2 Samuel 23

Shan

← Chapter 22 Jump to: Chapter 24 →

1ၵႂၢမ်းလိုၼ်းလင်သုတ်း တႃႇဝိတ်ႈ ဢၼ်ဝႃႈ ၵႂၢမ်းဢၼ် တႃႇဝိတ်ႈ လုၵ်ႈၸၢႆး ယေႇသႄး ၊ ဢၼ်ပဵၼ်ၵေႃႉဢၼ်မုၼ်ၽုင်းယႂ်ႇလႄႈ လႆႈၶၢမ်ႇၽိၵ်ႈသိၵ်ႈၽြႃးပဵၼ်ၸဝ်ႈမဵဝ်း ယႃႇၵုပ်ႈ ပဵၼ်ၵေႃႉဢၼ်ႁဵတ်းၵႂၢမ်းသဵင်လီသဵင်ဝၢၼ်ၵႃႈၼႂ်းမဵဝ်း ဢီႉသရေႇလႃႉ ၼၼ်ႉ ဢွၵ်ႇသူပ်းဝႃႈၸမ်ႉ၊-

2ဝီႉၺိၺ်ႇထႃႇဝရႃႉၽြႃး ဢဝ်ၵဝ်မီးဢမိင်ႉလႄႈ ၼုၵ်ႈၵပၢတ်ႈၸဝ်ႈ မီးယူႇၵႃႈတီႈလိၼ်ႉၵဝ်ဢေႃႈ။-

3ၽြႃးပဵၼ်ၸဝ်ႈမဵဝ်း ဢီႉသရေႇလႃႉ မီးဢမိင်ႉလႄႈ မၢၵ်ႇႁိၼ်မၢၵ်ႇၽႃမဵဝ်း ဢီႉသရေႇလႃႉ ၼၼ်ႉ ဢွၵ်ႇသူပ်းလၢတ်ႈတီႈၵဝ်လႄႈဝႃႈၸမ်ႉ၊ ၵေႃႉဢၼ်ၸွမ်းၼင်ႇတြႃးယူႇသေလႄႈ ဢုပ်ႉပိူင်ႇၵူၼ်းတင်းလၢႆ၊ ၵေႃႉဢၼ်ၵူဝ်ႁႄၽြႃးပဵၼ်ၸဝ်ႈယူႇသေလႄႈဢုပ်ႉပိူင်ႇၼၼ်ႉ၊-

4တၵ်းပဵၼ်မိူၼ်ၸိူဝ်ႉၼင်ႇဢၼ်လႅင်းၶိင်ႇၵၢင်ၼႂ် မိူဝ်ႈဢၼ်ၵၢင်ဝၼ်းဢွၵ်ႇ ဢၼ်ဝႃႈၶိင်ႇၵၢင်ၼႂ်ဢၼ်ၽူၼ်ဢမ်ႇၵုမ်ႈ ၽႃႉဢမ်ႇမိုတ်းၼၼ်ႉဢေႃႈ။ တၵ်းပဵၼ်မိူၼ်ၸိူဝ်ႉၼင်ႇ ယိူဝ်ႈၼုမ်ႇၵိင်ႇၼုမ်ႇ ဢၼ်ဢွၵ်ႇမႃးၵႃႈတီႈလိၼ် ၵွပ်ႈပိူဝ်ႈဢၼ်ၽူၼ်တူၵ်းသေယဝ်ႉ ၵၢင်ဝၼ်းႁိူဝ်ႈလႅင်းယူႇသၢင်းဝၢင်းၼၼ်ႉဢေႃႈ။-

5မဵဝ်းၸိူဝ်ႉၶိူဝ်းၵဝ်ၼႆႉပဵၼ်ၸိူဝ်ႉၼင်ႇၼၼ်ယူႇ ၵႃႈတီႈၽၢႆႇၼႃႈၽြႃးပဵၼ်ၸဝ်ႈဢမ်ႇၸႂ်ႈႁိုဝ်။ မၼ်းၸဝ်ႈႁဵတ်းၼိၵ်ႈၸႃႉထႃႇဝရႃႉ ပတီႉၺိၺ်ႇဢၼ်ၸီႇယၢင်ႇပွင်ႁဵတ်းသေႇၶျႃႇလီငၢမ်းလႄႈ ဢမ်ႇလူႉလႆႈၼၼ်ႉလူၺ်ႈၵၼ်တင်းၵဝ်ယဝ်ႉ။ ပတီႉၺိၺ်ႇၼၼ်ႉ ပိၵ်ႉသမ်ႉမၼ်းၸဝ်ႈဢမ်ႇပႆႇႁႂ်ႈပျေႉၸုမ်ႇၵမ်းလဵဝ်သေၵေႃႈ၊ ပဵၼ်လွင်ႈဢၼ်ၵႄႇသႄႇၶျွတ်ႈဢဝ်ၵဝ်တင်းသဵင်ႈတင်းမူတ်း၊ လွင်ႈဢၼ်ထုၵ်ႇၸႂ်ၵျိူၵ်ႈၸႂ်ၵဝ်တင်းသဵင်ႈတင်းမူတ်းဢေႃႈ။

6ၵူၼ်းဢႃႉထမ်ႇမႃႉၵႃႈမီးၸိူဝ်းၼၼ်ႉၸမ်ႉ၊ တၵ်းလႆႈဢွၼ်ၵၼ်ပဵၼ်မိူၼ်ၸိူဝ်ႉၼင်ႇတူၼ်ႈၼၢမ်ဢၼ်လႆႈပႄႇပႅတ်ႈ ၵွပ်ႈပိူဝ်ႈဢၼ်ဢမ်ႇၸၢင်ႈယိပ်းဢဝ်ၵႅမ်းဢဝ်ၼၼ်ႉဢေႃႈ။-

7ၵေႃႉဢၼ်ယိပ်းဢၼ်ၵႅမ်းၼၼ်ႉ တၵ်းလႆႈသုင်းသွင်ႇၶိူင်ႈလဵၵ်း ဢိၵ်ႇတင်းၵၼ်းႁွၵ်ႇသေဢေႃႈ။ တူၼ်ႈၼၢမ်ၸိူဝ်းၼၼ်ႉ တၵ်းလႆႈၶၢမ်ႇတၢင်းဢၼ်ဢဝ်လႄႈတုတ်ႇၽႆးပႅတ်ႈမူတ်းမူတ်းသဵင်ႈသဵင်ႈ ၵႃႈၼႂ်းတီႈဢၼ်ၶဝ်ဢွၵ်ႇၼၼ်ႉဢေႃႈ၊ ဝႃႈၼင်ႇၼႆဢေႃႈ။

8ၸိုဝ်ႈသဵင်ပူဝ်ႇႁူဝ်ႁၢၼ်ၵူၼ်းသိုၵ်းလူင် ဢၼ်ၵိုတ်ႉႁၢပ်ႇဢမူႉ တႃႇဝိတ်ႈ ၼၼ်ႉၸိူဝ်းၼၼ်ႉၸမ်ႉ၊ ယႃသေႃႉၽမ်ႇ မဵဝ်း ႁၵ်ႉမေႃးၼီႉ ၼၼ်ႉပဵၼ်ပူဝ်ႇၶျုၵ်ႈဢေႃႈ။ ၵေႃႉၼၼ်ႉပဵၼ် ဢတီႉၼူဝ်ႇ ၊ ၵူၼ်းမဵဝ်း ဢေးၸရီႉ ဢၼ်တိုၵ်းတေႃးယႃႉပႅတ်ႈၵူၼ်း ပႅတ်ႇပၢၵ်ႇၵမ်းလဵဝ်ၵူၺ်းၼၼ်ႉဢေႃႈ။-

9လိုၼ်းမၼ်းၼၼ်ႉ ဢေးလႃႇၸႃႇ လုၵ်ႈၸၢႆး တေႃးတေႃး မဵဝ်း ဢႁေႃႇႁီႉ ၼၼ်ႉ ၶဝ်ႈပႃးၼႂ်းပူဝ်ႇႁူဝ်ႁၢၼ်ၵူၼ်းသိုၵ်းလူင် သၢမ်ၵေႃႉဢၼ်ၸွမ်းလူၺ်ႈၵၼ်တင်း တႃႇဝိတ်ႈ ၼၼ်ႉဢေႃႈ။ မိူဝ်ႈဢၼ်ၶဝ်ထၢမ်တႃႉထၢမ်ၶဵင်ႇ ၵူၼ်း ၽီႉလိတ်ႉတီႉ ဢၼ်ၸူႉၵၼ်တုမ်ၵၼ် ႁႂ်ႈလႆႈတိုၵ်းသိုၵ်းၸိူဝ်းၼၼ်ႉလႄႈ ၵူၼ်း ဢီႉသရေႇလႃႉ တင်းလၢႆ ဢွၼ်ၵၼ်သုတ်ႉၶိုၼ်းယိုတ်းၶိုၼ်းၼၼ်ႉၸိုင်၊-

10ၵေႃႉၼၼ်ႉလုၵ်ႉလႄႈတိုၵ်းတေႃးယႃႉပႅတ်ႈၵူၼ်း ၽီႉလိတ်ႉတီႉ ၸိူဝ်းၼၼ်ႉ တေႃႇထိုင်ႁွတ်ႈထၼ်ႈပေႃး မိုဝ်းမၼ်းၵူၼ်ႉၼႃႇဢူၼ်ႈၼႃႇသေလႄႈ ဢမ်ႇပွႆႇဢမ်ႇၽႃႈလၢပ်ႇမၼ်းလႆႈသေယဝ်ႉ၊ ထႃႇဝရႃႉၽြႃးႁဵတ်းတၢင်းဢၼ် ပႄႉၼႅင်ႇဢၼ်ယႂ်ႇၼႃႇၼႂ်းဝၼ်းၼၼ်ႉလႄႈ ၵူၼ်းတင်းလၢႆ ၵွမ်ႉၵႃႈလႆႈၶိုၼ်းမႃး ႁႂ်ႈလႆႈႁိမ်ဢဝ်ႁူင်ႇဢဝ်ဢုၵ်ႉၸႃႇၶူဝ်းလဵင်းၵူၺ်းဢေႃႈ။-

11လိုၼ်းမၼ်းၼၼ်ႉ မီး သၢမ်ႇမႃႇ လုၵ်ႈၸၢႆး ဢႃႇၵီႉ မဵဝ်း ႁႃႇရရီႉ ဢေႃႈ။ မိူဝ်ႈဢၼ်ၵူၼ်း ၽီႉလိတ်ႉတီႉ တင်းလၢႆ ၸူႉၵၼ်တုမ်ၵၼ်ပဵၼ်မုၵ်ႉပဵၼ်ၸိူဝ်းၵႃႈတီႈတူင်ႈၼႃးဢၼ်ၽုၵ်ႇထူဝ်ႇမဵဝ်းၼိုင်ႈလႄႈ ၵူၼ်း ဢီႉသရေႇလႃႉ တင်းလၢႆဢွၼ်ၵၼ်ဢွၵ်ႇပၢႆႈသေၵႃႈတီႈၵူၼ်း ၽီႉလိတ်ႉတီႉ ၸိူဝ်းၼၼ်ႉၼၼ်ႉၸိုင်၊-

12ၵေႃႉၼၼ်ႉၸုၵ်းၵႃႈၼႂ်းတူင်ႈၼႃးလႄႈ ပႂ်ႉလူပႂ်ႉတူၺ်းႁႄႉၶႅၼ်ယူႇသေလႄႈ တိုၵ်းတေႃးယႃႉပႅတ်ႈၵူၼ်း ၽီႉလိတ်ႉတီႉ ၸိူဝ်းၼၼ်ႉလႄႈ၊ ထႃႇဝရႃႉၽြႃးႁဵတ်းတၢင်းဢၼ်ပႄႉၼႅင်ႇဢၼ်ယႂ်ႇၼႃႇဢေႃႈ။-

13ၵူၼ်းသၢမ်ၵေႃႉဢၼ်ၶဝ်ႈပႃးၼႂ်းပူဝ်ႇလူင်သၢမ်သိပ်းၼၼ်ႉ ဢွၼ်ၵၼ်လူင်းၸူးတီႈ တႃႇဝိတ်ႈ ၵႃႈတီႈႁူးထမ်ႈ ဢတူႉလမ်ႇ ၼႂ်းၶိင်ႇဢၼ်ပၢတ်ႇၶဝ်ႈၼၼ်ႉလႄႈ မုၵ်ႉၸိူဝ်းၵူၼ်း ၽီႉလိတ်ႉတီႉ ၸိူဝ်းၼၼ်ႉ ၶျႃးတပ်ႉၶဝ်မီးယူႇၵႃႈတီႈပၢင်ႇႁူၺ်ႈ ရေႇၽဵမ်ႇ ဢေႃႈ။-

14မိူဝ်ႈၼၼ်ႉ တႃႇဝိတ်ႈ ယူႇၵႃႈၼႂ်းတိူၵ်ႈတီႈတိုၵ်းသိုၵ်းလႄႈ တပ်ႉၵူၼ်း ၽီႉလိတ်ႉတီႉ ၸိူဝ်းၼၼ်ႉ မီးယူႇၵႃႈတီႈဝဵင်း ပႅတ်ႉလႁႅမ်ႇ ဢေႃႈ။-

15တႃႇဝိတ်ႈ ၵေႃႈ မီးတင်းၸႂ်ဢၼ်တူၵ်းဢၢင်ႈသေလႄႈဝႃႈ၊ ႁႂ်ႈသေၵေႃႉသေၵူၼ်းတဵၵ်းဢဝ်ၼမ်ႉၵႃႈၼႂ်းၼမ်ႉမေႃႇ ဢၼ်မီးၵႃႈႁိမ်းၽၵ်းတူဝဵင်း ပႅတ်ႉလႁႅမ်ႇ ၼၼ်ႉပၼ်ၵဝ်ၵိၼ်သေၵမ်းလူၺ်ႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

16ပူဝ်ႇႁူဝ်ႁၢၼ်ၵူၼ်းသိုၵ်းသၢမ်ၵေႃႉၼၼ်ႉ လေႃႈၽၢင်ႈလေႃႈၽႃႇတပ်ႉ ၽီႉလိတ်ႉတီႉ ၵႂႃႇသေလႄႈ တဵၵ်းဢဝ်ၼမ်ႉၵႃႈၼႂ်းၼမ်ႉမေႃႇ ဢၼ်မီးၵႃႈႁိမ်းၽၵ်းတူဝဵင်း ပႅတ်ႉလႁႅမ်ႇ ၼၼ်ႉသေယဝ်ႉ၊ ဢဝ်မႃးၸူးၵႃႈတီႈ တႃႇဝိတ်ႈ ဢေႃႈ။ ၵူၺ်းၵႃႈ မၼ်းယင်းဢမ်ႇၶႂ်ႈၵိၼ်လႄႈ ဢဝ်ထွၵ်ႇႁိုဝ်ႈၵႃႈတီႈၽၢႆႇၼႃႈထႃႇဝရႃႉၽြႃးယူႇသေလႄႈ လဝ်ႊလၢတ်ႈလႄႈဝႃႈ၊-

17ထႃႇဝရႃႉၽြႃးတီႈၶႃႈ၊ ႁႂ်ႈဢမူႉဢၼ်ၶႃႈၸဝ်ႈၵိၼ်ၼမ်ႉၼႆႉ ၵႆၵၼ်တင်းၶႃႈၸဝ်ႈသေၵမ်းလူၺ်ႈ။ ၼမ်ႉၼႆႉပဵၼ်လိူတ်ႈၶဝ်ၸိူဝ်းဢၼ် ယင်းဢမ်ႇသေလၢႆဢသၢၵ်ႈတူဝ်ၸဝ်ႈၵဝ်ႇလႄႈၵႂႃႇၸိူဝ်းၼၼ်ႉ ဢမ်ႇၸႂ်ႈတီႈၶႃႈႁိုဝ်။ ဝႃႈၼင်ႇၼႆလႄႈ ယင်းဢမ်ႇၵိၼ်လႄႈယူႇဢေႃႈ။ ပူဝ်ႇႁူဝ်ႁၢၼ်ၵူၼ်းသိုၵ်းသၢမ်ၵေႃႉၼၼ်ႉ ႁဵတ်းလွင်ႈတၢင်းၸိူဝ်ႉၼင်ႇၼၼ်ဢေႃႈ၊-

18ဢၽီႉသေး ၼွင်ႉၸၢႆး ယႂႃႇၽႃႉ လုၵ်ႈၸၢႆး ၸေႇရူႉယႃႇ ၼၼ်ႉၵေႃႈ ပဵၼ်ၵႄႇပဵၼ်ႁူဝ် ၼႂ်းပူဝ်ႇႁူဝ်ႁၢၼ်ၵူၼ်းသိုၵ်းသၢမ်ၵေႃႉဢေႃႈ။ မၼ်းၼၼ်ႉယိပ်းၵမ်ဢဝ်ႁွၵ်ႇသေလႄႈ တိုၵ်းတေႃးယႃႉပႅတ်ႈၵူၼ်းသၢမ်ပၢၵ်ႇလႄႈ လႆႈၸိုဝ်ႈလႆႈသဵင်ၵႃႈၼႂ်းသၢမ်ၵေႃႉၼၼ်ႉဢေႃႈ။-

19မၼ်းပဵၼ်ၵေႃႉဢၼ်မီးမုၼ်သရေႇၼႃႇသေပိူၼ်ႈ ၵႃႈၼႂ်းသၢမ်ၵေႃႉၼၼ်ႉဢမ်ႇၸႂ်ႈႁိုဝ်။ ၵွပ်ႈပိူဝ်ႈၼင်ႇၼၼ်လႄႈ မၼ်းလႆႈဢရႃႇပူဝ်ႇၶျုၵ်ႈဢေႃႈ။ ၵူၺ်းၵႃႈ မၼ်းဢမ်ႇၶိုတ်းဢမ်ႇပဵင်းပူဝ်ႇႁူဝ်ႁၢၼ်ပထမႃႉသၢမ်ၵေႃႉၼၼ်ႉ။-

20ပေႇၼႃႇယႃႉ လုၵ်ႈၸၢႆးပူဝ်ႇႁူဝ်ႁၢၼ်ၵူၼ်းသိုၵ်း ယေႃးယတႃႉ ၵူၼ်းဝဵင်း ၵပ်ႉၸေးလႃႉ ဢၼ်ယၢမ်ႈႁဵတ်းလွင်ႈတၢင်းဢၼ်ယႂ်ႇၼႃႇလူင်လၢင်ၸိူဝ်းၼၼ်ႉၼၼ်ႉၵေႃႈ ဢဝ်လုၵ်ႈၸၢႆး ဢႃႇရေႇလႃႉ ၵူၼ်း မေႃႇၽႃႉ သွင်ၵေႃႉတၢႆဢေႃႈ။ လိူဝ်သေၼၼ်ႉ ၼႂ်းၶိင်ႇမိူဝ်ႈဢၼ် မီးမူၺ်ႁႃႇၼၼ်ႉၵေႃႈ မၼ်းၼၼ်ႉလူင်းၵႂႃႇလႄႈ ဢဝ်သၢင်ႇသီႈၵႃႈၼႂ်းႁူးလိၼ်ၶုမ်လိၼ်တၢႆဢေႃႈ။-

21ၵူၼ်း ဢေႇၵိပ်ႉတူႉ ဢၼ်ယႂ်ႇၶိုၵ်ႉၼႃႇၼၼ်ႉၵေႃႈမၼ်းဢဝ်တၢႆဢေႃႈ။ ၵူၼ်း ဢေႇၵိပ်ႉတူႉ ၼၼ်ႉယိပ်းၵမ်ႁွၵ်ႇယူႇသေၵေႃႈ၊ မၼ်းယိပ်းၵမ်ၶွၼ်ႉတဝ်ႉသေလႄႈ လူင်းၵႂႃႇႁိမ်ဢဝ်ႁွၵ်ႇၼၼ်ႉၵႃႈတီႈမိုဝ်းၵူၼ်း ဢေႇၵိပ်ႉတူႉ ၼၼ်ႉသေယဝ်ႉ၊ ဢဝ်ႁွၵ်ႇမၼ်းၼၼ်ႉ ဢဝ်မၼ်းတၢႆဢေႃႈ။-

22ပေႇၼႃႇယႃႉ လုၵ်ႈၸၢႆး ယေႃးယတႃႉ ၼၼ်ႉ ႁဵတ်းလွင်ႈတၢင်းၸိူဝ်းၼၼ်ႉလႄႈ လႆႈၸိုဝ်ႈလႆႈသဵင်ၵႃႈၼႂ်းပူဝ်ႇႁူဝ်ႁၢၼ်သၢမ်ၵေႃႉၼၼ်ႉဢေႃႈ။-

23ပိၵ်ႉသမ်ႉမၼ်းယဵင်ႈၶႅၼ်းမီးမုၼ်သရေႇၼႃႇသေပူဝ်ႇသၢမ်သိပ်းၼၼ်ႉသေၵေႃႈ မၼ်းဢမ်ႇၶိုတ်းဢမ်ႇပဵင်းပူဝ်ႇႁူဝ်ႁၢၼ် ပထမႃႉသၢမ်ၵေႃႉၼၼ်ႉ။ ဢရႃႇဢၼ်ဢုပ်ႉၶျုၵ်ႈဢတႂၢင်းဝုၼ်ႇတင်းလၢႆၵေႃႈ တႃႇဝိတ်ႈ ပၼ်တီႈမၼ်းဢေႃႈ။

24ဢႃႇသႃႇႁေးလႃႉ ၼွင်ႉၸၢႆး ယႂႃႇၽႃႉ ၼၼ်ႉၵေႃႈ ၶဝ်ႈပႃးၼႂ်းမုၵ်ႉၼႂ်းၸိူဝ်းပူဝ်ႇသၢမ်သိပ်းဢေႃႈ။ မိူၼ်ၼင်ႇၼၼ် ဢေးလႁႃႇၼၼ်ႇ လုၵ်ႈၸၢႆး တေႃးတေႃး ဢၼ်ယူႇၵႃႈတီႈဝဵင်း ပႅတ်ႉလႁႅမ်ႇ ၊-

25သၢမ်ႇမႃႇ မဵဝ်း ႁရေႃးတီႉ၊ ဢေးလီႉၵႃႉ မဵဝ်း ႁရေႃးတီႉ ၊-

26ႁေးလိတ်ႉ မဵဝ်း ၽႃႇလတီႉ၊ ဢီႇရႃႉ လုၵ်ႈၸၢႆး ဢီႉၵေးသႃႉ မဵဝ်း တေႇၵေႃႇ ၊-

27ဢပျေႇၸႃႇ မဵဝ်း ဢၼေႇသေႃႇထီႉ၊ မေႇပုၼ်ႇၼီႉ မဵဝ်း ႁႃႇသသီႉ ၊-

28ၸႃႇလမုၼ်ႇ မဵဝ်း ဢႁေႃႇႁီႉ၊ မႁႃႇရေး မဵဝ်း ၼေႇတေႃႇၽႃႇသီႉ ၊-

29ႁေးလႅပ်ႉ လုၵ်ႈၸၢႆး ပႃႇၼႃႇ မဵဝ်း ၼေႇတေႃႇၽႃႇသီႉ၊ ဢိတ်ႉတေႇ လုၵ်ႈၸၢႆး ရီႉၽေး ဢၼ်ယူႇဝဵင်း ၵီႉပႃႉ မဵဝ်း ပိၼ်ႇယႃႇမိၼ်ႇ ၊-

30ပေႇၼႃႇယႃႉ မဵဝ်း ပီႉရႃႉထေႃႇၼီႉ၊ ႁဵတ်ႉတေး ၵူၼ်းၵႃႈတီႈၼမ်ႉႁူၺ်ႈၼမ်ႉႁွင်ႈ ၵႃႇဢတ်ႉ ၊-

31ဢပျႃႇလပုၼ်ႇ မဵဝ်း ဢႃႇပႃႉသီႉ၊ ဢႃႇၸမႃႇဝိတ်ႉ မဵဝ်း ပႃႇႁူႉမီႉ ၊-

32ဢေးလျႃႇၽႃႉ မဵဝ်း သႃႇလႃႇပေႃးၼီႉ၊ ယေႃးၼသၼ်ႇ ဢၼ်ၶဝ်ႈပႃးၵႃႈၼႂ်းမဵဝ်းၸိူဝ်ႉၶိူဝ်း ယႃႇသိၼ်ႇ ၼၼ်ႉ၊-

33သၢမ်ႇမႃႇ မဵဝ်း ႁႃႇရရီႉ၊ ဢႃႇႁီႉဢမ်ႇ လုၵ်ႈၸၢႆး သႃႇရႃႉ မဵဝ်း ဢႃႇရႃႇရီႉ ၊-

34ဢေးလီႉၽလႅတ်ႉ လုၵ်ႈၸၢႆး ဢႁႃႇသၽေး မဵဝ်း မႃႇၶႃႇသီႉ၊ ဢေးလျမ်ႇ လုၵ်ႈၸၢႆး ဢႁီႉသေႃႇၽေးလႃႉ မဵဝ်း ၵီႉလေႃႇၼီႉ ၊-

35ႁေႇၸရေႃႇ မဵဝ်း ၵရမေႇလႃႉ၊ ၽႃႇရေး မဵဝ်း ဢႃႇၽီႉ ၊-

36ဢီႉၵႃႇလႃႉ လုၵ်ႈၸၢႆး ၼႃႇသၼ်ႇ မဵဝ်း ၸေႃႇၽႃႉ၊ ပႃႇၼီႉ မဵဝ်း ၵၢတ်ႉ ၊-

37ၸေးလႅၵ်ႉ မဵဝ်း ဢမ်ႇမုၼ်ႇ၊ ၼႁႃႇရေး မဵဝ်း ပေႇရေႃႇသီႉ ဢၼ်ပဵၼ်ၵူၼ်းဢွၼ်ႇ ဢၼ်ပႃးလၢၵ်ႈၼၢၵ်ႈ ယႂႃႇၽႃႉ လုၵ်ႈၸၢႆး ၸေႇရူႉယႃႇ ၼၼ်ႉ၊-

38ဢီႇရႃႉ မဵဝ်း ဢီႉသႃႇရီႉ၊ ၵႃႇရိပ်ႉ မဵဝ်း ဢီႉသႃႇရီႉ ၊-

39ဢူႉရီႉယႃႉ မဵဝ်း ႁိတ်ႉတီႉ ၊ ၼပ်ႉဢၢၼ်ႇပွင်းၵၼ်မီးသၢမ်သိပ်းပၢႆၸဵတ်းၵေႃႉဢေႃႈ။

← Chapter 22 Jump to: Chapter 24 →