2 Kings 16 — Shan

1ၼႂ်းပီႊဢၼ် ပေႇၵႃႇ လုၵ်ႈၸၢႆး ရေႇမလီႉ ၸၢမ်ႇႁၢင်ႈၸၢမ်ႇႁေႃ သိပ်းပၢႆၸဵတ်းပီႊၼၼ်ႉ၊ ဢႃႇၶတ်ႉ လုၵ်ႈၸၢႆး ယူဝ်းထမ်ႇ ၶုၼ်ႁေႃၶမ်း ယူႉတႃႉ ၼၼ်ႉၸႃႉၼင်ႈႁၢင်ႈၼင်ႈႁေႃဢေႃႈ။-

2မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈသၢဝ်းပီႊလႄႈ မၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရူႉသလႅမ်ႇ သိပ်းပၢႆႁူၵ်းပီႊဢေႃႈ။ မၼ်းဢမ်ႇႁဵတ်းဢၼ်လီဢၼ်ငၢမ်း သိုဝ်ႈၼႃႈတႂ်ႈတႃထႃႇဝရႃႉၽြႃး ၽြႃးပဵၼ်ၸဝ်ႈမၼ်း မိူၼ်ၸိူဝ်ႉၼင်ႇၸဝ်ႈပေႃႈမၼ်း တႃႇဝိတ်ႈ ၼၼ်ႉ။-

3မၼ်းၸွမ်းသဵၼ်ႈတၢင်းဢၼ်ၶုၼ်ႁေႃၶမ်း ဢီႉသရေႇလႃႉ ၸိူဝ်းၼၼ်ႉၸွမ်းၼၼ်ႉလႄႈ ဢဝ်လုၵ်ႈၸၢႆးမၼ်းပၼ် ႁႂ်ႈလႆႈၶၢမ်ႇတၢင်းဢၼ်ဢဝ်ၽႆးပုၵ်ႈၸေႃႇတီႈၸဝ်ႈၽြႃး မူးလွၵ်ႉ ၸွမ်းၵႃႈၼင်ႇထုင်းၸၢမ်ႇဢၼ်လီႁင်ႈဢဵတ်ႇသဵတ်ႇၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ထႃႇဝရႃႉၽြႃးႁေႃႈဢွၵ်ႇပႅတ်ႈသေၵႃႈတီႈၽၢႆႇၼႃႈ ၵူၼ်းမဵဝ်း ဢီႉသရေႇလႃႉ တင်းလၢႆၸိူဝ်းၼၼ်ႉဢေႃႈ။-

4မၼ်းၸၢင်ႈပုၵ်ႈၸေႃႇယိတ်ႈလႄႈ ဢဝ်ၼၢမ်ႇသႃႇတုတ်ႇၽႆး ၵႃႈၼိူဝ်ထႃႇၼႃႉတီႈသုင်လႂ်၊ ၵႃႈၼိူဝ်ၵုင်းလႂ်၊ ၵႃႈတႂ်ႈတူၼ်ႈမႆႉဢၼ်ၶဵဝ်လႂ်ဢေႃႈ။

5မိူဝ်ႈၼၼ်ႉ ရေႇၸိၼ်း ၶုၼ်ႁေႃၶမ်း သူႉရီႉ ဢိၵ်ႇတင်း ပေႇၵႃႇ လုၵ်ႈၸၢႆး ရေႇမလီႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉ ၶီႇသိုၵ်းၶိုၼ်ႈၸူးၵႃႈတီႈဝဵင်း ယေႇရူႉသလႅမ်ႇ လႄႈ လွမ်ႉႁွပ်ႈ ဢႃႇၶတ်ႉ ဝႆႉသေၵေႃႈ ဢမ်ႇပႄႉဢမ်ႇၼႅင်ႇမၼ်းလႆႈ။-

6မိူဝ်ႈၼၼ်ႉ ရေႇၸိၼ်း ၶုၼ်ႁေႃၶမ်း သူႉရီႉ သမ်ႉၶိုၼ်းလႆႈဝဵင်း ဢေးလတ်ႉ လႄႈ ဢဝ်သႂၢင်းၶဝ်ႈၵႃႈၼႂ်းမိူင်း သူႉရီႉ သေလႄႈ ႁေႃႈၵူၼ်း ယူႉတႃႉ တင်းလၢႆ ဢွၵ်ႇပႅတ်ႈသေၵႃႈၼႂ်းဝဵင်း ဢေးလတ်ႉ ၼၼ်ႉသေယဝ်ႉ၊ ၵူၼ်း သူႉရီႉ ၸိူဝ်းၼၼ်ႉ ဢွၼ်ၵၼ်မႃးၵႃႈတီႈဝဵင်း ဢေးလတ်ႉ လႄႈ ယူႇၵႃႈတီႈၼၼ်ႈ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

7ၵွပ်ႈပိူဝ်ႈၼင်ႇၼၼ်လႄႈ ဢႃႇၶတ်ႉ ပွႆႇၸႂ်ႉသၢၼ်ႇတမၢၼ်ႇတင်းလၢႆ ၵႂႃႇၸူးၵႃႈတီႈ တီႉၵလတ်ႉပီႉလေႇသႃႇ ၶုၼ်ႁေႃၶမ်း ဢႃႇသူႉရီႉ ၼၼ်ႉလႄႈ တွင်းပၢၼ်ႇလႄႈဝႃႈ၊ ၵဝ်ၶႃႈၼႆႉပဵၼ်လုၵ်ႈၸၢႆးၸဝ်ႈႁဝ်း၊ ပဵၼ်ၶႃႈၸဝ်ႈႁဝ်းတီႈၶႃႈဢေႃႈ။ မႃးသေၵမ်းတီႈၶႃႈ။ ၶႅၼ်းတေႃႈၵႄႇသႄႇၶျွတ်ႈဢဝ်ၵဝ်ၶႃႈ သေၵႃႈၼႂ်းမိုဝ်းၶုၼ်ႁေႃၶမ်း သူႉရီႉ ဢိၵ်ႇတင်းၶုၼ်ႁေႃၶမ်း ဢီႉသရေႇလႃႉ ဢၼ်ႁဵတ်းရၢၼ်ႇသူႇဝႆႉတၢင်းၽိတ်းတီႈၵဝ်ၶႃႈၸိူဝ်းၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

8မိူဝ်ႈၼၼ်ႉ ဢႃႇၶတ်ႉ ဢဝ်ငိုၼ်းၶမ်းဢၼ်ထူပ်းႁၼ်ၵႃႈၼႂ်းႁိူၼ်းထႃႇဝရႃႉၽြႃး ဢိၵ်ႇတင်းတိူၵ်ႈၽၼ်ႇတႃႇႁေႃၸဝ်ႈၼၼ်ႉလႄႈ ႁဵတ်းလၢၵ်ႈသွင်ႇပၼ်ၵႂႃႇတီႈၶုၼ်ႁေႃၶမ်း ဢႃႇသူႉရီႉ ဢေႃႈ။-

9ၶုၼ်ႁေႃၶမ်း ဢႃႇသူႉရီႉ ၼၼ်ႉ ထွမ်ႇဢဝ်ၵႂၢမ်းမၼ်းသေလႄႈ ၶုၼ်ႁေႃၶမ်း ဢႃႇသူႉရီႉ ၼၼ်ႉ ၶီႇသိုၵ်းၶိုၼ်ႈၸူးၵႃႈတီႈဝဵင်း ထမ်ႇမသႅတ်ႉ လႄႈ တိုၵ်းဢဝ်သေယဝ်ႉ၊ သိမ်းဢဝ်ၵူၼ်းဝဵင်းတင်းလၢႆၵႂႃႇၵႃႈတီႈဝဵင်း ၵီႉရႃႉ ဢေႃႈ။ ၶုၼ် ရေႇၸိၼ်း ၼၼ်ႉၵေႃႈ ဢဝ်တၢႆပႅတ်ႈဢေႃႈ။

10ၶုၼ်လူင် ဢႃႇၶတ်ႉ ၵႂႃႇၵႃႈတီႈဝဵင်း ထမ်ႇမသႅတ်ႉ ႁႂ်ႈလႆႈႁူပ်ႉထူပ်းၵၼ်တင်း တီႉၵလတ်ႉပီႉလေႇသႃႇ ၶုၼ်ႁေႃၶမ်း ဢႃႇသူႉရီႉ ၼၼ်ႉလႄႈ ႁၼ်ယိတ်ႈပလၢင်ႇၵႃႈတီႈဝဵင်းၼၼ်ႉသေယဝ်ႉ၊ ၶုၼ်လူင် ဢႃႇၶတ်ႉ မၢတ်ႈမၢႆ ဢဝ်ပုင်ႇႁၢင်ႈယိတ်ႈပလၢင်ႇၼၼ်ႉ ဢိၵ်ႇတင်းတၢင်းဢၼ်တႅၵ်ႈဢၼ်ၶပ်ႉမၼ်း ၸွမ်းလူၺ်ႈတၢင်းဢၼ်ႁဵတ်းဢၼ်သၢင်ႈမၼ်းၼၼ်ႉသေလႄႈပၼ်မႃးတီႈယိတ်ႈပရေႃးႁဵၵ်ႈ ဢူႉရီႉယႃႉ ဢေႃႈ။-

11ယိတ်ႈပရေႃးႁဵၵ်ႈ ဢူႉရီႉယႃႉ တႄႇႁဵတ်းယိတ်ႈပလၢင်ႇဢေႃႈ၊ ၸွမ်းၵႃႈၼင်ႇဢၼ်ၶုၼ်လူင် ဢႃႇၶတ်ႉ ဢဝ် ၵႃႈတီႈဝဵင်း ထမ်ႇမသႅတ်ႉ ပၼ်မႃးၼၼ်ႉသေလႄႈယိတ်ႈပရေႃးႁဵၵ်ႈ ဢူႉရီႉယႃႉ ၼၼ်ႉႁဵတ်းဝႆႉထႃႈ ၶိင်ႇမိူဝ်ႈဢၼ်ၶုၼ် ဢႃႇၶတ်ႉ တၵ်းလုၵ်ႉၵႃႈတီႈဝဵင်း ထမ်ႇမသႅတ်ႉ ႁွတ်ႈမႃးၼၼ်ႉဢေႃႈ။-

12ၶုၼ်ႁေႃၶမ်း လုၵ်ႉသေၵႃႈတီႈဝဵင်း ထမ်ႇမသႅတ်ႉ ႁွတ်ႈမႃးသေယဝ်ႉ၊ ၶုၼ်ႁေႃၶမ်းႁၼ်ယိတ်ႈပလၢင်ႇၼၼ်ႉလႄႈ၊ ၶုၼ်ႁေႃၶမ်းသုတ်ႉၸပ်းသုတ်ႉၸူးၵႃႈတီႈယိတ်ႈပလၢင်ႇၼၼ်ႉသေလႄႈ ပုၵ်ႈၸေႃႇယိတ်ႈၵႃႈၼိူဝ်မၼ်းဢေႃႈ။-

13မၼ်းဢဝ်ယိတ်ႈဢၼ်တုတ်ႇၽႆး၊ ဢိၵ်ႇတင်းၶိူင်ႈပုၵ်ႈၸေႃႇၽေႃးၸဵၼ်ႇမၼ်းတုတ်ႇၽႆးလႄႈ ဢဝ်ၶိူင်ႈပုၵ်ႈၸေႃႇဢၼ်သွၼ်းလေႃႇမၼ်း သွၼ်းလေႃႇသေလႄႈ ဢဝ်လိူတ်ႈယိတ်ႈမိၵ်ႉသႃႇႁႃယႃႉမၼ်း ၽႅတ်းသႂ်ႇၵႃႈၼိူဝ်ယိတ်ႈပလၢင်ႇဢေႃႈ။-

14ယိတ်ႈပလၢင်ႇတွင်းလိူင်ဢၼ်မီး ၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉၸိုင် မၼ်းၶၢႆႉဢွၵ်ႇသေၵႃႈတီႈၽၢႆႇၼႃႈႁိူၼ်းၸဝ်ႈ ၵႃႈတီႈၵႄႈဝူင်ႈၵၢင်ယိတ်ႈပလၢင်ႇမၼ်း တင်းႁိူၼ်းထႃႇဝရႃႉၽြႃးလႄႈ ဝႆႉၵႃႈတီႈၽၢႆႇတၢင်းႁွင်ႇယိတ်ႈပလၢင်ႇမၼ်းၼၼ်ႉဢေႃႈ။-

15လႆႈသမ်ႉ ၶုၼ်လူင် ဢႃႇၶတ်ႉ သင်ႇလၢတ်ႈဝႆႉတီႈယိတ်ႈပရေႃးႁဵၵ်ႈ ဢူႉရီႉယႃႉ ၸမ်ႉ၊ ယိတ်ႈဢၼ်တုတ်ႇၽႆးၶိင်ႇၵၢင်ၼႂ် တင်းၶိူင်ႈပုၵ်ႈၸေႃႇၽေႃးၸဵၼ်ႇၶိင်ႇၵၢင်ၶမ်ႈ၊ ယိတ်ႈဢၼ်တုတ်ႇၽႆးၶုၼ်ႁေႃၶမ်း တင်းၶိူင်ႈပုၵ်ႈၸေႃႇၽေႃးၸဵၼ်ႇမၼ်း ယိတ်ႈဢၼ်တုတ်ႇၽႆးၵူၼ်းဝၢၼ်ႈၵူၼ်းမိူင်း တင်းၶိူင်ႈပုၵ်ႈၸေႃႇၽေႃးၸဵၼ်ႇၶဝ် ၶိူင်ႈပုၵ်ႈၸေႃႇဢၼ်သွၼ်းလေႃႇၶဝ်ၸိူဝ်းၼၼ်ႉၸိုင်၊ ဢဝ်တုတ်ႇၽႆး ၵႃႈၼိူဝ်ယိတ်ႈပလၢင်ႇလူင်ၼႆႉတႃႉ။ လိူတ်ႈယိတ်ႈဢၼ်တုတ်ႇၽႆးၵႃႈမီး တင်းလိူတ်ႈယိတ်ႈတင်းလၢႆၵႃႈမီးၼၼ်ႉၵေႃႈ ဢဝ်ၽႅတ်းသႂ်ႇၵႃႈၼိူဝ်မၼ်းတႃႉ၊ ယိတ်ႈပလၢင်ႇတွင်းလိူင်ၼၼ်ႉ တၵ်းလႆႈမီးဝႆႉ ပုၼ်ႈဢၼ်ၵဝ်တၵ်းတွင်ႈထၢမ်ဢေႃႈ၊ ဝႃႈၼင်ႇၼႆလႄႈ၊-

16ယိတ်ႈပရေႃးႁဵၵ်ႈ ဢူႉရီႉယႃႉ ႁဵတ်းၸွမ်းၵႃႈဢၼ်ၶုၼ်လူင် ဢႃႇၶတ်ႉ သင်ႇလၢတ်ႈဝႆႉၼၼ်ႉဢေႃႈ။

17ၶုၼ်လူင် ဢႃႇၶတ်ႉ ၼုၵ်ႈဢဝ်ၵမ်းပၢတ်ႈ ဢၼ်ၸၢပ်ႈသႅင်ႇၵၼ်တင်းၶူင်ႇၸိူဝ်းၼၼ်ႉဢွၵ်ႇပႅတ်ႈလႄႈ ဢဝ်မေႃႈဢႅင်ႇၶၢႆႉသေၵႃႈၼိူဝ်ၸိူဝ်းၼၼ်ႉသေယဝ်ႉ၊ ဢဝ်ၼမ်ႉၼွင်ၼၼ်ႉၶျႃးတူၵ်းသေၵႃႈၼိူဝ်ဝူဝ်းတွင်းလိူင် ဢၼ်မီးၵႃႈတႂ်ႈမၼ်းၸိူဝ်းၼၼ်ႉသေလႄႈ တၢင်ႇဝႆႉၵႃႈၼိူဝ်မၢၵ်ႇႁိၼ်သိူဝ်ႇဢေႃႈ။-

18သုမ်ႉၵၢႆႇၼႃး ဢၼ်ႁဵတ်းဝႆႉၵႃႈတီႈပိၵ်ႈမၢၼ်ႇၸဝ်ႈ ပုၼ်ႈဢၼ်တၵ်းပႂ်ႉဝၼ်းၵမ်သိၼ်ၼၼ်ႉ ဢိၵ်ႇတင်းၵျွင်းတၢၼ်း ဢၼ်ၶုၼ်ႁေႃၶမ်းတၵ်းၶိုၼ်ႈၼၼ်ႉၸိုင်၊ မၼ်းဢဝ်သႂၢင်းၶဝ်ႈၵႃႈၼႂ်းႁိူၼ်းထႃႇဝရႃႉၽြႃး ၵွပ်ႈပိူဝ်ႈၶုၼ်ႁေႃၶမ်း ဢႃႇသူႉရီႉ ၼၼ်ႉဢေႃႈ။-

19လွင်ႈတၢင်းဢၼ် ဢႃႇၶတ်ႉ ႁဵတ်း ဢၼ်ယင်းၵိုတ်းယင်းၵျၢၼ်ႇ ၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်း ရႃႇၸဝၢင်ႇ ယူႉတႃႉ ဢေႃႈ။-

20ဢႃႇၶတ်ႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းၸိူဝ်းၼၼ်ႉ ၵႃႈၼႂ်းဝဵင်း တႃႇဝိတ်ႈ ဢေႃႈ။ ႁေႇၸၵီႉ လုၵ်ႈၸၢႆးၸဝ်ႈ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။