2 Samuel 18

Shan

← Chapter 17 Jump to: Chapter 19 →

1တႃႇဝိတ်ႈ ၼပ်ႉဢၢၼ်ႇၵူၼ်းဢၼ်ပႃးတီႈမၼ်းၸိူဝ်းၼၼ်ႉလႄႈ ၶၢၼ်းဝႆႉၶဝ်ၸိူဝ်းဢၼ်ဢုပ်ႉၼိူဝ်ၵူၼ်းယေႈႁဵင်၊ ၶဝ်ၸိူဝ်းဢၼ်ဢုပ်ႉၼိူဝ်ၵူၼ်းယေႈပၢၵ်ႇဢေႃႈ။-

2တႃႇဝိတ်ႈ ႁႂ်ႈၵူၼ်းတင်းလၢႆၶီႇၵႂႃႇလႄႈ ဢဝ်ၸူႉၼိုင်ႈ ဢၢပ်ႈပၼ်ၵႃႈၼႂ်းမိုဝ်း ယႂႃႇၽႃႉ ၊ ၸူႉၼိုင်ႈၵႃႈၼႂ်းမိုဝ်း ဢၽီႉသေး ၼွင်ႉၸၢႆး ယႂႃႇၽႃႉ လုၵ်ႈၸၢႆး ၸေႇရူႉယႃႇ ၊ ၸူႉၼိုင်ႈၵႃႈၼႂ်းမိုဝ်း ဢိတ်ႉတေႇ ၵူၼ်း ၵိတ်ႉတီႉ ၼၼ်ႉလႄႈ ၶုၼ်ႁေႃၶမ်းမီးဢမိင်ႉတီႈၵူၼ်းတင်းလၢႆလႄႈဝႃႈ၊ တူဝ်ၵဝ်တၵ်းၶီႇၵႂႃႇလူၺ်ႈၵၼ်တင်းသူဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။-

3ၵူၼ်းတင်းလၢႆၵေႃႈဢွၼ်ၵၼ်လဝ်ႊလၢတ်ႈလႄႈဝႃႈ၊ တူဝ်ၸဝ်ႈႁဝ်းယႃႇပေၵႂႃႇသေၵမ်းတီႈၶႃႈ။ ပိၵ်ႉသမ်ႉၶႃႈၸဝ်ႈႁဝ်းၸိူဝ်းၼႆႉ ဢွၵ်ႇပၢႆႈသေၵေႃႈ ၶဝ်ဢမ်ႇမၢတ်ႈပဵၼ်ဢမူႉတီႈၶႃႈ။ ပိၵ်ႉသမ်ႉၶႃႈၸဝ်ႈႁဝ်းၼႆႉတၢႆၶိုင်ႈၼိုင်ႈသေၵေႃႈ ၶဝ်ဢမ်ႇမၢတ်ႈပဵၼ်ဢမူႉတီႈၶႃႈ။ ၸဝ်ႈႁဝ်းၸမ်ႉ၊ မျၢတ်ႈၼႃႇသေၶႃႈၸဝ်ႈႁဝ်းၸိူဝ်းၼႆႉ မိုၼ်ႇၼိုင်ႈတီႈၶႃႈဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ ပေႃးၸဝ်ႈႁဝ်းယူႇၵႃႈၼႂ်းဝဵင်းလႄႈ ၸွႆႈထႅမ်မႃႉၸႃႉၶႃႈၸဝ်ႈၸိူဝ်းၼႆႉယူႇၸိုင်၊ ယဵင်ႈၶႅၼ်းတၵ်းလီတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

4ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊ ၵဝ်တၵ်းႁဵတ်းၸွမ်းၵႃႈဢၼ်သူထၢင်ႇပဵၼ်ဢၼ်လီၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်းၸုၵ်းယူႇၵႃႈတီႈႁူးၽၵ်းတူလႄႈ ၵူၼ်းတင်းသဵင်ႈတင်းလူင် ႁဵတ်းတပ်ႉယေႈပၢၵ်ႇ၊ တပ်ႉယေႈႁဵင်သေလႄႈၶီႇၵႂႃႇဢေႃႈ။-

5ၶုၼ်ႁေႃၶမ်းၵေႃႈသင်ႇလၢတ်ႈဝႆႉတီႈ ယႂႃႇၽႃႉ၊ ဢၽီႉသေး၊ ဢိတ်ႉတေႇ ၸိူဝ်းၼၼ်ႉလႄႈဝႃႈ၊ ထွၵ်ႈလူၺ်ႈၼႃႈၵဝ်သေလႄႈ ႁဵတ်းတီႈ ဢပႃႉသလုမ်ႇ ဢွၼ်ႇၼၼ်ႉ ဢူၼ်ႈဢူၼ်ႈဢွၼ်ႇဢွၼ်ႇတႃႉ၊ ဝႃႈၼင်ႇၼႆဢေႃႈ။ ၵူၼ်းတင်းသဵင်ႈတင်းလူင် လႆႈငိၼ်းမိူဝ်ႈဢၼ်ၶုၼ်ႁေႃၶမ်းသင်ႇလၢတ်ႈလွင်ႈ ဢပႃႉသလုမ်ႇ တီႈပူဝ်ႇၵႃႈမီးၸိူဝ်းၼၼ်ႉၸိူဝ်ႉၼင်ႇၼၼ်ၼၼ်ႉယူႇဢေႃႈ။

6ၼင်ႇၼၼ်လႄႈ ၵူၼ်းတင်းလၢႆဢွၼ်ၵၼ်ဢွၵ်ႇၸူးၵႃႈၼႂ်းတီႈဢၼ်ပၢင်ႇဢၼ်ပဵင်း ႁႂ်ႈလႆႈတိုၵ်းၵၼ်တင်းၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉလႄႈ ၶဵင်ႇသိုၵ်းၵၼ်ၵႃႈၼႂ်းပႃႇမႆႉပႃႇတွၵ်ႇထိူၼ်ႇ ဢေႇၽရိမ်ႇ ဢေႃႈ။-

7ၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ တူၵ်းသုမ်းၵႃႈတီႈၽၢႆႇၼႃႈၶႃႈၵူၼ်း တႃႇဝိတ်ႈ ၸိူဝ်းၼၼ်ႉလႄႈ ၼႂ်းဝၼ်းၼၼ်ႉမီးတၢင်းဢၼ် ၶႃႈၽၼ်းဢဝ်တၢႆ ဢၼ်ယႂ်ႇၼႃႇလူင်လၢင်ၵႃႈတီႈၼၼ်ႈလႄႈ ၵူၼ်းတၢႆသွင်မိုၼ်ႇဢေႃႈ။-

8တၢင်းဢၼ်တိုၵ်းၵၼ်ၼၼ်ႉ ၸွတ်ႇၸႅတ်ႇၵႃႈၼိူဝ်ၼႃႈလိၼ်ၵူႈတီႈၵူႈလႅၼ်လႄႈ ၼႂ်းဝၼ်းၼၼ်ႉ ၶဝ်ၸိူဝ်းဢၼ်တၢႆလူၺ်ႈပႃႇမႆႉပႃႇတွၵ်ႇၼၼ်ႉ ယဵင်ႈၶႅၼ်းၼမ်ၼႃႇသေ ၶဝ်ၸိူဝ်းဢၼ်တၢႆလူၺ်ႈလၢပ်ႇလူၺ်ႈလႅဝ်းၼၼ်ႉဢေႃႈ။

9ဢပႃႉသလုမ်ႇ ႁူပ်ႉထူပ်းၶႃႈၵူၼ်း တႃႇဝိတ်ႈ ဢေႃႈ။ ဢပႃႉသလုမ်ႇ ၼၼ်ႉၶီႇလီႈသေလႄႈ လီႈၼၼ်ႉၶဝ်ႈၵႂႃႇၵႃႈတႂ်ႈၵိင်ႇတႂ်ႈၶႃႊမႆႉၼိမ်ဢၼ်ၼႃတၼ်ၼႃႇလႄႈ တူၼ်ႈယႂ်ႇၼႃႇၼၼ်ႉလႄႈၵွၵ်းႁူဝ်မၼ်းၶၢင်ႉၶမ်ယူႇၵႃႈတီႈတူၼ်ႈမႆႉၼိမ်သေယဝ်ႉ၊ ႁွႆႈၽႅၼ်ယူႇၵႃႈတီႈဝူင်ႈၵၢင်ၽႃႉတင်းလိၼ်လႄႈ လီႈဢၼ်မၼ်းၶီႇၼၼ်ႉဢွၵ်ႇၵႂႃႇသေဢေႃႈ။-

10ၵူၼ်းၵေႃႉၼိုင်ႈႁၼ်လႄႈ မွၵ်ႇလၢတ်ႈတီႈ ယႂႃႇၽႃႉ လႄႈဝႃႈ၊ ၵဝ်ၶႃႈလႆႈႁၼ် ဢပႃႉသလုမ်ႇ ႁွႆႈၽႅၼ်ယူႇ ၵႃႈတီႈတူၼ်ႈမႆႉၼိမ်ၼၼ်ႉမႃးၶႃႈဢေႃႈ၊ ဝႃႈၼင်ႇၼႆသေယဝ်ႉ၊-

11ယႂႃႇၽႃႉ လၢတ်ႈတီႈၵေႃႉဢၼ်မွၵ်ႇလၢတ်ႈတီႈမၼ်းၼၼ်ႉလႄႈဝႃႈ၊ ပေႃးမႂ်းႁၼ်မႃးယဝ်ႉဢမၢၼ်ႇၶၼ်ပဵၼ်ၸိုင် ႁဵတ်းသင်လႄႈမႂ်းဢမ်ႇတႅင်းမၼ်းတူၵ်းပႅတ်ႈၵႃႈၼိူဝ်လိၼ်ၼင်ႇႁိုဝ်။ သင်မႂ်းႁဵတ်းၼင်ႇၼၼ်ၸိုင် ၵဝ်လႆႈပၼ်ငိုၼ်းသိပ်းၵျၢပ်ႈ ဢိၵ်ႇတင်းသၢႆႁတ်ႉဢႅဝ်တီႈမႂ်းယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

12ၵေႃႉၼၼ်ႉလၢတ်ႈတီႈ ယႂႃႇၽႃႉ လႄႈဝႃႈ၊ ပိၵ်ႉသမ်ႉၵဝ်ၶႃႈတၵ်းလႆႈၶၢမ်ႇဢဝ်ငိုၼ်းသေႁဵင်ၵျၢပ်ႈၼိုင်ႈ ၵႃႈၼႂ်းမိုဝ်းၵဝ်ၶႃႈသေၵေႃႈ၊ ၵဝ်ၶႃႈဢမ်ႇယဵတ်ႇမိုဝ်းသေလႄႈ ႁဵတ်းတီႈလုၵ်ႈၸၢႆးၶုၼ်ႁေႃၶမ်းၼၼ်ႉလႆႈၶႃႈ။ လွင်ႈမၼ်းၸမ်ႉ ၵႃႈၼင်ႇဢၼ်ႁဝ်းၶႃႈလႆႈငိၼ်းၼၼ်ႉ၊ ၶုၼ်ႁေႃၶမ်းသင်ႇလၢတ်ႈဝႆႉတီႈၸဝ်ႈႁဝ်း ဢိၵ်ႇတင်း ဢၽီႉသေး တင်း ဢိတ်ႉတေႇ လႄႈဝႃႈ၊ ထွၵ်ႈလူၺ်ႈၼႃႈၵဝ်သေလႄႈ ၽူႈလႂ်ယႃႇပေတိူဝ်ႉပေထုၵ်ႇ ဢပႃႉသလုမ်ႇ ဢွၼ်ႇၼၼ်ႉ၊ ဝႃႈၼင်ႇၼႆဝႆႉၶႃႈယဝ်ႉ။-

13ပေႃးဢမ်ႇၼၼ် ပေႃးၵဝ်ၶႃႈပႅတ်ႉလႅၼ်လူၺ်ႈဢသၢၵ်ႈမၼ်းၼၼ်ႉၸိုင်၊ ၵွပ်ႈပိူဝ်ႈဢၼ်လွင်ႈတၢင်းဢၼ်သိူင်ႇဝႆႉမႅပ်ႉဝႆႉ ႁႂ်ႈၶုၼ်ႁေႃၶမ်းဢမ်ႇႁူႉၼၼ်ႉ ဢမ်ႇမီးသေၸိူဝ်ႉသေဢၼ်လႄႈ ၸဝ်ႈႁဝ်းၵေႃႈတၵ်းယူႇၽၢႆႇၼိုင်ႈတင်းၵဝ်ၶႃႈ ၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

14ယႂႃႇၽႃႉ လၢတ်ႈလႄႈဝႃႈ၊ ၵဝ်ဢမ်ႇတၼ်းယူႇလူၺ်ႈၵၼ်တင်းမႂ်း၊ ဝႃႈၼင်ႇၼႆသေလႄႈ ယိပ်းၵမ်ဢဝ်ႁွၵ်ႇဢၼ်ပွတ်းသၢမ်မၢၵ်ႈသေလႄႈ ဢဝ်တႅင်းသႂ်ႇႁူဝ်ၸႂ် ဢပႃႉသလုမ်ႇ ဢၼ်ဢသၢၵ်ႈယင်းလိပ်းယူႇ ၵႃႈၼႂ်းၵႄႈတူၼ်ႈမႆႉၼိမ်ၼၼ်ႉ ပွင်ႇပဵဝ်ၵႂႃႇဢေႃႈ။-

15ၵူၼ်းဢွၼ်ႇဢၼ်ပႃးလၢၵ်ႈၼၢၵ်ႈ ယႂႃႇၽႃႉ သိပ်းၼိုင်ႈၵေႃႈ ဢွၼ်ၵၼ်ဝႅင်းႁွပ်ႈသေလႄႈ ႁဵတ်းတီႈ ဢပႃႉသလုမ်ႇ ႁႂ်ႈထၼ်ႈပေႃးတၢႆဢေႃႈ။-

16ယႂႃႇၽႃႉ ၵေႃႈပဝ်ႇတိုင်ႈၼႄးၶရႃႇလႄႈ ၵူၼ်းတင်းလၢႆဢွၼ်ၵၼ်လုၵ်ႉသေၵႃႈတီႈဢၼ် လိုပ်ႈၸွမ်းလမ်းၸွမ်းၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ ၶိုၼ်းမႃးဢေႃႈ။ လွင်ႈမၼ်းၸမ်ႉ ယႂႃႇၽႃႉ ႁၢမ်ႈတၢပ်ႈႁႄႉၶႅၼ်ၵူၼ်းတင်းလၢႆဢေႃႈ။-

17ၶဝ်ဢွၼ်ၵၼ်ဢဝ် ဢပႃႉသလုမ်ႇ ၼၼ်ႉ ၶျႃးတူၵ်းၵႃႈၼႂ်းၶုမ်လိၼ်ႁူးလိၼ်ဢၼ်လိုၵ်ႉ ၵႃႈၼႂ်းပႃႇမႆႉပႃႇတွၵ်ႇၼၼ်ႉသေယဝ်ႉ၊ ဢဝ်မၢၵ်ႇႁိၼ်ၵွင်သႂ်ႇဝႆႉၵႃႈၼိူဝ်မၼ်းပဵၼ်ၵွင်လူင်ဝႆႉဢေႃႈ။ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင်ဢွၼ်ၵၼ်ပၢႆႈၸူးၵႃႈတီႈႁိူၼ်းတီႈယူႇၶဝ်ႁင်းၽႂ်ႁင်းမၼ်းဢေႃႈ။

18ဢပႃႉသလုမ်ႇ ၼၼ်ႉ ၼႂ်းမိူဝ်ႈဢၼ်ဢသၢၵ်ႈယင်းတိုၵ်ႉလိပ်းယူႇၼၼ်ႉၸိုင်၊ ပၵ်းသဝ်ပၵ်းလၵ်းပုၼ်ႈမၼ်း ၵႃႈၼႂ်းၶူင်ႈႁူၺ်ႈၶုၼ်ႁေႃၶမ်းလႄႈဝႃႈ၊ ၵဝ်ဢမ်ႇမီးလုၵ်ႈၸၢႆးပုၼ်ႈဢၼ်တၵ်းၶုၵ်းၸႂ်လႆႈၶႆႈၸႂ်ထူပ်းၼႃႇမႃႉၸိုဝ်ႈသဵင်ၵဝ်ယူႇတႃႇသေႇမၼ်ႈၶိူင်ႇၼၼ်ႉ၊ ဝႃႈၼင်ႇၼႆဢေႃႈ။ မၼ်းႁွင်ႉႁဵၵ်ႈသဝ်ၼၼ်ႉ ၸွမ်းလူၺ်ႈၼႃႇမႃႉၸိုဝ်ႈသဵင်မၼ်းလႄႈ သဝ်ၼၼ်ႉလႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ သဝ် ဢပႃႉသလုမ်ႇ တေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ။

19မိူဝ်ႈၼၼ်ႉ ဢႁီႉမတ်ႉ လုၵ်ႈၸၢႆး ၸႃႇတုၵ်ႉ ၼၼ်ႉ ယွၼ်းဢၶႂၢင်ႉလႄႈဝႃႈ၊ ႁႂ်ႈၵဝ်ၶႃႈလႆႈၶုၼ်ႇလႅၼ်ႈၵႂႃႇလႄႈ လဝ်ႊလၢတ်ႈလွင်ႈဢၼ်ထႃႇဝရႃႉၽြႃးၸီႇယၢင်ႇတီႈရၢၼ်ႇသူႇၶုၼ်ႁေႃၶမ်းတင်းလၢႆ ၸွမ်းလူၺ်ႈဢပႅတ်ႈၶဝ်ၼၼ်ႉ တီႈၶုၼ်ႁေႃၶမ်းသေၵမ်းၶႃႈ၊ ဝႃႈၼင်ႇၼႆသေယဝ်ႉ၊-

20ယႂႃႇၽႃႉ လၢတ်ႈတီႈမၼ်းလႄႈဝႃႈ၊ ဝၼ်းမိူဝ်ႈၼႆႉ မႂ်းဢမ်ႇလႆႈလဝ်ႊလႆႈလၢတ်ႈသတၢင်းသဵင်ၶၢဝ်ႇ။ တၵ်းလႆႈလဝ်ႊလႆႈလၢတ်ႈသတၢင်းသဵင်ၶၢဝ်ႇ တၢင်ႇမိုဝ်ႉတၢင်ႇဝၼ်းဢေႃႈ။ ဝၼ်းမိူဝ်ႈၼႆႉ မႂ်းဢမ်ႇလႆႈလဝ်ႊလႆႈလၢတ်ႈသတၢင်းသဵင်ၶၢဝ်ႇ ၵွပ်ႈပိူဝ်ႈဢၼ်လုၵ်ႈၸၢႆးၶုၼ်ႁေႃၶမ်းတၢႆယဝ်ႉၼၼ်ႉ၊ ဝႃႈၼင်ႇၼႆသေယဝ်ႉ၊-

21ယႂႃႇၽႃႉ လၢတ်ႈတီႈ ၵူႉသီႉ လႄႈဝႃႈ၊ မႂ်းၵႂႃႇလႄႈလဝ်ႊလၢတ်ႈတီႈၶုၼ်ႁေႃၶမ်း ၸွမ်းၵႃႈၼင်ႇဢၼ်မႂ်းလႆႈႁၼ်ၼႆႉတႃႉ၊ ဝႃႈၼင်ႇၼႆလႄႈ၊ ၵူႉသီႉ ၵူမ်ႈႁူဝ်တီႈ ယႂႃႇၽႃႉ သေလႄႈၶုၼ်ႇလႅၼ်ႈဢေႃႈ။-

22လႆႈသမ်ႉ ဢႁီႉမတ်ႉ လုၵ်ႈၸၢႆး ၸႃႇတုၵ်ႉ သမ်ႉယွၼ်းဢဝ်ဢၶႂၢင်ႉတီႈ ယႂႃႇၽႃႉ ထႅင်ႈလႄႈဝႃႈ၊ ပိၵ်ႉၼၼ်ႉသေၵေႃႈ ႁႂ်ႈၵဝ်ၶႃႈလႆႈၶုၼ်ႇလႅၼ်ႈၸွမ်းလင် ၵူႉသီႉ သေၵမ်းၶႃႈ၊ ဝႃႈၼင်ႇၼႆသေယဝ်ႉ၊ ယႂႃႇၽႃႉ ထၢမ်လႄႈဝႃႈ၊ လုၵ်ႈၸၢႆးၵဝ်ဢိူၺ်း၊ ၵွပ်ႈပိူဝ်ႈဢၼ်ဢမ်ႇမီးသတၢင်းဢၼ်လီၸူမ်းလီသိူဝ်းလႄႈ ႁဵတ်းသင်လႄႈ မႂ်းၶႂ်ႈၶုၼ်ႇလႅၼ်ႈၵႂႃႇၼင်ႇႁိုဝ်၊ ဝႃႈၼင်ႇၼႆသေၵေႃႈ၊-

23ၵွပ်ႈပိူဝ်ႈဢၼ်သမ်ႉယွၼ်းဢၶႂၢင်ႉထႅင်ႈလႄႈဝႃႈ၊ ႁႂ်ႈလႆႈၶုၼ်ႇလႅၼ်ႈသေၵမ်းၶႃႈ၊ ဝႃႈၼင်ႇၼႆၼၼ်ႉလႄႈ မၼ်းပၼ်ဢၶႂၢင်ႉလႄႈဝႃႈ၊ ၶုၼ်ႇလႅၼ်ႈတႃႉ၊ ဝႃႈၼင်ႇၼႆဢေႃႈ။ မိူဝ်ႈၼၼ်ႉ ဢႁီႉမတ်ႉ ၼၼ်ႉ ၶုၼ်ႇလႅၼ်ႈၸွမ်းသဵၼ်ႈတၢင်းပၢင်ႇပဵင်းလႄႈ ပူၼ်ႉ ၵူႉသီႉ ၵႂႃႇသေဢေႃႈ။-

24တႃႇဝိတ်ႈ ၼင်ႈယူႇၵႃႈတီႈၽၵ်းတူ ၵႄႈလမ်းဝဵင်းသွင်ထၢပ်ႈဢေႃႈ။ ၵူၼ်းပႂ်ႉၵၢင်ၵေႃႉၼိုင်ႈ ၶိုၼ်ႈၵႃႈၼိူဝ်တီႈဢၼ်မုင်းၽၵ်းတူလမ်းဝဵင်းသေယဝ်ႉ မုင်ႈတူၺ်းလႄႈႁၼ်ၵူၼ်းၵေႃႉလဵဝ်ၵူၺ်းၶုၼ်ႇလႅၼ်ႈမႃးယူႇဢေႃႈ။-

25ၵူၼ်းပႂ်ႉၵၢင်ၼၼ်ႉ သႅၼ်ႇႁွင်ႉလဝ်ႊလၢတ်ႈတီႈၶုၼ်ႁေႃၶမ်းလႄႈ ၶုၼ်ႁေႃၶမ်းၵေႃႈမီးဢမိင်ႉလႄႈဝႃႈ၊ ပေႃးၵေႃႉလဵဝ်ၵူၺ်းၸိုင် သတၢင်းသဵင်ၶၢဝ်ႇတၵ်းပႃးမႃးၵႃႈၼႂ်းသူပ်းမၼ်းဢေႃႈ၊ ဝႃႈၼင်ႇၼႆဢေႃႈ။ ၵေႃႉၼၼ်ႉၶုၼ်ႇလႅၼ်ႈမႃးလႄႈ ႁွတ်ႈတီႈဢၼ်ၸမ်သေယဝ်ႉ၊-

26ၵူၼ်းပႂ်ႉၵၢင်ၼၼ်ႉ သမ်ႉႁၼ်တၢင်ႇၵေႃႉၶုၼ်ႇလႅၼ်ႈမႃးလႄႈ ၵူၼ်းပႂ်ႉၵၢင်ၼၼ်ႉ ႁွင်ႉၸူးတီႈၽၵ်းတူလႄႈဝႃႈ၊ တူၺ်းတီႈၶႃႈလူး။ ၵူၼ်းတၢင်ႇၵေႃႉၶုၼ်ႇလႅၼ်ႈမႃးထႅင်ႈၵေႃႉလဵဝ်ၵူၺ်းတီႈၶႃႈဢေႃႈ၊ ဝႃႈၼင်ႇၼႆသေယဝ်ႉ၊ ၶုၼ်ႁေႃၶမ်းသမ်ႉမီးဢမိင်ႉလႄႈဝႃႈ၊ ၵေႃႉၼၼ်ႉၵေႃႈ တၵ်းပႃးသတၢင်းသဵင်ၶၢဝ်ႇဢေႃႈ၊ ဝႃႈၼင်ႇၼႆဢေႃႈ၊-

27ၵူၼ်းပႂ်ႉၵၢင်ၼၼ်ႉသမ်ႉလဝ်ႊလၢတ်ႈလႄႈဝႃႈ၊ ၶႃႈၸဝ်ႈထၢင်ႇ တၢင်းဢၼ်ၶုၼ်ႇဢၼ်လႅၼ်ႈၵေႃႉဢၼ်ၶုၼ်ႇလႅၼ်ႈမႃးဢွၼ်တၢင်းၼၼ်ႉ မိူၼ်ၵၼ်တင်း တၢင်းဢၼ်ၶုၼ်ႇဢၼ်လႅၼ်ႈ ဢႁီႉမတ်ႉ လုၵ်ႈၸၢႆး ၸႃႇတုၵ်ႉ ၼၼ်ႉတီႈၶႃႈဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶုၼ်ႁေႃၶမ်းမီးဢမိင်ႉလႄႈဝႃႈ၊ မၼ်းၼၼ်ႉပဵၼ်ၵူၼ်းလီလႄႈ တၵ်းပႃးသတၢင်းဢၼ်လီဢေႃႈ၊ ဝႃႈၼင်ႇၼႆဢေႃႈ။-

28မိူဝ်ႈၼၼ်ႉ ဢႁီႉမတ်ႉ ႁွင်ႉသႅၼ်ႇလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ လႆႈၵတ်းယဵၼ်ၶျၢမ်းသႃႇတီႈၶႃႈယဝ်ႉ၊ ဝႃႈၼင်ႇၼႆယူႇသေလႄႈ ၶုပ်ႉမူပ်ႇၵႃႈၼိူဝ်လိၼ်ၵႃႈတီႈၽၢႆႇၼႃႈၶုၼ်ႁေႃၶမ်းလႄႈ လဝ်ႊလၢတ်ႈလႄႈဝႃႈ၊ ႁႂ်ႈထႃႇဝရႃႉၽြႃး ၽြႃးပဵၼ်ၸဝ်ႈၸဝ်ႈႁဝ်း ဢၼ်ဢဝ်ၶဝ်ၸိူဝ်းဢၼ် ယုၵ်ႉၶႅၼ်ယုၵ်ႉမိုဝ်းယူႇၽၢႆႇၼိုင်ႈတင်းၸဝ်ႈႁဝ်းၶႃႈ ၸဝ်ႈၶုၼ်လူင်ၼၼ်ႉ ဢၢပ်ႈပၼ်ၼၼ်ႉ မီးမင်ႇၵလႃႇသေၵမ်းလူၺ်ႈ၊ ဝႃႈၼင်ႇၼႆဢေႃႈ။-

29ၶုၼ်ႁေႃၶမ်းၵေႃႈထၢမ်လႄႈဝႃႈ၊ ဢပႃႉသလုမ်ႇ ဢွၼ်ႇၼၼ်ႉ လႆႈၵတ်းယဵၼ်ၶျၢမ်းသႃႇႁိုဝ်။ ဝႃႈၼင်ႇၼႆသေယဝ်ႉ၊ ဢႁီႉမတ်ႉ လဝ်ႊလၢတ်ႈလႄႈဝႃႈ၊ မိူဝ်ႈဢၼ် ယႂႃႇၽႃႉ ပွႆႇၸႂ်ႉၶႃႈၸဝ်ႈ ၶုၼ်လူင်ဢိၵ်ႇတင်းၶႃႈၸဝ်ႈႁဝ်းၼႆႉၼၼ်ႉၸိုင်၊ ၶႃႈၸဝ်ႈႁၼ်တၢင်းဢၼ်ဢူၼ်ဢဵၼ်ဢၼ်ယႂ်ႇၼႃႇသေၵေႃႈ ဢမ်ႇႁူႉလွင်ႈမၼ်းသေႇၶျႃႇလီငၢမ်းတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊-

30ၶုၼ်ႁေႃၶမ်းမီးဢမိင်ႉလႄႈဝႃႈ၊ ၶၢႆႉယူႇၵႃႈတီႈႁိမ်းၼႆႉတႃႉ၊ ဝႃႈၼင်ႇၼႆလႄႈ မၼ်းၼၼ်ႉၶၢႆႉလႄႈယူႇဢေႃႈ။-

31လႆႈသမ်ႉ ၵူႉသီႉ ႁွတ်ႈမႃးလႄႈ ၵူႉသီႉ လဝ်ႊလၢတ်ႈလႄႈဝႃႈ၊ ၸဝ်ႈႁဝ်းၶႃႈ ၸဝ်ႈၶုၼ်လူင်တီႈၶႃႈ၊ ပႃးသတၢင်းသဵင်ၶၢဝ်ႇမႃးတီႈၶႃႈဢေႃႈ။ ၽြႃးပဵၼ်ၸဝ်ႈၸီႇယၢင်ႇတီႈၶဝ်ၸိူဝ်းဢၼ် လုၵ်ႉယူႇၽၢႆႇၼိုင်ႈတင်းၸဝ်ႈႁဝ်းၼၼ်ႉ ၸွမ်းလူၺ်ႈဢပႅတ်ႈၶဝ်ၼၼ်ႉ ဝၼ်းမိူဝ်ႈၼႆႉတီႈၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

32ၶုၼ်ႁေႃၶမ်းၵေႃႈထၢမ်တီႈ ၵူႉသီႉ လႄႈဝႃႈ၊ ဢပႃႉသလုမ်ႇ ဢွၼ်ႇၼၼ်ႉ လႆႈၵတ်းယဵၼ်ၶျၢမ်းသႃႇႁိုဝ်။ ဝႃႈၼင်ႇၼႆသေယဝ်ႉ၊ ၵူႉသီႉ ၶိုၼ်းလဝ်ႊလၢတ်ႈလႄႈဝႃႈ၊ ႁႂ်ႈရၢၼ်ႇသူႇၸဝ်ႈႁဝ်းၶႃႈ ၸဝ်ႈၶုၼ်လူင်တင်းလၢႆ ဢိၵ်ႇတင်းၶဝ်ၸိူဝ်းဢၼ်လုၵ်ႉယူႇၽၢႆႇၼိုင်ႈတင်းၸဝ်ႈႁဝ်း ႁႂ်ႈလႆႈၼိၵ်ႈၸၢၵ်ႈငႅၼ်းသႄးၸဝ်ႈႁဝ်းတင်းသဵင်ႈတင်းလူင်ၼၼ်ႉ ပဵၼ်ၸိူဝ်ႉၼင်ႇၵေႃႉဢွၼ်ႇၼၼ်ႉသေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။

33ၶုၼ်ႁေႃၶမ်းမီးၸႂ်ဢၼ်သုၵ်ႉဢၼ်ယုင်ႈၼႃႇလူင်လၢင်သေလႄႈ ၶိုၼ်းၵႂႃႇၸူးၵႃႈတီႈသုမ်ႉထဵင် ဢၼ်မီးၵႃႈၼိူဝ်ၽၵ်းတူလမ်းဝဵင်းလႄႈႁႆႈႁွင်ႉဢေႃႈ။ ၼႂ်းမိူဝ်ႈဢၼ်မၼ်းယင်းတိုၵ်ႉၶိုၼ်ႈၵႂႃႇယူႇၼၼ်ႉၸိုင်မၼ်းဝႃႈ၊ လုၵ်ႈၸၢႆးၵဝ် ဢပႃႉသလုမ်ႇ ဢိူၺ်း၊ လုၵ်ႈၸၢႆးၵဝ်ဢိူၺ်း၊ လုၵ်ႈၸၢႆးၵဝ် ဢပႃႉသလုမ်ႇ ဢိူၺ်း၊ ၵဝ်မီးဢလူဝ်ႇၶႂ်ႈတၢႆတၢင်တူဝ်မႂ်းယဝ်ႉ။ ဢပႃႉသလုမ်ႇ လုၵ်ႈၸၢႆးၵဝ်ဢိူၺ်း၊ ဝႃႈၼင်ႇၼႆယူႇဢေႃႈ။

← Chapter 17 Jump to: Chapter 19 →