2 Kings 18

Shan

← Chapter 17 Jump to: Chapter 19 →

1ၼႂ်းပီႊဢၼ် ႁေႃးသေႇ လုၵ်ႈၸၢႆး ဢေးလႃႇ ၶုၼ်ႁေႃၶမ်း ဢီႉသရေႇလႃႉ ၸၢမ်ႇႁၢင်ႈၸၢမ်ႇႁေႃသၢမ်ပီႊၼၼ်ႉ၊ ႁေႇၸၵီႉ လုၵ်ႈၸၢႆး ဢႃႇၶတ်ႉ ၶုၼ်ႁေႃၶမ်း ယူႉတႃႉ ၸႃႉၼင်ႈႁၢင်ႈၼင်ႈႁေႃဢေႃႈ။-

2မိူဝ်ႈဢၼ်မၼ်းၸႃႉၼင်ႈႁၢင်ႈၼင်ႈႁေႃၼၼ်ႉၸိုင်၊ ဢသၢၵ်ႈမၼ်းလႆႈသၢဝ်းပၢႆႁႃႈပီႊလႄႈ၊ မၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရူႉသလႅမ်ႇ သၢဝ်းပၢႆၵဝ်ႈပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ဢႃႇၽီႉ လုၵ်ႈယိင်း ၸႃႇၶရီႉ ဢေႃႈ။-

3မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃး ၸွမ်းၵႃႈၼင်ႇဢၼ်ၸဝ်ႈပေႃႈမၼ်း တႃႇဝိတ်ႈ ႁဵတ်းၼၼ်ႉဢေႃႈ။-

4မၼ်းပႄႇၽဵဝ်ႈထႃႇၼႃႉတီႈသုင်လႂ်၊ ၵိူၼ်ႇယႃႉသဝ်တီႈၵူဝ်းၵႂၢႆႇလႂ်၊ ပမ်ႈလူမ်ႉၽၼ်းလူမ်ႉတူၼ်ႈ ဢႃႇသရႃႉ လႂ် ပႅတ်ႈဢေႃႈ။ ငူးတွင်းလိူင်ဢၼ် မူဝ်းသေႇ ႁဵတ်းဝႆႉၼၼ်ႉၵေႃႈ မၼ်းတႅပ်းႁဵတ်းပွတ်းႁဵတ်းတွၼ်ႈပႅတ်ႈဢေႃႈ။ လွင်ႈမၼ်းၸမ်ႉ ၵူၼ်းမဵဝ်း ဢီႉသရေႇလႃႉ တင်းလၢႆ ၸၢင်ႈဢဝ်ၼၢမ်ႇသႃႇတုတ်ႇၽႆးၵႃႈတီႈၽၢႆႇၼႃႈဢၼ်ၼၼ်ႉ တေႃႇထိုင်ႁွတ်ႈၶိင်ႇၵႃႇလႃႉၸူဝ်ႈပၢၼ်ၼၼ်ႉဢေႃႈ။ မၼ်းႁွင်ႉႁဵၵ်ႈ ၸိုဝ်ႈဢၼ်ၼၼ်ႉ ၼႁုၵ်ႉတၼ်ႇ ဢေႃႈ။-

5မၼ်းသွၼ်ႈပိုင်ႈထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ ထၼ်ႈပေႃးၵႃႈၼႂ်းၶုၼ်ႁေႃၶမ်း ယူႉတႃႉ ၵႃႈဢၼ်ပဵၼ်ၵမ်းလိုၼ်းမၼ်း ဢိၵ်ႇတင်းၵႃႈၼႂ်းၶဝ်ၸိူဝ်းဢၼ် ပူၼ်ႉၵႂႃႇဢွၼ်တၢင်းမၼ်းၸိူဝ်းၼၼ်ႉၼၼ်ႉ ဢမ်ႇမီးၵေႃႉဢၼ်မိူၼ်ၵၼ်တင်းမၼ်းဢေႃႈ။-

6မၼ်းဢိင်ပိုင်ႈထႃႇဝရႃႉၽြႃးလႄႈ ယင်းဢမ်ႇၽၢတ်ႇဢမ်ႇယၢၼ်မၼ်းၸဝ်ႈလႄႈ ၸွမ်းလင်မၼ်းၸဝ်ႈယူႇသေလႄႈ ပႂ်ႉၵမ်ပႂ်ႉၸွမ်းပိင်းၺၢပ်ႈၸဝ်ႈဢၼ်ထႃႇဝရႃႉၽြႃးသင်ႇလၢတ်ႈဝႆႉတီႈ မူဝ်းသေႇ ၼၼ်ႉၸိူဝ်းၼၼ်ႉယူႇဢေႃႈ။-

7ထႃႇဝရႃႉၽြႃးမီးယူႇလူၺ်ႈၵၼ်တင်းမၼ်းလႄႈ၊ မၼ်းႁဵတ်းလႆႈပဵၼ်လႆႈၵႃႈဢၼ်မၼ်းဢွၵ်ႇၵႂႃႇဢွၵ်ႇပႆၼၼ်ႉဢေႃႈ။ မၼ်းပုင်ႇၵၢၼ်ႇၶုၼ်ႁေႃၶမ်း ဢႃႇသူႉရီႉ သေလႄႈ ဢမ်ႇၶၢမ်ႇႁဵတ်းၶႃႈတီႈၶုၼ်ၼၼ်ႉ။-

8ပဵၼ်ၵႃႈတီႈထဵင်လၢင်း ဢၼ်မုင်ႈတူၺ်းလႄႈပႂ်ႉၵၢင်သေဢမ်ႇဝႃႈ၊ ပဵၼ်ၵႃႈတီႈဝဵင်းဢၼ်မၼ်ႈၶိူင်ႇသေဢမ်ႇဝႃႈ၊ မၼ်းတိုၵ်းတေႃးယႃႉပႅတ်ႈၵူၼ်း ၽီႉလိတ်ႉတီႉ တင်းလၢႆ တေႃႇထိုင်ႁွတ်ႈဝဵင်း ၵႃႇၸႃႉ ဢိၵ်ႇတင်းလိၼ်မၼ်းဢေႃႈ။

9ၼႂ်းပီႊဢၼ်ၶုၼ်လူင် ႁေႇၸၵီႉ ၸၢမ်ႇႁၢင်ႈၸၢမ်ႇႁေႃသီႇပီႊ၊ ႁေႃးသေႇ လုၵ်ႈၸၢႆး ဢေးလႃႇ ၶုၼ်ႁေႃၶမ်း ဢီႉသရေႇလႃႉ ၸၢမ်ႇႁၢင်ႈၸၢမ်ႇႁေႃၸဵတ်းပီႊၼၼ်ႉ၊ သႃႇလႃႉမၼေႇၸႃႇ ၶုၼ်ႁေႃၶမ်း သူႉရီႉ ၼၼ်ႉ ၶီႇသိုၵ်းၶိုၼ်ႈၸူးၵႃႈတီႈဝဵင်း သမႃႇရီႉ လႄႈလွမ်ႉဝႆႉဢေႃႈ။-

10မိူဝ်ႈဢၼ်လႆႈသၢမ်ပီႊယဝ်ႉၼၼ်ႉၸိုင်၊ ၼႂ်းပီႊဢၼ် ႁေႇၸၵီႉ ၸၢမ်ႇႁၢင်ႈၸၢမ်ႇႁေႃ ႁူၵ်းပီႊ၊ ႁေႃးသေႇ ၶုၼ်ႁေႃၶမ်း ဢီႉသရေႇလႃႉ ၸၢမ်ႇႁၢင်ႈၸၢမ်ႇႁေႃ ၵဝ်ႈပီႊၼၼ်ႉ ၶဝ်လႆႈဝဵင်း သမႃႇရီႉ လႄႈ သိမ်းဢဝ်ဢေႃႈ။-

11ၶုၼ်ႁေႃၶမ်း ဢႃႇသူႉရီႉ ၼၼ်ႉ သိမ်းဢဝ်ၵူၼ်းမဵဝ်း ဢီႉသရေႇလႃႉ တင်းလၢႆၵႂႃႇၵႃႈတီႈမိူင်း ဢႃႇသူႉရီႉ လႄႈ ဢဝ်ဝႆႉၵႃႈတီႈဝဵင်း ႁႃႇလႃႉ ၊ ဝဵင်း ႁႃႇပေႃႇ ၵႃႈႁိမ်းၼမ်ႉႁွင်ႈ ၵေႃးၸၼ်ႇ ဢိၵ်ႇတင်းၵႃႈတီႈဝၢၼ်ႈဝဵင်းဢိူင်ႇ မေႇတီႉ ၸိူဝ်းၼၼ်ႉဢေႃႈ။-

12လွင်ႈမၼ်းၸမ်ႉ ၶဝ်ဢမ်ႇထွမ်ႇဢဝ်ၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈၶဝ်လႄႈ ဢွၼ်ၵၼ်ပူၼ်ႉလိူဝ်ပတီႉၺိၺ်ႇဢၼ်ဝႃႈၵႃႈဢၼ် မူဝ်းသေႇ ၶႃႈထႃႇဝရႃႉၽြႃးသင်ႇလၢတ်ႈဝႆႉၼၼ်ႉဢေႃႈ။ ၶဝ်ဢမ်ႇထွမ်ႇဢမ်ႇဢဝ်ဢမ်ႇပႂ်ႉဢမ်ႇၸွမ်း။

13ၼႂ်းပီႊဢၼ်ၶုၼ်လူင် ႁေႇၸၵီႉ ၸၢမ်ႇႁၢင်ႈၸၢမ်ႇႁေႃသိပ်းသီႇပီႊၼၼ်ႉ သၼႃႇၶရိပ်ႉ ၶုၼ်ႁေႃၶမ်း ဢႃႇသူႉရီႉ ၶီႇသိုၵ်းၶိုၼ်ႈၸူးတီႈဝဵင်းဢၼ်မၼ်ႈၶိူင်ႇၵႃႈမီးၵႃႈၼႂ်းမိူင်း ယူႉတႃႉ လႄႈ တိုၵ်းဢဝ်လႆႈဢေႃႈ။-

14ႁေႇၸၵီႉ ၶုၼ်ႁေႃၶမ်း ယူႉတႃႉ ပွႆႇၸႂ်ႉၸူးတီႈၶုၼ်ႁေႃၶမ်း ဢႃႇသူႉရီႉ ၵႃႈတီႈဝဵင်း လႃႇၶီႉသႃႉ လႄႈ လဝ်ႊလၢတ်ႈလႄႈဝႃႈ၊ ၶႃႈၸဝ်ႈၽိတ်းပိူင်ႈတီႈၶႃႈယဝ်ႉ။ ၶႅၼ်းတေႃႈၶိုၼ်းမိူဝ်းၵႂႃႇသေၵႃႈတီႈၶႃႈၸဝ်ႈၼႆႉသေၵမ်းတီႈၶႃႈ။ ၶႃႈၸဝ်ႈတၵ်းၵိုတ်ႉႁၢပ်ႇၵႃႈဢၼ်ၸဝ်ႈႁဝ်း တၢင်ႇပၼ်ၵႃႈၼိူဝ်ၶႃႈၸဝ်ႈၼၼ်ႉတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်း ဢႃႇသူႉရီႉ ၼၼ်ႉယွၼ်းဢဝ်ငိုၼ်း သၢမ်ပၢၵ်ႇ တလၢၼ်ႇတၢၼ်ႇ ဢိၵ်ႇတင်းၶမ်းသိပ်း တလၢၼ်ႇတၢၼ်ႇ တီႈ ႁေႇၸၵီႉ ၶုၼ်ႁေႃၶမ်း ယူႉတႃႉ ဢေႃႈ။

15ႁေႇၸၵီႉ ဢဝ်ငိုၼ်းၵႃႈဢၼ်ထူပ်းႁၼ်ၵႃႈၼႂ်းႁိူၼ်းထႃႇဝရႃႉၽြႃး ဢိၵ်ႇတင်းၵႃႈၼႂ်းတိူၵ်ႈၽၼ်ႇတႃႇၸဝ်ႈပၼ်ဢေႃႈ။-

16မိူဝ်ႈၼၼ်ႉ ႁေႇၸၵီႉ ထွတ်ႇဢဝ်ၶမ်း ၵႃႈတီႈၽၵ်းတူပိၵ်ႈမၢၼ်ႇထႃႇဝရႃႉၽြႃး ဢိၵ်ႇတင်းၵႃႈတီႈသဝ်ၽၵ်းတူ ဢၼ် ႁေႇၸၵီႉ ၶုၼ်ႁေႃၶမ်း ယူႉတႃႉ ဢဝ်ဢုမ်ႇႁေႃႇၸိူဝ်းၼၼ်ႉလႄႈပၼ်တီႈၶုၼ်ႁေႃၶမ်း ဢႃႇသူႉရီႉ ဢေႃႈ။-

17လိုၼ်းၼၼ်ႉၶုၼ်ႁေႃၶမ်း ဢႃႇသူႉရီႉ ၼၼ်ႉ ပွႆႇၸႂ်ႉ တႃႇတၼ်ႇ၊ ရႃႇပသႃႇရိတ်ႉ၊ ရႃႇပသႃႇၶႃႉ ဢိၵ်ႇလူၺ်ႈၵၼ်တင်းပူဝ်ႇပႃႇၵူၼ်းသိုၵ်း ဢၼ်ၼမ်ၼႃႇလူင်လၢင်သေၵႃႈတီႈဝဵင်း လႃႇၶီႉသႃႉ မႃးၸူးတီႈၶုၼ်လူင် ႁေႇၸၵီႉ ၵႃႈတီႈဝဵင်း ယေႇရူႉသလႅမ်ႇ လႄႈ၊ ၶဝ်ၼၼ်ႉဢွၼ်ၵၼ်ၶိုၼ်ႈၸူးလႄႈ ႁွတ်ႈထိုင်ၵႃႈတီႈဝဵင်း ယေႇရူႉသလႅမ်ႇ ဢေႃႈ။ ႁွတ်ႈထိုင်သေယဝ်ႉ၊ မႃးၸုၵ်းယူႇၵႃႈတီႈပၢၵ်ႇတေႃႈၼမ်ႉၼွင်လုၵ်ႈၵႃႈၼိူဝ်ဢၼ်မီးၵႃႈတီႈသဵၼ်ႈတၢင်းၵႂၢၵ်ႈလိၼ်ၵူၼ်းသၵ်ႉၶူဝ်းၼၼ်ႉဢေႃႈ။-

18မိူဝ်ႈဢၼ်ၶဝ်ၼၼ်ႉႁွင်ႉၸူးတီႈၶုၼ်ႁေႃၶမ်းၼၼ်ႉၸိုင်၊ ဢေးလျႃႇၵိမ်ႇ လုၵ်ႈၸၢႆး ႁီႉလၵီႉ ၵေႃႉၼၼ်ႉဢုပ်ႉၵႃႈၼိူဝ်ႁေႃၶမ်း ဢိၵ်ႇတင်းၸရေးလူင် သေႇပၼႃႉ ၊ ဢတႂၢင်းဝုၼ်ႇ ယေႃႇဢႃႇ လုၵ်ႈၸၢႆး ဢႃႇသပ်ႉ ၸိူဝ်းၼၼ်ႉ ဢွၵ်ႇၵႂႃႇၸူးၵႃႈတီႈၶဝ်ၼၼ်ႉသေယဝ်ႉ၊-

19ရႃႇပသႃႇၶႃႉ လၢတ်ႈတီႈၶဝ်လႄႈဝႃႈ၊ သူၶိုၼ်းလဝ်ႊလၢတ်ႈတီႈ ႁေႇၸၵီႉ လႄႈဝႃႈ၊ ၸဝ်ႈမႁႃႇၶုၼ်လူင်ၶုၼ်ႁေႃၶမ်း ဢႃႇသူႉရီႉ ၼၼ်ႉ မီးဢမိင်ႉၸဝ်ႈလႄႈဝႃႈၸမ်ႉ၊ တီႈဢိင်ပိုင်ႈဢၼ်မႂ်းဢိင်ပိုင်ႈယူႇၼၼ်ႉၸမ်ႉ၊ ပဵၼ်ၸိူဝ်ႉၼင်ႇႁိုဝ်။-

20မႂ်းလၢတ်ႈလႄႈဝႃႈ၊ ၵဝ်ၼႆႉပျေႉၸုမ်ႇဝႆႉတင်းၺၢၼ်ႇ တၢင်းၵတ်ႉတၢင်းၶၼ်၊ တၼ်းၶူဝ်းတၢင်းၵတ်ႉတၢင်းၶၼ်ႁႂ်ႈလႆႈတိုၵ်းသိုၵ်းဢေႃႈ၊ ဝႃႈၼင်ႇၼႆသေၵေႃႈ၊ ၵႂၢမ်းၼၼ်ႉပဵၼ်ဢၼ်လၢႆလၢႆ ဢမ်ႇပွင်ႇလွင်ႈၵႃႈသင်လူင်ပႄႇ။ မိူဝ်ႈလဵဝ်ၼႆႉ မႂ်းဢိင်ပိုင်ႈၽူႈလႂ်သေလႄႈပုင်ႇၵၢၼ်ႇၵဝ်။-

21တူၺ်းလူး၊ မႂ်းဢိင်ပိုင်ႈၶွၼ်ႉတဝ်ႉလႅမ်ႈမႆႉဢေႃႈဢၼ်ႁၵ်းဢၼ်ဝႃႈ မိူင်း ဢေႇၵိပ်ႉတူႉ ၼၼ်ႉလူင်ပႄႇ။ မႆႉဢေႃႈၼၼ်ႉတၵ်းတမ်တႅင်းမိုဝ်းၵေႃႉဢၼ် ဢိင်ပိုင်ႈၼၼ်ႉသေလႄႈပွင်ႇပဵဝ်ၵႂႃႇဢေႃႈ။ ၶုၼ်လူင် ဢေႇၵိပ်ႉတူႉ ၶုၼ်ႁေႃၶမ်း ၽႃႇရေႃး ၼၼ်ႉ တၵ်းႁဵတ်းတီႈၶဝ် ၵႃႈဢၼ်ဢိင်ပိုင်ႈမၼ်းၼၼ်ႉၸိူဝ်ႉၼင်ႇၼၼ်ဢေႃႈ။-

22ပေႃးသူၶိုၼ်းလၢတ်ႈတီႈၵဝ်လႄႈဝႃႈ၊ ႁဝ်းဢိင်ပိုင်ႈထႃႇဝရႃႉၽြႃး ၽြႃးပဵၼ်ၸဝ်ႈႁဝ်းဢေႃႈ၊ ဝႃႈၼင်ႇၼႆၸိုင်၊ မၼ်းၸဝ်ႈၼၼ်ႉပဵၼ်ၽြႃး ဢၼ် ႁေႇၸၵီႉ ပႄႇၽဵဝ်ႈထႃႇၼႃႉတီႈသုင်မၼ်းၸဝ်ႈ ဢိၵ်ႇတင်းယိတ်ႈပလၢင်ႇမၼ်းၸဝ်ႈတင်းလၢႆပႅတ်ႈသေလႄႈ သင်ႇလၢတ်ႈတီႈၵူၼ်းမိူင်း ယူႉတႃႉ တင်းၵူၼ်းဝဵင်း ယေႇရူႉသလႅမ်ႇ ၸိူဝ်းၼၼ်ႉလႄႈဝႃႈ၊ သူတၵ်းလႆႈၵူဝ်းၵႂၢႆႇၵႃႈတီႈၽၢႆႇၼႃႈယိတ်ႈပလၢင်ႇဢၼ်ၼႆႉ ၵႃႈၼႂ်းဝဵင်း ယေႇရူႉသလႅမ်ႇ ၼႆႉၵူၺ်းဢေႃႈ၊ ဝႃႈၼင်ႇၼႆၼၼ်ႉဢမ်ႇၸႂ်ႈႁိုဝ်။-

23ပိူဝ်ႈၼႆလႄႈ မိူဝ်ႈလဵဝ်ၼႆႉ၊ ပၼ်ၶဝ်ၸိူဝ်းဢၼ်တၵ်းႁပ်ႉတုင်းဢဝ်ၼၼ်ႉ တီႈၸဝ်ႈၵဝ်ၶုၼ်ႁေႃၶမ်း ဢႃႇသူႉရီႉ ၼၼ်ႉတႃႉ။ ပေႃးၵူၼ်းသိုၵ်းၶီႇမႃႉ မီးတီႈမႂ်းထၼ်ႈပေႃးၵုမ်ႇလုမ်ႇၸိုင်၊ ၵဝ်တၵ်းပၼ်မႃႉသွင်ႁဵင်ဢေႃႈ။-

24မႂ်းတၵ်းႁဵတ်းၸိူဝ်ႉၼင်ႇႁိုဝ်သေလႄႈ ႁႂ်ႈၼႃႈပူဝ်ႇဢၼ်လဵၵ်ႉသေပိူၼ်ႈၵႃႈၼႂ်းၶႃႈၵူၼ်းၸဝ်ႈၵဝ်ၸိူဝ်းၼၼ်ႉဝၢႆႇၶိုၼ်းလႄႈ တၵ်းသွၼ်ႈပိုင်ႈမိူင်း ဢေႇၵိပ်ႉတူႉ ပုၼ်ႈလေႃႉရထႃးလႂ် ဢိၵ်ႇတင်းၵူၼ်းသိုၵ်းၶီႇမႃႉလႂ်ၸိူဝ်းၼၼ်ႉၸိူဝ်ႉၼင်ႇႁိုဝ်။-

25ဢၶႂၢင်ႉထႃႇဝရႃႉၽြႃးယင်းဢမ်ႇမီးလႄႈ ၵဝ်မႃးႁႂ်ႈလႆႈယႃႉတီႈၼႆႈပႅတ်ႈႁိုဝ်။ ထႃႇဝရႃႉၽြႃးမီးဢမိင်ႉတီႈၵဝ်လႄႈဝႃႈ၊ ၶီႇသိုၵ်းၶိုၼ်ႈၸူးၵႃႈတီႈမိူင်းၼၼ်ႉသေလႄႈ ယႃႉပႅတ်ႈတႃႉ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

26မိူဝ်ႈၼၼ်ႉ ဢေးလျႃႇၵိမ်ႇ လုၵ်ႈၸၢႆး ႁီႉလၵီႉ၊ သေႇပၼႃႉ၊ ယေႃႇဢႃႇ ၸိူဝ်းၼၼ်ႉ လၢတ်ႈတီႈ ရႃႇပသႃႇၶႃႉ လႄႈဝႃႈ၊ ဢဝ်ၽႃႇသႃႇၵႂၢမ်း ဢႃႇရမီႉ မီးဢမိင်ႉတီႈၶႃႈၸဝ်ႈႁဝ်းၸိူဝ်းၼႆႉသေၵမ်း။ ၶႃႈၸဝ်ႈႁဝ်းၸိူဝ်းၼႆႉ ႁူႉၵႂၢမ်းၼၼ်ႉယူႇၶႃႈဢေႃႈ။ ယႃႇပေဢဝ် ၽႃႇသႃႇၵႂၢမ်း ယူႉတႃႉ မီးဢမိင်ႉတီႈၶႃႈၸဝ်ႈႁဝ်းၸိူဝ်းၼႆႉ ႁႂ်ႈႁွတ်ႈထိုင်ႁူၶဝ်ၸိူဝ်းဢၼ် မီးယူႇၵႃႈၼိူဝ်လမ်းဝဵင်းၼၼ်ႉသေၵမ်း၊ ဝႃႈၼင်ႇၼႆသေယဝ်ႉ၊-

27ရႃႇပသႃႇၶႃႉ လၢတ်ႈတီႈၶဝ်လႄႈဝႃႈ၊ ၸဝ်ႈၵဝ်ၼၼ်ႉပွႆႇၸႂ်ႉၵဝ်မႃးႁႂ်ႈၵဝ်လႆႈဢဝ်ၵႂၢမ်းၼႆႉလၢတ်ႈတေႃႇၵၼ်တင်းၸဝ်ႈမႂ်းတင်းမႂ်းၵူၺ်းႁိုဝ်။ မၼ်းၸဝ်ႈပွႆႇၸႂ်ႉၵဝ်မႃး ၵႃႈတီႈၶဝ်ၸိူဝ်းဢၼ်ၼင်ႈယူႇၵႃႈၼိူဝ်လမ်းဝဵင်း ႁႂ်ႈၶဝ်လႆႈၵိၼ်ၽၢႆႈလူင်ၶဝ်လႄႈသူတ်ႉၽၢႆႈၼွႆႉၶဝ်ယူႇ လူၺ်ႈၵၼ်တင်းသူၸိူဝ်းၼၼ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆသေယဝ်ႉ၊-

28ရႃႇပသႃႇၶႃႉ ၼၼ်ႉ ၸုၵ်းယူႇသေလႄႈ ဢဝ်ၽႃႇသႃႇၵႂၢမ်း ယူႉတႃႉ ႁဵတ်းတင်းသဵင်ဢၼ်ယႂ်ႇၼႃႇႁွင်ႉပၢဝ်ႇလႄႈဝႃႈ၊ ဢွၼ်ၵၼ်ထွမ်ႇငိၼ်းဢမိင်ႉၸဝ်ႈမႁႃႇၶုၼ်လူင် ၶုၼ်ႁေႃၶမ်း ဢႃႇသူႉရီႉ တႃႉ။-

29ၶုၼ်ႁေႃၶမ်းမီးဢမိင်ႉလႄႈဝႃႈၸမ်ႉ၊ ယႃႇပေႁႂ်ႈ ႁေႇၸၵီႉ လႆႈပႅတ်ႉလႅၼ်သူ၊ မၼ်းဢမ်ႇတၢတ်ႈၼိူင်ႇလႆႈႁႂ်ႈလႆႈၵႄႇသႄႇၼုၵ်ႈဢဝ်သူ ဢွၵ်ႇသေၵႃႈၼႂ်းမိုဝ်းၸဝ်ႈၼၼ်ႉၵူၺ်ႉ။-

30ယႃႇပေႁႂ်ႈ ႁေႇၸၵီႉ ႁႂ်ႈသူဢိင်ပိုင်ႈထႃႇဝရႃႉၽြႃးသေလႄႈလၢတ်ႈလႄႈဝႃႈ၊ ထႃႇဝရႃႉၽြႃးတၵ်းၵႄႇသႄႇၼုၵ်ႈဢဝ်ႁဝ်းဢွၵ်ႇဢမၢၼ်ႇၶၼ်ပဵၼ်လႄႈ၊ ဝဵင်းၼႆႉတၵ်းဢမ်ႇလႆႈႁွတ်ႈထိုင်ၵႃႈၼႂ်းမိုဝ်း ၶုၼ်ႁေႃၶမ်း ဢႃႇသူႉရီႉ ၵူၺ်ႉ၊ ဝႃႈၼင်ႇၼႆသေၵမ်း။-

31ယႃႇပေထွမ်ႇဢဝ်ၵႂၢမ်း ႁေႇၸၵီႉ သေၵမ်း။ ၶုၼ်ႁေႃၶမ်း ဢႃႇသူႉရီႉ မီးဢမိင်ႉလႄႈဝႃႈၸမ်ႉ၊ ႁဵတ်းမိၵ်ႉသႃႇႁႃယႃႉတၢင်းဢၼ်ထုၵ်ႇၵၼ်တင်းၵဝ်သေလႄႈ ဢွၼ်ၵၼ်ဢွၵ်ႇမႃးၸူးတီႈၵဝ်လႄႈ ၵူႈၵေႃႉၵူႈၵူၼ်းၵိၼ်မၢၵ်ႇၵႃႈတီႈတူၼ်ႈမၢၵ်ႇၸပိတ်ႈမၼ်းယူႇ၊ မၢၵ်ႇလိူဝ်ႇသၢင်းၽေႃးၵႃႈတီႈတူၼ်ႈမၢၵ်ႇလိူဝ်ႇသၢင်းၽေႃးမၼ်းယူႇသေလႄႈ သူတ်ႉၵိၼ်ၼမ်ႉၵႃႈတီႈၼမ်ႉၼွင်မၼ်းႁင်းၽႂ်ႁင်းမၼ်းယူႇ၊-

32တေႃႇထိုင်ႁွတ်ႈၵဝ်မႃးလႄႈ ဢဝ်သူၵႂႃႇသူင်ႇၵႃႈတီႈမိူင်းဢၼ်မိူၼ်ၸိူဝ်ႉၼင်ႇ မိူင်းသူဢၼ်ဝႃႈ မိူင်းဢၼ်ပျေႉၸုမ်ႇဝႆႉတင်းၶဝ်ႈပိူၵ်ႇၶဝ်ႈသၢၼ် တင်းၼမ်ႉၸပိတ်ႈ၊ မိူင်းဢၼ်ပျေႉၸုမ်ႇဝႆႉတင်းၶဝ်ႈမုၼ်း တင်းသူၼ်ဢူးယဵၼ်ႇၸပိတ်ႈ၊ မိူင်းဢၼ်ပျေႉၸုမ်ႇဝႆႉတင်း ၼမ်ႉမၼ်း သၢၼ်ႇလုၼ်ႇ တင်းၼမ်ႉၽိုင်ႈၼၼ်ႉ ႁႂ်ႈသူဢမ်ႇလႆႈတၢႆလႄႈ ဢသၢၵ်ႈတၵ်းလိပ်းယူႇၼၼ်ႉတႃႉ။ ယႃႇပေထွမ်ႇဢဝ်ၵႂၢမ်း ႁေႇၸၵီႉ မိူဝ်ႈဢၼ်မၼ်းတိုၵ်းယူင်းၸူဝ်းဢဝ်သူလႄႈဝႃႈ၊ ထႃႇဝရႃႉၽြႃးတၵ်းၵႄႇသႄႇၼုၵ်ႈဢဝ်ႁဝ်းဢွၵ်ႇဢေႃႈ၊ ဝႃႈၼင်ႇၼႆၼၼ်ႉသေၵမ်း။-

33ၽြႃးၵူႈသိုင်ႇၵူႈမိူင်းသေၸဝ်ႈသေပႃး ယၢမ်ႈၵႄႇသႄႇၼုၵ်ႈဢဝ်မိူင်းတူဝ်ၸဝ်ႈၵဝ်ႇဢွၵ်ႇသေၵႃႈၼႂ်းမိုဝ်းၶုၼ်ႁေႃၶမ်း ဢႃႇသူႉရီႉ ယဝ်ႉႁိုဝ်။-

34ၽြႃးမိူင်း ႁႃႇမတ်ႉ ဢိၵ်ႇတင်းမိူင်း ဢႃႇပတ်ႉ ၸိူဝ်းၼၼ်ႉမီးၵႃႈလႂ်။ ၽြႃးမိူင်း သေႇၽရႃႉဝိမ်း ၊ မိူင်း ႁေႇၼႃႉ ၊မိူင်း ဢီႉဝႃႇ ၸိူဝ်းၼၼ်ႉမီးၵႃႈလႂ်။ ၶဝ်ၼၼ်ႉၵႄႇသႄႇၼုၵ်ႈဢဝ်မိူင်း သမႃႇရီႉ လွတ်ႈသေၵႃႈၼႂ်းမိုဝ်းၵဝ်ယဝ်ႉႁိုဝ်။-

35ၼႂ်းၽြႃးၵူႈသိုင်ႇၵူႈမိူင်းၼၼ်ႉ ၽြႃးသူႇလႂ်ပႃးလႂ်ယၢမ်ႈတွၼ်ႉၵႄႇသႄႇၼုၵ်ႈဢဝ်မိူင်းတူဝ်ၸဝ်ႈၵဝ်ႇလွတ်ႈသေၵႃႈၼႂ်းမိုဝ်းၵဝ်လႄႈ၊ ထႃႇဝရႃႉၽြႃးတၵ်းၵႄႇသႄႇၼုၵ်ႈဢဝ်ဝဵင်း ယေႇရူႉသလႅမ်ႇ လွတ်ႈသေၵႃႈၼႂ်းမိုဝ်းၵဝ်၊ ဝႃႈၼင်ႇၼႆဢေႃႈ။-

36ၵူၺ်းၵႃႈ ၵူၼ်းတင်းလၢႆၸိူဝ်းၼၼ်ႉ ဢမ်ႇတၵ်းသဵင်လႄႈ ဢမ်ႇၶိုၼ်းလၢတ်ႈၵႂၢမ်းသေၶေႃးသေၵမ်း။ လွင်ႈမၼ်းၸမ်ႉ ၶုၼ်ႁေႃၶမ်းမီးဢမိင်ႉလႄႈဝႃႈ၊ ယႃႇပေၶိုၼ်းလၢတ်ႈ၊ ဝႃႈၼင်ႇၼႆဢေႃႈ။-

37မိူဝ်ႈၼၼ်ႉ ဢေးလျႃႇၵိမ်ႇ လုၵ်ႈၸၢႆး ႁီႉလၶီႉ ၵေႃႉဢၼ်ဢုပ်ႉၵႃႈၼိူဝ်ႁေႃၶမ်း ဢိၵ်ႇတင်းၸရေးလူင် သေႇပၼႃႉ ၊ ဢတႂၢင်းဝုၼ်ႇ ယေႃႇဢႃႇ လုၵ်ႈၸၢႆး ဢႃႇသပ်ႉ ၸိူဝ်းၼၼ်ႉ၊ ၸၵ်ႉသိၵ်ႇၶူဝ်းၼုင်ႈတူဝ်ၸဝ်ႈၵဝ်ႇသေလႄႈ၊ ၶိုၼ်းမႃးၵႃႈတီႈ ႁေႇၸၵီႉ လႄႈ ဢဝ်ၵႂၢမ်း ရႃႇပသႃႇၶႃႉ ၼၼ်ႉ လဝ်ႊလၢတ်ႈဢေႃႈ။

← Chapter 17 Jump to: Chapter 19 →