2 Samuel 21

Shan

← Chapter 20 Jump to: Chapter 22 →

1လိုၼ်းၼၼ်ႉ ၼႂ်းၸူဝ်ႈပၢၼ် တႃႇဝိတ်ႈ ၼၼ်ႉ ပဵၼ်တၢင်းဢၼ်ၶဝ်ႈၵႃႈမၢၵ်ႇပႅင်းပီႊၼိုင်ႈယဝ်ႉပီႊၼိုင်ႈ သၢမ်ပီႊတဵမ်တဵမ်လႄႈ တႃႇဝိတ်ႈ လဝ်ႊထၢမ်တီႈထႃႇဝရႃႉၽြႃးလႄႈ၊ ထႃႇဝရႃႉၽြႃးမီးဢမိင်ႉလႄႈဝႃႈ၊ ဢမူႉၼႆႉ ပဵၼ်ၵွပ်ႈပိူဝ်ႈ သေႃးလူႉ ဢိၵ်ႇတင်းၵွပ်ႈပိူဝ်ႈပီႈၼွင်ႉၸိူဝ်ႉၶိူဝ်းမၼ်း ဢၼ်ၸၢင်ႈထွၵ်ႇလိူတ်ႈၵူၼ်းၼၼ်ႉလႄႈ မၼ်းဢဝ်ၵူၼ်း ၵီႉပွင်ႇ တင်းလၢႆတၢႆၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

2ၶုၼ်ႁေႃၶမ်းႁွင်ႉဢဝ်ၵူၼ်း ၵီႉပွင်ႇ တင်းလၢႆမႃးလႄႈ လၢတ်ႈၵႂၢမ်းတေႃႇၵၼ်တင်းၶဝ်ဢေႃႈ။ ၵူၼ်း ၵီႉပွင်ႇ ၸိူဝ်းၼၼ်ႉၸမ်ႉ၊ ဢမ်ႇၶဝ်ႈပႃးၼႂ်းမဵဝ်း ဢီႉသရေႇလႃႉ ။ ပဵၼ်မဵဝ်း ဢႃႇမေႃးရီႉ ဢၼ်ၵိုတ်းၵျၢၼ်ႇယူႇၼၼ်ႉဢေႃႈ။ ပိၵ်ႉသမ်ႉမဵဝ်း ဢီႉသရေႇလႃႉ တင်းလၢႆ ဝႆႉသဵတ်ႈၸႃႇၵတီႉတီႈၶဝ်ယဝ်ႉသေၵေႃႈ၊ သေႃးလူႉ ပႂ်ႉဢၵျူဝ်းမဵဝ်း ဢီႉသရေႇလႃႉ ဢိၵ်ႇတင်းမဵဝ်း ယူႉတႃႉ သေလႄႈ ဢဝ်ႁႅင်းၵျူဝ်းၸႃး ႁႂ်ႈလႆႈဢဝ်ၶဝ် တၢႆပႅတ်ႈယူႇဢေႃႈ။-

3မိူဝ်ႈၼၼ်ႉ ၶုၼ်လူင် တႃႇဝိတ်ႈ လၢတ်ႈတီႈၵူၼ်း ၵီႉပွင်ႇ ၸိူဝ်းၼၼ်ႉလႄႈဝႃႈ၊ ၵဝ်တၵ်းႁဵတ်းၵႃႈသင်ပုၼ်ႈသူ။ ၵဝ်တၵ်းလႆႈဢဝ်ၵႃႈသင်ၽေႇဢပႅတ်ႈ ႁႂ်ႈသူပၼ်တၢင်းလီတီႈဢမူၺ်ႇထႃႇဝရႃႉၽြႃး၊ ဝႃႈၼင်ႇၼႆသေယဝ်ႉ၊-

4ၵူၼ်း ၵီႉပွင်ႇ ၸိူဝ်းၼၼ်ႉ ဢွၼ်ၵၼ်ၶိုၼ်းလဝ်ႊလၢတ်ႈလႄႈဝႃႈ၊ ၶႃႈၸဝ်ႈႁဝ်းၶဝ် ဢမ်ႇယွၼ်းဢဝ်ငိုၼ်းဢဝ်ၶမ်းတီႈ သေႃးလူႉ ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းတီႈၶႃႈ။ ၶႃႈၸဝ်ႈႁဝ်းၶဝ်ဢမ်ႇၸၢပ်ႈသႅင်ႇလူၺ်ႈလွင်ႈဢၼ် ဢဝ်ၵူၼ်းမဵဝ်း ဢီႉသရေႇလႃႉ တၢႆ သေၵေႃႉသေၵူၼ်းတီႈၶႃႈ။ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းမီးဢမိင်ႉလႄႈဝႃႈ၊ ၵႃႈၼင်ႇဢၼ်သူယွၼ်းဢဝ်ၼၼ်ႉ၊ ၵဝ်တၵ်းႁဵတ်းၸွမ်းဢေႃႈ၊ ဝႃႈၼင်ႇၼႆဢေႃႈ။-

5ၶဝ်ၵေႃႈၶိုၼ်းလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၶႅၼ်းတေႃႈဢဝ်လုၵ်ႈၸၢႆး ၵေႃႉဢၼ်ၼိၵ်ႈၸၢၵ်ႈငႅၼ်းသႄးၶႃႈၸဝ်ႈႁဝ်းၶဝ်လႄႈ ၵျူဝ်းၸႃးၵျၢမ်ႇပွင်ႁႂ်ႈလႆႈပႄႇၽဵဝ်ႈၶႃႈၸဝ်ႈႁဝ်းၶဝ်ပႅတ်ႈ ႁႂ်ႈၶႃႈၸဝ်ႈႁဝ်းၶဝ်ဢမ်ႇလႆႈယူႇ ၵႃႈၼႂ်းၼမ်ႉၼႂ်းလိၼ် ဢီႉသရေႇလႃႉ ၼႆႉၼၼ်ႉ ၸဵတ်းၵေႃႉ၊-

6ဢၢပ်ႈပၼ်ၵႃႈၼႂ်းမိုဝ်းၶႃႈၸဝ်ႈႁဝ်းၶဝ်သေၵမ်းတီႈၶႃႈ။ ၶႃႈၸဝ်ႈႁဝ်းၶဝ်တၵ်းဢဝ်ၶဝ်ၼၼ်ႉႁွႆႈဝႆႉပုၼ်ႈထႃႇဝရႃႉၽြႃး ၵႃႈတီႈဝဵင်း ၵီႉပႃႉ ၊ တီႈယူႇ သေႃးလူႉ ဢၼ်ထႃႇဝရႃႉၽြႃး လိူၵ်ႈၵဵပ်းဢဝ်ၼၼ်ႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶုၼ်ႁေႃၶမ်းမီးဢမိင်ႉလႄႈဝႃႈ၊ ၵဝ်တၵ်းဢဝ်ၶဝ်ဢၢပ်ႈပၼ်ဢေႃႈ၊ ဝႃႈၼင်ႇၼႆဢေႃႈ။-

7ၼႂ်းဝႃႈၼၼ်သေၵေႃႈ ၶုၼ်ႁေႃၶမ်းသေလၢႆ မေႇၽီႉပေႃးသႅတ်ႉ ၊ လုၵ်ႈၸၢႆး ယေႃးၼသၼ်ႇ ဢၼ်ပဵၼ်လုၵ်ႈၸၢႆး သေႃးလူႉ ၼၼ်ႉ ၵွပ်ႈပိူဝ်ႈဢၼ်ၵတီႉသဵတ်ႈၸႃႇထႃႇဝရႃႉၽြႃး လႆႈမီးဝႆႉၵႃႈတီႈဝူင်ႈၵၢင်သွင်ၶႃ ဢၼ်ဝႃႈ တႃႇဝိတ်ႈ တင်း ယေႃးၼသၼ်ႇ လုၵ်ႈၸၢႆး သေႃးလူႉ ၼၼ်ႉဢေႃႈ။-

8ပိူဝ်ႈဢၼ်ပဵၼ်ၼင်ႇၼႆလႄႈ ၶုၼ်ႁေႃၶမ်းဢဝ်လုၵ်ႈၸၢႆး ရီႉၸပႃႉ ဢၼ်ပဵၼ်လုၵ်ႈယိင်း ဢေႇဢႃႇ ဢၼ်မၼ်းၵိူတ်ႇလဵင်ႉမႃးတီႈ သေႃးလူႉ ၼၼ်ႉသွင်ၵေႃႉဢၼ်ဝႃႈ ဢႃႇမေႃးၼီႉ တင်း မေႇၽီႉပေႃးသႅတ်ႉ ၼၼ်ႉ ဢိၵ်ႇတင်းလုၵ်ႈၸၢႆး မေးရပ်ႉ ဢၼ်ပဵၼ်လုၵ်ႈယိင်း သေႃးလူႉ ဢၼ်မၼ်းၵိူတ်ႇလဵင်ႉမႃးတီႈ ဢႃႇတြေႇလႃႉ လုၵ်ႈၸၢႆး ပႃႇၸီႉလေး မဵဝ်း မေးႁေႃႇလသီႉ ၼၼ်ႉ ႁႃႈၵေႃႉလႄႈ၊-

9ဢၢပ်ႈပၼ်ၵႃႈၼႂ်းမိုဝ်းၵူၼ်း ၵီႉပွင်ႇ ၸိူဝ်းၼၼ်ႉသေယဝ်ႉ၊ ၶဝ်ၸိူဝ်းၼၼ်ႉ ဢွၼ်ၵၼ်ဢဝ်ၶဝ်ၼၼ်ႉၵႂႃႇႁွႆႈဝႆႉၵႃႈၼိူဝ်လွႆၼၼ်ႉ ၵႃႈတီႈၽၢႆႇၼႃႈထႃႇဝရႃႉၽြႃးလႄႈ ၶဝ်ၸဵတ်းၵေႃႉၼၼ်ႉ သုမ်းဢသၢၵ်ႈၽွမ်ႉမိူဝ်ႈလဵဝ်ၵၼ်ဢေႃႈ။ ၶဝ်လႆႈၶၢမ်ႇတၢင်းဢၼ်ဢဝ်တၢႆ ၼႂ်းၶိင်ႇမိူဝ်ႈဢၼ်ပၢတ်ႇၶဝ်ႈ ၼႂ်းဝၼ်းဢၼ်ပဵၼ်တူၼ်ႈပဵၼ်ငဝ်ႈ မိူဝ်ႈဢၼ်ၸႃႉပၢတ်ႇၶဝ်ႈမူႉယေႃးၼၼ်ႉဢေႃႈ။

10ရီႉၸပႃႉ လုၵ်ႈယိင်း ဢေႇဢႃႇ ၼၼ်ႉ၊ ၸႃႉၸဵမ်ၶိင်ႇမိူဝ်ႈဢၼ်ၸႃႉပၢတ်ႇၶဝ်ၼၼ်ႉ တေႃႇထိုင်ႁွတ်ႈၽႃႉတူၵ်းၽူၼ်တူၵ်း ၵႃႈၼိူဝ်ၶဝ်ၼၼ်ႉလႄႈ ဢဝ်ၼင်ပေႃသိူဝ်ႇတီႈဢၼ် တၵ်းၼွၼ်းဝႆႉၵႃႈၼိူဝ်မၢၵ်ႇႁိၼ်သေယဝ်ႉ၊ ပႂ်ႉလူပႂ်ႉတူၺ်းႁႂ်ႈၼူၵ်ႉဢမ်ႇလႆႈၸပ်းၵႃႈၼိူဝ်ၶဝ်ၼၼ်ႉၶိင်ႇၵၢင်ဝၼ်း ႁႂ်ႈတူဝ်ႁၢႆႉဢမ်ႇလႆႈၶူပ်းၵိၼ်ၶဝ်ၼၼ်ႉၶိင်ႇၵၢင်ၶိုၼ်းလႄႈယူႇဢေႃႈ။-

11မိူဝ်ႈဢၼ်ပိူၼ်ႈလဝ်ႊလၢတ်ႈလွင်ႈဢၼ် ရီႉၸပႃႉ လုၵ်ႈယိင်း ဢေႇဢႃႇ မေးၼွႆႉ သေႃးလူႉ ႁဵတ်းၼၼ်ႉ တီႈ တႃႇဝိတ်ႈ ၼၼ်ႉၸိုင်၊-

12တႃႇဝိတ်ႈ ၵႂႃႇလႄႈ ဢဝ်လုပ်ႇ သေႃးလူႉ ဢိၵ်ႇတင်းလုပ်ႇ ယေႃးၼသၼ်ႇ လုၵ်ႈၸၢႆးၸဝ်ႈၼၼ်ႉ သေၵႃႈၼႂ်းမိုဝ်းၵူၼ်းဝဵင်း ယႃႇပႅတ်ႉ မိူင်း ၵီႉလတ်ႉ ဢၼ်လၵ်ႉဢဝ်လုပ်ႇၸိူဝ်းၼၼ်ႉ သေၵႃႈတီႈသဵၼ်ႈတၢင်းဝဵင်း ပႅတ်ႉသၼ်ႇ တီႈဢၼ်ၵူၼ်း ၽီႉလိတ်ႉတီႉ တင်းလၢႆ ဢဝ်ႁွႆႈဝႆႉၼႂ်းမိူဝ်ႈဢၼ်ၵူၼ်း ၽီႉလိတ်ႉတီႉ တင်းလၢႆ လႆႈဢဝ် သေႃးလူႉ တၢႆၵႃႈၼိူဝ်လွႆ ၵီႉလပေႃႇ ၼၼ်ႉ မႃးဢေႃႈ။-

13မၼ်းဢဝ်လုပ်ႇ သေႃးလူႉ ဢိၵ်ႇတင်း လုပ်ႇလုၵ်ႈၸၢႆးၸဝ်ႈ ယေႃးၼသၼ်ႇ ၼၼ်ႉသေၵႃႈတီႈၼၼ်ႈမႃးသေယဝ်ႉ၊ လုပ်ႇၶဝ်ၸိူဝ်းဢၼ်ႁွႆႈဝႆႉၼၼ်ႉၵေႃႈ သိမ်းဢဝ်သေလႄႈ၊-

14ဢဝ်လုပ်ႇ သေႃးလူႉ ဢိၵ်ႇတင်း လုၵ်ႈၸၢႆးၸဝ်ႈ ယေႃးၼသၼ်ႇ ၼၼ်ႉၸိူဝ်းၼၼ်ႉ သၢင်းၵျူဝ်ႇၵႃႈတီႈဝၢၼ်ႈ ၸေးလႃႉ မိူင်း ပိၼ်ႇယႃႇမိၼ်ႇ ၵႃႈၼႂ်းပႃႇႁဵဝ်ႈ ၵီႉသႃႉ ပေႃႈ သေႃးလူႉ ၼၼ်ႉလႄႈ ဢွၼ်ၵၼ်ႁဵတ်းၸွမ်းၵႃႈၼင်ႇဢၼ် ၶုၼ်ႁေႃၶမ်းသင်ႇလၢတ်ႈဝႆႉၼၼ်ႉဢေႃႈ။ ၽြႃးပဵၼ်ၸဝ်ႈထွမ်ႇဢဝ်ၵႂၢမ်းဢၼ်သူးတွင်း ပုၼ်ႈသိုင်ႇၸိုင်ႈဝၢၼ်ႈမိူင်းၸဝ်ႈၼၼ်ႉဢေႃႈ။

15လိုၼ်းၼၼ်ႉ ၵူၼ်း ၽီႉလိတ်ႉတီႉ တင်းလၢႆသမ်ႉ တိုၵ်းၵၼ်တင်းမဵဝ်း ဢီႉသရေႇလႃႉ ထႅင်ႈလႄႈ တႃႇဝိတ်ႈ ဢိၵ်ႇတင်းၶႃႈမၼ်းၵူၼ်းမၼ်းၸိူဝ်းၼၼ်ႉ လူင်းၵႂႃႇႁပ်ႉၶၢမ်ႇတိုၵ်းတေႃးၵူၼ်း ၽီႉလိတ်ႉတီႉ ၸိူဝ်းၼၼ်ႉလႄႈ တႃႇဝိတ်ႈ ႁိူဝ်ႉဢူၼ်ႈလႄႈယူႇဢေႃႈ။-

16ဢီႉသပီႉပေႇၼုတ်ႉ ဢၼ်ပဵၼ်မဵဝ်း ရေႇၽဵမ်ႇ ၼၼ်ႉ ယိပ်းၵမ်ဢဝ်ႁွၵ်ႇတွင်းလိူင် ဢၼ်ၼမ်ႉၼၵ်းမၼ်း မီးသၢမ်ပၢၵ်ႇၵျၢပ်ႈ သၶေးလႃႉ လႄႈ ၼုင်ႈမႆၶူဝ်းတိုၵ်းသိုၵ်းဢၼ်မႂ်ႇယူႇသေလႄႈ ၵျၢမ်ႇငႃတၵ်းဢဝ် တႃႇဝိတ်ႈ တၢႆဢေႃႈ။-

17ဢၽီႉသေး လုၵ်ႈၸၢႆး ၸေႇရူႉယႃႇ ၼၼ်ႉၸွႆႈထႅမ်လႄႈ တိုၵ်းတေႃးၵူၼ်း ၽီႉလိတ်ႉတီႉ ၼၼ်ႉပႅတ်ႈလႄႈဢဝ်တၢႆပႅတ်ႈဢေႃႈ။ မိူဝ်ႈၼၼ်ႉ ၶႃႈၵူၼ်း တႃႇဝိတ်ႈ တင်းလၢႆ ဢွၼ်ၵၼ်ၵိၼ်ႇဝႃႈလႄႈဝႃႈ၊ ၵွပ်ႈပိူဝ်ႈဢၼ်ၵူဝ်ၸဝ်ႈႁဝ်းတၵ်းႁႂ်ႈဢၼ်လႅင်း ဢီႉသရေႇလႃႉ လပ်ႉႁၢႆၵႂႃႇၼၼ်ႉလႄႈ ၵမ်းလိုၼ်းၸဝ်ႈႁဝ်းဢမ်ႇလႆႈ ၶီႇသိုၵ်းလူၺ်ႈၵၼ်တင်းၶႃႈၸဝ်ႈႁဝ်းၶဝ်ၵူၺ်ႉ၊ ဝႃႈၼင်ႇၼႆဢေႃႈ။

18လိုၼ်းၼၼ်ႉၽဝ်ႇၼိုင်ႈ၊ ပဵၼ်သိုၵ်းၵၼ်တင်းၵူၼ်း ၽီႉလိတ်ႉတီႉ တင်းလၢႆ ၵႃႈတီႈဝဵင်း ၵေႃႇၽႃႉ ၼၼ်ႉလႄႈ သီႉပေႇၶေး ၵူၼ်း ႁူႉသႃႉ ဢဝ် သႃႇၽႃႉ ဢၼ်ပဵၼ်မဵဝ်း ရေႇၽဵမ်ႇ ၼၼ်ႉတၢႆဢေႃႈ။-

19လိုၼ်းၼၼ်ႉၽဝ်ႇၼိုင်ႈ၊ ပဵၼ်သိုၵ်းၵၼ်တင်းၵူၼ်း ၽီႉလိတ်ႉတီႉ တင်းလၢႆ ၵႃႈတီႈဝဵင်း ၵေႃႇၽႃႉ ၼၼ်ႉလႄႈ၊ ဢေးလႁႃႇၼၼ်ႇ လုၵ်ႈၸၢႆး ယႃႇဢီႉရႃႉ ဢၼ်ပဵၼ်ၵူၼ်းဝဵင်း ပႅတ်ႉလႁႅမ်ႇ ၼၼ်ႉ ဢဝ်ၼွင်ႉၸၢႆး ၵေႃးလျတ်ႈ ၵူၼ်းမဵဝ်း ၵိတ်ႉတီႉ ဢၼ်ယိပ်းၵမ်ၵၼ်းႁွၵ်ႇ ဢၼ်ယႂ်ႇတၢၼ်ႇသီႈပၼ်ႉႁမ်းႁုၵ်ႇ ၼၼ်ႉတၢႆဢေႃႈ။-

20လိုၼ်းၼၼ်ႉၽဝ်ႇၼိုင်ႈ၊ ပဵၼ်သိုၵ်းၵၼ်ၵႃႈတီႈဝဵင်း ၵႃႇသႃႉ လႄႈ ၵူၼ်းဢၼ်တူဝ်ယႂ်ႇသုင်လႄႈ ၵႃႈတီႈမိုဝ်းယေႈၶွၼ် မီးၼိဝ်ႉမိုဝ်းႁူၵ်းၼိဝ်ႉ၊ ၵႃႈတီႈတိၼ်ယေႈၶွၼ် မီးၼိဝ်ႉတိၼ်ႁူၵ်းၼိဝ်ႉ ပွင်းၵၼ်မီးသၢဝ်းသီႇၼိဝ်ႉ ဢၼ်ပဵၼ်ၸိူဝ်ႉၶိူဝ်းမဵဝ်း ရေႇၽဵမ်ႇ ၼၼ်ႉၵေႃႉၼိုင်ႈ၊-

21ထၢမ်တႃႉထၢမ်ၶဵင်ႇၵူၼ်းမဵဝ်း ဢီႉသရေႇလႃႉ တင်းလၢႆလႄႈ၊ ယေႃးၼသၼ်ႇ လုၵ်ႈၸၢႆး သီႉမႃႇ ပီႈၸၢႆး တႃႇဝိတ်ႈ ၼၼ်ႉ ဢဝ်ၵေႃႉၼၼ်ႉတၢႆဢေႃႈ။-

22ၶဝ်သီႇၵေႃႉၼၼ်ႉပဵၼ်လုၵ်ႈၸၢႆးၵူၼ်း ရေႇၽဵမ်ႇ ဢၼ်ယူႇၵႃႈတီႈဝဵင်း ၵႃႇသႃႉ ၼၼ်ႉလႄႈ တၢႆလူၺ်ႈမိုဝ်း တႃႇဝိတ်ႈ ဢိၵ်ႇတင်း ၶႃႈမၼ်းၵူၼ်းမၼ်းဢေႃႈ။

← Chapter 20 Jump to: Chapter 22 →