2 Samuel 19 — Shan

1ၼင်ႇၼၼ်လႄႈ ပိူၼ်ႈမွၵ်ႇလၢတ်ႈလွင်ႈဢၼ်ၶုၼ်ႁေႃၶမ်းႁႆႈႁွင်ႉပွင်ႉၶၢင်းၵွပ်ႈပိူဝ်ႈ ဢပႃႉသလုမ်ႇ ၼၼ်ႉတီႈ ယႂႃႇၽႃႉ ဢေႃႈ။-

2ၼႂ်းဝၼ်းၼၼ်ႉ ပွႆးဢၼ်ပႄႉၼႅင်ႇၼၼ်ႉ ပဵၼ်လွင်ႈဢၼ်လီငိၼ်းၽၢၼ်ၵႂႃႇသေဢေႃႈ။ ၼႂ်းဝၼ်းၼၼ်ႉ ၵူၼ်းတင်းလၢႆငိၼ်းလွင်ႈဢၼ်ၶုၼ်ႁေႃၶမ်း မီးတၢင်းဢၼ်ၶီၸႂ်ၶူမ်ၸႂ် ၵွပ်ႈပိူဝ်ႈလုၵ်ႈၸၢႆးၸဝ်ႈၼၼ်ႉလႄႈ၊-

3ၵူၼ်းတင်းလၢႆဢွၼ်ၵၼ်တဵတ်ႇတဵတ်ႇ လွမ်ပၢႆႈၶဝ်ႈၵႃႈၼႂ်းဝဵင်းၼႂ်းဝၢၼ်ႈၼၼ်ႉ မိူၼ်ၸိူဝ်ႉၼင်ႇဢၼ် ၶဝ်ၸိူဝ်းဢၼ်ဢူၵ်းဢၼ်ဢၢႆတင်းလၢႆ တဵတ်ႇတဵတ်ႇဢွၵ်ႇပၢႆႈသေၵႃႈတီႈပွႆးဢၼ်တိုၵ်းသိုၵ်းၼၼ်ႉဢေႃႈ။-

4ၶုၼ်ႁေႃၶမ်းၵေႃႈ ႁူမ်ႇသုမ်ႇၼႃႈသေလႄႈ ၶုၼ်ႁေႃၶမ်းႁဵတ်းတင်းသဵင်ဢၼ်ယႂ်ႇၼႃႇႁွင်ႉႁႆႈလႄႈဝႃႈ၊ လုၵ်ႈၸၢႆးၵဝ် ဢပႃႉသလုမ်ႇ ဢိူၺ်း၊ ဢပႃႉသလုမ်ႇ ဢိူၺ်း၊ လုၵ်ႈၸၢႆးၵဝ်ဢိူၺ်း၊ လုၵ်ႈၸၢႆးၵဝ်ဢိူၺ်း၊ ဝႃႈၼင်ႇၼႆယူႇဢေႃႈ။-

5ယႂႃႇၽႃႉ ၶဝ်ႈၼႂ်းႁိူၼ်းၸူးၵႃႈတီႈၶုၼ်ႁေႃၶမ်းလႄႈ လဝ်ႊလၢတ်ႈလႄႈဝႃႈ၊ ဝၼ်းမိူဝ်ႈၼႆႉ ၸဝ်ႈႁဝ်းယႃႉသရေႇၼႃႈတႃၶႃႈၸဝ်ႈႁဝ်းၶဝ်တင်းသဵင်ႈတင်းလူင် ဢၼ်ၵႄႇသႄႇၶျွတ်ႈဢဝ်ၸႃႉၸဵမ် ဢသၢၵ်ႈၸဝ်ႈႁဝ်းလႄႈလုၵ်ႈၸၢႆးၸဝ်ႈ၊ လုၵ်ႈယိင်းၸဝ်ႈ၊ ၼၢင်းႁေႃၶမ်း၊ ၸိူင်ႉၼၢင်းတင်းလၢႆ ဝၼ်းမိူဝ်ႈၼႆႉၼၼ်ႉတီႈၶႃႈယဝ်ႉ။-

7မိူဝ်ႈလဵဝ်ၼႆႉ လုၵ်ႉသေၵမ်းတီႈၶႃႈ၊ ဢွၵ်ႇလႄႈလၢတ်ႈၵႂၢမ်းဢၼ်ထုၵ်ႇၸႂ်ၵျိူၵ်ႈၸႂ်တီႈၶႃႈၸဝ်ႈႁဝ်းတင်းလၢႆသေၵမ်းတီႈၶႃႈ။ ၶႃႈၸဝ်ႈႁဝ်းၼႆႉ တၵ်းဢဝ်ထႃႇဝရႃႉၽြႃး တိူင်ႇဝႃႈၵိၼ်ႇဝႃႈလူၺ်ႈလွင်ႈဢၼ် ပေႃးၸဝ်ႈႁဝ်းဢမ်ႇဢွၵ်ႇၵႂႃႇၸိုင်၊ ၶိုၼ်းၼႆႉၽူႈလႂ်တၵ်းဢမ်ႇယူႇတီႈၸဝ်ႈႁဝ်းသေၵေႃႉသေၵူၼ်းၼၼ်ႉတီႈၶႃႈယဝ်ႉ။ ပိူဝ်ႈၼႆလႄႈ ဢမူႉၼၼ်ႉ ယဵင်ႈၶႅၼ်းတၵ်းႁၢႆႉၼႃႇသေဢမူႉၵႃႈဢၼ်ပဵၼ်မႃးတီႈၸဝ်ႈႁဝ်း ၸႃႉၸဵမ်မိူဝ်ႈဢၼ်ယင်းလဵၵ်ႉယင်းၼုမ်ႇ တေႃႇထိုင်ႁွတ်ႈမိူဝ်ႈလဵဝ်ၼႆႉၼၼ်ႉတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

8ၶုၼ်ႁေႃၶမ်းလုၵ်ႉလႄႈ ၼင်ႈၵႃႈတီႈႁူးၽၵ်းတူဝဵင်းဢေႃႈ။ မိူဝ်ႈၼၼ်ႉ ၶဝ်ဢွၼ်ၵၼ်မွၵ်ႇလၢတ်ႈတီႈၵူၼ်းတင်းသဵင်ႈတင်းလူင်လႄႈဝႃႈ၊ ၶုၼ်ႁေႃၶမ်းၼင်ႈယူႇၵႃႈတီႈႁူးၽၵ်းတူဢေႃႈ၊ ဝႃႈၼင်ႇၼႆလႄႈ ၵူၼ်းတင်းသဵင်ႈတင်းလူင် ဢွၼ်ၵၼ်သုတ်ႉၸပ်းသုတ်ႉၸူးၵႃႈတီႈၶုၼ်ႁေႃၶမ်းဢေႃႈ။ ၵူၼ်းမဵဝ်း ဢီႉသရေႇလႃႉ တင်းလၢႆၸမ်ႉ၊ ဢွၼ်ၵၼ်ပၢႆႈၵႂႃႇၸူးတီႈဢၼ်ၶဝ်ယူႇၼၼ်ႉ ႁင်းၽႂ်ႁင်းမၼ်းယဝ်ႉယဝ်ႉ။

9မိူဝ်ႈၼၼ်ႉၵူၼ်းတင်းသဵင်ႈတင်းလူင်ၵႃႈၼႂ်းမဵဝ်း ဢီႉသရေႇလႃႉ ၵူႈမဵဝ်းၼၼ်ႉ ၼင်ႇၵၼ်ၵၼ်တၢင်ႇဢပႅတ်ႈတီႈၵၼ်လႄႈဝႃႈ၊ ၶုၼ်ႁေႃၶမ်းၼၼ်ႉ ၼုၵ်ႈဢဝ်ႁဝ်းဢွၵ်ႇသေၵႃႈၼႂ်းမိုဝ်းရၢၼ်ႇသူႇႁဝ်းလႄႈ ၵႄႇသႄႇဢဝ်ႁဝ်းလွတ်ႈသေၵႃႈၼႂ်းမိုဝ်းၵူၼ်း ၽီႉလိတ်ႉတီႉ ၸိူဝ်းၼၼ်ႉယဝ်ႉ။ မိူဝ်ႈလဵဝ်ၼႆႉ မၼ်းၸဝ်ႈဢွၵ်ႇပၢႆႈသေၵႃႈၼႂ်းမိူင်း ၵွပ်ႈပိူဝ်ႈ ဢပႃႉသလုမ်ႇ ၼၼ်ႉဢေႃႈ။-

10ဢပႃႉသလုမ်ႇ ဢၼ်ႁဝ်းပၼ်ၽိၵ်ႈသိၵ်ႈလႄႈ ယုၵ်ႉယွင်ႈဝႆႉၵႃႈၼိူဝ်ႁဝ်းၼၼ်ႉ တၢႆၵႃႈတီႈပၢင်သိုၵ်းယဝ်ႉ။ မိူဝ်ႈလဵဝ်ၼႆႉ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူယင်းဢမ်ႇလၢတ်ႈလွင်ႈဢၼ်တၵ်းသမ်ႉဢဝ်ၶုၼ်ႁေႃၶမ်းၶိုၼ်းမႃးထႅင်ႈၼၼ်ႉလႄႈ ယူႇတဵတ်ႇတဵတ်ႇယဵၼ်ယဵၼ်ယူႇၼင်ႇႁိုဝ်။ ဝႃႈၼင်ႇၼႆဢေႃႈ။-

11ၶုၼ်လူင် တႃႇဝိတ်ႈ ပွႆႇၸႂ်ႉၵူၼ်းၵႂႃႇၸူးၵႃႈတီႈယိတ်ႈပရေႃးႁဵၵ်ႈ ၸႃႇတုၵ်ႉ ဢိၵ်ႇတင်း ဢႃႇပျႃႇထႃႇ ၼၼ်ႉလႄႈဝႃႈ၊ သွင်ၶိူဝ်လၢတ်ႈတီႈၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်း ယူႉတႃႉ ၸိူဝ်းၼၼ်ႉလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူတူၵ်းလိုၼ်းသုတ်းပိူၼ်ႈ ၼႂ်းလွင်ႈဢၼ်တၵ်းလႆႈဢဝ်ၶုၼ်ႁေႃၶမ်းၶိုၼ်းသူင်ႇတီႈႁေႃၸဝ်ႈၼၼ်ႉၼင်ႇႁိုဝ်။ ၵႂၢမ်းဢၼ်ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၸၢင်ႈလၢတ်ႈၼၼ်ႉ ႁွတ်ႈထိုင်ၵႃႈတီႈၶုၼ်ႁေႃၶမ်း ၸူးၵႃႈတီႈႁေႃယႃႇယီႇမၼ်းၸဝ်ႈၼၼ်ႉယဝ်ႉ။-

12သူပဵၼ်ပီႈပဵၼ်ၼွင်ႉၵဝ်၊ လုပ်ႇၵဝ်၊ ၼိူဝ်ႉၵဝ်လႄႈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူတူၵ်းလိုၼ်းသုတ်းပိူၼ်ႈ ၼႂ်းလွင်ႈဢၼ်ဢဝ် ၶုၼ်ႁေႃၶမ်းၶိုၼ်းသူင်ႇၼၼ်ႉၼင်ႇႁိုဝ်။ ဝႃႈၼင်ႇၼႆတႃႉ။-

13သွင်ၶိူဝ်သမ်ႉဢွၼ်ၵၼ်လၢတ်ႈတီႈ ဢႃႇမသႃႉ လႄႈဝႃႈ၊ မႂ်းပဵၼ်လုပ်ႇၵဝ်ၼိူဝ်ႉၵဝ်ဢမ်ႇၸႂ်ႈႁိုဝ်။ ပေႃးမႂ်းဢမ်ႇပဵၼ်ၶုၼ်ပူဝ်ႇၶျုၵ်ႈတၢင်တူဝ် ယႂႃႇၽႃႉ ယူႇတႃႇသေႇ ၵႃႈတီႈၽၢႆႇၼႃႈၵဝ်ၸိုင်၊ ယင်းဢမ်ႇၵႃးဢၼ်ၼၼ်ႉလႄႈ ႁႂ်ႈၽြႃးပဵၼ်ၸဝ်ႈႁဵတ်းလိူဝ်တွၼ်းၼႃႇသေၼၼ်ႉတီႈၵဝ်သေၵမ်းလူၺ်ႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

14ၼင်ႇၼၼ်လႄႈ မၼ်းႁႂ်ႈႁူဝ်ၸႂ်ၵူၼ်းမဵဝ်း ယူႉတႃႉ တင်းသဵင်ႈတင်းလူင်ၽွမ်ႉၵၼ် ဢူၼ်ႈၼူပ်ႈၵိူင်းၸူးမိူၼ်ၸိူဝ်ႉၼင်ႇ ႁူဝ်ၸႂ်ၵူၼ်းၵေႃႉလဵဝ်ၵူၺ်းၼၼ်ႉ ထၼ်ႈပေႃးႁႂ်ႈၶဝ်ဢွၼ်ၵၼ်ပွႆႇၸႂ်ႉပၢင်းဢဝ်ၶုၼ်ႁေႃၶမ်းလႄႈ လဝ်ႊလၢတ်ႈလႄႈဝႃႈ၊ တူဝ်ၸဝ်ႈႁဝ်း ဢိၵ်ႇတင်းၶႃႈၸဝ်ႈႁဝ်းတင်းလၢႆၼၼ်ႉ ၶိုၼ်းမႃးသေၵမ်းတီႈၶႃႈ၊ ဝႃႈၼင်ႇၼႆၼၼ်ႉဢေႃႈ။-

15မိူဝ်ႈၼၼ်ႉၶုၼ်ႁေႃၶမ်းၶိုၼ်းလႄႈ ႁွတ်ႈထိုင်ၵႃႈတီႈၼမ်ႉႁွင်ႈ ယေႃးတၢၼ်ႇ ဢေႃႈ။ ၵူၼ်းမဵဝ်း ယူႉတႃႉ တင်းလၢႆ ဢွၼ်ၵၼ်ၵႂႃႇၵႃႈတီႈဝဵင်း ၵီႉလႃႉၵႃႇလႃႉ ႁႂ်ႈလႆႈႁပ်ႉႁူဝ်တၢင်းၶုၼ်ႁေႃၶမ်းလႄႈ၊ ဢဝ်ၶုၼ်ႁေႃၶမ်း ၶၢမ်ႈၼမ်ႉႁွင်ႈ ယေႃးတၢၼ်ႇ ဢေႃႈ။

16သီႉမီႉ လုၵ်ႈၸၢႆး ၵေးရႃႉ ၵူၼ်းဝဵင်း ပႃႇႁူႉရိမ်း မဵဝ်း ပိၼ်ႇယႃႇမိၼ်ႇ ၼၼ်ႉ ႁိပ်ႈၼႅတ်ႈၸွမ်းလူၺ်ႈၵၼ်တင်းၵူၼ်းမဵဝ်း ယူႉတႃႉ တင်းလၢႆ လူင်းမႃးႁႂ်ႈလႆႈႁပ်ႉႁူဝ်တၢင်းၶုၼ်လူင် တႃႇဝိတ်ႈ ဢေႃႈ။-

17ၵူၼ်းမဵဝ်း ပိၼ်ႇယႃႇမိၼ်ႇ ႁဵင်ၼိုင်ႈ ဢိၵ်ႇတင်း ၸီႉၽႃႉ ၶႃပီႈၼွင်ႉၸိူဝ်ႉၶိူဝ်း သေႃးလူႉ တင်းလုၵ်ႈၸၢႆးမၼ်းသိပ်းႁႃႈၵေႃႉ၊ ၶႃႈမၼ်းသၢဝ်းၼိုင်ႈၸိူဝ်းၼၼ်ႉ ဢွၼ်ၵၼ်ၸွမ်းမႃးလူၺ်ႈၵၼ်တင်းမၼ်းၼၼ်ႉလႄႈ ၶၢမ်ႈၼမ်ႉႁွင်ႈ ယေႃးတၢၼ်ႇ သိုဝ်ႈၼႃႈတႂ်ႈတႃၶုၼ်ႁေႃၶမ်းဢေႃႈ။-

18ႁိူဝ်းတႃႈၼမ်ႉၼၼ်ႉ ၶၢမ်ႈၼမ်ႉၵႂႃႇ ႁႂ်ႈလႆႈႁပ်ႉဢဝ်ၵူၼ်းႁၢင်ႈၵူၼ်းႁေႃၸဝ်ႈတင်းလၢႆၶၢမ်ႈမႃး ဢိၵ်ႇတင်းႁႂ်ႈလႆႈႁဵတ်းၸွမ်းၵႃႈၼင်ႇဢၼ် ၸဝ်ႈမီးဢလူဝ်ႇၼၼ်ႉဢေႃႈ။ သီႉမီႉ လုၵ်ႈၸၢႆး ၵေးရႃႉ ၼၼ်ႉ ၶုပ်ႉမူပ်ႇၵႃႈတီႈၽၢႆႇၼႃႈၶုၼ်ႁေႃၶမ်း မိူဝ်ႈဢၼ်မၼ်းၸဝ်ႈၸမ်တၵ်းၶၢမ်ႈၼမ်ႉႁွင်ႈ ယေႃးတၢၼ်ႇ ၼၼ်ႉလႄႈ၊-

19လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၸဝ်ႈႁဝ်းၶႃႈ ၶႅၼ်းတေႃႈယႃႇပေပၼ်ဢပႅတ်ႈတီႈၶႃႈၸဝ်ႈႁဝ်းသေၵမ်းတီႈၶႃႈ။ ၶႅၼ်းတေႃႈယႃႇပေတွင်းဝႆႉ ဢမူႉဢၼ်ၶႃႈၸဝ်ႈႁဝ်းႁဵတ်းပူၼ်ႉႁဵတ်းလိူဝ်ၼႃႇလူင်လၢင် ၼႂ်းဝၼ်းဢၼ်ၸဝ်ႈၶုၼ်လူင်ဢွၵ်ႇသေၵႃႈတီႈဝဵင်း ယေႇရူႉသလႅမ်ႇ ၼၼ်ႉ ထၼ်ႈပေႃးၸဝ်ႈၶုၼ်လူင် ဢဝ်ဝႆႉၼႂ်းၸႂ်ၼႂ်းၶေႃးယူႇၼၼ်ႉသေၵမ်းတီႈၶႃႈ။-

20ၶႃႈၸဝ်ႈၼႆႉႁူႉလွင်ႈဢၼ် ၶႃႈၸဝ်ႈႁဝ်းၽိတ်းပိူင်ႈမႅၼ်ႈၼၼ်ႉယူႇတီႈၶႃႈဢေႃႈ။ ပိူဝ်ႈၼႆလႄႈဝၼ်းမိူဝ်ႈၼႆႉ ၶႃႈၸဝ်ႈႁဝ်းၼႆႉၸင်ႇ လူင်းမႃးဢွၼ်တၢင်းသုတ်းပိူၼ်ႈ ၼႂ်းမဵဝ်း ယူဝ်းသႅပ်ႈ တင်းသဵင်ႈတင်းလူင် ႁႂ်ႈလႆႈႁပ်ႉႁူဝ်တၢင်းၸဝ်ႈႁဝ်းၶႃႈ ၸဝ်ႈၶုၼ်လူင်တီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

21ဢၽီႉသေး လုၵ်ႈၸၢႆး ၸေႇရူႉယႃႇ ၼၼ်ႉၵေႃႈလဝ်ႊထၢမ်လႄႈဝႃႈ၊ သီႉမီႉ ၼႆႉတၵ်းလႆႈၶၢမ်ႇတၢႆ ၵွပ်ႈပိူဝ်ႈဢၼ်မၼ်းၵိၼ်ႇလႃႇၸဝ်ႈ ဢၼ်လႆႈၶၢမ်ႇၽိၵ်ႈသိၵ်ႈဢၼ်ထႃႇဝရႃႉၽြႃးပၼ်ၼၼ်ႉ ဢမ်ႇၸႂ်ႈတီႈၶႃႈႁိုဝ်။ မိူဝ်ႈဢၼ်ဝႃႈၼင်ႇၼႆၸိုင်၊-

22တႃႇဝိတ်ႈ မီးဢမိင်ႉလႄႈဝႃႈ၊ လုၵ်ႈၸၢႆး ၸေႇရူႉယႃႇ ၶဝ်ဢိူၺ်း၊ သူၸၢပ်ႈသႅင်ႇၵၼ်တင်းၵဝ် ႁႂ်ႈလႆႈႁဵတ်းရၢၼ်ႇသူႇၵဝ် ဝၼ်းမိူဝ်ႈၼႆႉၸိူဝ်ႉၼင်ႇႁိုဝ်။ ၵူၼ်းမဵဝ်း ဢီႉသရေႇလႃႉ သေၵေႃႉသေၵူၼ်း တၵ်းလႆႈၶၢမ်ႇတၢင်းဢၼ်ဢဝ်တၢႆ ဝၼ်းမိူဝ်ႈၼႆႉႁိုဝ်။ ၵဝ်ႁူႉလွင်ႈဢၼ် ၵဝ်ပဵၼ်ၶုၼ်ႁေႃၶမ်း ဢီႉသရေႇလႃႉ ဝၼ်းမိူဝ်ႈၼႆႉၼၼ်ႉဢမ်ႇၸႂ်ႈႁိုဝ်။ ဝႃႈၼင်ႇၼႆလႄႈ၊-

23ၶုၼ်ႁေႃၶမ်းလၢတ်ႈတီႈ သီႉမီႉ လႄႈဝႃႈ၊ မႂ်းဢမ်ႇလႆႈၶၢမ်ႇတၢင်းတၢႆၵူၺ်ႉ၊ ဝႃႈၼင်ႇၼႆသေလႄႈ ၶုၼ်ႁေႃၶမ်းတိူင်ႇဝႃႈၵိၼ်ႇဝႃႈတီႈမၼ်းၼၼ်ႉဢေႃႈ။

24မေႇၽီႉပေႃးသႅတ်ႉ လၢၼ်ၸၢႆး သေႃးလူႉ ၼၼ်ႉၵေႃႈ လူင်းမႃးႁႂ်ႈလႆႈႁပ်ႉႁူဝ်တၢင်းၶုၼ်ႁေႃၶမ်းဢေႃႈ။ မၼ်းၼၼ်ႉယင်းဢမ်ႇသုၵ်ႈတိၼ်၊ ယင်းဢမ်ႇႁၢင်ႈၶိူင်ႈမႄးၼူတ်ႇမႄးၶူၼ်၊ ယင်းဢမ်ႇသၵ်ႉဢမ်ႇသၢႆႇၶူဝ်းၼုင်ႈလႄႈယူႇ ၸႃႉၸဵမ်ဝၼ်းဢၼ်ၶုၼ်ႁေႃၶမ်းဢွၵ်ႇၵႂႃႇၼၼ်ႉ တေႃႇထိုင်ႁွတ်ႈဝၼ်းဢၼ်မၼ်းၸဝ်ႈၶိုၼ်းမႃး ၼိမ်ၼိမ်လီလီၼၼ်ႉယဝ်ႉ။-

25မိူဝ်ႈဢၼ်ၵူၼ်းဝဵင်း ယေႇရူႉသလႅမ်ႇ တင်းလၢႆ ဢွၼ်ၵၼ်မႃးႁႂ်ႈလႆႈႁပ်ႉႁူဝ်တၢင်းၶုၼ်ႁေႃၶမ်းၼၼ်ႉၸိုင်၊ ၶုၼ်ႁေႃၶမ်းထၢမ်တီႈမၼ်းၼၼ်ႉလႄႈဝႃႈ၊ မေႇၽီႉပေႃးသႅတ်ႉ ဢိူၺ်း၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းဢမ်ႇၵႂႃႇၸွမ်းလူၺ်ႈၵၼ်တင်းၵဝ်ၼင်ႇႁိုဝ်။ ဝႃႈၼင်ႇၼႆသေယဝ်ႉ၊-

26မၼ်းၼၼ်ႉၶိုၼ်းလဝ်ႊလၢတ်ႈလႄႈဝႃႈ၊ ၸဝ်ႈႁဝ်းၶႃႈ ၸဝ်ႈၶုၼ်လူင်တီႈၶႃႈ၊ ၶႃႈ ၶႃႈၸဝ်ႈႁဝ်းၼႆႉၼၼ်ႉ ပႅတ်ႉလႅၼ်ၶႃႈၸဝ်ႈႁဝ်းၼႆႉတီႈၶႃႈဢေႃႈ။ လွင်ႈမၼ်းၸမ်ႉ ၵွပ်ႈပိူဝ်ႈဢၼ်ၶႃႈၸဝ်ႈႁဝ်းၼႆႉတိၼ်ၵႅင်ႉလႄႈ ၶႃႈၸဝ်ႈႁဝ်းၼႆႉဝႃႈ၊ ၵဝ်တၵ်းႁၢင်ႈၵွပ်းလီႈ ႁႂ်ႈလႆႈၶီႇလႄႈၵႂႃႇၸူးၵႃႈတီႈၶုၼ်ႁေႃၶမ်းဢေႃႈ၊ ဝႃႈၼင်ႇၼႆယူႇတီႈၶႃႈဢေႃႈ။-

27မၼ်းၶႃႉၸိုဝ်ႈၶၢႆသဵင်ၶႃႈၸဝ်ႈႁဝ်းၼႆႉတီႈၸဝ်ႈႁဝ်းၶႃႈ၊ ၸဝ်ႈၶုၼ်လူင်တီႈၶႃႈယဝ်ႉ။ ၵူၺ်းၵႃႈ ၸဝ်ႈႁဝ်းၶႃႈ၊ ၸဝ်ႈၶုၼ်လူင် ပဵၼ်မိူၼ်ၸိူဝ်ႉၼင်ႇတမၢၼ်ႇၵၢင်ႁၢဝ်ၽြႃးပဵၼ်ၸဝ်ႈတီႈၶႃႈဢေႃႈ။ ႁဵတ်းၸွမ်းၵႃႈၼင်ႇဢၼ်ထုၵ်ႇတႃၸဝ်ႈႁဝ်းၼၼ်ႉသေၵမ်းတီႈၶႃႈ၊-

28ၵႃႈပဵၼ်ပီႈၼွင်ႉၸိူဝ်ႉၶိူဝ်းပေႃႈၶႃႈၸဝ်ႈႁဝ်းၼႆႉၼၼ်ႉ ပဵၼ်ၵူၼ်းတၢႆၵႃႈတီႈၽၢႆႇၼႃႈၸဝ်ႈႁဝ်းၶႃႈ ၸဝ်ႈၶုၼ်လူင်တီႈၶႃႈဢေႃႈ။ ၵူၺ်းၵႃႈ ၸဝ်ႈႁဝ်းဢဝ်ၶႃႈၸဝ်ႈႁဝ်းၼႆႉ ပၼ်တီႈယူႇႁူမ်ႈလူၺ်ႈၵၼ်တင်းၶဝ်ၸိူဝ်းဢၼ်ၵိၼ်တီႈၶူင်ႇတီႈၵိၼ်ၸဝ်ႈႁဝ်းၸိူဝ်းၼၼ်ႉတီႈၶႃႈယဝ်ႉ။ ပိူဝ်ႈဢၼ်ပဵၼ်ၼင်ႇၼႆလႄႈ ၶႃႈၸဝ်ႈႁဝ်းၼႆႉတၵ်းမီးဢၶႂၢင်ႉဢၼ်လႆႈၶၢင်းၶီၶၢင်းၽၢၼ်တေႃႇၸဝ်ႈၶုၼ်လူင်ထႅင်ႈလူးၵွၼ်ႇၸိူဝ်ႉၼင်ႇႁိုဝ်တီႈၶႃႈ။ မိူဝ်ႈဢၼ်ဝႃႈၼင်ႇၼႆၸိုင်၊-

29ၶုၼ်ႁေႃၶမ်းမီးဢမိင်ႉလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းလဝ်ႊလၢတ်ႈလူၺ်ႈလွင်ႈဢမူႉမႂ်း တီႈၵဝ်ထႅင်ႈလူးၵွၼ်ႇၸိူဝ်ႉၼင်ႇႁိုဝ်။ ၵဝ်ၸီႇယၢင်ႇလွင်ႈဢၼ်မႂ်း ဢိၵ်ႇတင်း ၸီႉၽႃႉ ၼၼ်ႉ တၵ်းလႆႈၽႄလိၼ်မႅင်ႇၵၼ်ၼၼ်ႉယဝ်ႉ၊ ဝႃႈၼင်ႇၼႆဢေႃႈ။-

30မေႇၽီႉပေႃးသႅတ်ႉ ၵေႃႈ လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၵွပ်ႈပိူဝ်ႈဢၼ်ၸဝ်ႈႁဝ်းၶႃႈ ၸဝ်ႈၶုၼ်လူင်သမ်ႉၶိုၼ်းႁွတ်ႈထိုင် ၵႃႈတီႈႁၢင်ႈၸဝ်ႈႁေႃၸဝ်ႈ ၼိမ်ၼိမ်လီလီၼၼ်ႉလႄႈ ႁႂ်ႈမၼ်းၼၼ်ႉဢဝ်ၵူႈၸိူဝ်ႉၵူႈပိူင်သေၵမ်းတီႈၶႃႈ၊ ဝႃႈၼင်ႇၼႆဢေႃႈ။

31ပႃႇၸီႉလေး ၵူၼ်းမိူင်း ၵီႉလတ်ႉ ၼၼ်ႉၵေႃႈ လုၵ်ႉသေၵႃႈတီႈဝဵင်း ရေႃႇၵေႇလိမ်း လူင်းမႃးလႄႈ ၶၢမ်ႈၼမ်ႉႁွင်ႈ ယေႃးတၢၼ်ႇ လူၺ်ႈၵၼ်တင်းၶုၼ်ႁေႃၶမ်း ႁႂ်ႈလႆႈၸွမ်းသူင်ႇမၼ်းၸဝ်ႈပူၼ်ႉၼမ်ႉႁွင်ႈ ယေႃးတၢၼ်ႇ ဢေႃႈ။-

32ပႃႇၸီႉလေး ၼၼ်ႉ ပဵၼ်ၵေႃႉဢၼ်ထဝ်ႈၵႄႇၼႃႇလႄႈ ဢသၢၵ်ႈလႆႈပႅတ်ႇသိပ်းပီႊဢေႃႈ။ မၼ်းလႆႈႁဵတ်းလဵင်ႉႁဵတ်းလူတီႈၶုၼ်ႁေႃၶမ်း ၸူဝ်ႈဢၼ်ၶုၼ်လူင်ယင်းတိုၵ်ႉၶျႃးတပ်ႉယူႇၵႃႈတီႈဝဵင်း မႁႃႇၼိမ်ႇ ၼၼ်ႉဢေႃႈ။ မၼ်းပဵၼ်ၵေႃႉဢၼ် မၢၵ်ႈမီးၼႃႇလူင်လၢင်ဢေႃႈ။-

33ၶုၼ်ႁေႃၶမ်းၵေႃႈမီးဢမိင်ႉတီႈ ပႃႇၸီႉလေး လႄႈဝႃႈ၊ ၸွမ်းလူၺ်ႈၵၼ်တင်းၵဝ်တႃႉ။ ၵဝ်တၵ်းလဵင်ႉလူမႂ်းႁူမ်ႈလူၺ်ႈၵၼ်တင်းၵဝ် ၵႃႈတီႈဝဵင်း ယေႇရူႉသလႅမ်ႇ ပုၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

34ပႃႇၸီႉလေး လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ လွင်ႈၼင်ႇႁိုဝ်ၶႃႈၸဝ်ႈႁဝ်းၼႆႉ တၵ်းလႆႈၸွမ်းလူၺ်ႈၵၼ်တင်းၸဝ်ႈၶုၼ်လူင် ၶိုၼ်းၵႂႃႇၸူးၵႃႈတီႈဝဵင်း ယေႇရူႉသလႅမ်ႇ ပုၼ်ႉၸိုင်၊ ဢသၢၵ်ႈၶႃႈၸဝ်ႈႁဝ်းၼႆႉ ယင်းၵိုတ်းၵျၢၼ်ႇၵႃႈႁိုဝ်လူးၵွၼ်ႇတီႈၶႃႈ။-

35ဝၼ်းမိူဝ်ႈၼႆႉဢသၢၵ်ႈၶႃႈၸဝ်ႈႁဝ်းၼႆႉ လႆႈပႅတ်ႇသိပ်းပီႊယဝ်ႉတီႈၶႃႈယဝ်ႉ။ ၶႃႈၸဝ်ႈႁဝ်းၼႆႉ တၵ်းၸၵ်းၽႄလႄႈ ႁူႉလွင်ႈဢၼ်လီ ဢၼ်ဢမ်ႇလီလႆႈတီႈၶႃႈႁိုဝ်။ ၶႃႈၸဝ်ႈႁဝ်းၼႆႉ တၵ်းၸိမ်းတူၺ်းဢရႃႉသႃႇတၢင်းၵိၼ်တၢင်းၶူပ်းလႆႈတီႈၶႃႈႁိုဝ်။ ၶႃႈၸဝ်ႈႁဝ်းၼႆႉ တၵ်းငိၼ်းသဵင်ဢၼ်မေႃၵႂၢမ်းၵူၼ်းၸၢႆး၊ မေႃၵႂၢမ်းၵူၼ်းယိင်းတင်းလၢႆႁဵတ်းၼၼ်ႉလႆႈတီႈၶႃႈႁိုဝ်။ ပိူဝ်ႈၼႆလႄႈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၶႃႈၸဝ်ႈႁဝ်းၼႆႉ တၵ်းလႆႈပဵၼ်ဢၼ်ၼၵ်းၼႃပႃးပၼ်တီႈၸဝ်ႈၵဝ်ၶႃႈ ၸဝ်ႈၶုၼ်လူင်ၼင်ႇႁိုဝ်တီႈၶႃႈ၊-

36ၶႃႈၸဝ်ႈႁဝ်းၼႆႉ တၵ်းၸွမ်းလူၺ်ႈၵၼ်တင်းၸဝ်ႈၶုၼ်လူင် ၶၢမ်ႈၵႂႃႇၵႃႈတီႈၽၢႆႇပုၼ်ႉၼမ်ႉႁွင်ႈ ယေႃးတၢၼ်ႇ ဢိတ်းၼိုင်ႈၵူၺ်းတီႈၶႃႈဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၸဝ်ႈၶုၼ်လူင်တၵ်းၶျႃးပၼ်သူးလၢပ်ႈဢၼ်ယႂ်ႇၼႃႇလူင်လၢင်ထၼ်ႈၼႆႉၼင်ႇႁိုဝ်တီႈၶႃႈ။-

37ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈႁဝ်းၼႆႉ လႆႈၶိုၼ်းမိူဝ်းၵႂႃႇ ႁႂ်ႈလႆႈတၢႆၵႃႈၼႂ်းဝဵင်းတီႈယူႇၶႃႈၸဝ်ႈ ၵႃႈတီႈႁိမ်းပႃႇႁဵဝ်ႈပေႃႈမႄႈၶႃႈၸဝ်ႈႁဝ်းၼႆႉၼၼ်ႉသေၵမ်းတီႈၶႃႈ၊ ၼႂ်းဝႃႈၼၼ်သေၵေႃႈ မီးၶႃႈၸဝ်ႈႁဝ်း ၶီႉမႁမ်ႇ ၼႆႉတီႈၶႃႈဢေႃႈ။ ႁႂ်ႈမၼ်းၸွမ်းလူၺ်ႈၵၼ်တင်းၸဝ်ႈႁဝ်း ၶႃႈၸဝ်ႈၶုၼ်လူင်ၶၢမ်ႈၵႂႃႇသေၵမ်းတီႈၶႃႈ။ ၶႅၼ်းတေႃႈႁဵတ်းတီႈမၼ်းၸွမ်းၵႃႈၼင်ႇဢၼ် ၸဝ်ႈႁဝ်းထၢင်ႇပဵၼ်ဢၼ်လီၼၼ်ႉသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

38ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊ ၶီႉမႁမ်ႇ တၵ်းလႆႈၸွမ်းလူၺ်ႈၵၼ်တင်းၵဝ်ၶၢမ်ႈၵႂႃႇဢေႃႈ။ ၵဝ်တၵ်းႁဵတ်းတီႈမၼ်းၸွမ်းၵႃႈၼင်ႇဢၼ် မႂ်းထၢင်ႇပဵၼ်ဢၼ်လီၼၼ်ႉဢေႃႈ။ ၵႃႈဢၼ်မႂ်းယွၼ်းတီႈၵဝ်ၼၼ်ႉၵေႃႈ ၵဝ်တၵ်းႁဵတ်းပုၼ်ႈမႂ်းဢေႃႈ၊ ဝႃႈၼင်ႇၼႆဢေႃႈ။-

39ၵူၼ်းတင်းသဵင်ႈတင်းလူင်ဢွၼ်ၵၼ်ၶၢမ်ႈၼမ်ႉႁွင်ႈ ယေႃးတၢၼ်ႇ ဢေႃႈ။ တူဝ်ၶုၼ်ႁေႃၶမ်းၵေႃႈ ၶၢမ်ႈၼမ်ႉႁွင်ႈ ယေႃးတၢၼ်ႇ သေယဝ်ႉ၊ ၼူမ် ပႃႇၸီႉလေး သေလႄႈ၊ ပၼ်တၢင်းလီတီႈမၼ်းလႄႈ မၼ်းၼၼ်ႉၶိုၼ်းမိူဝ်းၵႂႃႇၵႃႈတီႈ တီႈဢၼ်မၼ်းယူႇၼၼ်ႉသေဢေႃႈ။-

40ၼင်ႇၼၼ်လႄႈၶုၼ်ႁေႃၶမ်းၵႂႃႇၸူးၵႃႈတီႈဝဵင်း ၵီႉလႃႉၵႃႇလႃႉ လႄႈ ၶီႉမႁမ်ႇ ၵေႃႈၸွမ်းၶၢမ်ႈၵႂႃႇဢေႃႈ။ ၵူၼ်းမဵဝ်း ယူႉတႃႉ ၵႃႈမီး ဢိၵ်ႇတင်းၵူၼ်းမဵဝ်း ဢီႉသရေႇလႃႉ ၶိုင်ႈၼိုင်ႈၸိူဝ်းၼၼ်ႉ ဢွၼ်ၵၼ်ႁပ်ႉဢဝ်ၶုၼ်ႁေႃၶမ်းမႃးဢေႃႈ။

41လႆႈသမ်ႉ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢွၼ်ၵၼ်မႃးၸူးတီႈၶုၼ်ႁေႃၶမ်းလႄႈ လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၵူၼ်းမဵဝ်း ယူႉတႃႉ ဢၼ်ပဵၼ်ပီႈၼွင်ႉၶႃႈၸဝ်ႈႁဝ်းၸိူဝ်းၼႆႉၼၼ်ႉ လႆႈဢွၼ်ၵၼ်လၵ်ႉဢဝ်ၸဝ်ႈႁဝ်းလႄႈ ဢဝ်ၸဝ်ႈႁဝ်း ဢိၵ်ႇတင်းၵူၼ်းႁၢင်ႈၵူၼ်းႁေႃတင်းလၢႆ တင်းၵူၼ်းၸဝ်ႈၶုၼ်လူင် တႃႇဝိတ်ႈ တင်းသဵင်ႈတင်းလူင် ၶၢမ်ႈၼမ်ႉႁွင်ႈ ယေႃးတၢၼ်ႇ ၼင်ႇႁိုဝ်တီႈၶႃႈ။ မိူဝ်ႈဢၼ်ဝႃႈၼင်ႇၼႆၸိုင်၊-

42ၵူၼ်းမဵဝ်း ယူႉတႃႉ တင်းသဵင်ႈတင်းလူင် ဢွၼ်ၵၼ်ၶိုၼ်းလၢတ်ႈတီႈၵူၼ်း ဢီႉသရေႇလႃႉ တင်းလၢႆလႄႈဝႃႈ၊ ပဵၼ်ၵွပ်ႈပိူဝ်ႈဢၼ်ၶုၼ်ႁေႃၶမ်းပဵၼ်ပီႈၼွင်ႉႁဝ်းၼၼ်ႉဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူၸႂ်မႆႈၶႆႈၸႃႉလူၺ်ႈလွင်ႈဢမူႉၼႆႉၼင်ႇႁိုဝ်။ ႁဝ်းၵိၼ်ၸရိပ်ႈတၢင်းၵိၼ်ၶုၼ်ႁေႃၶမ်းႁိုဝ်။ မၼ်းၸဝ်ႈပၼ်သူးပၼ်လၢပ်ႈသေၸိူဝ်ႉသေပိူင်တီႈႁဝ်းႁိုဝ်။ ဝႃႈၼင်ႇၼႆဢေႃႈ။

43ၵူၼ်းမဵဝ်း ဢီႉသရေႇလႃႉ တင်းလၢႆၵေႃႈ ဢွၼ်ၵၼ်ၶိုၼ်းလၢတ်ႈတီႈၵူၼ်းမဵဝ်း ယူႉတႃႉ ၸိူဝ်းၼၼ်ႉလႄႈဝႃႈ၊ ႁဝ်းၸၢပ်ႈသႅင်ႇတီႈၶုၼ်ႁေႃၶမ်းသိပ်းပုၼ်ႈလႄႈ ႁဝ်းယဵင်ႈၶႅၼ်းၸၢပ်ႈသႅင်ႇမဵဝ်း တႃႇဝိတ်ႈ လိူဝ်တွၼ်းၼႃႇသေသူဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ သူယင်းဢမ်ႇတိူင်ႇပၢင်ႇၵၼ်တင်းႁဝ်းဢွၼ်တၢင်း လူၺ်ႈလွင်ႈဢၼ်ဢဝ်ၶုၼ်ႁေႃၶမ်းၶိုၼ်းမႃးၼၼ်ႉလႄႈ ႁဵတ်းဢမ်ႇၼပ်ႉဢမ်ႇၶၢၼ်းႁဝ်းၼင်ႇႁိုဝ်။ ဝႃႈၼင်ႇၼႆဢေႃႈ။ ၵႂၢမ်းၵူၼ်းမဵဝ်း ယူႉတႃႉ ၸိူဝ်းၼၼ်ႉ ယဵင်ႈၶႅၼ်းႁၢဝ်ႈၵျၢမ်းလိူဝ်တွၼ်းၼႃႇသေၵႂၢမ်း ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉဢေႃႈ။