2 Kings 14

Shan

← Chapter 13 Jump to: Chapter 15 →

1ၼႂ်းပီႊဢၼ် ယႁေႃးသႃႉ လုၵ်ႈၸၢႆး ယေႃးၶတ်ႉ ၶုၼ်ႁေႃၶမ်း ဢီႉသရေႇလႃႉ ၸၢမ်ႇႁၢင်ႈၸၢမ်ႇႁေႃသွင်ပီႊၼၼ်ႉ၊ ဢႃႇမၸီႉ လုၵ်ႈၸၢႆးၸဝ်ႈ ယေႃးသႃႉ ၶုၼ်ႁေႃၶမ်း ယူႉတႃႉ ၸႃႉၼင်ႈႁၢင်ႈၼင်ႈႁေႃဢေႃႈ။-

2မၼ်းၼၼ်ႉမိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈသၢဝ်းပၢႆႁႃႈပီႊလႄႈ မၼ်းဢုပ်ႉပိူင်ႇၸၢမ်ႇၸႃးယူႇ ၵႃႈၼႂ်းဝဵင်း ယေႇရူႉသလႅမ်ႇ သၢဝ်းပၢႆၵဝ်ႈပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ယုတ်ႉတၼ်ႇ ၵူၼ်းယိင်းဝဵင်း ယေႇရူႉသလႅမ်ႇ ဢေႃႈ။-

3မၼ်းႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃး သေၵေႃႈ ဢမ်ႇပဵၼ်ၸိူဝ်ႉၼင်ႇၸဝ်ႈပေႃႈမၼ်း တႃႇဝိတ်ႈ ၼၼ်ႉ၊ ႁဵတ်းၸွမ်းၵႃႈၼင်ႇဢၼ် ယေႃးသႃႉ ၸဝ်ႈပေႃႈမၼ်းႁဵတ်းၼၼ်ႉဢေႃႈ။-

4ၵူၺ်းၵႃႈ မၼ်းဢမ်ႇပႄႇပႅတ်ႈထႃႇၼႃႉတီႈသုင်တင်းလၢႆလႄႈ၊ ၵူၼ်းတင်းလၢႆယင်းဢွၼ်ၵၼ်ပုၵ်ႈၸေႃႇယိတ်ႈလႄႈ ဢဝ်ၽႆးတုတ်ႇၼၢမ်ႇသႃႇၵႃႈတီႈၸိူဝ်းၼၼ်ႉယူႇဢေႃႈ။

5မိူဝ်ႈဢၼ်သိုင်ႇၸိုင်ႈဝၢၼ်ႈမိူင်းတႄႇယူႇၵႃႈၼႂ်းမိုဝ်းမၼ်းယဝ်ႉၼၼ်ႉၸိုင် မၼ်းဢဝ်ၶႃႈမၼ်းၵူၼ်းမၼ်းဢၼ်ဢဝ်ၸဝ်ႈပေႃႈမၼ်းၶုၼ်လူင်ၼၼ်ႉတၢႆၸိူဝ်းၼၼ်ႉတၢႆဢေႃႈ။-

6ၵူၺ်းၵႃႈမၼ်းဢမ်ႇဢဝ်လုၵ်ႈၸၢႆးၶဝ်ၸိူဝ်းဢၼ် ဢဝ်ၸဝ်ႈပေႃႈမၼ်းတၢႆၸိူဝ်းၼၼ်ႉတၢႆလႄႈ ၸွမ်းၵႃႈၼင်ႇဢၼ်တႅမ်ႈဝႆႉမီးယူႇ ၵႃႈၼႂ်းၵျၢမ်းလိၵ်ႈပိင်းၺၢပ်ႈတီႉ မူဝ်းသေႇ ဢၼ်ထႃႇဝရႃႉၽြႃးမီးဢမိင်ႉလႄႈဝႃႈ၊ ပေႃႈဢမ်ႇလႆႈၶၢမ်ႇတၢႆတၢင်တူဝ်လုၵ်ႈလၢင်း၊ လုၵ်ႈလၢင်းဢမ်ႇလႆႈၶၢမ်ႇတၢႆတၢင်တူဝ်ပေႃႈ၊ ၵူႈၵေႃႉၵူႈၵူၼ်းတၵ်းလႆႈၶၢမ်ႇတၢႆၵွပ်ႈပိူဝ်ႈဢပႅတ်ႈတူဝ်ၸဝ်ႈၵဝ်ႇၵူၺ်းဢေႃႈ၊ ဝႃႈၼင်ႇၼႆၼၼ်ႉဢေႃႈ။-

7မၼ်းဢဝ်ၵူၼ်းမဵဝ်း ဢေႇတုမ်ႇ တၢႆမိုၼ်ႇၼိုင်ႈ ၵႃႈၼႂ်းပၢင်ႇႁူၺ်ႈၵိူဝ်ၼၼ်ႉလႄႈ တိုၵ်းတေႃးသိမ်းဢဝ်ဝဵင်း သေးလႃႉ သေယဝ်ႉ၊ ႁွင်ႉႁဵၵ်ႈၸိုဝ်ႈဝဵင်းၼၼ်ႉ ယွၵ်ႉထေႇလႃႉ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

8လိုၼ်းၼၼ်ႉ ဢႃႇမၸီႉ ပွႆႇၸႂ်ႉသၢၼ်ႇတမၢၼ်ႇ ၵႂႃႇၵႃႈတီႈ ယႁေႃးသႃႉ လုၵ်ႈၸၢႆး ယေႃးၶတ်ႉ လုၵ်ႈၸၢႆး ယေႇႁူႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉလႄႈ သင်ႇလၢတ်ႈၵႂႃႇလႄႈဝႃႈ၊ မႃးလႄႈတေႃႇၼႃႈႁူပ်ႉထူပ်းၵၼ်တႃႉႁဝ်း၊ ဝႃႈၼင်ႇၼႆသေယဝ်ႉ၊-

9ယႁေႃးသႃႉ ၶုၼ်ႁေႃၶမ်း ဢီႉသရေႇလႃႉ ၶိုၼ်းသင်ႇလၢတ်ႈမႃးတီႈ ဢႃႇမၸီႉ ၶုၼ်ႁေႃၶမ်း ယူႉတႃႉ လႄႈဝႃႈ၊ တူၼ်ႈၼၢမ် လေႇပၼုၼ်ႇ ပွႆႇၸႂ်ႉၵႂႃႇၵႃႈတီႈတူၼ်ႈ ဢႃႇရိတ်ႉလေႇပၼုၼ်ႇ လႄႈဝႃႈ၊ ဢဝ်လုၵ်ႈယိင်းမႂ်းပၼ်ၵၼ်တင်းလုၵ်ႈၸၢႆးၵဝ်တႃႉ၊ ဝႃႈၼင်ႇၼႆလႄႈ၊ တူဝ်ထိူၼ်ႇႁၢႆႉ လေႇပၼုၼ်ႇ တူဝ်ၼိုင်ႈတႆႇတၢင်းပႆတၢင်းၵႂႃႇလႄႈ ယဵပ်ႇမႅၼ်ႈတူၼ်ႈၼၢမ်ၼၼ်ႉဢေႃႈ။-

10မႂ်းလႆႈတိုၵ်းတေႃးယႃႉပႅတ်ႈၵူၼ်း ဢေႇတုမ်ႇ ၸိူဝ်းၼၼ်ႉလႄႈ ၸႂ်မႂ်းမီးတၢင်းဢၼ်သုင်ၼႃႇဢေႃႈ။ ဢုပ်ႇဢၢတ်ႇယူႇႁင်းတူဝ်ၸဝ်ႈၵဝ်ႇၵူၺ်းလႄႈ ယူႇၵႃႈတီႈႁိူၼ်းတီႈယူႇမႂ်းတႃႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းႁႃဢမူႉႁႂ်ႈၽေးႁွတ်ႈထိုင်ၵႃႈတီႈမႂ်းလႄႈ မႂ်းဢၼ်ဝႃႈတူဝ်မႂ်းလႆႈလူမ်ႉတူၵ်းပႃးလူၺ်ႈၵၼ်တင်းမိူင်း ယူႉတႃႉ ၼၼ်ႉၼင်ႇႁိုဝ်။ ဝႃႈၼင်ႇၼႆဢေႃႈ။-

11ၵူၺ်းၵႃႈ ဢႃႇမၸီႉ ဢမ်ႇထွမ်ႇဢမ်ႇဢဝ်ၵႂၢမ်းၼၼ်ႉလႄႈ၊ ယႁေႃးသႃႉ ၶုၼ်ႁေႃၶမ်း ဢီႉသရေႇလႃႉ ၶီႇသိုၵ်းၶိုၼ်ႈၸူးလႄႈ မၼ်းဢိၵ်ႇတင်း ဢႃႇမၸီႉ ၼၼ်ႉ တေႃႇၼႃႈႁူပ်ႉထူပ်းၵၼ်ၵႃႈတီႈပၢင်ႇပဵင်း ပႅတ်ႉသေးမိတ်ႉ မိူင်း ယူႉတႃႉ သေယဝ်ႉ၊-

12မဵဝ်း ယူႉတႃႉ တူၵ်းသုမ်း ၵႃႈတီႈၽၢႆႇၼႃႈမဵဝ်း ဢီႉသရေႇလႃႉ လႄႈ ဢွၼ်ၵၼ်ဢွၵ်ႇပၢႆႈၸူးၵႃႈတီႈမူဝ်းၵႃႇတီႈယူႇတီႈသဝ်းၶဝ်ႁင်းၽႂ်ႁင်းမၼ်းဢေႃႈ။-

13ယႁေႃးသႃႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉ တီႉလႆႈ ဢႃႇမၸီႉ ၶုၼ်ႁေႃၶမ်း ယူႉတႃႉ ဢၼ်ပဵၼ်လုၵ်ႈၸၢႆး ယေႃးသႃႉ လုၵ်ႈၸၢႆး ဢႃႇၶၸီႉ ၼၼ်ႉ ၵႃႈတီႈဝဵင်း ပႅတ်ႉသေးမိတ်ႉ လႄႈ ဢဝ်ၵႂႃႇၸူးၵႃႈတီႈဝဵင်း ယေႇရူႉသလႅမ်ႇ သေယဝ်ႉ၊ ၶိုၼ်းယႃႉလမ်းဝဵင်း ယေႇရူႉသလႅမ်ႇ ပႅတ်ႈသီႇပၢၵ်ႇသွၵ်ႇ ဢဝ်ၵႃႈတီႈၽၵ်းတူ ဢေႇၽရိမ်ႇ တေႃႇထိုင်ႁွတ်ႈၽၵ်းတူၸဵင်ႇဝဵင်းဢေႃႈ။-

14မၼ်းသိမ်းဢဝ်ၸႃႉၸဵမ်ငိုၼ်းၶမ်းလႄႈ ၶိူင်ႈပိူင်ၵႃႈဢၼ်ထူပ်းႁၼ်ၵႃႈၼႂ်းႁိူၼ်းထႃႇဝရႃႉၽြႃး ဢိၵ်ႇတင်းၽၼ်ႇတႃႇႁေႃၸဝ်ႈတင်းၶဝ်ၸိူဝ်းဢၼ် ႁပ်ႉတုင်းဢဝ်ၵမ်ႈၽွင်ႈၼၼ်ႉသေလႄႈ ၶိုၼ်းမိူဝ်းၵႂႃႇၵႃႈတီႈဝဵင်း သမႃႇရီႉ ဢေႃႈ။-

15လွင်ႈတၢင်းဢၼ် ယႁေႃးသႃႉ ႁဵတ်းဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းဢၼ်တၼ်းၶူဝ်းမၼ်းယႂ်ႇ၊ လွင်ႈတၢင်းဢၼ်မၼ်းတိုၵ်းသိုၵ်းၵၼ်တင်း ဢႃႇမၸီႉ ၶုၼ်ႁေႃၶမ်း ယူႉတႃႉ ၼၼ်ႉ ၸိူဝ်းၼၼ်ႉၸိုင်၊ တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။-

16ယႁေႃးသႃႉ ၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းဝဵင်း သမႃႇရီႉ လူၺ်ႈၵၼ်တင်း ၶုၼ်ႁေႃၶမ်း ဢီႉသရေႇလႃႉ ၸိူဝ်းၼၼ်ႉဢေႃႈ။ ယေႇရူဝ်းပုမ်ႇ လုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃ တၢင်တူဝ်ၸဝ်ႈပေႃႈမၼ်းဢေႃႈ။

17လိုၼ်းသေ ယႁေႃးသႃႉ လုၵ်ႈၸၢႆး ယေႃးၶတ်ႉ ၶုၼ်ႁေႃၶမ်း ဢီႉသရေႇလႃႉ တၢႆယဝ်ႉၼၼ်ႉ၊ ဢႃႇမၸီႉ လုၵ်ႈၸၢႆး ယေႃးသႃႉ ၶုၼ်ႁေႃၶမ်း ယူႉတႃႉ ၼၼ်ႉ ဢသၢၵ်ႈလိပ်းယူႇသိပ်းႁႃႈပီႊလူးၵွၼ်ႇဢေႃႈ။-

18လွင်ႈတၢင်း ဢႃႇမၸီႉ ဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ ဢေႃႈ။-

19ၶဝ်ဢွၼ်ၵၼ်လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈတင်းမၼ်း ၵႃႈၼႂ်းဝဵင်း ယေႇရူႉသလႅမ်ႇ လႄႈ မၼ်းဢွၵ်ႇပၢႆႈၵႂႃႇၵႃႈတီႈဝဵင်း လႃႇၶီႉသႃႉ လႄႈ၊ ၶဝ်ဢွၼ်ၵၼ်ပွႆႇၸႂ်ႉၸွမ်းၵႂႃႇၵႃႈတီႈဝဵင်း လႃႇၶီႉသႃႉ ၼၼ်ႉသေလႄႈ ဢဝ်မၼ်းတၢႆၵႃႈတီႈၼၼ်ႈသေယဝ်ႉ၊-

20ဢဝ်မၼ်းတၢင်ႇၵႃႈၼိူဝ်မႃႉသေလႄႈ မႃးၵႃႈတီႈဝဵင်း ယေႇရူႉသလႅမ်ႇ လႄႈ မၼ်းလႆႈၶၢမ်ႇတၢင်းဢၼ်သၢင်းၵျူဝ်ႇ လူၺ်ႈၵၼ်တင်းပူႇမွၼ်ႇမၼ်းတင်းလၢႆ ၵႃႈၼႂ်းဝဵင်း တႃႇဝိတ်ႈ ဢေႃႈ။-

21ၵူၼ်းဝၢၼ်ႈၵူၼ်းမိူင်း ယူႉတႃႉ တင်းသဵင်ႈတင်းလူင်ဢွၼ်ၵၼ်ဢဝ် ဢႃႇၸရီႉ ဢၼ်ဢသၢၵ်ႈလႆႈသိပ်းပၢႆႁူၵ်းပီႊၼၼ်ႉ ႁဵတ်းၶုၼ်ႁေႃၶမ်းတၢင်တူဝ် ဢႃႇမၸီႉ ၸဝ်ႈပေႃႈမၼ်းၼၼ်ႉဢေႃႈ။-

22မၼ်းၼၼ်ႉတႄႇႁဵတ်းဝဵင်း ဢေးလုတ်ႉ လႄႈ သမ်ႉဢဝ်သႂၢင်းၶဝ်ႈၵႃႈၼႂ်းမိူင်း ယူႉတႃႉ လိုၼ်းသေၸဝ်ႈပေႃႈမၼ်း ၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆယဝ်ႉၼၼ်ႉဢေႃႈ။

23ၼႂ်းပီႊဢၼ် ဢႃႇမၸီႉ လုၵ်ႈၸၢႆးၸဝ်ႈ ယေႃးသႃႉ ၶုၼ်ႁေႃၶမ်း ယူႉတႃႉ ၼၼ်ႉ ၸၢမ်ႇႁၢင်ႈၸၢမ်ႇႁေႃသိပ်းပၢႆႁႃႈပီႊၼၼ်ႉ၊ ယေႇရူဝ်းပုမ်ႇ လုၵ်ႈၸၢႆးၸဝ်ႈ ယႁေႃးသႃႉ ၶုၼ်ႁေႃၶမ်း ဢီႉသရေႇလႃႉ ၼၼ်ႉ ၸႃႉၼင်ႈႁၢင်ႈၼင်ႈႁေႃ ၵႃႈၼႂ်းဝဵင်း သမႃႇရီႉ လႄႈ ဢုပ်ႉပိူင်ႇၸၢမ်ႇၸႃးသီႇသိပ်းပၢႆပီႊၼိုင်ႈဢေႃႈ။-

24မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးလႄႈ ယင်းဢမ်ႇၸုၼ်ႉပႅတ်ႈဢပႅတ်ႈ ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ၊ ဢၼ်မၼ်းႁႂ်ႈမဵဝ်း ဢီႉသရေႇလႃႉ ၽိတ်းပိူင်ႈၼၼ်ႉလႄႈယူႇဢေႃႈ။-

25မၼ်းၶိုၼ်းလႆႈၶွပ်ႇၼမ်ႉလႅၼ်လိၼ်မိူင်း ဢီႉသရေႇလႃႉ ဢဝ်ၵႃႈတီႈၸႃႉၸဵမ် သူပ်းတၢင်းဢၼ်ၶဝ်ႈၸူးၵႃႈတီႈဝဵင်း ႁႃႇမတ်ႉ ၵႂႃႇတေႃႇထိုင်ႁွတ်ႈပၢင်ႇလၢႆႇ ဢႃႇရၽႃႉ ၼၼ်ႉ ၸွမ်းၵႃႈၼင်ႇၵႂၢမ်းထႃႇဝရႃႉၽြႃး ၽြႃးပဵၼ်ၸဝ်ႈမဵဝ်း ဢီႉသရေႇလႃႉ ဢၼ်မၼ်းၸဝ်ႈဢဝ်ၶႃႈမၼ်းၸဝ်ႈ ပရေႃးၽႅတ်ႈ ယူဝ်းၼႃႉ လုၵ်ႈၸၢႆး ဢမိတ်ႉတေႇ ဢၼ်ယူႇၵႃႈတီႈဝဵင်း ၵႃႉသႁေႇပႃႇ ၼၼ်ႉမီးဢမိင်ႉဝႆႉၼၼ်ႉဢေႃႈ။-

26လွင်ႈမၼ်းၸမ်ႉ ထႃႇဝရႃႉၽြႃးႁၼ်လွင်ႈဢၼ်တုၵ်ႉၶႃႉတၢင်းၽၢၼ်မဵဝ်း ဢီႉသရေႇလႃႉ ၼၵ်းၼႃႇလူင်လၢင် ဢိၵ်ႇတင်းလွင်ႈဢၼ်ဢမ်ႇမီးၵေႃႉဢၼ်လႆႈၶၢမ်ႇတၢင်းဢၼ်ၶျုၵ်ႈဝႆႉ၊ ၵေႃႉဢၼ်လွတ်ႈၵႂႃႇလႄႈ ဢမ်ႇမီးၵေႃႉဢၼ်ၸွႆႈထႅမ်မႃႉၸႃႉလႆႈၼၼ်ႉသေယဝ်ႉ၊-

27ထႃႇဝရႃႉၽြႃး မီးတၢင်းၵျၢမ်ႇတၢင်းပွင် တၵ်းဢမ်ႇမွတ်ႇၼႃႇမႃႉၸိုဝ်ႈသဵင်မဵဝ်း ဢီႉသရေႇလႃႉ ပႅတ်ႈသေၵႃႈတႂ်ႈၽႃႉၵၢင်ႁၢဝ်လႄႈ ဢဝ် ယေႇရူဝ်းပုမ်ႇ လုၵ်ႈၸၢႆးၸဝ်ႈ ယႁေႃးသႃႉ ၵႄႇသႄႇၶျွတ်ႈဢဝ်ၶဝ်ၼၼ်ႉဢေႃႈ။-

28လွင်ႈတၢင်း ယေႇရူဝ်းပုမ်ႇ ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းၵႃႈဢၼ်မၼ်းႁဵတ်း၊ လွင်ႈတၢင်းဢၼ်တၼ်းၶူဝ်းမၼ်းယႂ်ႇ၊ လွင်ႈတၢင်းဢၼ်မၼ်းတိုၵ်းသိုၵ်း၊ လွင်ႈတၢင်းဢၼ်မၼ်းၶိုၼ်းလႆႈဝဵင်း ထမ်ႇမသႅတ်ႉ တင်းဝဵင်း ႁႃႇမတ်ႉ ဢၼ်ၶဝ်ႈပႃးၼႂ်းမိူင်း ယူႉတႃႉ မိူဝ်ႈဢွၼ်တၢင်းၼၼ်ႉ ပုၼ်ႈမဵဝ်း ဢီႉသရေႇလႃႉ ၼၼ်ႉၸိူဝ်းၼၼ်ႉၸိုင်၊ တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ဢီႉသရေႇလႃႉ ဢေႃႈ။-

29ယေႇရူဝ်းပုမ်ႇ ၼၼ်ႉ ၼွၼ်းလပ်းလူၺ်ႈၵၼ်တင်းပူႇၸဝ်ႈမွၼ်ႇၸဝ်ႈ ၶုၼ်ႁေႃၶမ်း ဢီႉသရေႇလႃႉ ၸိူဝ်းၼၼ်ႉလႄႈ ၸႃႇၶရီႉ လုၵ်ႈၸၢႆးၸဝ်ႈၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

← Chapter 13 Jump to: Chapter 15 →