2 Samuel 15

Shan

← Chapter 14 Jump to: Chapter 16 →

1လိုၼ်းၼၼ်ႉ ဢပႃႉသလုမ်ႇ ၼၼ်ႉ ပွင်ႁႅၼ်းလေႃႉရထႃး ဢိၵ်ႇတင်းမႃႉ တင်းၵူၼ်းႁႃႈသိပ်း ဢၼ်လႆႈၶုၼ်ႇလႅၼ်ႈၵႃႈတီႈၽၢႆႇၼႃႈမၼ်းဢေႃႈ။-

2ဢပႃႉသလုမ်ႇ ၼၼ်ႉ ၸၢင်ႈလုၵ်ႉၸဝ်ႉၸဝ်ႉသေလႄႈ ၸုၵ်းယူႇၵႃႈတီႈသဵၼ်ႈတၢင်းႁူးၽၵ်းတူဢေႃႈ။ မိူဝ်ႈဢၼ်ၵေႃႉဢၼ်မီးဢမူႉၼၼ်ႉ မႃးၸူးၵႃႈတီႈၶုၼ်ႁေႃၶမ်း ႁႂ်ႈလႆႈၶၢမ်ႇတၢင်းဢၼ်ၸီႇယၢင်ႇတႅပ်းတတ်းၼၼ်ႉၸိုင်၊ ဢပႃႉသလုမ်ႇ ထၢမ်လႄႈဝႃႈ၊ မႂ်းၼႆႉပဵၼ်ၵူၼ်းဝဵင်းလႂ်၊ ဝႃႈၼင်ႇၼႆသေယဝ်ႉ၊ မိူဝ်ႈဢၼ်ၵေႃႉၼၼ်ႉၶိုၼ်းလဝ်ႊလၢတ်ႈလႄႈဝႃႈ၊ ၶႃႈၸဝ်ႈၼႆႉပဵၼ်မဵဝ်းၸိူဝ်ႉၶိူဝ်း ဢီႉသရေႇလႃႉ ဢၼ်ၸိူဝ်းၼၼ်ႉ ဢၼ်ၸိူဝ်းၼႆႉတီႈၶႃႈဢေႃႈ၊ ဝႃႈၼင်ႇၼႆၼၼ်ႉၸိုင်၊-

3ဢပႃႉသလုမ်ႇ ၸင်ႇလၢတ်ႈလႄႈဝႃႈ တူၺ်းလူး၊ ဢမူႉမႂ်းၼႆႉၸိုဝ်ႈၸႂ်ႈလီငၢမ်းဢေႃႈ။ ၵူၺ်းၵႃႈ ၽူႈလႂ်သေၵေႃႉသေၵူၼ်း ဢမ်ႇလႆႈၶၢမ်ႇဢဝ်ဢၶႂၢင်ႉတီႈၶုၼ်ႁေႃၶမ်း ႁႂ်ႈလႆႈထွမ်ႇဢဝ်ဢမူႉမႂ်း၊ ဝႃႈၼင်ႇၼႆဢေႃႈ။-

4မၢင်ၽဝ်ႇမၢင်ပွၵ်ႈ ဢပႃႉသလုမ်ႇ လၢတ်ႈလႄႈဝႃႈ၊ ႁႂ်ႈၵဝ်ပဵၼ်ၶုၼ်ဢၼ်ၸီႇယၢင်ႇတြႃးၵႃႈတီႈမိူင်းၼႆႉသေၵမ်းလူၺ်ႈ။ ပေႃးပဵၼ်ၸိူဝ်ႉၼင်ႇၼၼ်ၸိုင်၊ ၵႃႈပဵၼ်ၶဝ်ၸိူဝ်းဢၼ်မီးဢမူႉတြႃးၼၼ်ႉ မႃးၸူးၵႃႈတီႈၵဝ်လႄႈ ၵဝ်တၵ်းၸီႇယၢင်ႇၸွမ်းၼင်ႇတြႃးတီႈၶဝ်ဢေႃႈ၊ ဝႃႈၼင်ႇၼႆဢေႃႈ။-

5မိူဝ်ႈဢၼ်သေၵေႃႉသေၵူၼ်း သုတ်ႉၸပ်းသုတ်ႉၸူး ႁႂ်ႈလႆႈႁဵတ်းရူဝ်ႇသေႇၵူဝ်ယမ်ၼၼ်ႉၸိုင်၊ မၼ်းယဵတ်ႇမိုဝ်းမၼ်းယိပ်းၵမ်ဢဝ်ၵေႃႉၼၼ်ႉသေလႄႈၼူမ်ဢေႃႈ။-

6ၼင်ႇၼၼ်လႄႈ ဢပႃႉသလုမ်ႇ ႁဵတ်းတီႈၵူၼ်းမဵဝ်း ဢီႉသရေႇလႃႉ ၵႃႈဢၼ်မႃးတီႈၶုၼ်ႁေႃၶမ်း ႁႂ်ႈလႆႈၶၢမ်ႇတၢင်းဢၼ်ၸီႇယၢင်ႇတႅပ်းတတ်းၼၼ်ႉၸိူဝ်းၼၼ်ႉလႄႈ လၵ်ႉဢဝ်ႁူဝ်ၸႂ်ၵူၼ်းမဵဝ်း ဢီႉသရေႇလႃႉ တင်းလၢႆဢေႃႈ။

7မိူဝ်ႈဢၼ်ပူၼ်ႉသေသီႇပီႊယဝ်ႉၼၼ်ႉ၊ ဢပႃႉသလုမ်ႇ လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၶႅၼ်းတေႃႈပၼ်ဢၶႂၢင်ႉႁႂ်ႈၶႃႈၸဝ်ႈလႆႈၵႂႃႇၵႃႈတီႈဝဵင်း ႁေႇပြုၼ်ႇ လႄႈ ၽေႇဝၢတ်ႈၵတီႉသဵတ်ႈၸႃႇဢၼ်ၶႃႈၸဝ်ႈဝႆႉၵတီႉၼၼ်ႉသေၵမ်းတီႈၶႃႈ၊-

8လွင်ႈမၼ်းၸမ်ႉ ၶႃႈၸဝ်ႈႁဝ်းလႆႈႁဵတ်းၵတီႉသဵတ်ႈၸႃႇဝႆႉ ၼႂ်းမိူဝ်ႈဢၼ်ၶႃႈၸဝ်ႈႁဝ်းယင်းယူႇၵႃႈတီႈဝဵင်း ၵေႇသူႉရႃႉ မိူင်း သူႉရီႉ ၼၼ်ႉလႄႈဝႃႈ၊ ပေႃးထႃႇဝရႃႉၽြႃး ဢဝ်ၵဝ်ၶႃႈၶိုၼ်းမႃးၵႃႈတီႈဝဵင်း ယေႇရူႉသလႅမ်ႇ ၸိုင်၊ ၵဝ်ၶႃႈတၵ်းႁဵတ်းဝၢတ်ႈတီႈထႃႇဝရႃႉၽြႃးဢေႃႈ၊ ဝႃႈၼင်ႇၼႆတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

9ၶုၼ်ႁေႃၶမ်းမီးဢမိင်ႉလႄႈဝႃႈ၊ ၵႂႃႇၼိမ်ၼိမ်လီလီတႃႉ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉ မၼ်းလုၵ်ႉလႄႈၵႂႃႇၵႃႈတီႈဝဵင်း ႁေႇပြုၼ်ႇ ဢေႃႈ။

10ၵူၺ်းၵႃႈ ဢပႃႉသလုမ်ႇ ပွႆႇၸႂ်ႉ ၶဵဝ်လွတ်ႈၽၢႆႇၼႂ်းတင်းလၢႆ ၵႂႃႇၸွတ်ႇၸႅတ်ႇၵႃႈၼႂ်းမဵဝ်း ဢီႉသရေႇလႃႉ ၵႃႈမီး ၵူႈတီႈၵူႈလႅၼ်လႄႈ သင်ႇလၢတ်ႈလႄႈဝႃႈ၊ မိူဝ်ႈဢၼ်သူငိၼ်းသဵင်ဢၼ် ပဝ်ႇတိုင်ႈၼႄးၶရႃႇၼၼ်ႉၸိုင်၊ သူဢွၼ်ၵၼ်လၢတ်ႈလႄႈဝႃႈ၊ ဢပႃႉသလုမ်ႇ ၼင်ႈႁၢင်ႈၼင်ႈႁေႃၵႃႈတီႈဝဵင်း ႁေႇပြုၼ်ႇ ယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။-

11ၵူၼ်းသွင်ပၢၵ်ႇ ဢၼ် ဢပႃႉသလုမ်ႇ ႁွင်ႉဢဝ်ပၢင်းဢဝ်ၼၼ်ႉ ဢွၼ်ၵၼ်ဢွၵ်ႇသေၵႃႈၼႂ်းဝဵင်း ယေႇရူႉသလႅမ်ႇ ၵႂႃႇလူၺ်ႈၵၼ်တင်းမၼ်းဢေႃႈ။ ၶဝ်ၼၼ်ႉမီးတင်းၸႂ်ဢၼ်လီဢၼ်ငၢမ်းသေလႄႈ ၸွမ်းၵႂႃႇလႄႈဢမ်ႇႁူႉလွင်ႈဢမူႉၼၼ်ႉလႃးလႃး။-

12ဢပႃႉသလုမ်ႇ ပွႆႇၸႂ်ႉႁွင်ႉဢဝ် ဢႁီႉသေႃႇၽေးလႃႉ ၵူၼ်းဝဵင်း ၵီႉလေႃႇ ၊ ဢမၢတ်ႈဢၼ်တိူင်ႇပၢင်ႇႁူမ်ႈ တႃႇဝိတ်ႈ ၼၼ်ႉ သေၵႃႈတီႈဝဵင်းတီႈယူႇမၼ်း ၼႂ်းမိူဝ်ႈဢၼ်မၼ်းယင်းတိုၵ်ႉပုၵ်ႈၸေႃႇယိတ်ႈယူႇၼၼ်ႉဢေႃႈ။ ဢမူႉလွင်ႈတၢင်းဢၼ်ပုင်ႇၵၢၼ်ႇၼၼ်ႉ ႁႅင်းယႂ်ႇၵွပ်ႈပိူဝ်ႈဢၼ် ၶဝ်ၸိူဝ်းဢၼ်ၸွမ်းလင် ဢပႃႉသလုမ်ႇ ၼၼ်ႉ ယႂ်ႇၽႄႈၼမ်မႃးယူႇသေႇသေႇၼၼ်ႉဢေႃႈ။-

13ၵေႃႉဢၼ်မွၵ်ႇလၢတ်ႈသတၢင်းသဵင်ၶၢဝ်ႇ ၵေႃႉၼိုင်ႈမႃးၵႃႈတီႈ တႃႇဝိတ်ႈ လႄႈ လဝ်ႊလၢတ်ႈလႄႈဝႃႈ၊ ႁူဝ်ၸႂ်ၵူၼ်းမဵဝ်း ဢီႉသရေႇလႃႉ တင်းလၢႆၼၼ်ႉ ပႃးၸွမ်း ဢပႃႉသလုမ်ႇ ၵႂႃႇယဝ်ႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

14တႃႇဝိတ်ႈ ၵေႃႈမီးဢမိင်ႉတီႈၶႃႈၵူၼ်းမၼ်းၵႃႈဢၼ်မီးတီႈမၼ်း ၵႃႈၼႂ်းဝဵင်း ယေႇရူႉသလႅမ်ႇ ၸိူဝ်းၼၼ်ႉလႄႈဝႃႈ၊ ႁဝ်းဢွၼ်ၵၼ် လုၵ်ႉလႄႈပၢႆႈတႃႉႁဝ်း။ ပေႃးဢမ်ႇၼၼ် ႁဝ်းတၵ်းဢမ်ႇလွတ်ႈသေၵႃႈၼႂ်းမိုဝ်း ဢပႃႉသလုမ်ႇ ၼၼ်ႉၵူၺ်ႉ။ ဢွၼ်ၵၼ်ၸဵဝ်းဢွၵ်ႇၵႂႃႇတႃႉႁဝ်း။ ၵူဝ်မၼ်းတၵ်းၶိုတ်းႁဝ်းၵမ်းလဵဝ်သေလႄႈ ႁဵတ်းၽေးသႂ်ႇတီႈႁဝ်းလႄႈ တိုၵ်းတေႃးယႃႉပႅတ်ႈဝဵင်းလူၺ်ႈၶူမ်းလၢပ်ႇၶူမ်းလႅဝ်းဢေႃႈ၊ ဝႃႈၼင်ႇၼႆဢေႃႈ။-

15ၶႃႈၵူၼ်းၶုၼ်ႁေႃၶမ်းၸိူဝ်းၼၼ်ႉၵေႃႈ ဢွၼ်ၵၼ်လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၶႃႈၸဝ်ႈႁဝ်းၶဝ်တၵ်းဢွၼ်ၵၼ်ႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်းၶႃႈ ၸဝ်ႈၶုၼ်လူင်ၸီႇယၢင်ႇၼၼ်ႉတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

16ၶုၼ်ႁေႃၶမ်းပႃးဢဝ်ၵူၼ်းႁၢင်ႈၵူၼ်းႁေႃၵႃႈမီးဢွၵ်ႇၵႂႃႇဢေႃႈ။ ၵူၺ်းၵႃႈ ၶုၼ်ႁေႃၶမ်းဝႆႉၵိုတ်းၸိူင်ႉၼၢင်းသိပ်းၼိုင်ႈ ႁႂ်ႈလႆႈပႂ်ႉႁၢင်ႈပႂ်ႉႁေႃၸဝ်ႈယူႇဢေႃႈ။-

17ၼင်ႇၼၼ်လႄႈ ၶုၼ်ႁေႃၶမ်းဢိၵ်ႇတင်း ၵူၼ်းၵႃႈဢၼ်ပႃးတီႈမၼ်းၸိူဝ်းၼၼ်ႉ ဢွၵ်ႇၵႂႃႇလႄႈၶျႃးပၢင်ၵႃႈတီႈဝၢၼ်ႈ ပႅတ်ႉႁမ်ႇမိုဝ်ႉႁုၵ်ႇ ဢေႃႈ။-

18ၶႃႈၸဝ်ႈၵူၼ်းၸဝ်ႈၵႃႈမီးၼၼ်ႉ ဢွၼ်ၵၼ်လွမ်ႉႁွပ်ႈယူႇသေလႄႈ ၸွမ်းၵႂႃႇဢေႃႈ။ ၵႃႈပဵၼ်ၵူၼ်း ၶေးရသီႉ လႂ်၊ ၵႃႈပဵၼ်ၵူၼ်း ပေႇလသီႉ လႂ်၊ ၵႃႈပဵၼ်ၵူၼ်း ၵိတ်ႉတီႉ လႂ်၊ ဢၼ်ဝႃႈၵူၼ်းႁူၵ်းပၢၵ်ႇ ဢၼ်လုၵ်ႉသေၵႃႈတီႈဝဵင်း ၵႃႇသႃႉ ၸွမ်းမႃးၸိူဝ်းၼၼ်ႉ ၶီႇၵႂႃႇၵႃႈတီႈၽၢႆႇၼႃႈၶုၼ်ႁေႃၶမ်းဢေႃႈ။

19မိူဝ်ႈၼၼ်ႉ ၶုၼ်ႁေႃၶမ်းမီးဢမိင်ႉတီႈ ဢိတ်ႉတေႇ ၵူၼ်း ၵိတ်ႉတီႉ ၼၼ်ႉလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းၸွမ်းလူၺ်ႈၵၼ်တင်းႁဝ်းမႃးၼင်ႇႁိုဝ်။ ၶိုၼ်းမိူဝ်းလႄႈယူႇၵႃႈတီႈၶုၼ်ႁေႃၶမ်းတႃႉ။ မႂ်းၼႆႉပဵၼ်ၶႅၵ်ႇၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်ဢမ်ႇပႆႇတူၵ်းတီႈတူၵ်းလႅၼ်ဢေႃႈ။-

20ၵွပ်ႈပိူဝ်ႈဢၼ်မႂ်းၸင်ႇႁွတ်ႈမႃးမိူဝ်ႈဝႃးၵူၺ်းလႄႈ မိူဝ်ႈၼႆႉၵဝ်တၵ်းလႆႈႁႂ်ႈမႂ်းလႄႇၵႂႃႇလႄႇမႃးၸွမ်းလူၺ်ႈၵၼ်တင်းႁဝ်း ၵွပ်ႈပိူဝ်ႈဢၼ်ၵဝ်လႆႈၵႂႃႇၸွမ်းၵႃႈၼင်ႇဢၼ်ၵဝ်မီးဢၶႂၢင်ႉ ဢၼ်လႆႈၵႂႃႇၼၼ်ႉႁိုဝ်။ မႂ်းႁွင်ႉဢဝ်ပီႈၼွင်ႉၸိူဝ်ႉၶိူဝ်းမႂ်းသေလႄႈမိူဝ်းၵႂႃႇတႃႉ။ ႁႂ်ႈၵရူႉၼႃႇ ဢိၵ်ႇတင်းသဵတ်ႈၸႃႇ မီးတီႈမႂ်းသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

21ဢိတ်ႉတေႇ ၵေႃႈၶိုၼ်းလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၵႃႈၼင်ႇဢၼ်ဢသၢၵ်ႈထႃႇဝရႃႉၽြႃးလိပ်းယူႇၼၼ်ႉ၊ ၵႃႈၼင်ႇဢၼ်ဢသၢၵ်ႈၸဝ်ႈႁဝ်းၶႃႈ ၸဝ်ႈၶုၼ်လူင်ဢသၢၵ်ႈလိပ်းယူႇၼၼ်ႉ၊ ဢသၢၵ်ႈၸဝ်ႈၶုၼ်လူင်သုမ်းသေဢမ်ႇဝႃႈ၊ ၵတ်းယဵၼ်ၶျၢမ်းသႃႇသေဢမ်ႇဝႃႈ၊ ၶႃႈၸဝ်ႈႁဝ်းၼႆႉ တၵ်းမီးယူႇၵႃႈတီႈဢၼ်ၸဝ်ႈႁဝ်းမီးၼၼ်ႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

22တႃႇဝိတ်ႈ မီးဢမိင်ႉတီႈ ဢိတ်ႉတေႇ လႄႈဝႃႈ၊ ၶီႇၵႂႃႇတႃႉ၊ ဝႃႈၼင်ႇၼႆသေယဝ်ႉ၊ ဢိတ်ႉတေႇ ၵူၼ်း ၵိတ်ႉတီႉ ၼၼ်ႉ ပႃးဢဝ်ၵူၼ်းလူင်ၵူၼ်းဢွၼ်ႇၵႃႈဢၼ်မီးတီႈမၼ်းၼၼ်ႉၶီႇၵႂႃႇဢေႃႈ။-

23ၵူၼ်းဝၢၼ်ႈၵူၼ်းမိူင်းတင်းသဵင်ႈတင်းလူင်ဢွၼ်ၵၼ်ႁဵတ်းသဵင်ဢၼ်ယႂ်ႇၼႃႇႁႆႈႁွင်ႉၼႃႇလူင်လၢင်ဢေႃႈ။ ၵူၼ်းၵႃႈမီးၼၼ်ႉၶီႇၵႂႃႇလႄႈ တူဝ်ၶုၼ်ႁေႃၶမ်း ၶၢမ်ႈၼမ်ႉႁွင်ႈ ၵီႉတြုၼ်ႇ သေယဝ်ႉ၊ ၵူၼ်းၵႃႈမီးၼၼ်ႉ ဢွၼ်ၵၼ်ၶၢမ်ႈၸူးသဵၼ်ႈတၢင်းထိူၼ်ႇဢေႃႈ။

24ၸႃႇတုၵ်ႉ ဢိၵ်ႇတင်းၵူၼ်း လေႇဝီႉ ၵႃႈမီးၵေႃႈ ႁၢမ်ဢဝ်တိူၵ်ႈတႃႇပတီႉၺိၺ်ႇၽြႃးပဵၼ်ၸဝ်ႈသေလႄႈႁွတ်ႈမႃးလႄႈ ၶျႃးတိူၵ်ႈတႃႇၽြႃးပဵၼ်ၸဝ်ႈၼၼ်ႉဝႆႉဢေႃႈ။ ဢႃႇပျႃႇထႃႇ ၼၼ်ႉႁွတ်ႈမႃးလႄႈ ၵိုတ်းသဝ်းယူႇတေႃႇထိုင်ႁွတ်ႈၵူၼ်းထၼ်ႈပေႃးဢွၵ်ႇသေ ၵႃႈၼႂ်းဝဵင်းတင်းသဵင်ႈတင်းမူတ်းၼၼ်ႉဢေႃႈ။-

25ၶုၼ်ႁေႃၶမ်းမီးဢမိင်ႉတီႈ ၸႃႇတုၵ်ႉ လႄႈဝႃႈ၊ ဢဝ်တိူၵ်ႈတႃႇၽြႃးပဵၼ်ၸဝ်ႈၶိုၼ်းမိူဝ်းသူင်ႇဝႆႉၵႃႈၼႂ်းဝဵင်းတႃႉ။ ပေႃးၵဝ်ထူပ်းၵျေးၸူးသိုဝ်ႈၼႃႈတႂ်ႈတႃထႃႇဝရႃႉၽြႃးၸိုင်၊ မၼ်းၸဝ်ႈတၵ်းဢဝ်ၵဝ်ၶိုၼ်းမႃးလႄႈၼႄပျႃးတိူၵ်ႈတႃႇၸဝ်ႈဢိၵ်ႇတင်းတီႈဢၼ်မၼ်းၸဝ်ႈၵိင်းဝၢပ်ႈယူႇၼၼ်ႉဢေႃႈ။-

26ဢမ်ႇၼၼ်ၵေႃႈ ပေႃးမၼ်းၸဝ်ႈမီးဢမိင်ႉလႄႈဝႃႈ၊ ၵဝ်ဢမ်ႇမီးဢလူဝ်ႇတီႈမႂ်းယဝ်ႉ၊ ဝႃႈၼင်ႇၼႆၸိုင်၊ ၵဝ်မီးယူႇဢေႃႈ။ ႁႂ်ႈမၼ်းၸဝ်ႈႁဵတ်းၸွမ်းၵႃႈၼင်ႇဢၼ် မၼ်းၸဝ်ႈမီးဢလူဝ်ႇၼၼ်ႉသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

27ၶုၼ်ႁေႃၶမ်းၵေႃႈ သမ်ႉမီးဢမိင်ႉတီႈယိတ်ႈပရေႃးႁဵၵ်ႈ ၸႃႇတုၵ်ႉ လႄႈဝႃႈ၊ မႂ်းၼႆႉပဵၼ်ၵေႃႉဢၼ်တႃပွင်ႇတႃလႅင်းဢမ်ႇၸႂ်ႈႁိုဝ်။ ႁွင်ႉဢဝ်လုၵ်ႈလၢင်းမႂ်းသွင်ၵေႃႉဢၼ်ဝႃႈ ဢႁီႉမတ်ႉ လုၵ်ႈၸၢႆးမႂ်း ဢိၵ်ႇတင်း ယေႃးၼသၼ်ႇ လုၵ်ႈၸၢႆး ဢႃႇပျႃႇထႃႇ ၸိူဝ်းၼၼ်ႉလႄႈ ၶိုၼ်းမိူဝ်းၵႂႃႇၵႃႈတီႈဝဵင်းၼိမ်ၼိမ်လီလီတႃႉ။-

28ၸူဝ်ႈဢၼ်ၵႂၢမ်းဢၼ်သူႁႂ်ႈလဝ်ႊလၢတ်ႈၼၼ်ႉ ဢမ်ႇပႆႇႁွတ်ႈထိုင်ၼၼ်ႉၸိုင် ၵဝ်တၵ်းၵိုတ်းသဝ်းပႂ်ႉထႃႈယူႇၵႃႈတီႈတိုဝ်ႉတႃႈတီႈဢၼ်ၶၢမ်ႈၼမ်ႉ ၵႃႈၼႂ်းထိူၼ်ႇၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊-

29ၸႃႇတုၵ်ႉ ဢိၵ်ႇတင်း ဢႃႇပျႃႇထႃႇ ၸိူဝ်းၼၼ်ႉ ဢွၼ်ၵၼ်ဢဝ်တိူၵ်ႈတႃႇၽြႃးပဵၼ်ၸဝ်ႈ ၶိုၼ်းမိူဝ်းသူင်ႇၵႃႈတီႈဝဵင်း ယေႇရူႉသလႅမ်ႇ လႄႈ ယူႇၵႃႈတီႈၼၼ်ႈဢေႃႈ။

30တႃႇဝိတ်ႈ ၵေႃႈ ၶိုၼ်ႈလွႆ သၢၼ်ႇလုၼ်ႇ တီႈဢၼ်လႆႈၶိုၼ်ႈၼၼ်ႉယူႇသေလႄႈ ႁႆႈႁွင်ႉၸွမ်းတၢင်းယူႇ၊ ႁူမ်ႇသုမ်ႇႁူဝ်မၼ်းယူႇ၊ ယင်းဢမ်ႇတိုဝ်းၶႅပ်းတိၼ်ယူႇဢေႃႈ။ ၵူၼ်းၵႃႈဢၼ်ၸွမ်းလင်မၼ်းၵႂႃႇၸိူဝ်းၼၼ်ႉၵေႃႈ ဢွၼ်ၵၼ်ႁူမ်ႇသုမ်ႇႁူဝ်ၶဝ်ယူႇ၊ ႁႆႈႁွင်ႉၸွမ်းတၢင်းယူႇသေလႄႈၶိုၼ်ႈဢေႃႈ။

31မိူဝ်ႈဢၼ်ၵေႃႉၼိုင်ႈလဝ်ႊလၢတ်ႈတီႈ တႃႇဝိတ်ႈ လႄႈဝႃႈ ဢႁီႉသေႃႇၽေးလႃႉ ပႃးၼႂ်းမုၵ်ႉၸိူဝ်းဢၼ်ၽွမ်ႉႁူမ်ႈလူၺ်ႈၵၼ်တင်း ဢပႃႉသလုမ်ႇ လႄႈ ပုင်ႇၵၢၼ်ႇၼၼ်ႉတီႈၶႃႈဢေႃႈ၊ ဝႃႈၼင်ႇၼႆၼၼ်ႉၸိုင်၊ တႃႇဝိတ်ႈ သူးတွင်းလႄႈဝႃႈ၊ ထႃႇဝရႃႉၽြႃးတီႈၶႃႈ၊ ၶႅၼ်းတေႃႈႁႂ်ႈတၢင်းၵျၢမ်ႇတၢင်းပွင်ဢၼ် ဢႁီႉသေႃႇၽေးလႃႉ ပၼ်ၼၼ်ႉ ပဵၼ်တၢင်းၵျၢမ်ႇတၢင်းပွင်ဢၼ်မိူၵ်ႈၼႃႇသေၵမ်းတီႈၶႃႈ၊ ဝႃႈၼင်ႇၼႆဢေႃႈ။-

32မိူဝ်ႈဢၼ် တႃႇဝိတ်ႈ ႁွတ်ႈထိုင်ၵႃႈၼိူဝ်ပၢႆၸိၵ်းတီႈဢၼ်လႆႈၶိုၼ်ႈၼၼ်ႉလႄႈ ပဵၼ်တီႈဢၼ်ယၢမ်ႈၵူဝ်းၵႂၢႆႇၽြႃးပဵၼ်ၸဝ်ႈၼၼ်ႉၸိုင်၊ ႁူႉသေး ၵူၼ်း ဢႃႇၶီႉ ၼၼ်ႉ သိၵ်ႇသိူဝ်ႈယၢဝ်းမၼ်းသေလႄႈ ဢဝ်မုၼ်ႈလိၼ်တၢင်ႇသႂ်ႇၵႃႈၼိူဝ်ႁူဝ်လႄႈ ဢွၵ်ႇမႃးႁႂ်ႈလႆႈႁပ်ႉႁူဝ်တၢင်းဢေႃႈ။-

33တႃႇဝိတ်ႈ ၵေႃႈမီးဢမိင်ႉတီႈမၼ်းလႄႈဝႃႈ၊ ပေႃးမႂ်းၸွမ်းလူၺ်ႈၵၼ်တင်းၵဝ်ၸိုင်၊ မႂ်းတၵ်းပဵၼ်တၢင်းဢၼ်ၼၵ်းၼႃပႃးပၼ်တီႈၵဝ်ဢေႃႈ။-

34ပေႃးမႂ်းၶိုၼ်းမိူဝ်းၵႂႃႇၵႃႈတီႈဝဵင်းလႄႈ လဝ်ႊလၢတ်ႈတီႈ ဢပႃႉသလုမ်ႇ လႄႈဝႃႈ၊ ၸဝ်ႈၶုၼ်လူင်တီႈၶႃႈ၊ တေႃႈလဵဝ်ၼႆႉၶႃႈၸဝ်ႈၼႆႉ တၵ်းၶၢမ်ႇႁဵတ်းၶႃႈတီႈၸဝ်ႈႁဝ်း မိူၼ်ၸိူဝ်ႉၼင်ႇဢၼ်ယၢမ်ႈၶၢမ်ႇႁဵတ်းၶႃႈ တီႈပေႃႈၸဝ်ႈမိူဝ်ႈၼၼ်ႉၼၼ်ႉတီႈၶႃႈဢေႃႈ၊ ဝႃႈၼင်ႇၼႆၸိုင်၊ တၵ်းယူႇၽၢႆႇၵဝ်သေလႄႈ ယႃႉတၢင်းၵျၢမ်ႇတၢင်းပွင်ဢၼ် ဢႁီႉသေႃႇၽေးလႃႉ ပၼ်ၼၼ်ႉပႅတ်ႈဢေႃႈ။-

35ၵႃႈတီႈၼၼ်ႈ မီးယိတ်ႈပရေႃးႁဵၵ်ႈ ၸႃႇတုၵ်ႉ ဢိၵ်ႇတင်း ဢႃႇပျႃႇထႃႇ လူၺ်ႈၵၼ်တင်းမႂ်းယူႇဢမ်ႇၸႂ်ႈႁိုဝ်။ ပိူဝ်ႈဢၼ်ပဵၼ်ၼင်ႇၼႆလႄႈ မႂ်းတၵ်းလႆႈဢဝ်ၵႃႈဢၼ်မႂ်းလႆႈငိၼ်းၼႂ်းႁေႃၸဝ်ႈၼၼ်ႉ ၶိုၼ်းလၢတ်ႈတီႈ ၸႃႇတုၵ်ႉ ဢိၵ်ႇတင်း ဢႃႇပျႃႇထႃႇ ယိတ်ႈပရေႃးႁဵၵ်ႈၸိူဝ်းၼၼ်ႉဢေႃႈ။-

36တူၺ်းလူး၊ တီႈၶဝ်ၼၼ်ႉမီးလုၵ်ႈလၢင်းၶဝ်သွင်ၵေႃႉဢၼ်ဝႃႈ ဢႁီႉမတ်ႉ လုၵ်ႈၸၢႆး ၸႃႇတုၵ်ႉ ဢိၵ်ႇတင်း ယေႃးၼသၼ်ႇ လုၵ်ႈၸၢႆး ဢႃႇပျႃႇထႃႇ ၸိူဝ်းၼၼ်ႉယူႇဢေႃႈ။ တၵ်းလႆႈဢဝ်ၵႃႈဢၼ်မႂ်းငိၼ်းလႆႈၼၼ်ႉ ပၼ်ၵႃႈၼႂ်းမိုဝ်းသွင်ၶႃၼၼ်ႉ မႃးတီႈၵဝ်ဢေႃႈ၊ ဝႃႈၼင်ႇၼႆသေယဝ်ႉ၊-

37ႁူႉသေး ၵေႃႉသေႈ တႃႇဝိတ်ႈ ၼၼ်ႉ ၶိုၼ်းမိူဝ်းၵႂႃႇၸူးၵႃႈတီႈဝဵင်းသေဢေႃႈ။ ဢပႃႉသလုမ်ႇ ၵေႃႈၶဝ်ႈၵႃႈၼႂ်းဝဵင်း ယေႇရူႉသလႅမ်ႇ ဢေႃႈ။

← Chapter 14 Jump to: Chapter 16 →

Recommended Reading

Commentary 2 Samuel Commentaries → Devotional 2 Samuel Devotional Guide → Get This Bible Shan Study Bible →