2 Samuel 11

Shan

← Chapter 10 Jump to: Chapter 12 →

1မိူဝ်ႈဢၼ်ၶွပ်ႈၶူပ်ႇၶွပ်ႈပီႊလႄႈ ႁွတ်ႈထိုင်ၶိင်ႇဢၼ်ၶုၼ်ႁေႃၶမ်းတင်းလၢႆ ယၢမ်ႈတိုၵ်းသိုၵ်းၵၼ်ၼၼ်ႉၸိုင်၊ တႃႇဝိတ်ႈ ပွႆႇၸႂ်ႉ ယႂႃႇၽႃႉ ဢိၵ်ႇတင်းၶႃႈမၼ်းၵူၼ်းမၼ်း တင်းၵူၼ်းမဵဝ်း ဢီႉသရေႇလႃႉ ၵႃႈမီးၵႂႃႇလႄႈ ၶဝ်ၼၼ်ႉဢွၼ်ၵၼ်တိုၵ်းတေႃးယႃႉပႅတ်ႈၵူၼ်းမဵဝ်း ဢမ်ႇမုၼ်ႇ လႄႈ လွမ်ႉႁွပ်ႈဝဵင်း ရပ်ႉပႃႇ ဝႆႉဢေႃႈ။ တူဝ် တႃႇဝိတ်ႈ ၸမ်ႉ၊ ယူႇၵႃႈတီႈဝဵင်း ယေႇရူႉသလႅမ်ႇ ဢေႃႈ။-

2လိုၼ်းၼၼ်ႉ ဝၼ်းၼိုင်ႈၶိင်ႇႁူဝ်ၶမ်ႈ တႃႇဝိတ်ႈ လုၵ်ႉသေၵႃႈတီႈၵူႇတီႈၼွၼ်းမၼ်းလႄႈ ၼႂ်းမိူဝ်ႈဢၼ်မၼ်းယင်းတိုၵ်ႉၽၢႆႈသၢင်းၵျၢၼ်ႇယူႇၵႃႈၼိူဝ်မုင်းႁိူၼ်းယူႇၼၼ်ႉၸိုင်၊ မၼ်းယူႇၵႃႈၼိူဝ်မုင်းႁိူၼ်းၼၼ်ႉ ႁၼ်မႄႈယိင်းၵေႃႉၼိုင်ႈ ဢၢပ်ႇၼမ်ႉယူႇဢေႃႈ။ မႄႈယိင်းၼၼ်ႉ ပဵၼ်ဢၼ်ႁၢင်ႈလီ ထုၵ်ႇၼႃႈထုၵ်ႇတႃၼႃႇလူင်လၢင်ဢေႃႈ။-

3တႃႇဝိတ်ႈ ပွႆႇၸႂ်ႉၵႂႃႇထၢမ်လွင်ႈမႄႈယိင်းၼၼ်ႉလႄႈ၊ ၵေႃႉၼိုင်ႈလၢတ်ႈလႄႈဝႃႈ၊ ပဵၼ် ပႃႇသသေးၽႃႉ မေး ဢူႉရီႉယႃႉ ၵူၼ်း ႁိတ်ႉတီႉ ၊ လုၵ်ႈယိင်း ဢေးလျမ်ႇ ဢေႃႈ၊ ဝႃႈၼင်ႇၼႆဢေႃႈ။-

4လႆႈသမ်ႉ တႃႇဝိတ်ႈ ပွႆႇၸႂ်ႉၵူၼ်းလႄႈ ႁွင်ႉဢဝ်မႄႈယိင်းၼၼ်ႉမႃးတီႈမၼ်းသေယဝ်ႉ၊ မႄႈယိင်းၼၼ်ႉၵေႃႈ ၶဝ်ႈၸူးတီႈမၼ်းလႄႈ မၼ်းၼွၼ်းလူၺ်ႈၵၼ်တင်းမၼ်းၼၼ်ႉဢေႃႈ။ မႄႈယိင်းၼၼ်ႉ ႁဵတ်းႁႂ်ႈဢၼ်ဝူၺ်ႇဢၼ်ႁင်ႈမၼ်းမူတ်းသႂ်သေယဝ်ႉ၊ ၶိုၼ်းမိူဝ်းၵႂႃႇၵႃႈတီႈႁိူၼ်းမၼ်းသေဢေႃႈ။-

5မႄႈယိင်းၼၼ်ႉ ပႃးပတိၵ်ႉသၼ်ႇထေႇလႄႈ ပွႆႇၸႂ်ႉမႃးလႄႈလဝ်ႊလၢတ်ႈတီႈ တႃႇဝိတ်ႈ လႄႈဝႃႈ၊ ၶိင်းပဵၼ်ၶႃႈၼႆႉ ၸပ်းပတိၵ်ႉသၼ်ႇထေႇယဝ်ႉတီႈၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

6တႃႇဝိတ်ႈ ပွႆႇၸႂ်ႉၵႂႃႇတီႈ ယႂႃႇၽႃႉ လႄႈ သင်ႇလၢတ်ႈလႄႈဝႃႈ၊ ပွႆႇၸႂ်ႉ ဢူႉရီႉယႃႉ ၵူၼ်း ႁိတ်ႉတီႉ ၼၼ်ႉမႃးတီႈၵဝ်တႃႉ၊ ဝႃႈၼင်ႇၼႆသေယဝ်ႉ၊-

7ယႂႃႇၽႃႉ ပွႆႇၸႂ်ႉ ဢူႉရီႉယႃႉ မႃးတီႈ တႃႇဝိတ်ႈ လႄႈ မိူဝ်ႈဢၼ် ဢူႉရီႉယႃႉ ႁွတ်ႈမႃးၼၼ်ႉၸိုင်၊ တႃႇဝိတ်ႈ တွင်ႈထၢမ်လူၺ်ႈလွင်ႈဢၼ် ယႂႃႇၽႃႉ ယူႇလီၵိၼ်ဝၢၼ်ယူႇႁိုဝ်။ ၵူၼ်းတင်းလၢႆယူႇလီၵိၼ်ဝၢၼ်ယူႇႁိုဝ်။ တိုၵ်းသိုၵ်းလႄႈပႄႉၼႅင်ႇႁိုဝ် ၼၼ်ႉသေယဝ်ႉ၊-

8တႃႇဝိတ်ႈ မီးဢမိင်ႉတီႈ ဢူႉရီႉယႃႉ လႄႈဝႃႈ၊ လူင်းမိူဝ်းၸူးၵႃႈတီႈႁိူၼ်းမႂ်းလႄႈ သုၵ်ႈတိၼ်မႂ်းတႃႉ၊ ဝႃႈၼင်ႇၼႆလႄႈ၊ ဢူႉရီႉယႃႉ ဢွၵ်ႇသေၵႃႈၼႂ်းႁေႃၸဝ်ႈၵႂႃႇသေယဝ်ႉ၊ ၶုၼ်ႁေႃၶမ်းဢဝ်တၢင်းၵိၼ်တၢင်းၶူပ်းပၼ်ၵႂႃႇၸွမ်းလင်မၼ်းဢေႃႈ။-

9ၵူၺ်းၵႃႈ ဢူႉရီႉယႃႉ ယင်းဢမ်ႇၵႂႃႇၵႃႈတီႈႁိူၼ်းမၼ်းလႄႈ ၼွၼ်းယူႇၵႃႈတီႈႁူးၽၵ်းတူႁေႃၸဝ်ႈ လူၺ်ႈၵၼ်တင်းၶႃႈၵူၼ်းၸဝ်ႈမၼ်း ၵႃႈမီးၸိူဝ်းၼၼ်ႉဢေႃႈ။-

10မိူဝ်ႈဢၼ်ပိူၼ်ႈလဝ်ႊလၢတ်ႈလွင်ႈဢၼ် ဢူႉရီႉယႃႉ ဢမ်ႇလူင်းမိူဝ်းၵႂႃႇၸူးၵႃႈတီႈႁိူၼ်းမၼ်းၼၼ်ႉတီႈ တႃႇဝိတ်ႈ ၼၼ်ႉၸိုင် တႃႇဝိတ်ႈ တွင်ႈထၢမ်တီႈ ဢူႉရီႉယႃႉ လႄႈဝႃႈ၊ မႂ်းလုၵ်ႉသေၵႃႈတီႈဢၼ်ၵႂႃႇတၢင်းပႆတၢင်းၼၼ်ႉ ႁွတ်ႈမႃးဢမ်ႇၸႂ်ႈႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းယင်းဢမ်ႇလူင်းၵႂႃႇၸူးၵႃႈတီႈႁိူၼ်းမႂ်းလႄႈယူႇၼင်ႇႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

11ဢူႉရီႉယႃႉ ၶိုၼ်းလဝ်ႊလၢတ်ႈတီႈ တႃႇဝိတ်ႈ လႄႈဝႃႈ၊ တိူၵ်ႈတႃႇၸဝ်ႈ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းၵူၼ်းမဵဝ်း ယူႉတႃႉ တင်းလၢႆ လႆႈယူႇၵႃႈၼႂ်းသုမ်ႉၼႂ်းထဵင်တီႈၶႃႈဢေႃႈ။ ၸဝ်ႈ ယႂႃႇၽႃႉ ဢိၵ်ႇတင်းၶႃႈၸဝ်ႈႁဝ်းၸိူဝ်းၼၼ်ႉ လႆႈယူႇလႆႈသဝ်းၵႃႈတီႈၼွၵ်ႈတီႈပၢင်ႇတီႈၶႃႈဢေႃႈ။ ၶႃႈၸဝ်ႈၼႆႉတၵ်းထုၵ်ႇလီမိူဝ်းၵႂႃႇၸူးၵႃႈတီႈႁိူၼ်းလႄႈ ၵိၼ်ၶူပ်းယူႇ၊ မူၼ်ႈပျေႃႇလူၺ်ႈၵၼ်တင်းမေးယူႇတီႈၶႃႈႁိုဝ်။ ၵႃႈၼင်ႇဢၼ်ၸဝ်ႈႁဝ်းဢသၢၵ်ႈလိပ်းယူႇၼၼ်ႉ၊ ၵႃႈၼင်ႇဢၼ်ႁူဝ်ၸႂ်ၸဝ်ႈႁဝ်း ဢသၢၵ်ႈလိပ်းယူႇၼၼ်ႉ၊ ၶႃႈၸဝ်ႈဢမ်ႇႁဵတ်းၸိူဝ်ႉၼင်ႇၼၼ်တီႈၶႃႈ၊ ဝႃႈၼင်ႇၼႆဢေႃႈ။-

12တႃႇဝိတ်ႈ ၵေႃႈမီးဢမိင်ႉတီႈ ဢူႉရီႉယႃႉ လႄႈဝႃႈ၊ ၶမ်ႈၼႆႉယူႇၵႃႈတီႈဝဵင်းၼႆႉလူးၵွၼ်ႇတႃႉ။ ဝၼ်းမိူဝ်ႈၽုၵ်ႈၵဝ်တၵ်းပွႆႇမႂ်းၵႂႃႇဢေႃႈ၊ ဝႃႈၼင်ႇၼႆလႄႈ၊ ဝၼ်းၼၼ်ႉ ဢိၵ်ႇတင်းဝၼ်းမိူဝ်ႈၽုၵ်ႈၼၼ်ႉ ဢူႉရီႉယႃႉ ယူႇၵႃႈတီႈဝဵင်း ယေႇရူႉသလႅမ်ႇ ဢေႃႈ။-

13တႃႇဝိတ်ႈ ၵေႃႈ ႁွင်ႉဢဝ်မၼ်းလႄႈ မၼ်းလႆႈၵိၼ်လႆႈၶူပ်းၵႃႈတီႈၽၢႆႇၼႃႈၸဝ်ႈယူႇသေလႄႈ လႆႈၵိၼ်လႆႈသူတ်ႉ တေႃႇထိုင်ႁွတ်ႈထၼ်ႈပေႃးမဝ်းလဝ်ႈမဝ်းၵမ်ဢေႃႈ။ ၵူၺ်းၵႃႈ ၶိင်ႇႁူဝ်ၶမ်ႈၼၼ်ႉ၊ မၼ်းယင်းဢမ်ႇလူင်းၵႂႃႇၸူးၵႃႈတီႈႁိူၼ်းမၼ်းလႄႈ ဢွၵ်ႇၵႂႃႇႁႂ်ႈလႆႈၼွၼ်းၵႃႈတီႈၵူႇတီႈၼွၼ်းလူၺ်ႈၵၼ်တင်းၶႃႈၵူၼ်းၸဝ်ႈမၼ်းၸိူဝ်းၼၼ်ႉဢေႃႈ။

14ၶိင်ႇၵၢင်ၼႂ်၊ တႃႇဝိတ်ႈ တႅမ်ႈလိၵ်ႈသေလႄႈ ဢၢပ်ႈၵႃႈၼႂ်းမိုဝ်း ဢူႉရီႉယႃႉ ပၼ်ၵႂႃႇၵႃႈတီႈ ယႂႃႇၽႃႉ ဢေႃႈ။-

15ၵႂၢမ်းဢၼ်ပႃးၵႃႈၼႂ်းလိၵ်ႈၼၼ်ႉဝႃႈၸမ်ႉ၊ ၶၢၼ်း ဢူႉရီႉယႃႉ ဝႆႉၵႃႈတီႈတပ်ႉဢွၼ်တၢင်းသုတ်း တီႈဢၼ်တိုၵ်းသိုၵ်းမႆႈႁွၼ်ႉၼႃႇၼၼ်ႉသေလႄႈ ၵူႈသိမ်းဢဝ်တပ်ႉသေၵႃႈတီႈမၼ်း ႁႂ်ႈမၼ်းလႆႈၶၢမ်ႇတၢင်းဢၼ်တိူဝ်ႉဢၼ်မၢတ်ႇလႄႈတၢႆတႃႉ၊ ဝႃႈၼင်ႇၼႆဢေႃႈ။-

16ၼင်ႇၼၼ်လႄႈ ယႂႃႇၽႃႉ လွမ်ႉဝဵင်းၼၼ်ႉဝႆႉသေလႄႈ ၶၢၼ်း ဢူႉရီႉယႃႉ ဝႆႉၵႃႈတီႈ ဢၼ်မၼ်းႁူႉလွင်ႈဢၼ်ႁူဝ်ႁၢၼ်ၵူၼ်းသိုၵ်း ဢၼ်ႁႅင်းယႂ်ႇၼႃႇတၵ်းမီးၼၼ်ႉဢေႃႈ။-

17မိူဝ်ႈဢၼ်ၵူၼ်းဝဵင်းၸိူဝ်းၼၼ်ႉ ဢွၵ်ႇလႄႈၶဵင်ႇသိုၵ်းၵၼ်တင်း ယႂႃႇၽႃႉ ၼၼ်ႉၸိုင်၊ ၵူၼ်းတင်းလၢႆ ဢၼ်ဝႃႈၶႃႈၵူၼ်း တႃႇဝိတ်ႈ ၵမ်ႈၽွင်ႈတၢႆဢေႃႈ။ ဢူႉရီႉယႃႉ ၵူၼ်း ႁိတ်ႉတီႉ ၼၼ်ႉၵေႃႈတၢႆဢေႃႈ။-

18လိုၼ်းၼၼ်ႉ ယႂႃႇၽႃႉ ပွႆႇၸႂ်ႉလႄႈ လဝ်ႊလၢတ်ႈလွင်ႈၵႃႈဢၼ်ၶဝ်လႆႈတိုၵ်းလႆႈတေႃးၼၼ်ႉတီႈ တႃႇဝိတ်ႈ လႄႈ၊-

19သင်ႇလၢတ်ႈတီႈၵူၼ်းၸႂ်ႉၵူၼ်းသွႆလႄႈဝႃႈ၊ မႂ်းလဝ်ႊလၢတ်ႈလွင်ႈၵႃႈဢၼ်လႆႈတိုၵ်းလႆႈတေႃးၼၼ်ႉ တီႈၶုၼ်ႁေႃၶမ်းယဝ်ႉတူဝ်ႈယဝ်ႉလႄႈ၊-

20ပေႃးၶုၼ်ႁေႃၶမ်းၸႂ်မႆႈၶႆႈၸႃႉလႄႈထၢမ်ဝႃႈ၊ မိူဝ်ႈဢၼ်သူတိုၵ်းတေႃးၼၼ်ႉၸိုင်၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူသုတ်ႉၸပ်းသုတ်ႉၸူးၵႃႈတီႈႁိမ်းဝဵင်းၼင်ႇႁိုဝ်။ သူဢမ်ႇႁူႉလွင်ႈဢၼ် ၶဝ်တၵ်းယိုဝ်းတူၵ်းထိမ်ႈတူၵ်းသေၵႃႈၼိူဝ်လမ်းဝဵင်းၼၼ်ႉႁိုဝ်။-

21ၽူႈလႂ်တိူဝ်ႉထုၵ်ႇသႂ်ႇ ဢၽီႉမလႅၵ်ႉ လုၵ်ႈၸၢႆး ယေႇရုပ်ႉပေႇသႅတ်ႉ ၼၼ်ႉ။ မႄႈယိင်းၵေႃႉၼိုင်ႈ ဢဝ်မၢၵ်ႇႁိၼ်လူၺ်ၽၢၵ်ႇၼိုင်ႈ ထိမ်ႈတူၵ်းသေၵႃႈၼိူဝ်လမ်းဝဵင်းလႄႈ တိူဝ်ႉထုၵ်ႇသႂ်ႇမၼ်း ႁႂ်ႈမၼ်းထၼ်ႈပေႃးတၢႆ ၵႃႈတီႈဝဵင်း သေႇပႅတ်ႉ ၼၼ်ႉဢမ်ႇၸႂ်ႈႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူသုတ်ႉၸပ်းသုတ်ႉၸူးၵႃႈတီႈႁိမ်းလမ်းဝဵင်းၼင်ႇႁိုဝ်၊ ဝႃႈၼင်ႇၼႆၸိုင်၊ မႂ်းလဝ်ႊလၢတ်ႈလႄႈဝႃႈ၊ ၶႃႈၸဝ်ႈႁဝ်း ဢူႉရီႉယႃႉ ၵူၼ်း ႁိတ်ႉတီႉ ၼၼ်ႉ တၢႆယဝ်ႉတီႈၶႃႈယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

22ၼင်ႇၼၼ်လႄႈ တမၢၼ်ႇၼၼ်ႉၵႂႃႇလႄႈႁွတ်ႈထိုင်သေယဝ်ႉ၊ လဝ်ႊလၢတ်ႈတီႈ တႃႇဝိတ်ႈ ၸွမ်းၵႃႈၼင်ႇဢၼ် ယႂႃႇၽႃႉ သင်ႇလၢတ်ႈဝႆႉတင်းသဵင်ႈတင်းလူင်ၼၼ်ႉဢေႃႈ။-

23တမၢၼ်ႇၼၼ်ႉလဝ်ႊလၢတ်ႈတီႈ တႃႇဝိတ်ႈ လႄႈဝႃႈၸမ်ႉ၊ ရၢၼ်ႇသူႇၸိူဝ်းၼၼ်ႉပႄႉၼႅင်ႇၶႃႈၸဝ်ႈႁဝ်းၶဝ်သေလႄႈ ယဵပ်ႇၸွမ်းၶႃႈၸဝ်ႈႁဝ်းၶဝ် တေႃႇထိုင်ႁွတ်ႈတီႈပၢင်ႇတီႈပဵင်းသေယဝ်ႉ၊ ၶႃႈၸဝ်ႈႁဝ်းၶဝ်လမ်းတိုၵ်းတေႃးယဵပ်ႇၸွမ်းၶဝ်တေႃႇထိုင်ႁွတ်ႈႁူးၽၵ်းတူဝဵင်းတီႈၶႃႈဢေႃႈ။-

24ၸဝ်ႈၵၢင်ႇၸဝ်ႈၵူင် ယူႇၵႃႈၼိူဝ်လမ်းဝဵင်း ယိုဝ်းၶႃႈၸဝ်ႈႁဝ်းၶဝ်လႄႈ ၶႃႈၸဝ်ႈႁဝ်းၶဝ်ၵမ်ႈၽွင်ႈတၢႆတီႈၶႃႈဢေႃႈ။ ၶႃႈၸဝ်ႈႁဝ်း ဢူႉရီႉယႃႉ ၵူၼ်း ႁိတ်ႉတီႉ ၼၼ်ႉၵေႃႈ တၢႆယဝ်ႉတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

25တႃႇဝိတ်ႈ ၵေႃႈသင်ႇလၢတ်ႈတီႈတမၢၼ်ႇၼၼ်ႉလႄႈဝႃႈၸမ်ႉ၊ မႂ်းလၢတ်ႈတီႈ ယႂႃႇၽႃႉ လႄႈဝႃႈ၊ ယႃႇပေၸႂ်လူႉၵွပ်ႈပိူဝ်ႈဢမူႉၼႆႉ။ လၢပ်ႇလႅဝ်းၸၢင်ႈၵိၼ်ၸၢင်ႈၶူပ်းပဵၼ်လႄႉပဵၼ်ၵမ်းဢေႃႈ။ ဢဝ်ႁႅင်းလႄႈတိုၵ်းတေႃး ဝဵင်းမႆႈမႆႈႁွၼ်ႉႁွၼ်ႉသေလႄႈ ယႃႉပႅတ်ႈတႃႉ၊ ဝႃႈၼင်ႇၼႆလႄႈ ပၼ်ႁႅင်းတီႈမၼ်းတႃႉ၊ ဝႃႈၼင်ႇၼႆဢေႃႈ။

26မိူဝ်ႈဢၼ်မေး ဢူႉရီႉယႃႉ ၼၼ်ႉ ငိၼ်းလွင်ႈဢၼ်ၽူဝ်မၼ်း ဢူႉရီႉယႃႉ တၢႆယဝ်ႉၼၼ်ႉၸိုင်၊ မၼ်းႁႆႈႁွင်ႉပွင်ႉၶၢင်း ၵွပ်ႈပိူဝ်ႈၽူဝ်မၼ်းၼၼ်ႉလႄႈယူႇဢေႃႈ။-

27ပူၼ်ႉသေၶိင်ႇဢၼ်ႁႆႈႁွင်ႉပွင်ႉၶၢင်းၼၼ်ႉသေယဝ်ႉ၊ တႃႇဝိတ်ႈ ပွႆႇၸႂ်ႉလႄႈႁွင်ႉဢဝ်မႄႈယိင်းၼၼ်ႉ မႃးၵႃႈတီႈႁေႃၸဝ်ႈသေလႄႈ မၼ်းၼၼ်ႉလႆႈပဵၼ်ၼၢင်းႁေႃၶမ်းလႄႈ ၵိူတ်ႇလဵင်ႉလုၵ်ႈၸၢႆးမႃးဢေႃႈ။ ၵူၺ်းၵႃႈ လွင်ႈတၢင်းဢၼ် တႃႇဝိတ်ႈ ႁဵတ်းၼၼ်ႉ ပဵၼ်လွင်ႈတၢင်းဢၼ်ဢမ်ႇထုၵ်ႇၸႂ်ၵျိူၵ်ႈၸႂ်ထႃႇဝရႃႉၽြႃးၼၼ်ႉဢေႃႈ။

← Chapter 10 Jump to: Chapter 12 →