2 Samuel 13

Shan

← Chapter 12 Jump to: Chapter 14 →

1ၼႆလႄႈ ဢပႃႉသလုမ်ႇ လုၵ်ႈၸၢႆးၸဝ်ႈ တႃႇဝိတ်ႈ ၼၼ်ႉ မီးၼွင်ႉယိင်းဢၼ်ႁၢင်ႈလီဢၼ်လႆႈၸိုဝ်ႈ တႃႇမႃႇ ၼၼ်ႉၵေႃႉၼိုင်ႈဢေႃႈ။ ဢႃႇမၼုၼ်ႇ လုၵ်ႈၸၢႆးၸဝ်ႈ တႃႇဝိတ်ႈ ငိၼ်းႁၵ်ႉငိၼ်းပႅင်းမၼ်းၼၼ်ႉဢေႃႈ။-

2ဢႃႇမၼုၼ်ႇ ၼၼ်ႉယၢပ်ႇၸႂ်ယုင်ႈၸႂ်ထၼ်ႈပေႃးမၼ်းၸပ်းတၢင်းၶႆႈတၢင်းပဵၼ် ၵွပ်ႈပိူဝ်ႈၼွင်ႉယိင်းမၼ်း တႃႇမႃႇ ၼၼ်ႉဢေႃႈ။ လွင်ႈမၼ်းၸမ်ႉ မၼ်းၼၼ်ႉပဵၼ်သၢဝ်ၵၼ်ႇၺႃႇလႄႈ ဢႃႇမၼုၼ်ႇ ၵျၢမ်ႇပွင်လွင်ႈဢၼ် ဢလူဝ်ႇတၵ်းပျေႉၸုမ်ႇတီႈမၼ်းၸိူဝ်ႉၼင်ႇႁိုဝ်ၼၼ်ႉလႄႈ ဢမ်ႇပဵၼ်လႆႈ။-

3ၵူၺ်းၵႃႈ ဢႃႇမၼုၼ်ႇ မီးၵေႃႉသေႈဢၼ်လႆႈၸိုဝ်ႈ ယေႃးၼတပ်ႉ ဢၼ်ပဵၼ်လုၵ်ႈၸၢႆး သီႉမႃႇ ပီႈၸၢႆး တႃႇဝိတ်ႈ ၼၼ်ႉဢေႃႈ။ ယေႃးၼတပ်ႉ ၼၼ်ႉ ပဵၼ်ၵေႃႉဢၼ်လၵ်းလႅမ်ၼႃႇလူင်လၢင်ဢေႃႈ။-

4မၼ်းၼၼ်ႉထၢမ်လႄႈဝႃႈ၊ ၸဝ်ႈႁဝ်းၼႆႉပဵၼ်လုၵ်ႈၸၢႆးၶုၼ်ႁေႃၶမ်းယူႇလႄႈ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ ယွမ်ႁဵဝ်ႇၵႂႃႇယေႈဝၼ်းယေႈဢိတ်းယူႇၼင်ႇႁိုဝ်တီႈၶႃႈ။ ဢမ်ႇမွၵ်ႇလၢတ်ႈတီႈၶႃႈၸဝ်ႈတီႈၶႃႈႁိုဝ်၊ ဝႃႈၼင်ႇၼႆသေယဝ်ႉ၊ ဢႃႇမၼုၼ်ႇ ၶိုၼ်းလၢတ်ႈလႄႈဝႃႈ၊ ၵဝ်မီးၸႂ်ဢၼ်ၸပ်းဢၼ်ၸွႆး တႃႇမႃႇ ဢၼ်ပဵၼ်ၼွင်ႉယိင်း ဢပႃႉသလုမ်ႇ ၼွင်ႉၸၢႆးၵဝ်ၼၼ်ႉဢေႃႈ၊ ဝႃႈၼင်ႇၼႆဢေႃႈ။-

5ယေႃးၼတပ်ႉ ၵေႃႈလၢတ်ႈတီႈမၼ်းလႄႈဝႃႈ၊ ၼွၼ်းယဵတ်ႇယူႇဢိူၼ်လိူၼ် ၵႃႈၼိူဝ်ၵူႇတီႈၼွၼ်းၸဝ်ႈလႄႈ ႁဵတ်းၸိူဝ်ႉၼင်ႇႁၢင်ႈမီးတၢင်းၶႆႈတၢင်းပဵၼ်ၼၼ်ႉသေၵမ်းတီႈၶႃႈ။ မိူဝ်ႈဢၼ်ၸဝ်ႈပေႃႈၸဝ်ႈႁဝ်းမႃးလူမႃးတူၺ်းၼၼ်ႉၸိုင် တၵ်းလႆႈယွၼ်းဢၶႂၢင်ႉလႄႈဝႃႈ၊ ႁႂ်ႈၼွင်ႉယိင်းၶႃႈၸဝ်ႈ တႃႇမႃႇ ၼၼ်ႉ မႃးႁဵတ်းလဵင်ႉႁဵတ်းလူတီႈၶႃႈၸဝ်ႈသေၵမ်းတီႈၶႃႈ။ ႁႂ်ႈမၼ်းမႃးတူမ်ႈမႃးႁုင်ၵႃႈတီႈၽၢႆႇၼႃႈၶႃႈၸဝ်ႈၼႆႉ ႁႂ်ႈၶႃႈၸဝ်ႈလႆႈႁၼ်တၢင်းၵိၼ်တၢင်းၶူပ်း ဢၼ်မၼ်းႁုင်ၼၼ်ႉလႄႈ ၵိၼ်ၵႃႈတီႈမိုဝ်းမၼ်းသေၵမ်းတီႈၶႃႈ၊ ဝႃႈၼင်ႇၼႆလႄႈ၊-

6ဢႃႇမၼုၼ်ႇ ၼၼ်ႉ ၼွၼ်းယဵတ်ႇယူႇဢိူၼ်လိူၼ်ယူႇသေလႄႈ ႁဵတ်းမိူၼ်ၸိူဝ်ႉၼင်ႇႁၢင်ႈမီးတၢင်းၶႆႈတၢင်းပဵၼ်ၼၼ်ႉဢေႃႈ။ မိူဝ်ႈဢၼ်ၶုၼ်ႁေႃၶမ်းမႃးလူမႃးတူၺ်းၼၼ်ႉၸိုင်၊ ဢႃႇမၼုၼ်ႇ လဝ်ႊယွၼ်းဢၶႂၢင်ႉတီႈၶုၼ်ႁေႃၶမ်းလႄႈဝႃႈ၊ ႁႂ်ႈ တႃႇမႃႇ ၼွင်ႉယိင်းၶႃႈၸဝ်ႈၼၼ်ႉ မႃးလႄႈႁဵတ်းၶဝ်ႈမုၼ်းသွင်ၶႅပ်း ၵႃႈတီႈၽၢႆႇၼႃႈၶႃႈၸဝ်ႈ ႁႂ်ႈၶႃႈၸဝ်ႈလႆႈၵိၼ်ၵႃႈတီႈမိုဝ်းမၼ်းသေၵမ်းတီႈၶႃႈ၊ ဝႃႈၼင်ႇၼႆဢေႃႈ။

7တႃႇဝိတ်ႈ ပွႆႇၸႂ်ႉၵႂႃႇၵႃႈတီႈႁိူၼ်း တႃႇမႃႇ လႄႈ သင်ႇလၢတ်ႈလႄႈဝႃႈ၊ ၵႂႃႇၵႃႈတီႈႁိူၼ်းပီႈၸၢႆးမႂ်း ဢႃႇမၼုၼ်ႇ လႄႈ ႁုင်တၢင်းၵိၼ်တၢင်းၶူပ်းပၼ်တီႈမၼ်းသေၵမ်း၊ ဝႃႈၼင်ႇၼႆလႄႈ၊-

8တႃႇမႃႇ ၼၼ်ႉ ၵႂႃႇၸူးတီႈႁိူၼ်းပီႈၸၢႆးမၼ်း ဢႃႇမၼုၼ်ႇ လႄႈ မၼ်းၼၼ်ႉၼွၼ်းယဵတ်ႇယူႇဢိူၼ်လိူၼ်ဢေႃႈ။ တႃႇမႃႇ ဢဝ်ၽွင်ၶဝ်ႈမုၼ်းလႄႈၼူတ်ႈသေယဝ်ႉ ႁဵတ်းၶဝ်ႈမုၼ်းၶႅပ်းၵႃႈတီႈၽၢႆႇၼႃႈပီႈၸၢႆးမၼ်းလႄႈမူၵ်းဢေႃႈ။-

9မၼ်းဢဝ်ဝၢၼ်ႇၽႄလႄႈ ဢဝ်ထွၵ်ႇသႂ်ႇတမ်းပၼ်ၵႃႈတီႈၽၢႆႇၼႃႈ ဢႃႇမၼုၼ်ႇ သေၵေႃႈ၊ မၼ်းဢမ်ႇႁပ်ႉတုင်းဢဝ်ႁႂ်ႈလႆႈၵိၼ်လႄႈဝႃႈ၊ ႁႂ်ႈၵူၼ်းၵႃႈမီးဢွၼ်ၵၼ်ဢွၵ်ႇၵႂႃႇသေၵႃႈတီႈၵဝ်ၼႆႉသေၵမ်း၊ ဝႃႈၼင်ႇၼႆသေယဝ်ႉ၊ ၵူၼ်းၵႃႈမီးၼၼ်ႉ ဢွၼ်ၵၼ်ဢွၵ်ႇၵႂႃႇသေဢေႃႈ။-

10ဢႃႇမၼုၼ်ႇ လၢတ်ႈတီႈ တႃႇမႃႇ လႄႈဝႃႈ၊ ဢဝ်တၢင်းၵိၼ်ၼႆႉမႃးၵႃႈၼႂ်းလုၵ်း ႁႂ်ႈၵဝ်လႆႈၵိၼ်ၵႃႈတီႈမိုဝ်းမႂ်းသေၵမ်း၊ ဝႃႈၼင်ႇၼႆလႄႈ၊ တႃႇမႃႇ ဢဝ်ၶဝ်ႈမုၼ်းၶႅပ်းဢၼ်မၼ်းႁဵတ်းၸိူဝ်းၼၼ်ႉသေလႄႈ ၶဝ်ႈၵႂႃႇၵႃႈၼႂ်းလုၵ်းတီႈဢၼ် ပီႈၸၢႆးမၼ်း ဢႃႇမၼုၼ်ႇ မီးၼၼ်ႉဢေႃႈ။-

11မိူဝ်ႈဢၼ်မၼ်းဢဝ်ၵႂႃႇၸူးၵႃႈတီႈႁိမ်းမၼ်းၼၼ်ႉ ပုၼ်ႈဢၼ်မၼ်းၼၼ်ႉတၵ်းၵိၼ်ၼၼ်ႉၸိုင်၊ မၼ်းၼၼ်ႉတိုတ်ႉၸၼ်ဢဝ်မၼ်းသေလႄႈ လၢတ်ႈလႄႈဝႃႈ၊ ၼွင်ႉယိင်းၵဝ်ဢိူၺ်း၊ မႃးလႄႈၼွၼ်းလူၺ်ႈၵၼ်တင်းၵဝ်သေၵမ်း၊ ဝႃႈၼင်ႇၼႆဢေႃႈ။-

12မၼ်းၵေႃႈလၢတ်ႈတီႈမၼ်းၼၼ်ႉလႄႈဝႃႈ၊ ယႃႇပေႁဵတ်း။ ပီႈၸၢႆးၵဝ်ၶႃႈဢိူၺ်း၊ ယႃႇပေၶျႃးၵဝ်ၶႃႈတူၵ်းတီႈတႅမ်ႇသေၵမ်း။ ဢမ်ႇထုၵ်ႇလီႁဵတ်းဢမူႉၸိူဝ်ႉၼင်ႇၼႆၵႃႈၼႂ်းမဵဝ်း ဢီႉသရေႇလႃႉ ၵူၺ်ႉ။ ယႃႇပေႁဵတ်းဢမူႉဢၼ်ႁၢႆႉမိူၵ်ႈၼႆႉသေၵမ်း။-

13ပေႃးႁဵတ်းၸိုင်၊ ၵဝ်ၶႃႈၼႆႉတၵ်းဢဝ်တၢင်းဢၼ်လီဢူၵ်းလီဢၢႆၵဝ်ၶႃႈပႅတ်ႈၵႃႈတီႈလႂ်။ ၸဝ်ႈၵေႃႈတၵ်းပဵၼ်ၸိူဝ်ႉၼင်ႇၵေႃႉဢၼ်မိူၵ်ႈဢၼ်ယုတ်ႈၼၼ်ႉ ၵႃႈၼႂ်းမဵဝ်း ဢီႉသရေႇလႃႉ ဢေႃႈ။ ပိူဝ်ႈဢၼ်ပဵၼ်ၼင်ႇၼႆလႄႈ လဝ်ႊလၢတ်ႈတီႈၶုၼ်ႁေႃၶမ်းသေၵမ်း။ ပေႃးလဝ်ႊလၢတ်ႈၸိုင် မၼ်းၸဝ်ႈယင်းဢမ်ႇပၼ်ဢဝ်ၵၼ်လႄႈဢမ်ႇယူႇၵူၺ်ႉ၊ ဝႃႈၼင်ႇၼႆသေၵေႃႈ၊-

14မၼ်းၼၼ်ႉ ယင်းဢမ်ႇထွမ်ႇဢမ်ႇဢဝ်ၵႂၢမ်းမၼ်း။ ပိူဝ်ႈဢၼ်ႁႅင်းမၼ်းၼၼ်ႉယဵင်ႈၶႅၼ်းယႂ်ႇၼႃႇသေမၼ်းလႄႈ မၼ်းၼၼ်ႉႁဵတ်းပႄႉႁဵတ်းၼႅင်ႇသေလႄႈ ၼွၼ်းလူၺ်ႈၵၼ်တင်းမၼ်းဢေႃႈ။-

15မိူဝ်ႈၼၼ်ႉ ဢႃႇမၼုၼ်ႇ ၼၼ်ႉသမ်ႉ မီးၸႂ်ဢၼ်ငိၼ်းၸင်းဢၼ်ယႂ်ႇၼႃႇလူင်လၢင်လႄႈၸင်းမၼ်းဢေႃႈ။ တၢင်းဢၼ်ငိၼ်းၸင်းဢၼ်မၼ်းၸင်းၼၼ်ႉ ယဵင်ႈၶႅၼ်းယႂ်ႇၼႃႇသေ တၢင်းဢၼ်ငိၼ်းႁၵ်ႉ ဢၼ်မၼ်းႁၵ်ႉမိူဝ်ႈဢွၼ်တၢင်းၼၼ်ႉသေယဝ်ႉ၊ ဢႃႇမၼုၼ်ႇ လၢတ်ႈတီႈမၼ်းလႄႈဝႃႈ၊ မႂ်းလုၵ်ႉလႄႈၵႂႃႇသေတႃႉ၊ ဝႃႈၼင်ႇၼႆဢေႃႈ။-

16မၼ်းၵေႃႈလၢတ်ႈတီႈမၼ်းၼၼ်ႉလႄႈဝႃႈ၊ ဢမ်ႇမီးလွင်ႈမၼ်းၶႃႈ။ ဢပႅတ်ႈဢၼ်ႁေႃႈဢွၵ်ႇပႅတ်ႈမိူဝ်ႈလဵဝ်ၼႆႉၼၼ်ႉ ယဵင်ႈၶႅၼ်းယႂ်ႇၼႃႇသေဢပႅတ်ႈဢၼ်လႆႈႁဵတ်းမႃးတီႈၵဝ်ၶႃႈၼၼ်ႉၶႃႈဢေႃႈ၊ ဝႃႈၼင်ႇၼႆသေၵေႃႈ၊ မၼ်းၼၼ်ႉဢမ်ႇထွမ်ႇဢမ်ႇဢဝ်ၵႂၢမ်းမၼ်း။-

17မိူဝ်ႈၼၼ်ႉမၼ်းၼၼ်ႉႁွင်ႉဢဝ်ၶႃႈၸႂ်ႉၶႃႈသွႆၵေႃႉၼိုင်ႈလႄႈ ၸီႇယၢင်ႇဝႃႈ၊ ႁေႃႈမႄႈယိင်းၼႆႉဢွၵ်ႇပႅတ်ႈသေလႄႈ သွတ်ႇသႄႈၽၵ်းတူဝႆႉသေၵႃႈတီႈလိုၼ်းလင်မၼ်းတႃႉ၊ ဝႃႈၼင်ႇၼႆဢေႃႈ။-

18မၼ်းၼုင်ႈၶူဝ်းၼုင်ႈသိူဝ်ႈဢၼ်ယူင်ႉလီယၢဝ်းလီ ၸွမ်းၵႃႈၼင်ႇဢၼ်လုၵ်ႈယိင်းၶုၼ်ႁေႃၶမ်း ဢၼ်ပဵၼ်သၢဝ်ၵၼ်ႇၺႃႇၸၢင်ႈၼုင်ႈ ၼၼ်ႉယူႇဢေႃႈ။ ၶႃႈၸႂ်ႉၶႃႈသွႆၼၼ်ႉ ႁေႃႈမၼ်းဢွၵ်ႇလႄႈ သွတ်ႇသႄႈၽၵ်းတူဝႆႉသေၵႃႈတီႈလိုၼ်းလင်မၼ်းဢေႃႈ။-

19တႃႇမႃႇ ၵေႃႈ ဢဝ်တဝ်ႈတၢင်ႇသႂ်ႇၵႃႈၼိူဝ်ႁူဝ်မၼ်းသေလႄႈ သိၵ်ႇသိူဝ်ႈဢၼ်ယူင်ႉလီယၢဝ်းလီမၼ်းၼၼ်ႉသေယဝ်ႉ၊ ဢဝ်မိုဝ်းမၼ်းတၢင်ႇႁူဝ်မၼ်းယူႇ၊ ႁႆႈႁွင်ႉၸွမ်းတၢင်းယူႇသေလႄႈ ၶိုၼ်းမိူဝ်းၵႂႃႇဢေႃႈ။-

20ပီႈၸၢႆးဢွၵ်ႇမၼ်း ဢပႃႉသလုမ်ႇ ၵေႃႈ လၢတ်ႈတီႈမၼ်းလႄႈဝႃႈ၊ ပီႈၸၢႆးၵဝ် ဢႃႇမၼုၼ်ႇ ၼၼ်ႉ လႆႈမီးလူၺ်ႈၵၼ်တင်းမႂ်းယဝ်ႉႁိုဝ်။ ၵူၺ်းၵႃႈၼွင်ႉယိင်းၵဝ်ဢိူၺ်း၊ ယူႇတဵတ်ႇတဵတ်ႇယဵၼ်ယဵၼ်ယူႇတႃႉ။ မၼ်းၼၼ်ႉပဵၼ်ပီႈၸၢႆးမႂ်းဢေႃႈ။ ယႃႇပေဝႆႉၸႂ်လူၺ်ႈလွင်ႈဢမူႉၼႆႉ၊ ဝႃႈၼင်ႇၼႆသေယဝ်ႉ၊ တႃႇမႃႇ ယူႇတဵတ်ႇတဵတ်ႇယဵၼ်ယဵၼ်ယူႇၵႃႈတီႈႁိူၼ်းပီႈၸၢႆးမၼ်း ဢပႃႉသလုမ်ႇ ၼၼ်ႉဢေႃႈ။-

21မိူဝ်ႈဢၼ်ၶုၼ်လူင် တႃႇဝိတ်ႈ ႁူႉငိၼ်းလွင်ႈတၢင်းၵႃႈမီးၼၼ်ႉယဝ်ႉၼၼ်ႉၸိုင်၊ မၼ်းၸႂ်မႆႈၶႆႈၸႃႉၼႃႇလူင်လၢင်ဢေႃႈ။-

22ဢပႃႉသလုမ်ႇ ဢမ်ႇလၢတ်ႈၵႂၢမ်းဢၼ်လီဢၼ်ၸႃႉတီႈပီႈဢၢႆႈမၼ်း ဢႃႇမၼုၼ်ႇ ၼၼ်ႉ။ ၼႂ်းဝႃႈၼၼ်သေၵေႃႈ ဢပႃႉသလုမ်ႇ မီးၸႂ်ဢၼ်ဝႆႉတၢင်းၽိတ်းတီႈ ဢႃႇမၼုၼ်ႇ ၵွပ်ႈပိူဝ်ႈဢၼ်မၼ်းၼၼ်ႉ ၶျႃးၼွင်ႉယိင်းမၼ်း တႃႇမႃႇ တူၵ်းတီႈတႅမ်ႇၼၼ်ႉဢေႃႈ။

23လိုၼ်းၼၼ်ႉ မိူဝ်ႈဢၼ်လႆႈသွင်ပီႊတဵမ်တဵမ်ယဝ်ႉၸိုင်၊ ဢပႃႉသလုမ်ႇ ၶၢမ်ႇပွႆးၵႅတ်းႁႆးၶူၼ်သူဝ်းၵႃႈတီႈဝၢၼ်ႈ ပႃႇလႃႉႁႃႇၸေႃႇ ၵႃႈတီႈႁိမ်းဝဵင်း ဢေႇၽရိမ်ႇ ၼၼ်ႉလႄႈ ဢပႃႉသလုမ်ႇ ႁွင်ႉပၢင်းဢဝ်လုၵ်ႈၸၢႆးၸဝ်ႈၶုၼ်ႁေႃၶမ်းတင်းသဵင်ႈတင်းလူင်ဢေႃႈ။-

24ဢပႃႉသလုမ်ႇ ၵေႃႈ ၶဝ်ၸူးၵႃႈတီႈၶုၼ်ႁေႃၶမ်းလႄႈလဝ်ႊလၢတ်ႈလႄႈဝႃႈ၊ တူၺ်းတီႈၶႃႈလူး။ ၶႃႈၸဝ်ႈႁဝ်းၼႆႉၶၢမ်ႇပွႆးၵႅတ်းႁႆးၶူၼ်သူဝ်းတီႈၶႃႈဢေႃႈ။ ၶႅၼ်းတေႃႈၸဝ်ႈပဵၼ်ၸဝ်ႈ ဢိၵ်ႇတင်းၶႃႈၸဝ်ႈတင်းလၢႆဢွၼ်ၵၼ်ၸွမ်းလူၺ်ႈၵၼ်တင်းၶႃႈၸဝ်ႈႁဝ်းၼႆႉၵႂႃႇသေၵမ်းတီႈၶႃႈ၊ ဝႃႈၼင်ႇၼႆသေယဝ်ႉ၊-

25ၶုၼ်ႁေႃၶမ်းၵေႃႈလၢတ်ႈတီႈ ဢပႃႉသလုမ်ႇ လႄႈဝႃႈ၊ ဢမ်ႇထုၵ်ႇလီၵႂႃႇၵူၺ်ႉ၊ လုၵ်ႈၸၢႆးၵဝ်ဢိူၺ်း၊ ယႃႇပေႁႂ်ႈႁဝ်းလႆႈၵႂႃႇတင်းသဵင်ႈတင်းမူတ်း။ ၵူဝ်ႁဝ်းတၵ်းပဵၼ်တၢင်းဢၼ်ၼၵ်းၼႃပႃးပၼ်တီႈမႂ်းဢေႃႈ၊ ဝႃႈၼင်ႇၼႆသေလႄႈ မၼ်းၸူဝ်းဢဝ်မၼ်းၸဝ်ႈသေၵေႃႈ၊ တူဝ်မၼ်းၸဝ်ႈယင်းဢမ်ႇၵႂႃႇလႄႈ ပၼ်တၢင်းလီသေဢေႃႈ။-

26ဢပႃႉသလုမ်ႇ ၵေႃႈ လဝ်ႊလၢတ်ႈထႅင်ႈလႄႈဝႃႈ၊ ပေႃးၸဝ်ႈႁဝ်းဢမ်ႇၸွမ်းဢမ်ႇၵႂႃႇတီႈၶႃႈၸိုင်၊ ပၼ်ဢၶႂၢင်ႉဢၼ်ပီႈၸၢႆးၶႃႈၸဝ်ႈ ဢႃႇမၼုၼ်ႇ ၼၼ်ႉ လႆႈၸွမ်းလႆႈၵႂႃႇသေၵမ်းတီႈၶႃႈ၊ မိူဝ်ႈဢၼ်ဝႃႈၼင်ႇၼႆၸိုင်၊ ၶုၼ်ႁေႃၶမ်းလၢတ်ႈတီႈမၼ်းလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ တၵ်းလႆႈႁႂ်ႈမၼ်းၸွမ်းလူၺ်ႈၵၼ်တင်းမႂ်းၵႂႃႇၼင်ႇႁိုဝ်။ ဝႃႈၼင်ႇၼႆသေၵေႃႈ၊-

27ဢပႃႉသလုမ်ႇ တုၵ်းတဝ်ၼႃႇလူင်လၢင်လႄႈ ၶုၼ်လူင်ပၼ်ဢၶႂၢင်ႉဢၼ် ၸႃႉၸဵမ် ဢႃႇမၼုၼ်ႇ လႄႈ လုၵ်ႈၸၢႆးၸဝ်ႈၵႃႈမီးၼၼ်ႉ လႆႈၸွမ်းဢေႃႈ။

28ဢပႃႉသလုမ်ႇ ၵေႃႈသင်ႇလၢတ်ႈဝႆႉတီႈၶႃႈမၼ်းၵူၼ်းမၼ်းတင်းလၢႆလႄႈဝႃႈ၊ သူဢွၼ်ၵၼ်ပႂ်ႉထႃႈၶိင်ႇမိူဝ်ႈဢၼ် ဢႃႇမၼုၼ်ႇ တၵ်းသႂၢင်ႇသိူဝ်းမူၼ်ႈပျေႃႇလူၺ်ႈၼမ်ႉၸပိတ်ႈၼၼ်ႉတႃႉ။ မိူဝ်ႈဢၼ်ၵဝ်လၢတ်ႈတီႈသူလႄႈဝႃႈ၊ ဢွၼ်ၵၼ်တႅင်း ဢႃႇမၼုၼ်ႇ တၢႆတႃႉ၊ ဝႃႈၼင်ႇၼႆၼၼ်ႉၸိုင်၊ ဢဝ်မၼ်းတၢႆတႃႉ။ ယႃႇပေၵူဝ်။ ၵဝ်ၸီႇယၢင်ႇဢမ်ႇၸႂ်ႈႁိုဝ်။ ဢဝ်ႁႅင်းလႄႈ မီးတၢင်းဢၼ်ႁတ်းႁၢၼ်တႃႉ၊ ဝႃႈၼင်ႇၼႆလႄႈ၊-

29ၶႃႈၵူၼ်း ဢပႃႉသလုမ်ႇ ၸိူဝ်းၼၼ်ႉ ဢွၼ်ၵၼ်ႁဵတ်းတီႈ ဢႃႇမၼုၼ်ႇ ၸွမ်းၵႃႈၼင်ႇဢၼ် ဢပႃႉသလုမ်ႇ သင်ႇလၢတ်ႈဝႆႉၼၼ်ႉဢေႃႈ။ မိူဝ်ႈၼၼ်ႉ လုၵ်ႈၸၢႆးၸဝ်ႈၶုၼ်ႁေႃၶမ်းၵႃႈမီးၼၼ်ႉ ဢွၼ်ၵၼ်လုၵ်ႉလႄႈ ၶီႇလီႈၶဝ်သေလႄႈဢွၵ်ႇပၢႆႈဢေႃႈ။-

30မိူဝ်ႈဢၼ်ၶဝ်ယင်းတိုၵ်ႉၸွမ်းတၢင်းမႃးယူႇၼၼ်ႉၸိုင်၊ သတၢင်းသဵင်ၶၢဝ်ႇႁွတ်ႈထိုင်တီႈ တႃႇဝိတ်ႈ လႄႈဝႃႈ၊ ဢပႃႉသလုမ်ႇ ၼၼ်ႉ ဢဝ်လုၵ်ႈၸၢႆးၸဝ်ႈၶုၼ်လူင်တင်းသဵင်ႈတင်းလူင်တၢႆယဝ်ႉ။ ဢမ်ႇၵိုတ်းဢမ်ႇၵျၢၼ်ႇဝႆႉသေၵေႃႉသေၵူၼ်း၊ ဝႃႈၼင်ႇၼႆဢေႃႈ။-

31မိူဝ်ႈၼၼ်ႉၶုၼ်ႁေႃၶမ်းလုၵ်ႉလႄႈ သိၵ်ႇၶူဝ်းၼုင်ႈမၼ်းသေလႄႈ ၼွၼ်းယဵတ်ႇယူႇၵႃႈၼိူဝ်လိၼ်ဢေႃႈ။ ၶႃႈၵူၼ်းၸဝ်ႈၵႃႈမီးၵေႃႈ သိၵ်ႇၶူဝ်းၼုင်ႈၶဝ်သေလႄႈ ဢွၼ်ၵၼ်ၸုၵ်းယူႇၵႃႈတီႈႁိမ်းမၼ်းဢေႃႈ။-

32ယေႃးၼတပ်ႉ လုၵ်ႈၸၢႆး သီႉမႃႇ ပီႈၸၢႆး တႃႇဝိတ်ႈ ၼၼ်ႉ လဝ်ႊလၢတ်ႈလႄႈဝႃႈ၊ ယႃႇပေယုမ်ႇလွင်ႈဢၼ်ဢဝ်လုၵ်ႈၸၢႆးၸဝ်ႈၶုၼ်လူင်ၵႃႈမီး တၢႆၼၼ်ႉသေၵမ်းတီႈၶႃႈ၊ ဢႃႇမၼုၼ်ႇ ၵေႃႉလဵဝ်ၵူၺ်း တၢႆယဝ်ႉတီႈၶႃႈဢေႃႈ။ ၸႃႉၸဵမ်ဝၼ်းဢၼ်မၼ်းၼၼ်ႉ ၶျႃး တႃႇမႃႇ ၼွင်ႉယိင်းမၼ်းတူၵ်းတီႈတႅမ်ႇၼၼ်ႉလႄႈ ဢပႃႉသလုမ်ႇ ၸီႇယၢင်ႇဢမူႉၼႆႉတီႈၶႃႈယဝ်ႉ။-

33မိူဝ်ႈလဵဝ်ၼႆႉ၊ ၸဝ်ႈႁဝ်းၶႃႈၸဝ်ႈၶုၼ်လူင်၊ ယႃႇပေဢဝ်သႂ်ႇၸႂ်လႄႈထၢင်ႇထိူမ်လွင်ႈဢၼ် လုၵ်ႈၸၢႆးၸဝ်ႈၶုၼ်လူင်တင်းသဵင်ႈတင်းမူတ်းၼၼ်ႉ တၢႆယဝ်ႉၼၼ်ႉသေၵမ်းတီႈၶႃႈ၊ ဢႃႇမၼုၼ်ႇ ၵေႃႉလဵဝ်ၵူၺ်း တၢႆယဝ်ႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။-

34ဢပႃႉသလုမ်ႇ ၵေႃႈဢွၵ်ႇပၢႆႈၵႂႃႇသေဢေႃႈ။ မိူဝ်ႈၼၼ်ႉ ၵူၼ်းဢွၼ်ႇဢၼ်ပႂ်ႉၵၢင်ၼၼ်ႉ မုင်ႈတူၺ်းလႄႈႁၼ်ၵူၼ်းၼမ်ၼႃႇ ၸွမ်းသဵၼ်ႈတၢင်းပဵမ်ႉလွႆမႃး ၵႃႈတီႈၽၢႆႇတၢင်းလင်မၼ်းဢေႃႈ။-

35ယေႃးၼတပ်ႉ ၵေႃႈလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ တူၺ်းတီႈၶႃႈလူး။ လုၵ်ႈၸၢႆးၸဝ်ႈၶုၼ်လူင်ၸိူဝ်းၼၼ်ႉ ဢွၼ်ၵၼ်မႃးတီႈၶႃႈယဝ်ႉ။ ၵႂၢမ်းဢၼ်ၶႃႈၸဝ်ႈႁဝ်းလဝ်ႊလၢတ်ႈၼၼ်ႉ ၸႂ်ႈတီႈၶႃႈဢေႃႈ၊ ဝႃႈၼင်ႇၼႆလႄႈ၊-

36မိူဝ်ႈဢၼ်မၼ်းလဝ်ႊလၢတ်ႈၸိူဝ်ႉၼင်ႇၼၼ်ယဝ်ႉတူဝ်ႈယဝ်ႉၼၼ်ႉ၊ လုၵ်ႈၸၢႆးၸဝ်ႈၶုၼ်ႁေႃၶမ်းၸိူဝ်းၼၼ်ႉ ဢွၼ်ၵၼ်ႁွတ်ႈမႃးလႄႈ ၵိဝ်သဵင်ယူႇသေလႄႈႁႆႈႁွင်ႉဢေႃႈ။ ၶုၼ်ႁေႃၶမ်းဢိၵ်ႇတင်းၶႃႈၵူၼ်းၸဝ်ႈၸိူဝ်းၼၼ်ႉ ဢွၼ်ၵၼ်ႁႆႈႁွင်ႉၼႃႇလူင်လၢင်ဢေႃႈ။

37ဢပႃႉသလုမ်ႇ ၼၼ်ႉ ဢွၵ်ႇပၢႆႈလႄႈၵႂႃႇၸူးၵႃႈတီႈ တႃႇလမေး လုၵ်ႈၸၢႆး ဢမီႉႁုတ်ႉ ၶုၼ်လူင် ၵေႇသူႉရႃႉ ၼၼ်ႉဢေႃႈ။ တႃႇဝိတ်ႈ ႁႆႈႁွင်ႉပွင်ႉၶၢင်းၵွပ်ႈပိူဝ်ႈလုၵ်ႈၸၢႆးၸဝ်ႈၼၼ်ႉယူႇ ၵူႈမိုဝ်ႉၵူႈဝၼ်းဢေႃႈ။-

38ၼင်ႇၼၼ်လႄႈ ဢပႃႉသလုမ်ႇ ဢွၵ်ႇပၢႆႈလႄႈၵႂႃႇၸူးၵႃႈတီႈဝဵင်း ၵေႇသူႉရႃႉ သေလႄႈ ယူႇၵႃႈတီႈၼၼ်ႈသၢမ်ပီႊဢေႃႈ။-

39ၶုၼ်လူင် တႃႇဝိတ်ႈ ၸႂ်ထိုင်ၸႂ်ႁွတ်ႈ ဢပႃႉသလုမ်ႇ သေလႄႈယူႇဢေႃႈ။ လွင်ႈမၼ်းၸမ်ႉ မၼ်းပေႇၸႂ်လူၺ်ႈလွင်ႈ ဢႃႇမၼုၼ်ႇ ၵွပ်ႈပိူဝ်ႈဢၼ်မၼ်းတၢႆၼၼ်ႉယဝ်ႉယဝ်ႉ။

← Chapter 12 Jump to: Chapter 14 →