2 Kings 6 — Shan

1ၽဝ်ႇၼိုင်ႈ ၵူၼ်းမဵဝ်းပရေႃးၽႅတ်ႈတင်းလၢႆ လၢတ်ႈတီႈ ဢေးလီႉသႄး လႄႈဝႃႈ၊ တူၺ်းၶႃႈလူး၊ တီႈဢၼ်ႁဝ်းၶႃႈယူႇလူၺ်ႈၵၼ်တင်းၸဝ်ႈႁဝ်းမိူဝ်ႈလဵဝ်ၼႆႉၼႆႉၵိတ်ႇၵႅပ်ႈၼႃႇပုၼ်ႈႁဝ်းၶႃႈၶႃႈဢေႃႈ။-

2ၶႅၼ်းတေႃႈႁႂ်ႈႁဝ်းၶႃႈလႆႈၵႂႃႇၵႃႈတီႈၼမ်ႉႁွင်ႈ ယေႃးတၢၼ်ႇ ၼၼ်ႉလႄႈ ၽွမ်ႉၵၼ်ဢဝ်မႆႉၸိင်ယေႈၵေႃႉယေႈလႅမ်ႈၵႃႈတီႈၼၼ်ႈသေယဝ်ႉ၊ ႁဵတ်းပုၼ်ႈဢၼ်ႁဝ်းၶႃႈတၵ်းယူႇၵႃႈတီႈၼၼ်ႈသေၵမ်းၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၶိုၼ်းလၢတ်ႈလႄႈဝႃႈ၊ ဢွၼ်ၵၼ်ၵႂႃႇတႃႉ၊ ဝႃႈၼင်ႇၼႆဢေႃႈ။-

3ၵူၼ်းၵေႃႉၼိုင်ႈတွင်းပၢၼ်ႇလႄႈဝႃႈ၊ ၶႅၼ်းတေႃႈယႃႇပေတွပ်ႇထဵင်သေၵမ်းၶႃႈ။ ၶႅၼ်းတေႃႈၵႂႃႇလူၺ်ႈၵၼ်တင်းၶႃႈၸဝ်ႈသေၵမ်းၶႃႈ၊ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ၵဝ်တၵ်းၵႂႃႇဢိူဝ်ႈ၊ ဝႃႈၼင်ႇၼႆလႄႈ၊ ၵႂႃႇလူၺ်ႈၵၼ်တင်းၶဝ်ဢေႃႈ။-

4မိူဝ်ႈဢၼ်ၶဝ်ႁွတ်ႈထိုင်ၵႃႈတီႈၼမ်ႉႁွင်ႈ ယေႃးတၢၼ်ႇ ၼၼ်ႉၸိုင်၊ ၶဝ်ဢွၼ်ၵၼ်ပမ်ႈမႆႉၽၼ်းမႆႉဢေႃႈ။-

5ၵူၼ်းၵေႃႉၼိုင်ႈ ၼႂ်းမိူဝ်ႈဢၼ်မၼ်းယင်းတိုၵ်ႉပမ်ႈမႆႉၽၼ်းမႆႉယူႇၼၼ်ႉၸိုင်၊ မၢၵ်ႈတႃမၢတ်ႇမၼ်းတူၵ်းၵႃႈၼႂ်းၼမ်ႉၵႂႃႇလႄႈ၊ မၼ်းႁွင်ႉသႅၼ်ႇလႄႈဝႃႈ၊ ဢလူဝ်း။ ဢလူဝ်း၊ ဢလူဝ်း၊ ၸဝ်ႈဢိူၺ်း၊ ပဵၼ်ၶွင်ဢၼ်ယိမ်ပိူၼ်ႈမႃးၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

6ၵူၼ်းၽြႃးပဵၼ်ၸဝ်ႈထၢမ်လႄႈဝႃႈ၊ တူၵ်းၵႃႈတီႈလႂ်၊ မိူဝ်ႈဢၼ်ဝႃႈၼင်ႇၼႆၸိုင်၊ ၵေႃႉၼၼ်ႉၼႄပၼ်တီႈဢၼ်တူၵ်းၼၼ်ႉတီႈမၼ်းလႄႈ၊ မၼ်းတႅပ်းၽၼ်းၶွၼ်ႉလႅမ်ႈၼိုင်ႈလႄႈ ၶျႃးတူၵ်းသႂ်ႇၵႃႈတီႈၼၼ်ႈသေယဝ်ႉ၊ လဵၵ်းၼၼ်ႉၽူးမႃးဢေႃႈ။-

7မၼ်းလၢတ်ႈလႄႈဝႃႈ၊ ယိပ်းဢဝ်တႃႉ၊ ဝႃႈၼင်ႇၼႆလႄႈ၊ ၵေႃႉၼၼ်ႉယိုၼ်းမိုဝ်းမၼ်းလႄႈဢဝ်ဢေႃႈ။

8ၽဝ်ႇၼိုင်ႈ ၶုၼ်ႁေႃၶမ်း သူႉရီႉ ၊ တိုၵ်းၵၼ်တင်းမိူင်း ဢီႉသရေႇလႃႉ ၊ မိူဝ်ႈဢၼ်မၼ်းတိူင်ႇပၢင်ႇၵၼ်တင်းၶႃႈမၼ်းၵူၼ်းမၼ်းလႄႈဝႃႈ၊ ၵဝ်တၵ်းၶျႃးတပ်ႉၵႃႈတီႈဢၼ်ၸိူဝ်းၼၼ်ႉ၊ ၵႃႈတီႈဢၼ်ၸိူဝ်းၼႆႉဢေႃႈ၊ ဝႃႈၼင်ႇၼႆၼၼ်ႉၸိုင်၊-

9ၵူၼ်းၽြႃးပဵၼ်ၸဝ်ႈၼၼ်ႉ ပွႆႇၸႂ်ႉၸူးတီႈၶုၼ်ႁေႃၶမ်း ဢီႉသရေႇလႃႉ လႄႈဝႃႈ၊ ႁဵတ်းသတီႉလူၺ်ႈလွင်ႈဢၼ် တၵ်းၵႂႃႇၸူးတီႈဢၼ်ၸိူဝ်းၼႆႉသေၵမ်း။ ၵူၼ်း သူႉရီႉ တင်းလၢႆယင်းတိုၵ်ႉလူင်းမႃးၸူးၵႃႈတီႈၼၼ်ႈယူႇဢေႃႈ၊ ဝႃႈၼင်ႇၼႆလႄႈ၊-

10ၶုၼ်ႁေႃၶမ်း ဢီႉသရေႇလႃႉ ပွႆႇၸႂ်ႉၵႃႈတီႈဢၼ်ၵူၼ်းၽြႃးပဵၼ်ၸဝ်ႈပၼ်သတီႉၼၼ်ႉလႄႈ၊ ပွၵ်ႈၼိုင်ႈ သွင်ပွၵ်ႈဢမ်ႇၵႃးလႆႈၵၢင်းလွတ်ႈဢေႃႈ၊

11ၵွပ်ႈပိူဝ်ႈလွင်ႈၼၼ်ႉလႄႈ၊ ၶုၼ်ႁေႃၶမ်း သူႉရီႉ မႆႈၸႂ်ၶီၸႂ်လႄႈ ႁွင်ႉဢဝ်ၶႃႈမၼ်းၵူၼ်းမၼ်းသေလႄႈ ထၢမ်လႄႈဝႃႈ၊ သူယင်းဢမ်ႇၼႄပျႃးလွင်ႈဢၼ်ၵႃႈၼႂ်းႁဝ်းၼႆႉၽူႈလႂ်ယူႇၽၢႆႇၶုၼ်ႁေႃၶမ်း ဢီႉသရေႇလႃႉ ၼၼ်ႉ တီႈၵဝ်လႄႈတၵ်းယူႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

12ၶႃႈမၼ်းၵူၼ်းမၼ်းၵေႃႉၼိုင်ႈလဝ်ႊလၢတ်ႈလႄႈဝႃႈ၊ ဢမ်ႇၸႂ်ႈၸိူဝ်ႉၼင်ႇၼၼ်တီႈၶႃႈ ၸဝ်ႈၶုၼ်လူင်၊ ပရေႃးၽႅတ်ႈ ဢေးလီႉသႄး ဢၼ်မီးၵႃႈၼႂ်းမိူင်း ဢီႉသရေႇလႃႉ ၼၼ်ႉ ၸၢင်ႈဢဝ်ၵႂၢမ်းဢၼ်ၸဝ်ႈႁဝ်းမီးဢမိင်ႉၵႃႈတီႈၼႂ်းလုၵ်းၼွၼ်းၸဝ်ႈႁဝ်းၼၼ်ႉ၊ မွၵ်ႇလၢတ်ႈတီႈၶုၼ်ႁေႃၶမ်း ဢီႉသရေႇလႃႉ တီႈၶႃႈဢေႃႈ၊ ဝႃႈၼင်ႇၼႆဢေႃႈ။

13မၼ်းၵေႃႈမီးဢမိင်ႉလႄႈဝႃႈ၊ ၵႂႃႇလွမ်တူၺ်းတီႈဢၼ်မၼ်းယူႇၼၼ်ႉတႃႉ။ ၵဝ်တၵ်းပွႆႇၸႂ်ႉၵႂႃႇ ႁႂ်ႈလႆႈတီႉဢဝ်မၼ်းမႃးဢေႃႈ၊ ဝႃႈၼင်ႇၼႆသေယဝ်ႉ၊ ပိူၼ်ႈလဝ်ႊလၢတ်ႈလႄႈဝႃႈ၊ မၼ်းၼၼ်ႉမီးၵႃႈတီႈဝဵင်း တေႃႇသၼ်ႇ တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

14မၼ်းပွႆႇၸႂ်ႉၵူၼ်းသိုၵ်းၶီႇမႃႉ၊ ၵူၼ်းသိုၵ်းၶီႇလေႃႉရထႃး၊ ပူဝ်ႇပႃႇဢၼ်ယႂ်ႇၼႃႇၵႂႃႇၵႃႈတီႈဝဵင်းၼၼ်ႉလႄႈ၊ ၶဝ်ၼၼ်ႉႁွတ်ႈထိုင်ၶိင်ႇၵၢင်ၶိုၼ်းၼၼ်ႉလႄႈ ဢွၼ်ၵၼ်လွမ်ႉႁွပ်ႈဝဵင်းဝႆႉဢေႃႈ။-

15ၶိင်ႇၵၢင်ၼႂ်ၸဝ်ႉၸဝ်ႉ၊ ၵူၼ်းဢွၼ်ႇၵူၼ်းၽြႃးပဵၼ်ၸဝ်ႈၼၼ်ႉ လုၵ်ႉလႄႈဢွၵ်ႇၵႃႈၼွၵ်ႈသေယဝ်ႉ၊ ႁၼ်ပူဝ်ႇပႃႇဢၼ်ပႃး ၵူၼ်းသိုၵ်းၶီႇမႃႉ၊ ၵူၼ်းသိုၵ်းၶီႇလေႃႉရထႃးၼၼ်ႉ လွမ်ႉႁွပ်ႈဝဵင်းယူႇၼၼ်ႉလႄႈ၊ ၵူၼ်းဢွၼ်ႇၼၼ်ႉလၢတ်ႈတီႈၸဝ်ႈမၼ်းလႄႈဝႃႈ၊ ဢလူဝ်း ၸဝ်ႈဢိူၺ်း၊ တၵ်းႁဵတ်းၸိူဝ်ႉၼင်ႇႁိုဝ်တီႈၶႃႈ၊ ဝႃႈၼင်ႇၼႆဢေႃႈ။-

16မၼ်းၶိုၼ်းလၢတ်ႈလႄႈဝႃႈ၊ ယႃႇပေမႆႈၸႂ်။ ၶဝ်ၸိူဝ်းဢၼ်ယူႇၽၢႆႇႁဝ်းၼႆႉ ယဵင်ႈၶႅၼ်းၼမ်ၼႃႇသေၶဝ်ၸိူဝ်းဢၼ် ယူႇၽၢႆႇၶဝ်ၼၼ်ႉဢေႃႈ၊ ဝႃႈၼင်ႇၼႆသေလႄႈ၊-

17ဢေးလီႉသႄး သူးတွင်းလႄႈဝႃႈ၊ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈၽုၺ်ႇမၢၵ်ႇတႃမၼ်းၼႆႉ ႁႂ်ႈမၼ်းလႆႈႁၼ်သေၵမ်းတီႈၶႃႈ၊ ဝႃႈၼင်ႇၼႆလႄႈ၊ ထႃႇဝရႃႉၽြႃး ၽုၺ်ႇမၢၵ်ႇတႃၵူၼ်းဢွၼ်ႇၼၼ်ႉလႄႈ၊ မၼ်းၼၼ်ႉႁၼ်လွႆၼၼ်ႉ တဵမ်ဝႆႉတင်းမႃႉၽႆးလႂ်၊ လေႃႉရထႃးၽႆးလႂ်ၵႃႈတီႈဢၼ်လဵပ်ႈႁွပ်ႈ ဢေးလီႉသႄး ၼၼ်ႉဢေႃႈ။-

18မိူဝ်ႈဢၼ်ၶဝ်ၼၼ်ႉ လူင်းၸူးၵႃႈတီႈမၼ်းၼၼ်ႉၸိုင်၊ ဢေးလီႉသႄး သူးတွင်းတီႈထႃႇဝရႃႉၽြႃးလႄႈဝႃႈ၊ ၶႅၼ်းတေႃႈပၼ်တၢမ်ႇႁႂ်ႈမၢၵ်ႇတႃၶဝ်ၸိူဝ်းၼႆႉမွတ်ႇသေၵမ်းတီႈၶႃႈ၊ ဝႃႈၼင်ႇၼႆလႄႈ၊ မၼ်းၸဝ်ႈပၼ်တၢမ်ႇဢၼ်တႃမွတ်ႇတီႈၶဝ်ၼၼ်ႉ ၸွမ်းၵႃႈၼင်ႇဢၼ် ဢေးလီႉသႄး သူးတွင်းၼၼ်ႉဢေႃႈ။

19ဢေးလီႉသႄး ၵေႃႈ လၢတ်ႈတီႈၶဝ်ၼၼ်ႉလႄႈဝႃႈ၊ ဢမ်ႇၸႂ်ႈသဵၼ်ႈတၢင်းၼႆႉၵူၺ်ႉ၊ ဢမ်ႇၸႂ်ႈဝဵင်းၼႆႉၵူၺ်ႉ၊ ၸွမ်းလင်ၵဝ်တႃႉ။ ၵဝ်တၵ်းဢဝ်သူ သူင်ႇပၼ်တီႈၵေႃႉဢၼ်သူႁူႉၼၼ်ႉဢေႃႈ၊ ဝႃႈၼင်ႇၼႆသေလႄႈ ဢဝ်ၶဝ်ၼၼ်ႉ ၵႂႃႇသူင်ႇၵႃႈတီႈဝဵင်း သမႃႇရီႉ ဢေႃႈ။-

20မၼ်းႁွတ်ႈထိုင်ၵႃႈၼႂ်းဝဵင်း သမႃႇရီႉ သေယဝ်ႉ၊ ဢေးလီႉသႄး သူးတွင်းလႄႈဝႃႈ၊ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈၽုၺ်ႇတႃၶဝ်ၸိူဝ်းၼႆႉ ႁႂ်ႈၶဝ်လႆႈႁၼ်သေၵမ်းတီႈၶႃႈ၊ ဝႃႈၼင်ႇၼႆလႄႈ၊ ထႃႇဝရႃႉၽြႃးၽုၺ်ႇမၢၵ်ႇတႃၶဝ်ၼၼ်ႉသေယဝ်ႉ၊ ၶဝ်ၼၼ်ႉႁၼ်လႄႈ ႁူႉလွင်ႈဢၼ်ၶဝ်မီးယူႇၵႃႈၼႂ်းၵၢင်ဝဵင်း သမႃႇရီႉ ၼၼ်ႉဢေႃႈ။-

21ၶုၼ်ႁေႃၶမ်း ဢီႉသရေႇလႃႉ ၵေႃႈထၢမ်တီႈ ဢေးလီႉသႄး လႄႈဝႃႈ၊ ပေႃႈဢိူၺ်း၊ ၵဝ်တၵ်းလႆႈဢဝ်ၶဝ်ၸိူဝ်းၼႆႉတၢႆႁိုဝ်။ တၵ်းလႆႈဢဝ်တၢႆႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

22မၼ်းၶိုၼ်းလၢတ်ႈလႄႈဝႃႈ၊ ယႃႇပေဢဝ်တၢႆသေၵမ်းတီႈၶႃႈ။ တၵ်းလႆႈဢဝ်ၶဝ်ၸိူဝ်းဢၼ်ၸဝ်ႈႁဝ်းပႃးဢဝ်တင်းလၢပ်ႇတင်းၵၢင်ႇသေလႄႈ တိုၵ်းတေႃးလႄႈတီႉလႆႈယဝ်ႉၼၼ်ႉတၢႆတီႈၶႃႈႁိုဝ်။ ဢဝ်ၶဝ်ႈမုၼ်းတင်းၼမ်ႉတမ်းပၼ်ၵႃႈတီႈၽၢႆႇၼႃႈၶဝ်လႄႈ ႁႂ်ႈၶဝ်ၵိၼ်ၶူပ်းသေယဝ်ႉ၊ ၶိုၼ်းမိူဝ်းၵႂႃႇၵႃႈတီႈၸဝ်ႈၶဝ်ၼၼ်ႉသေၵမ်းတီႈၶႃႈ၊ ဝႃႈၼင်ႇၼႆလႄႈ

23ပွင်ႁႅၼ်းတၢင်းၵိၼ်တၢင်းၶူပ်းၼမ်ၼႃႇလူင်လၢင်ပုၼ်ႈၶဝ်ၼၼ်ႉလႄႈ ႁႂ်ႈၶဝ်ၵိၼ်ၶူပ်းသေယဝ်ႉ၊ ပွႆႇၶဝ်လႄႈၶဝ်ၼၼ်ႉ ဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈၸဝ်ႈၶဝ်သေဢေႃႈ။ လိုၼ်းၼၼ်ႉၵူၼ်း သူႉရီႉ တင်းလၢႆ ဢမ်ႇႁဵတ်းမုၵ်ႉႁဵတ်းၸိူဝ်းသေလႄႈ မႃးၵႃႈတီႈမိူင်း ဢီႉသရေႇလႃႉ ။

24လိုၼ်းၼၼ်ႉ ပိၼ်ႇႁႃႇတတ်ႉ ၶုၼ်ႁေႃၶမ်း သူႉရီႉ ၼၼ်ႉ ႁႂ်ႈပူဝ်ႇပႃႇၵူၼ်းသိုၵ်းမၼ်းတင်းသဵင်ႈတင်းလူင် ၸူႉၵၼ်တုမ်ၵၼ်သေလႄႈ ၶီႇသိုၵ်းၶိုၼ်ႈၸူးလႄႈ လွမ်ႉဝဵင်း သမႃႇရီႉ ဝႆႉဢေႃႈ။-

25ၵႃႈၼႂ်းဝဵင်း သမႃႇရီႉ ၼၼ်ႉ ပဵၼ်ဢၼ်တၢင်းၵိၼ်တၢင်းၶူပ်းၵႃႈပႅင်းၼႃႇလူင်လၢင်လႄႈ၊ ၶဝ်ၼၼ်ႉဢွၼ်ၵၼ်လွမ်ႉဝဵင်းၶၢင်းဝဵင်းဝႆႉ တေႃႇထိုင်ႁွတ်ႈထၼ်ႈပေႃး ၵွၵ်းႁူဝ်လီႈယေႈလုၵ်ႈလႆႈၶၢႆဢဝ်ငိုၼ်းပႅတ်ႇသိပ်းၵျၢပ်ႈ၊ ၶီႈၼူၵ်ႉတူႈယေႈပႄႇငိုၼ်းႁႃႈၵျၢပ်ႈဢေႃႈ။-

26ၼႂ်းမိူဝ်ႈဢၼ်ၶုၼ်ႁေႃၶမ်း ဢီႉသရေႇလႃႉ ပႆၵႃႈၼိူဝ်လမ်းဝဵင်းၵႂႃႇယူႇၼၼ်ႉၸိုင်၊ မႄႈယိင်းၵေႃႉၼိုင်ႈ ႁွင်ႉသႅၼ်ႇတီႈမၼ်းလႄႈဝႃႈ၊ ၸဝ်ႈၶုၼ်လူင်တီႈၶႃႈ၊ ၵႄႇသႄႇၸွႆႈထႅမ်သေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

27မၼ်းထၢမ်လႄႈဝႃႈ၊ ပေႃးထႃႇဝရႃႉၽြႃးဢမ်ႇၵႄႇသႄႇၸွႆႈထႅမ်မႂ်းၸိုင် ၵဝ်တၵ်းၵႄႇသႄႇၸွႆႈထႅမ်မႂ်းလႆႈၸိူဝ်ႉၼင်ႇႁိုဝ်။ တၵ်းလႆႈဢဝ်ၵႃႈၼႂ်းတလၢင်းယဵပ်ႇၶဝ်ႈ၊ ၵႃႈၼႂ်းၶိူင်ႈၼူတ်ႈမၢၵ်ႇၸပိတ်ႈၼၼ်ႉၵႄႇသႄႇၸွႆႈထႅမ်ႁိုဝ်။ ဝႃႈၼင်ႇၼႆသေယဝ်ႉ၊-

28ၶုၼ်ႁေႃၶမ်းသမ်ႉထၢမ်လႄႈဝႃႈ၊ မႂ်းပဵၼ်ၵႃႈသင်၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၼၼ်ႉလဝ်ႊလၢတ်ႈလႄႈဝႃႈ၊ မႄႈယိင်းၼႆႉလၢတ်ႈတီႈၶႃႈၸဝ်ႈလႄႈဝႃႈ၊ ဢဝ်လုၵ်ႈၸၢႆးမႂ်းဢၢပ်ႈပၼ်ပုၼ်ႈဢၼ်ႁဝ်းတၵ်းၵိၼ်ဝၼ်းမိူဝ်ႈၼႆႉသေၵမ်း၊ ဝၼ်းမိူဝ်ႈၽုၵ်ႈၸိုင် ႁဝ်းတၵ်းၵိၼ်လုၵ်ႈၸၢႆးၵဝ်ဢေႃႈ၊ ဝႃႈၼင်ႇၼႆလႄႈ၊-

29ၶႃႈၸဝ်ႈႁဝ်းၶဝ်ဢွၼ်ၵၼ်တူမ်ႈလုၵ်ႈၸၢႆးၶႃႈၸဝ်ႈလႄႈ ၵိၼ်တီႈၶႃႈဢေႃႈ၊ ဝၼ်းမိူဝ်ႈၽုၵ်ႈၼၼ်ႉၶႃႈၸဝ်ႈယွၼ်းတီႈမၼ်းလႄႈဝႃႈ၊ ဢဝ်လုၵ်ႈၸၢႆးမႂ်းဢၢပ်ႈပၼ်ပုၼ်ႈဢၼ်ႁဝ်းတၵ်းၵိၼ်သေၵမ်း၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းဢဝ်လုၵ်ႈၸၢႆးမၼ်းသိူင်ႇမႅပ်ႉဝႆႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

30ၶုၼ်ႁေႃၶမ်းငိၼ်းၵႂၢမ်းမႄႈယိင်းၼၼ်ႉသေယဝ်ႉ၊ သိၵ်ႇၶူဝ်းၼုင်ႈမၼ်းလႄႈ၊ ၼႂ်းမိူဝ်ႈဢၼ်မၼ်းပႆၵႃႈၼိူဝ်လမ်းဝဵင်းယူႇၼၼ်ႉၸိုင်၊ ၵူၼ်းတင်းလၢႆတူၺ်းလႄႈ လႆႈႁူႉႁၼ်လွင်ႈဢၼ်မၼ်းၼုင်ႈၼင်ပေႃ တၢင်းၼႂ်းၸပ်းၼိူဝ်ႉၸပ်းၼင်မၼ်းၼၼ်ႉယူႇဢေႃႈ။-

31မၼ်းလၢတ်ႈလႄႈဝႃႈ၊ ပေႃးၵွၵ်းႁူဝ် ဢေးလီႉသႄး လုၵ်ႈၸၢႆး သႃႇၽတ်ႉ ၼၼ်ႉ ယင်းၵိုတ်းဝႆႉယူႇၵႃႈတီႈတူဝ်မၼ်းဝၼ်းမိူဝ်ႈၼႆႉၸိုင်၊ ယင်းဢမ်ႇၵႃးဢၼ်ၼၼ်ႉလႄႈ ႁႂ်ႈၽြႃးပဵၼ်ၸဝ်ႈႁဵတ်းလိူဝ်တွၼ်းၼႃႇသေၼၼ်ႉတီႈၵဝ်သေၵမ်းလူၺ်ႈ၊ ဝႃႈၼင်ႇၼႆဢေႃႈ။-

32မိူဝ်ႈၼၼ်ႉ ဢေးလီႉသႄး ၼၼ်ႉ ၼင်ႈယူႇၵႃႈၼႂ်းႁိူၼ်းမၼ်းလႄႈ ၶဝ်ၸိူဝ်းဢၼ် ပဵၼ်ၵႄႇပဵၼ်ႁူဝ်ၼၼ်ႉ ယင်းတိုၵ်ႉၼင်ႈယူႇလူၺ်ႈၵၼ်တင်းမၼ်းဢေႃႈ။ ၶုၼ်ႁေႃၶမ်းပွႆႇၸႂ်ႉၵူၼ်းၵေႃႉၼိုင်ႈသေ၊ ၵႃႈတီႈၽၢႆႇၼႃႈၸဝ်ႈၼၼ်ႉလႄႈ ၸူဝ်ႈဢၼ်ၵူၼ်းၸႂ်ႉၵူၼ်းသွႆၼၼ်ႉ ဢမ်ႇပႆႇႁွတ်ႈထိုင်တီႈမၼ်းၼၼ်ႉၸိုင်၊ မၼ်းလၢတ်ႈတီႈၶဝ်ၸိူဝ်းဢၼ်ပဵၼ်ၵႄႇပဵၼ်ႁူဝ်ၼၼ်ႉလႄႈဝႃႈ၊ သူႁူႉႁၼ် လွင်ႈဢၼ်လုၵ်ႈၸၢႆးၵေႃႉၼၼ်ႉ ဢဝ်ဢသၢၵ်ႈၵူၼ်းတၢႆၼၼ်ႉၼၼ်ႉပွႆႇၸႂ်ႉႁႂ်ႈမႃး တႅပ်းဢဝ်ၵွၵ်းႁူဝ်ၵဝ်ၼၼ်ႉႁိုဝ်။ မိူဝ်ႈဢၼ်ၵူၼ်းၸႂ်ႉၵူၼ်းသွႆၼၼ်ႉႁွတ်ႈမႃးၼၼ်ႉၸိုင်၊ ဢိုတ်းႁပ်းၽၵ်းတူဝႆႉသေလႄႈ ဢီးၽၵ်းတူႁၢမ်ႈတၢပ်ႈႁႄႉၶႅၼ်မၼ်းဝႆႉတႃႉ။ သဵင်တိၼ်ၸဝ်ႈမၼ်းမေႃးယူႇလိုၼ်းမၼ်းဢမ်ႇၸႂ်ႈႁိုဝ်၊ ဝႃႈၼင်ႇၼႆ၊-

33ၼႂ်းမိူဝ်ႈဢၼ်မၼ်းယင်းတိုၵ်ႉလၢတ်ႈၵၼ်တင်းၶဝ်ယူႇၼၼ်ႉ၊ ၵူၼ်းၸႂ်ႉၵူၼ်းသွႆၼၼ်ႉႁွတ်ႈမႃးဢေႃႈ။ ၶုၼ်ႁေႃၶမ်းၵေႃႈႁွတ်ႈထိုင်သေယဝ်ႉ၊ လၢတ်ႈလႄႈဝႃႈ၊ ဢမူႉၼႆႉၸမ်ႉ၊ ပဵၼ်ဢမူႉဢၼ်ထႃႇဝရႃႉၽြႃးၸီႇယၢင်ႇဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၵဝ်ယင်းလႆႈပႂ်ႉမုင်ႈပႂ်ႉမွင်းၵျေးၸူးထႃႇဝရႃႉၽြႃးယူႇထႅင်ႈလူးၵွၼ်ႇၸိူဝ်ႉၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်။