2 Kings 21

Shan

← Chapter 20 Jump to: Chapter 22 →

1မၼႃႇသေႇ ၼၼ်ႉ မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈသိပ်းပၢႆသွင်ပီႊလႄႈ မၼ်းဢုပ်ႉပိူင်ႇၸၢမ်ႇၸႃးယူႇၵႃႈၼႂ်းဝဵင်း ယေႇရူႉသလႅမ်ႇ ႁႃႈသိပ်းပၢႆႁႃႈပီႊဢေႃႈ။ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် ႁိပ်ႉသၽႃႉ ဢေႃႈ။-

2မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃထႃႇဝရႃႉၽြႃး ၸွမ်းၼင်ႇထုင်းၸၢမ်ႇဢၼ်လီႁင်ႈဢဵတ်ႇသဵတ်ႇ ၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ထႃႇဝရႃႉၽြႃးႁေႃႈဢွၵ်ႇပႅတ်ႈ သေၵႃႈတီႈၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆၸိူဝ်းၼၼ်ႉဢေႃႈ။-

3မၼ်းမႄးၵုမ်းမႄးႁဵတ်းထႃႇၼႃႉတီႈသုင် ဢၼ်ၸဝ်ႈပေႃႈမၼ်း ႁေႇၸၵီႉ ယႃႉပႅတ်ႈၸိူဝ်းၼၼ်ႉလႄႈ တႄႇႁဵတ်းယိတ်ႈပလၢင်ႇပုၼ်ႈ ၽြႃးပႃႇလႃႉ လႂ်၊ ႁဵတ်းတူၼ်ႈ ဢႃႇသရႃႉ မိူၼ်ၸိူဝ်ႉၼင်ႇဢၼ် ဢႃႇႁပ်ႉ ၶုၼ်ႁေႃၶမ်း ဢီႉသရေႇလႃႉ ႁဵတ်းၼၼ်ႉလႂ်၊ ႁဵတ်းဝၢတ်ႈတီႈၶိူင်ႈပိူင်ၽႃႉၵၢင်ႁၢဝ်ၵႃႈမီးလႄႈ ၵူဝ်းၵႂၢႆႇဢေႃႈ။-

4ၵႃႈၼႂ်းႁိူၼ်းထႃႇဝရႃႉၽြႃး ဢၼ်ထႃႇဝရႃႉၽြႃးမီးဢမိင်ႉလႄႈဝႃႈ၊ ၵဝ်တၵ်းႁႂ်ႈၼႃႇမႃႉၸိုဝ်ႈသဵင်ၵဝ်တႄႇယူႇၵႃႈၼႂ်းဝဵင်း ယေႇရူႉသလႅမ်ႇ သေႇသေႇဢေႃႈ၊ ဝႃႈၼင်ႇၼႆၼၼ်ႉၵေႃႈ၊ မၼ်းႁဵတ်းယိတ်ႈပလၢင်ႇတင်းလၢႆဢေႃႈ။-

5မၼ်းတႄႇႁဵတ်းယိတ်ႈပလၢင်ႇပုၼ်ႈၶိူင်ႈပိူင်ၽႃႉၵၢင်ႁၢဝ်ၵႃႈမီးၼၼ်ႉ ၵႃႈၼႂ်းတမ်ႇတိူင်းႁိူၼ်းထႃႇဝရႃႉၽြႃးတင်းသွင်ထၢပ်ႈဢေႃႈ။-

6မၼ်းႁႂ်ႈလုၵ်ႈၸၢႆးမၼ်းလႆႈၶၢမ်ႇတၢင်းဢၼ်ဢဝ်ၽႆးပုၵ်ႈၸေႃႇဢေႃႈ။ မၼ်းၸၢင်ႈတူၺ်းပေႇတၢင်ႇၵႃႇလႃးလႄႈ သုင်းသွင်ႇဢတၢတ်ႈဢၼ်ၸၢင်ႈၸေႃႉၸၢင်ႈႁဵတ်းၼၼ်ႉသေလႄႈ ပၼ်ဢၶႂၢင်ႉတီႈၽိူဝ်ႉၶဝ်ၽီၶဝ်ဢေႃႈ။ မၼ်းႁဵတ်းတူႉၸရိူၵ်ႈၼမ်ၼႃႇသိုဝ်ႈၼႃႈတႂ်ႈတႃထႃႇဝရႃႉၽြႃး ႁႂ်ႈလႆႈတိုၵ်းယူင်းတၢင်းၸႂ်မႆႈၶႆႈၸႃႉမၼ်းၸဝ်ႈဢေႃႈ။-

7မၼ်းဢဝ်ရုၵ်ႈထူႉ ဢၼ်ႁဵတ်းႁႂ်ႈမိူၼ်ၵၼ်တင်းတူၼ်ႈ ဢႃႇသရႃႉ ဢၼ်မၼ်းလုမ်းလႃးမႄးႁဵတ်းၼၼ်ႉသေလႄႈ တၢင်ႇဝႆႉၵႃႈၼႂ်းႁိူၼ်းၸဝ်ႈ ဢၼ်ထႃႇဝရႃႉၽြႃးမီးဢမိင်ႉတီႈ တႃႇဝိတ်ႈ တင်းလုၵ်ႈၸၢႆးၸဝ်ႈ သေႃးလမုၼ်ႇ လႄႈဝႃႈ၊ ၵဝ်တၵ်းႁႂ်ႈၼႃႇမႃႉၸိုဝ်ႈသဵင်ၵဝ် တႄႇယူႇၵႃႈၼႂ်းႁိူၼ်းၸဝ်ႈၼႆႉ ဢိၵ်ႇတင်းဝဵင်း ယေႇရူႉသလႅမ်ႇ ဢၼ်ၵဝ်လိူၵ်ႈၵဵပ်းဢဝ် ၵႃႈၼႂ်းမဵဝ်း ဢီႉသရေႇလႃႉ ၵူႈမဵဝ်းၼၼ်ႉယူႇတႃႇသေႇဢေႃႈ။-

8ပိၵ်ႉသမ်ႉမၼ်းၸဝ်ႈမီးဢမိင်ႉလႄႈဝႃႈ၊ ပေႃးၵူၼ်းမဵဝ်း ဢီႉသရေႇလႃႉ တင်းလၢႆ ပႂ်ႉၵမ်ပႂ်ႉၸွမ်းႁႂ်ႈလႆႈၵမ်ၵျၢင်ႉၸွမ်းၵႃႈၼင်ႇဢၼ်ၵဝ်သင်ႇလၢတ်ႈဝႆႉဢၼ်ဝႃႈ ၵႃႈၼင်ႇတြႃးဢၼ်ၶႃႈၵဝ် မူဝ်းသေႇ သင်ႇလၢတ်ႈဝႆႉၼၼ်ႉၸိုင်၊ ၵမ်းလိုၼ်းၵဝ်တၵ်းဢမ်ႇႁႂ်ႈတိၼ်မဵဝ်း ဢီႉသရေႇလႃႉ ၶဝ်လႆႈယၢင်ႈလႆႈပၢႆႈဢွၵ်ႇသေၵႃႈၼႂ်းမိူင်းဢၼ်ၵဝ်ပၼ်တီႈပူႇၶဝ်မွၼ်ႇၶဝ်ၼၼ်ႉ ဝႃႈၼင်ႇၼႆၼၼ်ႉဢေႃႈ။-

9ၶဝ်ၼၼ်ႉဢမ်ႇထွမ်ႇဢမ်ႇဢဝ် မၼႃႇသေႇ တိုၵ်းယူင်းၸူဝ်းဢဝ်ၶဝ် ႁႂ်ႈၶဝ်ႁဵတ်းလွင်ႈတၢင်းဢၼ်ယဵင်ႈၶႅၼ်းႁၢႆႉမိူၵ်ႈၼႃႇသေ လွင်ႈတၢင်းဢၼ်ၵူၼ်းၵူႈၸိူဝ်ႉၵူႈမဵဝ်း ဢၼ်ထႃႇဝရႃႉၽြႃးယႃႉၽဵဝ်ႈပႅတ်ႈသေၵႃႈတီႈ ၽၢႆႇၼႃႈၵူၼ်းမဵဝ်း ဢီႉသရေႇလႃႉ တင်းလၢႆ ၸိူဝ်းၼၼ်ႉႁဵတ်းၼၼ်ႉဢေႃႈ။

10ပိူဝ်ႈၼႆလႄႈ ထႃႇဝရႃႉၽြႃးဢဝ်ၶႃႈမၼ်းၸဝ်ႈ ပရေႃးၽႅတ်ႈတင်းလၢႆ မီးဢမိင်ႉလႄႈဝႃႈၸမ်ႉ၊-

11ၵွပ်ႈပိူဝ်ႈဢၼ် မၼႃႇသေႇ ၶုၼ်ႁေႃၶမ်း ယူႉတႃႉ ႁဵတ်းလွင်ႈတၢင်းဢၼ်လီႁင်ႈဢဵတ်ႇသဵတ်ႇၸိူဝ်းၼၼ်ႉလႄႈ ႁဵတ်းတူႉၸရိူၵ်ႈလိူဝ်တွၼ်းၼႃႇသေ ၵႃႈဢၼ်ၵူၼ်း ဢႃႇမေႃးရီႉ ဢၼ်ပဵၼ်ၵႂႃႇယဝ်ႉ မိူဝ်ႈဢွၼ်တၢင်းမၼ်းၼၼ်ႉၸိူဝ်းၼၼ်ႉ ဢိၵ်ႇတင်းၵွပ်ႈပိူဝ်ႈဢၼ်မၼ်းဢဝ်ရုၵ်ႈထူႉသၢင်းထူႉမၼ်း ႁႂ်ႈၵူၼ်း ယူႉတႃႉ တင်းလၢႆၽိတ်းပိူင်ႈၼၼ်ႉလႄႈ၊-

12ထႃႇဝရႃႉၽြႃး ၽြႃးပဵၼ်ၸဝ်ႈ မဵဝ်း ဢီႉသရေႇလႃႉ မီးဢမိင်ႉလႄႈဝႃႈ၊ ၵဝ်ၼႆႉတၵ်းႁႂ်ႈၽေးႁွတ်ႈထိုင်ၵႃႈၼိူဝ်ဝဵင်း ယေႇရူႉသလႅမ်ႇ တင်းမိူင်း ယူႉတႃႉ ႁႂ်ႈႁူၶဝ်ၸိူဝ်းဢၼ်လႆႈငိၼ်းလွင်ႈမၼ်းၼၼ်ႉ တင်းသွင်ၽၢႆႇထၼ်ႈပေႃးၶူမ်းဢေႃႈ။-

13ၵဝ်တၵ်းဢဝ်မႆမီႈ သမႃႇရီႉ ဢိၵ်ႇတင်းၸိူၵ်ႈၵၢင်းမႅဝ်းမဵဝ်းၸိူဝ်ႉၶိူဝ်း ဢႃႇႁပ်ႉ ၶဵင်ႈၵႃႈၼိူဝ်ဝဵင်း ယေႇရူႉသလႅမ်ႇ ဢေႃႈ။ ၵဝ်တၵ်းႁဵတ်းတီႈဝဵင်း ယေႇရူႉသလႅမ်ႇ မိူၼ်ၸိူဝ်ႉၼင်ႇဢၼ်ၵူၼ်းၸဵတ်ႉဝၢၼ်ႇလၢင်ႉဝၢၼ်ႇလႄႈ ၸဵတ်ႉလၢင်ႉသေယဝ်ႉ၊ ဢဝ်ၶႂမ်ႈဝႆႉၼၼ်ႉဢေႃႈ။-

14ၵဝ်တၵ်းၸုၼ်ႉပႅတ်ႈဢမူၺ်ႇၵဝ် ဢၼ်ယင်းၵိုတ်းယင်းၵျၢၼ်ႇၼၼ်ႉလႄႈ ဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းရၢၼ်ႇသူႇၶဝ်သေယဝ်ႉ၊ ၶဝ်ၼၼ်ႉတၵ်းပဵၼ်တီႈဢၼ်ရၢၼ်ႇသူႇၶဝ်တင်းသဵင်ႈတင်းလူင် ႁိမ်ဢဝ်ၼိၵ်ႈၸၢၵ်ႈငႅၼ်းသႄးဢေႃႈ။-

15လွင်ႈမၼ်းၸမ်ႉ ၶဝ်သိုပ်ႇသိုပ်ႇတၢမ်းတၢမ်း ဢွၼ်ၵၼ်ႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃၵဝ်လႄႈ တိုၵ်းယူင်းတၢင်းၸႂ်မႆႈၶႆႈၸႃႉၵဝ် ၸႃႉၸဵမ်မိုဝ်ႉဝၼ်းဢၼ်ပူႇၶဝ်မွၼ်ႇၶဝ်ဢွၵ်ႇသေၵႃႈၼႂ်းမိူင်း ဢေႇၵိပ်ႉတူႉ မႃးၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉယဝ်ႉ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။

16မၼႃႇသေႇ ၼၼ်ႉ၊ ၼွၵ်ႈသေဢပႅတ်ႈဢၼ်မၼ်းႁဵတ်းတူႉၸရိူၵ်ႈ သိုဝ်ႈၼႃႈတႂ်ႈတႃထႃႇဝရႃႉၽြႃးလႄႈႁႂ်ႈမဵဝ်း ယူႉတႃႉ ၽိတ်းပိူင်ႈၼၼ်ႉ၊ မၼ်းထွၵ်ႇလိူတ်ႈၶဝ်ၸိူဝ်းဢၼ်ဢမ်ႇမီးဢပႅတ်ႈၼၼ်ႉပႅတ်ႈၼမ်ၼႃႇထၼ်ႈပေႃး ႁႂ်ႈဝဵင်း ယေႇရူႉသလႅမ်ႇ တဵမ်ဝႆႉတင်းလိူတ်ႈ ဢဝ်ၵႃႈတီႈၸႃႉၸဵမ်ၽၢႆႇၼိုင်ႈ တေႃႇထိုင်ႁွတ်ႈၽၢႆႇၼိုင်ႈဢေႃႈ။-

17လွင်ႈတၢင်း မၼႃႇသေႇ ဢၼ်ယင်းၵိုတ်းယင်းၵျၢၼ်ႇ၊ လွင်ႈတၢင်းဢၼ်မၼ်းႁဵတ်း ဢိၵ်ႇတင်းဢပႅတ်ႈဢၼ်မၼ်းၽိတ်းပိူင်ႈၼၼ်ႉၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ ဢေႃႈ။-

18မၼႃႇသေႇ ၼၼ်ႉၼွၼ်းလပ်းလူၺ်ႈၵၼ်တင်းပူႇမွၼ်ႇမၼ်းတင်းလၢႆလႄႈ ၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းသူၼ်ဢူးယဵၼ်ႇ ဢၼ်ၸၢပ်ႈသႅင်ႇၵၼ်တင်းႁေႃမၼ်း ဢၼ်ဝႃႈသူၼ်ဢူးယဵၼ်ႇ ဢေႃႇၸႃႉ ၼၼ်ႉဢေႃႈ။ ဢႃႇမုၼ်ႇ လုၵ်ႈၸၢႆးၸဝ်ႈၼၼ်ႉ ၼင်ႈႁၢင်ႈၼင်ႈႁေႃ တၢင်တူဝ်ၸဝ်ႈပေႃႈမၼ်းဢေႃႈ။

19ဢႃႇမုၼ်ႇ ၼၼ်ႉ မိူဝ်ႈဢၼ်ၸႃႉၼင်ႈႁၢင်ႈၼင်ႈႁေႃၼၼ်ႉၸိုင်ဢသၢၵ်ႈမၼ်းလႆႈသၢဝ်းပၢႆသွင်ပီႊလႄႈ၊ မၼ်းဢုပ်ႉပိူင်ႇၸၢမ်ႇၸႃး ယူႇၵႃႈၼႂ်းဝဵင်း ယေႇရူႉသလႅမ်ႇ သွင်ပီႊဢေႃႈ၊ ၸိုဝ်ႈသဵင်မႄႈၸဝ်ႈၸမ်ႉ၊ ပဵၼ် မေႇသူႉလမိတ်ႉ လုၵ်ႈယိင်း ႁႃႇရုတ်ႉ ၵူၼ်းယိင်း ဝဵင်း ယုတ်ႉပႃႇ ဢေႃႈ။-

20မၼ်းႁဵတ်းတူႉၸရိူၵ်ႈသိုဝ်ႈၼႃႈတႂ်ႈတႃ ထႃႇဝရႃႉၽြႃးမိူၼ်ၸိူဝ်ႉၼင်ႇဢၼ်ၸဝ်ႈပေႃႈမၼ်း မၼႃႇသေႇ ႁဵတ်းၼၼ်ႉဢေႃႈ။-

21မၼ်းၸွမ်းသဵၼ်ႈတၢင်းၵႃႈဢၼ်ၸဝ်ႈပေႃႈမၼ်းၸွမ်းၼၼ်ႉလႄႈ ႁဵတ်းဝၢတ်ႈတီႈရုၵ်ႈထူႉသၢင်းထူႉ ဢၼ်ၸဝ်ႈပေႃႈမၼ်းႁဵတ်းဝၢတ်ႈၼၼ်ႉလႄႈၵူဝ်းၵႂၢႆႇဢေႃႈ။-

22မၼ်းၸုၼ်ႉပႅတ်ႈထႃႇဝရႃႉၽြႃး ၽြႃးပဵၼ်ၸဝ်ႈပူႇမၼ်းမွၼ်ႇမၼ်းၼၼ်ႉသေလႄႈ ယင်းဢမ်ႇၸွမ်းသဵၼ်ႈတၢင်းထႃႇဝရႃႉၽြႃး လႄႈယူႇဢေႃႈ။

23ၶႃႈၵူၼ်း ဢႃႇမုၼ်ႇ တင်းလၢႆ ဢွၼ်ၵၼ်လွမ်ႁဵတ်းမုၵ်ႉႁဵတ်းၸိူဝ်းသေလႄႈ ဢဝ်ၶုၼ်ႁေႃၶမ်းတၢႆၵႃႈၼႂ်းႁေႃမၼ်းဢေႃႈ။-

24ၵူၼ်းဝၢၼ်ႈၵူၼ်းမိူင်းတင်းလၢႆ ဢွၼ်ၵၼ်ၶႃႈၽၼ်းၶဝ်ၸိူဝ်းဢၼ်လွမ်ႁဵတ်းမုၵ်ႉႁဵတ်းၸိူဝ်းယူႇၽၢႆႇၼိုင်ႈ တင်းၶုၼ်လူင် ဢႃႇမုၼ်ႇ ၼၼ်ႉၸိူဝ်းၼၼ်ႉလႄႈ၊ ၵူၼ်းဝၢၼ်ႈၵူၼ်းမိူင်းၸိူဝ်းၼၼ်ႉ ဢဝ် ယူဝ်းသီႉယႃႉ လုၵ်ႈၸၢႆးၸဝ်ႈၼင်ႈႁၢင်ႈၼင်ႈႁေႃ တၢင်တူဝ်ၸဝ်ႈပေႃႈမၼ်းဢေႃႈ။-

25လွင်ႈတၢင်းဢၼ် ဢႃႇမုၼ်ႇ ႁဵတ်းဢၼ်ယင်းၵိုတ်းယင်းၵျၢၼ်ႇၸိူဝ်းၼၼ်ႉၸိုင် တႅမ်ႈဝႆႉမီးယူႇၵႃႈၼႂ်းရႃႇၸဝၢင်ႇ ယူႉတႃႉ ဢေႃႈ။-

26မၼ်းၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းၶုမ်ႁူးသၢင်းၶႅင်းမၼ်းၵႃႈၼႂ်းသူၼ်ဢူးယဵၼ်ႇ ဢေႃႇၸႃႉ လႄႈ၊ ယူဝ်းသီႉယႃႉ လုၵ်ႈၸၢႆးၸဝ်ႈ ၼင်ႈႁၢင်ႈၼင်ႈႁေႃတၢင်တူဝ်ၸဝ်ႈပေႃႈမၼ်းဢေႃႈ။

← Chapter 20 Jump to: Chapter 22 →