2 Kings 7

Shan

← Chapter 6 Jump to: Chapter 8 →

1ဢေးလီႉသႄး လၢတ်ႈလႄႈဝႃႈ၊ ဢွၼ်ၵၼ်ထွမ်ႇငိၼ်းၵႂၢမ်းထႃႇဝရႃႉၽြႃးတႃႉ။ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ဝၼ်းမိူဝ်ႈၽုၵ်ႈမိူဝ်ႈၶိင်ႇၼႆႉၼၼ်ႉ တၵ်းဢွၼ်ၵၼ်ၶၢႆၽွင်ၶဝ်ႈမုၼ်းၵျုင်ႇယေႈသီႇပႄႇ ငိုၼ်းယေႈၵျၢပ်ႈ သၶေးလႃႉ ၊ ၶဝ်ႈသၢၼ်မူႉယေႃးယေႈၶႂၢႆးယေႈၵျၢပ်ႈ သၶေးလႃႉ ၵႃႈတီႈႁူးၽၵ်းတူဝဵင်း သမႃႇရီႉ ဢေႃႈ၊ ဝႃႈၼင်ႇၼႆဢေႃႈ။-

2ဢမၢတ်ႈဢၼ်လႆႈၶၢမ်ႇတၢင်းဢၼ်ၶုၼ်ႁေႃၶမ်းဢိင်ၼၼ်ႉ ၶိုၼ်းလၢတ်ႈတီႈၵူၼ်းၽြႃးပဵၼ်ၸဝ်ႈလႄႈဝႃႈ၊ တူၺ်းလူး၊ ပေႃးထႃႇဝရႃႉၽြႃးၽုၺ်ႇႁူးလၢင်းတဵၼ်ၽႃႉၵၢင်ႁၢဝ်ၸိုင်၊ ၸၢင်ႈၶႄးတၵ်းပဵၼ်ၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ တူၺ်းလူး၊ မႂ်းၼႆႉတၵ်းလႆႈဢဝ်တင်းမၢၵ်ႇတႃမႂ်းႁၼ်ယူႇဢေႃႈ။ ၵူၺ်းၵႃႈ မႂ်းတၵ်းဢမ်ႇလႆႈၵိၼ်၊ ဝႃႈၼင်ႇၼႆဢေႃႈ။

3မိူဝ်ႈၼၼ်ႉၵူၼ်းတုတ်ႈ ဢၼ်ၼင်ႈယူႇၵႃႈတီႈႁူးၽၵ်းတူဝဵင်းသီႇၵေႃႉၼၼ်ႉ တိူင်ႇပၢင်ႇၵၼ်လႄႈဝႃႈ၊ ႁဝ်းၼႆႉၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တၵ်းလႆႈၼင်ႈယူႇၵႃႈတီႈၼႆႈတေႃႇထိုင်ႁွတ်ႈထၼ်ႈပေႃးတၢႆၼင်ႇႁိုဝ်။-

4ပေႃးႁဝ်းၶဝ်ႈၵႃႈၼႂ်းဝဵင်းၸိုင်၊ ၵွပ်ႈပိူဝ်ႈဢၼ်ပဵၼ်တၢင်းဢၼ် တၢင်းၵိၼ်တၢင်းၶူပ်းၵႃႈပႅင်းလႄႈႁဝ်းတၵ်းလႆႈတၢႆၵႃႈတီႈၼၼ်ႈဢေႃႈ။ ပေႃးႁဝ်းၼင်ႈယူႇၵႃႈတီႈၼႆႈၵေႃႈႁဝ်းတၵ်းလႆႈတၢႆဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ ဢွၼ်ၵၼ်ၵႂႃႇၶဝ်ႈယူႇၽၢႆႇတပ်ႉ သူႉရီႉ ၼၼ်ႉတႃႉႁဝ်း။ ပေႃးၶဝ်ၼၼ်ႉပၼ်ဢသၢၵ်ႈႁဝ်းလိပ်းၵေႃႈ ႁဝ်းတၵ်းလႆႈလိပ်းဢေႃႈ။ ပေႃႈၶဝ်ဢဝ်ႁဝ်းတၢႆၵေႃႈတၵ်းပဵၼ်ဢၼ်တၢႆၵူၺ်းၼင်ႇၵဝ်ႇဢေႃႈ၊ ဝႃႈၼင်ႇၼႆသေယဝ်ႉ၊-

5ၶဝ်ဢွၼ်ၵၼ်လုၵ်ႉၶိင်ႇၼႃႈႁူဝ်ၶမ်ႈလႄႈ ၵႂႃႇၸူးၵႃႈတီႈတပ်ႉ သူႉရီႉ ဢေႃႈ။ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈယၼ်ႇႁူဝ်တပ်ႉၼၼ်ႉၸိုင်၊ ၶဝ်ဢမ်ႇထူပ်းဢမ်ႇႁၼ်ၽူႈလႂ်သေၵေႃႉသေၵူၼ်း။-

6လွင်ႈမၼ်းၸမ်ႉထႃႇဝရႃႉၽြႃးႁဵတ်းႁႂ်ႈတပ်ႉၵူၼ်း သူႉရီႉ ၸိူဝ်းၼၼ်ႉ၊ လႆႈငိၼ်းသဵင်ၵူၼ်းသိုၵ်းၶီႇလေႃႉရထႃး ၵူၼ်းသိုၵ်းၶီႇမႃႉ ဢၼ်ဝႃႈသဵင်ပူဝ်ႇပႃႇဢၼ်ယႂ်ႇၼမ်ၼႃႇၼၼ်ႉသေလႄႈ၊ ၶဝ်ၵေႃႉၼိုင်ႈလႄႈၵေႃႉၼိုင်ႈ လၢတ်ႈၵၼ်လႄႈဝႃႈ၊ တူၺ်းလူး၊ ၶုၼ်ႁေႃၶမ်း ဢီႉသရေႇလႃႉ ၼၼ်ႉ ၸၢင်ႈငႃဢဝ်ၶုၼ် ႁိတ်ႉတီႉ ဢိၵ်ႇတင်း ၶုၼ် ဢေႇၵိပ်ႉတူႉ တင်းလၢႆမႃးတိုၵ်းတေႃးႁဝ်းယဝ်ႉ၊ ဝႃႈၼင်ႇၼႆသေလႄႈ

7ဢွၼ်ၵၼ်လုၵ်ႉၶိင်ႇၼႃႈႁူဝ်ၶမ်ႈၼၼ်ႉလႄႈ၊ ၸုၼ်ႉပႅတ်ႈသုမ်ႉၶဝ်၊ မႃႉၶဝ်၊ လီႈၶဝ်၊ ဢၼ်ဝႃႈ တပ်ႉၶဝ် ၵႃႈၼင်ႇဢၼ်မီးဝႆႉၼၼ်ႉသေလႄႈ ဢွၵ်ႇပၢႆႈႁႂ်ႈဢသၢၵ်ႈၶဝ်လႆႈလွတ်ႈဢေႃႈ။-

8ၵူၼ်းတုတ်ႈၸိူဝ်းၼၼ်ႉႁွတ်ႈထိုင်ၵႃႈတီႈယၼ်ႇႁူဝ်တပ်ႉၼၼ်ႉသေယဝ်ႉ၊ ၶဝ်ႈၵႃႈၼႂ်းသုမ်ႉလင်ၼိုင်ႈသေလႄႈ ၵိၼ်ၶူပ်းယဝ်ႉလႄႈဢွၼ်ၵၼ်ဢဝ်ငိုၼ်းၶမ်းၶိူင်ႈၼုင်ႈတၢင်းမႆ ၵႂႃႇသိူင်ႇမႅပ်ႉဝႆႉဢေႃႈ။ ၶဝ်သမ်ႉၶိုၼ်းမႃးသေလႄႈ ၶဝ်ႈၵႃႈၼႂ်းသုမ်ႉတၢင်ႇလင်လႄႈ၊ ၵႃႈတီႈၼၼ်ႈၵေႃႈ ၶဝ်သမ်ႉဢဝ်ဢုၵ်ႉၸႃႇၵႂႃႇသိူင်ႇမႅပ်ႉဝႆႉဢေႃႈ။-

9ၵမ်းၼၼ်ႉ ၶဝ်လၢတ်ႈၵၼ်လႄႈဝႃႈ၊ ႁဝ်းၼႆႉဢမ်ႇႁဵတ်းဢၼ်လီဢၼ်ငၢမ်းလူင်ပႄႇ။ ဝၼ်းမိူဝ်ႈၼႆႉပဵၼ်ဝၼ်းဢၼ်မွၵ်ႇလၢတ်ႈသတၢင်းသဵင်ၶၢဝ်ႇဢၼ်လီလႄႈ ႁဝ်းယင်းဢမ်ႇမွၵ်ႇလၢတ်ႈလႄႈယူႇလူင်ပႄႇ။ ပေႃးႁဝ်းယူႇတေႃႇထိုင်ႁွတ်ႈမိူင်းလႅင်းၸိုင်၊ ဢမူႉသေၸိူဝ်ႉသေပိူင်တၵ်းႁွတ်ႈထိုင်ၵႃႈၼိူဝ်ႁဝ်းဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ ႁဝ်းဢွၼ်ၵၼ်ၵႂႃႇလႄႈ မွၵ်ႇလၢတ်ႈတီႈၵူၼ်းႁၢင်ႈၵူၼ်းႁေႃၸဝ်ႈတႃႉႁဝ်း၊ ဝႃႈၼင်ႇၼႆသေယဝ်ႉ၊-

10ၶဝ်ၵႂႃႇလႄႈ ႁွင်ႉသႅၼ်ႇတီႈၵူၼ်းပႂ်ႉၼွၵ်ႈၽၵ်းတူဝဵင်းသေလႄႈ လၢတ်ႈတီႈၶဝ်ၼၼ်ႉလႄႈဝႃႈ၊ ႁဝ်းႁွတ်ႈထိုင်ၵႃႈတီႈတပ်ႉၵူၼ်း သူႉရီႉ ယဝ်ႉလႄႈ ဢမ်ႇထူပ်းဢမ်ႇႁၼ်ၽူႈလႂ်သေၵေႃႉသေၵူၼ်း။ ဢမ်ႇငိၼ်းသဵင်ၵူၼ်း။ ထူပ်းႁၼ်မႃႉလႂ်၊ လီႈလႂ်မတ်ႉၽုၵ်ႇဝႆႉယူႇသေလႄႈ သုမ်ႉတင်းလၢႆၵေႃႈ မီးဝႆႉယူႇပဵၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇဢေႃႈ၊ ဝႃႈၼင်ႇၼႆလႄႈ၊-

11ၵူၼ်းပႂ်ႉၽၵ်းတူၸိူဝ်းၼၼ်ႉၵေႃႈ ႁွင်ႉသႅၼ်ႇလႄႈ မွၵ်ႇလၢတ်ႈလွင်ႈမၼ်းတီႈၵူၼ်းႁၢင်ႈၵူၼ်းႁေႃၸဝ်ႈၵႃႈၼႂ်းဝဵင်းဢေႃႈ။

12ၶုၼ်ႁေႃၶမ်းလုၵ်ႉၶိင်ႇၵၢင်ၶိုၼ်းလႄႈလၢတ်ႈတီႈၶႃႈမၼ်းၵူၼ်းမၼ်းလႄႈဝႃႈ၊ ၵဝ်တၵ်းလၢတ်ႈပၼ်လွင်ႈဢၼ်ၵူၼ်း သူႉရီႉ ၸိူဝ်းၼၼ်ႉ ၶႂ်ႈႁဵတ်းၸိူဝ်ႉၼင်ႇႁိုဝ်တီႈႁဝ်းၼၼ်ႉဢေႃႈ။ ၵွပ်ႈပိူဝ်ႈဢၼ်ၶဝ်ႁူႉလွင်ႈဢၼ်ႁဝ်းဢိုပ်းယၢၵ်ႈၼၼ်ႉလႄႈ ၶဝ်ဢွၵ်ႇၵႃႈၼွၵ်ႈတပ်ႉလႄႈ တဵတ်ႇမႅပ်ႉယူႇၵႃႈၼႂ်းထိူၼ်ႇသေလႄႈဝႃႈ၊ မိူဝ်ႈဢၼ်ၶဝ်ဢွၵ်ႇၵႃႈၼွၵ်ႈဝဵင်းမႃးၼၼ်ႉ၊ ႁဝ်းတၵ်းတီႉၵမ်ဢဝ်တူဝ်လိပ်းၶဝ်သေလႄႈ ၶဝ်ႈၵႃႈၼႂ်းဝဵင်းဢေႃႈ၊ ဝႃႈၼင်ႇၼႆဢေႃႈ၊ ဝႃႈၼင်ႇၼႆသေယဝ်ႉ၊-

13ၶႃႈၵူၼ်းမၼ်းၵေႃႉၼိုင်ႈ လဝ်ႊလၢတ်ႈလႄႈဝႃႈ၊ ႁႂ်ႈလႆႈဢဝ်မႃႉႁႃႈတူဝ် ဢၼ်ၵိုတ်းဢၼ်ၵျၢၼ်ႇဝႆႉၵႃႈၼႂ်းဝဵင်းၼႆႉၼၼ်ႉသေၵမ်းတီႈၶႃႈ။ မႃႉၸိူဝ်းၼၼ်ႉၸမ်ႉ၊ ပဵၼ်ၸိူဝ်ႉၼင်ႇမူႇၽုင်မုၵ်ႉၸိူဝ်း ၵူၼ်းမဵဝ်း ဢီႉသရေႇလႃႉ ၵႃႈဢၼ်ယင်းၵိုတ်းယင်းၵျၢၼ်ႇ ၵႃႈၼႂ်းဝဵင်းၼႆႉၸိူဝ်းၼၼ်ႉတီႈၶႃႈဢေႃႈ။ ပဵၼ်ၸိူဝ်ႉၼင်ႇမူႇၽုင်မုၵ်ႉၸိူဝ်း ၵူၼ်းမဵဝ်း ဢီႉသရေႇလႃႉ ဢၼ်ႁွတ်ႈထိုင်တၢင်းလူႉတၢင်းလႅဝ်ၼၼ်ႉတီႈၶႃႈဢေႃႈ။ ႁႂ်ႈၶႃႈၸဝ်ႈႁဝ်းၶဝ်လႆႈပွႆႇၸႂ်ႉလႄႈတူၺ်းသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊-

14ၶဝ်ဢွၼ်ၵၼ်ဢဝ်လေႃႉရထႃးသွင်လင်တင်းမႃႉမၼ်းသေယဝ်ႉ၊ ၶုၼ်ႁေႃၶမ်းပွႆႇၸႂ်ႉၵႂႃႇၸွမ်းတူၺ်း မုၵ်ႉၸိူဝ်းၵူၼ်း သူႉရီႉ ၸိူဝ်းၼၼ်ႉလႄႈဝႃႈ၊ ဢွၼ်ၵၼ်ၵႂႃႇလႄႈ လူတူၺ်းတႃႉ၊ ဝႃႈၼင်ႇၼႆလႄႈ၊-

15ၶဝ်ဢွၼ်ၵၼ်ၸွမ်းၵႂႃႇတေႃႇထိုင်ႁွတ်ႈၼမ်ႉႁွင်ႈ ယေႃးတၢၼ်ႇ ဢေႃႈ။ ၵႃႈၼႂ်းသဵၼ်ႈတၢင်းၵႃႈဢၼ်ၵႂႃႇၼၼ်ႉ တဵမ်ဝႆႉတင်းၶူဝ်းၼုင်ႈတၢင်းမႆ ဢိၵ်ႇတင်းၶိူင်ႈပိူင်ဢၼ်ၵူၼ်း သူႉရီႉ ၸိူဝ်းၼၼ်ႉပႅတ်ႈဝႆႉၼႂ်းမိူဝ်ႈဢၼ် ၶဝ်ၼႅတ်ႈပၢႆႈၶၼ်ၶၼ်ၽႂ်းၽႂ်းၼၼ်ႉဢေႃႈ။ ၶဝ်ၸိူဝ်းဢၼ် ၶၢမ်ႇတၢင်းဢၼ်ပွႆႇၸႂ်ႉၼၼ်ႉၶိုၼ်းမႃးလႄႈ လဝ်ႊလၢတ်ႈထိုင်ႁူၶုၼ်ႁေႃၶမ်းဢေႃႈ။-

16မိူဝ်ႈၼၼ်ႉၵူၼ်းတင်းလၢႆဢွၼ်ၵၼ်ဢွၵ်ႇလႄႈ ႁိမ်ဢဝ်တပ်ႉၵူၼ်း သူႉရီႉ ၸိူဝ်းၼၼ်ႉဢေႃႈ၊ ၼင်ႇၼၼ်လႄႈ ၶဝ်ဢွၼ်ၵၼ်ၶၢႆၽွင်ၶဝ်ႈမုၼ်းၵျုင်ႇ ယေႈသီႇပႄႇငိုၼ်းယေႈၵျၢပ်ႈ သၶေးလႃႉ ၊ ၶဝ်ႈသၢၼ်မူႉယေႃးယေႈၶႂၢႆး ငိုၼ်းယေႈၵျၢပ်ႈမႅၼ်ႈၸွမ်းၵႃႈၼင်ႇၵႂၢမ်းထႃႇဝရႃႉၽြႃးၼၼ်ႉဢေႃႈ။

17ၶုၼ်ႁေႃၶမ်းဢဝ်ဢမၢတ်ႈ ဢၼ်လႆႈၶၢမ်ႇတၢင်းဢၼ်မၼ်းၸဝ်ႈဢိင်ၼၼ်ႉ ၶၢၼ်းဝႆႉႁႂ်ႈပႂ်ႉၽၵ်းတူဝဵင်းလႄႈ ၵူၼ်းတင်းလၢႆယဵပ်ႇမႅၼ်ႈမၼ်းၵႃႈၼႂ်းၽၵ်းတူဝဵင်းၼၼ်ႉလႄႈ၊ မၼ်းၼၼ်ႉတၢႆသေမႅၼ်ႈၸွမ်းၵႃႈၼင်ႇဢၼ် ဢွၵ်ႇသူပ်းၵူၼ်းၽြႃးပဵၼ်ၸဝ်ႈ ဢၼ်လၢတ်ႈဝႆႉၼႂ်းမိူဝ်ႈဢၼ်တူဝ်ၶုၼ်ႁေႃၶမ်းလူင်းၸူးၵႃႈတီႈမၼ်းၼၼ်ႉဢေႃႈ။-

18ၼင်ႇၼၼ်လႄႈပဵၼ်ၸွမ်းၵႃႈၼင်ႇဢၼ်ၵူၼ်းၽြႃးပဵၼ်ၸဝ်ႈ လၢတ်ႈတီႈၶုၼ်ႁေႃၶမ်းလႄႈဝႃႈ၊ ဝၼ်းမိူဝ်ႈၽုၵ်ႈမိူဝ်ႈၶိင်ႇၼႆႉၼၼ်ႉ၊ တၵ်းလႆႈဢွၼ်ၵၼ်ၶၢႆၽွင်ၶဝ်ႈမုၼ်းၵျုင်ႇ ယေႈသီႇပႄႇငိုၼ်းယေႈၵျၢပ်ႈ သၶေးလႃႉ ၊ ၶဝ်ႈသၢၼ်မူႉယေႃးယေႈၶႂၢႆးငိုၼ်းယေႈၵျၢပ်ႈ ၵႃႈၼႂ်းၽၵ်းတူဝဵင်း သမႃႇရီႉ ဢေႃႈ၊ ဝႃႈၼင်ႇၼႆလႄႈ၊-

19ဢမၢတ်ႈၼၼ်ႉၶိုၼ်းလၢတ်ႈတီႈၵူၼ်းၽြႃးပဵၼ်ၸဝ်ႈလႄႈဝႃႈ၊ တူၺ်းလူး၊ ပေႃးထႃႇဝရႃႉၽြႃးၽုၺ်ႇႁူးလၢင်းတဵၼ်ၽႃႉၵၢင်ႁၢဝ်ၸိုင်၊ ၸၢင်ႈၶႄးတၵ်းပဵၼ်ၸိူဝ်ႉၼင်ႇၼၼ်ဢေႃႈ၊ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ တူၺ်းလူး၊ မႂ်းၼႆႉတၵ်းလႆႈဢဝ်တင်းမၢၵ်ႇတႃမႂ်းႁၼ်ယူႇဢေႃႈ၊ ၵူၺ်းၵႃႈမႂ်းတၵ်းဢမ်ႇလႆႈၵိၼ်၊ ဝႃႈၼင်ႇၼႆၼၼ်ႉဢေႃႈ။-

20ပဵၼ်တီႈမၼ်းၼၼ်ႉၸိူဝ်ႉၼင်ႇၼၼ်ဢေႃႈ၊ ၵူၼ်းတင်းလၢႆယဵပ်ႇမႅၼ်ႈမၼ်းၼၼ်ႉ ၵႃႈၼႂ်းႁူးၽၵ်းတူဝဵင်းလႄႈ၊ မၼ်းၼၼ်ႉတၢႆသေဢေႃႈ။

← Chapter 6 Jump to: Chapter 8 →