2 Kings 17 — Shan

1ၼႂ်းပီႊဢၼ် ဢႃႇၶတ်ႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃသိပ်းပၢႆသွင်ပီႊၼၼ်ႉ၊ ႁေႃးသေႇ လုၵ်ႈၸၢႆး ဢေးလႃႇ ၸႃႉၼင်ႈႁၢင်ႈၼင်ႈႁေႃလႄႈ ဢုပ်ႉပိူင်ႇၸၢမ်ႇၸႃး မိူင်း ဢီႉသရေႇလႃႉ ယူႇ ၵႃႈၼႂ်းဝဵင်း သမႃႇရီႉ ၵဝ်ႈပီႊဢေႃႈ။-

2မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးသေၵေႃႈ ဢမ်ႇၶိုတ်းတူႉၸရိူၵ်ႈ ဢၼ်ၶုၼ်ႁေႃၶမ်း ဢီႉသရေႇလႃႉ ဢၼ်ပူၼ်ႉၵႂႃႇယဝ်ႉ မိူဝ်ႈဢွၼ်တၢင်းမၼ်းၸိူဝ်းၼၼ်ႉႁဵတ်းၼၼ်ႉ။

3မၼ်းၼၼ်ႉၸိုင်၊ သႃႇလႃႉမၼေႇၸႃႇ ၶုၼ်ႁေႃၶမ်း ဢႃႇသူႉရီႉ ၶီႇသိုၵ်းၶိုၼ်ႈၸူးလႄႈ ႁေႃးသေႇ လႆႈၶၢမ်ႇႁဵတ်းၶႃႈသေလႄႈ သၢၵ်ႈၶွၼ်ႇဢေႃႈ။-

4ၶုၼ်ႁေႃၶမ်း ဢႃႇသူႉရီႉ ထူပ်းႁၼ်လွင်ႈဢၼ် ႁေႃးသေႇ မီးတၢင်းၵျၢမ်ႇတၢင်းပွင်ဢၼ်တၵ်းပုင်ႇၵၢၼ်ႇၵွပ်ႈပိူဝ်ႈဢၼ်မၼ်းပွႆႇၸႂ်ႉ သၢၼ်ႇတမၢၼ်ႇတင်းလၢႆ ၵႂႃႇၸူးၵႃႈတီႈ သႂႃႇ ၶုၼ်ႁေႃၶမ်း ဢေႇၵိပ်ႉတူႉ လႄႈ၊ ဢမ်ႇသၢၵ်ႈဢမ်ႇပၼ်ၶွၼ်ႇ ဢၼ်မၼ်းယၢမ်ႈသၢၵ်ႈပၼ်တီႈ ၶုၼ်ႁေႃၶမ်း ဢႃႇသူႉရီႉ ၵူႈပီႊၼၼ်ႉလႄႈ၊ ၶုၼ်ႁေႃၶမ်း ဢႃႇသူႉရီႉ တီႉၵမ်ဢဝ်မၼ်းသေလႄႈ ၶင်ဝႆႉၵႃႈၼႂ်းထွင်ႇသေယဝ်ႉ၊

5ၶုၼ်ႁေႃၶမ်း ဢႃႇသူႉရီႉ ၶီႇသိုၵ်းၶိုၼ်ႈၸူးၵႃႈတီႈမိူင်းၸဝ်ႈၸွတ်ႇၵႂႃႇတင်းဝၢၼ်ႈတင်းမိူင်းသေလႄႈ ႁွတ်ႈထိုင်ၵႃႈတီႈဝဵင်း သမႃႇရီႉ လႄႈ လွမ်ႉဝႆႉသၢမ်ပီႊဢေႃႈ။-

6ၼႂ်းပီႊဢၼ် ႁေႃးသေႇ ၸၢမ်ႇႁၢင်ႈၸၢမ်ႇႁေႃၵဝ်ႈပီႊၼၼ်ႉ၊ ၶုၼ်ႁေႃၶမ်း ဢႃႇသူႉရီႉ လႆႈဝဵင်း သမႃႇရီႉ လႄႈ သိမ်းဢဝ်ၵူၼ်းမဵဝ်း ဢီႉသရေႇလႃႉ တင်းလၢႆ ၵႂႃႇၵႃႈတီႈမိူင်း ဢႃႇသူႉရီႉ လႄႈ ဢဝ်ဝႆႉၵႃႈတီႈဝဵင်း ႁႃႇလႃႉ ၊ ဝဵင်း ႁႃႇပေႃႇ ၵႃႈႁိမ်းၼမ်ႉႁွင်ႈ ၵေႃးၸၼ်ႇ ဢိၵ်ႇတင်းၵႃႈတီႈဝၢၼ်ႈဝဵင်း ဢိူင်ႇ မေႇတီႉ ၸိူဝ်းၼၼ်ႉဢေႃႈ။-

7လွင်ႈမၼ်းၸမ်ႉ ပဵၼ်ၵွပ်ႈပိူဝ်ႈဢၼ် ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ၽိတ်းပိူင်ႈထႃႇဝရႃႉၽြႃး ၽြႃးပဵၼ်ၸဝ်ႈၶဝ် ဢၼ်ၼုၵ်ႈဢဝ်ၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ ဢိၵ်ႇတင်းၵႃႈၼႂ်းမိုဝ်းၶုၼ်ႁေႃၶမ်း ၽႃႇရေႃး ၼၼ်ႉမႃးၼၼ်ႉသေလႄႈ ရူဝ်ႇသေႇၵူဝ်ယမ်ၽြႃးတၢင်ႇသူႇတၢင်ႇပႃးလႄႈ၊-

8ၸွမ်းထုင်းၸၢမ်ႇၵူၼ်းတၢင်ႇၸိူဝ်ႉတၢင်ႇၶိူဝ်းဢၼ်ထႃႇဝရႃႉၽြႃး ႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈ ၵူၼ်းမဵဝ်း ဢီႉသရေႇလႃႉ တင်းလၢႆ ၸိူဝ်းၼၼ်ႉ ဢိၵ်ႇတင်းထုင်းၸၢမ်ႇၶုၼ်ႁေႃၶမ်း ဢီႉသရေႇလႃႉ ဢၼ်ၶဝ်ယုၵ်ႉယွင်ႈဝႆႉၸိူဝ်းၼၼ်ႉဢေႃႈ။-

9ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ လွမ်ႁဵတ်းလွင်ႈတၢင်းဢၼ်ဢမ်ႇတြႃးယူႇၽၢႆႇၼိုင်ႈ တင်းထႃႇဝရႃႉၽြႃး ၽြႃးပဵၼ်ၸဝ်ႈၶဝ်ဢေႃႈ။ ပဵၼ်ၵႃႈတီႈထဵင်လၢင်းဢၼ်မုင်ႈတူၺ်းလႄႈ ပႂ်ႉၵၢင်သေဢမ်ႇဝႃႈ၊ ပဵၼ်ၵႃႈတီႈဝဵင်းဢၼ်မၼ်ႈၶိူင်ႇသေဢမ်ႇဝႃႈ၊ ၶဝ်ဢွၼ်ၵၼ် တႄႇႁဵတ်းထႃႇၼႃႉတီႈသုင် ၵႃႈတီႈၵႃႈဢၼ်ပဵၼ်ဝၢၼ်ႈပဵၼ်ဝဵင်းၶဝ်ၼၼ်ႉဢေႃႈ။-

10ၶဝ်ဢွၼ်ၵၼ်တႄႇႁဵတ်းသဝ်တီႈၵူဝ်းၵႂၢႆႇ ဢိၵ်ႇတင်းတူၼ်ႈ ဢႃႇသရႃႉ တင်းလၢႆ ၵႃႈၼိူဝ်ၵုင်းဢၼ်သုင်ၵႃႈမီး ဢိၵ်ႇတင်းၵႃႈတႂ်ႈတူၼ်ႈမႆႉဢၼ်ၶဵဝ်ၵႃႈမီးၼၼ်ႉဢေႃႈ။-

11ၶဝ်ဢွၼ်ၵၼ်ဢဝ်ၼၢမ်ႇသႃႇတုတ်ႇၽႆး ၵႃႈတီႈထႃႇၼႃႉတီႈသုင်ၵႃႈမီး မိူၼ်ၸိူဝ်ႉၼင်ႇၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ထႃႇဝရႃႉၽြႃးႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈၶဝ်ၼၼ်ႉလႄႈ ႁဵတ်းဢမူႉဢႃႉထမ်ႇမႃႉ ႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉထႃႇဝရႃႉၽြႃးဢေႃႈ။-

12ၶဝ်ဢွၼ်ၵၼ်ႁဵတ်းဝၢတ်ႈတီႈရုၵ်ႈထူႉသၢင်းထူႉ ဢၼ်ထႃႇဝရႃႉၽြႃး ပိင်းၺၢပ်ႈဝႆႉလႄႈဝႃႈ၊ သူဢမ်ႇလႆႈႁဵတ်းလွင်ႈတၢင်းၸိူဝ်ႉၼင်ႇၼၼ်ၼၼ်ႉ၊ ဝႃႈၼင်ႇၼႆၼၼ်ႉဢေႃႈ။-

13ပိၵ်ႉသမ်ႉထႃႇဝရႃႉၽြႃး ဢဝ်တင်းပရေႃးၽႅတ်ႈ ဢိၵ်ႇတင်းၶဝ်ၸိူဝ်းဢၼ်ႁူပွင်ႇတႃလႅင်းၵူႈၵေႃႉၵူႈၵူၼ်းၶၢမ်ႇသၢၵ်ႈသေႇတီႈမဵဝ်း ဢီႉသရေႇလႃႉ တင်းမဵဝ်း ယူႉတႃႉ လႄႈဝႃႈ၊ သူဢွၼ်ၵၼ်ဝႄႈပိူင်ႈသဵၼ်ႈတၢင်းဢႃႉထမ်ႇမႃႉသူသေလႄႈ ပႂ်ႉၵမ်ပႂ်ႉၸွမ်းပိင်းၺၢပ်ႈၵဝ် ဢိၵ်ႇတင်းထုင်းၽိင်ႈတြႃးၵဝ် ၸွမ်းၵႃႈၼင်ႇတြႃးၵႃႈဢၼ်ၵဝ်ပိင်းၺၢပ်ႈဝႆႉ တီႈပူႇမွၼ်ႇသူတင်းလၢႆလႄႈ၊ ၵဝ်ဢဝ်ၶႃႈၵဝ်ၵူၼ်းၵဝ်ပရေႃးၽႅတ်ႈ တင်းလၢႆပၼ်မႃးတီႈသူၼၼ်ႉတႃႉ၊ ဝႃႈၼင်ႇၼႆသေၵေႃႈ၊-

14ၶဝ်ဢမ်ႇထွမ်ႇဢမ်ႇဢဝ်၊ ႁႂ်ႈၶေႃးၶဝ်ၵႅၼ်ႇၶႅင် မိူၼ်ၸိူဝ်ႉၼင်ႇၶေႃးပူႇမွၼ်ႇၶဝ်ဢၼ်ဢမ်ႇယုမ်ႇမၢတ်ႈထႃႇဝရႃႉၽြႃးၸိူဝ်းၼၼ်ႉဢေႃႈ။-

15ၶဝ်ဢွၼ်ၵၼ်ပႄႇပႅတ်ႈထုင်းၽိင်ႈတြႃးၸဝ်ႈ၊ ပတီႉၺိၺ်ႇဢၼ်မၼ်းၸဝ်ႈႁဵတ်းဝႆႉလူၺ်ႈၵၼ်တင်းပူႇမွၼ်ႇၶဝ်၊ သၢၵ်ႈသေႇဢၼ်မၼ်းၸဝ်ႈၶၢမ်ႇသၢၵ်ႈသေႇတီႈၶဝ်ၼၼ်ႉသေလႄႈ ၵမ်ၵျၢင်ႉဢၼတ်ႉတႃႉတြႃးယူႇလႄႈ ပဵၼ်ဢၼ်လၢႆလၢႆ ဢမ်ႇပွင်ႇလွင်ႈသေယဝ်ႉ၊ ၸွမ်းလင်ၵူၼ်းတၢင်ႇၸိူဝ်ႉတၢင်ႇမဵဝ်း ဢၼ်ယူႇလဵပ်ႈႁွပ်ႈၶဝ်ဢၼ် ထႃႇဝရႃႉၽြႃးပိင်းၺၢပ်ႈဝႆႉလူၺ်ႈလွင်ႈ ဢၼ်ဢမ်ႇလႆႈၵမ်ၵျၢင်ႉၸိူဝ်ႉၼင်ႇဢၼ်ၶဝ်ၼၼ်ႉၵမ်ၵျၢင်ႉၼၼ်ႉဢေႃႈ။-

16ၶဝ်ဢွၼ်ၵၼ်ၸုၼ်ႉပႅတ်ႈပိင်းၺၢပ်ႈထႃႇဝရႃႉၽြႃး ၽြႃးပဵၼ်ၸဝ်ႈၶဝ်ၵႃႈမီးၼၼ်ႉလႄႈ ႁဵတ်းရုၵ်ႈထူႉဢၼ်သွၼ်းလေႃႇ ဢၼ်ဝႃႈဝူဝ်းဢွၼ်ႇသွင်တူဝ် ဢိၵ်ႇတင်းတူၼ်ႈ ဢႃႇသရႃႉ သေလႄႈ ၵူဝ်းၵႂၢႆႇၶိူင်ႈပိူင်ၵၢင်ႁၢဝ်လႄႈ ႁဵတ်းဝၢတ်ႈတီႈ ၽြႃးပႃႇလႃႉ ဢေႃႈ။-

17ၶဝ်ဢွၼ်ၵၼ်ဢဝ်လုၵ်ႈၸၢႆးလုၵ်ႈယိင်းၶဝ်ပၼ် ႁႂ်ႈလႆႈၶၢမ်ႇတၢင်းဢၼ်ဢဝ်ၽႆးပုၵ်ႈၸေႃႇလႄႈ သုင်းသွင်ႇဢတၢတ်ႈဝိၵ်ႉၸႃႇ ဢတၢတ်ႈဢၼ်ၸေႃႉဢၼ်ႁဵတ်းၼၼ်ႉသေလႄႈ ၶၢႆတူဝ်ၶဝ်ႁႂ်ႈလႆႈႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃး ႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉၸဝ်ႈဢေႃႈ။-

18ၵွပ်ႈပိူဝ်ႈၼင်ႇၼၼ်လႄႈ ထႃႇဝရႃႉၽြႃးၸႂ်မႆႈၶႆႈၸႃႉတေႃႇမဵဝ်း ဢီႉသရေႇလႃႉ ႁႅင်းယႂ်ႇၼႃႇလူင်လၢင်လႄႈ ပႄႇၶဝ်ပႅတ်ႈသေၵႃႈတီႈသိုဝ်ႈၼႃႈတႂ်ႈတႃၸဝ်ႈဢေႃႈ။ ၼွၵ်ႈသေမဵဝ်း ယူႉတႃႉ ၼၼ်ႉ ဢမ်ႇၵိုတ်းဢမ်ႇၵျၢၼ်ႇဝႆႉသေမဵဝ်း။-

19မဵဝ်း ယူႉတႃႉ ၵေႃႈ ဢမ်ႇပႂ်ႉၵမ်ပႂ်ႉၸွမ်းပိင်းၺၢပ်ႈထႃႇဝရႃႉၽြႃး ၽြႃးပဵၼ်ၸဝ်ႈၶဝ်၊ ဢွၼ်ၵၼ်ၸွမ်းထုင်းၸၢမ်ႇမဵဝ်း ဢီႉသရေႇလႃႉ ဢၼ်ၶဝ်ႁဵတ်းၼၼ်ႉဢေႃႈ။-

20ထႃႇဝရႃႉၽြႃး ထဵင်ပႅတ်ႈမဵဝ်းၸိူဝ်ႉၶိူဝ်း ဢီႉသရေႇလႃႉ ၵႃႈမီးၼၼ်ႉသေလႄႈ ပၼ်တၢမ်ႇလႄႈ ဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ် ႁိမ်ဢဝ်ၼၼ်ႉတေႃႇထိုင်ႁွတ်ႈမၼ်းၸဝ်ႈ ႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈမၼ်းၸဝ်ႈဢေႃႈ။-

21လွင်ႈမၼ်းၸမ်ႉ မၼ်းၸဝ်ႈသိၵ်ႇမဵဝ်း ဢီႉသရေႇလႃႉ ဢွၵ်ႇသေၵႃႈၼႂ်းမိုဝ်းမဵဝ်းၸိူဝ်ႉၶိူဝ်း တႃႇဝိတ်ႈ လႄႈ ၶဝ်ၼၼ်ႉယုၵ်ႉယွင်ႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ၼၼ်ႉ ႁႂ်ႈပဵၼ်ၶုၼ်ႁေႃၶမ်းၶဝ်လႄႈ၊ ယေႇရူဝ်းပုမ်ႇ ၼၼ်ႉၵေႃႈ ႁႂ်ႈမဵဝ်း ဢီႉသရေႇလႃႉ ဝႄႈပိူင်ႈသေၵႃႈတီႈသဵၼ်ႈတၢင်းဢၼ်ၸွမ်းလင်ထႃႇဝရႃႉၽြႃးလႄႈ ႁႂ်ႈႁဵတ်းတူႉၸရိူၵ်ႈလူင်ဢေႃႈ။-

22ပိူဝ်ႈဢၼ်ပဵၼ်ၼင်ႇၼႆလႄႈ ၵူၼ်းမဵဝ်း ဢီႉသရေႇလႃႉ တင်းလၢႆ ဢွၼ်ၵၼ်ၸွမ်းသဵၼ်ႈတၢင်းတူႉၸရိူၵ်ႈၵႃႈဢၼ် ယေႇရူဝ်းပုမ်ႇ ႁဵတ်းၼၼ်ႉလႄႈ၊ ယင်းဢမ်ႇဝႄႈဢမ်ႇပိူင်ႈလႄႈယူႇ၊-

23တေႃႇထိုင်ႁွတ်ႈထႃႇဝရႃႉၽြႃး ထၼ်ႈပေႃးပႄႇပႅတ်ႈမဵဝ်း ဢီႉသရေႇလႃႉ သေၵႃႈတီႈၽၢႆႇၼႃႈမၼ်းၸဝ်ႈ ၸွမ်းၵႃႈၼင်ႇဢၼ်မၼ်းၸဝ်ႈ ဢဝ်ၶႃႈမၼ်းၸဝ်ႈပရေႃးၽႅတ်ႈၵႃႈမီးၼၼ်ႉမီးဢမိင်ႉဝႆႉၼၼ်ႉဢေႃႈ။ ၵွပ်ႈပိူဝ်ႈၼင်ႇၼၼ်လႄႈ မဵဝ်း ဢီႉသရေႇလႃႉ လႆႈၶၢမ်ႇတၢင်းဢၼ်သိမ်းဢဝ်ဢွၵ်ႇသေၵႃႈတီႈမိူင်း ဢၼ်ၶဝ်ယူႇၵဝ်ႇၵဝ်ႇၼၼ်ႉၵႂႃႇၵႃႈတီႈမိူင်း ဢႃႇသူႉရီႉ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

24ၶုၼ်ႁေႃၶမ်း ဢႃႇသူႉရီႉ ၼၼ်ႉၵေႃႈ ဢဝ်ၵူၼ်းဝဵင်း ပႃႇပူႉလုၼ်ႇ ၊ ၵူၼ်းဝဵင်း ၵူႉသႃႉ ၊ ၵူၼ်းဝဵင်း ဢႃႇဝႃႉ ၊ ၵူၼ်းဝဵင်း ႁႃႇမတ်ႉ ၊ ၵူၼ်းဝဵင်း သေႇၽရႃႉဝိမ်း တင်းလၢႆမႃးလႄႈ ဝႆႉၵႃႈၼႂ်းဝၢၼ်ႈၼႂ်းဝဵင်း သမႃႇရီႉ တၢင်တူဝ်ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉလႄႈ၊ ၶဝ်ၼၼ်ႉဢွၼ်ၵၼ်သိမ်းဢဝ်မိူင်း သမႃႇရီႉ လႄႈ တူၵ်းတီႈတူၵ်းလႅၼ်ၵႃႈၼႂ်းဝၢၼ်ႈဝဵင်းၸိူဝ်းၼၼ်ႉဢေႃႈ။-

25မိူဝ်ႈဢၼ်ၶဝ်ၸႃႉတူၵ်းတီႈတူၵ်းလႅၼ်ၼၼ်ႉၸိုင် ၶဝ်ဢမ်ႇရူဝ်ႇသေႇၵူဝ်ယမ်ထႃႇဝရႃႉၽြႃးလႄႈ ထႃႇဝရႃႉၽြႃးပွႆႇၸႂ်ႉသၢင်ႇသီႈမႃးလႄႈ ၶူပ်းၶဝ်တၢႆၵမ်ႈၽွင်ႈဢေႃႈ။-

26ၵွပ်ႈပိူဝ်ႈၼင်ႇၼၼ်လႄႈ ၶဝ်လဝ်ႊလၢတ်ႈတီႈၶုၼ်ႁေႃၶမ်း ဢႃႇသူႉရီႉ လႄႈဝႃႈ၊ ၵူၼ်းၵူႈၸိူဝ်ႉၵူႈမဵဝ်းဢၼ်ၸဝ်ႈႁဝ်းႁႂ်ႈၶၢႆႉၵႂႃႇလႄႈ ယူႇၵႃႈၼႂ်းဝၢၼ်ႈၼႂ်းဝဵင်း သမႃႇရီႉ ၸိူဝ်းၼၼ်ႉ ဢမ်ႇႁူႉတြႃးၽြႃးဢၼ်ပႂ်ႉမိူင်းၼၼ်ႉတီႈၶႃႈ။ ပိူဝ်ႈၼႆလႄႈ မၼ်းၸဝ်ႈၼၼ်ႉပွႆႇၸႂ်ႉသၢင်ႇသီႈမႃးလႄႈ ၶူပ်းၶဝ်ၼၼ်ႉတၢႆၵမ်ႈၽွင်ႈ ၵွပ်ႈပိူဝ်ႈဢၼ်ၶဝ်ဢမ်ႇႁူႉတြႃးၽြႃးဢၼ်ပႂ်ႉမိူင်းၼၼ်ႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

27ၶုၼ်ႁေႃၶမ်း ဢႃႇသူႉရီႉ မီးဢမိင်ႉလႄႈဝႃႈ၊ ဢွၼ်ၵၼ်ဢဝ်ယိတ်ႈပရေႃးႁဵၵ်ႈ ဢၼ်သူသိမ်းဢဝ်ၵႃႈတီႈမိူင်းၼၼ်ႉမႃးၼၼ်ႉၵေႃႉၼိုင်ႈ ၶိုၼ်းၵႂႃႇသူင်ႇသေ ႁႂ်ႈမၼ်းၼၼ်ႉၵႂႃႇလႄႈယူႇၵႃႈတီႈၼၼ်ႈသေလႄႈ သင်ႇသွၼ်ပၼ်တြႃးၽြႃးဢၼ်ပႂ်ႉမိူင်းၼၼ်ႉ တီႈၶဝ်ၼၼ်ႉသေ၊ ဝႃႈၼင်ႇၼႆလႄႈ၊-

28ယိတ်ႈပရေႃးႁဵၵ်ႈ ဢၼ်ၶဝ်သိမ်းဢဝ်သေၵႃႈတီႈဝဵင်း သမႃႇရီႉ မႃးၼၼ်ႉၵေႃႉၼိုင်ႈ ၶိုၼ်းလႄႈယူႇၵႃႈတီႈဝဵင်း ပေႇသလႃႉ သေလႄႈ သင်ႇသွၼ်ပၼ်လွင်ႈဢၼ်ၶဝ်ၼၼ်ႉတၵ်းလႆႈ ရူဝ်ႇသေႇၵူဝ်ယမ်ထႃႇဝရႃႉၽြႃးၸိူဝ်ႉၼင်ႇႁိုဝ်ၼၼ်ႉဢေႃႈ။-

29ၼႂ်းဝႃႈၼၼ်သေၵေႃႈ ၵူၼ်းမဵဝ်းႁင်းၽႂ်ႁင်းမၼ်းၼၼ်ႉ ဢွၼ်ၵၼ်ႁဵတ်းၽြႃးၶဝ်လႄႈ တၢင်ႇဝႆႉၵႃႈၼႂ်းႁိူၼ်းထႃႇၼႃႉတီႈသုင်တင်းလၢႆ ဢၼ်ၵူၼ်း သမႃႇရီႉ ၸိူဝ်းၼၼ်ႉ ႁဵတ်းဝႆႉၸိူဝ်းၼၼ်ႉၼႂ်းဝၢၼ်ႈဝဵင်း ဢၼ်ၶဝ်ၵူႈၸိူဝ်ႉၵူႈမဵဝ်းတူၵ်းတီႈတူၵ်းလႅၼ် ႁင်းၽႂ်ႁင်းမၼ်းၼၼ်ႉဢေႃႈ။-

30ၵူၼ်းဝဵင်း ပႃႇပူႉလုၼ်ႇ ၸိူဝ်းၼၼ်ႉ ဢွၼ်ၵၼ်ႁဵတ်းၽြႃး သူႉၵုတ်ႉပေႇၼုတ်ႉ ၊ ၵူၼ်းဝဵင်း ၵူႉသႃႉ ၸိူဝ်းၼၼ်ႉ ဢွၼ်ၵၼ်ႁဵတ်းၽြႃး ၼေႇရႃႇၵႃႇလႃႉ ၊ ၵူၼ်းဝဵင်း ႁႃႇမတ်ႉ ၸိူဝ်းၼၼ်ႉဢွၼ်ၵၼ်ႁဵတ်းၽြႃး ဢသီႉမႃႉ ၊-

31ၵူၼ်းဝဵင်း ဢႃႇဝႃႉ ၸိူဝ်းၼၼ်ႉဢွၼ်ၵၼ်ႁဵတ်းၽြႃး ၼီႉပႃႉႁႃႇၸႃႉ တင်းၽြႃး တႃႇတၵ်ႉ ဢေႃႈ၊ ၵူၼ်းဝဵင်း သေႇၽရႃႉဝိမ်း ၸိူဝ်းၼၼ်ႉ ဢွၼ်ၵၼ်ဢဝ်လုၵ်ႈလၢင်းၶဝ် တုတ်ႇၽႆးလႄႈ ပုၵ်ႈၸေႃႇတီႈ ဢႃႇတြမ်ႇမလႅၵ်ႉ တင်း ဢႃႇၼမ်ႇမေးလႅၵ်ႉ ဢၼ်ဝႃႈၽြႃးဢၼ်ပႂ်ႉဝဵင်း သေႇၽရႃႉဝိမ်း ၸိူဝ်းၼၼ်ႉဢေႃႈ။-

32ထႃႇဝရႃႉၽြႃးၵေႃႈ ၶဝ်ဢွၼ်ၵၼ်ရူဝ်ႇသေႇၵူဝ်ယမ်လႄႈ ဢဝ်ၵူၼ်းၵႃႈၼႂ်းၶဝ်ၼၼ်ႉၶၢၼ်းဝႆႉၵႃႈၼႂ်းဢရႃႇယိတ်ႈပရေႃးႁဵၵ်ႈ ထႃႇၼႃႉတီႈသုင်တင်းလၢႆလႄႈ ၶဝ်ၼၼ်ႉဢွၼ်ၵၼ်ပုၵ်ႈၸေႃႇယိတ်ႈၵႃႈၼႂ်းႁိူၼ်းထႃႇၼႃႉတီႈသုင်ၸိူဝ်းၼၼ်ႉပုၼ်ႈၶဝ်ဢေႃႈ။-

33ၼင်ႇၼၼ်လႄႈ ၶဝ်ဢွၼ်ၵၼ်ႁဵတ်းတၢင်းဢၼ်ရူဝ်ႇသေႇၵူဝ်ယမ်ထႃႇဝရႃႉၽြႃးဢေႃႈ။ တီႈၽြႃးၶဝ်ၵေႃႈ ၶဝ်ဢွၼ်ၵၼ်ႁဵတ်းဝၢတ်ႈၸွမ်းထုင်းၸၢမ်ႇ ဢၼ်ၵူၼ်းၵူႈမဵဝ်းဢၼ်ၶဝ်လႆႈၶၢမ်ႇတၢင်းဢၼ်ႁေႃႈဢွၵ်ႇသေၵႃႈၼႂ်းၶဝ်ၼၼ်ႉမႃးၸိူဝ်းၼၼ်ႉ ႁဵတ်းၼၼ်ႉဢေႃႈ။-

34ၶဝ်ဢွၼ်ၵၼ်ၸွမ်းထုင်းၸၢမ်ႇမိူဝ်ႈၵွၼ်ႇဢွၼ်ၼႆႉၼၼ်ႉယူႇတေႃႇထိုင်ႁွတ်ႈဝၼ်းမိူဝ်ႈၼႆႉလႄႈဢမ်ႇႁွတ်ႈထိုင်တၢင်းဢၼ် ရူဝ်ႇသေႇၵူဝ်ယမ်ထႃႇဝရႃႉၽြႃး။ ဢမ်ႇပႂ်ႉၵမ်ပႂ်ႉၸွမ်းထုင်းၽိင်ႈတြႃးမဵဝ်းၶဝ်၊ လွင်ႈတၢင်းဢၼ်ၸီႇယၢင်ႇဝႆႉ ဢၼ်သႅင်ႇတင်းမဵဝ်းၶဝ်။ တြႃးၸဝ်ႈတင်းပိင်းၺၢပ်ႈၸဝ်ႈတင်းလၢႆဢၼ်ထႃႇဝရႃႉၽြႃး ပိင်းၺၢပ်ႈဝႆႉတီႈၵူၼ်းမဵဝ်း ယႃႇၵုပ်ႈ ဢၼ်မၼ်းၸဝ်ႈႁွင်ႉႁဵၵ်ႈၸိုဝ်ႈ ဢီႉသရေႇလႃႉ လႄႈ၊-

35ပဵၼ်မဵဝ်းဢၼ်ထႃႇဝရႃႉၽြႃးႁဵတ်းပတီႉၺိၺ်ႇ လူၺ်ႈၵၼ်သေလႄႈသင်ႇလၢတ်ႈလႄႈဝႃႈ၊ သူဢမ်ႇလႆႈရူဝ်ႇသေႇၵူဝ်ယမ်ၽြႃးတၢင်ႇသူႇတၢင်းပႃး၊ ဢမ်ႇလႆႈၵူမ်ႈႁူဝ်ၵွမ်းႁူဝ်၊ ဢမ်ႇလႆႈႁဵတ်းဝူတ်ႈႁဵတ်းဝၢတ်ႈ၊ ဢမ်ႇလႆႈပုၵ်ႈၸေႃႇယိတ်ႈ။-

36သူတၵ်းလႆႈဢွၼ်ၵၼ်ရူဝ်ႇသေႇၵူဝ်ယမ်ၵူမ်ႈႁူဝ်ၵွမ်းႁူဝ်လႄႈ ပုၵ်ႈၸေႃႇတီႈထႃႇဝရႃႉၽြႃး ဢၼ်ဢဝ်တင်းတၼ်းၶူဝ်းဢၼ်ယႂ်ႇၼႃႇ တင်းတၢင်းဢၼ်ယိုၼ်ႈၶႅၼ်ယိုၼ်ႈမိုဝ်းသေလႄႈ ၼုၵ်ႈဢဝ်သူဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉၵူၺ်းဢေႃႈ။-

37တၵ်းလႆႈဢွၼ်ၵၼ်ပႂ်ႉၵမ်ပႂ်ႉၸွမ်းထုင်းၽိင်ႈတြႃးလႂ်၊ လွင်ႈတၢင်းဢၼ်ၸီႇယၢင်ႇဝႆႉလႂ်၊ ပိင်းၺၢပ်ႈၸဝ်ႈ ဢၼ်မၼ်းၸဝ်ႈတႅမ်ႈဝႆႉပုၼ်ႈသူလႂ်ၼၼ်ႉယူႇတႃႇသေႇဢေႃႈ။ ဢမ်ႇလႆႈရူဝ်ႇသေႇၵူဝ်ယမ်ၽြႃးတၢင်ႇသူႇတၢင်ႇပႃး။-

38ဢမ်ႇလႆႈလူင်လႆႈလိုမ်းပတီႉၺိၺ်ႇဢၼ်ၵဝ်ႁဵတ်းလူၺ်ႈၵၼ်တင်းသူၼၼ်ႉ။ ဢမ်ႇလႆႈရူဝ်ႇသေႇၵူဝ်ယမ်ၽြႃးတၢင်ႇသူႇတၢင်ႇပႃး။-

39တၵ်းလႆႈရူဝ်ႇသေႇၵူဝ်ယမ်ထႃႇဝရႃႉၽြႃး ၽြႃးပဵၼ်ၸဝ်ႈသူၵူၺ်းဢေႃႈ။ ပေႃးႁဵတ်းၼင်ႇၼၼ်ၸိုင် မၼ်းၸဝ်ႈတၵ်းၵႄႇသႄႇ ၼုၵ်ႈဢဝ်သူဢွၵ်ႇသေၵႃႈၼႂ်းမိုဝ်းရၢၼ်ႇသူႇ တင်းသဵင်ႈတင်းလူင်ဢေႃႈ၊ ဝႃႈၼင်ႇၼႆၼၼ်ႉသေၵေႃႈ၊-

40ၶဝ်ၼၼ်ႉဢမ်ႇထွမ်ႇဢမ်ႇဢဝ်။ ဢွၼ်ၵၼ်ၸွမ်းထုင်းၸၢမ်ႇ မိူဝ်ႈၵွၼ်ႇဢွၼ်ၼႆႉၼၼ်ႉဢေႃႈ။-

41ၼင်ႇၼၼ်လႄႈ ၵူၼ်းၵူႈၸိူဝ်ႉၵူႈၶိူဝ်းၸိူဝ်းၼၼ်ႉ ဢွၼ်ၵၼ်ရူဝ်ႇသေႇၵူဝ်ယမ်ထႃႇဝရႃႉၽြႃးလႄႈ၊ တီႈရုၵ်ႈထူႉသၢင်းထူႉၶဝ်ၵေႃႈ ႁဵတ်းဝူတ်ႈႁဵတ်းဝၢတ်ႈယူႇဢေႃႈ။ လုၵ်ႈၶဝ်လၢၼ်ၶဝ် ဢိၵ်ႇတင်းလိၼ်ၶဝ်ၸိူဝ်းၼၼ်ႉ ဢွၼ်ၵၼ်ႁဵတ်းၸွမ်းၸူဝ်ႈပေႃႈပၢၼ်မႄႈၶဝ်လႄႈ ၵမ်ၵျၢင်ႉယူႇတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။