2 Samuel 2

Shan

← Chapter 1 Jump to: Chapter 3 →

1လိုၼ်းၼၼ်ႉ တႃႇဝိတ်ႈ လဝ်ႊထၢမ်တီႈထႃႇဝရႃႉၽြႃးလႄႈဝႃႈ၊ ၶႃႈၸဝ်ႈတၵ်းလႆႈၶိုၼ်း ၶိုၼ်ႈၸူးၵႃႈတီႈဝဵင်း ယူႉတႃႉ သေဝဵင်းဝဵင်းတီႈၶႃႈႁိုဝ်၊ ဝႃႈၼင်ႇၼႆသေယဝ်ႉ၊ ထႃႇဝရႃႉၽြႃးမီးဢမိင်ႉလႄႈဝႃႈ၊ ၶိုၼ်းၶိုၼ်ႈၵႂႃႇတႃႉ၊ ဝႃႈၼင်ႇၼႆဢေႃႈ။ တႃႇဝိတ်ႈ သမ်ႉလဝ်ႊထၢမ်လႄႈဝႃႈ၊ ၶႃႈၸဝ်ႈတၵ်းလႆႈၶိုၼ်း ၶိုၼ်ႈၵႂႃႇၸူးၵႃႈတီႈဝဵင်းဢၼ်လႂ်တီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းၸဝ်ႈမီးဢမိင်ႉလႄႈဝႃႈ၊ ၶိုၼ်းၶိုၼ်ႈၵႂႃႇၸူးၵႃႈတီႈဝဵင်း ႁေႇပြုၼ်ႇ တႃႉ၊ ဝႃႈၼင်ႇၼႆလႄႈ၊-

2တႃႇဝိတ်ႈ ပႃးဢဝ်မေးမၼ်းသွင်ၵေႃႉဢၼ်ဝႃႈ ဢႁီႉၼွင်ႇ ၵူၼ်းယိင်းဝဵင်း ယေႇၸရေႇလႃႉ ဢိၵ်ႇတင်း ဢၽီႉၵေးလႃႉ ၵူၼ်းယိင်းဝဵင်း ၵရမေႇလႃႉ မေး ၼႃႇပလႃႉ ၸိူဝ်းၼၼ်ႉ ၶိုၼ်းၶိုၼ်ႈၵႂႃႇဢေႃႈ။-

3ၵူၼ်းတင်းလၢႆဢၼ်ပႃးတီႈမၼ်း ဢၼ်ဝႃႈၵူႈၵေႃႉၵူႈၵူၼ်း ဢိၵ်ႇတင်းၵူၼ်းႁိူၼ်းၵူၼ်းယေးမၼ်းၼၼ်ႉၸိူဝ်းၼၼ်ႉၵေႃႈ တႃႇဝိတ်ႈ ႁွင်ႉဢဝ်မႃးလႄႈ ၶဝ်ၼၼ်ႉလႆႈယူႇၵႃႈတီႈဝၢၼ်ႈဝဵင်း ႁေႇပြုၼ်ႇ ၸိူဝ်းၼၼ်ႉဢေႃႈ။-

4လႆႈသမ်ႉ ၵူၼ်းမဵဝ်း ယူႉတႃႉ တင်းလၢႆ ဢွၼ်ၵၼ်မႃးလႄႈ ပၼ်ၽိၵ်ႈသိၵ်ႈတီႈ တႃႇဝိတ်ႈ ၊ ႁႂ်ႈမၼ်းလႆႈပဵၼ်ၶုၼ်ႁေႃၶမ်းမဵဝ်း ယူႉတႃႉ ဢေႃႈ။-

5မိူဝ်ႈၼၼ်ႉ ပိူၼ်ႈလဝ်ႊလၢတ်ႈတီႈ တႃႇဝိတ်ႈ လႄႈဝႃႈ၊ ၵူၼ်းဝဵင်း ယႃႇပႅတ်ႉ မိူင်း ၵီႉလတ်ႉ ၸိူဝ်းၼၼ်ႉ ဢွၼ်ၵၼ်သၢင်းၵျူဝ်ႇ သေႃးလူႉ ယဝ်ႉတီႈၶႃႈယဝ်ႉ၊ ဝႃႈၼင်ႇၼႆသေယဝ်ႉ၊ တႃႇဝိတ်ႈ ပွႆႇၸႂ်ႉတမၢၼ်ႇၵႂႃႇၸူးၵႃႈတီႈၵူၼ်းဝဵင်း ယႃႇၽႅတ်ႈ မိူင်း ၵီႉလတ်ႉ ၸိူဝ်းၼၼ်ႉလႄႈ သင်ႇလၢတ်ႈၵႂႃႇတီႈၶဝ်လႄႈဝႃႈ၊ ႁႂ်ႈသူလႆႈၶၢမ်ႇတၢင်းလီမင်ႇၵလႃႇ ဢၼ်ထႃႇဝရႃႉၽြႃးပၼ်ၼၼ်ႉ ၵွပ်ႈပိူဝ်ႈဢၼ်သူႁဵတ်းၵျေးၸူးၵရူႉၼႃႇတီႈၸဝ်ႈသူဢၼ်ဝႃႈ သေႃးလူႉ ၼၼ်ႉလႄႈ ဢဝ်တူဝ်တၢႆၸဝ်ႈ သၢင်းၵျူဝ်ႇၼၼ်ႉသေၵမ်းလူၺ်ႈ။-

6ႁႂ်ႈထႃႇဝရႃႉၽြႃးႁဵတ်းၵျေးၸူးၵရူႉၼႃႇ ဢိၵ်ႇတင်းၵျေးၸူးသဵတ်ႈၸႃႇတီႈသူသေၵမ်းလူၺ်ႈ။ ၵဝ်ၵေႃႈတၵ်းတွပ်ႇတႅၼ်းပၼ်ၵျေးၸူးၼႆႉတီႈသူ ၵွပ်ႈပိူဝ်ႈဢၼ်သူႁဵတ်းလွင်ႈတၢင်းၼႆႉၼၼ်ႉဢေႃႈ။-

7မိူဝ်ႈလဵဝ်ၼႆႉၸိုင် ႁႂ်ႈမိုဝ်းသူႁႅင်းလႄႈမီးတၢင်းဢၼ်ၵတ်ႉၶၼ်ႁတ်းႁၢၼ်တႃႉ။ လွင်ႈမၼ်းၸမ်ႉ ၸဝ်ႈသူ သေႃးလူႉ တၢႆယဝ်ႉ။ ၵူၼ်းမဵဝ်း ယူႉတႃႉ တင်းလၢႆ ဢွၼ်ၵၼ်ပၼ်ၽိၵ်ႈသိၵ်ႈတီႈၵဝ် ႁႂ်ႈၵဝ်လႆႈပဵၼ်ၶုၼ်ႁေႃၶမ်းၶဝ်ယဝ်ႉ၊ ဝႃႈၼင်ႇၼႆဢေႃႈ၊

8ၵူၺ်းၵႃႈ ဢႃႉပၼႃး လုၵ်ႈၸၢႆး ၼေးရႃႉ ဢၼ်ပဵၼ်ၶုၼ်ပူဝ်ႇၶျုၵ်ႈ သေႃးလူႉ ၼၼ်ႉ ဢဝ် ဢီႉသပေႃႇသႅတ်ႉ လုၵ်ႈၸၢႆးၸဝ်ႈ သေႃးလူႉ ၼၼ်ႉသေလႄႈ ဢဝ်ၵႂႃႇၵႃႈတီႈဝဵင်း မႁႃႇၼိမ်ႇ သေယဝ်ႉ၊-

9ယုၵ်ႉယွင်ႈဝႆႉၵႃႈၼႂ်းဢရႃႇဢၼ်လႆႈဢုပ်ႉပိူင်ႇ ၸႃႉၸဵမ်မိူင်း ၵီႉလတ်ႉ လႄႈ ၵူၼ်းမဵဝ်း ဢႃႇသႃႇ တင်းလၢႆ၊ ဝဵင်း ယေႇၸရေႇလႃႉ လိၼ် ဢေႇၽရိမ်ႇ ၊ လိၼ် ပိၼ်ႇယႃႇမိၼ်ႇ ဢၼ်ဝႃႈမိူင်း ဢီႉသရေႇလႃႉ တင်းသဵင်ႈတင်းမူတ်းၼၼ်ႉဢေႃႈ။-

10ဢီႉသပေႃႇသႅတ်ႉ လုၵ်ႈၸၢႆးၸဝ်ႈ သေႃးလူႉ ၼၼ်ႉ မိူဝ်ႈဢၼ်ၸႃႉဢုပ်ႉပိူင်ႇမိူင်း ဢီႉသရေႇလႃႉ ၼၼ်ႉၸိုင် ဢသၢၵ်ႈလႆႈသီႇသိပ်းလႄႈ မၼ်းၸၢမ်ႇၸႃးသွင်ပီႊဢေႃႈ။-

11မဵဝ်း ယူႉတႃႉ ၸမ်ႉ ၸွမ်းလင် တႃႇဝိတ်ႈ ဢေႃႈ။ ၶူပ်ႇပီႊဢၼ် တႃႇဝိတ်ႈ လႆႈယူႇၵႃႈတီႈဝဵင်း ႁေႇပြုၼ်ႇ လႄႈ လႆႈဢုပ်ႉပိူင်ႇၵူၼ်းမဵဝ်း ယူႉတႃႉ ၸိူဝ်းၼၼ်ႉပွင်းၵၼ်ၸမ်ႉ ပဵၼ်ၸဵတ်းပီႊပၢႆႁူၵ်းလိူၼ်ဢေႃႈ။

12လႆႈသမ်ႉ ဢႃႉပၼႃး လုၵ်ႈၸၢႆး ၼေးရႃႉ ၼၼ်ႉ ပႃးဢဝ်တင်းၶႃႈၵူၼ်း ဢီႉသပေႃႇသႅတ်ႉ လုၵ်ႈၸၢႆးၸဝ်ႈ သေႃးလူႉ ၼၼ်ႉၸိူဝ်းၼၼ်ႉ လုၵ်ႉသေၵႃႈတီႈဝဵင်း မႁႃႇၼိမ်ႇ ၵႂႃႇၵႃႈတီႈဝဵင်း ၵီႉပွင်ႇ ဢေႃႈ။-

13ယႂႃႇၽႃႉ လုၵ်ႈၸၢႆး ၸေႇရူႉယႃႇ ဢိၵ်ႇတင်းၶႃႈၵူၼ်း တႃႇဝိတ်ႈ တင်းလၢႆ ဢွၵ်ႇႁႄႉလႄႈ ႁူပ်ႉထူပ်းၵၼ်ၵႃႈတီႈႁိမ်းၼမ်ႉၼွင် ၵီႉပွင်ႇ သေယဝ်ႉ၊ မုၵ်ႉၸိူဝ်းၼိုင်ႈၼင်ႈၵႃႈတီႈၽၢႆႇၼိုင်ႈၼမ်ႉၼွင်လႄႈ မုၵ်ႉၸိူဝ်းၼိုင်ႈၼင်ႈၵႃႈတီႈၽၢႆႇၼိုင်ႈၼမ်ႉၼွင်ၼၼ်ႉဢေႃႈ။-

14ဢႃႉပၼႃး ၼၼ်ႉလၢတ်ႈတီႈ ယႂႃႇၽႃႉ လႄႈဝႃႈ၊ ႁႂ်ႈၵူၼ်းဢွၼ်ႇတင်းလၢႆ လုၵ်ႉလႄႈယဝ်ႉယွၵ်ႇၵၼ်လဵၼ်ႈၵႃႈတီႈၽၢႆႇၼႃႈႁဝ်းသေၵမ်း၊ ဝႃႈၼင်ႇၼႆသေယဝ်ႉ၊ ယႂႃႇၽႃႉ ၵေႃႈဝႃႈ၊ ႁႂ်ႈဢွၼ်ၵၼ်လုၵ်ႉသေၵမ်း၊ ဝႃႈၼင်ႇၼႆလႄႈ၊-

15မိူဝ်ႈၼၼ်ႉ ၵူၼ်းသိပ်းသွင်ၵေႃႉ ပုၼ်ႈၵူၼ်းမဵဝ်း ပိၼ်ႇယႃႇမိၼ်ႇ တင်း ဢီႉသပေႃႇသႅတ်ႉ လုၵ်ႈၸၢႆးၸဝ်ႈ သေႃးလူႉ ၼၼ်ႉ ဢိၵ်ႇတင်းၶႃႈ တႃႇဝိတ်ႈ သိပ်းသွင်ၵေႃႉ ဢွၼ်ၵၼ်လုၵ်ႉလႄႈ ၶၢမ်ႈၸူးၵၼ်ၸွမ်းလူၺ်ႈတၢင်းဢၼ်ၼပ်ႉဢၼ်ဢၢၼ်ႇၼၼ်ႉဢေႃႈ။-

16ၶဝ်ၼၼ်ႉၵေႃႉတေႃႇၵေႃႉ ၼင်ႇၵၼ်ၵၼ်ယိပ်းၵမ်ၵွၵ်းႁူဝ်ၵၼ်ယူႇ၊ ဢဝ်မိတ်ႈတႅင်းသႂ်ႇပဵမ်ႉၵၼ်ယူႇသေလႄႈ လူမ်ႉတၢႆတီႈလဵဝ်ၵၼ်ယူႇဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ တီႈၼၼ်ႉဢၼ်မီးၼႂ်းဢိူင်ႇ ၵီႉပွင်ႇ ၼၼ်ႉ လႆႈၶၢမ်ႇတၢင်းဢၼ်ႁွင်ႉႁဵၵ်ႈၸိုဝ်ႈ ႁေႇလၵႃႉႁိတ်ႉၸူႉရိမ်း ဢေႃႈ၊

17ၼႂ်းဝၼ်းၼၼ်ႉ မီးတၢင်းဢၼ်တိုၵ်းၵၼ် ဢၼ်ယႂ်ႇၼႃႇလူင်လၢင်လႄႈ ဢႃႉပၼႃး ဢိၵ်ႇတင်းၵူၼ်းမဵဝ်း ဢီႉသရေႇလႃႉ ၸိူဝ်းၼၼ်ႉ တူၵ်းသုမ်းၵႃႈတီႈၽၢႆႇၼႃႈၶႃႈၵူၼ်း တႃႇဝိတ်ႈ တင်းလၢႆဢေႃႈ။-

18မိူဝ်ႈၼၼ်ႉ လုၵ်ႈၸၢႆး ၸေႇရူႉယႃႇ သၢမ်ၵေႃႉဢၼ်ဝႃႈ ယႂႃႇၽႃႉ၊ ဢၽီႉသေး၊ ဢႃႇသႃႇႁေးလႃႉ ၸိူဝ်းၼၼ်ႉၵေႃႈပႃးဢေႃႈ။ ဢႃႇသႃႇႁေးလႃႉ ၼၼ်ႉ တိၼ်ၶၼ်တိၼ်ၽႂ်းမိူၼ်ၸိူဝ်ႉၼင်ႇတိုင် ဢၼ်ယၢမ်ႈယူႇၵႃႈတီႈထိူၼ်ႇၼၼ်ႉဢေႃႈ။-

19ဢႃႇသႃႇႁေးလႃႉ ၼၼ်ႉ လိုပ်ႈၸွမ်းလမ်းၸွမ်း ဢႃႉပၼႃး ၵႂႃႇဢေႃႈ။ ၼႂ်းမိူဝ်ႈဢၼ်မၼ်းယင်းတိုၵ်ႉၵႂႃႇယူႇၼၼ်ႉ၊ မၼ်းယင်းဢမ်ႇဝႄႈဢမ်ႇပိူင်ႈသေၵႃႈတီႈတၢင်းဢၼ်ၸွမ်း ဢႃႉပၼႃး ၼၼ်ႉ ၵႂႃႇၽၢႆႇသၢႆႉၽၢႆႇၶႂႃလႄႈယူႇဢေႃႈ။-

20ဢႃႉပၼႃး ၼၼ်ႉ ဝၢႆႇတူၺ်းၶိုၼ်းတၢင်းလင်လႄႈထၢမ်ဝႃႈ၊ ဢႃႇသႃႇႁေးလႃႉ ဢိူၺ်း၊ ပဵၼ်မႂ်းႁိုဝ်။ ဝႃႈၼင်ႇၼႆသေယဝ်ႉ၊ မၼ်းၶိုၼ်းလၢတ်ႈလႄႈဝႃႈ၊ ပဵၼ်ၵဝ်ယဝ်ႉ၊ ဝႃႈၼင်ႇၼႆဢေႃႈ။-

21ဢႃႉပၼႃး ၵေႃႈလၢတ်ႈလႄႈဝႃႈ၊ ငႅၵ်းၵႂႃႇၵႃႈတီႈၽၢႆႇတၢင်းၶႂႃ၊ ဢမ်ႇၼၼ် ၵႃႈတီႈၽၢႆႇတၢင်းသၢႆႉသေလႄႈ တီႉၵမ်ဢဝ်ၵူၼ်းဢွၼ်ႇသေၵေႃႉလႄႈ ႁိမ်ဢဝ်လၢၵ်ႈၼၢၵ်ႈၸုမ်ႇမၼ်းတႃႉ၊ ဝႃႈၼင်ႇၼႆသေၵေႃႈ၊ ဢႃႇသႃႇႁေးလႃႉ ၼၼ်ႉ ယင်းဢမ်ႇငႅၵ်းၵႂႃႇသေတၢင်းဢၼ် ၸွမ်းလင်မၼ်းၼၼ်ႉလႄႈယူႇဢေႃႈ။-

22လႆႈသမ်ႉ ဢႃႉပၼႃး လၢတ်ႈတီႈ ဢႃႇသႃႇႁေးလႃႉ လႄႈဝႃႈ၊ ငႅၵ်းၵႂႃႇသေတၢင်းဢၼ်ၸွမ်းလင်ၵဝ်ၼႆႉတႃႉ။ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ၵဝ်တၵ်းလႆႈတႅင်းမႂ်းပွင်ႇၵူပ်းလိၼ်ၼင်ႇႁိုဝ်။ ပေႃးႁဵတ်းၸိူဝ်ႉၼင်ႇၼၼ်ၸိုင် ၵဝ်တၵ်းၼႄပျႃးၼႃႈၵဝ်တီႈၽၢႆႇၼႃႈပီႈၸၢႆးမႂ်း ယႂႃႇၽႃႉ ၼၼ်ႉလႆႈၸိူဝ်ႉၼင်ႇႁိုဝ်။ ဝႃႈၼင်ႇၼႆသေၵေႃႈ၊-

23ၵွပ်ႈပိူဝ်ႈဢၼ်မၼ်းတွပ်ႇထဵင်တၢင်းဢၼ်တၵ်းလႆႈငႅၵ်းၵႂႃႇၼၼ်ႉလႄႈ ဢႃႉပၼႃး ၼၼ်ႉ ဢဝ်သူၼ်ႈႁွၵ်ႇမၼ်းၼၼ်ႉ တႅင်းသႂ်ႇပုမ်မၼ်းလႄႈ ထၼ်ႈပေႃးႁွၵ်ႇမၼ်းၼၼ်ႉပွင်ႇပဵဝ်ၵႂႃႇၵႃႈတီႈတၢင်းသၼ်လင်မၼ်းသေယဝ်ႉ၊ မၼ်းလူမ်ႉၵႃႈတီႈၼၼ်ႈလႄႈတၢႆၵႃႈၼႂ်းတီႈၼၼ်ႉၵမ်းလဵဝ်ဢေႃႈ။ ၵူၼ်းၵႃႈဢၼ်ႁွတ်ႈထိုင်ၵႃႈတီႈဢၼ် ဢႃႇသႃႇႁေးလႃႉ လူမ်ႉတၢႆၼၼ်ႉၸိူဝ်းၼၼ်ႉ ဢွၼ်ၵၼ်ၵိုတ်းသဝ်းယူႇဢေႃႈ။-

24ၵူၺ်းၵႃႈ ယႂႃႇၽႃႉ ဢိၵ်ႇတင်း ဢၽီႉသေး ၼၼ်ႉလိုပ်ႈၸွမ်းလမ်းၸွမ်း ဢႃႉပၼႃး ၵႂႃႇလႄႈ မိူဝ်ႈဢၼ်ၶဝ်ႁွတ်ႈထိုင်ၵႃႈတီႈလွႆ ဢမ်ႇမႃႇ ဢၼ်မီးၵႃႈတီႈၽၢႆႇၼႃႈဝဵင်း ၵီႉဢႃႇ ႁိမ်းသဵၼ်ႈတၢင်းဢၼ်ၵႂႃႇၸူးၵႃႈတီႈထိူၼ်ႇ ၵီႉပွင်ႇ ၼၼ်ႉၸိုင် ၵၢင်ဝၼ်းတူၵ်းသေဢေႃႈ၊

25ၵူၼ်းမဵဝ်း ပိၼ်ႇယႃႇမိၼ်ႇ ၸိူဝ်းၼၼ်ႉ ၸူႉၵၼ်တုမ်ၵၼ်ၽၢႆႇလင် ဢႃႉပၼႃး လႄႈ ႁဵတ်းတပ်ႉလဵဝ်ၵူၺ်းသေလႄႈ ၵိုတ်းသဝ်းယူႇၵႃႈၼိူဝ်ပၢႆလွႆဢေႃႈ။-

26မိူဝ်ႈၼၼ်ႉ ဢႃႉပၼႃး ႁွင်ႉသႅၼ်ႇၸူးတီႈ ယႂႃႇၽႃႉ လႄႈဝႃႈ၊ လၢပ်ႇလႅဝ်းတၵ်းလႆႈၶူပ်းၵိၼ်ယူႇတႃႇသေႇဢမ်ႇထၢတ်ႇႁိုဝ်။ ၵႃႈတီႈၵမ်းလိုၼ်းသုတ်းၼၼ်ႉ တၵ်းပဵၼ်ဢရႃႉသႃႇဢၼ်ၶူမ်ဢမ်ႇၸႂ်ႈႁိုဝ်။ မႂ်းယင်းဢမ်ႇၸီႇယၢင်ႇႁႂ်ႈၵူၼ်းတင်းလၢႆ လုၵ်ႉသေၵႃႈတီႈတၢင်းဢၼ် လိုပ်ႈၸွမ်းလမ်းၸွမ်းပီႈၼွင်ႉၶဝ်ၼၼ်ႉလႄႈ ၶိုၼ်းမိူဝ်းၵႂႃႇလႄႈ တၵ်းယူႇၶိင်ႇၵႃႇလႃႉႁိုင်ၵႃႈႁိုဝ်။ ဝႃႈၼင်ႇၼႆသေယဝ်ႉ၊-

27ယႂႃႇၽႃႉ လၢတ်ႈလႄႈဝႃႈ၊ ၵႃႈၼင်ႇဢၼ်ၽြႃးပဵၼ်ၸဝ်ႈဢသၢၵ်ႈလိပ်းယူႇၼၼ်ႉ၊ သင်မႂ်းဢမ်ႇလၢတ်ႈဢွၼ်တၢင်းၸိုင်၊ ၸႃႉၸဵမ်ၶိင်ႇၵၢင်ၼႂ်ၼၼ်ႉလႄႈ ၵူၼ်းတင်းလၢႆယင်းဢမ်ႇလိုပ်ႈၸွမ်းလမ်းၸွမ်းပီႈမၼ်းၼွင်ႉမၼ်းႁင်းၽႂ်ႁင်းမၼ်းလႄႈ တၵ်းၶိုၼ်းမိူဝ်းၵႂႃႇယဝ်ႉဢေႃႈ၊ ဝႃႈၼင်ႇၼႆသေလႄႈ၊-

28ယႂႃႇၽႃႉ ပဝ်ႇတိုင်ႈၶရႃႇလႄႈ ၵူၼ်းၵႃႈမီးၼၼ်ႉယင်းဢမ်ႇလိုပ်ႈၸွမ်းလမ်းၸွမ်းၵူၼ်းမဵဝ်း ဢီႉသရေႇလႃႉ ထႅင်ႈ၊ ယင်းဢမ်ႇတိုၵ်းတေႃးထႅင်ႈလႄႈယူႇသေဢေႃႈ။-

29ဢႃႉပၼႃး ဢိၵ်ႇတင်းၵူၼ်းမၼ်းၸိူဝ်းၼၼ်ႉ ၽႃႇလတ်းၵႂႃႇၵႃႈၼႂ်းပၢင်ႇပဵင်း ဢႃႇရၽႃႉ တင်းၶိုၼ်းလႄႈ ၶၢမ်ႈၼမ်ႉႁွင်ႈ ယေႃးတၢၼ်ႇ သေယဝ်ႉ၊ ၽႃႇလတ်းၵႃႈၼႂ်းမိူင်း ပီႉသရုၼ်ႇ ထၼ်ႈပေႃးသုတ်းလႄႈ ႁွတ်ႈထိုင်ၵႃႈတီႈဝဵင်း မႁႃႇၼိမ်ႇ ဢေႃႈ။

30ယႂႃႇၽႃႉ ၵေႃႈလုၵ်ႉသေၵႃႈတီႈဢၼ်လိုပ်ႈၸွမ်းလမ်းၸွမ်း ဢႃႉပၼႃး ၼၼ်ႉၶိုၼ်းမႃးလႄႈ မိူဝ်ႈဢၼ်မၼ်းႁႂ်ႈၵူၼ်းမၼ်း တင်းသဵင်ႈတင်းလူင်ၸူႉၵၼ်တုမ်ၵၼ်ၼၼ်ႉၸိုင်၊ လုတ်ႈၵႂႃႇၶႃႈၵူၼ်း တႃႇဝိတ်ႈ သိပ်းပၢႆၵဝ်ႈၵေႃႉ ဢိၵ်ႇတင်း ဢႃႇသႃႇႁေးလႃႉ ၼၼ်ႉဢေႃႈ။-

31ၶႃႈၵူၼ်း တႃႇဝိတ်ႈ ၸိူဝ်းၼၼ်ႉ တိုၵ်းတေႃးယႃႉပႅတ်ႈၵူၼ်းမဵဝ်း ပိၼ်ႇယႃႇမိၼ်ႇ ဢိၵ်ႇတင်းၵူၼ်း ဢႃႉပၼႃး ၸိူဝ်းၼၼ်ႉလႄႈ တၢႆသၢမ်ပၢၵ်ႇပၢႆႁူၵ်းသိပ်းဢေႃႈ။-

32ၶဝ်ဢွၼ်ၵၼ်ႁၢပ်ႇဢဝ်တူဝ်တၢႆ ဢႃႇသႃႇႁေးလႃႉ ၼၼ်ႉၵႂႃႇလႄႈ သၢင်းၵျူဝ်ႇၼႂ်းပႃႇႁဵဝ်ႈပေႃႈမၼ်း ဢၼ်မီးၵႃႈတီႈဝဵင်း ပႅတ်ႉလႁႅမ်ႇ ၼၼ်ႉဢေႃႈ။ ယႂႃႇၽႃႉ ဢိၵ်ႇတင်းၵူၼ်းမၼ်းၸိူဝ်းၼၼ်ႉ ဢွၼ်ၵၼ်ၵႂႃႇတင်းၶိုၼ်းလႄႈမိူင်းၸႃႉလႅင်းတီႈၶဝ် မိူဝ်ႈဢၼ်ၶဝ်ႁွတ်ႈထိုင်ၵႂႃႇၵႃႈတီႈ ဝဵင်း ႁေႇပြုၼ်ႇ ဢေႃႈ။

← Chapter 1 Jump to: Chapter 3 →