2 Samuel 24 — Shan

1လိုၼ်းၼၼ်ႉ ထႃႇဝရႃႉၽြႃးၸႂ်မႆႈၶႆႈၸႃႉတီႈမဵဝ်း ဢီႉသရေႇလႃႉ လႄႈ တိုၵ်းယူင်း တႃႇဝိတ်ႈ ႁဵတ်းရၢၼ်ႇသူႇၽၢႆႇၼိုင်ႈတင်းၶဝ်သေလႄႈဝႃႈ၊ ၵႂႃႇလႄႈၼပ်ႉဢၢၼ်ႇမဵဝ်း ဢီႉသရေႇလႃႉ ဢိၵ်ႇတင်းမဵဝ်း ယူႉတႃႉ တႃႉ၊ ဝႃႈၼင်ႇၼႆဢေႃႈ။-

2ၶုၼ်ႁေႃၶမ်းၵေႃႈ မီးဢမိင်ႉတီႈၶုၼ်ပူဝ်ႇၶျုၵ်ႈမၼ်း ယႂႃႇၽႃႉ ဢၼ်မီးယူႇတီႈမၼ်းၼၼ်ႉလႄႈဝႃႈ၊ မႂ်းလႄႇလဵပ်ႈၵႂႃႇၼႂ်းမဵဝ်း ဢီႉသရေႇလႃႉ ၵႃႈမီး ဢဝ်ၵႃႈတီႈၸႃႉၸဵမ်ဝဵင်း တၢၼ်ႇ တေႃႇထိုင်ႁွတ်ႈဝဵင်း ပေႇရသေႇၽႃႉ လႄႈ ၼပ်ႉဢၢၼ်ႇၵူၼ်းတင်းလၢႆ ႁႂ်ႈၵဝ်လႆႈႁူႉလွင်ႈဢၼ် ၵူၼ်းတင်းလၢႆမီးၼမ်လႂ်ၼၼ်ႉတႃႉ၊ ဝႃႈၼင်ႇၼႆဢေႃႈ။-

3ယႂႃႇၽႃႉ ၵေႃႈ လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းထၢပ်ႈၵူၼ်းထႅင်ႈလႄႈ ႁႂ်ႈယႂ်ႇၽႄႈၼမ်ၵိုၼ်းမႃးပၢၵ်ႇပုၼ်ႈ ၵႃႈဢၼ်မီးၼၼ်ႉသေယဝ်ႉ၊ ႁဵတ်းႁႂ်ႈမၢၵ်ႇတႃၸဝ်ႈႁဝ်းၶႃႈ ၸဝ်ႈၶုၼ်လူင်လႆႈႁၼ်သေၵမ်းလူၺ်ႈ။ ၼႂ်းဝႃႈၼၼ်သေၵေႃႈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းၶႃႈ ၸဝ်ႈၶုၼ်လူင်ထုၵ်ႇၸႂ်ၵျိူၵ်ႈၸႂ်ဢမူႉၼႆႉၼင်ႇႁိုဝ်တီႈၶႃႈ၊ ဝႃႈၼင်ႇၼႆဢေႃႈ။-

4ၵူၺ်းၵႃႈ ဢမိင်ႉၶုၼ်ႁေႃၶမ်းပႄႉၼႅင်ႇၵႂၢမ်း ယႂႃႇၽႃႉ ဢိၵ်ႇတင်းၵႂၢမ်းပူဝ်ႇႁူဝ်ႁၢၼ်တင်းလၢႆလႄႈ၊ ယႂႃႇၽႃႉ ဢိၵ်ႇတင်းပူဝ်ႇႁူဝ်ႁၢၼ်ၸိူဝ်းၼၼ်ႉ ဢွၼ်ၵၼ်ဢွၵ်ႇသေၵႃႈတီႈ ၶုၼ်ႁေႃၶမ်းၵႂႃႇႁႂ်ႈလႆႈၼပ်ႉဢၢၼ်ႇၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။

5ၶဝ်ၼၼ်ႉဢွၼ်ၵၼ်ၶၢမ်ႈၼမ်ႉႁွင်ႈ ယေႃးတၢၼ်ႇ လႄႈ ၶျႃးတပ်ႉၵႃႈတီႈဝဵင်း ဢႃႇရေႃႇ ၵႃႈတီႈၽၢႆႇၶႂႃဝဵင်းၼၼ်ႉ ဢၼ်မီးၵႃႈၼႂ်းပၢင်ႇႁူၺ်ႈ ၵၢတ်ႉ ၼၼ်ႉ ဢိၵ်ႇတင်းၵႃႈတီႈႁိမ်းဝဵင်း ယႃႇၸႃႇ ဢေႃႈ။-

6သမ်ႉဢွၼ်ၵၼ်ၵႂႃႇၵႃႈတီႈမိူင်း ၵီႉလတ်ႉ ဢိၵ်ႇတင်းမိူင်း ထၵ်းတိမ်ႇႁွတ်ႇသီႉ လႄႈ ႁွတ်ႈထိုင်ၵႃႈတီႈမိူင်း တၢၼ်ႇယၢၼ်ႇ သေယဝ်ႉ၊ ငႅၵ်းၵႂႃႇၸူးၵႃႈတီႈမိူင်း ၸီႉတုမ်ႇ လႄႈ၊-

7ႁွတ်ႈထိုင်ၵႃႈတီႈတိူၵ်ႈတီႈတိုၵ်းသိုၵ်း တူႉရူႉ ဢိၵ်ႇတင်းၵႃႈတီႈဝဵင်း ႁီႉဝီႉ တင်းဝဵင်း ၶႃႇၼၼီႉ ၵႃႈမီးလႄႈ ၵွႆႈသုတ်းၵႃႈတီႈဝဵင်း ပေႇရသေႇၽႃႉ ပွတ်းတၢင်းၸၢၼ်းမိူင်း ယူႉတႃႉ ၼၼ်ႉဢေႃႈ။-

8ၼင်ႇၼၼ်လႄႈ ၶဝ်လႄႇလဵပ်ႈၵႂႃႇၵႃႈၼႂ်းမိူင်းတၢင်ႇမိူင်းလႄႈ ပူၼ်ႉသေၵဝ်ႈလိူၼ်ပၢႆသၢဝ်းဝၼ်းသေယဝ်ႉ၊ ၶိုၼ်းႁွတ်ႈထိုင်ၵႃႈတီႈဝဵင်း ယေႇရူႉသလႅမ်ႇ ဢေႃႈ။-

9ယႂႃႇၽႃႉ ၵေႃႈ ဢဝ်ၸရၢင်းၵူၼ်းတင်းလၢႆ ဢၼ်ပွင်းၵၼ်ယဝ်ႉၼၼ်ႉ သၢၵ်ႈတီႈၶုၼ်ႁေႃၶမ်းလႄႈ ၵႃႈတီႈမဵဝ်း ဢီႉသရေႇလႃႉ မီး ႁူဝ်ႁၢၼ်ၵူၼ်းသိုၵ်းဢၼ်ယိပ်းၵမ်လၢပ်ႇပႅတ်ႇသႅၼ်၊ ၵႃႈတီႈမဵဝ်း ယူႉတႃႉ မီးႁႃႈသႅၼ်ဢေႃႈ။-

10တႃႇဝိတ်ႈ ၼၼ်ႉ ၼပ်ႉဢၢၼ်ႇၵူၼ်းတင်းလၢႆသေယဝ်ႉ၊ ၼႅင်ၸႂ်လႄႈ တႃႇဝိတ်ႈ တွင်းပၢၼ်ႇလဝ်ႊလၢတ်ႈတီႈထႃႇဝရႃႉၽြႃးလႄႈဝႃႈ၊ ၶႃႈၸဝ်ႈၽိတ်းပိူင်ႈၼႃႇလူင်လၢင် ၼႂ်းလွင်ႈတၢင်းဢၼ်ၶႃႈၸဝ်ႈႁဵတ်းမႅၼ်ႈၼၼ်ႉတီႈၶႃႈယဝ်ႉ။ တေႃႈမိူဝ်ႈလဵဝ်ၼႆႉ၊ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈပွႆႇလွတ်ႈဢပႅတ်ႈၶႃႈၸဝ်ႈႁဝ်းသေၵမ်းတီႈၶႃႈ။ ၶႃႈၸဝ်ႈလႆႈႁဵတ်းဢမူႉဢၼ်မိူၵ်ႈၼႃႇလူင်လၢင်ၼႆႉ မႅၼ်ႈယဝ်ႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

11မိူဝ်ႈဢၼ် တႃႇဝိတ်ႈ လုၵ်ႉၶိင်ႇၵၢင်ၼႂ်ၼၼ်ႉၸိုင် ၼုၵ်ႈၵပၢတ်ႈထႃႇဝရႃႉၽြႃးႁွတ်ႈမႃးတီႈပရေႃးၽႅတ်ႈ ၵၢတ်ႉ ဢၼ်ပဵၼ်ၵူၼ်း ဢၼ်ပွင်ႇႁူတႃလႅင်းတီႈ တႃႇဝိတ်ႈ ၼၼ်ႉလႄႈဝႃႈ၊-

12မႂ်းၵႂႃႇမွၵ်ႇလၢတ်ႈတီႈ တႃႇဝိတ်ႈ လႄႈဝႃႈ၊ ထႃႇဝရႃႉၽြႃး မီးဢမိင်ႉၸဝ်ႈၸမ်ႉ၊ ၵဝ်ၼႄပျႃးလွင်ႈတၢင်းသၢမ်ပိူင်တီႈမႂ်းဢေႃႈ။ မႂ်းတၵ်းလႆႈလိူၵ်ႈၵဵပ်းဢဝ်သေပႃးပႃး ပုၼ်ႈဢၼ်ၵဝ်တၵ်းႁဵတ်းတီႈမႂ်းဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆလႄႈ၊-

13ၵၢတ်ႉ ၼၼ်ႉၵႂႃႇၵႃႈတီႈ တႃႇဝိတ်ႈ သေလႄႈ လဝ်ႊလၢတ်ႈလႄႈဝႃႈ၊ တၵ်းလႆႈႁႂ်ႈၶဝ်ႈၵႃႈမၢၵ်ႇပႅင်း ၵႃႈတီႈမိူင်းၸဝ်ႈႁဝ်းသၢမ်ပီႊတဵမ်တဵမ်တီႈၶႃႈႁိုဝ်။ ဢမ်ႇၼၼ်ၵေႃႈ တၵ်းလႆႈႁႂ်ႈၸဝ်ႈႁဝ်းဢွၵ်ႇပၢႆႈရၢၼ်ႇသူႇၸဝ်ႈႁဝ်းယူႇသၢမ်လိူၼ်တဵမ်တဵမ်လႄႈ ၶဝ်လႆႈလိုပ်ႈလမ်းၸွမ်းၸဝ်ႈႁဝ်းယူႇတီႈၶႃႈႁိုဝ်။ ဢမ်ႇၼၼ်ၵေႃႈ တၵ်းလႆႈႁႂ်ႈၵႃႇလႃႉႁႃႈလႅင်မိူင်း ႁွတ်ႈထိုင်ၵႃႈတီႈမိူင်းၸဝ်ႈႁဝ်း သၢမ်ဝၼ်းတဵမ်တဵမ်တီႈၶႃႈႁိုဝ်။ တေႃႈလဵဝ်ၼႆႉ ၶႅၼ်းတေႃႈၶႆႈၸႂ်ဝူၼ်ႉၸႂ်လူၺ်ႈလွင်ႈဢၼ် ၶႃႈၸဝ်ႈတၵ်းလႆႈၶိုၼ်းလဝ်ႊလၢတ်ႈတီႈၵေႃႉဢၼ် ပွႆႇၸႂ်ႉၶႃႈၸဝ်ႈမႃးၼၼ်ႉ ၸိူဝ်ႉၼင်ႇႁိုဝ်ၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

14တႃႇဝိတ်ႈ ၵေႃႈၶိုၼ်းလၢတ်ႈတီႈ ၵၢတ်ႉ လႄႈဝႃႈ၊ ၵဝ်ၼႆႉႁွတ်ႈထိုင်ၵႃႈၼႂ်းတၢင်းဢၼ်ၵိတ်ႇဢၼ်ၵႅပ်ႈၼႃႇလူင်လၢင်ယဝ်ႉလူင်ပႄႇ။ ႁႂ်ႈႁဝ်းႁွတ်ႈထိုင်ၵႃႈၼႂ်းမိုဝ်းထႃႇဝရႃႉၽြႃးသေၵမ်းလူၺ်ႈ။ ၵရူႉၼႃႇမၼ်းၸဝ်ႈယႂ်ႇၼႃႇဢေႃႈ။ ယႃႇပေႁႂ်ႈၵဝ်ႁွတ်ႈထိုင်ၵႃႈၼႂ်းမိုဝ်းၵူၼ်းသေၵမ်း၊ ဝႃႈၼင်ႇၼႆဢေႃႈ။

15ထႃႇဝရႃႉၽြႃး ပွႆႇၵႃႇလႃႉႁႃႈလႅင်မိူင်းႁွတ်ႈထိုင်ၵႃႈတီႈမဵဝ်း ဢီႉသရေႇလႃႉ ၸႃႉၸဵမ်ၶိင်ႇၵၢင်ၼႂ်ၼၼ်ႉ တေႃႇထိုင်ႁွတ်ႈၶိင်ႇဢၼ်မၵ်းၶၢၼ်းဝႆႉၼၼ်ႉလႄႈ ဢဝ်ၵႃႈတီႈဝဵင်း တၢၼ်ႇ ၵႂႃႇ တေႃႇထိုင်ႁွတ်ႈဝဵင်း ပေႇရသေႇၽႃႉ ၼၼ်ႉလႄႈ ၵူၼ်းတၢႆၸဵတ်းမိုၼ်ႇဢေႃႈ။-

16မိူဝ်ႈဢၼ်တမၢၼ်ႇၵၢင်ႁၢဝ် ယဵတ်ႇမိုဝ်းၸူးဝဵင်း ယေႇရူႉသလႅမ်ႇ ႁႂ်ႈလႆႈယႃႉပႅတ်ႈဝဵင်းၼၼ်ႉၼၼ်ႉၸိုင်၊ ထႃႇဝရႃႉၽြႃး ၶုၵ်းၸႂ်လႆႈ မႆႈၸႂ်လူၺ်ႈၽေးၼၼ်ႉလႄႈ မီးဢမိင်ႉတီႈတမၢၼ်ႇၵၢင်ႁၢဝ်ဢၼ်ယႃႉပႅတ်ႈၵူၼ်းတင်းလၢႆၼၼ်ႉလႄႈဝႃႈ၊ ပေႃးယဝ်ႉ။ ယိုတ်းဢဝ်မိုဝ်းမႂ်း ၶိုၼ်းသေတႃႉ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉတမၢၼ်ႇၵၢင်ႁၢဝ်ထႃႇဝရႃႉၽြႃးၼၼ်ႉ မီးယူႇၵႃႈတီႈႁိမ်းတလၢင်းယဵပ်ႇၶဝ်ႈ ဢရေႃးၼႃႇ ၵူၼ်း ယေႇပူႉသီႉ ၼၼ်ႉဢေႃႈ။-

17တႃႇဝိတ်ႈ ႁၼ်တမၢၼ်ႇၵၢင်ႁၢဝ် ဢၼ်ပၼ်တၢမ်ႇတီႈၵူၼ်းတင်းလၢႆၼၼ်ႉသေယဝ်ႉ၊ တွင်းပၢၼ်ႇတီႈထႃႇဝရႃႉၽြႃးလႄႈဝႃႈ၊ ၶႃႈၸဝ်ႈၽိတ်းပိူင်ႈတီႈၶႃႈယဝ်ႉ။ ၶႃႈၸဝ်ႈႁဵတ်းႁၢႆႉႁဵတ်းမိူၵ်ႈတီႈၶႃႈယဝ်ႉ။ သူဝ်းၸိူဝ်းၼႆႉၸမ်ႉ၊ ႁဵတ်းၵႃႈသင်မႅၼ်ႈတီႈၶႃႈ၊ ႁႂ်ႈမိုဝ်းၸဝ်ႈႁဝ်းႁွတ်ႈထိုင်ၵႃႈၼိူဝ်ၶႃႈၸဝ်ႈ ဢိၵ်ႇတင်းပီႈၼွင်ႉၸိူဝ်ႉၶိူဝ်းၶႃႈၸဝ်ႈသေၵမ်းတီႈၶႃႈ၊ ဝႃႈၼင်ႇၼႆဢေႃႈ။

18ၼႂ်းဝၼ်းၼၼ်ႉၵမ်းလဵဝ်၊ ၵၢတ်ႉ ၼၼ်ႉမႃးတီႈ တႃႇဝိတ်ႈ လႄႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်းၶိုၼ်ႈၵႂႃႇလႄႈ တႄႇႁဵတ်းယိတ်ႈပလၢင်ႇပုၼ်ႈထႃႇဝရႃႉၽြႃး ၵႃႈတီႈတလၢင်းယဵပ်ႇၶဝ်ႈ ဢရေႃးၼႃႇ ၵူၼ်း ယေႇပူႉသီႉ ၼၼ်ႉသေၵမ်းတီႈၶႃႈ၊ ဝႃႈၼင်ႇၼႆလႄႈ၊-

19ၵႃႈၼင်ႇဢၼ် ၵၢတ်ႉ သင်ႇလၢတ်ႈၼၼ်ႉ တႃႇဝိတ်ႈ ၶိုၼ်ႈၵႂႃႇၸွမ်း ၵႃႈၼင်ႇဢၼ်ဢမိင်ႉထႃႇဝရႃႉၽြႃးမီးၼၼ်ႉဢေႃႈ။-

20ၼင်ႇၼၼ်လႄႈ ဢရေႃးၼႃႇ တူၺ်းလႄႈႁၼ်ၶုၼ်ႁေႃၶမ်းဢိၵ်ႇတင်းၶႃႈမၼ်းၵူၼ်းမၼ်းတင်းလၢႆ မႃးၸူးၵႃႈတီႈမၼ်းၼၼ်ႉသေယဝ်ႉ၊ ဢွၵ်ႇၵႂႃႇၵႃႈတီႈၼွၵ်ႈလႄႈ ၶုပ်ႉမူပ်ႇဝၢင်းႁူဝ်ၵႃႈၼိူဝ်လိၼ် ၵႃႈတီႈၽၢႆႇၼႃႈၶုၼ်ႁေႃၶမ်းယူႇသေလႄႈ ဢရေႃးၼႃႇ လဝ်ႊထၢမ်လႄႈဝႃႈ၊-

21ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းၶႃႈ ၸဝ်ႈၶုၼ်လူင်မႃးၵႃႈတီႈဢၼ်ၶႃႈၸဝ်ႈႁဝ်းမီးၼႆႉၼင်ႇႁိုဝ်တီႈၶႃႈ၊ ဝႃႈၼင်ႇၼႆသေယဝ်ႉ၊ တႃႇဝိတ်ႈ မီးဢမိင်ႉလႄႈဝႃႈ၊ မႃးႁႂ်ႈလႆႈသိုဝ်ႉဢဝ်တလၢင်းယဵပ်ႇၶဝ်ႈမႂ်းသေလႄႈ တႄႇႁဵတ်းယိတ်ႈပလၢင်ႇပုၼ်ႈထႃႇဝရႃႉၽြႃး ႁႂ်ႈၽေးၵႃႇလႃႉႁႃႈလႅင်မိူင်းလႆႈထၢတ်ႇယဵၼ်သေၵႃႈတီႈၵူၼ်းတင်းလၢႆဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

22ဢရေႃးၼႃႇ ၵေႃႈလဝ်ႊလၢတ်ႈတီႈ တႃႇဝိတ်ႈ လႄႈဝႃႈ၊ ၸဝ်ႈႁဝ်းၶႃႈ ၸဝ်ႈၶုၼ်လူင် ၶႅၼ်းတေႃႈဢဝ်လႄႈပုၵ်ႈၸေႃႇၸွမ်းၵႃႈၼင်ႇဢၼ် ၸႂ်ၸဝ်ႈႁဝ်းမီးသေၵမ်းတီႈၶႃႈ။ တူၺ်းတီႈၶႃႈလူး။ မီးဝူဝ်းပုၼ်ႈဢၼ်တၵ်းႁဵတ်းယိတ်ႈဢၼ်တုတ်ႇၽႆး ဢိၵ်ႇတင်းၶိူင်ႈပိူင်ဢၼ်ပေႃႉၶဝ်ႈၼူတ်ႈၶဝ်ႈ တင်းၶိူင်ႈပိူင်ဢၼ်ၸၢပ်ႈသႅင်ႇၵၼ်တင်းဝူဝ်းၸိူဝ်းၼၼ်ႉ ပုၼ်ႈၽိုၼ်းယူႇတီႈၶႃႈဢေႃႈ။-

23ၵႃႈမီးတင်းသဵင်ႈတင်းလူင်ၼႆႉၸမ်ႉ၊ ၸဝ်ႈၶုၼ်လူင်တီႈၶႃႈ၊ ဢရေႃးၼႃႇ ဢဝ်သၢၵ်ႈတီႈၸဝ်ႈၶုၼ်လူင်တီႈၶႃႈဢေႃႈ၊ ဝႃႈၼင်ႇၼႆလႄႈ ဢရေႃးၼႃႇ သမ်ႉလဝ်ႊလၢတ်ႈလႄႈဝႃႈ၊ ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းႁပ်ႉတုင်းဢဝ်ၸဝ်ႈႁဝ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

24ၶုၼ်ႁေႃၶမ်းၵေႃႈမီးဢမိင်ႉတီႈ ဢရေႃးၼႃႇ လႄႈဝႃႈ၊ ဢမ်ႇၸႂ်ႈၵူၺ်ႉ။ ၵဝ်တၵ်းပၼ်ၵႃႈမၼ်းၶၼ်မၼ်းလႄႈ သိုဝ်ႉဢဝ်ဢမၢၼ်ႇၶၼ်ပဵၼ်ဢေႃႈ။ ငိုၼ်းၵဝ်ယင်းဢမ်ႇသဵင်ႈလႄႈ ၵဝ်ဢမ်ႇမီးဢလူဝ်ႇၶႂ်ႈပုၵ်ႈၸေႃႇယိတ်ႈဢၼ်တုတ်ႇၽႆး တီႈထႃႇဝရႃႉၽြႃး ၽြႃးပဵၼ်ၸဝ်ႈၵဝ်ၵူၺ်ႉ၊ ဝႃႈၼင်ႇၼႆသေယဝ်ႉ၊ တႃႇဝိတ်ႈ ဢဝ်ငိုၼ်းႁႃႈသိပ်းၵျၢပ်ႈ သၶေးလႃႉ ပၼ်သေလႄႈ သိုဝ်ႉဢဝ်တလၢင်းယဵပ်ႇၶဝ်ႈ ဢိၵ်ႇတင်းဝူဝ်းၸိူဝ်းၼၼ်ႉသေယဝ်ႉ၊-

25တႃႇဝိတ်ႈ တႄႇႁဵတ်း ယိတ်ႈပလၢင်ႇပုၼ်ႈထႃႇဝရႃႉၽြႃး ၵႃႈတီႈၼၼ်ႈလႄႈ ပုၵ်ႈၸေႃႇယိတ်ႈဢၼ်တုတ်ႇၽႆး ဢိၵ်ႇတင်းယိတ်ႈမိၵ်ႉသႃႇႁႃယႃႉဢေႃႈ။ ၼင်ႇၼၼ်လႄႈ ထႃႇဝရႃႉၽြႃးၵေႃႈ ထွမ်ႇဢဝ်ၵႂၢမ်းဢၼ်သူးတွင်းပုၼ်ႈမိူင်းၸဝ်ႈၼၼ်ႉလႄႈ ႁႂ်ႈၽေးၵႃႇလႃႉႁႃႈလႅင်မိူင်းၼၼ်ႉ ထၢတ်ႇယဵၼ်သေၵႃႈတီႈမဵဝ်း ဢီႉသရေႇလႃႉ ဢေႃႈ။ ထမ်ႇမႃႉရႃႇၸဝၢင်ႇၽိုၼ်တူႉတီႉယႃႉယဝ်ႉယဝ်ႉဢေႃႈ။