2 Kings 5

Shan

← Chapter 4 Jump to: Chapter 6 →

1ၼေႇမၢၼ်ႇ ၶုၼ်ပူဝ်ႇၶျုၵ်ႈၶုၼ်ႁေႃၶမ်း သူႉရီႉ ၼၼ်ႉ ပဵၼ်ၵေႃႉဢၼ်လႆႈၼႃႈလႆႈတႃတီႈၸဝ်ႈမၼ်းလႄႈ မီးမုၼ်မီးၽုင်းဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃးဢဝ်မၼ်းပၼ်ဢၶႂၢင်ႉဢၼ်မိူင်း သူႉရီႉ လႆႈပႄႉလႆႈၼႅင်ႇၼၼ်ႉယဝ်ႉ၊ မၼ်းပဵၼ်ႁူဝ်ႁၢၼ်ၵူၼ်းသိုၵ်းဢၼ်ႁႅင်းယႂ်ႇၼႃႇဢေႃႈ။ ၵူၺ်းၵႃႈမၼ်းပဵၼ်တုတ်ႈဢေႃႈ။-

2ၽဝ်ႇၼိုင်ႈ ၵူၼ်း သူႉရီႉ တင်းလၢႆႁဵတ်းပဵၼ်မုၵ်ႉပဵၼ်ၸိူဝ်းသေလႄႈ ၶီႇသိုၵ်းၵႂႃႇသေယဝ်ႉ၊ တီႉလႆႈမႄႈယိင်းဢွၼ်ႇၵေႃႉၼိုင်ႈသေၵႃႈၼႂ်းမိူင်း ဢီႉသရေႇလႃႉ မႃးဢေႃႈ။ မၼ်းၼၼ်ႉလႆႈၶၢမ်ႇႁဵတ်းၶႃႈတီႈမေး ၼေႇမၢၼ်ႇ ၼၼ်ႉယူႇဢေႃႈ။-

3မၼ်းၼၼ်ႉလၢတ်ႈတီႈၸဝ်ႈၼၢင်းမၼ်းလႄႈဝႃႈ၊ ႁႂ်ႈၸဝ်ႈၵဝ်ၶႃႈၼၼ်ႉႁွတ်ႈထိုင်ၵႃႈတီႈပရေႃးၽႅတ်ႈဢၼ်မီးယူႇၵႃႈတီႈဝဵင်း သမႃႇရီႉ ၼၼ်ႉသေၵမ်းလူၺ်ႈ။ မၼ်းၼၼ်ႉတၵ်းႁႂ်ႈတုတ်ႈဢၼ်ၸပ်းတီႈမၼ်းၸဝ်ႈၼၼ်ႉႁၢႆၶႃႈဢေႃႈ၊ ဝႃႈၼင်ႇၼႆဢေႃႈ။-

4ၼင်ႇၼၼ်လႄႈ ၼေႇမၢၼ်ႇ ၼၼ်ႉ ၶဝ်ႈၸူးၵႃႈတီႈၸဝ်ႈမၼ်းလႄႈလဝ်ႊလၢတ်ႈလႄႈဝႃႈ၊ မႄႈယိင်းဢွၼ်ႇ ဢီႉသရေႇလႃႉ ၼၼ်ႉ လၢတ်ႈၸိူဝ်ႉၼင်ႇၼႆၸိူဝ်ႉၼင်ႇၼၼ်တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

5ၶုၼ်ႁေႃၶမ်း သူႉရီႉ ၵေႃႈမီးဢမိင်ႉလႄႈဝႃႈ၊ ၵႂႃႇတႃႉ။ ၵႂႃႇတႃႉ။ ၵဝ်တၵ်းပၼ်လိၵ်ႈၵႂႃႇ တီႈၶုၼ်ႁေႃၶမ်း ဢီႉသရေႇလႃႉ ဢေႃႈ၊ ဝႃႈၼင်ႇၼႆလႄႈ မၼ်းၼၼ်ႉဢဝ်ငိုၼ်းသိပ်း တလၢၼ်ႇတၢၼ်ႇ ၊ ၶမ်းႁူၵ်းႁဵင်ၵျၢပ်ႈ၊ ၶူဝ်းၼုင်ႈသိပ်းၸုမ်ႇသေလႄႈၵႂႃႇလႄႈ၊-

6ဢဝ်လိၵ်ႈၼၼ်ႉသႂၢင်းၶဝ်ႈၵႃႈတီႈၶုၼ်ႁေႃၶမ်း ဢီႉသရေႇလႃႉ ဢေႃႈ။ ၵႂၢမ်းဢၼ်ပႃးၵႃႈၼႂ်းလိၵ်ႈၼၼ်ႉဝႃႈၸမ်ႉ၊ ၵဝ်ၶႃႈပွႆႇၸႂ်ႉၶႃႈၵဝ်ၶႃႈ ၼေႇမၢၼ်ႇ ပႃးဢဝ်လိၵ်ႈၼႆႉၵႂႃႇႁႂ်ႈၸဝ်ႈႁႂ်ႈတုတ်ႈမၼ်းႁၢႆဢေႃႈ၊ ဝႃႈၼင်ႇၼႆဢေႃႈ။-

7ၶုၼ်ႁေႃၶမ်း ဢီႉသရေႇလႃႉ ၽတ်းလိၵ်ႈၼၼ်ႉသေယဝ်ႉ၊ ၸၵ်ႉသိၵ်ႇၶူဝ်းၼုင်ႈမၼ်းလႄႈဝႃႈ၊ ၵဝ်ပဵၼ်ၽြႃးဢၼ်ပိူင်ႇပၼ်ပိူင်ႇၼုၵ်ႈဢသၢၵ်ႈလႄႈ မၼ်းၼၼ်ႉပွႆႇၸႂ်ႉၵေႃႉၼႆႉမႃးတီႈၵဝ် ႁႂ်ႈၵဝ်ပၼ်ၵတ်းယဵၼ်ၶျၢမ်းသႃႇႁိုဝ် သူတူၺ်းလူး၊ တူၺ်းလွင်ႈဢၼ်မၼ်းၶႂ်ႈႁႃတၢင်းၽိတ်းသႂ်ႇတီႈၵဝ်ထၢၼ်ႇလႂ်ၼၼ်ႉတႃႉ၊ ဝႃႈၼင်ႇၼႆဢေႃႈ။

8ဢေးလီႉသႄး ၵူၼ်းၽြႃးပဵၼ်ၸဝ်ႈ ငိၼ်းလွင်ႈဢၼ်ၶုၼ်ႁေႃၶမ်း ဢီႉသရေႇလႃႉ သိၵ်ႈၶူဝ်းၼုင်ႈမၼ်းၼၼ်ႉသေယဝ်ႉ၊ သင်ႇလၢတ်ႈၵႂႃႇတီႈၶုၼ်ႁေႃၶမ်းလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းသိၵ်ႇၶူဝ်းၼုင်ႈၸဝ်ႈႁဝ်းၼင်ႇႁိုဝ်တီႈၶႃႈ။ ႁႂ်ႈမၼ်းၼၼ်ႉမႃးၵႃႈတီႈၶႃႈၸဝ်ႈသေၵမ်း။ မၼ်းတၵ်းလႆႈႁူႉလွင်ႈဢၼ်ပရေႃးၽႅတ်ႈမီးၵႃႈၼႂ်းမိူင်း ဢီႉသရေႇလႃႉ ၼႆႉဢေႃႈ၊ ဝႃႈၼင်ႇၼႆဢေႃႈ။-

9ပိူဝ်ႈၼႆလႄႈ ၼေႇမၢၼ်ႇ ၼၼ်ႉ ပႃးဢဝ်လေႃႉရထႃးမၼ်းဢိၵ်ႇတင်းမႃႉမၼ်းတင်းလၢႆမႃးလႄႈ ၸုၵ်းယူႇၵႃႈတီႈၽၵ်းတူႁိူၼ်း ဢေးလီႉသႄး ဢေႃႈ။-

10ဢေးလီႉသႄး ၵေႃႈပွႆႇၸႂ်ႉၵူၼ်းၸူးတီႈမၼ်းလႄႈလၢတ်ႈဝႃႈ၊ မႂ်းၵႂႃႇလႄႈဢၢပ်ႇၼမ်ႉၵႃႈၼႂ်းၼမ်ႉႁွင်ႈ ယေႃးတၢၼ်ႇ တေႃႇထိုင်ႁွတ်ႈၸဵတ်းပွၵ်ႈတႃႉ။ ၼိူဝ်ႉၼင်မႂ်းတၵ်းၶၢႆႉပုတ်ႈလႄႈမႂ်းတၵ်းလႆႈမူတ်းသႂ်ဢေႃႈ၊ ဝႃႈၼင်ႇၼႆဢေႃႈ။-

11ၼေႇမၢၼ်ႇ ၸႂ်မႆႈၶႆႈၸႃႉလႄႈ ဢွၵ်ႇၵႂႃႇသေလႄႈလၢတ်ႈဝႃႈ၊ တူၺ်းလူး၊ ၵဝ်ယဵဝ်ပရေႃးၽႅတ်ႈၼၼ်ႉတၵ်းဢွၵ်ႇမႃးလႄႈ ၸုၵ်းယူႇၵႃႈတီႈႁိမ်းၵဝ်ယူႇ၊ ႁွင်ႉႁႃၼႃႇမႃႉၸိုဝ်ႈသဵင်ထႃႇဝရႃႉၽြႃး ၽြႃးပဵၼ်ၸဝ်ႈမၼ်းလႄႈ ဢဝ်မိုဝ်းမၼ်းမုင်းၵႂႃႇမုင်းမႃး ၵႃႈၼိူဝ်တီႈႁွႆႈၸဵပ်းယူႇသေလႄႈ ႁႂ်ႈတုတ်ႈႁၢႆဢေႃႈ။-

12ၼမ်ႉႁွင်ႈ ဢႃႇမၼႃႉ ၊ ၼမ်ႉႁွင်ႈ ၽႃႇၽႃႇ ၵႃႈတီႈမိူင်း ထမ်ႇမသႅတ်ႉ ၸိူဝ်းၼၼ်ႉ ယဵင်ႈၶႅၼ်းလီၼႃႇသေၼမ်ႉႁွင်ႈ ဢီႉသရေႇလႃႉ ၵႃႈမီးဢမ်ႇၸႂ်ႈႁိုဝ်။ ၵဝ်ဢၢပ်ႇၼမ်ႉၵႃႈၼႂ်းၼမ်ႉႁွင်ႈၸိူဝ်းၼၼ်ႉလႄႈ တၵ်းမူတ်းသႂ်ဢမ်ႇၸႂ်ႈႁိုဝ်။ ဝႃႈၼင်ႇၼႆသေလႄႈ ဝၢႆႇၶိုၼ်းလႄႈၸႂ်မႆႈၶႆႈၸႃႉမိူဝ်းၵႂႃႇဢေႃႈ။-

13ၶႃႈမၼ်းၵူၼ်းမၼ်းဢွၼ်ၵၼ်သုတ်ႉၸပ်းသုတ်ႉၸူးလႄႈ လဝ်ႊလၢတ်ႈလႄႈဝႃႈ၊ ပေႃႈႁဝ်းၶႃႈဢိူၺ်း၊ ပေႃးပရေႃးၽႅတ်ႈၸီႇယၢင်ႇႁႂ်ႈၸဝ်ႈႁဝ်းႁဵတ်းလွင်ႈတၢင်းဢၼ်ယႂ်ႇဢၼ်လူင်သေၸိူဝ်ႉသေပိူင်ၸိုင်၊ ၸဝ်ႈႁဝ်းတၵ်းႁဵတ်းဢမ်ႇၸႂ်ႈၶႃႈႁိုဝ်။ ပေႃးၸီႇယၢင်ႇလႄႈဝႃႈ၊ ဢၢပ်ႇၼမ်ႉလႄႈ ႁွတ်ႈထိုင်တၢင်းဢၼ်မူတ်းသႂ်တႃႉ၊ ဝႃႈၼင်ႇၼႆၸိုင်၊ ယဵင်ႈၶႅၼ်းလီႁဵတ်းၼႃႇလူင်လၢင်ၵႃႈႁိုဝ်ၶႃႈ၊ ဝႃႈၼင်ႇၼႆသေယဝ်ႉ၊-

14မၼ်းၼၼ်ႉလူင်းၸူးလႄႈ ဢဝ်တူဝ်မၼ်းၸုမ်ႇၵႃႈၼႂ်းၼမ်ႉႁွင်ႈ ယေႃးတၢၼ်ႇ တေႃႇထိုင်ႁွတ်ႈၸဵတ်းပွၵ်ႈ ၸွမ်းၵႃႈၼင်ႇဢၼ်ၵူၼ်းၽြႃးပဵၼ်ၸဝ်ႈၸီႇယၢင်ႇၼၼ်ႉသေယဝ်ႉ၊ ၼိူဝ်ႉၼင်မၼ်းၼၼ်ႉၶၢႆႉပုတ်ႈၵႂႃႇလႄႈ ပဵၼ်ၸိူဝ်ႉၼင်ႇၼိူဝ်ႉၼင်လုၵ်ႈဢွၼ်ႇၼၼ်ႉလႄႈ မၼ်းႁွတ်ႈထိုင်တၢင်းဢၼ်မူတ်းသႂ်ဢေႃႈ။

15ၼင်ႇၼၼ်သေယဝ်ႉ၊ မၼ်းၼၼ်ႉဢိၵ်ႇလူၺ်ႈၵၼ်တင်းၶဝ်ၵႃႈဢၼ်ၸွမ်းမၼ်းၼၼ်ႉ ဢွၼ်ၵၼ်ၶိုၼ်းမႃးတီႈၵူၼ်းၽြႃးပဵၼ်ၸဝ်ႈလႄႈ ႁွတ်ႈထိုင်သေယဝ်ႉ၊ ၸုၵ်းယူႇၵႃႈတီႈၽၢႆႇၼႃႈမၼ်းသေလႄႈ တွင်းပၢၼ်ႇလႄႈဝႃႈ၊ မိူဝ်ႈလဵဝ်ၼႆႉၵဝ်ၶႃႈႁူႉလွင်ႈဢၼ် လိူဝ်သေၵႃႈၼႂ်းမိူင်း ဢီႉသရေႇလႃႉ ၼႆႉ၊ ၵႃႈၼိူဝ်လိၼ်မိူင်းၵႃႈမီးၼႆႉ ဢမ်ႇမီးၽြႃးပဵၼ်ၸဝ်ႈသေသူႇသေပႃးၼၼ်ႉၶႃႈယဝ်ႉ။ ပိူဝ်ႈဢၼ်ပဵၼ်ၼင်ႇၼႆလႄႈႁပ်ႉတုင်းဢဝ်လၢၵ်ႈသွင်ႇတၢင်းလူႇ တီႈၶႃႈၸဝ်ႈႁဝ်းၼႆႉသေၵမ်းၶႃႈ၊ ဝႃႈၼင်ႇၼႆဢေႃႈ။-

16မၼ်းၵေႃႈလၢတ်ႈလႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃး ဢၼ်ၵဝ်ၵူဝ်းၵႂၢႆႇၼၼ်ႉဢသၢၵ်ႈလိပ်းယူႇၼၼ်ႉ၊ ၵဝ်ဢမ်ႇလႆႈၶၢမ်ႇလႆႈဢဝ်၊ ဝႃႈၼင်ႇၼႆသေယဝ်ႉ၊ မၼ်းၼၼ်ႉသမ်ႉ တိုၵ်းယူင်းမၼ်းႁႂ်ႈၶၢမ်ႇဢဝ်သေၵေႃႈ၊ မၼ်းထဵင်ပႄႇပႅတ်ႈသေလႄႈယူႇဢေႃႈ။-

17ၼေႇမၢၼ်ႇ ၵေႃႈလၢတ်ႈလႄႈဝႃႈ၊ ပေႃးပဵၼ်ၼင်ႇၼၼ်ၸိုင် ႁႂ်ႈၶႃႈၸဝ်ႈႁဝ်းၼႆႉ လႆႈမီးဢၶႂၢင်ႉဢၼ်လႆႈဢဝ်လိၼ်ပုၼ်ႈတႃႇလီႈသေသွင်တူဝ်ၼိုင်ႈၼၼ်ႉ တၢင်ႇႁၢင်ႈၵႂႃႇသေၵမ်းၶႃႈ။ ဢဝ်ၼႆႉၵႂႃႇၼႃႈ၊ ၶႃႈၸဝ်ႈႁဝ်းၼႆႉ လိူဝ်သေတီႈထႃႇဝရႃႉၽြႃးၼၼ်ႉ တၵ်းဢမ်ႇပုၵ်ႈၸေႃႇ ၸႃႉၸဵမ်ယိတ်ႈဢၼ်တုတ်ႇၽႆးလႄႈ ယိတ်ႈဢၼ်လႂ်သေၸိူဝ်ႉသေပိူင် တီႈၽြႃးတၢင်ႇသူႇတၢင်ႇပႃးၼၼ်ႉၶႃႈယဝ်ႉ။-

18ၼႂ်းဝႃႈၼၼ်သေၵေႃႈ တီႈႁဵင်းၼိုင်ႈၸမ်ႉ၊ ႁႂ်ႈထႃႇဝရႃႉၽြႃးပွႆႇလွတ်ႈဢပႅတ်ႈၶႃႈၸဝ်ႈႁဝ်းၼႆႉသေၵမ်းလူၺ်ႈ။ ယၢမ်းမိူဝ်ႈဢၼ်ၸဝ်ႈၵဝ်ၶႃႈ ၶဝ်ႈၵႂႃႇၵႃႈၼႂ်းၵျွင်းၽြႃး ရိမ်ႇမုၼ်ႇ ႁႂ်ႈလႆႈၵူဝ်းၵႂၢႆႇၵႃႈတီႈၼၼ်ႈလႄႈ ဢိင်ၵဝ်ၶႃႈယူႇသေလႄႈ ၵဝ်ၶႃႈၵူမ်ႈၵွမ်းတူဝ်ၸဝ်ႈၵဝ်ႇ ၵႃႈၼႂ်းၵျွင်း ရိမ်ႇမုၼ်ႇ ၼၼ်ႉ၊ ပေႃးၵဝ်ၶႃႈၵူမ်ႈၵွမ်းၵႂႃႇၵႃႈၼႂ်း ရိမ်ႇမုၼ်ႇ ၸိုင်၊ ႁႂ်ႈထႃႇဝရႃႉၽြႃးၼၼ်ႉ ပွႆႇလွတ်ႈဢပႅတ်ႈၶႃႈၸဝ်ႈႁဝ်းၼႆႉသေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊-

19မၼ်းလၢတ်ႈလႄႈဝႃႈ၊ ၵႂႃႇၼိမ်ၼိမ်တႃႉ၊ ဝႃႈၼင်ႇၼႆလႄႈ၊ မၼ်းၼၼ်ႉၵႂႃႇဢမ်ႇပႆႇပေႃးၵႆလူင်လၢင်လႄႈ၊-

20ၵေႇႁႃႇၸီႉ ၵူၼ်းဢွၼ်ႇ ဢေးလီႉသႄး ၵူၼ်းၽြႃးပဵၼ်ၸဝ်ႈၼၼ်ႉ ၵျၢမ်ႇပွင်ၼႂ်းၸႂ်လႄႈဝႃႈ၊ ၸဝ်ႈၵဝ်ၼႆႉယင်းဢမ်ႇၶၢမ်ႇဢမ်ႇဢဝ်ဢုၵ်ႉၸႃႇဢၼ် ၼေႇမၢၼ်ႇ ၵူၼ်း သူႉရီႉ ဢဝ်မႃးၼၼ်ႉလႄႈ ဢဵတ်းလူမၼ်းၼၼ်ႉၼႃႇလူင်လၢင်ယဝ်ႉ။ ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ၊ ၵဝ်တၵ်းၶုၼ်ႇလႅၼ်ႈၸွမ်းလင်မၼ်းၵႂႃႇလႄႈ ဢဝ်သေၸိူဝ်ႉသေပိူင်ဢေႃႈ၊ ဝႃႈၼင်ႇၼႆသေလႄႈ၊-

21ၵေႇႁႃႇၸီႉ ၸွမ်းလင် ၼေႇမၢၼ်ႇ ၵႂႃႇဢေႃႈ။ ၼေႇမၢၼ်ႇ ၼၼ်ႉႁၼ်လွင်ႈဢၼ် ၵေႃႉၼိုင်ႈလႅၼ်ႈၸွမ်းမၼ်းၼၼ်ႉသေယဝ်ႉ၊ လူင်းသေၵႃႈၼိူဝ်လေႃႉရထႃး ႁႂ်ႈလႆႈႁႄႉႁပ်ႉလႄႈထၢမ်ဝႃႈ၊ လီယူႇၵူႈၸိူဝ်ႉၵူႈပိူင်ႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

22မၼ်းလၢတ်ႈလႄႈဝႃႈ၊ လီယူႇၶႃႈဢေႃႈ။ ၸဝ်ႈၵဝ်ၶႃႈၼၼ်ႉပွႆႇၸႂ်ႉၵဝ်ၶႃႈမႃးလႄႈသင်ႇလၢတ်ႈလႄႈဝႃႈ၊ မိူဝ်ႈလဵဝ်ၼႆႉၵူၼ်းၼုမ်ႇၵူၼ်းၵမ် ၵူၼ်းမဵဝ်းပရေႃးၽႅတ်ႈသွင်ၵေႃႉလုၵ်ႉသေၵႃႈတီႈႁၢၼ်ႉလွႆ ဢေႇၽရိမ်ႇ ႁွတ်ႈမႃးတီႈၵဝ်ယဝ်ႉ။ ပၼ်ငိုၼ်း တလၢၼ်ႇတၢၼ်ႇ ၼိုင်ႈ ဢိၵ်ႇတင်းၶူဝ်းၼုင်ႈသွင်ၸုမ်ႇၼိုင်ႈတီႈၶဝ်သေၵမ်း၊ ဝႃႈၼင်ႇၼႆဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

23ၼေႇမၢၼ်ႇ ၶိုၼ်းလၢတ်ႈလႄႈဝႃႈ၊ ယင်းဢမ်ႇတွပ်ႇဢမ်ႇထဵင်လႄႈ ဢဝ်ငိုၼ်းသွင် တလၢၼ်ႇတၢၼ်ႇ သေၵမ်း၊ ဝႃႈၼင်ႇၼႆလႄႈ တိုၵ်းယူင်းမၼ်းသေလႄႈ ဢဝ်ငိုၼ်းသွင် တလၢၼ်ႇတၢၼ်ႇ သႂ်ႇၵႃႈၼႂ်းထူင်သွင်လုၵ်ႈမတ်ႉၸပ်း လူၺ်ႈၵၼ်တင်းၶူဝ်းသွင်ၸုမ်ႇလႄႈ တၢင်ႇသႂ်ႇပၼ်ၵႃႈၼိူဝ်ၵူၼ်းဢွၼ်ႇမၼ်းသွင်ၵေႃႉသေယဝ်ႉ၊ သွင်ၶႃၼၼ်ႉလႆႈတဵင်ႇဢွၼ်ႁူဝ်မၼ်းၼၼ်ႉဢေႃႈ။-

24မိူဝ်ႈဢၼ်ႁွတ်ႈထိုင်ၵႃႈၼိူဝ်ၵုင်းၼၼ်ႉၸိုင်၊ မၼ်းၼၼ်ႉဢဝ်ဢုၵ်ႉၸႃႇၼၼ်ႉသေၵႃႈၼႂ်းမိုဝ်းသွင်ၶႃၼၼ်ႉသိူင်ႇသိမ်းဝႆႉၵႃႈၼႂ်းႁိူၼ်းမၼ်းလႄႈ ပွႆႇသွင်ၶႃၼၼ်ႉသေလႄႈ၊ သွင်ၶႃၼၼ်ႉဢွၵ်ႇၵႂႃႇသေယဝ်ႉ၊-

25မၼ်းၼၼ်ႉၶဝ်ႈလႄႈ ၸုၵ်းၵႃႈတီႈၽၢႆႇၼႃႈၸဝ်ႈမၼ်းဢေႃႈ။ ဢေးလီႉသႄး ၵေႃႈထၢမ်တီႈမၼ်းလႄႈဝႃႈ၊ ၵေႇႁႃႇၸီႉ ဢိူၺ်း၊ မႂ်းၵႂႃႇၵႃႈလႂ်မႃး။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၼၼ်ႉၶိုၼ်းလၢတ်ႈလႄႈဝႃႈ၊ ၶႃႈၸဝ်ႈႁဝ်းဢမ်ႇၵႂႃႇၵႃႈလႂ်သေဢိတ်းၶႃႈ၊ ဝႃႈၼင်ႇၼႆသေယဝ်ႉ၊-

26မၼ်းလၢတ်ႈတီႈမၼ်းၼၼ်ႉလႄႈဝႃႈ၊ မိူဝ်ႈဢၼ်ၵေႃႉၼၼ်ႉဝၢႆႇလူင်းသေၵႃႈၼိူဝ်လေႃႉရထႃး ႁႂ်ႈလႆႈႁပ်ႉႁူဝ်တၢင်းမႂ်းၼၼ်ႉၸိုင်၊ ၸႂ်ဝီႉၺိၺ်ႇၵဝ် ဢမ်ႇၸွမ်းလူၺ်ႈၵၼ်တင်းမႂ်းယူႇႁိုဝ်။ ပဵၼ်ၶိင်ႇဢၼ်ၶၢမ်ႇဢဝ်ငိုၼ်းႁိုဝ်။ ပဵၼ်ၶိင်ႇဢၼ်သိမ်းဢဝ်ၶူဝ်းၼုင်ႈတၢင်းမႆ၊ သူၼ်ဢူးယဵၼ်ႇ သၢၼ်ႇလုၼ်ႇ ၊ သူၼ်ဢူးယဵၼ်ႇၸပိတ်ႈ၊ သူဝ်း၊ ဝူဝ်း၊ ၶႃႈၵူၼ်းၸၢႆးၶႃႈၵူၼ်းယိင်းႁိုဝ်။-

27ပိူဝ်ႈဢၼ်ပဵၼ်ၼင်ႇၼႆလႄႈ ႁႂ်ႈတုတ်ႈ ၼေႇမၢၼ်ႇ ၸပ်းတီႈမႂ်း ဢိၵ်ႇတင်းတီႈမဵဝ်းၸိူဝ်ႉၶိူဝ်းမႂ်းယူႇတႃႇသေႇသေၵမ်း၊ ဝႃႈၼင်ႇၼႆလႄႈ၊ မၼ်းၼၼ်ႉပဵၼ်တုတ်ႈဢၼ်ၽိူၵ်ႇၶၢဝ်ဝႆႉ မိူၼ်ၸိူဝ်ႉၼင်ႇမူၺ်ႁႃႇၼၼ်ႉယူႇသေလႄႈ ဢွၵ်ႇၵႂႃႇသေၵႃႈတီႈၸဝ်ႈမၼ်းဢေႃႈ။

← Chapter 4 Jump to: Chapter 6 →