2 Kings 3

Shan

← Chapter 2 Jump to: Chapter 4 →

1ၼႂ်းပီႊဢၼ် ယူဝ်းသၽတ်ႉ ၶုၼ်ႁေႃၶမ်း ယူႉတႃႉ ၸၢမ်ႇႁၢင်ႈၸၢမ်ႇႁေႃသိပ်းပၢႆပႅတ်ႇပီႊၼၼ်ႉ၊ ယူဝ်းရမ်ႇ လုၵ်ႈၸၢႆး ဢႃႇႁပ်ႉ ၼၼ်ႉ ၸႃႉၼင်ႈႁၢင်ႈၼင်ႈႁေႃမိူင်း ဢီႉသရေႇလႃႉ ၵႃႈၼႂ်းဝဵင်း သမႃႇရီႉ လႄႈ ဢုပ်ႉပိူင်ႇၸၢမ်ႇၸႃးသိပ်းပၢႆသွင်ပီႊဢေႃႈ။-

2မၼ်းၼၼ်ႉႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃးဢေႃႈ။ ၵူၺ်းၵႃႈ မၼ်းဢမ်ႇႁဵတ်းမိူၼ်ၸိူဝ်ႉၼင်ႇၸဝ်ႈပေႃႈမၼ်း၊ ၸဝ်ႈမႄႈမၼ်းၸိူဝ်းၼၼ်ႉ၊ မၼ်းပႄႇၽဵဝ်ႈသဝ်တီႈၵူဝ်းၵႂၢႆႇ ပႃႇလႃႉ ဢၼ်ၸဝ်ႈပေႃႈမၼ်းႁဵတ်းၼၼ်ႉပႅတ်ႈသေဢေႃႈ။-

3ၼႂ်းဝႃႈၼၼ်သေၵေႃႈ မၼ်းယင်းၸပ်းၸွမ်းဢပႅတ်ႈတူႉၸရိူၵ်ႈဢၼ် ယေႇရူဝ်းပုမ်ႇ လုၵ်ႈၸၢႆး ၼေႇပတ်ႉ ႁဵတ်းလႄႈ ႁႂ်ႈၵူၼ်းမဵဝ်း ဢီႉသရေႇလႃႉ တင်းလၢႆၽိတ်းပိူင်ႈၼၼ်ႉယူႇဢေႃႈ။ မၼ်းဢမ်ႇပႄႇဢမ်ႇပႅတ်ႈ။

4မေႇသႃႉ ၶုၼ်လူင် မေႃႇၽႃႉ ၼၼ်ႉ ပဵၼ်ၵေႃႉဢၼ်လဵင်ႉထိင်းသူဝ်းလႄႈ လႆႈဢဝ်ၶူၼ်သူဝ်းဢွၼ်ႇသႅၼ်တူဝ် ဢိၵ်ႇတင်းသူဝ်းပေႃႈသႅၼ်တူဝ် သၢၵ်ႈပၼ်တီႈၶုၼ်ႁေႃၶမ်း ဢီႉသရေႇလႃႉ ဢေႃႈ။-

5မိူဝ်ႈဢၼ် ဢႃႇႁပ်ႉ တၢႆၼၼ်ႉၸိုင် ၶုၼ်လူင် မေႃႇၽႃႉ ၼၼ်ႉ ပုင်ႇၵၢၼ်ႇၶုၼ်ႁေႃၶမ်း ဢီႉသရေႇလႃႉ ဢေႃႈ။-

6မိူဝ်ႈၼၼ်ႉ ၶုၼ်လူင် ယႁူဝ်းရမ်ႇ ဢွၵ်ႇသေၵႃႈၼႂ်းဝဵင်း သမႃႇရီႉ လႄႈ ၼပ်ႉဢၢၼ်ႇဢဝ်ၸရၢင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢေႃႈ။-

7မၼ်းၵႂႃႇလႄႈပွႆႇၸႂ်ႉၸူးၵႃႈတီႈ ယူဝ်းသၽတ်ႉ ၶုၼ်ႁေႃၶမ်း ယူႉတႃႉ လႄႈထၢမ်ဝႃႈ၊ ၶုၼ်လူင် မေႃႇၽႃႉ ၼၼ်ႉ ပုင်ႇၵၢၼ်ႇၵဝ်ၶႃႈယဝ်ႉ။ ၸဝ်ႈတၵ်းၸွမ်းလူၺ်ႈၵၼ်တင်းၵဝ်ၶႃႈၵႂႃႇတိုၵ်းမိူင်း မေႃႇၽႃႉ ႁိုဝ်။ ဝႃႈၼင်ႇၼႆသေယဝ်ႉ၊ မၼ်းၼၼ်ႉၶိုၼ်းလၢတ်ႈလႄႈဝႃႈ၊ ၵဝ်ၶႃႈတၵ်းၶီႇၶိုၼ်ႈၵႂႃႇဢေႃႈ။ ၵဝ်ၶႃႈၼႆႉပဵၼ်မိူၼ်ၸိူင်ႉၼင်ႇၸဝ်ႈယူႇ။ ၵူၼ်းၵဝ်ၶႃႈၸိူဝ်းၼႆႉ ပဵၼ်မိူၼ်ၸိူဝ်ႉၼင်ႇၵူၼ်းၸဝ်ႈၸိူဝ်းၼၼ်ႉယူႇသေလႄႈ မႃႉၵဝ်ၶႃႈတင်းလၢႆပဵၼ်မိူၼ်ၸိူဝ်ႉၼင်ႇမႃႉၸဝ်ႈၸိူဝ်းၼၼ်ႉဢေႃႈ၊ ဝႃႈၼင်ႇၼႆဢေႃႈ။-

8မၼ်းသမ်ႉထၢမ်လႄႈဝႃႈ၊ ႁဝ်းတၵ်းၶီႇၸွမ်းသဵၼ်ႈတၢင်းလႂ်ၶိုၼ်ႈၸူး၊ ဝႃႈၼင်ႇၼႆသေယဝ်ႉ၊ မၼ်းၼၼ်ႉၶိုၼ်းလၢတ်ႈလႄႈဝႃႈ၊ ၸွမ်းသဵၼ်ႈတၢင်းထိူၼ်ႇ ဢေႇတုမ်ႇ ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

9ၼင်ႇၼၼ်လႄႈ ၶုၼ်ႁေႃၶမ်း ဢီႉသရေႇလႃႉ ၊ ၶုၼ်ႁေႃၶမ်း ယူႉတႃႉ ၊ ၶုၼ်ႁေႃၶမ်း ဢေႇတုမ်ႇ ၸိူဝ်းၼၼ်ႉ ၽွမ်ႉၵၼ်ၶီႇၵႂႃႇလႄႇလဵပ်ႈၵႂႃႇၶၢဝ်းတၢင်းၸဵတ်းဝၼ်းယူႇသေလႄႈ ဢမ်ႇမီးၼမ်ႉပုၼ်ႈဢၼ် ပူဝ်ႇပႃႇၵူၼ်းသိုၵ်းတင်းလၢႆ ဢိၵ်ႇတင်းတရိၵ်ႈသၢၼ်ႇဢၼ်ပႃးတီႈၶဝ်ၼၼ်ႉၸိူဝ်းၼၼ်ႉတၵ်းၵိၼ်။-

10ၶုၼ်ႁေႃၶမ်း ဢီႉသရေႇလႃႉ လၢတ်ႈလႄႈဝႃႈ၊ ဢလူဝ်း၊ ဢလူဝ်း၊ ထႃႇဝရႃႉၽြႃးႁွင်ႉဢဝ်ႁဝ်း ၶုၼ်ႁေႃၶမ်းသၢမ်ပႃးၼႆႉ မႃးႁႂ်ႈလႆႈဢဝ်ဢၢပ်ႈပၼ်ၵႃႈၼႂ်းမိုဝ်းၵူၼ်း မေႃႇၽႃႉ တင်းလၢႆလူင်ပႄႇ၊ ဝႃႈၼင်ႇၼႆဢေႃႈ။-

11ယူဝ်းသၽတ်ႉ ထၢမ်လႄႈဝႃႈ၊ ပုၼ်ႈဢၼ်ႁဝ်းတၵ်းလႆႈတွင်ႈထၢမ်တီႈထႃႇဝရႃႉၽြႃးၸိုင်၊ ၵႃႈတီႈၼႆႈဢမ်ႇမီးပရေႃးၽႅတ်ႈထႃႇဝရႃႉၽြႃး သေတူၼ်သေပႃးႁိုဝ်။ ဝႃႈၼင်ႇၼႆသေယဝ်ႉ၊ ၶႃႈၵူၼ်းၶုၼ်ႁေႃၶမ်း ဢီႉသရေႇလႃႉ ၵေႃႉၼိုင်ႈလဝ်ႊလၢတ်ႈလႄႈဝႃႈ၊ ဢေးလီႉသႄး လုၵ်ႈၸၢႆး သႃႇၽတ်ႉ ၵေႃႉဢၼ်ပဵၼ်တိၼ်ပဵၼ်မိုဝ်း ဢေးလီႉယႃႉ ၼၼ်ႉ မီးၵႃႈတီႈၼႆႈတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

12ယူဝ်းသၽတ်ႉ ၵေႃႈလၢတ်ႈလႄႈဝႃႈ၊ ၼုၵ်ႈၵပၢတ်ႈထႃႇဝရႃႉၽြႃးမီးတီႈမၼ်းၼၼ်ႉဢေႃႈ၊ ဝႃႈၼင်ႇၼႆသေလႄႈ၊ ၶုၼ်ႁေႃၶမ်း ဢီႉသရေႇလႃႉ ဢိၵ်ႇတင်း ယူဝ်းသၽတ်ႉ တင်းၶုၼ်ႁေႃၶမ်း ဢေႇတုမ်ႇ ၸိူဝ်းၼၼ်ႉ ဢွၼ်ၵၼ်လူင်းၸူးၵႃႈတီႈမၼ်းၼၼ်ႉဢေႃႈ။-

13ဢေးလီႉသႄး လၢတ်ႈတီႈၶုၼ်ႁေႃၶမ်း ဢီႉသရေႇလႃႉ လႄႈဝႃႈ၊ ၶႃႈၸဝ်ႈၸၢပ်ႈသႅင်ႇၵၼ်တင်းၸဝ်ႈႁဝ်းၸိူဝ်ႉၼင်ႇႁိုဝ်။ ၵႂႃႇၸူးၵႃႈတီႈ ပရေႃးၽႅတ်ႈၸဝ်ႈပေႃႈၸဝ်ႈႁဝ်းဢိၵ်ႇတင်းပရေႃးၽႅတ်ႈၸဝ်ႈမႄႈၸဝ်ႈႁဝ်း ၸိူဝ်းၼၼ်ႉတီႈၶႃႈတႃႉ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶုၼ်ႁေႃၶမ်း ဢီႉသရေႇလႃႉ လၢတ်ႈလႄႈဝႃႈ၊ ယႃႇပေဝႃႈသေၵမ်း။ ထႃႇဝရႃႉၽြႃးႁွင်ႉဢဝ်ႁဝ်း ၶုၼ်ႁေႃၶမ်းသၢမ်ပႃးၼႆႉ မႃးႁႂ်ႈလႆႈဢဝ်ဢၢပ်ႈပၼ်ၼႂ်းမိုဝ်းၵူၼ်း မေႃႇၽႃႉ တင်းလၢႆလူင်ပႄႇ၊ ဝႃႈၼင်ႇၼႆသေယဝ်ႉ၊-

14ဢေးလီႉသႄး လၢတ်ႈလႄႈဝႃႈ၊ ၵႃႈၼင်ႇဢၼ်ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ဢၼ်ၶႃႈၸဝ်ႈၵူဝ်းၵႂၢႆႇၼၼ်ႉ ဢသၢၵ်ႈလိပ်းယူႇၼၼ်ႉ၊ သင်ၶႃႈၸဝ်ႈဢမ်ႇထွၵ်ႈလူၺ်ႈၼႃႈ ယူဝ်းသၽတ်ႉ ၶုၼ်ႁေႃၶမ်း ယူႉတႃႉ ၸိုင်၊ ၶႃႈၸဝ်ႈဢမ်ႇၶႂ်ႈတူၺ်းၶႂ်ႈႁၼ်ၸဝ်ႈႁဝ်း။-

15ႁွင်ႉဢဝ်ၵူၼ်းလဵတ်းတိင်ႇမႃးတီႈၶႃႈတႃႉ၊ ဝႃႈၼင်ႇၼႆဢေႃႈ၊ မိူဝ်ႈဢၼ်ၵူၼ်းလဵတ်းတိင်ႇၼၼ်ႉလဵတ်းၼၼ်ႉၸိုင်၊ မိုဝ်းထႃႇဝရႃႉၽြႃးႁွတ်ႈထိုင်ၵႃႈၼိူဝ်မၼ်းလႄႈ၊ မၼ်းၼၼ်ႉလၢတ်ႈလႄႈဝႃႈ၊-

16ထႃႇဝရႃႉၽြႃးမီးဢမိင်ႉဝႆႉၸမ်ႉ၊ ၶုတ်းႁဵတ်းၶုမ်ႁဵတ်းလုၵ်းၵႃႈတီႈပၢင်ႇႁူၺ်ႈၼႆႉၼမ်ၼမ်တီႈၶႃႈတႃႉ။-

17လွင်ႈမၼ်းၸမ်ႉ ထႃႇဝရႃႉၽြႃးမီးဢမိင်ႉလႄႈဝႃႈ၊ သူယင်းဢမ်ႇႁၼ်ၽူၼ်ႁၼ်လူမ်းလႄႈ ပၢင်ႇႁူၺ်ႈၼႆႉတၵ်းတဵမ်ဝႆႉတင်းၼမ်ႉလႄႈ၊ သူဢိၵ်ႇတင်းသူဝ်းဝူဝ်းသူတင်းတရိၵ်ႈသၢၼ်ႇသူတၵ်းလႆႈၵိၼ်ဢေႃႈ။-

18လွင်ႈတၢင်းၼၼ်ႉ ပဵၼ်လွင်ႈတၢင်းဢၼ်လဵၵ်ႉဢၼ်ဢွၼ်ႇသိုဝ်ႈၼႃႈတႂ်ႈတႃ ထႃႇဝရႃႉၽြႃးလူးၵွၼ်ႇဢေႃႈ။ ၵူၼ်း မေႃႇၽႃႉ တင်းလၢႆၵေႃႈ မၼ်းၸဝ်ႈတၵ်းဢဝ်ဢၢပ်ႈပၼ်ၵႃႈၼႂ်းမိုဝ်းသူဢေႃႈ။-

19သူတၵ်းလႆႈတိုၵ်းတေႃးယႃႉပႅတ်ႈဝဵင်း ၵႃႈဢၼ်မၼ်ႈၶိူင်ႇ ဢိၵ်ႇတင်းဝဵင်းၵႃႈဢၼ်ႁၢင်ႈလီႁၢင်ႈငၢမ်းတင်းလၢႆလႄႈ ပမ်ႈတူၼ်ႈမႆႉဢၼ်လီသုင်းလီသွင်ႇၵႃႈမီးလူမ်ႉပႅတ်ႈဢေႃႈ။ တၵ်းလႆႈဢဝ်လိၼ်ထူမ်ၼမ်ႉမေႃႇၵႃႈမီးပႅတ်ႈလႄႈ ဢဝ်တင်းမၢၵ်ႇႁိၼ်ယႃႉၵႂၢၵ်ႈလိၼ်ဢၼ်လီၵႃႈမီးၸိူဝ်းၼၼ်ႉပႅတ်ႈဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။-

20ၵၢင်ၼႂ်ၶိင်ႇမိူဝ်ႈဢၼ်ပုၵ်ႈၸေႃႇၶိူင်ႈပုၵ်ႈၸေႃႇၽေႃးၸဵၼ်ႇၼၼ်ႉ ၼမ်ႉလုၵ်ႉသေၵႃႈတီႈသဵၼ်ႈတၢင်း ဢေႇတုမ်ႇ မႃးလႄႈတဵမ်မိူင်းတင်းမိူင်းဝႆႉဢေႃႈ။

21ၵူၼ်းမိူင်း မေႃႇၽႃႉ တင်းသဵင်ႈတင်းလူင် ငိၼ်းလွင်ႈဢၼ်ၶုၼ်ႁေႃၶမ်းၸိူဝ်းၼၼ်ႉ ၶီႇသိုၵ်းမႃးၼၼ်ႉသေယဝ်ႉ၊ ႁႂ်ႈၵူၼ်းဢၼ်ယိပ်းၵမ်လၢၵ်ႈၼၢၵ်ႈလႆႈလဵၵ်ႉလဵၵ်ႉယႂ်ႇယႂ်ႇၵႃႈမီးၼၼ်ႉ ၸူႉၵၼ်တုမ်ၵၼ်သေလႄႈၶျႃးတပ်ႉၶဝ်ႁႄႉယူႇ ၵႃႈတီႈၶွပ်ႇၼမ်ႉလႅၼ်လိၼ်ဢေႃႈ။-

22မိူဝ်ႈဢၼ်ၶဝ်လုၵ်ႉၶိင်ႇၵၢင်ၼႂ်ၸဝ်ႉၸဝ်ႉၼၼ်ႉ၊ ငဝ်းဢရွင်ႇၵၢင်ဝၼ်းထွင်ႇသႂ်ႇၵႃႈတီႈၼမ်ႉၼၼ်ႉလႄႈ ၵူၼ်းမိူင်း မေႃႇၽႃႉ ၸိူဝ်းၼၼ်ႉ ႁၼ်ၼမ်ႉဢၼ်မီးသိုဝ်ႈၶဝ်ၼၼ်ႉ လႅင်ဝႆႉမိူၼ်ၸိူဝ်ႉၼင်ႇလိူတ်ႈၼၼ်ႉလႄႈ လၢတ်ႈၵၼ်လႄႈဝႃႈ၊-

23ဢၼ်ၼၼ်ႉပဵၼ်လိူတ်ႈဢေႃႈ။ ၶုၼ်ႁေႃၶမ်းၸိူဝ်းၼၼ်ႉ၊ လႆႈၶၢမ်ႇတၢင်းဢၼ်ဢဝ်တၢႆယဝ်ႉ။ ပႃးၼိုင်ႈလႄႈပႃးၼိုင်ႈၼင်ႇၵၼ်ၵၼ် ယႃႉၵၼ်ပႅတ်ႈယဝ်ႉ။ ပိူဝ်ႈဢၼ်ပဵၼ်ၼင်ႇၼႆလႄႈ၊ ၵူၼ်း မေႃႇၽႃႉ ၶဝ်ဢိူၺ်း၊ ဢွၼ်ၵၼ်ၵႂႃႇလႄႈႁိမ်ဢဝ်ႁူင်ႇဢဝ်တႃႉ၊ ဝႃႈၼင်ႇၼႆဢေႃႈ။-

24မိူဝ်ႈဢၼ်ၶဝ်ၼၼ်ႉ ႁွတ်ႈထိုင်ၵႃႈတီႈတပ်ႉ ဢီႉသရေႇလႃႉ ၼၼ်ႉၸိုင်၊ ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ဢွၼ်ၵၼ်လုၵ်ႉလႄႈ တိုၵ်းတေႃးယႃႉပႅတ်ႈၵူၼ်း မေႃႇၽႃႉ ၸိူဝ်းၼၼ်ႉထၼ်ႈပေႃး ႁႂ်ႈၶဝ်ၼၼ်ႉဢွၵ်ႇပၢႆႈဢေႃႈ။ ၶဝ်ဢွၼ်ၵၼ်လိုပ်ႈၸွမ်းလမ်းၸွမ်းတေႃႇထိုင်ႁွတ်ႈမိူင်း မေႃႇၽႃႉ လႄႈ ယႃႉၶဝ်ၼၼ်ႉပႅတ်ႈဢေႃႈ။-

25ၶဝ်ဢွၼ်ၵၼ်ၵိူၼ်ႇယႃႉဝဵင်းတင်းလၢႆပႅတ်ႈလႄႈ ၵူၼ်းၵူႈၵေႃႉဢွၼ်ၵၼ်ဢဝ်မၢၵ်ႇႁိၼ်ထိမ်ႈသႂ်ႇၵႃႈၼိူဝ်ၼႃႈလိၼ်ဢၼ်လီၵႃႈမီးၸိူဝ်းၼၼ်ႉႁင်းၽႂ်ႁင်းမၼ်းလႄႈ ႁူမ်ႇသုမ်ႇဝႆႉဢေႃႈ။ ၼမ်ႉဢွၵ်ႇႁူးၵႃႈမီးၵေႃႈ ၶဝ်ဢွၼ်ၵၼ်ဢဝ်လိၼ်ထူမ်လႄႈ ပမ်ႈတူၼ်ႈမႆႉဢၼ်လီသုင်းလီသွင်ႇၵႃႈမီးလူမ်ႉပႅတ်ႈဢေႃႈ၊ တီႈဝဵင်း ၵီႉရႃႉႁရိတ်ႉ ၼၼ်ႉၵူၺ်းၶဝ်ဝႆႉၵိုတ်းဝႆႉၵျၢၼ်ႇမၢၵ်ႇႁိၼ်မၼ်းတင်းလၢႆယူႇလႄႈ ၵူၺ်းၵွမ်ႉၵူၼ်းမေႃယိပ်းၵူင်ၵွၼ်ၸိူဝ်းၼၼ်ႉၵူၺ်းဢွၼ်ၵၼ် လႄႇလဵပ်ႈပိုတ်းယိုဝ်းဢေႃႈ။

26ၶုၼ်လူင် မေႃႇၽႃႉ ႁူႉႁၼ်လွင်ႈဢၼ်ဢမ်ႇၶၢမ်ႇတိုၵ်းၶၢမ်ႇတေႃးလႆႈၼၼ်ႉသေယဝ်ႉ၊ ႁွင်ႉဢဝ်ၵူၼ်းဢၼ်ယိပ်းလၢပ်ႇၸဵတ်းပၢၵ်ႇသေလႄႈ ဢဝ်ႁႅင်းဢွၵ်ႇႁႂ်ႈလႆႈယႃႉတပ်ႉ ၶုၼ်ႁေႃၶမ်း ဢေႇတုမ်ႇ ပႅတ်ႈသေၵေႃႈဢမ်ႇယႃႉလႆႈ။-

27ၵမ်းၼၼ်ႉ မၼ်းဢဝ်လုၵ်ႈၸၢႆးတူၼ်ႈမၼ်း ဢၼ်ထိူၵ်ႈၼင်ႈႁၢင်ႈၼင်ႈႁေႃတၢင်တူဝ်မၼ်းၼၼ်ႉလႄႈ ႁဵတ်းယိတ်ႈဢၼ်တုတ်ႇၽႆးၵႃႈၼိူဝ်လမ်းဝဵင်းဢေႃႈ။ တၢင်းၸႂ်မႆႈၶႆႈၸႃႉၸဝ်ႈႁွတ်ႈထိုင်ၵႃႈၼိူဝ်ၵူၼ်းမဵဝ်း ဢီႉသရေႇလႃႉ တင်းလၢႆလႄႈ၊ ၶဝ်ဢွၼ်ၵၼ်ဝႆႉမိူင်းၼၼ်ႉသေလႄႈ ၶိုၼ်းမိူဝ်းၵႂႃႇၸူးၵႃႈတီႈမိူင်းၶဝ်သေဢေႃႈ။

← Chapter 2 Jump to: Chapter 4 →