2 Kings 15

Shan

← Chapter 14 Jump to: Chapter 16 →

1ၼႂ်းပီႊဢၼ် ယေႇရူဝ်းပုမ်ႇ ၶုၼ်ႁေႃၶမ်း ဢီႉသရေႇလႃႉ ၸၢမ်ႇႁၢင်ႈၸၢမ်ႇႁေႃသၢဝ်းပၢႆၸဵတ်းပီႊၼၼ်ႉ၊ ဢႃႇၸရီႉ လုၵ်ႈၸၢႆးၸဝ်ႈ ဢႃႇမၸီႉ ၶုၼ်ႁေႃၶမ်း ယူႉတႃႉ ၼၼ်ႉ ၸႃႉၼင်ႈႁၢင်ႈၼင်ႈႁေႃဢေႃႈ။-

2မိူဝ်ႈဢၼ်မၼ်းၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ ဢသၢၵ်ႈမၼ်းလႆႈသိပ်းပၢႆႁူၵ်းပီႈလႄႈ၊ မၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရူႉသလႅမ်ႇ ႁႃႈသိပ်းပၢႆသွင်ပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ယေႇၶေႃးလီႉ ၵူၼ်းယိင်းဝဵင်း ယေႇရူႉသလႅမ်ႇ ဢေႃႈ။-

3မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃး ၸွမ်းၵႃႈဢၼ်ၸဝ်ႈပေႃႈမၼ်း ဢႃႇမၸီႉ ႁဵတ်းၼၼ်ႉဢေႃႈ။-

4ၵူၺ်းၵႃႈမၼ်းဢမ်ႇပႄႇပႅတ်ႈထႃႇၼႃႉတီႈသုင်တင်းလၢႆလႄႈ၊ ၵူၼ်းတင်းလၢႆယင်းဢွၼ်ၵၼ်ပုၵ်ႈၸေႃႇယိတ်ႈလႄႈ ဢဝ်ၼၢမ်ႇသႃႇတုတ်ႇၽႆးၵႃႈတီႈထႃႇၼႃႉတီႈသုင်ၸိူဝ်းၼၼ်ႉယူႇဢေႃႈ။

5ထႃႇဝရႃႉၽြႃးပၼ်တၢမ်ႇတီႈၶုၼ်ႁေႃၶမ်းၼၼ်ႉလႄႈ၊ မၼ်းပဵၼ်တုတ်ႈ တေႃႇထိုင်ႁွတ်ႈမၼ်းထၼ်ႈပေႃးတၢႆလႄႈ လႆႈယူႇၵႃႈတီႈႁေႃလင်ၼိုင်ႈၶေႃၶေႃၵူၺ်းမၼ်းဢေႃႈ။ ယူဝ်းထမ်ႇ လုၵ်ႈၸၢႆးၸဝ်ႈၼၼ်ႉ လႆႈဢုပ်ႉၵႃႈၼိူဝ်ႁေႃၸဝ်ႈလႄႈ ၸီႇယၢင်ႇဢမူႉတီႈၵူၼ်းဝၢၼ်ႈၵူၼ်းမိူင်းတင်းလၢႆဢေႃႈ။-

6လွင်ႈတၢင်း ဢႃႇၸရီႉ ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းၵႃႈဢၼ်မၼ်းႁဵတ်းၼၼ်ႉၸိူဝ်းၼၼ်ႉ တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ ဢေႃႈ။-

7ဢႃႇၸရီႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ၊ ၶဝ်ဢဝ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉၵႃႈၼႂ်းဝဵင်း တႃႇဝိတ်ႈ ဢေႃႈ။ ယူဝ်းထမ်ႇ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

8ၼႂ်းပီႊဢၼ် ဢႃႇၸရီႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃ သၢမ်သိပ်းပၢႆပႅတ်ႇပီႊၼၼ်ႉ၊ ၸႃႇၶရီႉ လုၵ်ႈၸၢႆးၸဝ်ႈ ယေႇရူဝ်းပုမ်ႇ ၼၼ်ႉ ဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ ယူႇၵႃႈၼႂ်းဝဵင်း သမႃႇရီႉ ႁူၵ်းလိူၼ်တဵမ်တဵမ်ဢေႃႈ။-

9မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃး ၸွမ်းၵႃႈၼင်ႇဢၼ်ပူႇမၼ်းမွၼ်ႇမၼ်းႁဵတ်းၼၼ်ႉလႄႈ ယင်းဢမ်ႇၸုၼ်ႉပႅတ်ႈတူႉၸရိူၵ်ႈဢပႅတ်ႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ဢၼ်မၼ်းႁႂ်ႈမဵဝ်း ဢီႉသရေႇလႃႉ ၼၼ်ႉ ၽိတ်းပိူင်ႈလႄႈယူႇဢေႃႈ။-

10သႃႇလုမ်ႇ လုၵ်ႈၸၢႆး ယႃႇၽႅတ်ႉ ၼၼ်ႉ လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်းလႄႈ ယႃႉမၼ်းပႅတ်ႈ ႁႂ်ႈထၼ်ႈပေႃးတၢႆၵႃႈတီႈၽၢႆႇၼႃႈၵူၼ်းတင်းလၢႆသေလႄႈ ၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။-

11လွင်ႈတၢင်း ၸႃႇၶရီႉ ဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။-

12ၼင်ႇၼၼ်လႄႈ ၵႂၢမ်းဢၼ်ထႃႇဝရႃႉၽြႃးမီးဢမိင်ႉဝႆႉတီႈ ယေႇႁူႉ လႄႈဝႃႈ၊ ၸူဝ်ႈလုၵ်ႈပၢၼ်လၢၼ်မႂ်းတၵ်းလႆႈၼင်ႈၵႃႈၼိူဝ်ရႃႇၸႃႉပလၢင်ႇ မိူင်း ဢီႉသရေႇလႃႉ တေႃႇထိုင်ႁွတ်ႈသီႇသိုပ်ႇဢေႃႈ၊ ဝႃႈၼင်ႇၼႆၼၼ်ႉပျေႉၸုမ်ႇယဝ်ႉဢေႃႈ။

13ၼႂ်းပီႊဢၼ် ဢူဝ်းၸီႉယႃႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃသၢမ်သိပ်းပၢႆၵဝ်ႈပီႊၼၼ်ႉ၊ သႃႇလုမ်ႇ ၼၼ်ႉၸႃႉၼင်ႈႁၢင်ႈၼင်ႈႁေႃလႄႈ ဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း သမႃႇရီႉ လိူၼ်ၼိုင်ႈဢေႃႈ။-

14မေႇၼႁိမ်ႇ လုၵ်ႈၸၢႆး ၵႃႇတီႉ ၼၼ်ႉ လုၵ်ႉသေၵႃႈတီႈဝဵင်း တီႉရၸႃႉ ၶိုၼ်ႈၸူးလႄႈႁွတ်ႈထိုင်ၵႃႈတီႈဝဵင်း သမႃႇရီႉ သေယဝ်ႉ၊ ယႃႉပႅတ်ႈ သႃႇလုမ်ႇ လုၵ်ႈၸၢႆး ယႃႇၽႅတ်ႉ ၼၼ်ႉ ၵႃႈၼႂ်းဝဵင်း သမႃႇရီႉ ၼၼ်ႉ ႁႂ်ႈထၼ်ႈပေႃးတၢႆသေလႄႈ ၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။-

15လွင်ႈတၢင်း သႃႇလုမ်ႇ ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းဢၼ်မၼ်းလွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းၶုၼ်ၼၼ်ႉ တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။-

16မိူဝ်ႈၼၼ်ႉ မေႇၼႁိမ်ႇ တိုၵ်းတေႃးယႃႉပႅတ်ႈ ဝဵင်း တီႉၽသႃႉ တင်းၵူၼ်းၵႃႈဢၼ်မီးၵႃႈၼႂ်းမၼ်းတင်းဢိူင်ႇမၼ်း ဢၼ်မၼ်းပူၼ်ႉသေ ဝဵင်း တီႉရၸႃႉ ၵႂႃႇၼၼ်ႉၸိူဝ်းၼၼ်ႉဢေႃႈ။ မၼ်းတိုၵ်းတေႃးယႃႉပႅတ်ႈဝဵင်းၼၼ်ႉ ၵွပ်ႈပိူဝ်ႈဢၼ်ၶဝ်ဢမ်ႇၽုၺ်ႇၽၵ်းတူဝဵင်းပၼ်မၼ်းၼၼ်ႉလႄႈ ၽႃႇတွင်ႉမႄႈယိင်းၵႃႈဢၼ်ပႃးတွင်ႉၸိူဝ်းၼၼ်ႉ ၵႃႈၼႂ်းၼၼ်ႉဢေႃႈ။

17ၼႂ်းပီႊဢၼ် ဢႃႇၸရီႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃ သၢမ်သိပ်းပၢႆၵဝ်ႈပီႊၼၼ်ႉ မေႇၼႁိမ်ႇ လုၵ်ႈၸၢႆး ၵႃႇတီႉ ၼၼ်ႉ ၸႃႉၼင်ႈႁၢင်ႈၼင်ႈႁေႃလႄႈ ဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ ယူႇၵႃႈၼႂ်းဝဵင်း သမႃႇရီႉ သိပ်းပီႊဢေႃႈ။-

18မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ယင်းဢမ်ႇၸုၼ်ႉပႅတ်ႈတူႉၸရိူၵ်ႈဢပႅတ်ႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ဢၼ်မၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉလႄႈယူႇဢေႃႈ။

19ပူႉလႃႉ ၶုၼ်ႁေႃၶမ်း ဢႃႇသူႉရီႉ ၼၼ်ႉ မႃးတိုၵ်းတေႃးမိူင်းၸဝ်ႈလႄႈ၊ မေႇၼႁိမ်ႇ ဢဝ် ပူႉလႃႉ ႁႂ်ႈမၼ်းၼၼ်ႉၸွႆႈထႅမ်မႃႉၸႃႉမၼ်း ႁႂ်ႈဢႃႇၼႃႇမၼ်းလႆႈတႄႇယူႇလႄႈ ပၼ်ငိုၼ်းႁဵင် တလၢၼ်ႇတၢၼ်ႇ တီႈမၼ်းၼၼ်ႉဢေႃႈ။-

20မေႇၼႁိမ်ႇ ၽႃႇငိုၼ်းၵဵပ်းဢဝ်ငိုၼ်းတီႈမဵဝ်း ဢီႉသရေႇလႃႉ ဢၼ်ဝႃႈတီႈၶဝ်ၸိူဝ်းဢၼ် မၢၵ်ႈမီးၵူႈၵေႃႉၵူႈၵူၼ်း ယေႈၵေႃႉႁႃႈၶၼ် ပုၼ်ႈဢၼ်တၵ်းသၢၵ်ႈပၼ် တီႈၶုၼ်ႁေႃၶမ်း ဢႃႇသူႉရီႉ ဢေႃႈ။ ၵွပ်ႈပိူဝ်ႈၼင်ႇၼၼ်လႄႈ ၶုၼ်ႁေႃၶမ်း ဢႃႇသူႉရီႉ ၼၼ်ႉဝၢႆႇၶိုၼ်းမိူဝ်းၵႂႃႇလႄႈ ဢမ်ႇယူႇၵႃႈတီႈမိူင်းၸဝ်ႈၼၼ်ႉ။-

21လွင်ႈတၢင်း မေႇၼႁိမ်ႇ ဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။-

22မေႇၼႁိမ်ႇ ၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ပေႇၵႁီႉ လုၵ်ႈၸၢႆးၸဝ်ႈ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

23ၼႂ်းပီႊဢၼ် ဢႃႇၸရီႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃ ႁႃႈသိပ်းပီႊၼၼ်ႉ၊ ပေႇၵႁီႉ လုၵ်ႈၸၢႆး မေႇၼႁိမ်ႇ ၼၼ်ႉ ၸႃႉၼင်ႈႁၢင်ႈၼင်ႈႁေႃလႄႈ ဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ ယူႇၵႃႈၼႂ်းဝဵင်း သမႃႇရီႉ သွင်ပီႊဢေႃႈ။-

24မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ယင်းဢမ်ႇၸုၼ်ႉပႅတ်ႈတူႉၸရိူၵ်ႈဢပႅတ်ႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ဢၼ်မၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉလႄႈယူႇဢေႃႈ။-

25ပေႇၵႃႇ လုၵ်ႈၸၢႆး ရေႇမလီႉ ပူဝ်ႇၶျုၵ်ႈမၼ်းၼၼ်ႉ လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်းလႄႈ ပႃးဢဝ်ၵူၼ်းမိူင်း ၵီႉလတ်ႉ ႁႃႈသိပ်းၵေႃႉသေလႄႈ ယႃႉပႅတ်ႈမၼ်း ဢိၵ်ႇတင်း ဢႃႇၵေႃႇၽႃႉ တင်း ဢရေႇႁႃႉ ၼၼ်ႉ ၵႃႈၼႂ်းတပ်ႉႁေႃၸဝ်ႈ ၵႃႈတီႈဝဵင်း သမႃႇရီႉ ၼၼ်ႉ ႁႂ်ႈထၼ်ႈပေႃးတၢႆလႄႈ ၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။-

26လွင်ႈတၢင်း ပေႇၵႁီႉ ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းၵႃႈဢၼ်မၼ်းႁဵတ်းၼၼ်ႉၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်း ရႃႇၸဝၢင်ႇ ဢီႉသရေႇလႃႉ ဢေႃႈ။

27ၼႂ်းပီႊဢၼ် ဢႃႇၸရီႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃ ႁႃႈသိပ်းပၢႆသွင်ပီႊၼၼ်ႉ၊ ပေႇၵႃႇ လုၵ်ႈၸၢႆး ရေႇမလီႉ ၸႃႉၼင်ႈႁၢင်ႈၼင်ႈႁေႃလႄႈ ဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ ယူႇၵႃႈၼႂ်းဝဵင်း သမႃႇရီႉ သၢဝ်းပီႊဢေႃႈ။-

28မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ယင်းဢမ်ႇၸုၼ်ႉပႅတ်ႈတူႉၸရိူၵ်ႈဢပႅတ်ႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ဢၼ်မၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉလႄႈယူႇဢေႃႈ။-

29ၼႂ်းၸူဝ်ႈပၢၼ် ပေႇၵႃႇ ၶုၼ်ႁေႃၶမ်း ဢီႉသရေႇလႃႉ ၼၼ်ႉ၊ တီႉၵလတ်ႉပီႉလေႇသႃႇ ၶုၼ်ႁေႃၶမ်း သူႉရီႉ မႃးလႄႈတိုၵ်းဢဝ်ဝဵင်း ဢီႉယုၼ်ႇ ၊ ဝဵင်း ဢႃႇပေႇလႃႉပႅတ်ႉမႃႇၶႃႉ ၊ ဝဵင်း ယႃႇၼေႃႇ ၊ ဝဵင်း ၵေႇတေႇသႃႉ ၊ ဝဵင်း ႁႃႇၸေႃႇ ဢိၵ်ႇလူၺ်ႈၵၼ်တင်းမိူင်း ၵီႉလတ်ႉ ၊ မိူင်း ၵႃႇလီႉလႄး ၊ မိူင်း ၼပ်ႉထလီႉ ၵႃႈမီးၼၼ်ႉလႄႈ သိမ်းဢဝ်ၶဝ်ၵႂႃႇ ၵႃႈတီႈမိူင်း ဢႃႇသူႉရီႉ ဢေႃႈ။-

30ၼႂ်းပီႊဢၼ် ယူဝ်းထမ်ႇ လုၵ်ႈၸၢႆး ဢူဝ်းၸီႉယႃႉ ၸၢမ်ႇႁၢင်ႈၸၢမ်ႇႁေႃ သၢဝ်းပီႊၼၼ်ႉ၊ ႁေႃးသေႇ လုၵ်ႈၸၢႆး ဢေးလႃႇ ၼၼ်ႉ လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်း ပေႇၵႃႇ လုၵ်ႈၸၢႆး ရေႇမလီႉ လႄႈ ယႃႉပႅတ်ႈႁႂ်ႈထၼ်ႈပေႃးတၢႆသေယဝ်ႉ၊ ၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။-

31လွင်ႈတၢင်း ပေႇၵႃႇ ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းၵႃႈဢၼ်မၼ်းႁဵတ်းၼၼ်ႉၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။

32ၼႂ်းပီႊဢၼ် ပေႇၵႃႇ လုၵ်ႈၸၢႆး ရေႇမလီႉ ၶုၼ်ႁေႃၶမ်း ဢီႉသရေႇလႃႉ ၸၢမ်ႇႁၢင်ႈၸၢမ်ႇႁေႃ သွင်ပီႊၼၼ်ႉ၊ ယူဝ်းထမ်ႇ လုၵ်ႈၸၢႆးၸဝ်ႈ ဢူဝ်းၸီႉယႃႉ ၶုၼ်ႁေႃၶမ်း ယူႉတႃႉ ၼၼ်ႉ ၸႃႉၼင်ႈႁၢင်ႈၼင်ႈႁေႃဢေႃႈ။-

33မိူဝ်ႈဢၼ်မၼ်းၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈသၢဝ်းပၢႆသွင်ပီႊလႄႈ၊ မၼ်းဢုပ်ႉပိူင်ႇၸၢမ်ႇၸႃးယူႇ ၵႃႈၼႂ်းဝဵင်း ယေႇရူႉသလႅမ်ႇ သိပ်းပၢႆႁူၵ်းပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ယေႇရူႉသႃႇ လုၵ်ႈယိင်း ၸႃႇတုၵ်ႉ ဢေႃႈ။-

34မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ၸွမ်းၵႃႈၼင်ႇဢၼ်ၸဝ်ႈပေႃႈမၼ်း ဢူဝ်းၸီႉယႃႉ ႁဵတ်းၼၼ်ႉဢေႃႈ။-

35ၵူၺ်းၵႃႈ မၼ်းဢမ်ႇပႄႇပႅတ်ႈထႃႇၼႃႉတီႈသုင်တင်းလၢႆလႄႈ၊ ၵူၼ်းတင်းလၢႆယင်းဢွၼ်ၵၼ်ပုၵ်ႈၸေႃႇယိတ်ႈလႄႈ ဢဝ်ၼၢမ်ႇသႃႇတုတ်ႇၽႆးၵႃႈတီႈထႃႇၼႃႉတီႈသုင်ၸိူဝ်းၼၼ်ႉယူႇဢေႃႈ။ မၼ်းႁဵတ်းၽၵ်းတူဢၼ်ၵႃႈၼိူဝ် တီႈႁိူၼ်းထႃႇဝရႃႉၽြႃးဢေႃႈ။-

36လွင်ႈတၢင်း ယူဝ်းထမ်ႇ ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းၵႃႈဢၼ်မၼ်းႁဵတ်းၼၼ်ႉၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ ဢေႃႈ။-

37ၼႂ်းၶိင်ႇမိူဝ်ႈၼၼ်ႉ ထႃႇဝရႃႉၽြႃးၸႃႉပွႆႇၸႂ်ႉ ရေႇၸိၼ်း ၶုၼ်ႁေႃၶမ်း သူႉရီႉ ဢိၵ်ႇတင်း ပေႇၵႃႇ လုၵ်ႈၸၢႆး ရေႇမလီႉ ၶီႇသိုၵ်းမႃးၵႃႈတီႈ မိူင်း ယူႉတႃႉ ဢေႃႈ။-

38ယူဝ်းထမ်ႇ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉ ၵႃႈၼႂ်းဝဵင်းၸဝ်ႈပေႃႈမၼ်း တႃႇဝိတ်ႈ ဢေႃႈ။ ဢႃႇၶတ်ႉ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

← Chapter 14 Jump to: Chapter 16 →