2 Kings 13

Shan

← Chapter 12 Jump to: Chapter 14 →

1ၼႂ်းပီႊဢၼ် ယေႃးသႃႉ လုၵ်ႈၸၢႆး ဢႃႇၶၸီႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃ သၢဝ်းပၢႆသၢမ်ပီႊၼၼ်ႉ၊ ယေႃးၶတ်ႉ လုၵ်ႈၸၢႆး ယေႇႁူႉ ၼၼ်ႉ ၸႃႉၼင်ႈႁၢင်ႈၼင်ႈႁေႃ ယူႇၵႃႈၼႂ်းဝဵင်း သမႃႇရီႉ လႄႈ ဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ သိပ်းပၢႆၸဵတ်းပီႊဢေႃႈ။-

2မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ယင်းဢမ်ႇဝႄႈပႅတ်ႈဢပႅတ်ႈတူႉၸရိူၵ်ႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ဢၼ်မၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉလႄႈၸွမ်းယူႇဢေႃႈ။

3ၵွပ်ႈပိူဝ်ႈၼင်ႇၼၼ်လႄႈ ထႃႇဝရႃႉၽြႃးၸႂ်မႆႈၶႆႈၸႃႉတီႈမဵဝ်း ဢီႉသရေႇလႃႉ လႄႈ ဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်း ႁႃႇၸေႇလႃႉ ၶုၼ်ႁေႃၶမ်း သူႉရီႉ ဢိၵ်ႇတင်းၵႃႈၼႂ်းမိုဝ်း ပိၼ်ႇႁႃႇတတ်ႉ လုၵ်ႈၸၢႆး ႁႃႇၸေႇလႃႉ ၼၼ်ႉ ၼႂ်းၸူဝ်ႈပၢၼ်မၼ်းၼၼ်ႉတဵမ်တဵမ်ဢေႃႈ။-

4ယေႃးၶတ်ႉ ၼၼ်ႉသူးတွင်းတီႈထႃႇဝရႃႉၽြႃးလႄႈ၊ ထႃႇဝရႃႉၽြႃးထွမ်ႇဢဝ်ၵႂၢမ်းမၼ်း ၵွပ်ႈပိူဝ်ႈဢၼ်မၼ်းၸဝ်ႈႁၼ်တၢင်းဢၼ်ၼိၵ်ႈၸၢၵ်ႈငႅၼ်းသႄး တီႈမဵဝ်း ဢီႉသရေႇလႃႉ ဢၼ်ၶုၼ်ႁေႃၶမ်း သူႉရီႉ ၼိၵ်ႈၸၢၵ်ႈငႅၼ်းသႄးၶဝ်ၼၼ်ႉဢေႃႈ။-

5ထႃႇဝရႃႉၽြႃးပၼ်ၸဝ်ႈဢၼ်ၵႄႇသႄႇၶျွတ်ႈဢဝ် တီႈမဵဝ်း ဢီႉသရေႇလႃႉ ထၼ်ႈပေႃးၶဝ်လႆႈလွတ်ႈဢွၵ်ႇသေၵႃႈၼႂ်းမိုဝ်း ၵူၼ်း သူႉရီႉ တင်းလၢႆလႄႈ ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ လႆႈယူႇၵႃႈၼႂ်းမူဝ်းၵႃႇတီႈယူႇတီႈသဝ်းၶဝ် မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉဢေႃႈ။-

6ၼႂ်းဝႃႈၼၼ်သေၵေႃႈ ၶဝ်ယင်းဢမ်ႇဝႄႈပႅတ်ႈတူႉၸရိူၵ်ႈဢပႅတ်ႈမဵဝ်းၸိူဝ်ႉၶိူဝ်း ယေႇရူဝ်းပုမ်ႇ ဢၼ်မၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉလႄႈ ဢွၼ်ၵၼ်ၸွမ်းယူႇဢေႃႈ။ ၵႃႈတီႈဝဵင်း သမႃႇရီႉ ၵေႃႈ ယင်းမီးတူၼ်ႈ ဢႃႇသရႃႉ ယူႇဢေႃႈ။-

7ၵႃႈတီႈ ယေႃးၶတ်ႉ ၼၼ်ႉ၊ လိူဝ်သေၵူၼ်းသိုၵ်းၶီႇမႃႉႁႃႈသိပ်း၊ လေႃႉရထႃးသိပ်းၼိုင်ႈ၊ ၵူၼ်းသိုၵ်းပႆတိၼ်မိုၼ်ႇၼိုင်ႈၵူၺ်းၼၼ်ႉ၊ ၶုၼ်ႁေႃၶမ်း သူႉရီႉ ဢမ်ႇဝႆႉၵိုတ်းဝႆႉၵျၢၼ်ႇလႃးလႃး။ လွင်ႈမၼ်းၸမ်ႉ ၶုၼ်ႁေႃၶမ်း သူႉရီႉ ၼၼ်ႉ လႆႈယႃႉၽဵဝ်ႈၶဝ်ပႅတ်ႈလႄႈ ႁႂ်ႈၶဝ်ပဵၼ်ၸိူဝ်ႉၼင်ႇမုၼ်ႈၵႃႈၼႂ်းတလၢင်းယဵပ်ႇၶဝ်ႈၼၼ်ႉဢေႃႈ။-

8လွင်ႈတၢင်း ယေႃးၶတ်ႉ ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းၵႃႈဢၼ်မၼ်းႁဵတ်း၊ လွင်ႈတၢင်းဢၼ်တၼ်းၶူဝ်းမၼ်းယႂ်ႇၸိူဝ်းၼၼ်ႉၸိုင်၊ တႅမ်ႈဝႆႉမီးယူႇၵႃႈၼႂ်း ရႃႇၸဝၢင်ႇ ဢီႉသရေႇလႃႉ ဢေႃႈ။-

9ယေႃးၶတ်ႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶဝ်ဢဝ်မၼ်းသၢင်းၵျူဝ်ႇၵႃႈၼႂ်းဝဵင်း သမႃႇရီႉ ဢေႃႈ။ ယႁေႃးသႃႉ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

10ၼႂ်းပီႊဢၼ် ယေႃးသႃႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃသၢမ်သိပ်းပၢႆၸဵတ်းပီႊၼၼ်ႉ၊ ယႁေႃးသႃႉ လုၵ်ႈၸၢႆး ယေႃးၶတ်ႉ ၼၼ်ႉ ၸႃႉၼင်ႈႁၢင်ႈၼင်ႈႁေႃယူႇၵႃႈၼႂ်းဝဵင်း သမႃႇရီႉ လႄႈဢုပ်ႉပိူင်ႇၸၢမ်ႇၸႃးမိူင်း ဢီႉသရေႇလႃႉ သိပ်းပၢႆႁူၵ်းပီႊဢေႃႈ။-

11မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ယင်းဢမ်ႇဝႄႈပႅတ်ႈတူႉၸရိူၵ်ႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ဢၼ်မၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉလႄႈ ဢွၼ်ၵၼ်ၸွမ်းယူႇဢေႃႈ။-

12လွင်ႈတၢင်း ယႁေႃးသႃႉ ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းၵႃႈဢၼ်မၼ်းႁဵတ်း၊ လွင်ႈတၢင်းဢၼ်တၼ်းၶူဝ်းမၼ်းယႂ်ႇ လူၺ်ႈလွင်ႈဢၼ်မၼ်းတိုၵ်းသိုၵ်းၵၼ်တင်း ဢႃႇမၸီႉ ၶုၼ်ႁေႃၶမ်း ယူႉတႃႉ ၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်း ရႃႇၸဝၢင်ႇ ဢီႉသရေႇလႃႉ ဢေႃႈ။-

13ယႁေႃးသႃႉ ၼၼ်ႉ ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ၊ ယေႇရူဝ်းပုမ်ႇ လုၵ်ႈၸၢႆးၸဝ်ႈၼၼ်ႉ ၼင်ႈရႃႇၸႃႉပလၢင်ႇၸဝ်ႈပေႃႈမၼ်းဢေႃႈ။ ယႁေႃးသႃႉ ၼၼ်ႉ လႆႈၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းဝဵင်း သမႃႇရီႉ လူၺ်ႈၵၼ်တင်းၶုၼ်ႁေႃၶမ်း ဢီႉသရေႇလႃႉ တင်းလၢႆဢေႃႈ။

14မိူဝ်ႈၼၼ်ႉၼႂ်းမိူဝ်ႈဢၼ် ဢေးလီႉသႄး ၸပ်းတၢင်းၶႆႈတၢင်းပဵၼ်ဢၼ်မၼ်းတၵ်းလႆႈတၢႆလူၺ်ႈၼၼ်ႉလႄႈယူႇၼၼ်ႉၸိုင်၊ ယႁေႃးသႃႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉ လူင်းၸူးတီႈမၼ်းလႄႈၵူမ်ႈၶူမ်ႁႆႈႁွင်ႉယူႇၵႃႈၼိူဝ်ၼႃႈမၼ်းလႄႈဝႃႈ၊ ပေႃႈၵဝ်ဢိူၺ်း၊ ပေႃႈၵဝ်ဢိူၺ်း၊ လေႃႉရထႃး ဢီႉသရေႇလႃႉ ဢိၵ်ႇတင်းမႃႉလေႃႉရထႃး ဢီႉသရေႇလႃႉ လူင်ပႄႇ၊ ဝႃႈၼင်ႇၼႆဢေႃႈ။-

15ဢေးလီႉသႄး ၵေႃႈလၢတ်ႈတီႈမၼ်းလႄႈဝႃႈ၊ ဢဝ်ၵၢင်ႇတင်းပိုၼ်မႃးတႃႉ၊ ဝႃႈၼင်ႇၼႆလႄႈ မၼ်းဢဝ်ၵၢင်ႇတင်းပိုၼ်မႃးဢေႃႈ။-

16မၼ်းၼၼ်ႉသမ်ႉလၢတ်ႈတီႈၶုၼ်ႁေႃၶမ်း ဢီႉသရေႇလႃႉ ထႅင်ႈလႄႈဝႃႈ၊ ဝူတ်ႈၵၢင်ႇတႃႉ၊ ဝႃႈၼင်ႇၼႆလႄႈ၊ မၼ်းဝူတ်ႈၵၢင်ႇလႄႈ ဢေးလီႉသႄး ၼၼ်ႉ ဢဝ်မိုဝ်းမၼ်းတၢင်ႇသႂ်ႇၵႃႈၼိူဝ်မိုဝ်းၶုၼ်ႁေႃၶမ်းယူႇသေလႄႈဝႃႈ၊-

17ၽုၺ်ႇႁူးလၢင်းတဵၼ်ၽၢႆႇတၢင်းဢွၵ်ႇတႃႉ၊ ဝႃႈၼင်ႇၼႆလႄႈ၊ မၼ်းၽုၺ်ႇသေယဝ်ႉ၊ ဢေးလီႉသႄး သမ်ႉလၢတ်ႈထႅင်ႈလႄႈဝႃႈ၊ ယိုဝ်းတႃႉ၊ ဝႃႈၼင်ႇၼႆလႄႈ၊ မၼ်းယိုဝ်းဢေႃႈ။ မၼ်းၼၼ်ႉလၢတ်ႈလႄႈဝႃႈ၊ ပဵၼ်ပိုၼ်တီႈဢၼ်ထႃႇဝရႃႉၽြႃးၵႄႇသႄႇၶျွတ်ႈဢဝ် ပိုၼ်တီႈဢၼ် ၵႄႇသႄႇၶျွတ်ႈဢဝ် ၵႃႈၼႂ်းမိုဝ်းၵူၼ်း သူႉရီႉ တင်းလၢႆဢေႃႈ။ လွင်ႈမၼ်းၸမ်ႉ ၸဝ်ႈတၵ်းလႆႈတိုၵ်းတေႃးယႃႉပႅတ်ႈၵူၼ်း သူႉရီႉ တင်းလၢႆ ၵႃႈတီႈဝဵင်း ဢႃႇၽႅတ်ႉ ထၼ်ႈပေႃးလူႉပေႃးလႅဝ်ဢေႃႈ၊ ဝႃႈၼင်ႇၼႆဢေႃႈ။-

18မၼ်းၼၼ်ႉသမ်ႉလၢတ်ႈထႅင်ႈလႄႈဝႃႈ၊ ဢဝ်ပိုၼ်ထႅင်ႈလူးၵွၼ်ႇတႃႉ၊ ဝႃႈၼင်ႇၼႆလႄႈ၊ မၼ်းဢဝ်ဢေႃႈ၊ မၼ်းၼၼ်ႉသမ်ႉလၢတ်ႈတီႈ ၶုၼ်ႁေႃၶမ်း ဢီႉသရေႇလႃႉ ထႅင်ႈလႄႈဝႃႈ၊ ဢဝ်ပေႃႉယႅၼ်ႉသႂ်ႇၵႃႈၼိူဝ်လိၼ်တႃႉ၊ ဝႃႈၼင်ႇၼႆလႄႈ၊ မၼ်းဢဝ်ပေႃႉယႅၼ်ႉသၢမ်ၵမ်းၵူၺ်းလႄႈ ၵိုတ်းသဝ်းယူႇသေဢေႃႈ။-

19မိူဝ်ႈၼၼ်ႉၵူၼ်းၽြႃးပဵၼ်ၸဝ်ႈ ၸႂ်မႆႈၶႆႈၸႃႉတီႈမၼ်းလႄႈလၢတ်ႈလႄႈဝႃႈ၊ မႂ်းထုၵ်ႇလီပေႃႉယႅၼ်ႉႁႃႈၵမ်းႁူၵ်းၵမ်းဢေႃႈ။ သင်ပေႃႉယႅၼ်ႉၸိူဝ်ႉၼင်ႇၼၼ်ၸိုင်၊ မႂ်းတၵ်းလႆႈတိုၵ်းတေႃးယႃႉပႅတ်ႈၵူၼ်း သူႉရီႉ တင်းလၢႆထၼ်ႈပေႃးလူႉပေႃးလႅဝ်ဢေႃႈ။ မိူဝ်ႈလဵဝ်ၼႆႉၸမ်ႉ၊ မႂ်းတၵ်းလႆႈတိုၵ်းတေႃးယႃႉပႅတ်ႈၵူၼ်း သူႉရီႉ ၸိူဝ်းၼၼ်ႉသၢမ်ပွၵ်ႈၵူၺ်းဢေႃႈ၊ ဝႃႈၼင်ႇၼႆဢေႃႈ။-

20ဢေးလီႉသႄး ၼၼ်ႉတၢႆလႄႈ ၶဝ်ဢဝ်မၼ်းသၢင်းၵျူဝ်ႇသေဢေႃႈ၊ မိူဝ်ႈဢၼ်ႁွတ်ႈထိုင်ငဝ်ႈပီႊၼႃႈၼၼ်ႉၸိုင်၊ ၵူၼ်း မေႃႇၽႃႉ တင်းလၢႆ ပဵၼ်မုၵ်ႉပဵၼ်ၸိူဝ်းသေလႄႈ မႃးတိုၵ်းမိူင်းၸဝ်ႈဢေႃႈ။-

21ၼႂ်းမိူဝ်ႈဢၼ်ၶဝ်ယင်းတိုၵ်ႉသၢင်းၵျူဝ်ႇၵူၼ်းၵေႃႉၼိုင်ႈယူႇၼၼ်ႉၸိုင် ၶဝ်ႁၼ်မုၵ်ႉၵူၼ်းၸိူဝ်းၵူၼ်း မေႃႇၽႃႉ မႃးလႄႈ ၶဝ်ၼႅတ်ႈဢဝ်တူဝ်တၢႆၼၼ်ႉၶျႃးတူၵ်းသႂ်ႇၵႃႈၼႂ်းၶုမ်သၢင်းၶႅင်း ဢေးလီႉသႄး ၼၼ်ႉဢေႃႈ၊ မိူဝ်ႈဢၼ်ၵေႃႉဢၼ်တၢႆၼၼ်ႉႁွတ်ႈထိုင်ၵႃႈတီႈတႂ်ႈလႄႈ တိူဝ်ႉထုၵ်ႇသႂ်ႇလုပ်ႇ ဢေးလီႉသႄး ၼၼ်ႉၸိုင် ဢသၢၵ်ႈမၼ်းသမ်ႉၶိုၼ်းလိပ်းလႄႈ မၼ်းလုၵ်ႉၸုၵ်းယူႇဢေႃႈ။

22ၸူဝ်ႈပၢၼ်ၶုၼ် ယေႃးၶတ်ႉ ၼၼ်ႉတဵမ်တဵမ် ႁႃႇၸေႇလႃႉ ၶုၼ်ႁေႃၶမ်း သူႉရီႉ ၼိၵ်ႈၸၢၵ်ႈငႅၼ်းသႄးမဵဝ်း ဢီႉသရေႇလႃႉ ဢေႃႈ။-

23ထႃႇဝရႃႉၽြႃး ဢဵတ်းလူႁၵ်ႉပႅင်းၶဝ်၊ ႁဵတ်းၵျေးၸူးတီႈၶဝ်လႄႈ ၶုၵ်းၸႂ်လႆႈၶႆႈၸႂ်ထူပ်းၶဝ်ၵွပ်ႈပိူဝ်ႈပတီႉၺိၺ်ႇ ဢၼ်မၼ်းၸဝ်ႈႁဵတ်းဝႆႉလူၺ်ႈၵၼ်တင်း ဢႃႇပြႃႇႁၢမ်ႇ၊ ဢီႉၸၢၵ်ႈ၊ ယႃႇၵုပ်ႈ ၸိူဝ်းၼၼ်ႉသေလႄႈ ယင်းဢမ်ႇပႆႇယႃႉၽဵဝ်ႈၶဝ်ပႅတ်ႈ၊ ဢမ်ႇပႆႇႁေႃႈၶဝ်ဢွၵ်ႇပႅတ်ႈသေၵႃႈတီႈၽၢႆႇၼႃႈမၼ်းၸဝ်ႈလႄႈယူႇဢေႃႈ။-

24ႁႃႇၸေႇလႃႉ ၶုၼ်ႁေႃၶမ်း သူႉရီႉ ၼၼ်ႉတၢႆလႄႈ ပိၼ်ႇႁႃႇတတ်ႉ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။-

25ဝၢၼ်ႈဝဵင်းဢၼ် ႁႃႇၸေႇလႃႉ တိုၵ်းတေႃးလႄႈ သိမ်းဢဝ်ၵႃႈၼႂ်းမိုဝ်း ယေႃးၶတ်ႉ ၸဝ်ႈပေႃႈမၼ်းၼၼ်ႉၸိုင်၊ ယႁေႃးသႃႉ လုၵ်ႈၸၢႆး ယေႃးၶတ်ႉ ၼၼ်ႉ သမ်ႉၶိုၼ်းတိုၵ်းတေႃးၼုၵ်ႈဢဝ် ၵႃႈၼႂ်းမိုဝ်း ပိၼ်ႇႁႃႇတတ်ႉ လုၵ်ႈၸၢႆး ႁႃႇၸေႇလႃႉ ၼၼ်ႉဢေႃႈ ယႁေႃးသႃႉ ၼၼ်ႉ တိုၵ်းတေႃးယႃႉပႅတ်ႈမၼ်းၼၼ်ႉတေႃႇထိုင်ႁွတ်ႈသၢမ်ပွၵ်ႈလႄႈ သမ်ႉလႆႈဝၢၼ်ႈဝဵင်း ဢီႉသရေႇလႃႉ တင်းလၢႆၶိုၼ်းဢေႃႈ။

← Chapter 12 Jump to: Chapter 14 →