2 Samuel 20

Shan

← Chapter 19 Jump to: Chapter 21 →

1မိူဝ်ႈၼၼ်ႉ မီးၵူၼ်းဢႃႉထမ်ႇမႃႉဢၼ်လႆႈၸိုဝ်ႈ သေးၽႃႉ လုၵ်ႈၸၢႆး ပီႉၶရီႉ မဵဝ်း ပိၼ်ႇယႃႇမိၼ်ႇ ၼၼ်ႉၵေႃႉၼိုင်ႈ ၵႃႈတီႈၼၼ်ႈဢေႃႈ။ ၵေႃႉၼၼ်ႉပဝ်ႇတိုင်ႈၼႄးၶရႃႇသေလႄႈလၢတ်ႈဝႃႈ၊ မဵဝ်း ဢီႉသရေႇလႃႉ ၶဝ်ဢိူၺ်း၊ ႁဝ်းဢမ်ႇၸၢပ်ႈသႅင်ႇၵၼ်တင်း တႃႇဝိတ်ႈ သေပုၼ်ႈသေတႃႇလႄႈ ဢမ်ႇထိူၵ်ႈၶၢမ်ႇဢမူၺ်ႇလုၵ်ႈၸၢႆး ယေႇသႄး ယဝ်ႉ။ ၵူၼ်းတင်းလၢႆၶဝ်ဢိူၺ်း၊ ဢွၼ်ၵၼ်ၶိုၼ်းမိူဝ်းၵႂႃႇၵႃႈတီႈမူဝ်းၵႃႇ တီႈယူႇသူႁင်းၽႂ်ႁင်းမၼ်းသေတႃႉ၊ ဝႃႈၼင်ႇၼႆသေယဝ်ႉ၊-

2ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်ဢွၵ်ႇသေၵႃႈတီႈဢၼ်ၸွမ်း တႃႇဝိတ်ႈ ၼၼ်ႉလႄႈ ၸွမ်းလင် သေးၽႃႉ လုၵ်ႈၸၢႆး ပီႉၶရီႉ ၼၼ်ႉဢေႃႈ။ ၵူၼ်းမဵဝ်း ယူႉတႃႉ တင်းလၢႆၸမ်ႉ၊ ၸပ်းၸွမ်းၶုၼ်ႁေႃၶမ်းၶဝ်ယူႇ ဢဝ်ၵႃႈတီႈၼမ်ႉႁွင်ႈ ယေႃးတၢၼ်ႇ တေႃႇထိုင်ႁွတ်ႈဝဵင်း ယေႇရူႉသလႅမ်ႇ ဢေႃႈ။

3ၶုၼ်လူင် တႃႇဝိတ်ႈ ၼၼ်ႉ ႁွတ်ႈထိုင်ၵႃႈတီႈႁေႃၸဝ်ႈ ၼႂ်းဝဵင်း ယေႇရူႉသလႅမ်ႇ ၼၼ်ႉသေယဝ်ႉ၊ ဢဝ်ၸိူင်ႉၼၢင်းၸဝ်ႈသိပ်းၼိုင်ႈ ဢၼ်ဝႆႉႁႂ်ႈလႆႈပႂ်ႉႁေႃၸဝ်ႈၸိူဝ်းၼၼ်ႉလႄႈ ဝႆႉၵႃႈၼႂ်းႁိူၼ်းၶင်ဝႆႉဢေႃႈ။ ပိၵ်ႉသမ်ႉလဵင်ႉလူၶဝ်ၼၼ်ႉယူႇသေၵေႃႈ ဢမ်ႇၶဝ်ႈဢမ်ႇၸူးတီႈၶဝ်။ ၶဝ်ၼၼ်ႉၶၢမ်ႇတၢင်းဢၼ်ၶျုၵ်ႈဝႆႉ တေႃႇထိုင်ႁွတ်ႈထၼ်ႈပေႃးတၢႆလႄႈ လႆႈယူႇၸိူဝ်ႉၼင်ႇမႄႈမူၵ်းမႄႈမၢႆႈၼၼ်ႉဢေႃႈ။

4မိူဝ်ႈၼၼ်ႉ ၶုၼ်ႁေႃၶမ်းၵေႃႈ မီးဢမိင်ႉတီႈ ဢႃႇမသႃႉ လႄႈဝႃႈ၊ ၼႂ်းသၢမ်ဝၼ်း မႂ်းတၵ်းလႆႈႁႂ်ႈၵူၼ်း ယူႉတႃႉ တင်းလၢႆ ၸူႉၵၼ်တုမ်ၵၼ်သေလႄႈ တူဝ်မႂ်းတၵ်းလႆႈၶိုၼ်းမႃးၵႃႈတီႈၼႆႈဢေႃႈ၊ ဝႃႈၼင်ႇၼႆဢေႃႈ။-

5ဢႃႇမသႃႉ ၼၼ်ႉၵေႃႈ ၵႂႃႇလႄႈႁႂ်ႈၵူၼ်း ယူႉတႃႉ တင်းလၢႆ ၸူႉၵၼ်တုမ်ၵၼ်သေယဝ်ႉ၊ ပူၼ်ႉၶိင်ႇဢၼ်မၵ်းၶၢၼ်းဝႆႉၼၼ်ႉဢေႃႈ။-

6တႃႇဝိတ်ႈ ၵေႃႈ မီးဢမိင်ႉတီႈ ဢၽီႉသေး လႄႈဝႃႈ၊ မိူဝ်ႈလဵဝ်ၼႆႉ သေးၽႃႉ လုၵ်ႈၸၢႆး ပီႉၶရီႉ ၼၼ်ႉ ယဵင်ႈၶႅၼ်းတၵ်းႁဵတ်းလွင်ႈတၢင်းဢၼ်ဢမ်ႇလီတီႈႁဝ်းလိူဝ်တွၼ်းၼႃႇသေ ဢပႃႉသလုမ်ႇ ၼၼ်ႉဢေႃႈ။ ႁွင်ႉဢဝ်ၶႃႈၵူၼ်းၸဝ်ႈမႂ်းတင်းလၢႆလႄႈ လိုပ်ႈၸွမ်းလမ်းၸွမ်းမၼ်းၼၼ်ႉၵႂႃႇတႃႉ။ ပေႃးဢမ်ႇၼၼ် ၵူဝ်မၼ်းတၵ်းၶဝ်ႈၵႃႈၼႂ်းဝဵင်းဢၼ်မၼ်ႈၶိူင်ႇသေတီႈသေဢၼ်လႄႈ လပ်ႉႁၢႆတႃႁဝ်းၵႂႃႇသေဢေႃႈ၊ ဝႃႈၼင်ႇၼႆလႄႈ၊-

7ၵူၼ်း ယႂႃႇၽႃႉ တင်းလၢႆ ဢိၵ်ႇတင်းၵူၼ်း ၶေးရသီႉ လႂ်၊ ၵူၼ်း ပေႇလသီႉ လႂ် တင်းၵူၼ်းဢၼ်ႁႅင်းယႂ်ႇၼႃႇ တင်းသဵင်ႈတင်းလူင်ၸိူဝ်းၼၼ်ႉ ဢွၼ်ၵၼ်ၸွမ်းလင်မၼ်းၼၼ်ႉ ဢွၵ်ႇသေၵႃႈၼႂ်းဝဵင်း ယေႇရူႉသလႅမ်ႇ ၵႂႃႇ ႁႂ်ႈလႆႈလိုပ်ႈၸွမ်းလမ်းၸွမ်း သေးၽႃႉ လုၵ်ႈၸၢႆး ပီႉၶရီႉ ၼၼ်ႉဢေႃႈ။-

8မိူဝ်ႈဢၼ်ၶဝ်ႁွတ်ႈထိုင်ၵႃႈတီႈမၢၵ်ႇႁိၼ်လူင် ဢၼ်မီးၵႃႈတီႈဝဵင်း ၵီႉပွင်ႇ ၼၼ်ႉၸိုင်၊ ဢႃႇမသႃႉ ၼၼ်ႉ ၶီႇမႃးႁပ်ႉႁူဝ်တၢင်းၶဝ်ဢေႃႈ။ ယႂႃႇၽႃႉ ၼၼ်ႉ ဢဝ်ၶူဝ်းၼုင်ႈတိုၵ်းသိုၵ်းဢၼ်မၼ်းၼုင်ႈၼၼ်ႉႁတ်ႉဢႅဝ်ယူႇ၊ ၵႃႈၼိူဝ်ၶူဝ်းၼၼ်ႉမီးသၢႆဢႅဝ် ဢၼ်ဢဝ်လၢပ်ႇမတ်ႉၵွပ်ႈလူၺ်ႈၵၼ်တင်းၵပ်းမၼ်းၼၼ်ႉ ႁတ်ႉဝႆႉၵႃႈတီႈဢႅဝ်မၼ်းၼၼ်ႉလႄႈမီးဝႆႉယူႇဢေႃႈ။ ၼႂ်းမိူဝ်ႈဢၼ်ယင်းတိုၵ်ႉၵႂႃႇယူႇၼၼ်ႉၸိုင်၊ လၢပ်ႇၼၼ်ႉသုတ်ႉတူၵ်းၵႂႃႇဢေႃႈ။-

9ယႂႃႇၽႃႉ ၵေႃႈထၢမ်တီႈ ဢႃႇမသႃႉ လႄႈဝႃႈ၊ ယူႇလီၵိၼ်ဝၢၼ်ယူႇႁိုဝ်။ ၼွင်ႉၸၢႆးၵဝ်ဢိူၺ်း၊ ဝႃႈၼင်ႇၼႆယူႇသေလႄႈ ယႂႃႇၽႃႉ ဢဝ်မိုဝ်းၶွၼ်ၶႂႃ ယိပ်းၵမ်ၼူတ်ႇၵၢင်း ဢႃႇမသႃႉ ႁႂ်ႈလႆႈၼူမ်မၼ်းဢေႃႈ။-

10ၵွပ်ႈပိူဝ်ႈဢၼ် ဢႃႇမသႃႉ ဢမ်ႇႁဵတ်းသတီႉတီႈလၢပ်ႇဢၼ် ယႂႃႇၽႃႉ ယိပ်းၵမ်ယူႇၵႃႈၼႂ်းမိုဝ်းၶွၼ်သၢႆႉမၼ်းၼၼ်ႉလႄႈ၊ မၼ်းၼၼ်ႉ ဢဝ်တႅင်းသႂ်ႇတီႈပုမ်မၼ်းလႄႈဢဝ်သႆႈမၼ်းဢွၵ်ႇတူၵ်းၵႃႈၼိူဝ်လိၼ်ဢေႃႈ။ ဢမ်ႇထၢပ်ႈဢမ်ႇတႅင်းထႅင်ႈလႄႈ ဢႃႇမသႃႉ တၢႆဢေႃႈ။ ယႂႃႇၽႃႉ တင်းၼွင်ႉၸၢႆးမၼ်း ဢၽီႉသေး ၸိူဝ်းၼၼ်ႉ လိုပ်ႈၸွမ်းလမ်းၸွမ်း သေးၽႃႉ လုၵ်ႈၸၢႆး ပီႉၶရီႉ ၼၼ်ႉဢေႃႈ။-

11ၵူၼ်း ယႂႃႇၽႃႉ ၵေႃႉၼိုင်ႈ ၸုၵ်းပႂ်ႉယူႇၵႃႈတီႈႁိမ်းမၼ်းၼၼ်ႉသေလႄႈ မွၵ်ႇလၢတ်ႈလႄႈဝႃႈ၊ ပေႃးပဵၼ်ၵေႃႉဢၼ်ပဵၼ်ၸႂ် ယႂႃႇၽႃႉ ၊ ၵေႃႉဢၼ်ယူႇၽၢႆႇ တႃႇဝိတ်ႈ ၸိုင်၊ ၵႂႃႇၸွမ်းလင် ယႂႃႇၽႃႉ တႃႉ၊ ဝႃႈၼင်ႇၼႆဢေႃႈ။-

12ဢႃႇမသႃႉ ၼၼ်ႉၵိင်ႈၵိူၵ်ႇယူႇၵႃႈၼႂ်းလိူတ်ႈမၼ်း ၵႃႈၼႂ်းၵၢင်တၢင်းၼၼ်ႉဢေႃႈ။ မိူဝ်ႈဢၼ်ၵေႃႉၼၼ်ႉႁၼ် ၵူၼ်းတင်းသဵင်ႈတင်းလူင် ဢွၼ်ၵၼ်ၸုၵ်းၵိုတ်းယူႇၼၼ်ႉၸိုင်၊ မၼ်းဢဝ် ဢႃႇမသႃႉ ၼၼ်ႉ ဢွၵ်ႇသေၵႃႈၼႂ်းသဵၼ်ႈတၢင်းလူင် ၶၢႆႉၵႂႃႇဝႆႉၵႃႈတီႈပၢင်ႇတူင်ႈၼႃးသေယဝ်ႉ၊ ဢဝ်ၶူဝ်းၼုင်ႈႁူမ်ႇသုမ်ႇဝႆႉသေ ၼႂ်းမိူဝ်ႈဢၼ်မၼ်းႁၼ်ၵူၼ်းၵႃႈဢၼ်မႃးသဵၼ်ႈတၢင်းၼၼ်ႉ ၸုၵ်းၵိုတ်းယူႇၸိူဝ်ႉၼင်ႇၼၼ် ၼၼ်ႉဢေႃႈ။-

13ၶၢႆႉသေၵႃႈတီႈသဵၼ်ႈတၢင်းလူင် ၸိူဝ်ႉၼင်ႇၼၼ်သေယဝ်ႉ၊ ၵူၼ်းတင်းသဵင်ႈတင်းလူင်ဢွၼ်ၵၼ်ၸွမ်းလင် ယႂႃႇၽႃႉ လႄႈ လိုပ်ႈၸွမ်းလမ်းၸွမ်း သေးၽႃႉ လုၵ်ႈၸၢႆး ပီႉၶရီႉ ၼၼ်ႉဢေႃႈ။

14မၼ်းတႆႇလတ်းၼႂ်းလိၼ်မဵဝ်း ဢီႉသရေႇလႃႉ ၵႃႈမီးၵႂႃႇ တေႃႇထိုင်ႁွတ်ႈဝဵင်း ဢႃႇပေႇလႃႉ တင်းဝဵင်း ပႅတ်ႉမႃႇၶႃႉ ဢိၵ်ႇတင်း တီႈ ဢၼ်ၵူၼ်း ပေႇရီႉ ၵႃႈမီးၼၼ်ႉယူႇၼၼ်ႉဢေႃႈ။ ၶဝ်ၼၼ်ႉၸူႉၵၼ်တုမ်ၵၼ်လႄႈၸွမ်းလင်မၼ်းဢေႃႈ။-

15ၶဝ်ဢွၼ်ၵၼ်ၵႂႃႇလႄႈလွမ်ႉႁွပ်ႈမၼ်းၼၼ်ႉဝႆႉ ၵႃႈၼႂ်းဝဵင်း ဢႃႇပေႇလႃႉပႅတ်ႉမႃႇၶႃႉ ၼၼ်ႉလႄႈ ၵုမ်းတႅၼ်ႈလိၼ်ယူႇၽၢႆႇၼိုင်ႈ တင်းၶူးဝဵင်းၼၼ်ႉလႄႈ ၸုၵ်းတင်ႈယူႇၽၢႆႇၼိုင်ႈ တင်းၶူးဝဵင်းၼၼ်ႉဢေႃႈ။ ၶဝ်ၵႃႈဢၼ်ပႃးတီႈ ယႂႃႇၽႃႉ ၼၼ်ႉၸိူဝ်းၼၼ်ႉ ဢွၼ်ၵၼ်ၶုတ်းမူင်ႇလမ်းဝဵင်း ႁႂ်ႈၵိူၼ်ႇပင်းတူၵ်းဢေႃႈ။

16မိူဝ်ႈၼၼ်ႉ မႄႈယိင်းဢၼ်မီးပိင်ႇၺႃႇၵေႃႉၼိုင်ႈ ယူႇၵႃႈၼႂ်းဝဵင်းသေလႄႈ သႅၼ်ႇႁွင်ႉလႄႈဝႃႈၸမ်ႉ၊ ထွမ်ႇ၊ ထွမ်ႇ၊ မွၵ်ႇလၢတ်ႈတီႈ ယႂႃႇၽႃႉ လႄႈဝႃႈ၊ ၸဝ်ႈႁဝ်းသုတ်ႉမႃးသေၵမ်း။ ၵဝ်ၶႃႈတၵ်းလၢတ်ႈၵႂၢမ်းတေႃႇၸဝ်ႈႁဝ်းၶႃႈဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆလႄႈ၊-

17မိူဝ်ႈဢၼ်မၼ်းသုတ်ႉမႃးၼၼ်ႉၸိုင်၊ မႄႈယိင်းၼၼ်ႉထၢမ်လႄႈဝႃႈ၊ ၸဝ်ႈႁဝ်းၼႆႉၸႂ်ႈ ယႂႃႇၽႃႉ ႁိုဝ်။ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ပဵၼ်ၵဝ်ၼႆႉယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊ မႄႈယိင်းၼၼ်ႉလၢတ်ႈလႄႈဝႃႈ၊ ထွမ်ႇငိၼ်းၵႂၢမ်းၶႃႈၸဝ်ႈႁဝ်းသေၵမ်းၶႃႈ၊ ဝႃႈၼင်ႇၼႆဢေႃႈ။ မၼ်းၵေႃႈၶိုၼ်းလၢတ်ႈလႄႈဝႃႈ၊ ၵဝ်ထွမ်ႇငိၼ်းယူႇဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

18မႄႈယိင်းလဝ်ႊလၢတ်ႈလႄႈဝႃႈ၊ ၵႂၢမ်းထုင်းဢၼ်ၸၢင်ႈလၢတ်ႈမိူဝ်ႈၵွၼ်ႇဢွၼ်ၼႆႉၼၼ်ႉလႄႈဝႃႈၸမ်ႉ၊ ႁႂ်ႈတိူင်ႇပၢင်ႇၵၼ်ၵႃႈတီႈဝဵင်း ဢႃႇပေႇလႃႉ သေလႄႈ တႅပ်းတတ်းဢမူႉသေၵမ်း၊ ဝႃႈၼင်ႇၼႆဢမၢၼ်ႇၶၼ်ပဵၼ်ၶႃႈဢေႃႈ။-

19ၶႃႈၸဝ်ႈပဵၼ်ၵေႃႉဢၼ်ႁဵတ်းၼိမ်ၼိမ်လီလီ ၵႃႈၼႂ်းမဵဝ်း ဢီႉသရေႇလႃႉ လႄႈ ပဵၼ်ၵေႃႉဢၼ်ပႂ်ႉသဵတ်ႈၸႃႇယူႇၶႃႈဢေႃႈ။ ၸဝ်ႈႁဝ်းႁႃႁႂ်ႈလႆႈယႃႉၽဵဝ်ႈဝဵင်း ဝဵင်းၼိုင်ႈ ဢၼ်ဝႃႈမႄႈၵေႃႉၼိုင်ႈ ၵႃႈၼႂ်းမဵဝ်း ဢီႉသရေႇလႃႉ ၶႃႈဢေႃႈ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈၸဝ်ႈႁဝ်းမီးဢလူဝ်ႇ ႁႂ်ႈလႆႈဢိုၼ်ဢမူၺ်ႇထႃႇဝရႃႉၽြႃးၼင်ႇႁိုဝ်ၶႃႈ၊ ဝႃႈၼင်ႇၼႆသေယဝ်ႉ၊-

20ယႂႃႇၽႃႉ လၢတ်ႈလႄႈဝႃႈ၊ ႁႂ်ႈဢမူႉတၢင်းဢၼ်ဢိုၼ်ပႅတ်ႈ၊ ဢမူႉတၢင်းဢၼ်ယႃႉၽဵဝ်ႈပႅတ်ႈၼၼ်ႉ ၵႆၵၼ်တင်းၵဝ်သေၵမ်းလူၺ်ႈ။ ႁႂ်ႈၵႆၵၼ်သေၵမ်းလူၺ်ႈ။-

21ဢမ်ႇၸႂ်ႈၸိူဝ်ႉၼင်ႇၼၼ်၊ ၵေႃႉဢၼ်ပဵၼ်ၵူၼ်းႁၢၼ်ႉလွႆ ဢေႇၽရိမ်ႇ ဢၼ်လႆႈၸိုဝ်ႈ သေးၽႃႉ လုၵ်ႈၸၢႆး ပီႉၶရီႉ ၼၼ်ႉ ယုၵ်ႉၶႅၼ်ယုၵ်ႉမိုဝ်းမၼ်းယူႇၽၢႆႇၼိုင်ႈတင်းၶုၼ်ႁေႃၶမ်း တႃႇဝိတ်ႈ ယဝ်ႉ။ ၵူၺ်းၵွမ်ႉဢဝ်ၵေႃႉၼၼ်ႉၵူၺ်း ဢၢပ်ႈပၼ်တႃႉ။ ပေႃးဢၢပ်ႈပၼ်ၸိုင်၊ ၵဝ်တၵ်းဢွၵ်ႇသေၵႃႈတီႈဝဵင်းၼႆႉၵႂႃႇဢေႃႈ။ မိူဝ်ႈဢၼ်ဝႃႈၼင်ႇၼႆၸိုင်၊ မႄႈယိင်းၼၼ်ႉလၢတ်ႈတီႈ ယႂႃႇၽႃႉ လႄႈဝႃႈ၊ တၵ်းဢဝ်ၵွၵ်းႁူဝ်မၼ်း ထိမ်ႈၶၢမ်ႈလမ်းဝဵင်းတူၵ်းပၼ်တီႈၸဝ်ႈႁဝ်းၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

22မႄႈယိင်းၼၼ်ႉ ၸွမ်းၵႃႈၼင်ႇဢၼ်မၼ်းမီးပိင်ႇၺႃႇၼၼ်ႉသေလႄႈ ၵႂႃႇၸူးၵႃႈတီႈၵူၼ်းဝဵင်းတင်းသဵင်ႈတင်းလူင်သေယဝ်ႉ၊ ၶဝ်ၼၼ်ႉ ဢွၼ်ၵၼ်တႅပ်းဢဝ်ၵွၵ်းႁူဝ် သေးၽႃႉ လုၵ်ႈၸၢႆး ပီႉၶရီႉ သေလႄႈ ထိမ်ႈတူၵ်းပၼ်တီႈ ယႂႃႇၽႃႉ ၵႃႈၼွၵ်ႈဢေႃႈ။ မၼ်းၵေႃႈပဝ်ႇတိုင်ႈၼႄးၶရႃႇသေလႄႈ၊ ၵူၼ်းတင်းလၢႆၼၼ်ႉ ဢွၼ်ၵၼ်လုၵ်ႉသေၵႃႈတီႈဝဵင်းၼၼ်ႉ ၶိုၼ်းမိူဝ်းၵႂႃႇၵႃႈတီႈမူဝ်းၵႃႇတီႈယူႇၶဝ် ႁင်းၽႂ်ႁင်းမၼ်းသေဢေႃႈ။ ယႂႃႇၽႃႉ ၵေႃႈ ၶိုၼ်းမိူဝ်းၵႂႃႇ ၵႃႈတီႈဝဵင်း ယေႇရူႉသလႅမ်ႇ ၸူးၵႃႈတီႈၶုၼ်ႁေႃၶမ်းသေဢေႃႈ။

23ယႂႃႇၽႃႉ ၼၼ်ႉပဵၼ်ၶုၼ်ပူဝ်ႇၶျုၵ်ႈ ဢၼ်ဢုပ်ႉၵႃႈၼိူဝ်ၵူၼ်းတပ်ႉ ဢီႉသရေႇလႃႉ တင်းသဵင်ႈတင်းလူင်ဢေႃႈ။ ပေႇၼႃႇယႃႉ လုၵ်ႈၸၢႆး ယေႃးယတႃႉ ၼၼ်ႉ လႆႈဢုပ်ႉၵႃႈၼိူဝ်ၵူၼ်း ၶေးရသီႉ လႂ် တင်းၵူၼ်း ပေႇလသီႉ လႂ်ဢေႃႈ။-

24ဢတေႃးရမ်ႇ ၼၼ်ႉပဵၼ်ဝုၼ်ႇၵဵပ်းၶွၼ်ႇၸဝ်ႈဢေႃႈ။ ယူဝ်းသၽတ်ႉ လုၵ်ႈၸၢႆး ဢႁီႉလုတ်ႉ ၼၼ်ႉ ပဵၼ်ဢတႂၢင်းဝုၼ်ႇဢေႃႈ။-

25သေးဝႃႉ ၼၼ်ႉပဵၼ်ၸရေးလူင်ၸဝ်ႈဢေႃႈ။ ၸႃႇတုၵ်ႉ တင်း ဢႃႇပျႃႇထႃႇ ၸိူဝ်းၼၼ်ႉ ပဵၼ်ယိတ်ႈပရေႃးႁဵၵ်ႈဢေႃႈ။-

26ဢီႇရႃႉ လုၵ်ႈၸၢႆး ယႃႇဢီႉရႃႉ ၼၼ်ႉ ပဵၼ်ၵေႃႉဢၼ်ဢုပ်ႉၵႃႈၼိူဝ်ႁေႃၸဝ်ႈဢေႃႈ။

← Chapter 19 Jump to: Chapter 21 →