ်းၵႂႃႇၼၼ်ႉၸိုင်၊ ယွၼ်းဢဝ်သူးဢၼ်ၵဝ်တၵ်းလႆႈႁဵတ်းပုၼ်ႈမႂ်းတႃႉ၊ ဝႃႈၼင်ႇၼႆသေယဝ်ႉ၊ ဢေးလီႉသႄး ယွၼ်းလႄႈဝႃႈ၊ ႁႂ်ႈဝီႉၺိၺ်ႇသွင်ပုၼ်ႈၸဝ်ႈႁဝ်းၼၼ်ႉမီးၵႃႈၼိူဝ်ၵဝ်ၶႃႈသေၵမ်းလူၺ်ႈ။ မိူဝ်ႈဢၼ်ဝႃႈၼင်ႇၼႆၸိုင်၊-

10မၼ်းၼၼ်ႉလၢတ်ႈလႄႈဝႃႈ၊ မႂ်းယွၼ်းဢဝ်သူးဢၼ်လႆႈယၢပ်ႇၼႃႇၼၼ်ႉဢေႃႈ။ ၵူၺ်းၵႃႈပေႃးမႂ်းလႆႈႁၼ်ၵဝ်ၽၢတ်ႇယၢၼ်ၵၼ်တင်းမႂ်းၵႂႃႇၸိုင် မႂ်းတၵ်းလႆႈဢေႃႈ။ ပေႃးဢမ်ႇၼၼ်ဢမ်ႇလႆႈၵူၺ်ႉ၊ ဝႃႈၼင်ႇၼႆဢေႃႈ။-

11ၼႂ်းမိူဝ်ႈဢၼ်သွင်ၶႃၸွမ်းတၢင်းၵႂႃႇလႄႈလၢတ်ႈတေႃႇၵၼ်ယူႇၸိူဝ်ႉၼင်ႇၼၼ်ယူႇၼၼ်ႉ၊ လေႃႉရထႃးၽႆးဢိၵ်ႇတင်းမႃႉၽႆးတင်းလၢႆၽုတ်းၽၢတ်းပေႃႇမႃးလႄႈ ဢဝ်သွင်ၶႃၽၢတ်ႇယၢၼ်ၵၼ်သေယဝ်ႉ၊ ဢေးလီႉယႃႉ ၼၼ်ႉၶိုၼ်ႈၵႂႃႇၵႃႈၼိူဝ်ၵၢင်ႁၢဝ်လူၺ်ႈလူမ်းၽိဝ်ႇႁုင်သေဢေႃႈ။-

12ဢေးလီႉသႄး တူၺ်းႁၼ်ဢၼ်ၼၼ်ႉလႄႈႁွင်ႉသႅၼ်ႇလႄႈဝႃႈ၊ ပေႃႈၵဝ်ဢိူၺ်း၊ ပေႃႈၵဝ်ဢိူၺ်း၊ လေႃႉရထႃး ဢီႉသရေႇလႃႉ ဢိၵ်ႇတင်းမႃႉလေႃႉရထႃး ဢီႉသရေႇလႃႉ လူင်ပႄႇ၊ ဝႃႈၼင်ႇၼႆသေလႄႈ၊ လိုၼ်းၼၼ်ႉမၼ်းဢမ်ႇလႆႈႁၼ် ဢေးလီႉယႃႉ ။ မၼ်းယိပ်းၵမ်ၶူဝ်းၼုင်ႈမၼ်းသေလႄႈ၊ သိၵ်ႇၶၢတ်ႇပဵၼ်သွင်ပွတ်းၵႂႃႇဢေႃႈ။-

13မၼ်းၵဵပ်းဢဝ်ၽႃႈဝႆ ဢေးလီႉယႃႉ ဢၼ်တူၵ်းသေၵႃႈတီႈမၼ်းၼၼ်ႉမႃးၼၼ်ႉလႄႈ ၶိုၼ်းမိူဝ်းၵႂႃႇသေယဝ်ႉ၊ ၸုၵ်းယူႇၵႃႈတီႈႁိမ်းၼမ်ႉႁွင်ႈ ယေႃးတၢၼ်ႇ သေလႄႈ၊-

14ဢဝ်ၽႃႈဝႆ ဢေးလီႉယႃႉ ဢၼ်တူၵ်းသေၵႃႈတီႈမၼ်းၼၼ်ႉမႃးၼၼ်ႉပေႃႉယႅၼ်ႉသႂ်ႇၼမ်ႉလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈ ဢေးလီႉယႃႉ ၼၼ်ႉမီးၵႃႈလႂ်၊ ဝႃႈၼင်ႇၼႆသေလႄႈ၊ မိူဝ်ႈဢၼ်မၼ်းပေႃႉယႅၼ်ႉသႂ်ႇၼမ်ႉယဝ်ႉၼၼ်ႉၸိုင်၊ ၼမ်ႉတႅၵ်ႇဢႃႈပဵၼ်သွင်ၽၢၵ်ႇၵႂႃႇ လႄႈ၊ ဢေးလီႉသႄး ၶၢမ်ႈၵႂႃႇဢေႃႈ။-

15ၵူၼ်းမဵဝ်းပရေႃးၽႅတ်ႈ ဢၼ်ယူႇၵႃႈတီႈဝဵင်း ယေႇရီႉၶူဝ်း လႄႈ ၸွမ်းလူၸွမ်းတူၺ်းၸိူဝ်းၼၼ်ႉ ႁၼ်မၼ်းသေယဝ်ႉ၊ လၢတ်ႈၵၼ်လႄႈဝႃႈ၊ ဝီႉၺိၺ်ႇ ဢေးလီႉယႃႉ ၼၼ်ႉ၊ ၵိင်းဝၢပ်ႈယူႇၵႃႈၼိူဝ် ဢေးလီႉသႄး ဢေႃႈ၊ ဝႃႈၼင်ႇၼႆသေလႄႈ ဢွၼ်ၵၼ်ၵႂႃႇႁႂ်ႈလႆႈႁပ်ႉႁူဝ်တၢင်းမၼ်းလႄႈ ၶုပ်ႉမူပ်ႇၵႃႈၼိူဝ်လိၼ်ၵႃႈတီႈၽၢႆႇၼႃႈမၼ်းဢေႃႈ။

16ၶဝ်ၼၼ်ႉၵေႃႈဢွၼ်ၵၼ်လၢတ်ႈလႄႈဝႃႈ၊ တီႈၶႃႈၸဝ်ႈႁဝ်းၶဝ်မီးၶဝ်ၸိူဝ်းဢၼ်ႁႅင်းယႂ်ႇႁႃႈသိပ်းၶႃႈဢေႃႈ။ ၶႅၼ်းတေႃႈပၼ်ဢၶႂၢင်ႉ ႁႂ်ႈၶဝ်လႆႈၵႂႃႇႁႃၸဝ်ႈ ၸဝ်ႈႁဝ်းၼၼ်ႉသေၵမ်း။ ၵူဝ်ဝီႉၺိၺ်ႇထႃႇဝရႃႉၽြႃးယုၵ်ႉယွင်ႈဢဝ်မၼ်းၼၼ်ႉၵႂႃႇသေလႄႈ ၶျႃးမၼ်းဝႆႉၵႃႈတီႈၼိူဝ်လွႆသေတီႈသေဢၼ်၊ ဢမ်ႇၼၼ်ၵေႃႈၵႃႈတီႈၼႂ်းၶူင်ႈႁူၺ်ႈ သေတီႈသေဢၼ်ၶႃႈဢေႃႈ၊ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ယႃႇပေပွႆႇၸႂ်ႉ၊ ဝႃႈၼင်ႇၼႆသေၵေႃႈ၊-

17ၶဝ်ၼၼ်ႉဢွၼ်ၵၼ်ယွၼ်းဢၶႂၢင်ႉၼႃႇလူင်လၢင်တေႃႇထိုင်ႁွတ်ႈႁႂ်ႈၸႂ်မၼ်းထၼ်ႈပေႃးဢူၵ်းဢၢႆၼၼ်ႉလႄႈ၊ မၼ်းလၢတ်ႈလႄႈဝႃႈ ပွႆႇၸႂ်ႉတႃႉ၊ ဝႃႈၼင်ႇၼႆဢေႃႈ။ ၶဝ်ၼၼ်ႉပွႆႇၸႂ်ႉၵူၼ်းႁႃႈသိပ်းၵႂႃႇလႄႈ ဢွၼ်ၵၼ်ႁႃသၢမ်ဝၼ်းတဵမ်တဵမ်လႄႈ ဢမ်ႇထူပ်းဢမ်ႇႁၼ်။-

18ၶဝ်ဢွၼ်ၵၼ်ၶိုၼ်းမႃးၼႂ်းမိူဝ်ႈဢၼ်မၼ်းယင်းမီးယူႇၵႃႈၼႂ်းဝဵင်း ယေႇရီႉၶူဝ်း ၼၼ်ႉလႄႈ၊ မၼ်းလၢတ်ႈတီႈၶဝ်လႄႈဝႃႈ၊ ၵဝ်လၢတ်ႈလႄႈဝႃႈ၊ ယႃႇပေၵႂႃႇ၊ ဝႃႈၼင်ႇၼႆဢမ်ႇၸႂ်ႈႁိုဝ်။ ဝႃႈၼင်ႇၼႆဢေႃႈ။

19ၵူၼ်းဝဵင်းၼၼ်ႉၸိူဝ်းၼၼ်ႉ ဢွၼ်ၵၼ်လဝ်ႊလၢတ်ႈတီႈ ဢေးလီႉသႄး လႄႈဝႃႈ၊ တူၺ်းၶႃႈလူး၊ တီႈဢၼ်တႄႇႁဵတ်းဝဵင်းၼႆႉၸိုင် ပဵၼ်တီႈဢၼ်သႃႇယႃႇလီငၢမ်း ၵႃႈၼင်ႇဢၼ်ၸဝ်ႈႁဝ်းႁၼ်ယူႇၼႆႉတီႈၶႃႈဢေႃႈ။ ၵူၺ်းၵႃႈၼမ်ႉဢမ်ႇလီၶႃႈ၊ လိၼ်ၵေႃႈၸၢင်ႈႁႂ်ႈ ပတိၵ်ႉသၼ်ႇထေႇတူဝ်ၸဝ်ႈၵဝ်ႇလူႉၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

20မၼ်းလၢတ်ႈလႄႈဝႃႈ၊ ဢွၼ်ၵၼ်ဢဝ်ၼမ်ႉတဝ်ႈဢၼ်မႂ်ႇလုၵ်ႈၼိုင်ႈ သႂ်ႇၵိူဝ်သေလႄႈမႃးတႃႉ၊ ဝႃႈၼင်ႇၼႆလႄႈ၊ ၶဝ်ဢွၼ်ၵၼ်ဢဝ်မႃးတီႈမၼ်းဢေႃႈ။-

21မၼ်းဢွၵ်ႇၸူးၵႃႈတီႈၼမ်ႉဢွၵ်ႇႁူးလႄႈ ဢဝ်ၵိူဝ်သႂ်ႇသေလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၵဝ်ႁႂ်ႈၼမ်ႉၼႆႉဝၢၼ်ဢေႃႈ။ ဢဝ်ၼႆႉၵႂႃႇၼႃႈ ဢမ်ႇလႆႈမီးတၢင်းဢၼ်ႁႂ်ႈတၢႆ၊ တၢင်းဢၼ်ႁႂ်ႈပတိၵ်ႉသၼ်ႇထေႇလူႉ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆလႄႈ၊-

22ၼမ်ႉၼၼ်ႉပဵၼ်ဢၼ်ဝၢၼ်ဢၼ်လီ တေႃႇထိုင်ႁွတ်ႈဝၼ်းမိူဝ်ႈၼႆႉၸွမ်းၵႃႈၼင်ႇဢၼ်ဢမိင်ႉၸဝ်ႈဢၼ် ဢေးလီႉသႄး သင်ႇလၢတ်ႈဝႆႉၼၼ်ႉဢေႃႈ။

23မၼ်းလုၵ်ႉသေၵႃႈတီႈဝဵင်းၼၼ်ႉၶိုၼ်ႈၸူးၵႃႈတီႈဝဵင်း ပေႇသလႃႉ လႄႈ ၼႂ်းမိူဝ်ႈဢၼ်မၼ်းယင်းတိုၵ်ႉၵႂႃႇတၢင်းပႆတၢင်းယူႇၼၼ်ႉ လုၵ်ႈဢွၼ်ႇတင်းလၢႆဢွၼ်ၵၼ်ဢွၵ်ႇသေၵႃႈၼႂ်းဝဵင်းၼၼ်ႉမႃးလႄႈ ႁဵတ်းပျၢၵ်ႈတီႈမၼ်းလႄႈဝႃႈ၊ ဢၢႆႈႁူဝ်ၵဵင်ႈဢိူၺ်း၊ ၶိုၼ်ႈတိၵ်းတိၵ်းတႃႉ၊ ဢၢႆႈႁူဝ်ၵဵင်ႈဢိူၺ်း၊ ၶိုၼ်ႈတိၵ်းတိၵ်းတႃႉ၊ ဝႃႈၼင်ႇၼႆဢေႃႈ။-

24မၼ်းဝၢႆႇတူၺ်းၶိုၼ်းလႄႈႁၼ်ၶဝ်သေယဝ်ႉ၊ ဢဝ်ၼႃႇမႃႉၸိုဝ်ႈသဵင်ထႃႇဝရႃႉၽြႃး ၵိၼ်ႇဝႃႈတီႈၶဝ်လႄႈ၊ မီမႄႈသွင်တူဝ်ဢွၵ်ႇသေၵႃႈၼႂ်းထိူၼ်ႇမႃးလႄႈ ၶူပ်းလုၵ်ႈဢွၼ်ႇၸိူဝ်းၼၼ်ႉတၢႆသီႇသိပ်းပၢႆသွင်ၵေႃႉဢေႃႈ။-

25မၼ်းလုၵ်ႉသေၵႃႈတီႈဝဵင်းၼၼ်ႉၵႂႃႇၸူးၵႃႈတီႈလွႆ ၵရမေႇလႃႉ လႄႈ သမ်ႉလုၵ်ႉသေၵႃႈတီႈလွႆၼၼ်ႉမိူဝ်းၵႂႃႇၵႃႈတီႈဝဵင်း သမႃႇရီႉ ဢေႃႈ။

← Chapter 1 Jump to: Chapter 3 →