2 Kings 12

Shan

← Chapter 11 Jump to: Chapter 13 →

1ၼႂ်းပီႊဢၼ် ယေႇႁူႉ ၸၢမ်ႇႁၢင်ႈၸၢမ်ႇႁေႃၸဵတ်းပီႊၼၼ်ႉ၊ ယေႃးသႃႉ ၸႃႉၼင်ႈႁၢင်ႈၼင်ႈႁေႃလႄႈ ဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရူႉသလႅမ်ႇ သီႇသိပ်းပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ၸီႉပီႉ ၵူၼ်းယိင်းဝဵင်း ပေႇရသေႇၽႃႉ ဢေႃႈ။-

2ယေႃးသႃႉ ၼၼ်ႉ ႁဵတ်းဢၼ်လီဢၼ်ငၢမ်းသိုဝ်ႈၼႃႈတႂ်ႈတႃထႃႇဝရႃႉၽြႃးယူႇ ၼႂ်းၸူဝ်ႈဢၼ်ယိတ်ႈပရေႃးႁဵၵ်ႈ ယေႃးယတႃႉ သင်ႇသွၼ်မၼ်းၼၼ်ႉတဵမ်တဵမ်ဢေႃႈ။-

3ၵူၺ်းၵႃႈမၼ်းဢမ်ႇပႄႇပႅတ်ႈထႃႇၼႃႉတီႈသုင်တင်းလၢႆလႄႈ ၵူၼ်းတင်းလၢႆယင်းဢွၼ်ၵၼ်ပုၵ်ႈၸေႃႇယိတ်ႈလႄႈ ဢဝ်ၼၢမ်ႇသႃႇတုတ်ႇၽႆးၵႃႈတီႈၸိူဝ်းၼၼ်ႉယူႇဢေႃႈ။

4ယေႃးသႃႉ ၵေႃႈမီးဢမိင်ႉတီႈ ယိတ်ႈပရေႃးႁဵၵ်ႈတင်းလၢႆလႄႈဝႃႈ၊ ငိုၼ်းဢၼ်ဢဝ်ဢုၵ်ႉၸႃႇတၢင်းလူႇ ဢၼ်သႂၢင်းၶဝ်ႈၵႃႈၼႂ်းႁိူၼ်းထႃႇဝရႃႉၽြႃးၸိူဝ်းၼၼ်ႉၶၢႆလႄႈ လႆႈၵႃႈမီးၼၼ်ႉ၊ ငိုၼ်းဢၼ်ပျၢတ်ႈၵႃႈတူဝ်ၶၼ်တူဝ်လႄႈလႆႈ၊ ငိုၼ်းဢၼ်မီးတင်းၸႂ်ၸေႇတၼႃႇသေလႄႈ ဢဝ်မႃးၵႃႈတီႈႁိူၼ်းထႃႇဝရႃႉၽြႃးလႄႈ လူႇတၢၼ်းၵႃႈမီးၼၼ်ႉၸိူဝ်းၼၼ်ႉၸိုင်၊-

5ႁႂ်ႈယိတ်ႈပရေႃးႁဵၵ်ႈတင်းလၢႆၶၢမ်ႇဢဝ်တီႈၵေႃႉဢၼ်မိုတ်ႈဢၼ်ၵိုဝ်းတင်းမၼ်းၼၼ်ႉ ႁင်းၽႂ်ႁင်းမၼ်းမႃးလႄႈ မႄးၵုမ်းမႄးႁဵတ်းႁွႆးတီႈဢၼ်ၵိူၼ်ႇဢၼ်လူႉတီႈပိၵ်ႈမၢၼ်ႇၸဝ်ႈ တီႈၵႃႈဢၼ်ထူပ်းႁၼ်ႁွႆးတီႈဢၼ်ၵိူၼ်ႇဢၼ်လူႉၼၼ်ႉတႃႉ၊ ဝႃႈၼင်ႇၼႆဢေႃႈ။-

6ၼႂ်းဝႃႈၼၼ်သေၵေႃႈ ၼႂ်းပီႊဢၼ်ၶုၼ်လူင် ယေႃးသႃႉ ၸၢမ်ႇႁၢင်ႈၸၢမ်ႇႁေႃသၢဝ်းပၢႆသၢမ်ပီႊၼၼ်ႉ၊ ယိတ်ႈပရေႃးႁဵၵ်ႈၸိူဝ်းၼၼ်ႉ ဢမ်ႇပႆႇမႄးၵုမ်းမႄးႁဵတ်းႁွႆးတီႈဢၼ်ၵိူၼ်ႇဢၼ်လူႉတီႈပိၵ်ႈမၢၼ်ႇၸဝ်ႈၸိူဝ်းၼၼ်ႉ။-

7မိူဝ်ႈၼၼ်ႉၶုၼ်လူင် ယေႃးသႃႉ ႁွင်ႉဢဝ်ယိတ်ႈပရေႃးႁဵၵ်ႈ ယေႃးယတႃႉ ဢိၵ်ႇတင်းယိတ်ႈပရေႃးႁဵၵ်ႈတၢင်ႇၵေႃႉတၢင်ႇၵူၼ်းတင်းလၢႆၼၼ်ႉလႄႈ မီးဢမိင်ႉလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူယင်းဢမ်ႇမႄးၵုမ်းမႄးႁဵတ်း ႁွႆးတီႈဢၼ်ၵိူၼ်ႇဢၼ်လူႉပိၵ်ႈမၢၼ်ႇၸဝ်ႈၸိူဝ်ႉၼင်ႇၼၼ်လႄႈယူႇၼင်ႇႁိုဝ်။ ၵမ်းလိုၼ်းသူယႃႇပေဢဝ်ငိုၼ်းတီႈၶဝ်ၸိူဝ်းဢၼ်မိုတ်ႈဢၼ်ၵိုဝ်းၵၼ်တင်းသူၼၼ်ႉ။ ဢွၼ်ၵၼ်ဢဝ်ဢၢပ်ႈပၼ်ပုၼ်ႈဢၼ်တၵ်းမႄးၵုမ်းမႄးႁဵတ်း ႁွႆးတီႈဢၼ်ၵိူၼ်ႇဢၼ်လူႉပိၵ်ႈမၢၼ်ႇၸဝ်ႈၸိူဝ်းၼၼ်ႉတႃႉ၊ ဝႃႈၼင်ႇၼႆလႄႈ၊-

8ယိတ်ႈပရေႃးႁဵၵ်ႈၸိူဝ်းၼၼ်ႉဢွၼ်ၵၼ်ႁပ်ႉတုင်းဢဝ် လွင်ႈဢၼ်ၵမ်းလိုၼ်းၶဝ်ဢမ်ႇလႆႈၶၢမ်ႇလႆႈဢဝ်ငိုၼ်းတီႈၵူၼ်းတင်းလၢႆ၊ ဢမ်ႇလႆႈမႄးၵုမ်းမႄးႁဵတ်းႁွႆးတီႈဢၼ်ၵိူၼ်ႇဢၼ်လူႉတီႈပိၵ်ႈမၢၼ်ႇၸဝ်ႈၸိူဝ်းၼၼ်ႉလႄႈယူႇဢေႃႈ။-

9ယိတ်ႈပရေႃးႁဵၵ်ႈ ယေႃးယတႃႉ ၼၼ်ႉ ဢဝ်တိူၵ်ႈတႃႇလႄႈ မုင်းၽႃႁူမ်ႇမၼ်းသေယဝ်ႉ ဢဝ်ဝႆႉၵႃႈတီႈႁိမ်းယိတ်ႈပလၢင်ႇ ၵႃႈတီႈၽၢႆႇၶႂႃသဵၼ်ႈတၢင်းဢၼ်ၶဝ်ႈၸူးၵႃႈၼႂ်းႁိူၼ်းထႃႇဝရႃႉၽြႃးၼၼ်ႉလႄႈ၊ ယိတ်ႈပရေႃးႁဵၵ်ႈဢၼ်ပႂ်ႉၽၵ်းတူၸိူဝ်းၼၼ်ႉဢွၼ်ၵၼ်ဢဝ်ငိုၼ်း ၵႃႈဢၼ်ဢဝ်မႃးၵႃႈတီႈႁိူၼ်းထႃႇဝရႃႉၽြႃးၼၼ်ႉ သႂ်ႇဝႆႉၵႃႈၼႂ်းၼၼ်ႉဢေႃႈ။-

10မိူဝ်ႈဢၼ်ၶဝ်ႁူႉႁၼ်လွင်ႈဢၼ်ငိုၼ်းၼမ်ၼႃႇၵႃႈၼႂ်းတိူၵ်ႈတႃႇၼၼ်ႉၸိုင်၊ ၸရေးလူင်ၶုၼ်ႁေႃၶမ်း တင်းၶုၼ်ယိတ်ႈပရေႃးႁဵၵ်ႈၼၼ်ႉမႃးလႄႈ ဢဝ်ငိုၼ်းဢၼ်ၸူႉႁွမ်ဝႆႉၵႃႈၼႂ်းႁိူၼ်းထႃႇဝရႃႉၽြႃးၼၼ်ႉ ႁေႃႇၸွၵ်းသေလႄႈ ဢဝ်ၸရၢင်းဢေႃႈ။-

11ၶဝ်ဢဝ်ငိုၼ်းဢၼ်ၸင်ႈႁိဝ်ႈဝႆႉယဝ်ႉၼၼ်ႉ ဢၢပ်ႈပၼ်ၵႃႈၼႂ်းမိုဝ်းၶဝ်ၸိူဝ်းဢၼ်ပႂ်ႉတၢင်းႁဵတ်းလႄႈဢုပ်ႉၵႃႈၼိူဝ်ႁိူၼ်းထႃႇဝရႃႉၽြႃးၼၼ်ႉလႄႈ ၶဝ်ၼၼ်ႉဢွၼ်ၵၼ်ဢဝ်မႅင်ႇပၼ် ပုၼ်ႈလၢၵ်ႈသမႃးလႂ်၊ ၶဝ်ၸိူဝ်းဢၼ်ႁဵတ်းဢၼ်ပွင်လႂ် ဢၼ်သၢင်ႈႁဵတ်းတီႈႁိူၼ်းထႃႇဝရႃႉၽြႃးၼၼ်ႉ၊-

12ၶဝ်ၸိူဝ်းဢၼ်တႄႇဢုတ်ႇလႂ်၊ ၶဝ်ၸိူဝ်းဢၼ်ထၢၵ်ႇဢၼ်သပ်းမၢၵ်ႇႁိၼ်လႂ် ဢိၵ်ႇတင်းပုၼ်ႈဢၼ်တၵ်းသိုဝ်ႉမႆႉလွၼ်ႉမႆႉၸိင် မၢၵ်ႇႁိၼ်ဢၼ်ထၢၵ်ႇယဝ်ႉသပ်းယဝ်ႉ ႁႂ်ႈလႆႈမႄးၵုမ်းမႄးႁဵတ်းႁွႆးတီႈဢၼ်ၵိူၼ်ႇဢၼ်လူႉတီႈႁိူၼ်းထႃႇဝရႃႉၽြႃးၸိူဝ်းၼၼ်ႉ ဢိၵ်ႇတင်းပုၼ်ႈၵႃႈဢၼ်တၵ်းသဵင်ႈႁႂ်ႈလႆႈမႄးၵုမ်းမႄးႁဵတ်းပိၵ်ႈမၢၼ်ႇၸဝ်ႈၼၼ်ႉဢေႃႈ။-

13ၶဝ်ဢမ်ႇဢဝ်ငိုၼ်းဢၼ်ဢဝ်မႃးလူႇတၢၼ်းတီႈႁိူၼ်းထႃႇဝရႃႉၽြႃးၼၼ်ႉ ႁဵတ်းၵွၵ်းငိုၼ်းလႂ်၊ ၵိမ်းၺၢပ်ႈၽႆးလႂ်၊ ဝၢၼ်ႇလႂ်၊ ၼႄးၶရႃႇလႂ်၊ ၶိူင်ႈၶမ်းလႂ်၊ ၶိူင်ႈငိုၼ်းလႂ် ပုၼ်ႈႁိူၼ်းထႃႇဝရႃႉၽြႃးၼၼ်ႉ၊-

14ငိုၼ်းၼၼ်ႉၸိုင်၊ ၶဝ်ဢဝ်ပၼ်တီႈၶဝ်ၸိူဝ်းဢၼ် ႁဵတ်းတၢင်းႁဵတ်းၼၼ်ႉလႄႈ ၶဝ်ၼၼ်ႉဢွၼ်ၵၼ်ဢဝ် မႄးၵုမ်းမႄးႁဵတ်းႁိူၼ်းထႃႇဝရႃႉၽြႃးဢေႃႈ။-

15ၶဝ်ဢမ်ႇတႂၢၵ်ႈၸရၢင်းတီႈၶဝ်ၸိူဝ်းဢၼ်ၶၢမ်ႇဢဝ်ငိုၼ်းသေလႄႈ ပၼ်တီႈၶဝ်ၸိူဝ်းဢၼ်ႁဵတ်းတၢင်းႁဵတ်းၼၼ်ႉ။ ၵွပ်ႈပိူဝ်ႈဢၼ်ၶဝ်ၸိူဝ်းၼၼ်ႉပႂ်ႉသဵတ်ႈၸႃႇၼၼ်ႉဢေႃႈ။-

16ငိုၼ်းယိတ်ႈဢၼ်ၽေႇတူႉၸရိူၵ်ႈ၊ ငိုၼ်းယိတ်ႈဢၼ်ၽေႇဢပႅတ်ႈၸမ်ႉ၊ ဢမ်ႇလႆႈဢဝ်သႂၢင်းၶဝ်ႈ ၵႃႈၼႂ်းႁိူၼ်းထႃႇဝရႃႉၽြႃးလႄႈ၊ ယိတ်ႈပရေႃးႁဵၵ်ႈလႆႈပိူင်ႇဢဝ်ဢေႃႈ။

17မိူဝ်ႈၼၼ်ႉ ႁႃႇၸေႇလႃႉ ၶုၼ်ႁေႃၶမ်း သူႉရီႉ ၶီႇသိုၵ်းၶိုၼ်ႈၸူးလႄႈ တိုၵ်းတေႃးဝဵင်း ၵႃႇသႃႉ သေလႄႈ သိမ်းဢဝ်သေယဝ်ႉ၊ ႁႃႇၸေႇလႃႉ ၼၼ်ႉ ဝၢႆႇၼႃႈတေႃႇဝဵင်း ယေႇရူႉသလႅမ်ႇ ႁႂ်ႈလႆႈၶီႇသိုၵ်းၶိုၼ်ႈၸူးယူႇဢေႃႈ။-

18ယေႃးသႃႉ ၶုၼ်ႁေႃၶမ်း ယူႉတႃႉ ၼၼ်ႉ ဢဝ်ၶိူင်ႈပိူင်ဢၼ်မူတ်းၸၢင်ႇၵႃႈဢၼ် ယူဝ်းသၽတ်ႉ၊ ယႁူဝ်းရမ်ႇ၊ ဢႃႇၶၸီႉ ပူႇၸဝ်ႈမွၼ်ႇၸဝ်ႈဢၼ်ဝႃႈ ၶုၼ်ႁေႃၶမ်း ယူႉတႃႉ ၸိူဝ်းၼၼ်ႉလူႇတၢၼ်း တင်းၶိူင်ႈပိူင်ဢၼ်မၼ်းႁႂ်ႈမူတ်းၸၢင်ႇၸိူဝ်းၼၼ်ႉ ဢိၵ်ႇတင်းၶမ်း ၵႃႈဢၼ်ထူပ်းႁၼ်ၵႃႈၼႂ်းၽၼ်ႇတႃႇႁိူၼ်းထႃႇဝရႃႉၽြႃး တင်းၽၼ်ႇတႃႇႁေႃၸဝ်ႈၼၼ်ႉ ပၼ်ၵႂႃႇတီႈ ႁႃႇၸေႇလႃႉ ၶုၼ်ႁေႃၶမ်း သူႉရီႉ ၼၼ်ႉလႄႈ၊ မၼ်းၼၼ်ႉဝၢႆႇသေဝၢင်းသေဝဵင်း ယေႇရူႉသလႅမ်ႇ လႄႈၵႂႃႇသေဢေႃႈ။

19လွင်ႈတၢင်း ယေႃးသႃႉ ဢၼ်ယင်းၵိုတ်းယင်းၵျၢၼ်ႇ ဢိၵ်ႇတင်းလွင်ႈတၢင်းၵႃႈဢၼ်မၼ်းႁဵတ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ ဢေႃႈ။-

20ၶႃႈမၼ်းၵူၼ်းမၼ်းဢွၼ်ၵၼ်လုၵ်ႉလႄႈ လွမ်ႁဵတ်းမုၵ်ႉႁဵတ်းၸိူဝ်းသေယဝ်ႉ၊ ဢဝ် ယေႃးသႃႉ ၼၼ်ႉတၢႆ ၵႃႈၼႂ်းႁေႃယႃႇယီႇ မီႉလေႃႇ ၵႃႈတီႈသဵၼ်ႈတၢင်းဢၼ်လူင်းၸူးဝၢၼ်ႈ သီႉလႃႉ ဢေႃႈ။-

21ယေႃးၸပတ်ႉ လုၵ်ႈၸၢႆး သီႉမတ်ႉ ဢိၵ်ႇတင်း ယႁေႃးၸပပ်ႉ လုၵ်ႈၸၢႆး သူဝ်းမေႇရႃႉ ၶႃႈမၼ်းၵူၼ်းမၼ်းၼၼ်ႉ ယႃႉမၼ်းပႅတ်ႈ ႁႂ်ႈထၼ်ႈပေႃးတၢႆဢေႃႈ။ ၶဝ်ဢွၼ်ၵၼ်ဢဝ်သၢင်းၵျူဝ်ႇလူၺ်ႈၵၼ်တင်းပူႇမွၼ်ႇမၼ်းတင်းလၢႆ ၵႃႈၼႂ်းဝဵင်း တႃႇဝိတ်ႈ ၼၼ်ႉဢေႃႈ၊ ဢႃႇမၸီႉ လုၵ်ႈၸၢႆးၸဝ်ႈၼၼ်ႉၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

← Chapter 11 Jump to: Chapter 13 →