2 Samuel 22 — Shan

1ၵႂၢမ်းဢၼ် တႃႇဝိတ်ႈ ႁဵတ်းၵႂၢမ်းဢွၵ်ႇသူပ်းဝႃႈ ၵႃႈတီႈၽၢႆႇၼႃႈထႃႇဝရႃႉၽြႃးၼႂ်းမိုဝ်ႉဝၼ်းဢၼ် ထႃႇဝရႃႉၽြႃးၵႄႇသႄႇၼုၵ်ႈဢဝ်မၼ်းဢွၵ်ႇသေ ၵႃႈၼႂ်းမိုဝ်းရၢၼ်ႇသူႇမၼ်းတင်းသဵင်ႈတင်းလူင် ဢိၵ်ႇတင်းၵႃႈၼႂ်းမိုဝ်း သေႃးလူႉ ၼၼ်ႉလႄႈဝႃႈၸမ်ႉ၊-

2ထႃႇဝရႃႉၽြႃး ပဵၼ်မၢၵ်ႇႁိၼ်မၢၵ်ႇၽႃၵဝ်၊ လမ်းဝဵင်းၵဝ်၊ ၸဝ်ႈဢၼ်ၵႄႇသႄႇဢဝ်ၵဝ်လွတ်ႈ၊-

3ၽြႃးၵဝ် ဢၼ်ပဵၼ်မၢၵ်ႇႁိၼ်မၢၵ်ႇၽႃၵဝ်၊ တီႈဢၼ်ၵဝ်ဢိင်ပိုင်ႈ၊ ဢၼ်ႁႄႉဢၼ်ၵင်ႈၵဝ်၊ ၶဝ်လႅမ်ဢၼ်ၵႄႇသႄႇၶျွတ်ႈဢဝ်ၵဝ်၊ တိူၵ်ႈတီႈတိုၵ်းသိုၵ်းၵဝ်၊ တီႈဢၼ်ၵဝ်သွၼ်ႈပိုင်ႈ၊ ၸဝ်ႈဢၼ်ၵႄႇသႄႇၶျွတ်ႈဢဝ်ၵဝ်ဢေႃႈ။ ၸဝ်ႈႁဝ်းၵႄႇသႄႇၶျွတ်ႈဢဝ်ၶႃႈၸဝ်ႈႁဝ်းဢွၵ်ႇသေၵႃႈၼႂ်းတၢင်းဢၼ် ၼိၵ်ႈၸၢၵ်ႈငႅၼ်းသႄးတီႈၶႃႈဢေႃႈ။-

4ၵဝ်တၵ်းလဝ်ႊယွၼ်းတီႈထႃႇဝရႃႉၽြႃး ဢၼ်ထုၵ်ႇလီၶၢမ်ႇတၢင်းဢၼ်ယွင်ႈယေႃးၼၼ်ႉလႄႈ ႁွတ်ႈထိုင်တၢင်းဢၼ်ၵႄႇသႄႇၶျွတ်ႈဢဝ် ၵႃႈၼႂ်းမိုဝ်းရၢၼ်ႇသူႇၵဝ်တင်းလၢႆၼၼ်ႉဢေႃႈ။-

5လႅင်းၼမ်ႉပိူပ်ႈၼမ်ႉတၢင်းတၢႆတင်းလၢႆလွမ်ႉႁွပ်ႈၵဝ်ဝႆႉလႄႈ ၼမ်ႉၸႅဝ်ႈတၢင်းဢၼ်ႁုၵ်းႁၢႆႉယုတ်ႈယွမ်းၼၼ်ႉ ႁႂ်ႈၵဝ်လႆႈၵူဝ်လႆႈႁႄဢေႃႈ။-

6သဵၼ်ႈၸိူၵ်ႈမိူင်းမရၼႃႉတင်းလၢႆလွမ်ႉႁွပ်ႈၵဝ်ဝႆႉလႄႈ တူင်ႇႁႅဝ်ႉတူင်ႇၶိုမ်းၶုၼ်တၢႆ လႆႈႁုတ်ႉမႅၼ်ႈၵဝ်ဝႆႉဢေႃႈ။-

7ၼႂ်းမိူဝ်ႈဢၼ်ယၢပ်ႇၸႂ်ၶၢၼ်ၸႂ်ယူႇၼၼ်ႉၸိုင်၊ ၵဝ်ႁွင်ႉႁႃထႃႇဝရႃႉၽြႃးလႄႈ သႅၼ်ႇႁွင်ႉႁႃၽြႃးပဵၼ်ၸဝ်ႈၵဝ်ဢေႃႈ။ မၼ်းၸဝ်ႈယူႇၵႃႈၼႂ်းပိၵ်ႈမၢၼ်ႇမၼ်းၸဝ်ႈ ငိၼ်းသဵင်ၵဝ်လႄႈ သဵင်ဢၼ်ၵဝ်သႅၼ်ႇႁွင်ႉႁႃၼၼ်ႉ ၶဝ်ႈႁွတ်ႈထိုင်ၵႃႈၼႂ်းႁူမၼ်းၸဝ်ႈဢေႃႈ။

8မိူဝ်ႈၼၼ်ႉ လိၼ်မိူင်းတူင်ႉၼိုင်လႄႈသၼ်ႇသၼ်ႇသၢႆသၢႆယူႇ၊ ငဝ်ႈႁၢၵ်ႈၽႃႉၵၢင်ႁၢဝ်တင်းလၢႆသၼ်ႇၶွၼ်းဝႆလႄႈ ၼိုင်ၵႂႃႇၼိုင်မႃးယူႇ ၵွပ်ႈပိူဝ်ႈဢၼ် တၢင်းၸႂ်မႆႈၶႆႈၸႃႉမၼ်းၸဝ်ႈဢွၵ်ႇၼၼ်ႉဢေႃႈ။-

9ၵႂၼ်းၽႆးဢွၵ်ႇၵႃႈၼႂ်းၶူႈလင်မၼ်းၸဝ်ႈယူႇ၊ ၽႆးၵႃႈၼႂ်းသူပ်းမၼ်းၸဝ်ႈမႆႈယူႇသေလႄႈ ထၢၼ်ႇၽႆးလုၵ်ႉၵွပ်ႈပိူဝ်ႈမၼ်းဢေႃႈ။-

10မၼ်းၸဝ်ႈၼူပ်ႈၽႃႉၵၢင်ႁၢဝ်သေလႄႈ လူင်းမႃးလႄႈၵႃႈတႂ်ႈတိၼ်မၼ်းၸဝ်ႈၼၼ်ႉ ပဵၼ်ဢၼ်လပ်းသိင်ႇဝႆႉဢေႃႈ။-

11မၼ်းၸဝ်ႈၶီႇ ၶေႇရူႉၽဵမ်ႇ သေလႄႈမိၼ်ယူႇလႄႈ မၼ်းၸဝ်ႈထၢင်ႇသႃးယူႇၵႃႈၼိူဝ်ပိၵ်ႇလူမ်းဢေႃႈ။-

12မၼ်းၸဝ်ႈႁႂ်ႈဢၼ်လပ်းသိင်ႇ ဢၼ်ဝႃႈၼမ်ႉဢၼ်ၸူႉဢၼ်တုမ် ဢိၵ်ႇတင်းၽႃႈၽူၼ်ဢၼ်ၼႃတၼ်ၼႃႇၸိူဝ်းၼၼ်ႉ ပဵၼ်မူဝ်းၵႃႇဢၼ်လွမ်ႉႁွပ်ႈမၼ်းၸဝ်ႈယူႇဢေႃႈ။-

13ၵွပ်ႈပိူဝ်ႈသၢႆဢရွင်ႇၵႃႈတီႈၽၢႆႇၼႃႈမၼ်းၸဝ်ႈၼၼ်ႉလႄႈ ထၢၼ်ႇၽႆးမီးတၢင်းဢၼ်လုၵ်ႉႁိူဝ်ႈယူႇဢေႃႈ။-

14ထႃႇဝရႃႉၽြႃးၽႃႉလင်ယူႇၵႃႈၼိူဝ်ၵၢင်ႁၢဝ်လႄႈ ၽြႃးဢၼ်သုင်ၼႃႇသေပိူၼ်ႈၼၼ်ႉ ပွႆႇသဵင်မၼ်းၸဝ်ႈဢေႃႈ။-

15မၼ်းၸဝ်ႈယိုဝ်းပိုၼ်ၵၢင်ႇမၼ်းၸဝ်ႈသေလႄႈ ႁႂ်ႈၶဝ်ၽူင်ႉပၢႆႈယၢႆႈၼီၵႂႃႇလႄႈ မၼ်းၸဝ်ႈႁႂ်ႈၽႃႉမႅပ်ႈသေလႄႈ ႁႂ်ႈၶဝ်တူၵ်းသုမ်းဢေႃႈ။

16မိူဝ်ႈၼၼ်ႉ ၵႃႈတႂ်ႈပိုၼ်ႉၼမ်ႉသမ်ႇမုၵ်ႉတြႃႇၼၼ်ႉ လႆႈပိုတ်ႇၵီႈလႄႈ ငဝ်ႈႁၢၵ်ႈတိူၵ်ႈလေႃးၵႃႉ ပေႃႇဢွၵ်ႇဝႆႉၵွပ်ႈပိူဝ်ႈဢၼ် ထႃႇဝရႃႉၽြႃးတၢင်ႇဢပႅတ်ႈ ဢိၵ်ႇတင်းၵွပ်ႈပိူဝ်ႈဢၼ် မၼ်းၸဝ်ႈထၢင်ႇထိုင်တၢင်းဢၼ်ထူၺ်ႈၸႂ်ၵႃႈၼႂ်းၶူႈလင်မၼ်းၸဝ်ႈၼၼ်ႉ ဢွၵ်ႇၼၼ်ႉဢေႃႈ။-

17မၼ်းၸဝ်ႈယဵတ်ႇမိုဝ်းမၼ်းၸဝ်ႈ ၵႃႈၼိူဝ်ၼၼ်ႉသေလႄႈ ယိပ်းၵမ်ၵဝ်လႄႈ မၼ်းၸဝ်ႈဢဝ်ၵဝ်ဢွၵ်ႇသေၵႃႈၼႂ်းၼမ်ႉ ဢၼ်ယႂ်ႇၼႃႇၸိူဝ်းၼၼ်ႉဢေႃႈ။-

18မၼ်းၸဝ်ႈၵႄႇသႄႇၼုၵ်ႈဢဝ်ၵဝ် ဢွၵ်ႇသေၵႃႈၼႂ်းမိုဝ်းရၢၼ်ႇသူႇၵဝ် ဢၼ်ႁႅင်းယႂ်ႇၼႃႇဢၼ်ဝႃႈ ၵႃႈၼႂ်းမိုဝ်းၶဝ်ၸိူဝ်းဢၼ်ၸင်းၵဝ်ၼၼ်ႉဢေႃႈ။ လွင်ႈမၼ်းၸမ်ႉ ၶဝ်ၼၼ်ႉႁႅင်းယႂ်ႇၼႃႇသေၵဝ်လႄႈ ၵဝ်ဢမ်ႇပႄႉၶဝ်လႆႈ။-

19ပိၵ်ႉသမ်ႉၶဝ်ၽုတ်းၽၢတ်းပေႃႇမႃးတီႈၵဝ်ၼႂ်းမိုဝ်ႉဝၼ်းဢၼ် ၵဝ်ႁွတ်ႈထိုင်ၽေးဢူႉပၢတ်ႈၼၼ်ႉသေၵေႃႈ၊ ထႃႇဝရႃႉၽြႃး ပဵၼ်တီႈဢၼ်ၵဝ်ဢိင်ယူႇပိုင်ႈယူႇဢေႃႈ။-

20မၼ်းၸဝ်ႈဢဝ်ၵဝ်သူင်ႇၵႃႈတီႈ ဢၼ်ၵႂၢင်ႈလီလႃးလီလႄႈ မၼ်းၸဝ်ႈၵႄႇသႄႇတိုတ်ႉၸၼ်ဢဝ်ၵဝ် ၵွပ်ႈပိူဝ်ႈဢၼ် မၼ်းၸဝ်ႈၼႅတ်ႈသၢၵ်ႈႁၵ်ႉပႅင်းၵဝ်ၼၼ်ႉဢေႃႈ။

21ထႃႇဝရႃႉၽြႃးပၼ်ဢၵျူဝ်းၸွမ်းၵႃႈၼင်ႇဢၼ်ၵဝ်မီးတၢင်းသိုဝ်ႈတေႃႇၼၼ်ႉလႄႈ မၼ်းၸဝ်ႈတွပ်ႇတႅၼ်းပၼ် ၸွမ်းၵႃႈၼင်ႇတၢင်းဢၼ်မိုဝ်းၵဝ်မူတ်းသႂ်ၼၼ်ႉဢေႃႈ။-

22လွင်ႈမၼ်းၸမ်ႉ ၵဝ်ၸွမ်းသဵၼ်ႈတၢင်းထႃႇဝရႃႉၽြႃးယူႇသေႇသေႇလႄႈ ၵဝ်ဢမ်ႇႁဵတ်းႁၢႆႉႁဵတ်းမိူၵ်ႈဝႄႈပႅတ်ႈၽြႃးပဵၼ်ၸဝ်ႈၵဝ်သေလႄႈၵႂႃႇ။-

23လွင်ႈတၢင်းဢၼ်မၼ်းၸဝ်ႈၸီႇယၢင်ႇဝႆႉၵႃႈမီးၼၼ်ႉ မီးယူႇသိုဝ်ႈၼႃႈတႂ်ႈတႃၵဝ်လႄႈ ၵဝ်ဢမ်ႇပႄႇဢမ်ႇပႅတ်ႈထုင်းၽိင်ႈတြႃးမၼ်းၸဝ်ႈၸိူဝ်းၼၼ်ႉလႃးလႃး။-

24ၵဝ်ၸေးၸုမ်ႇဝႆႉတင်း လွင်ႈဢၼ်လီဢၼ်ငၢမ်းၵႃႈတီႈၽၢႆႇၼႃႈၸဝ်ႈၼၼ်ႉလႄႈ ၵဝ်ဝႄႈပႅတ်ႈတူႉၸရိူၵ်ႈတူဝ်ၸဝ်ႈၵဝ်ႇသေလႄႈယူႇဢေႃႈ။-

25ပိူဝ်ႈၼႆလႄႈ ထႃႇဝရႃႉၽြႃးတွပ်ႇတႅၼ်းပၼ်ဢၵျူဝ်းတီႈၵဝ် ၸွမ်းၵႃႈၼင်ႇဢၼ်ၵဝ်မီးတၢင်းဢၼ်သိုဝ်ႈတေႃႇ ဢိၵ်ႇတင်းၸွမ်းၵႃႈၼင်ႇဢၼ် ၵဝ်မီးတၢင်းဢၼ်မူတ်းသႂ်သိုဝ်ႈၼႃႈတႂ်ႈတႃမၼ်းၸဝ်ႈၼၼ်ႉယဝ်ႉ။-

26တီႈၵေႃႉဢၼ်ဢဵတ်းလူၼၼ်ႉ၊ ၸဝ်ႈႁဝ်းၼႄပျႃးသၽေႃးတၢင်းဢၼ်ဢဵတ်းလူလႄႈ၊ တီႈၵေႃႉဢၼ်ၸေးၸုမ်ႇၼၼ်ႉ၊ ၸဝ်ႈႁဝ်းၼႄပျႃးသၽေႃးဢၼ်ၸေးၸုမ်ႇတီႈၶႃႈဢေႃႈ။-

27တီႈၵေႃႉဢၼ်သႂ်ၸၢင်ႇၼၼ်ႉ၊ ၸဝ်ႈႁဝ်းၼႄပျႃးသၽေႃးဢၼ်သႂ်ၸၢင်ႇလႄႈ၊ တီႈၵေႃႉဢၼ်ႁဵတ်းၶတ်းၼၼ်ႉ၊ ၸဝ်ႈႁဝ်းၼႄပျႃးသၽေႃးဢၼ်ႁဵတ်းၶတ်းတီႈၶႃႈဢေႃႈ။-

28ၶဝ်ၸိူဝ်းဢၼ်ယၢၵ်ႈဢၼ်ၽၢၼ်ၼၼ်ႉၸိုင်၊ ၸဝ်ႈႁဝ်းၵႄႇၶျွတ်ႈဢဝ်လႄႈ၊ ၶဝ်ၸိူဝ်းဢၼ်ႁူဝ်ၸႂ်ၽႅၼ်ႇသုင်ၼၼ်ႉၸမ်ႉ၊ တႃၸဝ်ႈႁဝ်းလူတူၺ်းမၢတ်ႈတွင်းဝႆႉ ႁႂ်ႈလႆႈဢဝ်ၶဝ်ၶျႃးတူၵ်းတီႈတႅမ်ႇတီႈၶႃႈဢေႃႈ။-

29ဢူဝ်းထႃႇဝရႃႉၽြႃး၊ ၸဝ်ႈႁဝ်းပဵၼ်ဝၢၼ်ႇၽႆးတဵၼ်းၶႃႈၸဝ်ႈတီႈၶႃႈလႄႈ ထႃႇဝရႃႉၽြႃးႁႂ်ႈလပ်းသိင်ႇၶႃႈၸဝ်ႈလႅင်းတီႈၶႃႈဢေႃႈ။-

30ၶႃႈၸဝ်ႈဢိင်ပိုင်ႈၸဝ်ႈႁဝ်းသေလႄႈ ၶုၼ်ႇလႅၼ်ႈၽၢင်ႈတပ်ႉတီႈၶႃႈလႄႈ ၶႃႈၸဝ်ႈဢိင်ပိုင်ႈၽြႃးပဵၼ်ၸဝ်ႈၶႃႈၸဝ်ႈလႄႈ ဝႅၼ်ၶၢမ်ႈလမ်းဝဵင်းၵႂႃႇတီႈၶႃႈဢေႃႈ။

31သဵၼ်ႈတၢင်းၽြႃးပဵၼ်ၸဝ်ႈၼၼ်ႉၸေးၸုမ်ႇလႄႈ၊ သဵတ်ႈၸႃႇထႃႇဝရႃႉၽြႃးၶၢမ်ႇတၢင်းဢၼ်ၸႅတ်ႈထၢမ်လႄႈ မူတ်းသႂ်ယူႇဢေႃႈ။ မၼ်းၸဝ်ႈပဵၼ်ဢၼ်ႁႄႉဢၼ်ၵင်ႈၶဝ်ၸိူဝ်းဢၼ် သွၼ်ႈပိုင်ႈမၼ်းၸဝ်ႈတင်းသဵင်ႈတင်းလူင်ၼၼ်ႉဢေႃႈ။-

32ၼွၵ်ႈသေထႃႇဝရႃႉၽြႃးၼၼ်ႉ၊ ယင်းမီးၽြႃးပဵၼ်ၸဝ်ႈသူႇလႂ်လူးၵွၼ်ႇ။ ၼွၵ်ႈသေၽြႃးပဵၼ်ၸဝ်ႈႁဝ်းၼၼ်ႉ ယင်းမီးမၢၵ်ႇႁိၼ်မၢၵ်ႇၽႃဢၼ်လႂ်လူးၵွၼ်ႇ။-

33ၽြႃးပဵၼ်ၸဝ်ႈၼၼ်ႉ ပဵၼ်တိူၵ်ႈတီႈတိုၵ်းသိုၵ်းၵဝ် ဢၼ်မၼ်ႈၶိူင်ႇၼႃႇလႄႈ မၼ်းၸဝ်ႈဢဝ်ၵေႃႉဢၼ်ၸေးၸုမ်ႇၼၼ်ႉ ၸွမ်းသူင်ႇၵႃႈၼႂ်းသဵၼ်ႈတၢင်းဢေႃႈ။-

34မၼ်းၸဝ်ႈႁႂ်ႈတိၼ်ၵဝ်ၶၼ်ၽႂ်း မိူၼ်ၸိူဝ်ႉၼင်ႇတိၼ်ၵႂၢင်ၼၼ်ႉလႄႈ မၼ်းၸဝ်ႈဢဝ်ၵဝ်တၢင်ႇဝႆႉ ၵႃႈၼိူဝ်တီႈဢၼ်သုင်ၵဝ်ၸိူဝ်းၼၼ်ႉဢေႃႈ။-

35မၼ်းၸဝ်ႈသင်ႇသွၼ်ပၼ်မိုဝ်းၵဝ် ႁႂ်ႈမေႃႁႂ်ႈၸၢင်ႈလွင်ႈတၢင်းဢၼ်တိုၵ်းသိုၵ်းလႄႈ ၶႅၼ်ၵဝ်ဝူတ်ႈတင်းၵၢင်ႇတွင်းလိူင်လႆႈဢေႃႈ။

36ၸဝ်ႈႁဝ်းဢဝ်ဢၼ်ႁႄႉဢၼ်ၵင်ႈ တၢင်းဢၼ်ၸဝ်ႈႁဝ်းၵႄႇသႄႇၶျွတ်ႈဢဝ်ၼၼ်ႉ ပၼ်တီႈၶႃႈၸဝ်ႈလႄႈ တၢင်းဢၼ်ၸဝ်ႈႁဝ်းဢဵတ်းလူယိူၼ်ႉၶၢမ်ႇၼၼ်ႉ ႁႂ်ႈၶႃႈၸဝ်ႈႁွတ်ႈထိုင်တၢင်းဢၼ်ယုၵ်ႉယွင်ႈဝႆႉတီႈၶႃႈဢေႃႈ။-

37ၸဝ်ႈႁဝ်းႁႂ်ႈသဵၼ်ႈတၢင်းဢၼ် တိၼ်ၶႃႈၸဝ်ႈယဵပ်ႇၼၼ်ႉၵႂၢင်ႈလီလႃးလီလႄႈ တႃတိၼ်ၶႃႈၸဝ်ႈဢမ်ႇပရၢတ်ႈၵႂႃႇတီႈၶႃႈ၊-

38ၶႃႈၸဝ်ႈလိုပ်ႈၸွမ်းလမ်းၸွမ်းရၢၼ်ႇသူႇၶႃႈၸဝ်ႈတင်းလၢႆသေလႄႈ ယႃႉၶဝ်ပႅတ်ႈလႄႈ၊ ၸူဝ်ႈဢၼ်ဢမ်ႇပႆႇပႄႇၽဵဝ်ႈၶဝ်ပႅတ်ႈၼၼ်ႉၸိုင်၊ ဢမ်ႇၶိုၼ်းမႃးတီႈၶႃႈ၊-

39ၶႃႈၸဝ်ႈပႄႇၽဵဝ်ႈၶဝ်ပႅတ်ႈယူႇသေလႄႈ တိူဝ်ႉထုၵ်ႇသႂ်ႇၶဝ် တေႃႇထိုင်ႁွတ်ႈၶဝ်ထၼ်ႈပေႃးဢမ်ႇလုၵ်ႉလႆႈလႄႈ ၶဝ်လူမ်ႉယူႇၵႃႈတႂ်ႈတိၼ်ၶႃႈၸဝ်ႈတီႈၶႃႈဢေႃႈ။-

40လွင်ႈမၼ်းၸမ်ႉ ၸဝ်ႈႁဝ်းဢဝ်သၢႆဢႅဝ်ႁႅင်းတၼ်းၶူဝ်းႁတ်ႉၶႃႈၸဝ်ႈ ႁႂ်ႈၶႃႈၸဝ်ႈမေႃၸၢင်ႈလွင်ႈတၢင်းဢၼ်တိုၵ်းသိုၵ်းလႄႈ ၸဝ်ႈႁဝ်းဢဝ်ၶဝ်ၸိူဝ်းဢၼ်လုၵ်ႉယူႇၽၢႆႇၼိုင်ႈတင်းၶႃႈၸဝ်ႈၸိူဝ်းၼၼ်ႉ လူမ်ႉတူၵ်းပႅတ်ႈၵႃႈတႂ်ႈၶႃႈၸဝ်ႈတီႈၶႃႈဢေႃႈ။-

41ၸဝ်ႈႁဝ်းႁႂ်ႈရၢၼ်ႇသူႇၶႃႈၸဝ်ႈတင်းလၢႆ ဝၢႆႇလင်ပၼ်တီႈၶႃႈၸဝ်ႈလႄႈ ၶႃႈၸဝ်ႈယႃႉၽဵဝ်ႈၶဝ်ၸိူဝ်းဢၼ်ၸင်းၶႃႈၸဝ်ႈၼၼ်ႉပႅတ်ႈတီႈၶႃႈဢေႃႈ။-

42ၶဝ်ၼၼ်ႉ မုင်ႈႁႃသေၵေႃႈ ၵေႃႉဢၼ်ၵႄႇသႄႇၶျွတ်ႈဢဝ်ဢမ်ႇမီးလႄႈ ၶဝ်မုင်ႈႁႃထႃႇဝရႃႉၽြႃးသေၵေႃႈ၊ မၼ်းၸဝ်ႈဢမ်ႇဢိူဝ်။-

43ၶဝ်ၼၼ်ႉၸိုင် ၶႃႈၸဝ်ႈဢဝ်ၼူတ်ႈလႅဝ်ဢွၼ်ႇဢွၼ်ႇၽွင်ၽွင်ၸိူဝ်ႉၼင်ႇမုၼ်ႈလိၼ်ၼၼ်ႉလႄႈ ၶႃႈၸဝ်ႈယဵပ်ႇသႂ်ႇၶဝ် မိူၼ်ၸိူဝ်ႉၼင်ႇ မုၼ်ႈဢၢင်ႉဢၢၵ်ႇ ၵႃႈတီႈၵၢင်တႃႈၵၢင်တၢင်းၼၼ်ႉသေလႄႈ ဢဝ်ၽႄႇမိူဝ်ပႅတ်ႈတီႈၶႃႈဢေႃႈ။

44ၸဝ်ႈႁဝ်းၵႄႇသႄႇဢဝ်ၶႃႈၸဝ်ႈ လွတ်ႈသေၵႃႈၼႂ်းတၢင်းဢၼ်မုၵ်ႉၵူၼ်းၸိူဝ်းၵူၼ်းၶႃႈၸဝ်ႈတင်းလၢႆ ၶေႉၶဵင်ႇတိုၵ်းတေႃးၵၼ်ယူႇၼၼ်ႉလႄႈ ၸဝ်ႈႁဝ်းပႂ်ႉလူပႂ်ႉတူၺ်းၶႃႈၸဝ်ႈ ႁႂ်ႈၶႃႈၸဝ်ႈလႆႈပဵၼ်ၵႄႇပဵၼ်ႁူဝ်ၵူၼ်းတၢင်ႇၸိူဝ်ႉတၢင်ႇၶိူဝ်းသေလႄႈ မုၵ်ႉၵူၼ်းၽုင်ၵူၼ်းဢၼ်ၶႃႈၸဝ်ႈဢမ်ႇတွၼ်ႉႁူႉၸၵ်းၼၼ်ႉ ၶၢမ်ႇႁဵတ်းၶႃႈတီႈၶႃႈၸဝ်ႈတီႈၶႃႈဢေႃႈ။-

45ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ ႁဵတ်းၵိူမ်ႈႁဵတ်းလိူမ်ႈတီႈၶႃႈၸဝ်ႈလႄႈ ၶဝ်ဢွၼ်ၵၼ်ထွမ်ႇဢဝ်ၼႂ်းမိူဝ်ႈဢၼ် ၶဝ်ငိၼ်းသဵင်ႈၵႂၢမ်းၶႃႈၸဝ်ႈၼၼ်ႉတီႈၶႃႈဢေႃႈ။-

46ၵူၼ်းတၢင်ႇၸိူဝ်ႉတၢင်ႇၶိူဝ်းၸိူဝ်းၼၼ်ႉ ႁဵဝ်ႇၸွပ်ႈၵႂႃႇလႄႈ ဢွၼ်ၵၼ်လုၵ်ႉသေၵႃႈၼႂ်းတိူၵ်ႈတီႈတိုၵ်းသိုၵ်းၶဝ်ၼၼ်ႉ သၼ်ႇသၼ်ႇသၢႆသၢႆဢွၵ်ႇၵႂႃႇတီႈၶႃႈဢေႃႈ။

47ထႃႇဝရႃႉၽြႃးဢသၢၵ်ႈလိပ်းယူႇလႄႈ ႁႂ်ႈမင်ႇၵလႃႇမီးတီႈမၢၵ်ႇႁိၼ်မၢၵ်ႇၽႃၵဝ်သေၵမ်းလူၺ်ႈ။ ႁႂ်ႈတၢင်းဢၼ်ယုၵ်ႉယွင်ႈ မီးတီႈၽြႃးပဵၼ်ၸဝ်ႈ ဢၼ်ပဵၼ်မၢၵ်ႇႁိၼ်မၢၵ်ႇၽႃတၢင်းဢၼ်ၵႄႇသႄႇၶျွတ်ႈဢဝ်ၵဝ်ၼၼ်ႉသေၵမ်းလူၺ်ႈ။-

48မၼ်းၸဝ်ႈပဵၼ်ၽြႃးပဵၼ်ၸဝ်ႈ ဢၼ်ယူႇၽၢႆႇၵဝ်သေလႄႈ ၸီႇယၢင်ႇၸွမ်းၼင်ႇတြႃးလႄႈ ဢဝ်မုၵ်ႉၵူၼ်းၸိူဝ်းၵူၼ်းၶျႃးတူၵ်းဝႆႉ ၵႃႈတႂ်ႈၵဝ်ၼၼ်ႉဢေႃႈ။-

49မၼ်းၸဝ်ႈဢဝ်ၵဝ်လွတ်ႈသေၵႃႈၼႂ်းမိုဝ်းရၢၼ်ႇသူႇၵဝ်ဢေႃႈ။ ၸဝ်ႈႁဝ်းယုၵ်ႉယွင်ႈၶႃႈၸဝ်ႈတၢင်ႇဝႆႉၵႃႈၼိူဝ်ၶဝ်ၸိူဝ်းဢၼ်လုၵ်ႉယူႇၽၢႆႇၼိုင်ႈ တင်းၶႃႈၸဝ်ႈၼၼ်ႉလႄႈ ၸဝ်ႈႁဝ်းၵႄႇသႄႇၼုၵ်ႈဢဝ်ၶႃႈၸဝ်ႈ ဢွၵ်ႇသေၵႃႈၼႂ်းမိုဝ်းၵေႃႉဢၼ်ႁိမ်ႁူင်ႇယႃႉယူၵ်ႉၼၼ်ႉတီႈၶႃႈဢေႃႈ။-

50ပိူဝ်ႈၼႆလႄႈ ထႃႇဝရႃႉၽြႃးတီႈၶႃႈ၊ ၶႃႈၸဝ်ႈတၵ်းယွင်ႈယေႃးၵျေးၸူးၸဝ်ႈႁဝ်း ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉလႄႈ ႁဵတ်းၵႂၢမ်းထေႃးပၼႃႇ တီႈၼႃႇမႃႉၸိုဝ်ႈသဵင်ၸဝ်ႈႁဝ်းတီႈၶႃႈဢေႃႈ။-

51မၼ်းၸဝ်ႈႁဵတ်းတၢင်းဢၼ်ၵႄႇသႄႇၶျွတ်ႈဢဝ်ဢၼ်ယႂ်ႇၼႃႇ တီႈၶုၼ်လူင်မၼ်းၸဝ်ႈၼၼ်ႉလႄႈ ႁဵတ်းၵျေးၸူးၵရူႉၼႃႇတီႈၵေႃႉဢၼ်လႆႈၶၢမ်ႇၽိၵ်ႈသိၵ်ႈ ဢၼ်မၼ်းၸဝ်ႈပၼ်ၼၼ်ႉ ဢၼ်ဝႃႈ တႃႇဝိတ်ႈ ၼၼ်ႉ ဢိၵ်ႇတင်းၸိူဝ်ႉၶိူဝ်းမၼ်း ၶိင်ႇၵႃႇလႃႉသိုပ်ႇသိုပ်ႇတၢမ်းတၢမ်းတႃႇသေႇယူႇဢေႃႈ။