2 Samuel 6

Shan

← Chapter 5 Jump to: Chapter 7 →

1လႆႈသမ်ႉ တႃႇဝိတ်ႈ ႁႂ်ႈၵူၼ်းမဵဝ်း ဢီႉသရေႇလႃႉ ဢၼ်လိူၵ်ႈၵဵပ်းဢဝ်တင်းသဵင်ႈတင်းလူင်ဢၼ်ဝႃႈ သၢမ်မိုၼ်ႇၼၼ်ႉ ၸူႉၵၼ်တုမ်ၵၼ်သေယဝ်ႉ၊-

2တႃႇဝိတ်ႈ လုၵ်ႉသေၵႃႈတီႈဝဵင်း ပႃႇလႃႉ မိူင်း ယူႉတႃႉ လႄႈ၊ ပႃးဢဝ်ၵူၼ်းၵႃႈဢၼ်မီးတီႈမၼ်းၼၼ်ႉ ၵႂႃႇႁႂ်ႈလႆႈဢဝ်တိူၵ်ႈတႃႇၽြႃးပဵၼ်ၸဝ်ႈ ဢၼ်လႆႈၶၢမ်ႇတၢင်းဢၼ်ဢဝ်ၼႃႇမႃႉၸိုဝ်ႈသဵင်ၸဝ်ႈဢၼ်ဝႃႈ ၼႃႇမႃႉၸိုဝ်ႈသဵင်ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ၸဝ်ႈ ဢၼ်ၵိင်းၼွၼ်းယူႇၵႃႈတီႈၵႄႈဝူင်ႈၵၢင် ၶေႇရူႉၽဵမ်ႇ ၼၼ်ႉ ႁွင်ႉႁဵၵ်ႈၼၼ်ႉသေၵႃႈတီႈၼၼ်ႈမႃးဢေႃႈ။-

3ၶဝ်ဢွၼ်ၵၼ်ဢဝ်တိူၵ်ႈတႃႇၽြႃးပဵၼ်ၸဝ်ႈၼၼ်ႉ တၢင်ႇၵႃႈၼိူဝ်လေႃႉဢၼ်မႂ်ႇလႄႈ ဢဝ်ဢွၵ်ႇသေၵႃႈၼႂ်းႁိူၼ်း ဢၽီႉၼတပ်ႉ ဢၼ်မီးၵႃႈၼိူဝ်လွႆၼၼ်ႉဢေႃႈ။ ဢေႃႇၸႃႉ တင်း ဢႃႇႁီႉဢူဝ်း ဢၼ်ပဵၼ်လုၵ်ႈၸၢႆး ဢၽီႉၼတပ်ႉ ၼၼ်ႉလႆႈႁေႃႈလေႃႉဢၼ်မႂ်ႇၼၼ်ႉဢေႃႈ။-

4ၶဝ်ဢွၼ်ၵၼ်ဢဝ်ဢွၵ်ႇသေၵႃႈၼႂ်းႁိူၼ်း ဢၽီႉၼတပ်ႉ ဢၼ်မီးၵႃႈၼိူဝ်လွႆၼၼ်ႉ ဢိၵ်ႇလူၺ်ႈၵၼ်တင်းတိူၵ်ႈတႃႇၸဝ်ႈလႄႈ ဢႃႇႁီႉဢူဝ်း ၵေႃႈၵႂႃႇဢွၼ်တၢင်းတိူၵ်ႈတႃႇၸဝ်ႈဢေႃႈ။-

5တႃႇဝိတ်ႈ ဢိၵ်ႇတင်းၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ယိပ်းၵမ်ဢဝ်တိင်ႇ၊ တရေႃး၊ ၵွင်ၶဵတ်ႇ၊ ၼႄးၶရႃႇ၊ သႅင်ႇတင်းလၢႆယူႇသေလႄႈ ဢဝ်ႁႅင်းၵျူဝ်းၸႃးပဝ်ႇႁႆႇ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။

6မိူဝ်ႈဢၼ်ၶဝ်ႁွတ်ႈထိုင်ၵႃႈတီႈတလၢင်းယဵပ်ႇၶဝ်ႈ ၼႃႇၶုၼ်ႇ ၼၼ်ႉၸိုင်၊ ၵွပ်ႈပိူဝ်ႈဢၼ်ဝူဝ်းၶီႈလိုတ်းၶီႈလႅင်ႉၼၼ်ႉလႄႈ ဢေႃႇၸႃႉ ယဵတ်ႇမိုဝ်းမၼ်းၸူးတိူၵ်ႈတႃႇၽြႃးပဵၼ်ၸဝ်ႈသေလႄႈယိပ်းၵမ်ဝႆႉဢေႃႈ။-

7တၢင်းၸႂ်မႆႈၶႆႈၸႃႉထႃႇဝရႃႉၽြႃး ဢွၵ်ႇတီႈ ဢေႃႇၸႃႉ ၼၼ်ႉလႄႈ ၽြႃးပဵၼ်ၸဝ်ႈပၼ်တၢမ်ႇၵွပ်ႈပိူဝ်ႈဢပႅတ်ႈမၼ်းၼၼ်ႉ ၵႃႈတီႈၼၼ်ႈသေယဝ်ႉ၊ မၼ်းၼၼ်ႉတၢႆၵႃႈတီႈႁိမ်းတိူၵ်ႈတႃႇၽြႃးပဵၼ်ၸဝ်ႈၼၼ်ႉ ၵႃႈတီႈၼၼ်ႈဢေႃႈ။-

8တႃႇဝိတ်ႈ မီးၸႂ်ဢၼ်ႁဵဝ်ႇၸွပ်ႈၵွပ်ႈပိူဝ်ႈဢၼ် ထႃႇဝရႃႉၽြႃးပၼ်တၢမ်ႇတီႈ ဢေႃႇၸႃႉ ၼၼ်ႉလႄႈ၊ ႁွင်ႉႁဵၵ်ႈၸိုဝ်ႈတီႈၼၼ်ႈ ပေးရိတ်ႉဢေႃႇၸႃႉ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။-

9ၼႂ်းဝၼ်းၼၼ်ႉ တႃႇဝိတ်ႈ ၵူဝ်ႁႄထႃႇဝရႃႉၽြႃးလႄႈထၢမ်လႄႈဝႃႈ၊ တိူၵ်ႈတႃႇထႃႇဝရႃႉၽြႃး တၵ်းႁွတ်ႈထိုင်ၵႃႈတီႈၵဝ်ၸိူဝ်ႉၼင်ႇႁိုဝ်။ ဝႃႈၼင်ႇၼႆသေလႄႈ၊-

10တႃႇဝိတ်ႈ ယင်းဢမ်ႇဢဝ်တိူၵ်ႈတႃႇထႃႇဝရႃႉၽြႃး မႃးၵႃႈတီႈမၼ်းၵႃႈၼႂ်းဝဵင်း တႃႇဝိတ်ႈ ၼၼ်ႉလႄႈ ဢဝ်ငႅၵ်းၵႂႃႇၸူးၵႃႈတီႈႁိူၼ်း ဢူဝ်းပိတ်ႉဢေႇတုမ်ႇ ၵူၼ်း ၵိတ်ႉတီႉ ၼၼ်ႉသေယဝ်ႉ၊-

11တိူၵ်ႈတႃႇထႃႇဝရႃႉၽြႃးၼၼ်ႉ မီးယူႇၵႃႈတီႈႁိူၼ်း ဢူဝ်းပိတ်ႉဢေႇတုမ်ႇ ၵူၼ်း ၵိတ်ႉတီႉ ၼၼ်ႉ သၢမ်လိူၼ်တဵမ်တဵမ်ဢေႃႈ။ ထႃႇဝရႃႉၽြႃးၵေႃႈ ပၼ်တၢင်းလီတီႈ ဢူဝ်းပိတ်ႉဢေႇတုမ်ႇ ဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းသဵင်ႈတင်းလူင်ဢေႃႈ။

12မိူဝ်ႈဢၼ်ပိူၼ်ႈလၢတ်ႈတီႈ တႃႇဝိတ်ႈ လႄႈဝႃႈ၊ ထႃႇဝရႃႉၽြႃး ပၼ်တၢင်းလီတီႈ ဢူဝ်းပိတ်ႉဢေႇတုမ်ႇ ဢိၵ်ႇတင်းၵူၼ်းႁိူၼ်းၵူၼ်းယေးမၼ်းတင်းသဵင်ႈတင်းလူင် ၵွပ်ႈပိူဝ်ႈတိူၵ်ႈတႃႇၽြႃးပဵၼ်ၸဝ်ႈၼၼ်ႉဢေႃႈ၊ ဝႃႈၼင်ႇၼႆၼၼ်ႉၸိုင်၊ တႃႇဝိတ်ႈ ၵႂႃႇလႄႈ မီးတၢင်းၸႂ်ဢၼ်ၸူမ်းသိူဝ်းၼႃႇလူင်လၢင်သေလႄႈ ဢဝ်တိူၵ်ႈတႃႇၽြႃးပဵၼ်ၸဝ်ႈသေၵႃႈၼႂ်းႁိူၼ်း ဢူဝ်းပိတ်ႉဢေႇတုမ်ႇ ၼၼ်ႉ မႃးၵႃႈတီႈဝဵင်း တႃႇဝိတ်ႈ ဢေႃႈ။-

13ၶဝ်ၸိူဝ်းဢၼ်ႁၢပ်ႇတိူၵ်ႈတႃႇထႃႇဝရႃႉၽြႃးၼၼ်ႉ ၵႂႃႇႁူၵ်းယၢင်ႈတိၼ်သေယဝ်ႉ၊ မၼ်းဢဝ်ဝူဝ်းဢိၵ်ႇတင်းတူဝ်ဢွၼ်ႇ ဢၼ်ပီးလီမၼ်းလီပုၵ်ႈၸေႃႇယိတ်ႈဢေႃႈ။-

14တႃႇဝိတ်ႈ ဢဝ်ႁႅင်းၵႃႈဢၼ်မီးဢွၵ်ႇသေလႄႈ ၵျူဝ်းၸႃးၵႃႈဝႅၼ်ၵႃႈတီႈၽၢႆႇၼႃႈထႃႇဝရႃႉၽြႃးလႄႈ တႃႇဝိတ်ႈ ၼၼ်ႉ ၼုင်ႈမႆသိူဝ်ႈသုပ်းပိၵ်ႈယူႇဢေႃႈ၊-

15ၼင်ႇၼၼ်လႄႈ တႃႇဝိတ်ႈ ဢိၵ်ႇတင်း ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉ ဢွၼ်ၵၼ်ႁုၼ်ႉႁိူဝ်ႇယူႇ၊ ပဝ်ႇၼႄးၶရႃႇယူႇသေလႄႈ ဢဝ်တိူၵ်ႈတႃႇထႃႇဝရႃႉၽြႃးမႃးဢေႃႈ။-

16မိူဝ်ႈဢၼ်တိူၵ်ႈတႃႇထႃႇဝရႃႉၽြႃးၶဝ်ႈမႃးၵႃႈၼႂ်းဝဵင်း တႃႇဝိတ်ႈ ယူႇၼၼ်ႉၸိုင်၊ မီႉၶႃႇလႃႉ လုၵ်ႈယိင်း သေႃးလူႉ ၼၼ်ႉ ယူႇၵႃႈတီႈႁူးလၢင်းတဵၼ်လွမ်တူၺ်းလႄႈ ႁၼ်ၶုၼ်လူင် တႃႇဝိတ်ႈ ၵႃႈယူႇဝႅၼ်ယူႇ ၵႃႈတီႈၽၢႆႇၼႃႈထႃႇဝရႃႉၽြႃးၼၼ်ႉယူႇသေလႄႈ ႁဵတ်းဢမ်ႇၼပ်ႉဢမ်ႇၶၢၼ်းတီႈမၼ်းၵႃႈၼႂ်းႁူဝ်ၸႂ်မၼ်းယူႇဢေႃႈ။

17ၶဝ်ဢွၼ်ၵၼ်ဢဝ်တိူၵ်ႈတႃႇထႃႇဝရႃႉၽြႃးသႂၢင်းၶဝ်ႈလႄႈ ဝႆႉၵႃႈၼႂ်းတီႈမၼ်း ၵႃႈတီႈၶိုင်ႈၵၢင်မူဝ်းၵႃႇၸဝ်ႈ ဢၼ် တႃႇဝိတ်ႈ ပူၵ်းတင်ႈဝႆႉပုၼ်ႈမၼ်းၼၼ်ႉသေယဝ်ႉ၊ တႃႇဝိတ်ႈ ပုၵ်ႈၸေႃႇယိတ်ႈဢၼ်တုတ်ႇၽႆး ဢိၵ်ႇတင်းယိတ်ႈမိၵ်ႉသႃႇႁႃယႃႉတင်းလၢႆ ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

18မိူဝ်ႈဢၼ် တႃႇဝိတ်ႈ ႁႂ်ႈဢမူႉတၢင်းဢၼ်ပုၵ်ႈၸေႃႇယိတ်ႈဢၼ်တုတ်ႇၽႆး၊ ယိတ်ႈမိၵ်ႉသႃႇႁႃယႃႉ ယဝ်ႉတူဝ်ႈယဝ်ႉၼၼ်ႉၸိုင်၊ မၼ်းဢဝ်ၼႃႇမႃႉၸိုဝ်ႈသဵင်ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ပၼ်တၢင်းလီတီႈပရဵၵ်ႈသၢတ်ႈတင်းလၢႆဢေႃႈ။-

19မၼ်းတူၵ်းမႅင်ႇပၼ်တီႈၵူၼ်းတင်းသဵင်ႈတင်းလူင် ၵႃႈဢၼ်ၶဝ်ႈပႃးၼႂ်းပရဵၵ်ႈသၢတ်ႈမဵဝ်း ဢီႉသရေႇလႃႉ ၸႃႉၸဵမ်ၵူၼ်းၸၢႆး ၵူၼ်းယိင်းၸိူဝ်းၼၼ်ႉ ယေႈၵေႃႉၶဝ်ႈမုၼ်းယေႈၶႅပ်း၊ ၼိူဝ်ႉယေႈၵွၼ်ႈ၊ ၶႅပ်းမၢၵ်ႇၸပိတ်ႈယေႈၶႅပ်း ၼင်ႇၵၼ်သေယဝ်ႉ၊ ၵူၼ်းတင်းသဵင်ႈတင်းလူင် ဢွၼ်ၵၼ်ၶိုၼ်းမိူဝ်းၵႂႃႇၸူးၵႃႈတီႈတီႈယူႇၶဝ်သေဢေႃႈ။

20လိုၼ်းၼၼ်ႉ တႃႇဝိတ်ႈ မိူဝ်းၵႂႃႇႁႂ်ႈလႆႈပၼ်တၢင်းလီတီႈၵူၼ်းၼႂ်းႁၢင်ႈၼႂ်းႁေႃမၼ်းၸိူဝ်းၼၼ်ႉလႄႈ မီႉၶႃႇလႃႉ လုၵ်ႈယိင်း သေႃးလူႉ ၼၼ်ႉ ဢွၵ်ႇႁပ်ႉႁူဝ်တၢင်းမၼ်းသေလႄႈလၢတ်ႈလႄႈဝႃႈ၊ ၶုၼ်ႁေႃၶမ်း ဢီႉသရေႇလႃႉ ဢၼ်ထွတ်ႇၶူဝ်းၼုင်ႈမၼ်းၸဝ်ႈဝၼ်းမိူဝ်ႈၼႆႉ ၵႃႈတီႈၽၢႆႇၼႃႈၶႃႈၵူၼ်းယိင်း ၶႃႈၵူၼ်းၸၢႆးမၼ်းၸဝ်ႈမိူၼ်ၸိူဝ်ႉၼင်ႇဢၼ် ၵေႃႉဢၼ်မဝ်ဢၼ်မၢင် ထွတ်ႇၶူဝ်းၼုင်ႈမၼ်းလႄႈ ယင်းဢမ်ႇမီးတၢင်းဢၼ်ဢူၵ်းဢၼ်ဢၢႆၼၼ်ႉၼႆ၊ မုၼ်ၽုင်းမၼ်းၸဝ်ႈယႂ်ႇၼႃႇလူင်လၢင်ၵႃႈႁိုဝ်ဝၼ်းမိူဝ်ႈၼႆႉယဝ်ႉလူင်ပႄႇ၊ ဝႃႈၼင်ႇၼႆဢေႃႈ။-

21တႃႇဝိတ်ႈ ၵေႃႈလၢတ်ႈတီႈ မီႉၶႃႇလႃႉ လႄႈဝႃႈ၊ ၵဝ်ႁဵတ်းၵႃႈတီႈၽၢႆႇၼႃႈထႃႇဝရႃႉၽြႃး ဢၼ်လိူၵ်ႈၵဵပ်းဢဝ်ၵဝ်တင်းတူဝ်ပေႃႈမႂ်း ဢိၵ်ႇတင်းပီႈၼွင်ႉၸိူဝ်ႉၶိူဝ်းမၼ်းၵႃႈမီးၼၼ်ႉလႄႈ ၶၢၼ်းၵဝ်ဝႆႉၵႃႈၼႂ်းဢရႃႇၶုၼ် ဢၼ်ဢုပ်ႉပိူင်ႇၵူၼ်းထႃႇဝရႃႉၽြႃး မဵဝ်း ဢီႉသရေႇလႃႉ တင်းလၢႆၼၼ်ႉဢမ်ႇၸႂ်ႈႁိုဝ်။ ပိူဝ်ႈၼႆလႄႈ ၵဝ်တၵ်းၵႃႈဝႅၼ်ၵႃႈတီႈၽၢႆႇၼႃႈထႃႇဝရႃႉၽြႃးဢေႃႈ။-

22ထၢၼ်ႇၼႆႉၵူၺ်းဢမ်ႇၵႃး၊ ၵဝ်ယဵင်ႈၶႅၼ်းတၵ်းယုတ်ႈယွမ်းဢေႃႈ။ ယဵင်ႈၶႅၼ်းတၵ်းၶျႃးတူဝ်ၸဝ်ႈၵဝ်ႇတူၵ်းတီႈတႅမ်ႇ သိုဝ်ႈၼႃႈတႂ်ႈတႃတူဝ်ၸဝ်ႈၵဝ်ႇဢေႃႈ။ တီႈၶႃႈၵူၼ်းယိင်းဢၼ်မႂ်းလၢတ်ႈၸိူဝ်းၼၼ်ႉၸမ်ႉ၊ ၵဝ်တၵ်းမီးသရေႇၼႃႈတႃယူႇဢေႃႈ၊ ဝႃႈၼင်ႇၼႆဢေႃႈ။-

23မီႉၶႃႇလႃႉ လုၵ်ႈယိင်း သေႃးလူႉ ၼၼ်ႉ ယင်းဢမ်ႇမီးလုၵ်ႈမီးလၢင်းလႄႈ ယူႇတေႃႇထိုင်ႁွတ်ႈမၼ်းထၼ်ႈပေႃးတၢႆဢေႃႈ။

← Chapter 5 Jump to: Chapter 7 →