2 Samuel 14 — Shan

1မိူဝ်ႈဢၼ် ယႂႃႇၽႃႉ လုၵ်ႈၸၢႆး ၸေႇရူႉယႃႇ ႁူႉသၢႆငၢႆလွင်ႈဢၼ်ႁူဝ်ၸႂ်ၶုၼ်ႁေႃၶမ်းၸပ်းၸွႆး ဢပႃႉသလုမ်ႇ ၼၼ်ႉယူႇၼၼ်ႉၸိုင်၊-

2ယႂႃႇၽႃႉ ပွႆႇၸႂ်ႉၸူးၵႃႈတီႈဝဵင်း တေႇၵေႃႇ လႄႈ ႁွင်ႉဢဝ်မႄႈယိင်းဢၼ်မီးပိင်ႇၺႃႇၼၼ်ႉသေယဝ်ႉ၊ သင်ႇလၢတ်ႈလႄႈဝႃႈ၊ မႂ်းႁဵတ်းၸိူဝ်ႉၼင်ႇႁၢင်ႈႁူဝ်ၸႂ်ဢမ်ႇသႃႇ ၶၢင်းၶီၶၢင်းၽၢၼ်ၼၼ်ႉယူႇသေလႄႈ ၼုင်ႈၶူဝ်းၼုင်ႈမႃႇသႃႇယူႇတႃႉ။ ယႃႇပေတႃးၼမ်ႉမၼ်း။ ႁဵတ်းၸိူဝ်ႉၼင်ႇႁၢင်ႈမႄႈယိင်းဢၼ်ႁႆႈႁွင်ႉ ၶၢင်းၶီၶၢင်းၽၢၼ်ယူႇႁိုင်ၼႃႇ ၵွပ်ႈပိူဝ်ႈၵူၼ်းဢၼ်တၢႆယဝ်ႉၼၼ်ႉယူႇသေလႄႈ၊-

3ၶဝ်ႈၸူးၵႃႈတီႈၶုၼ်ႁေႃၶမ်းလႄႈ လဝ်ႊလၢတ်ႈတီႈမၼ်းၸဝ်ႈၸိူဝ်ႉၼင်ႇၼႆတႃႉ၊ ဝႃႈၼင်ႇၼႆဢေႃႈ။ ၼင်ႇၼၼ်လႄႈ ယႂႃႇၽႃႉ ဢဝ်ၵႂၢမ်းသႂ်ႇၼႂ်းသူပ်းမၼ်းၼၼ်ႉဝႆႉဢေႃႈ။

4မိူဝ်ႈမႄႈယိင်းၵူၼ်းဝဵင်း တေႇၵေႃႇ ၼၼ်ႉ ၶဝ်ႈၸူးၵႃႈတီႈၶုၼ်ႁေႃၶမ်းၼၼ်ႉၸိုင်၊ မၼ်းၶုပ်ႉမူပ်ႇၵႃႈၼိူဝ်လိၼ်ယူႇသေလႄႈဝႆႈလႄႈ လဝ်ႊလၢတ်ႈလႄႈဝႃႈ၊ ၸဝ်ႈၶုၼ်လူင်တီႈၶႃႈ၊ ဢဵတ်းလူၵႄႇသႄႇၸွႆႈထႅမ်သေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

5ၶုၼ်ႁေႃၶမ်းၵေႃႈထၢမ်လႄႈဝႃႈ၊ မႂ်းမီးဢမူႉၵႃႈသင်၊ ဝႃႈၼင်ႇၼႆသေယဝ်ႉ၊ မၼ်းလဝ်ႊလၢတ်ႈလႄႈဝႃႈ၊ ၶိင်းပဵၼ်ၶႃႈၼႆႉ ပဵၼ်မႄႈမူၵ်းမႄႈမၢႆႈ လႄႈၽူဝ်တၢႆတီႈၶႃႈဢေႃႈ။-

6ၶိင်းပဵၼ်ၶႃႈၼႆႉ မီးလုၵ်ႈၸၢႆးသွင်ၵေႃႉလႄႈ၊ သွင်ၶႃၼၼ်ႉ ၽိတ်းၵၼ်တီႈၶႃႈဢေႃႈ။ ၵွပ်ႈပိူဝ်ႈဢၼ်ၵေႃႉဢၼ်ၶႄဢမ်ႇမီးလႄႈ ၵေႃႉၼိုင်ႈႁဵတ်းတီႈၵေႃႉၼိုင်ႈ တေႃႇထိုင်ႁွတ်ႈထၼ်ႈပေႃးတၢႆၶႃႈဢေႃႈ။-

7မိူဝ်ႈလဵဝ်ၼႆႉပီႈၼွင်ႉၸိူဝ်ႉၶိူဝ်းၵႃႈမီး ဢွၼ်ၵၼ်လုၵ်ႉယူႇၽၢႆႇၼိုင်ႈ တင်းၶိင်းပဵၼ်ၶႃႈလႄႈဝႃႈ၊ တၵ်းလႆႈဢဝ်ၵေႃႉဢၼ်ဢဝ်ပီႈၸၢႆးမၼ်းတၢႆၼၼ်ႉ ဢၢပ်ႈပၼ်ႁႂ်ႈႁဝ်းလႆႈဢဝ်မၼ်းတၢႆ တၢင်တူဝ်ဢသၢၵ်ႈပီႈၸၢႆးမၼ်းဢၼ်မၼ်းဢဝ်တၢႆၼၼ်ႉဢေႃႈ။ ၼင်ႇၼၼ်လႄႈ ႁဝ်းတၵ်းပႄႇၽဵဝ်ႈၵေႃႉဢၼ် ၶၢမ်ႇဢမူၺ်ႇပႅတ်ႈဢေႃႈ၊ ဝႃႈၼင်ႇၼႆတီႈၶႃႈဢေႃႈ။ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၶဝ်တၵ်းဢွၼ်ၵၼ်လပ်းပႅတ်ႈမွတ်ႇပႅတ်ႈထၢၼ်ႇၽႆးဢၼ်ၵိုတ်းဢၼ်ၵျၢၼ်ႇဝႆႉတီႈၶိင်းပဵၼ်ၶႃႈၼၼ်ႉလႄႈ၊ တီႈၽူဝ်ၶိင်းပဵၼ်ၶႃႈၼၼ်ႉ ၶဝ်တၵ်းဢမ်ႇႁႂ်ႈၸိုဝ်ႈသဵင်မၼ်း ဢိၵ်ႇတင်းတၢင်းဢၼ်ယင်းၵိုတ်းယင်းၵျၢၼ်ႇဝႆႉတီႈမၼ်းၼၼ်ႉ ၵိုတ်းၵျၢၼ်ႇဝႆႉၵႃႈၼိူဝ်လိၼ်မိူင်းၼႆႉတီႈၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

8ၶုၼ်ႁေႃၶမ်းမီးဢမိင်ႉတီႈမႄႈယိင်းၼၼ်ႉလႄႈဝႃႈ၊ ၶိုၼ်းမိူဝ်းၵႂႃႇၵႃႈတီႈႁိူၼ်းမႂ်းလူးၵွၼ်ႇတႃႉ။ ၵဝ်တၵ်းၸီႇယၢင်ႇဢမူႉမႂ်းဢေႃႈ၊ ဝႃႈၼင်ႇၼႆဢေႃႈ။-

9မႄႈယိင်းၵူၼ်းဝဵင်း တေႇၵေႃႇ ၼၼ်ႉၵေႃႈလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၸဝ်ႈႁဝ်းၶႃႈ၊ ၸဝ်ႈၶုၼ်လူင်တီႈၶႃႈ၊ ႁႂ်ႈဢပႅတ်ႈႁွတ်ႈၵႃႈၼိူဝ်ၶိင်းပဵၼ်ၶႃႈ ဢိၵ်ႇတင်းပီႈၼွင်ႉၸိူဝ်ႉၶိူဝ်းၶိင်းပဵၼ်ၶႃႈသေၵမ်းလူၺ်ႈ။ ႁႂ်ႈၶုၼ်ႁေႃၶမ်းတင်းရႃႇၸႃႉပလၢင်ႇမၼ်းၸဝ်ႈၼၼ်ႉ ၵၢင်းလွတ်ႈတင်းဢပႅတ်ႈသေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊-

10ၶုၼ်ႁေႃၶမ်းမီးဢမိင်ႉလႄႈဝႃႈ၊ ၵေႃႉဢၼ်တၢင်ႇဢပႅတ်ႈတီႈမႂ်းၼၼ်ႉၸိုင်၊ မႂ်းႁွင်ႉမႃးတီႈၵဝ်တႃႉ။ ၵမ်းလိုၼ်းမၼ်းဢမ်ႇလႆႈယႃႉယူၵ်ႉမႂ်းထႅင်ႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

11မၼ်းၶိုၼ်းလဝ်ႊလၢတ်ႈလႄႈဝႃႈ၊ ၵွပ်ႈပိူဝ်ႈဢၼ်ၵူဝ်ၶဝ်တၵ်းဢဝ်လုၵ်ႈၸၢႆးၶိင်းပဵၼ်ၶႃႈတၢႆလႄႈ လွင်ႈၼင်ႇႁိုဝ်ၵေႃႉဢၼ်ဢဝ်တၢႆၸွမ်းၼၼ်ႉ တၵ်းဢမ်ႇလႆႈယႃႉၽဵဝ်ႈပႅတ်ႈလႄႈယူႇၸိုင်၊ ၸဝ်ႈၶုၼ်လူင် ၶုၵ်းၸႂ်လႆႈၶႆႈၸႂ်ထူပ်းထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊ မၼ်းမီးဢမိင်ႉလႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃးဢသၢၵ်ႈလိပ်းယူႇၼၼ်ႉ၊ ၶူၼ်ႁူဝ်လုၵ်ႈၸၢႆးမႂ်း ဢမ်ႇလႆႈတူၵ်းၵႃႈၼိူဝ်လိၼ်သေသဵၼ်ႈၵူၺ်ႉ၊ ဝႃႈၼင်ႇၼႆဢေႃႈ။-

12လႆႈသမ်ႉ မႄႈယိင်းၼၼ်ႉတွင်းပၢၼ်ႇလဝ်ႊလၢတ်ႈလႄႈဝႃႈ၊ ၶႅၼ်းတေႃႈပၼ်ဢၶႂၢင်ႉဢၼ် ၶိင်းပဵၼ်ၶႃႈၸဝ်ႈႁဝ်းလႆႈလဝ်ႊလၢတ်ႈၵႂၢမ်းသေၶေႃႈသေၵမ်းတီႈၸဝ်ႈႁဝ်းၶႃႈၸဝ်ႈၶုၼ်လူင်သေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်းမီးဢမိင်ႉလႄႈဝႃႈ၊ လဝ်ႊတႃႉ၊ ဝႃႈၼင်ႇၼႆဢေႃႈ။-

13မႄႈယိင်းၼၼ်ႉၵေႃႈလဝ်ႊလၢတ်ႈလႄႈဝႃႈ၊ ပေႃးပဵၼ်ၸိူဝ်ႉၼင်ႇၼၼ်ၸိုင်၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈႁဝ်းၵျၢမ်ႇပွင်ၸိူဝ်ႉၼင်ႇၼၼ်ယူႇၽၢႆႇၼိုင်ႈ တင်းၵူၼ်းၽြႃးပဵၼ်ၸဝ်ႈတင်းလၢႆယူႇၼင်ႇႁိုဝ်တီႈၶႃႈ။ ၼႂ်းလွင်ႈဢၼ်ၸဝ်ႈၶုၼ်လူင်မီးဢမိင်ႉၼၼ်ႉ ၸဝ်ႈၶုၼ်လူင်ပဵၼ်ၸိူဝ်ႉၼင်ႇၵေႃႉဢၼ်မီးဢပႅတ်ႈ ၵွပ်ႈပိူဝ်ႈဢၼ်ၸဝ်ႈၶုၼ်လူင်ဢမ်ႇၶိုၼ်းႁွင်ႉဢဝ် ၵေႃႉဢၼ်ၸဝ်ႈၶုၼ်လူင်ႁေႃႈပႅတ်ႈၼၼ်ႉမႃးၼၼ်ႉယဝ်ႉ တီႈၶႃႈလူင်ပႄႇ။-

14ၵူၼ်းႁဝ်းၼႆႉတၵ်းလႆႈတၢႆလႄႈပဵၼ်ၸိူဝ်ႉၼင်ႇၼမ်ႉဢၼ်ထွၵ်ႇပႅတ်ႈၵႃႈၼိူဝ်လိၼ်လႄႈ ဢမ်ႇၶိုၼ်းၵွပ်ႇဢဝ်လႆႈၼၼ်ႉတီႈၶႃႈဢေႃႈ။ ၽြႃးပဵၼ်ၸဝ်ႈဢမ်ႇဢဝ်ဢသၢၵ်ႈၵူၼ်းတၢႆလႄႈ မၼ်းၸဝ်ႈၵျၢမ်ႇပွင်ႁႂ်ႈၵေႃႉဢၼ် လႆႈၶၢမ်ႇတၢင်းဢၼ်ႁေႃႈဢွၵ်ႇၼၼ်ႉဢမ်ႇလႆႈ ပဵၼ်ၵေႃႉဢၼ်လႆႈၶၢမ်ႇတၢင်းဢၼ်ႁေႃႈဢွၵ်ႇယူႇသေႇသေႇၼၼ်ႉတီႈၶႃႈ၊-

15ပိူဝ်ႈဢၼ်ပဵၼ်ၼင်ႇၼႆလႄႈ လွင်ႈဢၼ်ၶိင်းပဵၼ်ၶႃႈမႃးလႄႈ လဝ်ႊလၢတ်ႈဢမူႉၼႆႉတီႈၸဝ်ႈႁဝ်းၶႃႈ ၸဝ်ႈၶုၼ်လူင်ၼႆႉၸမ်ႉ၊ ၵူၼ်းတင်းလၢႆႁဵတ်းႁႂ်ႈၶိင်းပဵၼ်ၶႃႈ ၵူဝ်ႁႄတီႈၶႃႈဢေႃႈ။ ၶိင်းပဵၼ်ၶႃႈၸဝ်ႈႁဝ်းၼႆႉၵေႃႈဝႃႈ၊ ၵဝ်တၵ်းလဝ်ႊလၢတ်ႈတီႈၶုၼ်ႁေႃၶမ်းဢေႃႈ။ ၶုၼ်ႁေႃၶမ်းၸၢင်ႈၶႄး တၵ်းႁဵတ်းၸွမ်းၵႃႈၼင်ႇဢၼ်ၶႃႈမၼ်းၸဝ်ႈ တွင်းပၢၼ်ႇၼၼ်ႉဢေႃႈ။-

16လွင်ႈမၼ်းၸမ်ႉ ၶုၼ်ႁေႃၶမ်းတၵ်းထွမ်ႇဢဝ် ႁႂ်ႈလႆႈၼုၵ်ႈဢဝ်ၶႃႈမၼ်းၸဝ်ႈ လွတ်ႈသေၵႃႈၼႂ်းမိုဝ်းၵေႃႉဢၼ် တၵ်းပႄႇၽဵဝ်ႈၵဝ်ဢိၵ်ႇတင်းလုၵ်ႈၸၢႆးၵဝ်ပႅတ်ႈသေၵႃႈၼိူဝ်လိၼ်ဢမူၺ်ႇၽြႃးပဵၼ်ၸဝ်ႈၼႆႉဢေႃႈ၊ ဝႃႈၼင်ႇၼႆတီႈၶႃႈဢေႃႈ။-

17ၶိင်းပဵၼ်ၶႃႈၸဝ်ႈႁဝ်းၵေႃႈဝႃႈ၊ ႁႂ်ႈဢမိင်ႉၸဝ်ႈၵဝ် ၸဝ်ႈၶုၼ်လူင်ၼၼ်ႉ ပၼ်ၵတ်းယဵၼ်ၶျၢမ်းသႃႇသေၵမ်းလူၺ်ႈ။ ၸဝ်ႈၵဝ်ၸဝ်ႈၶုၼ်လူင် ၸၵ်းၽႄလႄႈႁူႉလွင်ႈတၢင်းဢၼ်လီ ဢၼ်ဢမ်ႇလီၼၼ်ႉလႆႈမိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈၼၼ်ႉဢေႃႈ၊ ဝႃႈၼင်ႇၼႆယူႇတီႈၶႃႈဢေႃႈ။ ထႃႇဝရႃႉၽြႃး ၽြႃးပဵၼ်ၸဝ်ႈ ၸဝ်ႈႁဝ်းၼၼ်ႉ တၵ်းမီးယူႇလူၺ်ႈၵၼ်တင်းၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

18မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉတီႈမႄႈယိင်းၼၼ်ႉလႄႈဝႃႈ၊ မႂ်းယႃႇပေသိူင်ႇပေဢမ်လွင်ႈတၢင်းဢၼ်ၵဝ်တွင်ႈထၢမ်တီႈမႂ်းၼၼ်ႉ ဝႆႉသေၵႃႈတီႈၵဝ်သေၵမ်း။ မိူဝ်ႈဢၼ်ဝႃႈၼင်ႇၼႆၸိုင်၊ မႄႈယိင်းၵေႃႈလဝ်ႊလၢတ်ႈလႄႈဝႃႈ၊ ၸဝ်ႈႁဝ်းၶႃႈ ၸဝ်ႈၶုၼ်လူင်တီႈၶႃႈ၊ မီးဢမိင်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

19ၶုၼ်ႁေႃၶမ်းၵေႃႈထၢမ်လႄႈဝႃႈ၊ ၼႂ်းလွင်ႈတၢင်းၵႃႈမီးၼႆႉ ယႂႃႇၽႃႉ ပၼ်တၢင်းၵျၢမ်ႇတၢင်းပွင်တီႈမႂ်းဢမ်ႇၸႂ်ႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊ မႄႈယိင်းၼၼ်ႉၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်းၶႃႈ ၸဝ်ႈၶုၼ်လူင်တီႈၶႃႈ၊ ၵႃႈၼင်ႇဢၼ်ၸဝ်ႈႁဝ်းဢသၢၵ်ႈလိပ်းယူႇၼၼ်ႉ၊ ၽူႈလႂ်ဢမ်ႇဝႄႈပိူင်ႈသေၵႃႈတီႈသဵၼ်ႈတၢင်းဢၼ်ၸဝ်ႈႁဝ်းၶႃႈ ၸဝ်ႈၶုၼ်လူင်မီးဢမိင်ႉၼၼ်ႉၵႂႃႇၽၢႆႇၶႂႃၽၢႆႇသၢႆႉလႆႈတီႈၶႃႈ။ ၶႃႈၸဝ်ႈႁဝ်း ယႂႃႇၽႃႉ ၼၼ်ႉ သင်ႇလၢတ်ႈဝႆႉတီႈၶိင်းပဵၼ်ၶႃႈလႄႈ ဢဝ်ၵႂၢမ်းတင်းသဵင်ႈတင်းလူင်ၼႆႉ သႂ်ႇဝႆႉၵႃႈၼႂ်းသူပ်းၶိင်းပဵၼ်ၶႃႈတီႈၶႃႈဢေႃႈ။-

20ၶႃႈၸဝ်ႈႁဝ်း ယႂႃႇၽႃႉ ၼၼ်ႉ ၸီႇယၢင်ႇႁႂ်ႈႁဵတ်းၸွမ်းပုင်ႇႁၢင်ႈၸိူဝ်ႉၼင်ႇၼၼ်လႄႈ ၸဝ်ႈႁဝ်းၵေႃႈမီးပိင်ႇၺႃႇၸိူဝ်ႉၼင်ႇဢၼ် တမၢၼ်ႇၵၢင်ႁၢဝ်ၽြႃးပဵၼ်ၸဝ်ႈမီးပိင်ႇၺႃႇၼၼ်ႉ တေႃႇထိုင်ႁွတ်ႈထၼ်ႈပေႃးႁူႉၵႃႈဢၼ်မီးၵႃႈၼိူဝ်လိၼ်မိူင်းၼႆႉလႆႈတီႈၶႃႈဢေႃႈ၊ ဝႃႈၼင်ႇၼႆဢေႃႈ။

21မိူဝ်ႈၼၼ်ႉၶုၼ်ႁေႃၶမ်းမီးဢမိင်ႉတီႈ ယႂႃႇၽႃႉ လႄႈဝႃႈ၊ ဢမူႉၼႆႉၸိုင်ၵဝ်လႆႈၸီႇယၢင်ႇယဝ်ႉ။ ပိူဝ်ႈၼႆလႄႈ မႂ်းၵႂႃႇလႄႈႁွင်ႉဢဝ် ဢပႃႉသလုမ်ႇ ဢွၼ်ႇၼၼ်ႉမႃးတႃႉ၊ ဝႃႈၼင်ႇၼႆဢေႃႈ။-

22ယႂႃႇၽႃႉ ၵေႃႈၶုပ်ႉမူပ်ႇၵႃႈၼိူဝ်လိၼ်ယူႇသေလႄႈ ဝႆႈလႄႈယွင်ႈယေႃးၵျေးၸူးၶုၼ်ႁေႃၶမ်းလႄႈဝႃႈ၊ ၸဝ်ႈႁဝ်းၶႃႈၸဝ်ႈၶုၼ်လူင်တီႈၶႃႈ၊ ဝၼ်းမိူဝ်ႈၼႆႉ ၶႃႈၸဝ်ႈႁဝ်းႁူႉလွင်ႈဢၼ်ၶႃႈၸဝ်ႈထူပ်းၵျေးၸူး သိုဝ်ႈၼႃႈတႂ်ႈတႃၸဝ်ႈႁဝ်း ၵွပ်ႈပိူဝ်ႈဢၼ်ၸဝ်ႈႁဵတ်းၸွမ်းၵႃႈၼင်ႇဢၼ်ၶႃႈၸဝ်ႈလဝ်ႊယွၼ်းၼၼ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

23လိုၼ်းၼၼ်ႉ ယႂႃႇၽႃႉ လုၵ်ႉလႄႈ ၵႂႃႇၵႃႈတီႈဝဵင်း ၵေႇသူႉရႃႉ သေယဝ်ႉ၊ ဢဝ် ဢပႃႉသလုမ်ႇ မႃး ၵႃႈတီႈဝဵင်း ယေႇရူႉသလႅမ်ႇ ဢေႃႈ။-

24ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊ ႁႂ်ႈမၼ်းဝႄႉၵႂႃႇၸူးၵႃႈတီႈႁိူၼ်းမၼ်းသေ။ ယႃႇပေႁႂ်ႈမၼ်းႁၼ်ၼႃႈၵဝ်၊ ဝႃႈၼင်ႇၼႆလႄႈ ဢပႃႉသလုမ်ႇ ဝႄႉၵႂႃႇၸူးၵႃႈတီႈႁိူၼ်းမၼ်းသေလႄႈ မၼ်းဢမ်ႇလႆႈႁၼ်ၼႃႈၶုၼ်ႁေႃၶမ်း။

25ၼႂ်းမဵဝ်း ဢီႉသရေႇလႃႉ တင်းသဵင်ႈတင်းမူတ်းၼၼ်ႉ၊ ၵေႃႉဢၼ်ႁၢင်ႈလီမိူၼ်ၸိူဝ်ႉၼင်ႇ ဢပႃႉသလုမ်ႇ လႄႈ လႆႈၶၢမ်ႇတၢင်းဢၼ်ယွင်ႈယေႃးၼၼ်ႉ ဢမ်ႇမီးသေၵေႃႉသေၵူၼ်း။ ၸႃႉၸဵမ်ၽႃႇတိၼ်မၼ်းလႄႈတေႃႇထိုင်ႁွတ်ႈၸိၵ်းႁူဝ်မၼ်း ဢမ်ႇမီးဢပႅတ်ႈသေၸိူဝ်ႉသေဢၼ်။-

26မိူဝ်ႈဢၼ်မၼ်းတႅပ်းၶူၼ်ႁူဝ်မၼ်းၼၼ်ႉၸိုင် မၼ်းၸင်ႈႁိဝ်ႈၶူၼ်ႁူဝ်မၼ်းၼၼ်ႉ ၸွမ်းလူၺ်ႈၵျၢပ်ႈၶုၼ်ႁေႃၶမ်းသေလႄႈ လႆႈသွင်ပၢၵ်ႇၵျၢပ်ႈ သၶေးလႃႉ ဢေႃႈ။ မၼ်းတႅပ်းပႅတ်ႈၼႂ်းတီႈသုတ်းတီႈၵွႆပီႊ ၵူႈပီႊလႄႈ တႅပ်းပႅတ်ႈၵွပ်ႈပိူဝ်ႈဢၼ်ၶူၼ်ႁူဝ်မၼ်းၼၼ်ႉ ၼၵ်းၼႃႇၼၼ်ႉဢေႃႈ။-

27ဢပႃႉသလုမ်ႇ ၼၼ်ႉ လႆႈလုၵ်ႈၸၢႆးသၢမ်ၵေႃႉ ဢိၵ်ႇတင်းလုၵ်ႈယိင်းဢၼ်လႆႈၸိုဝ်ႈ တႃႇမႃႇ ၼၼ်ႉ ၵေႃႉၼိုင်ႈဢေႃႈ။ လုၵ်ႈယိင်းၼၼ်ႉ ပဵၼ်ၵေႃႉဢၼ်ႁၢင်ႈလီၼႃႇလူင်လၢင်ဢေႃႈ။

28ဢပႃႉသလုမ်ႇ ၼၼ်ႉ ယင်းဢမ်ႇလႆႈႁၼ်ၼႃႈၶုၼ်ႁေႃၶမ်းလႄႈယူႇၵႃႈၼႂ်းဝဵင်း ယေႇရူႉသလႅမ်ႇ သွင်ပီႊသေယဝ်ႉ၊-

29ဢပႃႉသလုမ်ႇ ပွႆႇၸႂ်ႉႁွင်ႉဢဝ် ယႂႃႇၽႃႉ ႁႂ်ႈလႆႈပွႆႇၸႂ်ႉမၼ်းၵႂႃႇၵႃႈတီႈၶုၼ်ႁေႃၶမ်းသေၵေႃႈ ယႂႃႇၽႃႉ ဢမ်ႇမႃး။ ႁွင်ႉဢဝ်ၵမ်းတူႉတီႉယႃႉသေၵေႃႈဢမ်ႇမႃး။-

30ၵွပ်ႈပိူဝ်ႈၼင်ႇၼၼ်လႄႈမၼ်းၼၼ်ႉ လၢတ်ႈတီႈၶႃႈမၼ်းၵူၼ်းမၼ်းတင်းလၢႆလႄႈဝႃႈ၊ တူၺ်းလူး၊ တူင်ႈၼႃး ယႂႃႇၽႃႉ ၼၼ်ႉ ၸမ်ၵၼ်တင်းတီႈယူႇႁဝ်းလႄႈ မီးၶဝ်ႈမူႉယေႃးဢေႃႈ။ ဢွၼ်ၵၼ်ၵႂႃႇလႄႈဢဝ်ၽႆးတုတ်ႇတႃႉ၊ ဝႃႈၼင်ႇၼႆလႄႈ၊ ၶႃႈၵူၼ်း ဢပႃႉသလုမ်ႇ ၸိူဝ်းၼၼ်ႉ ဢွၼ်ၵၼ်ဢဝ်ၽႆးတုတ်ႇဢေႃႈ။-

31မိူဝ်ႈၼၼ်ႉ ယႂႃႇၽႃႉ လုၵ်ႉလႄႈ ၵႂႃႇၸူးၵႃႈတီႈႁိူၼ်း ဢပႃႉသလုမ်ႇ လႄႈ လဝ်ႊထၢမ်လႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၶႃႈၵူၼ်းၸဝ်ႈႁဝ်းၸိူဝ်းၼၼ်ႉ ဢဝ်ၽႆးတုတ်ႇတူင်ႈၼႃးၶႃႈၸဝ်ႈၼင်ႇႁိုဝ်တီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်။-

32ဢပႃႉသလုမ်ႇ ၶိုၼ်းလၢတ်ႈတီႈ ယႂႃႇၽႃႉ လႄႈဝႃႈ၊ တူၺ်းလူး၊ ၵဝ်ပွႆႇၸႂ်ႉႁွင်ႉဢဝ်မႂ်းလႄႈဝႃႈ၊ မႃးၵႃႈတီႈၼႆႈ ႁႂ်ႈၵဝ်လႆႈပွႆႇၸႂ်ႉမႂ်းၵႂႃႇၵႃႈတီႈၶုၼ်ႁေႃၶမ်း ႁႂ်ႈမႂ်းလဝ်ႊလၢတ်ႈလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၶႃႈၸဝ်ႈၼႆႉလႆႈလုၵ်ႉသေၵႃႈတီႈဝဵင်း ၵေႇသူႉရႃႉ မႃးၼင်ႇႁိုဝ်တီႈၶႃႈ၊ ထုၵ်ႇလီယူႇၵႃႈတီႈဝဵင်းၼၼ်ႉယူႇတေႃႇထိုင်ႁွတ်ႈမိူဝ်ႈလဵဝ်ၼႆႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။ မိူဝ်ႈလဵဝ်ၼႆႉ ႁႂ်ႈၵဝ်လႆႈႁၼ်ၼႃႈၶုၼ်ႁေႃၶမ်းသေၵမ်း။ ပေႃးၵဝ်မီးဢပႅတ်ႈၸိုင်၊ ႁႂ်ႈမၼ်းၸဝ်ႈဢဝ်ၵဝ်တၢႆသေၵမ်းလူၺ်ႈ၊ ဝႃႈၼင်ႇၼႆသေယဝ်ႉ၊-

33ယႂႃႇၽႃႉ ၵႂႃႇတီႈၶုၼ်ႁေႃၶမ်းလႄႈ လဝ်ႊလၢတ်ႈသေလႄႈ မၼ်းႁွင်ႉဢဝ် ဢပႃႉသလုမ်ႇ ဢေႃႈ။ မၼ်းၼၼ်ႉၵေႃႈ မႃးလႄႈဝၢင်းႁူဝ်ၶုပ်ႉမူပ်ႇၵႃႈၼိူဝ်လိၼ် ၵႃႈတီႈၽၢႆႇၼႃႈၶုၼ်ႁေႃၶမ်းလႄႈ ၶုၼ်ႁေႃၶမ်းၼူမ် ဢပႃႉသလုမ်ႇ ဢေႃႈ။