2 Kings 22

Shan

← Chapter 21 Jump to: Chapter 23 →

1ယူဝ်းသီႉယႃႉ ၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈပႅတ်ႇပီႊလႄႈ မၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရူႉသလႅမ်ႇ သၢမ်သိပ်းပၢႆဢဵတ်းပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ယေႇတီႉတႃႉ လုၵ်ႈယိင်း ဢတႃႇယႃႉ ၵူၼ်းယိင်းဝဵင်း ပေႃႇၸၵတ်ႉ ဢေႃႈ။-

2မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ၸွမ်းသဵၼ်ႈတၢင်းဢၼ် တႃႇဝိတ်ႈ ၸဝ်ႈပေႃႈမၼ်းၸွမ်းၼၼ်ႉယူႇသေလႄႈ ဢမ်ႇဝႄႈပိူင်ႈသေၵႃႈတီႈၽၢႆႇၶႂႃၵႃႈတီႈၽၢႆႇသၢႆႉၵႂႃႇ။

3ၼႂ်းပီႊဢၼ်ၶုၼ်လူင် ယူဝ်းသီႉယႃႉ ၸၢမ်ႇႁၢင်ႈၸၢမ်ႇႁေႃသိပ်းပႅတ်ႇပီႊၼၼ်ႉ၊ ၶုၼ်ႁေႃၶမ်းပွႆႇၸႂ်ႉၸရေးၸဝ်ႈ သႃႇၽၢၼ်ႇ လုၵ်ႈၸၢႆး ဢႃႇၸႃႇလီႉ ဢၼ်ပဵၼ်လုၵ်ႈၸၢႆး မေႇသူႉလမ်ႇ ၼၼ်ႉၵႂႃႇၸူးၵႃႈတီႈႁိူၼ်းထႃႇဝရႃႉၽြႃးလႄႈ သင်ႇလၢတ်ႈလႄႈဝႃႈ၊-

4မႂ်းၶိုၼ်ႈၸူးၵႃႈတီႈ ႁီႉလၶီႉ ၶုၼ်ယိတ်ႈပရေႃးႁဵၵ်ႈၼၼ်ႉလႄႈ ႁႂ်ႈမၼ်းၼပ်ႉဢၢၼ်ႇငိုၼ်းဢၼ်ဢဝ်မႃးၵႃႈတီႈႁိူၼ်းထႃႇဝရႃႉၽြႃး ဢၼ်ၵူၼ်းပႂ်ႉၽၵ်းတူႁပ်ႉတုင်းဢဝ်ၵႃႈတီႈမိုဝ်းၵူၼ်းတင်းလၢႆၼၼ်ႉသေလႄႈ၊-

5ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်သၢင်ႈဢၼ်ႁဵတ်း၊ ဢၼ်ဢုပ်ႉၵႃႈၼိူဝ်ႁိူၼ်းထႃႇဝရႃႉၽြႃးယူႇၸိူဝ်းၼၼ်ႉလႄႈ ႁႂ်ႈၶဝ်ၼၼ်ႉ ဢွၼ်ၵၼ်မႅင်ႇပၼ်တီႈၶဝ်ၸိူဝ်းဢၼ်သၢင်ႈဢၼ်ႁဵတ်း ဢၼ်မီးၵႃႈၼႂ်းႁိူၼ်းထႃႇဝရႃႉၽြႃးၼၼ်ႉ ႁႂ်ႈလႆႈမႄးၵုမ်းမႄးႁဵတ်းတီႈလူႉတီႈပင်းႁိူၼ်းၸဝ်ႈ၊-

6ဢၼ်ဝႃႈၶဝ်ၸိူဝ်းဢၼ်မေႃတိၼ်မေႃမိုဝ်းလႂ်၊ လၢၵ်ႈသမႃးလႂ်၊ ၶဝ်ၸိူဝ်းဢၼ်ၸၢင်ႈတႄႇတိူၵ်ႈႁဵတ်းတိူၵ်ႈလႂ် ဢိၵ်ႇတင်းပုၼ်ႈဢၼ်တၵ်းသိုဝ်ႉဢဝ်ၶိုဝ်ႇ၊ ပႄ၊ တူင်၊ ၵွၼ်လႂ်၊ တင်းမၢၵ်ႇႁိၼ်ဢၼ်သပ်းယဝ်ႉထၢၵ်ႇယဝ်ႉလႂ် ႁႂ်ႈလႆႈမႄးၵုမ်းမႄးႁဵတ်း ႁိူၼ်းၸဝ်ႈၼၼ်ႉတႃႉ၊ ဝႃႈၼင်ႇၼႆဢေႃႈ။-

7ၵူၺ်းၵႃႈဢမ်ႇဢဝ်ၸရၢင်းတီႈၶဝ်ၼၼ်ႉ လူၺ်ႈလွင်ႈငိုၼ်းဢၼ်ဢဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၼၼ်ႉ ၵွပ်ႈပိူဝ်ႈဢၼ်ၶဝ်ပဵၼ်ၵေႃႉဢၼ်ပႂ်ႉသဵတ်ႈၸႃႇၼၼ်ႉဢေႃႈ။

8ၶုၼ်ယိတ်ႈပရေႃးႁဵၵ်ႈ ႁီႉလၶီႉ ၵေႃႈ လၢတ်ႈတီႈၸရေးလူင် သႃႇၽၢၼ်ႇ လႄႈဝႃႈ၊ ၵဝ်ထူပ်းႁၼ်ၽိုၼ်ၵျၢမ်းလိၵ်ႈပိင်းၺၢပ်ႈတီႉ ၵႃႈၼႂ်းႁိူၼ်းထႃႇဝရႃႉၽြႃးယဝ်ႉ၊ ဝႃႈၼင်ႇၼႆသေလႄႈ၊ ႁီႉလၶီႉ ၼၼ်ႉဢဝ်ၵျၢမ်းလိၵ်ႈၼၼ်ႉ ဢၢပ်ႈပၼ်တီႈ သႃႇၽၢၼ်ႇ လႄႈ မၼ်းၼၼ်ႉၽတ်းဢေႃႈ။-

9လႆႈသမ်ႉ ၸရေးလူင် သႃႇၽၢၼ်ႇ ၼၼ်ႉၵႂႃႇၸူးတီႈၶုၼ်ႁေႃၶမ်းလႄႈ ဢဝ်ၵႂၢမ်းၶိုၼ်းလဝ်ႊၶိုၼ်းလၢတ်ႈတီႈၶုၼ်ႁေႃၶမ်းလႄႈဝႃႈ၊ ၶႃႈၸဝ်ႈႁဝ်းၶဝ်ဢဝ်ငိုၼ်းဢၼ်ထူပ်းႁၼ်ၵႃႈၼႂ်းႁိူၼ်းၸဝ်ႈၼၼ်ႉဢွၵ်ႇသေယဝ်ႉ၊ ဢဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်သၢင်ႈဢၼ်ႁဵတ်း ဢၼ်ဢုပ်ႉၵႃႈၼိူဝ်ႁိူၼ်းထႃႇဝရႃႉၽြႃးယူႇ ၸိူဝ်းၼၼ်ႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

10ၸရေးလူင် သႃႇၽၢၼ်ႇ ၼၼ်ႉ သမ်ႉလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ယိတ်ႈပရေႃးႁဵၵ်ႈ ႁီႉလၶီႉ ၼၼ်ႉဢဝ်ၽိုၼ်လိၵ်ႈ ဢၢပ်ႈပၼ်တီႈၶႃႈၸဝ်ႈတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ဢဝ်ၽတ်းရွတ်ႈၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။-

11ၶုၼ်ႁေႃၶမ်းငိၼ်းၵႂၢမ်းၵျၢမ်းလိၵ်ႈပိင်းၺၢပ်ႈတီႉၼၼ်ႉသေယဝ်ႉ၊ သိၵ်ႇၶူဝ်းၼုင်ႈမၼ်းလႄႈ၊-

12ၶုၼ်ႁေႃၶမ်းမီးဢမိင်ႉတီႈယိတ်ႈပရေႃးႁဵၵ်ႈ ႁီႉလၶီႉ၊ ဢႁီႉၵမ်ႇ လုၵ်ႈၸၢႆး သႃႇၽၢၼ်ႇ၊ ဢႃႇၶပေႃႇ လုၵ်ႈၸၢႆး မိၵ်ႉၶႃႇ၊ သႃႇၽၢၼ်ႇ ၸရေးၸဝ်ႈ၊ ဢသႃႇယႃႉ ၶႃႈၶုၼ်ႁေႃၶမ်းၸိူဝ်းၼၼ်ႉလႄႈဝႃႈ၊-

13သူဢွၼ်ၵၼ်ၵႂႃႇလႄႈလဝ်ႊထၢမ်တီႈထႃႇဝရႃႉၽြႃး လူၺ်ႈလွင်ႈၵႂၢမ်းၵျၢမ်းလိၵ်ႈ ဢၼ်ထူပ်းႁၼ်မိူဝ်ႈလဵဝ်ၼႆႉၼၼ်ႉ ပုၼ်ႈၵဝ်၊ ပုၼ်ႈၵူၼ်းတင်းလၢႆ၊ ပုၼ်ႈမဵဝ်း ယူႉတႃႉ တင်းသဵင်ႈတင်းလူင်သေၵမ်း။ လွင်ႈမၼ်းၸမ်ႉ ၵွပ်ႈပိူဝ်ႈဢၼ်ပူႇႁဝ်းမွၼ်ႇႁဝ်းၸိူဝ်းၼၼ်ႉ ယင်းဢမ်ႇထွမ်ႇဢမ်ႇဢဝ်ၵႂၢမ်းၵျၢမ်းလိၵ်ႈၼႆႉ ႁႂ်ႈလႆႈၵမ်ၵျၢင်ႉၸွမ်းၵႃႈဢၼ်တႅမ်ႈဝႆႉပုၼ်ႈႁဝ်းၼႆႉၼၼ်ႉလႄႈယူႇၼၼ်ႉလႄႈ တၢင်းၸႂ်မႆႈၶႆႈၸႃႉထႃႇဝရႃႉၽြႃး ဢၼ်ဢွၵ်ႇၸူးတီႈႁဝ်းၼၼ်ႉ ပဵၼ်ဢၼ်ႁႅင်းယႂ်ႇၼႃႇလူင်လၢင်ဢေႃႈ၊ ဝႃႈၼင်ႇၼႆဢေႃႈ။-

14မိူဝ်ႈၼၼ်ႉ ယိတ်ႈပရေႃးႁဵၵ်ႈ ႁီႉလၶီႉ၊ ဢႁီႉၵမ်ႇ၊ ဢႃႇၶပေႃႇ၊ သႃႇၽၢၼ်ႇ တင်း ဢသႃႇယႃႉ ၸိူဝ်းၼၼ်ႉ ဢွၼ်ၵၼ်ၵႂႃႇၸူးၵႃႈတီႈမႄႈယိင်း ပရေႃးၽႅတ်ႈ ႁူႉလတႃႉ မေး သႃႇလုမ်ႇ ဝုၼ်ႇဢၼ်ပႂ်ႉလူပႂ်ႉထိင်းၶူဝ်းၼုင်ႈၸဝ်ႈ၊ ဢၼ်ပဵၼ်လုၵ်ႈၸၢႆး တီႉၵဝႃႉ ဢၼ်ပဵၼ်လုၵ်ႈၸၢႆး ႁႃႇရႁတ်ႉ လႄႈ ယူႇၵႃႈၼႂ်းဝဵင်း ယေႇရူႉသလႅမ်ႇ ထၢပ်ႈၼွၵ်ႈၼၼ်ႉလႄႈ မွၵ်ႇလၢတ်ႈတီႈမၼ်းၼၼ်ႉဢေႃႈ။

15မႄႈယိင်းၼၼ်ႉၵေႃႈၶိုၼ်းလၢတ်ႈတီႈၶဝ်လႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉလႄႈဝႃႈၸမ်ႉ၊ သူၶိုၼ်းမိူဝ်းလၢတ်ႈတီႈၵေႃႉဢၼ် ပွႆႇၸႂ်ႉသူမႃးတီႈၵဝ်ၼၼ်ႉလႄႈဝႃႈ၊-

16ထႃႇဝရႃႉၽြႃးမီးဢမိင်ႉလႄႈဝႃႈ၊ ၵဝ်တၵ်းႁႂ်ႈၽေးႁွတ်ႈထိုင်ၵႃႈၼိူဝ်တီႈၼႆႉ ဢိၵ်ႇတင်းၵူၼ်းၵႃႈတီႈၼႆႈ ႁႂ်ႈၵႂၢမ်းၵျၢမ်းလိၵ်ႈၵႃႈမီး ဢၼ်ၶုၼ်ႁေႃၶမ်း ယူႉတႃႉ လႆႈၽတ်းယဝ်ႉၼၼ်ႉပျေႉၸုမ်ႇဢေႃႈ။-

17လွင်ႈမၼ်းၸမ်ႉ ၶဝ်ဢွၼ်ၵၼ်ၸုၼ်ႉပႅတ်ႈၵဝ်လႄႈ ဢဝ်ၼၢမ်ႇသႃႇတုတ်ႇၽႆးတီႈၽြႃးတၢင်ႇသူႇတၢင်ႇပႃး ႁႂ်ႈလႆႈဢဝ်လွင်ႈတၢင်းဢၼ်ၶဝ်ႁဵတ်းၸိူဝ်းၼၼ်ႉ တိုၵ်းယူင်းတၢင်းၸႂ်မႆႈၶႆႈၸႃႉၵဝ်ယဝ်ႉ။ ၵွပ်ႈပိူဝ်ႈၼင်ႇၼၼ်လႄႈ ၽႆးတၢင်းၸႂ်မႆႈၶႆႈၸႃႉၵဝ် ယင်းဢမ်ႇမွတ်ႇလႄႈ၊ တၵ်းလႆႈမႆႈၵႃႈတီႈၼႆႈဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ။-

18လႆႈသမ်ႉသူတၵ်းလႆႈၶိုၼ်းလဝ်ႊလၢတ်ႈတီႈၶုၼ်ႁေႃၶမ်း ယူႉတႃႉ ဢၼ်ပွႆႇၸႂ်ႉသူမႃးႁႂ်ႈလႆႈလဝ်ႊထၢမ်တီႈထႃႇဝရႃႉၽြႃးၼၼ်ႉလႄႈဝႃႈ၊ ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢဝ်လွင်ႈၵႂၢမ်းၵျၢမ်းလိၵ်ႈဢၼ်ၸဝ်ႈလႆႈငိၼ်းၼၼ်ႉလႄႈ မီးဢမိင်ႉလႄႈဝႃႈၸမ်ႉ၊-

19ၵွပ်ႈပိူဝ်ႈဢၼ်မႂ်းမီးၸႂ်ဢၼ်ဢူၼ်ႈဢွၼ်ႇလႄႈ ၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇၵႃႈတီႈၽၢႆႇၼႃႈထႃႇဝရႃႉၽြႃး ၼႂ်းမိူဝ်ႈဢၼ်မႂ်းငိၼ်းၵႂၢမ်းဢၼ်ၵဝ်လွၵ်ႇငိုတ်ႈတီႈထႃႇၼႃႉတီႈၼႆႈ ဢိၵ်ႇတင်းတီႈၵူၼ်းၵႃႈတီႈၼႆႈၸိူဝ်းၼၼ်ႉလႄႈဝႃႈ၊ ၶဝ်ၸိူဝ်းၼၼ်ႉတၵ်းလႆႈပဵၼ်တီႈဢၼ်ယႃႉပႅတ်ႈ ဢိၵ်ႇတင်းတီႈဢၼ်ၵိၼ်ႇလႃႇဢေႃႈ၊ ဝႃႈၼင်ႇၼႆၼၼ်ႉလႄႈ သိၵ်ႇၶူဝ်းၼုင်ႈမႂ်းသေလႄႈ ႁႆႈႁွင်ႉၵႃႈတီႈၽၢႆႇၼႃႈၵဝ်ၼၼ်ႉလႄႈ ၵဝ်ထွမ်ႇဢဝ်ၵႂၢမ်းမႂ်းဢေႃႈ၊ ထႃႇဝရႃႉၽြႃးမီးဢမိင်ႉဢေႃႈ။-

20ပိူဝ်ႈၼႆလႄႈ ၵဝ်တၵ်းဢဝ်မႂ်းသူင်ႇႁွတ်ႈတီႈဢၼ်ပူႇမႂ်းမွၼ်ႇမႂ်းၸူႉတုမ်ၼၼ်ႉလႄႈ မႂ်းတၵ်းလႆႈၶဝ်ႈၸူးၵႃႈတီႈသၢင်းၶႅင်းၼိမ်ၼိမ်လီလီဢေႃႈ။ တႃမႂ်းတၵ်းဢမ်ႇလႆႈတူၺ်းလႆႈႁၼ် ၽေးၵႃႈဢၼ်ၵဝ်ႁႂ်ႈႁွတ်ႈထိုင်ၵႃႈၼိူဝ်တီႈၼႆႉၼၼ်ႉ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆလႄႈ၊ ၶဝ်ၼၼ်ႉဢွၼ်ၵၼ်ၶိုၼ်းလဝ်ႊလၢတ်ႈတီႈၶုၼ်ႁေႃၶမ်းဢေႃႈ။

← Chapter 21 Jump to: Chapter 23 →