2 Samuel 16

Shan

← Chapter 15 Jump to: Chapter 17 →

1မိူဝ်ႈဢၼ် တႃႇဝိတ်ႈ ၼၼ်ႉပူၼ်ႉၸိၵ်းလွႆၵႂႃႇဢိတ်းၼိုင်ႈၼၼ်ႉၸိုင်၊ ၸီႉၽႃႉ ၶႃႈ မေႇၽီႉပေႃးသႅတ်ႉ ၼၼ်ႉ ပႃးဢဝ်လီႈဢၼ်တၢင်ႇၵွပ်းသွင်တူဝ်လႄႈ ဢဝ်ၶဝ်ႈမုၼ်းသွင်ပၢၵ်ႇႁူၺ်ႇ၊ ပုၵ်ႉမၢၵ်ႇၸပိတ်ႈဢၼ်ႁႅင်ႈပၢၵ်ႇၼိုင်ႈ၊ ၶႅပ်းမၢၵ်ႇလိူဝ်ႇသၢင်းၽေႃးပၢၵ်ႇၼိုင်ႈ၊ တဝ်ႈၼမ်ႉၸပိတ်ႈႁူၺ်ႇၼိုင်ႈ တၢင်ႇသႂ်ႇၵႃႈၼိူဝ်လီႈၸိူဝ်းၼၼ်ႉမႃး ႁႂ်ႈလႆႈႁပ်ႉႁူဝ်တၢင်းဢေႃႈ။-

2ၶုၼ်ႁေႃၶမ်းၵေႃႈထၢမ်တီႈ ၸီႉၽႃႉ လႄႈဝႃႈ၊ မႂ်းဢဝ်ၸိူဝ်းၼႆႉမႃး ႁႂ်ႈလႆႈႁဵတ်းၸိူဝ်ႉၼင်ႇႁိုဝ်။ ဝႃႈၼင်ႇၼႆသေယဝ်ႉ၊ ၸီႉၽႃႉ လဝ်ႊလၢတ်ႈလႄႈဝႃႈ၊ လီႈၸိူဝ်းၼႆႉပဵၼ်ပုၼ်ႈဢၼ် ၵူၼ်းႁၢင်ႈၵူၼ်းႁေႃၸဝ်ႈတၵ်းၶီႇ၊ ၶဝ်ႈမုၼ်းဢိၵ်ႇတင်းမၢၵ်ႇမႆႉၸိူဝ်းၼႆႉ ပဵၼ်ပုၼ်ႈဢၼ် ၵူၼ်းဢွၼ်ႇတင်းလၢႆတၵ်းၵိၼ်၊ ၼမ်ႉၸပိတ်ႈၵေႃႈပဵၼ်ပုၼ်ႈဢၼ် ၶဝ်ၸိူဝ်းဢၼ်ႁိူဝ်ႉဢူၼ်ႈၵႃႈတီႈထိူၼ်ႇၼၼ်ႉ တၵ်းၵိၼ်တီႈၶႃႈဢေႃႈ၊ ဝႃႈၼင်ႇၼႆဢေႃႈ။-

3ၶုၼ်ႁေႃၶမ်းၵေႃႈထၢမ်လႄႈဝႃႈ၊ လုၵ်ႈၸၢႆးၸဝ်ႈမႂ်းၼၼ်ႉမီးၵႃႈလႂ်၊ ဝႃႈၼင်ႇၼႆသေယဝ်ႉ၊ ၸီႉၽႃႉ လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ မၼ်းၵိုတ်းသဝ်းယူႇၵႃႈၼႂ်းဝဵင်း ယေႇရူႉသလႅမ်ႇ တီႈၶႃႈဢေႃႈ။ လွင်ႈမၼ်းၸမ်ႉ မၼ်းဝႃႈ၊ ဝၼ်းမိူဝ်ႈၼႆႉ မဵဝ်း ဢီႉသရေႇလႃႉ တၵ်းၶိုၼ်းပၼ် သိုင်ႇၸိုင်ႈဝၢၼ်ႈမိူင်းၸဝ်ႈပေႃႈၵဝ်တီႈၵဝ်ဢေႃႈ၊ ဝႃႈၼင်ႇၼႆတီႈၶႃႈယဝ်ႉ၊ ဝႃႈၼင်ႇၼႆလႄႈ၊-

4ၶုၼ်ႁေႃၶမ်းမီးဢမိင်ႉတီႈ ၸီႉၽႃႉ လႄႈဝႃႈ၊ ႁႂ်ႈဢုၵ်ႉၸႃႇၵႃႈဢၼ်ၸၢပ်ႈသႅင်ႇၵၼ်တင်း မေႇၽီႉပေႃးသႅတ်ႉ ၼၼ်ႉ ပဵၼ်ဢုၵ်ႉၸႃႇမႂ်းသေ၊ ဝႃႈၼင်ႇၼႆဢေႃႈ။ ၸီႉၽႃႉ ၵေႃႈ ၶိုၼ်းလဝ်ႊလၢတ်ႈလႄႈဝႃႈ၊ တၢင်ႇၼိူဝ်ႁူဝ်တီႈၶႃႈဢေႃႈ။ ၸဝ်ႈႁဝ်းၶႃႈ ၸဝ်ႈၶုၼ်လူင်တီႈၶႃႈ၊ ႁႂ်ႈၶႃႈၸဝ်ႈလႆႈထူပ်းၵျေးၸူး သိုဝ်ႈၼႃႈတႂ်ႈတႃၸဝ်ႈႁဝ်းသေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။

5မိူဝ်ႈဢၼ်ၶုၼ်လူင် တႃႇဝိတ်ႈ ႁွတ်ႈထိုင်ၵႃႈတီႈဝဵင်း ပႃႇႁူႉရိမ်း ၼၼ်ႉၸိုင်၊ ၵေႃႉဢၼ်လႆႈၸိုဝ်ႈ သီႉမီႉ ၊ လုၵ်ႈၸၢႆး ၵေးရႃႉ ဢၼ်ပဵၼ်ပီႈၼွင်ႉၸိူဝ်ႉၶိူဝ်း သေႃးလူႉ ၼၼ်ႉဢွၵ်ႇမႃးဢေႃႈ။ မၼ်းၼၼ်ႉဢွၵ်ႇမႃးလႄႈ ၵိၼ်ႇလႃႇၸွမ်းတၢင်းၵႂႃႇယူႇဢေႃႈ။-

6မၼ်းဢဝ်မၢၵ်ႇႁိၼ်ထိမ်ႈၶုၼ်လူင် တႃႇဝိတ်ႈ ဢိၵ်ႇတင်းၶႃႈၵူၼ်းၶုၼ်လူင် တႃႇဝိတ်ႈ ၵႃႈမီးၼၼ်ႉဢေႃႈ။ ၵူၼ်းတင်းသဵင်ႈတင်းလူင် ဢိၵ်ႇတင်းမူးမၢတ်ႈၽွင်းမိူင်းတင်းသဵင်ႈတင်းလူင်ၼၼ်ႉ ဢွၼ်ၵၼ်မီးယူႇၽၢႆႇၶႂႃၸဝ်ႈ၊ ၽၢႆႇသၢႆႉၸဝ်ႈဢေႃႈ။-

7သီႉမီႉ ၼၼ်ႉ ၵိၼ်ႇလႃႇလႄႈဝႃႈ၊ ၵႂႃႇႁႄ။ ၵႂႃႇႁႄ။ ၵူၼ်းဢႃႉထမ်ႇမႃႉ ဢၼ်ၸၢင်ႈထွၵ်ႇလိူတ်ႈၵူၼ်းၼႆႉဢိူၺ်း၊-

8ထႃႇဝရႃႉၽြႃးႁႂ်ႈဢပႅတ်ႈလိူတ်ႈပီႈၼွင်ႉၸိူဝ်ႉၶိူဝ်း သေႃးလူႉ ဢၼ်မႂ်းႁဵတ်းတၢင်တူဝ်မၼ်းသေလႄႈ ဢုပ်ႉပိူင်ႇၸၢမ်ႇၸႃးမိူင်းမၼ်းၼၼ်ႉတင်းသဵင်ႈတင်းမူတ်းၼၼ်ႉ တူၵ်းႁွတ်ႈၵႃႈၼိူဝ်ႁူဝ်မႂ်းလႄႈ ဢဝ်သိုင်ႇၸိုင်ႈဝၢၼ်ႈမိူင်း ဢၢပ်ႈပၼ်ၵႃႈၼႂ်းမိုဝ်းလုၵ်ႈၸၢႆးမႂ်း ဢပႃႉသလုမ်ႇ ၼၼ်ႉယဝ်ႉ။ တူၺ်းလူး ၵွပ်ႈပိူဝ်ႈဢၼ်မႂ်းပဵၼ်ၵေႃႉဢၼ် ၸၢင်ႈထွၵ်ႇလိူတ်ႈၵူၼ်းလႄႈ မႂ်းတူၵ်းႁွတ်ႈၵႃႈၼႂ်းဢမူႉဢၼ်ဢမ်ႇလီမႂ်းယဝ်ႉ၊ ဝႃႈၼင်ႇၼႆဢေႃႈ။-

9ဢၽီႉသေး လုၵ်ႈၸၢႆး ၸေႇရူႉယႃႇ ၵေႃႈ လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တူဝ်တၢႆမႃၼၼ်ႉ တၵ်းလႆႈၵိၼ်ႇလႃႇၸဝ်ႈၶုၼ်လူင်ၼင်ႇႁိုဝ်တီႈၶႃႈ၊ ႁႂ်ႈၶႃႈၸဝ်ႈလႆႈၵႂႃႇလႄႈတႅပ်းဢဝ်ႁူဝ်မၼ်းသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊-

10ၶုၼ်ႁေႃၶမ်းမီးဢမိင်ႉလႄႈဝႃႈ၊ လုၵ်ႈၸၢႆး ၸေႇရူႉယႃႇ ၶဝ်ဢိူၺ်း၊ သူၼႆႉၸၢပ်ႈသႅင်ႇၵၼ်တင်းၵဝ်ၸိူဝ်ႉၼင်ႇႁိုဝ်။ ႁႂ်ႈမၼ်းၵိၼ်ႇလႃႇသေၵမ်းလူၺ်ႈ။ ၵွပ်ႈပိူဝ်ႈဢၼ်ထႃႇဝရႃႉၽြႃး သင်ႇလၢတ်ႈတီႈမၼ်းလႄႈဝႃႈ၊ ၵိၼ်ႇလႃႇ တႃႇဝိတ်ႈ တႃႉ၊ ဝႃႈၼင်ႇၼႆဝႆႉယဝ်ႉလႄႈ၊ ၽူႈလႂ်တၵ်းလႆႈထၢမ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းႁဵတ်းၸိူဝ်ႉၼင်ႇၼႆၼင်ႇႁိုဝ်။ ဝႃႈၼင်ႇၼႆၼၼ်ႉ၊ ဝႃႈၼင်ႇၼႆဢေႃႈ။-

11တႃႇဝိတ်ႈ သမ်ႉမီးဢမိင်ႉတီႈ ဢၽီႉသေး ဢိၵ်ႇတင်းၶႃႈၵူၼ်းမၼ်းၵႃႈမီးၼၼ်ႉလႄႈဝႃႈ၊ တူၺ်းလူး၊ လုၵ်ႈၸၢႆးဢွၵ်ႇၵဝ်၊ ဢၼ်ဢွၵ်ႇမႃးၵႃႈၼႂ်းတူဝ်ၵဝ်ၼၼ်ႉ ယင်းႁႃဢသၢၵ်ႈၵဝ်ယူႇဢေႃႈ။ ၵူၼ်းမဵဝ်း ပိၼ်ႇယႃႇမိၼ်ႇ ၼၼ်ႉ ယဵင်ႈၶႅၼ်းတၵ်းမီးဢၶႂၢင်ႉလိူဝ်တွၼ်းၼႃႇသေၼၼ်ႉဢေႃႈ။ ယႃႇမၼ်းတႃႉ။ ႁႂ်ႈမၼ်းၵိၼ်ႇလႃႇသေၵမ်း။ ထႃႇဝရႃႉၽြႃးသင်ႇလၢတ်ႈတီႈမၼ်းဝႆႉယဝ်ႉ။-

12ထႃႇဝရႃႉၽြႃး လီလူတူၺ်းတုၵ်ႉၶႃႉတၢင်းၽၢၼ်ၵဝ် မၼ်းၸဝ်ႈတၵ်းလူတူၺ်းဢေႃႈ။ ၵွပ်ႈပိူဝ်ႈဢၼ်ၵေႃႉၼၼ်ႉၵိၼ်ႇလႃႇၵဝ်ဝၼ်းမိူဝ်ႈၼႆႉလႄႈ ထႃႇဝရႃႉၽြႃးလီၶိုၼ်းပၼ်ဢၵျူဝ်းဢၼ်လီမၼ်းၸဝ်ႈတၵ်းၶိုၼ်းပၼ်ဢေႃႈ၊ ဝႃႈၼင်ႇၼႆဢေႃႈ။-

13ၼင်ႇၼၼ်လႄႈၼႂ်းမိူဝ်ႈဢၼ် တႃႇဝိတ်ႈ ဢိၵ်ႇတင်းၵူၼ်းမၼ်းၵႃႈမီးၸိူဝ်းၼၼ်ႉ ယင်းတိုၵ်ႉၸွမ်းတၢင်းၵႂႃႇယူႇၼၼ်ႉၸိုင်၊ သီႉမီႉ တႆႇၸွမ်းၵႃႈတီႈပဵမ်ႉလွႆၽၢႆႇၼိုင်ႈတင်း တႃႇဝိတ်ႈ ၵႂႃႇလႄႈ ၵိၼ်ႇလႃႇၸွမ်းတၢင်းယူႇ၊ ဢဝ်တင်းမၢၵ်ႇႁိၼ်ထိမ်ႈယူႇသေလႄႈ ဢဝ်မုၼ်ႈလိၼ်ပိုၼ်ၸူးဢေႃႈ။-

14ၶုၼ်ႁေႃၶမ်းဢိၵ်ႇတင်း ၶဝ်ၸိူဝ်းဢၼ်ၸွမ်းၸဝ်ႈၵႃႈမီးၼၼ်ႉ ႁိူဝ်ႉဢူၼ်ႈယူႇသေလႄႈ ႁွတ်ႈထိုင်ၵႃႈတီႈဝဵင်း ဢႃယေႇၽိမ်ႇ လႄႈ ဢွၼ်ၵၼ်လိုဝ်ႈႁိူဝ်ႉလိုဝ်ႈၼူၼ်းယူႇဢေႃႈ။

15ဢပႃႉသလုမ်ႇ ဢိၵ်ႇတင်းၵူၼ်းမဵဝ်း ဢီႉသရေႇလႃႉ ၵႃႈမီးၸိူဝ်းၼၼ်ႉ ႁွတ်ႈထိုင်ၵႃႈတီႈဝဵင်း ယေႇရူႉသလႅမ်ႇ လႄႈ ဢႁီႉသေႃႇၽေးလႃႉ ၵေႃႈပႃးဢေႃႈ။-

16ႁူႉသေး ၵူၼ်း ဢႃႇၶီႉ ဢၼ်ပဵၼ်ၵေႃႉသေႈ တႃႇဝိတ်ႈ ၼၼ်ႉၵေႃႈ ႁွတ်ႈထိုင်ၵႃႈတီႈ ဢပႃႉသလုမ်ႇ သေယဝ်ႉ၊ ႁူႉသေး ၼၼ်ႉ ပၼ်တၢင်းလီတီႈ ဢပႃႉသလုမ်ႇ လႄႈဝႃႈ၊ ႁႂ်ႈၶုၼ်ႁေႃၶမ်းဢသၢၵ်ႈလိပ်းသေၵမ်းလူၺ်ႈ။ ႁႂ်ႈၶုၼ်ႁေႃၶမ်းဢသၢၵ်ႈလိပ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

17ဢပႃႉသလုမ်ႇ ၵေႃႈထၢမ်တီႈ ႁူႉသေး လႄႈဝႃႈ၊ ဢၼ်ၼႆႉပဵၼ်ၵျေးၸူးဢၼ်မႂ်းႁဵတ်းတီႈၵေႃႉသေႈမႂ်းၼၼ်ႉႁိုဝ်။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းဢမ်ႇၸွမ်းလူၺ်ႈၵၼ်တင်းၵေႃႉသေႈမႂ်းၼၼ်ႉၵႂႃႇၼင်ႇႁိုဝ်၊ ဝႃႈၼင်ႇၼႆသေယဝ်ႉ၊-

18ႁူႉသေး လဝ်ႊလၢတ်ႈတီႈ ဢပႃႉသလုမ်ႇ လႄႈဝႃႈ၊ ယႃႇပေမီးဢမိင်ႉၸိူဝ်ႉၼင်ႇၼၼ်သေၵမ်းတီႈၶႃႈ။ ၶႃႈၸဝ်ႈတၵ်းၶၢမ်ႇႁဵတ်းၶႃႈတီႈၵေႃႉဢၼ်ထႃႇဝရႃႉၽြႃး ဢိၵ်ႇတင်းၵူၼ်းတင်းလၢႆၼႆႉတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉ လိူၵ်ႈၵဵပ်းဢဝ်ၼၼ်ႉတီႈၶႃႈဢေႃႈ။ တၵ်းယူႇတီႈၵေႃႉၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

19မၼ်းၼၼ်ႉသမ်ႉၶိုၼ်းလဝ်ႊလၢတ်ႈထႅင်ႈလႄႈဝႃႈ၊ ၶႃႈၸဝ်ႈတၵ်းလႆႈၶၢမ်ႇႁဵတ်းၶႃႈတီႈၽူႈလႂ်တီႈၶႃႈ၊ လႆႈၶၢမ်ႇႁဵတ်းၶႃႈတီႈလုၵ်ႈၸၢႆးမၼ်းၸဝ်ႈ ဢမ်ႇၸႂ်ႈတီႈၶႃႈႁိုဝ်။ မိူၼ်ၸိူဝ်ႉၼင်ႇဢၼ်ၶႃႈၸဝ်ႈၶၢမ်ႇႁဵတ်းၶႃႈ တီႈၸဝ်ႈပေႃႈၸဝ်ႈႁဝ်းၼၼ်ႉ၊ တီႈၸဝ်ႈႁဝ်းၵေႃႈ ၶႃႈၸဝ်ႈတၵ်းၶၢမ်ႇႁဵတ်းၶႃႈတီႈၶႃႈဢေႃႈ၊ ဝႃႈၼင်ႇၼႆဢေႃႈ။

20မိူဝ်ႈၼၼ်ႉ ဢပႃႉသလုမ်ႇ လၢတ်ႈတီႈ ဢႁီႉသေႃႇၽေးလႃႉ လႄႈဝႃႈ၊ ပၼ်တၢင်းၵျၢမ်ႇတၢင်းပွင် လွင်ႈဢၼ်ႁဝ်းတၵ်းလႆႈႁဵတ်းၸိူဝ်ႉၼင်ႇႁိုဝ်ၼၼ်ႉသေၵမ်း၊ ဝႃႈၼင်ႇၼႆသေယဝ်ႉ၊-

21ဢႁီႉသေႃႇၽေးလႃႉ လဝ်ႊလၢတ်ႈတီႈ ဢပႃႉသလုမ်ႇ လႄႈဝႃႈ၊ ၶဝ်ႈၸူးၵႃႈတီႈၸိူင်ႉၼၢင်း ဢၼ်ၸဝ်ႈပေႃႈၸဝ်ႈႁဝ်းဝႆႉၵိုတ်းဝႆႉၵျၢၼ်ႇ ႁႂ်ႈလႆႈပႂ်ႉႁေႃၸဝ်ႈၸိူဝ်းၼၼ်ႉသေၵမ်းတီႈၶႃႈ။ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်တၵ်းငိၼ်းလွင်ႈဢၼ်ၸဝ်ႈပေႃႈၸဝ်ႈႁဝ်း လီႁင်ႈဢဵတ်ႇသဵတ်ႇၸဝ်ႈႁဝ်းၼၼ်ႉလႄႈ ႁႅင်းမိုဝ်းၶဝ်ၸိူဝ်းဢၼ်ယူႇၽၢႆႇၸဝ်ႈႁဝ်းၵႃႈမီးတၵ်းယႂ်ႇၼႃႇတီႈၶႃႈဢေႃႈ၊ ဝႃႈၼင်ႇၼႆလႄႈ၊-

22ၶဝ်ဢွၼ်ၵၼ်မုင်းမူဝ်းၵႃႇပုၼ်ႈ ဢပႃႉသလုမ်ႇ ၵႃႈၼိူဝ်ဢၼ်မုင်းႁေႃၶမ်းၼၼ်ႉလႄႈ ဢပႃႉသလုမ်ႇ ၶဝ်ႈၸူးၵႃႈတီႈၸိူင်ႉၼၢင်းၸဝ်ႈပေႃႈမၼ်းၸိူဝ်းၼၼ်ႉ ၵႃႈတီႈၽၢႆႇၼႃႈၵူၼ်းမဵဝ်း ဢီႉသရေႇလႃႉ ၵႃႈမီးၼၼ်ႉဢေႃႈ။-

23တၢင်းၵျၢမ်ႇတၢင်းပွင်ဢၼ် ဢႁီႉသေႃႇၽေးလႃႉ ပၼ်ၼႂ်းၸူဝ်ႈၼႂ်းပၢၼ်ၼၼ်ႉ ပဵၼ်ၸိူဝ်ႉၼင်ႇပျႃႇတိၵ်ႈ ဢၼ်လဝ်ႊထၢမ်တီႈၽြႃးပဵၼ်ၸဝ်ႈလႄႈလႆႈၶၢမ်ႇၼၼ်ႉဢေႃႈ။ တၢင်းၵျၢမ်ႇတၢင်းပွင် ဢၼ် ဢႁီႉသေႃႇၽေးလႃႉ ပၼ်ၵႃႈမီးၼၼ်ႉ ပဵၼ်ၸိူဝ်ႉၼင်ႇၼၼ်တီႈ တႃႇဝိတ်ႈ ဢိၵ်ႇတင်း ဢပႃႉသလုမ်ႇ ၼၼ်ႉဢေႃႈ။

← Chapter 15 Jump to: Chapter 17 →