2 Kings 8

Shan

← Chapter 7 Jump to: Chapter 9 →

1ၽဝ်ႇၼိုင်ႈ ဢေးလီႉသႄး လၢတ်ႈတီႈမႄႈယိင်းဢၼ်မၼ်းႁႂ်ႈလုၵ်ႈဢွၼ်ႇမၼ်းဢသၢၵ်ႈၶိုၼ်းလိပ်း မိူဝ်ႈဢွၼ်တၢင်းၼၼ်ႉၼၼ်ႉလႄႈဝႃႈ၊ မႂ်းၼႆႉဢိၵ်ႇတင်းၵူၼ်းႁိူၼ်းၵူၼ်းယေးမႂ်း ဢွၼ်ၵၼ်လုၵ်ႉၵႂႃႇလႄႈ သွၼ်ႈပိုင်ႈယူႇၵႃႈၼႂ်းတီႈဢၼ်မႂ်းသွၼ်ႈပိုင်ႈယူႇလႆႈၼၼ်ႉ သေတီႈတီႈတႃႉ။ ထႃႇဝရႃႉၽြႃးသင်ႇလၢတ်ႈႁႂ်ႈၶိင်ႇၵႃႇလႃႉဢၼ်တၢင်းၵိၼ်တၢင်းၶူပ်းၵႃႈပႅင်းၼၼ်ႉမႃးယဝ်ႉ။ တၵ်းႁွတ်ႈထိုင်ၵႃႈၼိူဝ်မိူင်းၼႆႉၸဵတ်းပီႊဢေႃႈ၊ ဝႃႈၼင်ႇၼႆဢေႃႈ။-

2မႄႈယိင်းၼၼ်ႉလုၵ်ႉလႄႈ ႁဵတ်းၸွမ်းၵႂၢမ်းၵူၼ်းၽြႃးပဵၼ်ၸဝ်ႈၼၼ်ႉသေလႄႈ ပႃးဢဝ်ၵူၼ်းႁိူၼ်းၵူၼ်းယေးမၼ်းတင်းလၢႆၵႂႃႇလႄႈ သွၼ်ႈပိုင်ႈယူႇၵႃႈၼႂ်းမိူင်း ၽီႉလိတ်ႉတီႉ ၸဵတ်းပီႊဢေႃႈ။-

3မိူဝ်ႈဢၼ်ၸေးၸဵတ်းပီႊယဝ်ႉၼၼ်ႉၸိုင်၊ မႄႈယိင်းၼၼ်ႉလုၵ်ႉသေ ၵႃႈတီႈမိူင်း ၽီႉလိတ်ႉတီႉ ၶိုၼ်းမႃးသေလႄႈ ဢွၵ်ႇၵႂႃႇႁႂ်ႈလႆႈလဝ်ႊလၢတ်ႈယွၼ်းဢဝ်ႁိူၼ်းမၼ်းလိၼ်မၼ်းၶိုၼ်းတီႈၶုၼ်ႁေႃၶမ်းဢေႃႈ။-

4မိူဝ်ႈၼၼ်ႉ ၶုၼ်ႁေႃၶမ်းလၢတ်ႈတေႃႇၵၼ်တင်း ၵေႇႁႃႇၸီႉ ဢၼ်ပဵၼ်ၵူၼ်းဢွၼ်ႇၵူၼ်းၽြႃးပဵၼ်ၸဝ်ႈၼၼ်ႉယူႇသေလႄႈ မီးဢမိင်ႉလႄႈဝႃႈ၊ ၶႆႈလၢတ်ႈလွင်ႈတၢင်းၵႃႈဢၼ် ဢေးလီႉသႄး ႁဵတ်းဢၼ်လီဢၢမ်းၸိူဝ်းၼၼ်ႉလူး၊ ဝႃႈၼင်ႇၼႆလႄႈ၊-

5ၼႂ်းမိူဝ်ႈဢၼ်မၼ်းၼၼ်ႉယင်းတိုၵ်ႉၶိုၼ်းလဝ်ႊလၢတ်ႈ လွင်ႈဢၼ်မၼ်းလႆႈႁႂ်ႈဢသၢၵ်ႈၵေႃႉဢၼ်တၢႆယဝ်ႉၶိုၼ်းလိပ်းၼၼ်ႉယူႇၼၼ်ႉၸိုင်၊ မႄႈယိင်းဢၼ်မၼ်းႁႂ်ႈလုၵ်ႈဢွၼ်ႇမၼ်းဢသၢၵ်ႈၶိုၼ်းလိပ်းၼၼ်ႉ လဝ်ႊယွၼ်းဢဝ်ႁိူၼ်းမၼ်း လိၼ်မၼ်း တီႈၶုၼ်ႁေႃၶမ်းဢေႃႈ။ ၵေႇႁႃႇၸီႉ ၵေႃႈလဝ်ႊလၢတ်ႈလႄႈဝႃႈ၊ ၸဝ်ႈၵဝ်ၶႃႈ၊ ၸဝ်ႈၶုၼ်လူင်တီႈၶႃႈ၊ ၵေႃႉၼႆႉပဵၼ်မႄႈယိင်းၼၼ်ႉ၊ ၵေႃႉၼႆႉပဵၼ်လုၵ်ႈၸၢႆးမၼ်း ဢၼ် ဢေးလီႉသႄး ႁႂ်ႈဢသၢၵ်ႈၶိုၼ်းလိပ်းၼၼ်ႉတီႈၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

6ၶုၼ်ႁေႃၶမ်းၵေႃႈထၢမ်မႄႈယိင်းၼၼ်ႉလႄႈ မႄႈယိင်းၼၼ်ႉၵေႃႈၶၢမ်ႇသၢၵ်ႈသေႇဢေႃႈ။ မိူဝ်ႈၼၼ်ႉၶုၼ်ႁေႃၶမ်းၶၢၼ်းၵေႃႉဢၼ်မီးဢရႃႇၵေႃႉၼိုင်ႈဝႆႉႁႂ်ႈလႆႈပႂ်ႉဢမူႉမၼ်းလႄႈ မီးဢမိင်ႉလႄႈဝႃႈ၊ ႁႂ်ႈဢဝ်ဢုၵ်ႉၸႃႇမၼ်းၵႃႈမီး ဢိၵ်ႇတင်းမၢၵ်ႇႁူင်းၵႃႈဢၼ်ဢွၵ်ႇပဵၼ်မႃးတီႈလိၼ်မၼ်း ၸႃႉၸဵမ်မိုဝ်ႉဝၼ်းဢၼ်မၼ်းဢွၵ်ႇၵႂႃႇသေၵႃႈၼႂ်းမိူင်းၸဝ်ႈၵႂႃႇၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉၶိုၼ်းပၼ်သေ၊ ဝႃႈၼင်ႇၼႆဢေႃႈ။

7ၽဝ်ႇၼိုင်ႈ ဢေးလီႉသႄး ၵႂႃႇၵႃႈတီႈဝဵင်း ထမ်ႇမသႅတ်ႉ လႄႈ မိူဝ်ႈၼၼ်ႉ ပိၼ်ႇႁႃႇတတ်ႉ ၶုၼ်ႁေႃၶမ်း သူႉရီႉ မီးတၢင်းၶႆႈတၢင်းပဵၼ်ယူႇဢေႃႈ။ ပိူၼ်ႈလဝ်ႊလၢတ်ႈတီႈမၼ်းလႄႈဝႃႈ၊ ၵူၼ်းၽြႃးပဵၼ်ၸဝ်ႈႁွတ်ႈထိုင်ၵႃႈတီႈၼႆႈတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

8ၶုၼ်ႁေႃၶမ်းသင်ႇလၢတ်ႈတီႈ ႁႃႇၸေႇလႃႉ လႄႈဝႃႈ၊ မႂ်းပႃးဢဝ်လၢၵ်ႈသွင်ႇၵႃႈၼႂ်းမိုဝ်းမႂ်းၵႂႃႇလႄႈ ႁပ်ႉႁူဝ်တၢင်းၵူၼ်းၽြႃးပဵၼ်ၸဝ်ႈသေလႄႈ ႁႂ်ႈမၼ်းလဝ်ႊထၢမ်တီႈထႃႇဝရႃႉၽြႃးလူၺ်ႈလွင်ႈဢၼ် ၵဝ်တၵ်းလုၵ်ႉၶိုၼ်းသေၵႃႈတီႈတၢင်းၶႆႈတၢင်းပဵၼ်ၼႆႉႁိုဝ်ၼၼ်ႉတႃႉ၊ ဝႃႈၼင်ႇၼႆလႄႈ၊-

9ႁႃႇၸေႇလႃႉ ၼၼ်ႉ ပႃးဢဝ်လၢၵ်ႈသွင်ႇဢၼ်ဝႃႈ ဢုၵ်ႉၸႃႇ ထမ်ႇမသႅတ်ႉ ဢၼ်လီၵူႈၸိူဝ်ႉၵူႈပိူင် တၢင်ႇသႂ်ႇၵႃႈၼိူဝ်ၵလႃးဢုၵ်ႉ သီႇသိပ်းတူဝ်သေယဝ်ႉ၊ ၵႂႃႇႁႂ်ႈလႆႈႁပ်ႉႁူဝ်တၢင်းမၼ်းလႄႈ ႁွတ်ႈထိုင်သေယဝ်ႉ၊ ၸုၵ်းယူႇၵႃႈတီႈၽၢႆႇၼႃႈမၼ်းသေလႄႈ လၢတ်ႈလႄႈဝႃႈ၊ လုၵ်ႈၸၢႆးၸဝ်ႈႁဝ်း ပိၼ်ႇႁႃႇတတ်ႉ ၶုၼ်ႁေႃၶမ်း သူႉရီႉ ၼၼ်ႉ ပွႆႇၸႂ်ႉၵဝ်ၶႃႈမႃး ၵႃႈတီႈၸဝ်ႈႁဝ်းႁႂ်ႈလႆႈတွင်ႈထၢမ်လႄႈဝႃႈ၊ ၵဝ်ၼႆႉတၵ်းလုၵ်ႉၶိုၼ်းသေၵႃႈတီႈတၢင်းၶႆႈတၢင်းပဵၼ်ၼႆႉႁိုဝ်။ ဝႃႈၼင်ႇၼႆၶႃႈယဝ်ႉ၊ ဝႃႈၼင်ႇၼႆဢေႃႈ။-

10ဢေးလီႉသႄး ၵေႃႈလၢတ်ႈလႄႈဝႃႈ မႂ်းၵႂႃႇလႄႈလၢတ်ႈလႄႈဝႃႈ၊ ၸဝ်ႈႁဝ်းတၵ်းလုၵ်ႉၶိုၼ်းဢမၢၼ်ႇၶၼ်ပဵၼ်တီႈၶႃႈဢေႃႈ၊ ဝႃႈၼင်ႇၼႆတႃႉ၊ ၼႂ်းဝႃႈၼၼ်သေၵေႃႈ ထႃႇဝရႃႉၽြႃးၼႄပျႃးလွင်ႈဢၼ်မၼ်းတၵ်းလႆႈတၢႆဢမၢၼ်ႇၶၼ်ပဵၼ်ၼၼ်ႉတီႈၵဝ်ယဝ်ႉ၊ ဝႃႈၼင်ႇၼႆသေလႄႈ၊-

11ယႅၵ်ႉတူၺ်းၵေႃႉၼၼ်ႉၸေးၸေးၸွတ်ႇၸွတ်ႇ တေႃႇထိုင်ႁွတ်ႈမၼ်းၼၼ်ႉထၼ်ႈပေႃးၼႃႈလူႉဢေႃႈ။ ၵူၼ်းၽြႃးပဵၼ်ၸဝ်ႈၵေႃႈၼမ်ႉတႃတူၵ်းဢေႃႈ။-

12ႁႃႇၸေႇလႃႉ ၵေႃႈထၢမ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းၼမ်ႉတႃတူၵ်းၼင်ႇႁိုဝ်ၶႃႈ၊ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ၵွပ်ႈပိူဝ်ႈဢၼ်ၵဝ်ႁူႉႁၼ်လွင်ႈၽေးဢူႉပၢတ်ႈဢၼ်မႂ်းတၵ်းႁဵတ်းတီႈၵူၼ်းမဵဝ်း ဢီႉသရေႇလႃႉ တင်းလၢႆဢၼ်ဝႃႈ တၢင်းဢၼ်ဢဝ်ၽႆးတုတ်ႇတိူၵ်ႈတီႈတိုၵ်းသိုၵ်းၶဝ်၊ တၢင်းဢၼ်ဢဝ်ၵူၼ်းၼုမ်ႇၵူၼ်းၵမ်ၶဝ်တၢႆလူၺ်ႈလၢပ်ႇလူၺ်ႈလႅဝ်း၊ တၢင်းဢၼ်ဢဝ်လုၵ်ႈဢွၼ်ႇလႅင်ၶဝ် သၵ်းသွင်ႉၵႃႈၼိူဝ်လိၼ်၊ တၢင်းဢၼ်ၽႃႇတွင်ႉမႄႈယိင်း ဢၼ်ပႃးပတိၵ်ႉသၼ်ႇထေႇၼၼ်ႉၸိူဝ်းၼၼ်ႉလႄႈ ၼမ်ႉတႃၵဝ်တူၵ်းဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

13ႁႃႇၸေႇလႃႉ သမ်ႉၶိုၼ်းထၢမ်လႄႈဝႃႈ၊ ၶႃႈၸဝ်ႈႁဝ်းၼႆႉပဵၼ်မႃယူႇလႄႈ တၵ်းလႆႈႁဵတ်းဢမူႉလွင်ႈတၢင်းဢၼ်ယႂ်ႇၼႃႇထၼ်ႈၼႆႉၶႃႈႁိုဝ်။ ဝႃႈၼင်ႇၼႆသေယဝ်ႉ၊ ဢေးလီႉသႄး လၢတ်ႈလႄႈဝႃႈ၊ ထႃႇဝရႃႉၽြႃးၼႄပျႃးလွင်ႈဢၼ်မႂ်းတၵ်းလႆႈႁဵတ်းၶုၼ်ႁေႃၶမ်းၵႃႈၼိူဝ်မိူင်း သူႉရီႉ ၼၼ်ႉတီႈၵဝ်ယဝ်ႉ၊ ဝႃႈၼင်ႇၼႆဢေႃႈ။-

14မိူဝ်ႈၼၼ်ႉ မၼ်းဢွၵ်ႇသေၵႃႈတီႈ ဢေးလီႉသႄး လႄႈ ႁွတ်ႈၵႃႈတီႈၸဝ်ႈမၼ်းသေယဝ်ႉ၊ ၸဝ်ႈမၼ်းထၢမ်လႄႈဝႃႈ၊ ဢေးလီႉသႄး ၼၼ်ႉ လၢတ်ႈၸိူဝ်ႉၼင်ႇႁိုဝ်တီႈမႂ်း၊ ဝႃႈၼင်ႇၼႆလႄႈ၊ မၼ်းၶိုၼ်းလဝ်ႊလၢတ်ႈလႄႈဝႃႈ၊ မၼ်းၼၼ်ႉလၢတ်ႈတီႈၶႃႈၸဝ်ႈလႄႈဝႃႈ၊ ၸဝ်ႈႁဝ်းတၵ်းလုၵ်ႉၶိုၼ်းသေၵႃႈတီႈတၢင်းၶႆႈတၢင်းပဵၼ်ၼႆႉဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

15ဝၼ်းမိူဝ်ႈၽုၵ်ႈၼၼ်ႉ၊ မၼ်းဢဝ်ၽႃႈႁူမ်ႇၸုပ်ႉၼမ်ႉသေလႄႈ ႁူမ်ႇသုမ်ႇသႂ်ႇၵႃႈတီႈၼႃႈၶုၼ်ႁေႃၶမ်း ႁႂ်ႈထၼ်ႈပေႃးတၢႆလႄႈ ႁႃႇၸေႇလႃႉ ၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်မၼ်းဢေႃႈ။

16ၼႂ်းပီႊဢၼ် ယူဝ်းရမ်ႇ လုၵ်ႈၸၢႆး ဢႃႇႁပ်ႉ ၶုၼ်ႁေႃၶမ်း ဢီႉသရေႇလႃႉ ၸၢမ်ႇႁၢင်ႈၸၢမ်ႇႁေႃႁႃႈပီႊၼၼ်ႉ၊ ၼႂ်းမိူဝ်ႈဢၼ် ယူဝ်းသၽတ်ႉ ပဵၼ်ၶုၼ်ႁေႃၶမ်း ယူႉတႃႉ ယူႇၼၼ်ႉ၊ ယႁူဝ်းရမ်ႇ လုၵ်ႈၸၢႆး ယူဝ်းသၽတ်ႉ ၶုၼ်ႁေႃၶမ်း ယူႉတႃႉ ၸႃႉၼင်ႈႁၢင်ႈၼင်ႈႁေႃဢေႃႈ။-

17မိူဝ်ႈဢၼ်မၼ်းၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ ဢသၢၵ်ႈမၼ်းလႆႈသၢမ်သိပ်းပၢႆသွင်ပီႊလႄႈ၊ မၼ်းဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရူႉသလႅမ်ႇ ပႅတ်ႇပီႊဢေႃႈ။-

18ပိူဝ်ႈဢၼ်မၼ်းပဵၼ်ၵူပ်ႉပဵၼ်ၵူႈလူၺ်ႈၵၼ်တင်းလုၵ်ႈယိင်း ဢႃႇႁပ်ႉ ၼၼ်ႉလႄႈ၊ မၼ်းၸွမ်းသဵၼ်ႈတၢင်းဢၼ် ၶုၼ်ႁေႃၶမ်း ဢီႉသရေႇလႃႉ တင်းလၢႆၸွမ်းၼၼ်ႉ မိူၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်း ဢႃႇႁပ်ႉ ၼၼ်ႉလႄႈ ႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးဢေႃႈ။-

19ၵူၺ်းၵႃႈ ထႃႇဝရႃႉၽြႃးထွၵ်ႈလူၺ်ႈၼႃႈ ၶႃႈမၼ်းၸဝ်ႈ တႃႇဝိတ်ႈ လႄႈ ဢမ်ႇမီးဢလူဝ်ႇၶႂ်ႈယႃႉမိူင်း ယူႉတႃႉ ပႅတ်ႈ ၵွပ်ႈပိူဝ်ႈဢၼ်မၼ်းၸဝ်ႈလႆႈမီးၵတီႉဝႆႉလူၺ်ႈလွင်ႈဢၼ်မၼ်းၸဝ်ႈ တၵ်းပၼ်ဝၢၼ်ႇၽႆးတဵၼ်းဢၼ်ႁိူဝ်ႈလႅင်းတီႈမၼ်း ဢိၵ်ႇတင်းလုၵ်ႈလၢၼ်မၼ်းတႃႇသေႇၼၼ်ႉဢေႃႈ။

20ၼႂ်းၸူဝ်ႈပၢၼ်မၼ်းၼၼ်ႉ မိူင်း ဢေႇတုမ်ႇ ပုင်ႇၵၢၼ်ႇ ၶုၼ်ႁေႃၶမ်း ယူႉတႃႉ သေလႄႈ ယုၵ်ႉယွင်ႈၵူၼ်းၵေႃႉၼိုင်ႈ ႁဵတ်းၶုၼ်ႁေႃၶမ်းၶဝ်ဢေႃႈ။-

21ယႁူဝ်းရမ်ႇ ၼၼ်ႉ ပႃးဢဝ်ၵူၼ်းသိုၵ်းၶီႇလေႃႉရထႃးတင်းသဵင်ႈတင်းလူင် ၶီႇသိုၵ်းၵႂႃႇၵႃႈတီႈဝဵင်း ၸႃႇဢီႇရႃႉ လႄႈ လုၵ်ႉၶိင်ႇၵၢင်ၶိုၼ်းသေလႄႈ ယႃႉၵူၼ်း ဢေႇတုမ်ႇ ဢၼ်လွမ်ႉႁွပ်ႈမၼ်းဢိၵ်ႇတင်း ပူဝ်ႇဢၼ်ဢုပ်ႉၵႃႈၼိူဝ်လေႃႉရထႃးၸိူဝ်းၼၼ်ႉပႅတ်ႈလႄႈ၊ ၵူၼ်း ဢေႇတုမ်ႇ တင်းလၢႆ ဢွၼ်ၵၼ်ဢွၵ်ႇပၢႆႈၵႂႃႇၸူးၵႃႈတီႈမူဝ်းၵႃႇတီႈယူႇၶဝ်ဢေႃႈ။-

22ၼင်ႇၼၼ်လႄႈ မိူင်း ဢေႇတုမ်ႇ ၼၼ်ႉပုင်ႇၵၢၼ်ႇၶုၼ်ႁေႃၶမ်း ယူႉတႃႉ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။ မိူဝ်ႈၶိင်ႇၼၼ်ႉမိူင်း လီႉပၼႃႉ ၵေႃႈပုင်ႇၵၢၼ်ႇဢေႃႈ။-

23လွင်ႈတၢင်း ယႁူဝ်းရမ်ႇ ဢၼ်ယင်းၵိုတ်းယင်းၵျၢၼ်ႇ ဢိၵ်ႇတင်းလွင်ႈတၢင်းၵႃႈဢၼ်မၼ်းႁဵတ်းၸိူဝ်းၼၼ်ႉၸိုင်၊ တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ ဢေႃႈ။-

24ယႁူဝ်းရမ်ႇ ၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းတင်းလၢႆ ၵႃႈၼႂ်းဝဵင်း တႃႇဝိတ်ႈ ဢေႃႈ။ ဢႃႇၶၸီႉ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

25ၼႂ်းပီႊဢၼ် ယူဝ်းရမ်ႇ လုၵ်ႈၸၢႆး ဢႃႇႁပ်ႉ ၶုၼ်ႁေႃၶမ်း ဢီႉသရေႇလႃႉ ၸၢမ်ႇႁၢင်ႈၸၢမ်ႇႁေႃသိပ်းပၢႆသွင်ပီႊၼၼ်ႉ၊ ဢႃႇၶၸီႉ လုၵ်ႈၸၢႆးၸဝ်ႈ ယႁူဝ်းရမ်ႇ ၶုၼ်ႁေႃၶမ်း ယူႉတႃႉ ၼၼ်ႉ ၸႃႉၼင်ႈႁၢင်ႈၼင်ႈႁေႃဢေႃႈ။-

26ဢႃႇၶၸီႉ ၼၼ်ႉ၊ မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ ဢသၢၵ်ႈလႆႈသၢဝ်းပၢႆသွင်ပီႊလႄႈ ဢုပ်ႉပိူင်ႇၸၢမ်ႇၸႃးၵႃႈၼႂ်းဝဵင်း ယေႇရူႉသလႅမ်ႇ ပီႊၼိုင်ႈဢေႃႈ။ ၸိုဝ်ႈသဵင်မႄႈမၼ်းၸမ်ႉ၊ ပဵၼ် ဢႃႇထလီႉ လၢၼ်ယိင်း ဢေႃးမရီႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉဢေႃႈ။-

27ပိူဝ်ႈဢၼ်မၼ်းပဵၼ်လုၵ်ႈၶူၺ် ဢႃႇႁပ်ႉ လႄႈ မၼ်းၸွမ်းသဵၼ်ႈတၢင်းဢၼ်မဵဝ်းၸိူဝ်ႉၶိူဝ်း ဢႃႇႁပ်ႉ ၸွမ်းၼၼ်ႉလႄႈ ႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃး မိူၼ်ၸိူဝ်ႉၼင်ႇမဵဝ်းၸိူဝ်ႉၶိူဝ်း ဢႃႇႁပ်ႉ ၼၼ်ႉဢေႃႈ။-

28မၼ်းၸွမ်းလူၺ်ႈၵၼ်တင်း ယူဝ်းရမ်ႇ လုၵ်ႈၸၢႆး ဢႃႇႁပ်ႉ ၼၼ်ႉ ၶီႇသိုၵ်းၵႂႃႇႁႂ်ႈလႆႈတိုၵ်းတေႃး ႁႃႇၸေႇလႃႉ ၶုၼ်ႁေႃၶမ်း သူႉရီႉ ၼၼ်ႉ ၵႃႈတီႈဝဵင်း ရႃႇမုတ်ႉ မိူင်း ၵီႉလတ်ႉ လႄႈ၊ ၵူၼ်း သူႉရီႉ ၸိူဝ်းၼၼ်ႉ ဢွၼ်ၵၼ်တိူဝ်ႉထုၵ်ႇသႂ်ႇ ယူဝ်းရမ်ႇ ဢေႃႈ။-

29ၶုၼ်လူင် ယူဝ်းရမ်ႇ ၼၼ်ႉ ၶိုၼ်းမိူဝ်းၵႂႃႇၵႃႈတီႈဝဵင်း ယေႇၸရေႇလႃႉ ႁႂ်ႈတၢင်းၸဵပ်းဢၼ် ၵူၼ်း သူႉရီႉ ၸိူဝ်းၼၼ်ႉတိူဝ်ႉထုၵ်ႇသႂ်ႇ ၵႃႈတီႈဝဵင်း ရႃႇမုတ်ႉ ၼႂ်းမိူဝ်ႈဢၼ်မၼ်းတိုၵ်းတေႃး ႁႃႇၸေႇလႃႉ ၶုၼ်ႁေႃၶမ်း သူႉရီႉ ယူႇၼၼ်ႉ ၸိူဝ်းၼၼ်ႉလႆႈႁၢႆဢေႃႈ။ ၼႂ်းမိူဝ်ႈဢၼ်မၼ်းယင်းတိုၵ်ႉၸဵပ်းသႅပ်ႇယူႇၼၼ်ႉၸိုင်၊ ဢႃႇၶၸီႉ လုၵ်ႈၸၢႆး ယႁူဝ်းရမ်ႇ ၶုၼ်ႁေႃၶမ်း ယူႉတႃႉ ၼၼ်ႉ လူင်းၵႂႃႇႁႂ်ႈလႆႈလူတူၺ်း ယူဝ်းရမ်ႇ လုၵ်ႈၸၢႆးၸဝ်ႈ ဢႃႇႁပ်ႉ ၼၼ်ႉ ၵႃႈတီႈ ယေႇၸရေႇလႃႉ ဢေႃႈ။

← Chapter 7 Jump to: Chapter 9 →