2 Samuel 4

Shan

← Chapter 3 Jump to: Chapter 5 →

1မိူဝ်ႈဢၼ်လုၵ်ႈၸၢႆး သေႃးလူႉ ၼၼ်ႉငိၼ်းလွင်ႈဢၼ် ဢႃႉပၼႃး တၢႆၵႃႈတီႈဝဵင်း ႁေႇပြုၼ်ႇ ၼၼ်ႉၸိုင်၊ ႁႅင်းမိုဝ်းမၼ်းဢူၼ်ႈၵႂႃႇယွမ်းၵႂႃႇလႄႈ ၵူၼ်းမဵဝ်း ဢီႉသရေႇလႃႉ တင်းသဵင်ႈတင်းလူင် ဢွၼ်ၵၼ်မီးတၢင်းဢၼ်မႆႈၸႂ်ၶီၸႂ်ဢေႃႈ။-

2လုၵ်ႈၸၢႆး သေႃးလူႉ ၼၼ်ႉ မီးၵူၼ်းသွင်ၵေႃႉဢၼ်လႆႈပဵၼ်တပ်ႉမူးလႄႈ ၸိုဝ်ႈၵေႃႉၼိုင်ႈၸမ်ႉ၊ ပဵၼ် ပႃႇၼႃႇ ၸိုဝ်ႈၵေႃႉၼိုင်ႈၸမ်ႉ၊ ပဵၼ် ရေႇၶပ်ႉ ဢေႃႈ။ ၶဝ်ၼၼ်ႉ ပဵၼ်လုၵ်ႈၸၢႆး ရိမ်ႇမုၼ်ႇ ၵူၼ်းၸိူဝ်ႉၶိူဝ်း ပေႇရေႃႇသီႉ မဵဝ်း ပိၼ်ႇယႃႇမိၼ်ႇ ဢေႃႈ။ ပိၵ်ႉသမ်ႉ ဝဵင်း ပေႇရုတ်ႉ ၼၼ်ႉ ၶဝ်ႈပႃးၼႂ်းလိၼ် ပိၼ်ႇယႃႇမိၼ်ႇ သေၵေႃႈ၊-

3ၵူၼ်း ပေႇရေႃႇသီႉ တင်းလၢႆ ဢွၼ်ၵၼ်ဢွၵ်ႇပၢႆႈၸူးၵႃႈတီႈဝဵင်း ၵိတ်ႉတဵမ် လႄႈ သွၼ်ႈပိုင်ႈယူႇၵႃႈတီႈၼၼ်ႈတေႃႇထိုင်ႁွတ်ႈဝၼ်းမိူဝ်ႈၼႆႉဢေႃႈ၊

4ယေႃးၼသၼ်ႇ လုၵ်ႈၸၢႆးၸဝ်ႈ သေႃးလူႉ ၼၼ်ႉ မီးလုၵ်ႈၸၢႆးဢၼ်တိၼ်ၵႅင်ႉၵေႃႉၼိုင်ႈဢေႃႈ။ မိူဝ်ႈဢၼ်သတၢင်းသဵင်ၶၢဝ်ႇ လွင်ႈ သေႃးလူႉ ဢိၵ်ႇတင်း ယေႃးၼသၼ်ႇ ၸိူဝ်းၼၼ်ႉ လုၵ်ႉသေၵႃႈတီႈဝဵင်း ယေႇၸရေႇလႃႉ ႁွတ်ႈမႃးၼၼ်ႉၸိုင်၊ ဢသၢၵ်ႈမၼ်းလႆႈႁႃႈၶူပ်ႇယဝ်ႉလႄႈ၊ ၵေႃႉဢၼ်လူဢၼ်ထိင်းမၼ်းၼၼ်ႉ ႁွပ်ႇဢဝ်မၼ်းယူႇသေလႄႈ ဢွၵ်ႇပၢႆႈသေယဝ်ႉ၊ ၼႂ်းမိူဝ်ႈဢၼ်ယင်းတိုၵ်ႉႁိပ်ႈၼႅတ်ႈပၢႆႈၵႂႃႇၶၼ်ၶၼ်ၽႂ်းၽႂ်းယူႇၼၼ်ႉၸိုင်၊ မၼ်းၼၼ်ႉတူၵ်းလႄႈတိၼ်ၵႅင်ႉၵႂႃႇဢေႃႈ။ ၸိုဝ်ႈသဵင်လုၵ်ႈဢွၼ်ႇၼၼ်ႉၸမ်ႉ၊ ပဵၼ် မေႇၽီႉပေႃးသႅတ်ႉ ဢေႃႈ။-

5ရေႇၶပ်ႉ ဢိၵ်ႇတင်း ပႃႇၼႃႇ လုၵ်ႈၸၢႆး ရိမ်ႇမုၼ်ႇ ၵူၼ်းမဵဝ်း ပေႇရေႃႇသီႉ ၼၼ်ႉ ၵႂႃႇလႄႈႁွတ်ႈထိုင်ၵႃႈတီႈႁေႃ ဢီႉသပေႃႇသႅတ်ႉ ၶိင်ႇဢၼ်မၼ်းၼွၼ်း ၶိင်ႇၵၢင်ဝၼ်းတဵင်ႈၼၼ်ႉဢေႃႈ။-

6သွင်ၶႃၼၼ်ႉ ႁဵတ်းၼင်ႇႁၢင်ႈတၵ်းဢဝ်ၶဝ်ႈၵျုင်ႇဢွၵ်ႇၼၼ်ႉလႄႈ ၶဝ်ႈၵႂႃႇၵႃႈၼႂ်းၵၢင်ႁိူၼ်းသေယဝ်ႉ၊ တႅင်းသႂ်ႇပုမ်မၼ်းသေလႄႈ၊ ရေႇၶပ်ႉ ဢိၵ်ႇတင်းၼွင်ႉၸၢႆးမၼ်း ပႃႇၼႃႇ ၼၼ်ႉဢွၵ်ႇပၢႆႈလွတ်ႈၵႂႃႇသေဢေႃႈ။-

7မိူဝ်ႈဢၼ်သွင်ၶႃၼၼ်ႉၶဝ်ႈၵႂႃႇၵႃႈၼႂ်းႁေႃလႄႈ မၼ်းယင်းတိုၵ်ႉၼွၼ်းယူႇၵႃႈၼိူဝ်တီႈၼွၼ်းမၼ်း ၵႃႈၼႂ်းလုၵ်းၼွၼ်းမၼ်းၼၼ်ႉၸိုင်၊ သွင်ၶႃၼၼ်ႉတႅင်းသႂ်ႇမၼ်းလႄႈ ဢဝ်မၼ်းတၢႆသေယဝ်ႉ၊ တႅပ်းဢဝ်ၵွၵ်းႁူဝ်မၼ်းသေလႄႈ ၸွမ်းသဵၼ်ႈတၢင်းပၢင်ႇပဵင်း ဢႃႇရၽႃႉ ၵႂႃႇတင်းၶိုၼ်းဢေႃႈ။-

8သွင်ၶႃၼၼ်ႉ ဢဝ်ၵွၵ်းႁူဝ် ဢီႉသပေႃႇသႅတ်ႉ ၼၼ်ႉမႃးၸူးၵႃႈတီႈ တႃႇဝိတ်ႈ ၵႃႈတီႈဝဵင်း ႁေႇပြုၼ်ႇ လႄႈ လဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ လူတူၺ်းၵွၵ်းႁူဝ် ဢီႉသပေႃႇသႅတ်ႉ လုၵ်ႈၸၢႆးၸဝ်ႈ သေႃးလူႉ ဢၼ်ပဵၼ်ရၢၼ်ႇသူႇၸဝ်ႈႁဝ်းလႄႈ ႁႃဢသၢၵ်ႈၸဝ်ႈႁဝ်းယူႇၼၼ်ႉသေၵမ်းတီႈၶႃႈ။ ထႃႇဝရႃႉၽြႃးတွပ်ႇတႅၼ်းပၼ်ဢပႅတ်ႈဢၼ်ၸဝ်ႈႁဝ်း ၸဝ်ႈၶုၼ်ႁေႃၶမ်းလႆႈၶၢမ်ႇၼၼ်ႉတီႈ သေႃးလူႉ ဢိၵ်ႇတင်းမဵဝ်းၸိူဝ်ႉၶိူဝ်းမၼ်းၼၼ်ႉ ဝၼ်းမိူဝ်ႈၼႆႉတီႈၶႃႈယဝ်ႉ၊ မိူဝ်ႈဢၼ်ဝႃႈၼင်ႇၼႆၸိုင်၊-

9တႃႇဝိတ်ႈ ၶိုၼ်းလၢတ်ႈတီႈ ရေႇၶပ်ႉ ဢိၵ်ႇတင်းၼွင်ႉၸၢႆးမၼ်း ပႃႇၼႃႇ လုၵ်ႈၸၢႆး ရိမ်ႇမုၼ်ႇ ၵူၼ်း ပေႇရေႃႇသီႉ ၼၼ်ႉလႄႈဝႃႈ၊ ၵႃႈၼင်ႇဢၼ်ထႃႇဝရႃႉၽြႃး ဢၼ်ထုတ်ႇဢဝ်ဢသၢၵ်ႈၵဝ်လွတ်ႈသေၵႃႈတီႈၽေးဢူႉပၢတ်ႈၵႃႈမီးၼၼ်ႉ ဢသၢၵ်ႈလိပ်းယူႇၼၼ်ႉ၊-

10မိူဝ်ႈၵမ်းဢွၼ်တၢင်းၼၼ်ႉ၊ မိူဝ်ႈဢၼ်ၵူၼ်းၵေႃႉၼိုင်ႈ မီးတၢင်းၵျၢမ်ႇတၢင်းပွင်ဢၼ်တၵ်းဢဝ်သတၢင်းသဵင်ၶၢဝ်ႇ ဢၼ်လီၸူမ်းလီသိူဝ်းၼၼ်ႉ မႃးလႄႈမွၵ်ႇလၢတ်ႈၼၼ်ႉယူႇသေလႄႈ မွၵ်ႇလၢတ်ႈတီႈၵဝ်လႄႈဝႃႈ၊ တူၺ်းတီႈၶႃႈလူး။ သေႃးလူႉ တၢႆယဝ်ႉတီႈၶႃႈယဝ်ႉ၊ ဝႃႈၼင်ႇၼႆၼၼ်ႉၸိုင်၊ ၵဝ်တိုတ်ႉၸၼ်ဢဝ်ၵေႃႉၼၼ်ႉတၢႆၵႃႈတီႈဝဵင်း ၸီႉၵလတ်ႉ လႄႈ ၶျႃးပၼ်သူးလၢပ်ႈၸိူဝ်ႉၼင်ႇၼၼ် ပုၼ်ႈၵႂၢမ်းသတၢင်းမၼ်းၼၼ်ႉဢေႃႈ။-

11မိူဝ်ႈဢၼ်ၵူၼ်းႁၢႆႉၵူၼ်းမိူၵ်ႈ ဢဝ်ၵေႃႉဢၼ်သိုဝ်ႈတေႃႇတၢႆၵႃႈၼိူဝ်တီႈၼွၼ်းမၼ်း ၵႃႈၼႂ်းႁိူၼ်းမၼ်းၼၼ်ႉၸိုင်၊ ၵဝ်ယဵင်ႈၶႅၼ်းထုၵ်ႇလီယွၼ်းဢဝ်လိူတ်ႈမၼ်းၼၼ်ႉ တီႈသူမိူဝ်ႈလဵဝ်ၼႆႉၵမ်းလဵဝ်လႄႈ ဢဝ်သူပႄႇပႅတ်ႈသေၵႃႈၼိူဝ်လိၼ်မိူင်းဢမ်ႇၸႂ်ႈႁိုဝ်။ ဝႃႈၼင်ႇၼႆသေယဝ်ႉ၊-

12တႃႇဝိတ်ႈ မီးဢမိင်ႉတီႈၵူၼ်းဢွၼ်ႇမၼ်းၸိူဝ်းၼၼ်ႉလႄႈ ၶဝ်ဢွၼ်ၵၼ်ဢဝ်သွင်ၵေႃႉၼၼ်ႉတၢႆလႄႈ တႅပ်းတိၼ်တႅပ်းမိုဝ်း သွင်ၶႃသေလႄႈ ဢဝ်ႁွႆႈဝႆႉၵႃႈတီႈႁိမ်းၼမ်ႉၼွင် ႁေႇပြုၼ်ႇ ဢေႃႈ။ ၵွၵ်းႁူဝ် ဢီႉသပေႃႇသႅတ်ႉ ၼၼ်ႉၸမ်ႉ၊ ၶဝ်ဢွၼ်ၵၼ်ဢဝ်လႄႈ သၢင်းၵျူဝ်ႇၵႃႈၼႂ်းပႃႇႁဵဝ်ႈ ဢႃႉပၼႃး ၵႃႈတီႈဝဵင်း ႁေႇပြုၼ်ႇ ၼၼ်ႉသေဢေႃႈ။

← Chapter 3 Jump to: Chapter 5 →