2 Samuel 3

Shan

← Chapter 2 Jump to: Chapter 4 →

1မိူဝ်ႈၼၼ်ႉ ပဵၼ်သိုၵ်းပဵၼ်သိူဝ်ႁိုင်ၼႃႇလူင်လၢင် ၵႃႈတီႈၵႄႈဝူင်ႈၵၢင်ၸိူဝ်ႉၶိူဝ်း သေႃးလူႉ ဢိၵ်ႇတင်းၸိူဝ်ႉၶိူဝ်း တႃႇဝိတ်ႈ ၼၼ်ႉလႄႈ တႃႇဝိတ်ႈ ၸိုင်မီးတၢင်းဢၼ်ႁႅင်းယႂ်ႇမႃးယူႇ။ ၸိူဝ်ႉၶိူဝ်း သေႃးလူႉ ၸမ်ႉ၊ မီးတၢင်းဢၼ်ႁႅင်းဢူၼ်ႈႁႅင်းယွမ်းၵႂႃႇယူႇဢေႃႈ။

2လုၵ်ႈၸၢႆးဢၼ် တႃႇဝိတ်ႈ လႆႈၵႃႈတီႈဝဵင်း ႁေႇပြုၼ်ႇ ၼၼ်ႉၸိူဝ်းၼၼ်ႉၸမ်ႉ၊ လုၵ်ႈၸၢႆးတူၼ်ႈမၼ်းပဵၼ် ဢႃႇမၼုၼ်ႇ ဢၼ်မၼ်းလႆႈၵႃႈတီႈ ဢႁီႉၼွင်ႇ မႄႈယိင်းဝဵင်း ယေႇၸရေႇလႃႉ ၼၼ်ႉဢေႃႈ။-

3လုၵ်ႈၸၢႆးတူႉတီႉယႃႉပဵၼ် ၶီႉလတ်ႉ ဢၼ်မၼ်းလႆႈၵႃႈတီႈ ဢၽီႉၵေးလႃႉ မႄႈယိင်းဝဵင်း ၵရမေႇလႃႉ မေး ၼႃႇပလႃႉ ၼၼ်ႉဢေႃႈ။ လုၵ်ႈၸၢႆးတႃႉတီႉယႃႉပဵၼ် ဢပႃႉသလုမ်ႇ လုၵ်ႈၸၢႆး မႃႇၶႃႇ လုၵ်ႈယိင်း တႃႇလမေး ၶုၼ်ႁေႃၶမ်းမိူင်း ၵေႇသူႉရႃႉ ၼၼ်ႉဢေႃႈ။-

4လုၵ်ႈၸၢႆးၸတုၵ်ႉထႃႉၸမ်ႉ ပဵၼ် ဢတေႃးၼီႉယႃႉ လုၵ်ႈၸၢႆး ႁၵ်ႉၵိတ်ႉ ဢေႃႈ။ လုၵ်ႈၸၢႆးပိၼ်ႇၸမႃႉပဵၼ် သေႇၽတီႉ လုၵ်ႈၸၢႆး ဢပီႉတလႃႉ ဢေႃႈ။-

5လုၵ်ႈၸၢႆးသႃႉထမႃႉၸမ်ႉ ပဵၼ် ဢီႉသရမ်ႇ ဢၼ်မၼ်းလႆႈၵႃႈတီႈ ဢေးၵလႃႇ ဢၼ်ပဵၼ်မေး တႃႇဝိတ်ႈ ၼၼ်ႉဢေႃႈ။ ၸိူဝ်းၼႆႉၸမ်ႉ၊ ၵိူတ်ႇလဵင်ႉမႃးတီႈ တႃႇဝိတ်ႈ ၵႃႈၼႂ်းဝဵင်း ႁေႇပြုၼ်ႇ ဢေႃႈ။

6ၼႂ်းမိူဝ်ႈဢၼ် ယင်းတိုၵ်ႉပဵၼ်သိုၵ်းပဵၼ်သိူဝ် ၵႃႈတီႈၵႄႈဝူင်ႈၵၢင်ၸိူဝ်ႉၶိူဝ်း သေႃးလူႉ ဢိၵ်ႇတင်းၸိူဝ်ႉၶိူဝ်း တႃႇဝိတ်ႈ ၼၼ်ႉယူႇၼၼ်ႉၸိုင်၊ ဢႃႉပၼႃး ၼၼ်ႉ ၵျူဝ်းၸႃးဢဝ်ႁႅင်းဢွၵ်ႇယူႇၽၢႆႇၸိူဝ်ႉၶိူဝ်း သေႃးလူႉ ဢေႃႈ။-

7သေႃးလူႉ ၼၼ်ႉမီးမေးၼွႆႉဢၼ်လႆႈၸိုဝ်ႈဝႃႈ ရီႉၸပႃႉ လုၵ်ႈယိင်း ဢေႇဢႃႇ ၼၼ်ႉၵေႃႉၼိုင်ႈဢေႃႈ။ ဢီႉသပေႃႇသႅတ်ႉ ထၢမ်တီႈ ဢႃႉပၼႃး လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းၶဝ်ႈၸူးၵႃႈတီႈမေးၼွႆႉၸဝ်ႈပေႃႈၵဝ်ၼင်ႇႁိုဝ်။ ဝႃႈၼင်ႇၼႆသေယဝ်ႉ၊-

8ဢႃႉပၼႃး ၼၼ်ႉ ၸႂ်မႆႈၶႆႈၸႃႉၼႃႇလူင်လၢင်ၵွပ်ႈပိူဝ်ႈၵႂၢမ်း ဢီႉသပေႃႇသႅတ်ႉ ၼၼ်ႉလႄႈဝႃႈ၊ ၵဝ်ၼႆႉပဵၼ်ၵွၵ်းႁူဝ်မႃ ဢၼ်ၸၢပ်ႈသႅင်ႇၵၼ်တင်းမဵဝ်း ယူႉတႃႉ ႁိုဝ်။ ပိၵ်ႉသမ်ႉၵဝ်ႁဵတ်းၵျေးၸူးတီႈပီႈၼွင်ႉၸိူဝ်ႉၶိူဝ်းပေႃႈၸဝ်ႈ သေႃးလူႉ ဢိၵ်ႇတင်းပီႈၼွင်ႉမၼ်း တင်းၵေႃႉသေႈမၼ်းၸိူဝ်းၼၼ်ႉဝၼ်းမိူဝ်ႈၼႆႉလႄႈ၊ ယင်းဢမ်ႇဢဝ်ၸဝ်ႈဢၢပ်ႈပၼ်ၵႃႈၼႂ်းမိုဝ်း တႃႇဝိတ်ႈ လႄႈယူႇသေၵေႃႈ၊ ၸဝ်ႈတၵ်းတၢင်ႇဢပႅတ်ႈတီႈၵဝ်ၵွပ်ႈပိူဝ်ႈမႄႈယိင်းၼၼ်ႉႁိုဝ်။-

9ပေႃးၵဝ်ယင်းဢမ်ႇႁဵတ်းၸွမ်းၵႃႈၼင်ႇဢၼ်ထႃႇဝရႃႉၽြႃးတိူင်ႇဝႃႈဝႆႉတီႈ တႃႇဝိတ်ႈ လႄႈဝႃႈ၊ တၵ်းၼုၵ်ႈဢဝ်သိုင်ႇၸိုင်ႈဝၢၼ်ႈမိူင်းသေၵႃႈတီႈၸိူဝ်ႉၶိူဝ်း သေႃးလူႉ လႄႈ ႁႂ်ႈရႃႇၸႃႉပလၢင်ႇ တႃႇဝိတ်ႈ တႄႇယူႇၵႃႈတီႈမိူင်း ဢီႉသရေႇလႃႉ ၊ မိူင်း ယူႉတႃႉ ၊ ဢဝ်ၵႃႈတီႈၸႃႉၸဵမ် ဝဵင်း တၢၼ်ႇ တေႃႇထိုင်ႁွတ်ႈဝဵင်း ပေႇရသေႇၽႃႉ ၼၼ်ႉဢေႃႈ၊ ဝႃႈၼင်ႇၼႆၼၼ်ႉ တီႈမၼ်းၼၼ်ႉလႄႈယူႇၸိုင်၊-

10ယင်းဢမ်ႇၵႃး ဢၼ်ၼၼ်ႉလႄႈ ႁႂ်ႈထႃႇဝရႃႉၽြႃး ႁဵတ်းလိူဝ်တွၼ်းၼႃႇသေၼၼ်ႉ တီႈ ဢႃႉပၼႃး သေၵမ်းလူၺ်ႈ၊ ဝႃႈၼင်ႇၼႆလႄႈ၊-

11မၼ်းၼၼ်ႉၵူဝ်ႁႄလႄႈ ဢမ်ႇႁတ်းၶိုၼ်းလၢတ်ႈၵႂၢမ်းတီႈ ဢႃႉပၼႃး သေၶေႃႈသေၵမ်း။

12လိုၼ်းၼၼ်ႉ ဢႃႉပၼႃး ၼၼ်ႉ ပွႆႇၸႂ်ႉသၢၼ်ႇတမၢၼ်ႇၸူးၵႃႈတီႈ တႃႇဝိတ်ႈ ပုၼ်ႈတူဝ်မၼ်းလႄႈ လဝ်ႊလၢတ်ႈလႄႈဝႃႈ၊ ၶုၼ်ၸဝ်ႈမိူင်းၸမ်ႉ၊ ပဵၼ်ၽူႈလႂ်တီႈၶႃႈ။ ႁဵတ်းမိၵ်ႉသႃႇႁႃယႃႉလူၺ်ႈၵၼ်တင်းၶႃႈၸဝ်ႈသေၵမ်းတီႈၶႃႈ။ တူၺ်းတီႈၶႃႈလူး။ မိုဝ်းၶႃႈၸဝ်ႈၼႆႉတၵ်းယူႇၽၢႆႇၸဝ်ႈႁဝ်းသေလႄႈ ႁဵတ်းႁႂ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၶၢႆႉပုတ်ႈမႃးၽၢႆႇၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

13မၼ်းၵေႃႈၶိုၼ်းလၢတ်ႈလႄႈဝႃႈ၊ လီယဝ်ႉ။ ၵဝ်တၵ်းႁဵတ်းမိၵ်ႉသႃႇႁႃယႃႉလူၺ်ႈၵၼ်တင်းမႂ်းဢေႃႈ။ ၼႂ်းဝႃႈၼၼ်သေၵေႃႈ ၵဝ်မီးတီႈဢၼ်တၵ်းယွၼ်းဢဝ်ဢၼ်ၼိုင်ႈဢေႃႈ။ ပေႃးမႂ်းဢမ်ႇဢဝ် မီႉၶႃႇလႃႉ လုၵ်ႈယိင်း သေႃးလူႉ ၼၼ်ႉမႃးဢွၼ်တၢင်းမႂ်း မိူဝ်ႈဢၼ်မႂ်းမႃးႁႂ်ႈလႆႈႁၼ်ၼႃႈၵဝ်ၼၼ်ႉၸိုင်၊ မႂ်းဢမ်ႇလႆႈႁၼ်ၼႃႈၵဝ်ၵူၺ်ႉ၊ ဝႃႈၼင်ႇၼႆဢေႃႈ။-

14တႃႇဝိတ်ႈ ၵေႃႈ ပွႆႇၸႂ်ႉသၢၼ်ႇတမၢၼ်ႇၵႂႃႇၸူးၵႃႈတီႈ ဢီႉသပေႃႇသႅတ်ႉ လုၵ်ႈၸၢႆးၸဝ်ႈ သေႃးလူႉ ၼၼ်ႉလႄႈဝႃႈ၊ ဢဝ် မီႉၶႃႇလႃႉ ဢၼ်ၵဝ်ဢဝ်ပၢႆၼင်ၵူၼ်း ၽီႉလိတ်ႉတီႉ ပၢၵ်ႇၼိုင်ႈသိုဝ်ႉဢဝ်ၼၼ်ႉ ဢၢပ်ႈပၼ်မႃးသေၵမ်း၊ ဝႃႈၼင်ႇၼႆလႄႈ၊-

15ဢီႉသပေႃႇသႅတ်ႉ ၼၼ်ႉ ပွႆႇၸႂ်ႉလႄႈ ၼုၵ်ႈဢဝ်မႄႈယိင်းၼၼ်ႉသေၵႃႈၼႂ်းမိုဝ်းၽူဝ်မၼ်း ၽႃႇလတီႉ လုၵ်ႈၸၢႆး လေႇသႃႉ ၼၼ်ႉဢေႃႈ။-

16ၽူဝ်မၼ်းၼၼ်ႉ ၵႂႃႇလူၺ်ႈၵၼ်တင်းမၼ်းလႄႈ ႁႆႈႁွင်ႉယူႇၼႂ်းမိူဝ်ႈဢၼ်ၵႂႃႇယူႇၼၼ်ႉသေလႄႈ ၸွမ်းလင်မၼ်းၵႂႃႇတေႃႇထိုင်ႁွတ်ႈဝဵင်း ပႃႇႁူႉရိမ်း ဢေႃႈ။ မိူဝ်ႈၼၼ်ႉ ဢႃႉပၼႃး လၢတ်ႈတီႈမၼ်းလႄႈဝႃႈ၊ ၶိုၼ်းမိူဝ်းၵႂႃႇသေတႃႉ၊ ဝႃႈၼင်ႇၼႆသေယဝ်ႉ၊ မၼ်းၼၼ်ႉလႆႈၶိုၼ်းမိူဝ်းၵႂႃႇသေဢေႃႈ၊-

17ဢႃႉပၼႃး ၵေႃႈ တိူင်ႇပၢင်ႇလၢတ်ႈၸႃၵၼ်တင်းၵူၼ်း ဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်း ဢီႉသရေႇလႃႉ ၸိူဝ်းၼၼ်ႉလႄႈဝႃႈ၊ မိူဝ်ႈဢွၼ်တၢင်းၼၼ်ႉ သူမီးၸႂ်ဢၼ်ၶႂ်ႈယုၵ်ႉယွင်ႈ တႃႇဝိတ်ႈ ဝႆႉၵႃႈၼႂ်းဢရႃႇၶုၼ်ႁေႃၶမ်းဢေႃႈ။-

18ပိူဝ်ႈၼႆလႄႈမိူဝ်ႈလဵဝ်ၼႆႉၸိုင်ယုၵ်ႉယွင်ႈတႃႉ။ ထႃႇဝရႃႉၽြႃးဢဝ်လွင်ႈ တႃႇဝိတ်ႈ မီးဢမိင်ႉလႄႈဝႃႈ၊ ၵဝ်တၵ်းဢဝ်တင်းမိုဝ်းၶႃႈၵဝ် တႃႇဝိတ်ႈ ၵႄႇသႄႇၼုၵ်ႈဢဝ်ၵူၼ်းမဵဝ်း ဢီႉသရေႇလႃႉ ဢွၵ်ႇသေၵႃႈၼႂ်းမိုဝ်းၵူၼ်း ၽီႉလိတ်ႉတီႉ ဢိၵ်ႇတင်းၵႃႈၼႂ်းမိုဝ်းရၢၼ်ႇသူႇၶဝ်တင်းသဵင်ႈတင်းလူင်ဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆဢေႃႈ။-

19လႆႈသမ်ႉ ဢႃႉပၼႃး လၢတ်ႈထိုင်ႁူၵူၼ်းမဵဝ်း ပိၼ်ႇယႃႇမိၼ်ႇ တင်းလၢႆဢေႃႈ။ လိုၼ်းၼၼ်ႉ ဢႃႉပၼႃး ၵႂႃႇႁႂ်ႈလႆႈဢဝ် လွင်ႈတၢင်းၵႃႈဢၼ်ၵူၼ်းမဵဝ်း ဢီႉသရေႇလႃႉ ဢိၵ်ႇတင်းၵူၼ်းမဵဝ်း ပိၼ်ႇယႃႇမိၼ်ႇ တင်းသဵင်ႈတင်းလူင်မီးဢလူဝ်ႇၼၼ်ႉ လဝ်ႊလၢတ်ႈထိုင်ႁူ တႃႇဝိတ်ႈ ၵႃႈတီႈဝဵင်း ႁေႇပြုၼ်ႇ ဢေႃႈ။-

20ၼင်ႇၼၼ်လႄႈ ဢႃႉပၼႃး ပႃးဢဝ်ၵူၼ်းသၢဝ်းၼိုင်ႈသေလႄႈ ႁွတ်ႈထိုင်တီႈ တႃႇဝိတ်ႈ ၵႃႈတီႈဝဵင်း ႁေႇပြုၼ်ႇ ၼၼ်ႉသေယဝ်ႉ၊ တႃႇဝိတ်ႈ ႁဵတ်းပွႆးလႄႈ လဵင်ႉလူ ဢႃႉပၼႃး ဢိၵ်ႇတင်းၵူၼ်းမၼ်းၸိူဝ်းၼၼ်ႉဢေႃႈ။-

21ဢႃႉပၼႃး ၵေႃႈလဝ်ႊလၢတ်ႈတီႈ တႃႇဝိတ်ႈ လႄႈဝႃႈ၊ ၶႃႈၸဝ်ႈတၵ်းလုၵ်ႉလႄႈ ၵႂႃႇႁႂ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ၸူႉၵၼ်တုမ်ၵၼ်ၵႃႈတီႈၸဝ်ႈႁဝ်းၶုၼ်ႁေႃၶမ်း ႁႂ်ႈၶဝ်လႆႈႁဵတ်းမိၵ်ႉသႃႇႁႃယႃႉလူၺ်ႈၵၼ်တင်းၸဝ်ႈႁဝ်း ဢိၵ်ႇတင်းႁႂ်ႈၸဝ်ႈႁဝ်းလႆႈဢုပ်ႉပိူင်ႇၸၢမ်ႇၸႃး ၵႃႈဢၼ်ၸဝ်ႈႁဝ်းမီးဢလူဝ်ႇၼၼ်ႉတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ တႃႇဝိတ်ႈ ပွႆႇမၼ်းလႄႈ မၼ်းၵႂႃႇ ၼိမ်ၼိမ်လီလီဢေႃႈ။

22မိူဝ်ႈၼၼ်ႉ ယႂႃႇၽႃႉ တင်းၶႃႈၵူၼ်း တႃႇဝိတ်ႈ တင်းလၢႆ လုၵ်ႉသေၵႃႈတီႈဢၼ်လိုပ်ႈၸွမ်းလမ်းၸွမ်းမုၵ်ႉၸိူဝ်းရၢၼ်ႇသူႇၼၼ်ႉ ၶိုၼ်းမႃးလႄႈ ပႃးဢဝ်ဢုၵ်ႉၸႃႇဢၼ်ႁိမ်လႆႈၼမ်ၼႃႇမႃးဢေႃႈ။ ဢႃႉပၼႃး ၼၼ်ႉ ဢမ်ႇမီးယူႇလူၺ်ႈၵၼ်တင်း တႃႇဝိတ်ႈ ၵႃႈတီႈဝဵင်း ႁေႇပြုၼ်ႇ ၼၼ်ႉ။ လွင်ႈမၼ်းၸမ်ႉ တႃႇဝိတ်ႈ ပွႆႇမၼ်းလႄႈ မၼ်းၵႂႃႇၼိမ်ၼိမ်လီလီယဝ်ႉ။-

23မိူဝ်ႈဢၼ် ယႂႃႇၽႃႉ ဢိၵ်ႇတင်းႁူဝ်ႁၢၼ်ၵူၼ်းသိုၵ်း ၵႃႈဢၼ်ပႃးတီႈမၼ်းၸိူဝ်းၼၼ်ႉၶိုၼ်းမႃးၼၼ်ႉၸိုင်၊ ပိူၼ်ႈမွၵ်ႇလၢတ်ႈတီႈ ယႂႃႇၽႃႉ လႄႈဝႃႈ၊ ဢႃႉပၼႃး လုၵ်ႈၸၢႆး ၼေးရႃႉ ၼၼ်ႉ မႃးၵႃႈတီႈၶုၼ်ႁေႃၶမ်းယဝ်ႉ။ မၼ်းၸဝ်ႈၵေႃႈပွႆႇမၼ်းလႄႈ မၼ်းလႆႈၵႂႃႇၼိမ်ၼိမ်လီလီယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

24ယႂႃႇၽႃႉ ၶဝ်ႈၸူးၵႃႈတီႈၶုၼ်ႁေႃၶမ်းလႄႈဝႃႈ၊ ၸဝ်ႈႁဝ်းႁဵတ်းၸိူဝ်ႉၼင်ႇႁိုဝ်တီႈၶႃႈ၊ တူၺ်းတီႈၶႃႈလူး။ ဢႃႉပၼႃး ၼၼ်ႉ မႃးၸူးၵႃႈတီႈၸဝ်ႈႁဝ်းယဝ်ႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းပွႆႇႁႂ်ႈမၼ်းလႆႈလွတ်ႈဢွၵ်ႇၵႂႃႇၼင်ႇႁိုဝ်တီႈၶႃႈ၊-

25ၸဝ်ႈႁဝ်းႁူႉလွင်ႈဢၼ် ဢႃႉပၼႃး လုၵ်ႈၸၢႆး ၼေးရႃႉ ၼၼ်ႉ မႃးႁႂ်ႈလႆႈပႅတ်ႉလႅၼ်ၸဝ်ႈႁဝ်းလႄႈ ႁူႉႁၼ်တၢင်းဢၼ်ၸဝ်ႈႁဝ်းၶဝ်ႈဢွၵ်ႇ၊ တၢင်းဢၼ်ၸဝ်ႈႁဝ်းၸီႇယၢင်ႇ ႁဵတ်းၵူႈၸိူဝ်ႉၵူႈပိူင်ၼၼ်ႉၵူၺ်းယူႇတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

26ယႂႃႇၽႃႉ ဢွၵ်ႇသေၵႃႈတီႈ တႃႇဝိတ်ႈ လႄႈ ပွႆႇၸႂ်ႉသၢၼ်ႇတမၢၼ်ႇ ၵႂႃႇၸွမ်းလင် ဢႃႉပၼႃး သေလႄႈ ၶဝ်ႁွင်ႉဢဝ်မၼ်းလူင်းၵႃႈတီႈၼမ်ႉမေႃႇ သီႉရႃႉ ၶိုၼ်းမႃးဢေႃႈ။ ၵူၺ်းၵႃႈ တႃႇဝိတ်ႈ ဢမ်ႇႁူႉလွင်ႈၼၼ်ႉ။-

27မိူဝ်ႈဢၼ် ဢႃႉပၼႃး ၼၼ်ႉၶိုၼ်းႁွတ်ႈထိုင်ၵႃႈတီႈဝဵင်း ႁေႇပြုၼ်ႇ ၼၼ်ႉၸိုင်၊ ယႂႃႇၽႃႉ ၼၼ်ႉႁွင်ႉဢဝ်မၼ်းမႃးၵႃႈတီႈၽၵ်းတူဝဵင်းႁႂ်ႈလႆႈတၵ်ႉလၢတ်ႈသဵတ်ႇသဵတ်ႇယဵၼ်ယဵၼ်သေယဝ်ႉ၊ တႅင်းသႂ်ႇပုမ်မၼ်းႁႂ်ႈမၼ်းထၼ်ႈပေႃးတၢႆ ၵွပ်ႈပိူဝ်ႈလိူတ်ႈၼွင်ႉၸၢႆးမၼ်း ဢႃႇသႃႇႁေးလႃႉ ၼၼ်ႉဢေႃႈ၊

28လိုၼ်းၼၼ်ႉမိူဝ်ႈဢၼ် တႃႇဝိတ်ႈ ငိၼ်းလွင်ႈမၼ်းၼၼ်ႉၸိုင်၊ မၼ်းဢွၵ်ႇသူပ်းဝႃႈ၊ ႁႂ်ႈၵဝ်ဢိၵ်ႇတင်းသိုင်ႇၸိုင်ႈဝၢၼ်ႈမိူင်းၵဝ် ၵၢင်းလွတ်ႈတင်းလိူတ်ႈ ဢႃႉပၼႃး လုၵ်ႈၸၢႆး ၼေးရႃႉ ၼၼ်ႉၵႃႈတီႈၽၢႆႇၼႃႈထႃႇဝရႃႉၽြႃးသေၵမ်းလူၺ်ႈ။-

29ႁႂ်ႈႁွတ်ႈထိုင်ၵႃႈၼိူဝ်ႁူဝ် ယႂႃႇၽႃႉ ဢိၵ်ႇတင်းႁူဝ်ပီႈၼွင်ႉၸိူဝ်ႉၶိူဝ်းပေႃႈမၼ်းတင်းသဵင်ႈတင်းလူင်သေၵမ်းလူၺ်ႈ။ ၵႃႈတီႈပီႈၼွင်ႉၸိူဝ်ႉၶိူဝ်း ယႂႃႇၽႃႉ ၼၼ်ႉၸိူဝ်းၼၼ်ႉ၊ ယႃႇပေႁႂ်ႈၵေႃႉဢၼ်ပဵၼ်တၢင်းဢၼ်ႁူဝ်ႈၸိုမ်းဢွၵ်ႇ၊ ၵေႃႉဢၼ်ပဵၼ်တုတ်ႈ၊ ၵေႃႉဢၼ်ဢိင်ၶွၼ်ႉတဝ်ႉ၊ ၵေႃႉဢၼ်တၢႆလူၺ်ႈလၢပ်ႇလူၺ်ႈလႅဝ်း၊ ၵေႃႉဢၼ်ဢိုပ်းဢၼ်ယၢၵ်ႈလႆႈထၢတ်ႇသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

30ၼင်ႇၼၼ်လႄႈ ယႂႃႇၽႃႉ ဢိၵ်ႇတင်းၼွင်ႉၸၢႆးမၼ်း ဢၽီႉသေး ၼၼ်ႉ ဢဝ် ဢႃႉပၼႃး တၢႆဢေႃႈ။ လွင်ႈမၼ်းၸမ်ႉ ဢႃႉပၼႃး လႆႈဢဝ်ၼွင်ႉၸၢႆးၶဝ် ဢႃႇသႃႇႁေးလႃႉ ၼၼ်ႉတၢႆ ၵႃႈတီႈပွႆးသိုၵ်း ၵီႉပွင်ႇ ၼၼ်ႉဢေႃႈ၊

31တႃႇဝိတ်ႈ ၵေႃႈ မီးဢမိင်ႉတီႈ ယႂႃႇၽႃႉ ဢိၵ်ႇတင်းၵူၼ်းၵႃႈဢၼ်မီးတီႈမၼ်းၸိူဝ်းၼၼ်ႉလႄႈဝႃႈ၊ ဢွၼ်ၵၼ်သိၵ်ႇၶူဝ်းၼုင်ႈသူလႄႈ ၼုင်ႈၶူဝ်းၼုင်ႈၼင်ပေႃယူႇသေလႄႈ ႁဵတ်းတၢင်းဢၼ်ႁႆႈႁွင်ႉပွင်ႉၶၢင်းၵႂႃႇၽၢႆႇၼႃႈ ဢႃႉပၼႃး တႃႉ၊ ဝႃႈၼင်ႇၼႆလႄႈ တူဝ် တႃႇဝိတ်ႈ ၸွမ်းသူင်ႇၵွမ်ႇမၼ်းၸူင်မၼ်းဢေႃႈ။-

32ၶဝ်ဢွၼ်ၵၼ်ဢဝ် ဢႃႉပၼႃး သၢင်းၵျူဝ်ႇၵႃႈတီႈဝဵင်း ႁေႇပြုၼ်ႇ ဢေႃႈ။ ၶုၼ်ႁေႃၶမ်းၵိဝ်သဵင်လႄႈ ႁႆႈႁွင်ႉၵႃႈတီႈႁိမ်းသၢင်းၶႅင်း ဢႃႉပၼႃး ၼၼ်ႉဢေႃႈ။ ၵူၼ်းတင်းသဵင်ႈတင်းလူင်ၵေႃႈဢွၼ်ၵၼ်ႁႆႈႁွင်ႉဢေႃႈ။-

33ၶုၼ်ႁေႃၶမ်း ၶၢင်းၶီၶၢင်းၽၢၼ်ၵွပ်ႈပိူဝ်ႈ ဢႃႉပၼႃး ၼၼ်ႉလႄႈဝႃႈၸမ်ႉ၊ ဢႃႉပၼႃး ၼႆႉလႆႈတၢႆၵႂႃႇ မိူၼ်ၸိူဝ်ႉၼင်ႇၵူၼ်းမိူၵ်ႈၵူၼ်းယုတ်ႈၼၼ်ႉယဝ်ႉလူင်ပႄႇ။-

34မိုဝ်းမႂ်းယင်းဢမ်ႇလႆႈၶၢမ်ႇတၢင်းဢၼ်မတ်ႉဢၼ်ၽုၵ်ႇ၊ တိၼ်မႂ်းယင်းဢမ်ႇလႆႈၶၢမ်ႇတၢင်းဢၼ်သႂ်ႇဝႅၼ်လဵၵ်းဝႅၼ်တွင်းလႄႈ မႂ်းလႆႈတၢႆၵႂႃႇမိူၼ်ၸိူဝ်ႉၼင်ႇဢၼ်လႆႈတၢႆလူၺ်ႈမိုဝ်းၵူၼ်းႁၢႆႉၵူၼ်းမိူၵ်ႈၼၼ်ႉယဝ်ႉလူင်ပႄႇ၊ ဝႃႈၼင်ႇၼႆဢေႃႈ။ လႆႈသမ်ႉ ၵူၼ်းတင်းသဵင်ႈတင်းလူင် ဢွၼ်ၵၼ်ႁႆႈႁွင်ႉ ၵွပ်ႈပိူဝ်ႈမၼ်းထႅင်ႈဢေႃႈ။-

35ပိၵ်ႉသမ်ႉၵူၼ်းတင်းသဵင်ႈတင်းလူင်သုတ်ႉၸပ်းသုတ်ႉၸူး ႁဵတ်းႁႂ်ႈ တႃႇဝိတ်ႈ ၵိၼ်တၢင်းၵိၼ်တၢင်းၶူပ်း ၸူဝ်ႈဢၼ်ၵၢင်ဝၼ်း ဢမ်ႇပႆႇၶမ်ႈၼၼ်ႉသေၵေႃႈ၊ တႃႇဝိတ်ႈ ၵိၼ်ႇဝႃႈလႄႈဝႃႈ၊ ပေႃးၵဝ်ၸိမ်းတူၺ်းၸႃႉၸဵမ်ၶဝ်ႈမုၼ်းလႄႈ တၢင်းၵိၼ်တၢင်းၶူပ်းသေၸိူဝ်ႉသေပိူင် ၸူဝ်ႈဢၼ်ၵၢင်ဝၼ်းဢမ်ႇပႆႇတူၵ်းၼၼ်ႉၸိုင်၊ ယင်းဢမ်ႇၵႃးဢၼ်ၼၼ်ႉလႄႈ ႁႂ်ႈၽြႃးပဵၼ်ၸဝ်ႈႁဵတ်းလိူဝ်တွၼ်းၼႃႇသေၼၼ်ႉ တီႈၵဝ်သေၵမ်းလူၺ်ႈ၊ ဝႃႈၼင်ႇၼႆဢေႃႈ။-

36ၵူၼ်းတင်းသဵင်ႈတင်းလူင်ႁၼ်လွင်ႈတၢင်းၼၼ်ႉလႄႈ ပဵၼ်ဢၼ်ထုၵ်ႇၸႂ်ၵျိူၵ်ႈၸႂ်ၶဝ် မိူၼ်ၸိူဝ်ႉၼင်ႇၵႃႈဢၼ်ၶုၼ်ႁေႃၶမ်းႁဵတ်းၼၼ်ႉထုၵ်ႇၸႂ်ၵျိူၵ်ႈၸႂ် ၵူၼ်းတင်းသဵင်ႈတင်းလူင်ၼၼ်ႉဢေႃႈ။-

37ၼင်ႇၼၼ်လႄႈၵူၼ်းတင်းလၢႆ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ႁူႉၸႅင်ႈလွင်ႈဢၼ်ၶုၼ်ႁေႃၶမ်း ဢမ်ႇမီးဢလူဝ်ႇၶႂ်ႈႁႂ်ႈဢဝ် ဢႃႉပၼႃး လုၵ်ႈၸၢႆး ၼေးရႃႉ တၢႆၼၼ်ႉ ၼႂ်းဝၼ်းၼၼ်ႉဢေႃႈ။-

38ၶုၼ်ႁေႃၶမ်းၵေႃႈ မီးဢမိင်ႉတီႈၶႃႈမၼ်းၵူၼ်းမၼ်းတင်းလၢႆလႄႈဝႃႈ၊ သူဢမ်ႇႁူႉလွင်ႈဢၼ်ၵေႃႉဢၼ်ပဵၼ်ၶုၼ်၊ ၵေႃႉဢၼ်ယႂ်ႇမျၢတ်ႈၼၼ်ႉၵေႃႉၼိုင်ႈ သုမ်းၸွမ်းၵႃႈၼႂ်းမဵဝ်း ဢီႉသရေႇလႃႉ ၼႂ်းဝၼ်းမိူဝ်ႈၼႆႉယဝ်ႉၼၼ်ႉႁိုဝ်။-

39ပိၵ်ႉသမ်ႉၵဝ်လႆႈၶၢမ်ႇၽိၵ်ႈသိၵ်ႈလႄႈ ပဵၼ်ၶုၼ်ႁေႃၶမ်းသေၵေႃႈ ဝၼ်းမိူဝ်ႈၼႆႉ ပဵၼ်ဢၼ်ႁႅင်းလဵၵ်ႉႁႅင်းဢူၼ်ႈဢေႃႈ။ ၶဝ်ၸိူဝ်းဢၼ်ပဵၼ်လုၵ်ႈၸၢႆး ၸေႇရူႉယႃႇ ၼၼ်ႉၸိူဝ်းၼႆႉ ယဵင်ႈၶႅၼ်းႁႅင်းယႂ်ႇလိူဝ်တွၼ်းၼႃႇသေၵဝ်ဢေႃႈ။ ႁႂ်ႈထႃႇဝရႃႉၽြႃးတွပ်ႇတႅၼ်းပၼ်တီႈၵေႃႉဢၼ်ႁဵတ်းဢၼ်ဢမ်ႇတြႃးၼၼ်ႉ ၸွမ်းၼင်ႇဢၼ်ဢပႅတ်ႈမၼ်းမီးၼၼ်ႉသေၵမ်းလူၺ်ႈ၊ ဝႃႈၼင်ႇၼႆဢေႃႈ။

← Chapter 2 Jump to: Chapter 4 →