2 Samuel 17

Shan

← Chapter 16 Jump to: Chapter 18 →

1လႆႈသမ်ႉ ဢႁီႉသေႃႇၽေးလႃႉ လဝ်ႊလၢတ်ႈတီႈ ဢပႃႉသလုမ်ႇ လႄႈဝႃႈ၊ ႁႂ်ႈၶႃႈၸဝ်ႈလႆႈလိူၵ်ႈၵဵပ်းဢဝ် ၵူၼ်းမိုၼ်ႇပၢႆသွင်ႁဵင်သေၵမ်းလူၺ်ႈ။ ၼႂ်းၶိုၼ်းၼႆႉၵမ်းလဵဝ် ၶႃႈၸဝ်ႈတၵ်းလုၵ်ႉလႄႈလိုပ်ႈၸွမ်းလမ်းၸွမ်း တႃႇဝိတ်ႈ တီႈၶႃႈဢေႃႈ။-

2ၶႃႈၸဝ်ႈတၵ်းတိုၵ်းတေႃးမၼ်း ၼႂ်းမိူဝ်ႈဢၼ်မၼ်းႁိူဝ်ႉဢူၼ်ႈယူႇ၊ ႁႅင်းမိုဝ်းမၼ်းၵေႇယူႇၼၼ်ႉလႄႈ ႁႂ်ႈမၼ်းတူၵ်းၸႂ်တီႈၶႃႈဢေႃႈ။ ၶဝ်ၸိူဝ်းဢၼ်ပႃးၵႃႈတီႈမၼ်းၵႃႈမီးၼၼ်ႉ တၵ်းၽူင်ႉပၢႆႈယၢႆႈၼီလႄႈ ၶႃႈၸဝ်ႈတၵ်းယႃႉပႅတ်ႈၶုၼ်ႁေႃၶမ်းၵူၺ်းတီႈၶႃႈဢေႃႈ။-

3ၶႃႈၸဝ်ႈတၵ်းဢဝ်ၵူၼ်းတင်းသဵင်ႈတင်းလူင် ၶိုၼ်းမႃးတီႈၸဝ်ႈႁဝ်းတီႈၶႃႈဢေႃႈ။ ပေႃးလႆႈၵေႃႉဢၼ်ၸဝ်ႈႁဝ်းႁႃၼၼ်ႉ ၵေႃႉၼိုင်ႈၵူၺ်းယဝ်ႉၸိုင်၊ တၵ်းပဵၼ်ၸိူဝ်ႉၼင်ႇဢၼ် ၵူၼ်းတင်းသဵင်ႈတင်းလူင်ဢွၼ်ၵၼ်ၶိုၼ်းမႃးၼၼ်ႉတီႈၶႃႈဢေႃႈ။ ၼင်ႇၼၼ်လႄႈ ၵူၼ်းတင်းသဵင်ႈတင်းလူင် တၵ်းယူႇၼိမ်ၼိမ်လီလီတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ။-

4ၵႂၢမ်းၼၼ်ႉထုၵ်ႇၸႂ်ၵျိူၵ်ႈၸႂ် ဢပႃႉသလုမ်ႇ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်း ဢီႉသရေႇလႃႉ တင်းသဵင်ႈတင်းလူင်ၼၼ်ႉဢေႃႈ။

5မိူဝ်ႈၼၼ်ႉ ဢပႃႉသလုမ်ႇ လၢတ်ႈလႄႈဝႃႈ၊ ႁွင်ႉဢဝ် ႁူႉသေး ၵူၼ်း ဢႃႇၶီႉ ၼၼ်ႉမႃးတႃႉ။ ဢွၼ်ၵၼ်ထွမ်ႇငိၼ်းၵႂၢမ်းမၼ်းလူးၵွၼ်ႇတႃႉႁဝ်း၊ ဝႃႈၼင်ႇၼႆလႄႈ၊-

6ႁူႉသေး ႁွတ်ႈမႃးၵႃႈတီႈ ဢပႃႉသလုမ်ႇ သေယဝ်ႉ၊ ဢပႃႉသလုမ်ႇ လၢတ်ႈတီႈမၼ်းလႄႈဝႃႈ၊ ဢႁီႉသေႃႇၽေးလႃႉ ပၼ်တၢင်းၵျၢမ်ႇတၢင်းပွင် ဢၼ်ၸိူဝ်ႉၼင်ႇၼၼ်ယဝ်ႉ။ ထုၵ်ႇလီထွမ်ႇဢဝ်ၵႂၢမ်းမၼ်းႁိုဝ်။ ဢမ်ႇၼၼ်ၵေႃႈမႂ်းလၢတ်ႈတႃႉ၊ ဝႃႈၼင်ႇၼႆသေယဝ်ႉ၊-

7ႁူႉသေး လဝ်ႊလၢတ်ႈတီႈ ဢပႃႉသလုမ်ႇ လႄႈဝႃႈ၊ တၢင်းၵျၢမ်ႇတၢင်းပွင်ဢၼ် ဢႁီႉသေႃႇၽေးလႃႉ ပၼ်မိူဝ်ႈလဵဝ်ၼႆႉၼၼ်ႉ ဢမ်ႇထုၵ်ႇဢမ်ႇလီတီႈၶႃႈ၊ ဝႃႈၼင်ႇၼႆဢေႃႈ။-

8ႁူႉသေး သမ်ႉလဝ်ႊလၢတ်ႈတီႈ ဢပႃႉသလုမ်ႇ ထႅင်ႈလႄႈဝႃႈ၊ ၸဝ်ႈႁဝ်းႁူႉလွင်ႈဢၼ်ၸဝ်ႈပေႃႈၸဝ်ႈႁဝ်း ဢိၵ်ႇတင်းၵူၼ်းမၼ်းၸိူဝ်းၼၼ်ႉ ပဵၼ်ၵေႃႉဢၼ်ႁႅင်းယႂ်ႇၼႃႇ ဢိၵ်ႇတင်းလွင်ႈဢၼ်ၶဝ်မီးၸႂ်ဢၼ်ႁၢဝ်ႈၵျၢမ်းၼႃႇမိူၼ်ၸိူဝ်ႉၼင်ႇမီမႄႈ ဢၼ်လႆႈၶၢမ်ႇတၢင်းဢၼ်ပိူၼ်ႈႁိမ်ဢဝ်လုၵ်ႈဢွၼ်ႇမၼ်းၵႂႃႇယဝ်ႉ ၵႃႈၼႂ်းထိူၼ်ႇၼၼ်ႉယူႇတီႈၶႃႈဢေႃႈ။ ၸဝ်ႈပေႃႈၸဝ်ႈႁဝ်းၼၼ်ႉၵေႃႈ ပဵၼ်ႁူဝ်ႁၢၼ်ၵူၼ်းသိုၵ်းလႄႈ ဢမ်ႇၸၢင်ႈၼွၼ်းလူၺ်ႈၵၼ်တင်းၵူၼ်းတင်းလၢႆ။-

9တူၺ်းလူး၊ မိူဝ်ႈလဵဝ်ၼႆႉ မၼ်းၼၼ်ႉတၵ်းတဵတ်ႇမႅပ်ႉယူႇၵႃႈၼႂ်းၶုမ်လိၼ်ႁူးလိၼ်သေတီႈသေဢၼ်၊ ဢမ်ႇၼၼ်ၵေႃႈ ၵႃႈၼႂ်းတၢင်ႇတီႈတၢင်ႇလႅၼ်တီႈၶႃႈဢေႃႈ။ ပေႃးၵူၼ်းၵမ်ႈၽွင်ႈလူမ်ႉတၢႆၵႃႈတီႈဢွၼ်တၢင်းၸိုင်၊ ၵေႃႉဢၼ်ငိၼ်းလွင်ႈမၼ်းတၢင်းမၼ်းၼၼ်ႉ တၵ်းလၢတ်ႈလႄႈဝႃႈ၊ ၶဝ်ၸိူဝ်းဢၼ်ၸွမ်းလင် ဢပႃႉသလုမ်ႇ ၼၼ်ႉတူၵ်းသုမ်းယဝ်ႉ၊ ဝႃႈၼင်ႇၼႆတီႈၶႃႈဢေႃႈ။-

10မိူဝ်ႈၼၼ်ႉ ၵေႃႉဢၼ်ႁတ်းႁၢၼ်၊ ၵေႃႉဢၼ်ႁူဝ်ၸႂ်ပဵၼ်ၸိူဝ်ႉၼင်ႇႁူဝ်ၸႂ်သၢင်ႇသီႈၼၼ်ႉ ၸႂ်တၵ်းလူႉတီႈၶႃႈဢေႃႈ။ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ႁူႉလွင်ႈဢၼ်ၸဝ်ႈပေႃႈၸဝ်ႈႁဝ်းၼၼ်ႉ ပဵၼ်ၵေႃႉဢၼ်ႁႅင်းယႂ်ႇ ဢိၵ်ႇတင်းလွင်ႈဢၼ်ၶဝ်ၸိူဝ်းဢၼ်ပႃးၸွမ်းတီႈမၼ်းၸဝ်ႈၼၼ်ႉ ပဵၼ်ၵေႃႉဢၼ်မီးတၢင်းဢၼ်ၵတ်ႉၶၼ်ႁတ်းႁၢၼ်ၼၼ်ႉယူႇတီႈၶႃႈဢေႃႈ။-

11ပိူဝ်ႈဢၼ်ပဵၼ်ၼင်ႇၼႆလႄႈ၊ ၶႃႈၸဝ်ႈတၵ်းပၼ်တၢင်းၵျၢမ်ႇတၢင်းပွင်တီႈၶႃႈဢေႃႈ။ တၵ်းလႆႈႁႂ်ႈၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢဝ်ၵႃႈတီႈဝဵင်း တၢၼ်ႇ တေႃႇထိုင်ႁွတ်ႈဝဵင်း ပေႇရသေႇၽႃႉ ဢၼ်ၼပ်ႉဢၢၼ်ႇမိူၼ်ၸိူဝ်ႉၼင်ႇမဵတ်ႉႁိၼ်မဵတ်ႉသၢႆး ၼမ်ႉသမ်ႇမုၵ်ႉတြႃႇၼၼ်ႉၸိူဝ်းၼၼ်ႉ ၸူႉၵၼ်တုမ်ၵၼ်တီႈၸဝ်ႈႁဝ်းလႄႈ တူဝ်ၸဝ်ႈႁဝ်းၶီႇသိုၵ်းတီႈၶႃႈဢေႃႈ။-

12ၼင်ႇၼၼ်လႄႈ ႁဝ်းၶႃႈႁွတ်ႈထိုင်ၵႃႈတီႈမၼ်းၼႂ်းတီႈဢၼ်ထူပ်းမၼ်းသေတီႈတီႈၼၼ်ႉလႄႈ ဢွၼ်ၵၼ်ႁူမ်ႇသုမ်ႇမၼ်းဝႆႉ မိူၼ်ၸိူဝ်ႉၼင်ႇဢၼ်ၼမ်ႉၼၢႆးတူၵ်းသႂ်ႇၵႃႈၼိူဝ်လိၼ်ၼၼ်ႉသေလႄႈ တူဝ်မၼ်းဢိၵ်ႇတင်းၶဝ်ၸိူဝ်းဢၼ်ပႃးတီႈမၼ်းၵႃႈမီးၼၼ်ႉ တၵ်းဢမ်ႇလႆႈၵိုတ်းလႆႈၵျၢၼ်ႇဝႆႉသေၵေႃႉသေၵူၼ်းတီႈၶႃႈ၊-

13ၼွၵ်ႈသေၼၼ်ႉ ပေႃးမၼ်းၶဝ်ႈၵႃႈၼႂ်းဝဵင်းသေဝဵင်းဝဵင်းၸိုင်၊ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် တၵ်းလႆႈဢွၼ်ၵၼ်ဢဝ်ၸိူၵ်ႈတင်းလၢႆမႃးၵႃႈတီႈဝဵင်းၼၼ်ႉလႄႈ၊ ႁဝ်းၶႃႈတၵ်းဢွၼ်ၵၼ်တိုတ်ႉၸၼ်ဢဝ်ဝဵင်းၼၼ်ႉတူၵ်းပႅတ်ႈၵႃႈၼႂ်းၼမ်ႉႁွင်ႈ တေႃႇထိုင်ႁွတ်ႈထၼ်ႈပေႃးမၢၵ်ႇႁိၼ်ႁႄႈဢမ်ႇလႆႈၵိုတ်းလႆႈၵျၢၼ်ႇဝႆႉသေလုၵ်ႈၵႃႈတီႈၼၼ်ႈတီႈၶႃႈဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊-

14ဢပႃႉသလုမ်ႇ ဢိၵ်ႇတင်းၵူၼ်းမဵဝ်း ဢီႉသရေႇလႃႉ ၵႃႈမီးၸိူဝ်းၼၼ်ႉ ဢွၼ်ၵၼ်လၢတ်ႈလႄႈဝႃႈ၊ တၢင်းၵျၢမ်ႇတၢင်းပွင်ဢၼ် ႁူႉသေး ၵူၼ်း ဢႃႇၶီႉ ပၼ်ၼႆႉ ယဵင်ႈၶႅၼ်းလီၼႃႇသေတၢင်းၵျၢမ်ႇတၢင်းပွင် ဢၼ် ဢႁီႉသေႃႇၽေးလႃႉ ပၼ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃး ၸီႇယၢင်ႇႁႂ်ႈယႃႉတၢင်းၵျၢမ်ႇတၢင်းပွင်ဢၼ်လီ ဢၼ် ဢႁီႉသေႃႇၽေးလႃႉ ပၼ်ၼၼ်ႉ ပႅတ်ႈႁႂ်ႈၽေးလႆႈႁွတ်ႈထိုင်ၵႃႈၼိူဝ် ဢပႃႉသလုမ်ႇ ဢေႃႈ။

15မိူဝ်ႈၼၼ်ႉ ႁူႉသေး သင်ႇလၢတ်ႈတီႈယိတ်ႈပရေႃးႁဵၵ်ႈ ၸႃႇတုၵ်ႉ ဢိၵ်ႇတင်း ဢႃႇပျႃႇထႃႇ ၸိူဝ်းၼၼ်ႉလႄႈဝႃႈ၊ ဢႁီႉသေႃႇၽေးလႃႉ ၼၼ်ႉ ပၼ်တၢင်းၵျၢမ်ႇတၢင်းပွင်ဢၼ်ၸိူဝ်ႉၼင်ႇၼႆ ဢၼ်ၸိူဝ်ႉၼင်ႇၼၼ် တီႈ ဢပႃႉသလုမ်ႇ ဢိၵ်ႇတင်းၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်း ဢီႉသရေႇလႃႉ ၸိူဝ်းၼၼ်ႉယဝ်ႉ။ ၵဝ်ၶႃႈၵေႃႈပၼ်တၢင်းၵျၢမ်ႇတၢင်းပွင် ဢၼ်ၸိူဝ်ႉၼင်ႇၼႆ ဢၼ်ၸိူဝ်ႉၼင်ႇၼၼ်ယဝ်ႉ။-

16ပိူဝ်ႈဢၼ်ပဵၼ်ၼင်ႇၼႆလႄႈ ပွႆႇၸႂ်ႉၵႂႃႇၶၼ်ၶၼ်ၽႂ်းၽႂ်းလႄႈ လဝ်ႊလၢတ်ႈတီႈ တႃႇဝိတ်ႈ လႄႈဝႃႈ၊ ၶိုၼ်းၼႆႉယႃႇပေယူႇၵႃႈတီႈတိုဝ်ႉတႃႈ တီႈဢၼ်ၶၢမ်ႈၼမ်ႉၵႃႈၼႂ်းထိူၼ်ႇသေၵမ်းတီႈၶႃႈ၊ ၶၢမ်ႈၵႂႃႇၶၼ်ၶၼ်ၽႂ်းၽႂ်းသေၵမ်းတီႈၶႃႈ၊ ၵူၼ်းၶုၼ်ႁေႃၶမ်း ဢိၵ်ႇတင်းၵူၼ်းၵႃႈဢၼ်ပႃးတီႈၸဝ်ႈႁဝ်းၼၼ်ႉ တၵ်းႁွတ်ႈထိုင်တၢင်းဢၼ်သုမ်းဢၼ်ၸွမ်းတီႈၶႃႈဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆသေယဝ်ႉ၊-

17ယေႃးၼသၼ်ႇ တင်း ဢႁီႉမတ်ႉ ၸိူဝ်းၼၼ်ႉ မီးယူႇၵႃႈတီႈ ဢႅၼ်ႇရေႃႇၵေးလႃႉ လႄႈ မႄႈယိင်းဢွၼ်ႇၵေႃႉၼိုင်ႈ ၵႂႃႇလၢတ်ႈပၼ်တီႈသွင်ၶႃလႄႈ သွင်ၶႃၼၼ်ႉၵႂႃႇႁႂ်ႈလႆႈလဝ်ႊလၢတ်ႈပၼ်တီႈၶုၼ်လူင် တႃႇဝိတ်ႈ ဢေႃႈ။ လွင်ႈမၼ်းၸမ်ႉ ၵူဝ်ပိူၼ်ႈႁၼ်လႄႈ သွင်ၶႃဢမ်ႇၶဝ်ႈၵႃႈၼႂ်းဝဵင်း။-

18ၵူၺ်းၵႃႈ ၵူၼ်းဢွၼ်ႇၵေႃႉၼိုင်ႈ ႁၼ်သွင်ၶႃၼၼ်ႉလႄႈ လဝ်ႊလၢတ်ႈတီႈ ဢပႃႉသလုမ်ႇ ဢေႃႈ။ သွင်ၶႃၼၼ်ႉၵႂႃႇၶၼ်ၶၼ်ၽႂ်းၽႂ်းလႄႈ ၶဝ်ႈၵႃႈၼႂ်းႁိူၼ်းၵူၼ်းၵေႃႉၼိုင်ႈ ဢၼ်မီးၼမ်ႉမေႃႇၵႃႈၼႂ်းႁိူၼ်းမၼ်းၼၼ်ႉ ၵႃႈတီႈဝဵင်း ပႃႇႁူႉရိမ်း ၼၼ်ႉသေယဝ်ႉ၊ လူင်းယူႇၵႃႈၼႂ်းၼမ်ႉမေႃႇၼၼ်ႉလႄႈ၊-

19ၵွပ်ႈပိူဝ်ႈဢၼ်မႄႈယိင်းၵေႃႉၼိုင်ႈ ဢဝ်ဢၼ်ႁူမ်ႇၼမ်ႉမေႃႇၼၼ်ႉ ႁူမ်ႇပၢၵ်ႇၼမ်ႉမေႃႇဝႆႉသေယဝ်ႉ၊ ဢဝ်ၶဝ်ႈဢၼ်မၢၵ်ႈယဝ်ႉၼၼ်ႉ တၢၵ်ႇဝႆႉၵႃႈၼိူဝ်ၼၼ်ႉလႄႈ ဢမ်ႇလႆႈႁူႉလွင်ႈၼၼ်ႉလႃးလႃး။-

20ၶႃႈၵူၼ်း ဢပႃႉသလုမ်ႇ ၸိူဝ်းၼၼ်ႉ ႁွတ်ႈထိုင်ၵႃႈတီႈမႄႈယိင်းၼၼ်ႉ ၵႃႈၼႂ်းႁိူၼ်းၼၼ်ႉလႄႈထၢမ်လႄႈဝႃႈ၊ ဢႁီႉမတ်ႉ တင်း ယေႃးၼသၼ်ႇ ၸိူဝ်းၼၼ်ႉမီးၵႃႈလႂ်၊ ဝႃႈၼင်ႇၼႆသေယဝ်ႉ၊ မႄႈယိင်းၼၼ်ႉၵေႃႈလၢတ်ႈလႄႈဝႃႈ၊ သွင်ၶႃၶၢမ်ႈၵႂႃႇၵႃႈတီႈၽၢႆႇပုၼ်ႉၼမ်ႉႁွင်ႈယဝ်ႉ၊ ဝႃႈၼင်ႇၼႆလႄႈ၊ မိူဝ်ႈဢၼ်ၶဝ်ၼၼ်ႉႁႃလႄႈဢမ်ႇထူပ်းဢမ်ႇႁၼ်ၼၼ်ႉၸိုင် ၶဝ်ၶိုၼ်းမိူဝ်းၵႂႃႇၵႃႈတီႈဝဵင်း ယေႇရူႉသလႅမ်ႇ သေဢေႃႈ။-

21လိုၼ်းသေဢၼ်ၶဝ်ၶိုၼ်းမိူဝ်းၵႂႃႇယဝ်ႉၼၼ်ႉ၊ သွင်ၶႃၼၼ်ႉလုၵ်ႉသေၵႃႈၼႂ်းၼမ်ႉမေႃႇဢွၵ်ႇလႄႈၵႂႃႇသေယဝ်ႉ၊ လဝ်ႊလၢတ်ႈတီႈၶုၼ်လူင် တႃႇဝိတ်ႈ လႄႈဝႃႈ၊ လုၵ်ႉလႄႈၶၢမ်ႈၵႂႃႇၵႃႈတီႈၽၢႆႇပုၼ်ႉၼမ်ႉႁွင်ႈ ၶၼ်ၶၼ်ၽႂ်းၽႂ်းသေၵမ်းတီႈၶႃႈ၊ ဢႁီႉသေႃႇၽေးလႃႉ ၼၼ်ႉ ပၼ်တၢင်းၵျၢမ်ႇတၢင်းပွင်ၸိူဝ်ႉၼင်ႇၼႆယူႇၽၢႆႇၼိုင်ႈတင်းၸဝ်ႈႁဝ်းတီႈၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

22တႃႇဝိတ်ႈ ဢိၵ်ႇတင်းၶဝ်ၸိူဝ်းဢၼ်ပႃးတီႈမၼ်းၵႃႈမီးၼၼ်ႉ ဢွၼ်ၵၼ်လုၵ်ႉလႄႈၶၢမ်ႈၼမ်ႉႁွင်ႈ ယေႃးတၢၼ်ႇ ဢေႃႈ။ မိူဝ်ႈဢၼ်မိူင်းလႅင်းၼၼ်ႉၸိုင် ၵေႃႉဢၼ်ဢမ်ႇပႆႇၶၢမ်ႈၼမ်ႉႁွင်ႈ ယေႃးတၢၼ်ႇ ပူၼ်ႉၼၼ်ႉ ဢမ်ႇမီးသေၵေႃႉသေၵူၼ်း။

23ဢႁီႉသေႃႇၽေးလႃႉ ၼၼ်ႉ ႁူႉႁၼ်လွင်ႈဢၼ်ဢမ်ႇၸွမ်းတၢင်းၵျၢမ်ႇတၢင်းပွင်မၼ်းၼၼ်ႉသေယဝ်ႉ၊ ႁႂ်ႈတၢင်ႇၵွပ်းႁၢင်ႈၵွပ်းလီႈ မၼ်းသေလႄႈ လုၵ်ႉလႄႈၵႂႃႇၸူးၵႃႈတီႈႁိူၼ်းမၼ်းၵႃႈတီႈဝဵင်းတီႈယူႇမၼ်းၼၼ်ႉသေလႄႈ ၸီႇယၢင်ႇဢမူႉၵၢၼ်ႁိူၼ်းမၼ်းသေယဝ်ႉ၊ ဢဝ်ၸိူၵ်ႈမတ်ႉႁွႆႈၵႅၼ်ၶေႃးမၼ်းသေလႄႈတၢႆသေဢေႃႈ။ မၼ်းလႆႈၶၢမ်ႇတၢင်းဢၼ်သၢင်းၵျူဝ်ႇၵႃႈၼႂ်းပႃႇႁဵဝ်ႈပူႇမွၼ်ႇမၼ်းၸိူဝ်းၼၼ်ႉဢေႃႈ။

24တႃႇဝိတ်ႈ ႁွတ်ႈထိုင်ၵႃႈတီႈဝဵင်း မႁႃႇၼိမ်ႇ ဢေႃႈ။ ဢပႃႉသလုမ်ႇ ၵေႃႈၶၢမ်ႈၼမ်ႉႁွင်ႈ ယေႃးတၢၼ်ႇ ဢိၵ်ႇလူၺ်ႈၵၼ်တင်းၵူၼ်းမဵဝ်း ဢီႉသရေႇလႃႉ ၵႃႈဢၼ်ပႃးတီႈမၼ်းၼၼ်ႉဢေႃႈ၊-

25ဢပႃႉသလုမ်ႇ ၼၼ်ႉၶၢၼ်းဝႆႉ ဢႃႇမသႃႉ ဝႆႉၵႃႈၼႂ်းဢရႃႇၶုၼ်ပူဝ်ႇၶျုၵ်ႈတၢင်တူဝ် ယႂႃႇၽႃႉ ၼၼ်ႉဢေႃႈ။ ဢႃႇမသႃႉ ၸမ်ႉ၊ ပဵၼ်လုၵ်ႈၸၢႆး ယေႇသႃႇ ၵူၼ်း ဢီႉသမေႇလႃႉ ဢၼ်ဢဝ်ၵၼ်တင်း ဢၽီႉၵေးလႃႉ ဢၼ်ပဵၼ်လုၵ်ႈယိင်း ၼႃႇႁတ်ႉ လႄႈ ပဵၼ်ၼွင်ႉယိင်း ၸေႇရူႉယႃႇ မေး ယႂႃႇၽႃႉ ၼၼ်ႉဢေႃႈ။-

26ၵူၼ်းမဵဝ်း ဢီႉသရေႇလႃႉ တင်းလၢႆ ဢိၵ်ႇတင်း ဢပႃႉသလုမ်ႇ ၼၼ်ႉ ၶျႃးတပ်ႉၶဝ်ၵႃႈတီႈမိူင်း ၵီႉလတ်ႉ ဢေႃႈ။

27မိူဝ်ႈဢၼ် တႃႇဝိတ်ႈ ႁွတ်ႈထိုင်ၵႃႈတီႈဝဵင်း မႁႃႇၼိမ်ႇ ၼၼ်ႉၸိုင်၊ သေႃႇၽီႉ လုၵ်ႈၸၢႆး ၼႃႇႁတ်ႉ ၵူၼ်းဝဵင်း ရပ်ႉပႃႇ မိူင်း ဢမ်ႇမုၼ်ႇ၊ မႃႇၶီႉရႃႉ လုၵ်ႈၸၢႆး ဢမျေးလႃႉ ၵူၼ်းဝဵင်း လေႃႇတေႇပႃႇ၊ ပႃႇၸီႉလေး ၵူၼ်းဝဵင်း ရေႃႇၵေႇလိမ်း မဵဝ်း ၵီႉလတ်ႉ ၸိူဝ်းၼၼ်ႉ၊-

28ဢွၼ်ၵၼ်ဢဝ်တီႈၼွၼ်းလႂ်၊ ၵွၵ်းလႂ်၊ မေႃႈလိၼ်လႂ် ဢိၵ်ႇလူၺ်ႈၵၼ်တင်းၶဝ်ႈသၢၼ်ၵျုင်ႇ၊ ၶဝ်ႈသၢၼ်မူႉယေႃး၊ ၽွင်ၶဝ်ႈမုၼ်း၊ မဵဝ်းၶဝ်ႈတႅၵ်ႇ၊ မဵဝ်းထူဝ်ႇ၊ မဵဝ်းထူဝ်ႇထိူၼ်ႇ၊ မဵဝ်းထူဝ်ႇတႅၵ်ႇ၊-

29ၼမ်ႉၽိုင်ႈ၊ ထေႃးပၢတ်ႈ၊ သူဝ်း၊ ၼမ်ႉၼူမ်းၵၢမ်ႈ ပုၼ်ႈဢၼ် တႃႇဝိတ်ႈ ဢိၵ်ႇတင်းၶဝ်ၸိူဝ်းဢၼ်ပႃးတီႈမၼ်းၼၼ်ႉ တၵ်းၵိၼ်ၼၼ်ႉမႃးဢေႃႈ။ လွင်ႈမၼ်းၸမ်ႉၶဝ်ၼၼ်ႉဝႃႈ၊ ၵူၼ်းတင်းလၢႆ လႆႈဢိုပ်းတၢင်းၵိၼ်ယူႇ၊ ႁိူဝ်ႉဢူၼ်ႈယူႇ၊ ယၢၵ်ႇၼမ်ႉယူႇၵႃႈၼႂ်းထိူၼ်ႇမႃးယဝ်ႉလူင်ပႄႇ၊ ဝႃႈၼင်ႇၼႆဢေႃႈ။

← Chapter 16 Jump to: Chapter 18 →