2 Samuel 5

Shan

← Chapter 4 Jump to: Chapter 6 →

1မိူဝ်ႈၼၼ်ႉ မဵဝ်း ဢီႉသရေႇလႃႉ တင်းသဵင်ႈတင်းလူင်ဢွၼ်ၵၼ်မႃးၸူးတီႈ တႃႇဝိတ်ႈ ၵႃႈတီႈဝဵင်း ႁေႇပြုၼ်ႇ ၼၼ်ႉသေလႄႈ လဝ်ႊလၢတ်ႈလႄႈဝႃႈ၊ ၶႃႈၸဝ်ႈၸိူဝ်းၼႆႉ ပဵၼ်လုပ်ႇၸဝ်ႈႁဝ်းၼိူဝ်ႉၸဝ်ႈႁဝ်းတီႈၶႃႈဢေႃႈ။-

2မိူဝ်ႈဢွၼ်ၼႆႉ၊ မိူဝ်ႈဢၼ် သေႃးလူႉ ပဵၼ်ၶုၼ်ႁေႃၶမ်းၶႃႈၸဝ်ႈၶဝ်ယူႇၼၼ်ႉ၊ ၸဝ်ႈႁဝ်းၼႆႉဢွၼ်ဢဝ်မဵဝ်း ဢီႉသရေႇလႃႉ ၵႂႃႇယူႇ၊ ဢွၼ်ဢဝ်ၶိုၼ်းသႂၢင်းၶဝ်ႈယူႇသေလႄႈ ယူႇမႃးယဝ်ႉတီႈၶႃႈယဝ်ႉ။ ထႃႇဝရႃႉၽြႃးၵေႃႈမီးဢမိင်ႉၸဝ်ႈတီႈၸဝ်ႈႁဝ်းလႄႈဝႃႈ၊ မႂ်းတၵ်းလႆႈႁဵတ်းလဵင်ႉႁဵတ်းလူၵူၼ်းၵဝ်မဵဝ်း ဢီႉသရေႇလႃႉ လႄႈ ပဵၼ်ငဝ်ႈပဵၼ်ႁူဝ်မဵဝ်း ဢီႉသရေႇလႃႉ ဢေႃႈ၊ ဝႃႈၼင်ႇၼႆဝႆႉတီႈၶႃႈယဝ်ႉ၊ ဝႃႈၼင်ႇၼႆဢေႃႈ။-

3ၼင်ႇၼၼ်လႄႈ ၵူၼ်းဢၼ်ပဵၼ်ၵႄႇပဵၼ်ႁူဝ်ၼႂ်းမဵဝ်း ဢီႉသရေႇလႃႉ တင်းလၢႆၼၼ်ႉ ဢွၼ်ၵၼ်မႃးၸူးတီႈၶုၼ်ႁေႃၶမ်း ၵႃႈတီႈဝဵင်း ႁေႇပြုၼ်ႇ ၼၼ်ႉသေယဝ်ႉ၊ ၶုၼ်လူင် တႃႇဝိတ်ႈ ႁဵတ်းမိၵ်ႉသႃႇႁႃယႃႉလူၺ်ႈၵၼ်တင်းၶဝ် ၵႃႈတီႈၽၢႆႇၼႃႈထႃႇဝရႃႉၽြႃး ၵႃႈၼႂ်းဝဵင်း ႁေႇပြုၼ်ႇ လႄႈ ၶဝ်ၼၼ်ႉဢွၼ်ၵၼ်ပၼ်ၽိၵ်ႈသိၵ်ႈတီႈ တႃႇဝိတ်ႈ လႄႈ ႁႂ်ႈမၼ်းပဵၼ်ၶုၼ်ႁေႃၶမ်း ဢီႉသရေႇလႃႉ ဢေႃႈ။

4မိူဝ်ႈဢၼ် တႃႇဝိတ်ႈ ၸႃႉၼင်ႈႁၢင်ႈၼင်ႈႁေႃၼၼ်ႉၸိုင် ဢသၢၵ်ႈမၼ်းလႆႈသၢမ်သိပ်းပီႊလႄႈမၼ်းဢုပ်ႉပိူင်ႇၸၢမ်ႇၸႃးသီႇသိပ်းပီႊဢေႃႈ။-

5မၼ်းယူႇၵႃႈတီႈဝဵင်း ႁေႇပြုၼ်ႇ သေလႄႈ ဢုပ်ႉပိူင်ႇၸၢမ်ႇၸႃးမိူင်း ယူႉတႃႉ ၸဵတ်းပီႊပၢႆႁူၵ်းလိူၼ်ဢေႃႈ။ မၼ်းယူႇၵႃႈတီႈဝဵင်း ယေႇရူႉသလႅမ်ႇ သေလႄႈဢုပ်ႉပိူင်ႇၸၢမ်ႇၸႃးမိူင်း ယူႉတႃႉ တင်းမိူင်း ဢီႉသရေႇလႃႉ တင်းသဵင်ႈတင်းမူတ်းၼၼ်ႉ သၢမ်သိပ်းပၢႆသၢမ်ပီႊဢေႃႈ၊-

6လႆႈသမ်ႉ ၶုၼ်ႁေႃၶမ်းပႃးဢဝ်ၵူၼ်းမၼ်းတင်းလၢႆသေလႄႈ ၶီႇသိုၵ်းၵႂႃႇၸူးၵႃႈတီႈဝဵင်း ယေႇရူႉသလႅမ်ႇ တီႈၵူၼ်း ယေႇပူႉသီႉ ဢၼ်ပဵၼ်ၵူၼ်းဝၢၼ်ႈၵူၼ်းမိူင်းၵဝ်ႇၵဝ်ႇၼၼ်ႉလႄႈ၊ ၶဝ်ၼၼ်ႉလၢတ်ႈတီႈ တႃႇဝိတ်ႈ လႄႈဝႃႈ၊ မႂ်းဢမ်ႇလႆႈၶဝ်ႈၵႃႈၼႂ်းတီႈၼႆႉ၊ ၵွမ်ႉၵႃႈၶဝ်ၸိူဝ်းဢၼ်တႃမွတ်ႇ ဢိၵ်ႇတင်းၶဝ်ၸိူဝ်းဢၼ်တိၼ်ၵႅင်ႉၼၼ်ႉၵူၺ်း တၵ်းႁေႃႈမႂ်းဢွၵ်ႇပႅတ်ႈဢေႃႈ။ လွင်ႈဢၼ်ၶႂ်ႈဝႃႈၼၼ်ႉၸမ်ႉ၊ တႃႇဝိတ်ႈ ဢမ်ႇၶဝ်ႈၵႃႈၼႂ်းလႆႈ၊ ဝႃႈၼင်ႇၼႆဢေႃႈ။-

7ၼႂ်းဝႃႈၼၼ်သေၵေႃႈ တႃႇဝိတ်ႈ တိုၵ်းဢဝ်တိူၵ်ႈတီႈတိုၵ်းသိုၵ်း ၸီႉဢုၼ်ႇ ဢၼ်ဝႃႈဝဵင်း တႃႇဝိတ်ႈ ၼၼ်ႉဢေႃႈ။-

8ၼႂ်းဝႃႈၼၼ်၊ တႃႇဝိတ်ႈ လၢတ်ႈလႄႈဝႃႈ၊ ႁႂ်ႈၶဝ်ၸိူဝ်းဢၼ်တိုၵ်းတေႃးယႃႉပႅတ်ႈ ၵူၼ်း ယေႇပူႉသီႉ ၸိူဝ်းၼၼ်ႉ ၵူႈၵေႃႉၵူႈၵူၼ်း ဢွၼ်ၵၼ်ဢဝ်ၶဝ်ၸိူဝ်းဢၼ် တိၼ်ၵႅင်ႉဢိၵ်ႇတင်းၶဝ်ၸိူဝ်းဢၼ်တႃမွတ်ႇ ဢၼ် တႃႇဝိတ်ႈ ၶၢၼ်ႉႁၼ်ၸိူဝ်းၼၼ်ႉ ထိမ်ႈတူၵ်းၵႃႈၼႂ်းႁွင်ႈၼႂ်းၶူးသေ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈမီးၵႂၢမ်းဢပုမ်ႇဢၼ်ဝႃႈ၊ ၶဝ်ၸိူဝ်းဢၼ်တႃမွတ်ႇ တင်းၶဝ်ၸိူဝ်းဢၼ်တိၼ်ၵႅင်ႉၸိူဝ်းၼၼ်ႉ ဢမ်ႇလႆႈၶဝ်ႈၵႃႈၼႂ်းႁိူၼ်းၼႂ်းယေး၊ ဝႃႈၼင်ႇၼႆဢေႃႈ။-

9လိုၼ်းၼၼ်ႉ တႃႇဝိတ်ႈ ယူႇၵႃႈၼႂ်းတိူၵ်ႈတီႈတိုၵ်းသိုၵ်းၼၼ်ႉလႄႈ ႁွင်ႉႁဵၵ်ႈၸိုဝ်ႈ ဝဵင်း တႃႇဝိတ်ႈ ဢေႃႈ။ တႃႇဝိတ်ႈ တႄႇႁဵတ်းၵႃႈတီႈႁိမ်းႁွမ်းလဵပ်ႈႁွပ်ႈ ၸႃႉၸဵမ်ၵႃႈတီႈ မီႉလေႃႇ လႄႈ ၵႃႈတီႈတၢင်းၼႂ်းၸိူဝ်းၼၼ်ႉဢေႃႈ။-

10တႃႇဝိတ်ႈ ယႂ်ႇၽႄႈတူဝ်းတွၼ်းမႃးယူႇသေလႄႈ ၸဝ်ႈပူဝ်ႇပႃႇၵၢင်ႁၢဝ်ၽြႃးပဵၼ်ၸဝ်ႈ ထႃႇဝရႃႉၽြႃးမီးယူႇလူၺ်ႈၵၼ်တင်းမၼ်းဢေႃႈ။

11ႁီႉရမ်ႇ ၶုၼ်လူင် တူႉရူႉ ပွႆႇၸႂ်ႉသၢၼ်ႇတမၢၼ်ႇ ဢိၵ်ႇလူၺ်ႈၵၼ်တင်းမႆႉ ဢႃႇရိတ်ႉ တင်းလၢၵ်ႈသမႃး၊ ၵူၼ်းမေႃတႄႇတိူၵ်ႈႁဵတ်းတိူၵ်ႈတင်းလၢႆမႃးၸူးၵႃႈတီႈ တႃႇဝိတ်ႈ လႄႈ ၶဝ်ၼၼ်ႉတႄႇႁဵတ်းႁေႃၸဝ်ႈ ပုၼ်ႈ တႃႇဝိတ်ႈ ဢေႃႈ။-

12တႃႇဝိတ်ႈ ႁူႉႁၼ်လွင်ႈဢၼ်ထႃႇဝရႃႉၽြႃး ႁႂ်ႈမၼ်းပဵၼ်ဢၼ်မၼ်ႈဢၼ်ၶိူင်ႇယူႇၵႃႈၼႂ်းဢရႃႇၶုၼ်ႁေႃၶမ်း ဢီႉသရေႇလႃႉ ဢိၵ်ႇတင်းလွင်ႈဢၼ်မၼ်းၸဝ်ႈယုၵ်ႉယွင်ႈသိုင်ႇၸိုင်ႈဝၢၼ်ႈမိူင်းမၼ်းၸဝ်ႈ ႁႂ်ႈပဵၼ်ပုၼ်ႈၵူၼ်းမၼ်းၸဝ်ႈ မဵဝ်း ဢီႉသရေႇလႃႉ ၼၼ်ႉဢေႃႈ-။

13တႃႇဝိတ်ႈ သမ်ႉဢဝ်မေးလူင်မေးဢွၼ်ႇ ၵူၼ်းယိင်းဝဵင်း ယေႇရူႉသလႅမ်ႇ တင်းလၢႆထႅင်ႈ လိုၼ်းသေဢၼ်မၼ်းၶၢႆႉသေၵႃႈတီႈဝဵင်း ႁေႇပြုၼ်ႇ ၼၼ်ႉယဝ်ႉၼၼ်ႉသေယဝ်ႉ၊ သမ်ႉလႆႈလုၵ်ႈၸၢႆးလုၵ်ႈယိင်းထႅင်ႈဢေႃႈ။-

14ၸိုဝ်ႈသဵင်လုၵ်ႈၸၢႆး ဢၼ် တႃႇဝိတ်ႈ လႆႈၵႃႈတီႈဝဵင်း ယေႇရူႉသလႅမ်ႇ ၼၼ်ႉၸမ်ႉ၊ ပဵၼ် သမႂႃႇ၊ သေႃးပပ်ႉ၊ ၼႃႇသၼ်ႇ၊ သေႃးလမုၼ်ႇ ၊-

15ဢီႉပႁႃႇ၊ ဢေးလီႉသႂႃႉ၊ ၼေႇၽႅတ်ႉ၊ ယႃႇၽျႃႇ ၊-

16ဢေးလီႉသမႃႇ၊ ဢေးလျႃႇတႃႉ၊ ဢေးလီႉၽလႅတ်ႉ ဢေႃႈ။

17မိူဝ်ႈဢၼ်ၵူၼ်း ၽီႉလိတ်ႉတီႉ တင်းလၢႆ ငိၼ်းလွင်ႈဢၼ်ပၼ်ၽိၵ်ႈသိၵ်ႈတီႈ တႃႇဝိတ်ႈ လႄႈ ႁႂ်ႈပဵၼ်ၶုၼ်ႁေႃၶမ်း ဢီႉသရေႇလႃႉ ၼၼ်ႉၸိုင်၊ ၵူၼ်း ၽီႉလိတ်ႉတီႉ တင်းသဵင်ႈတင်းလူင် ဢွၼ်ၵၼ်ၶီႇသိုၵ်းမႃး ႁႂ်ႈလႆႈႁႃ တႃႇဝိတ်ႈ ဢေႃႈ။ တႃႇဝိတ်ႈ ငိၼ်းလွင်ႈမၼ်းသေယဝ်ႉ၊ လူင်းၸူးၵႃႈတီႈတိူၵ်ႈ တီႈတိုၵ်းသိုၵ်းဢေႃႈ။-

18ၵူၼ်း ၽီႉလိတ်ႉတီႉ ၸိူဝ်းၼၼ်ႉ မႃးလႄႈယူႇၸွတ်ႇတူဝ်ႈၵႃႈတီႈပၢင်ႇႁူၺ်ႈ ရေႇၽဵမ်ႇ ဢေႃႈ။-

19တႃႇဝိတ်ႈ ၵေႃႈလဝ်ႊထၢမ်တီႈထႃႇဝရႃႉၽြႃးလႄႈဝႃႈ၊ ၶႃႈၸဝ်ႈတၵ်းလႆႈၶိုၼ်ႈၸူးၵႃႈတီႈၵူၼ်း ၽီႉလိတ်ႉတီႉ ၸိူဝ်းၼၼ်ႉတီႈၶႃႈႁိုဝ်။ ၸဝ်ႈႁဝ်းတၵ်းဢဝ်ၶဝ်ဢၢပ်ႈပၼ်ၵႃႈၼႂ်းမိုဝ်းၶႃႈၸဝ်ႈတီႈၶႃႈႁိုဝ်။ ဝႃႈၼင်ႇၼႆသေယဝ်ႉ၊ ထႃႇဝရႃႉၽြႃးမီးဢမိင်ႉတီႈ တႃႇဝိတ်ႈ လႄႈဝႃႈ၊ ၶိုၼ်ႈၸူးတႃႉ။ ၵဝ်တၵ်းဢဝ်ၵူၼ်း ၽီႉလိတ်ႉတီႉ ၸိူဝ်းၼၼ်ႉ ဢၢပ်ႈပၼ်ၵႃႈၼႂ်းမိုဝ်းမႂ်းဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆလႄႈ၊-

20တႃႇဝိတ်ႈ ၵႂႃႇၸူးၵႃႈတီႈဝဵင်း ပႃႇလႃႉပေႇရၸိမ်း လႄႈ တႃႇဝိတ်ႈ တိုၵ်းတေႃးယႃႉပႅတ်ႈၶဝ်ၵႃႈတီႈၼၼ်ႈသေယဝ်ႉ၊ လၢတ်ႈလႄႈဝႃႈ၊ ထႃႇဝရႃႉၽြႃးၵိူၼ်ႇယႃႉပႅတ်ႈရၢၼ်ႇသူႇၵဝ်ၵႃႈတီႈၽၢႆႇၼႃႈၵဝ် မိူၼ်ၸိူဝ်ႉၼင်ႇဢၼ်ၼမ်ႉလူၵ်ႈလႄႈၵိူၼ်ႇယႃႉပႅတ်ႈၼၼ်ႉယဝ်ႉ၊ ဝႃႈၼင်ႇၼႆသေလႄႈ ႁွင်ႉႁဵၵ်ႈၸိုဝ်ႈတီႈၼၼ်ႈ ပႃႇလႃႉပေႇရၸိမ်း ဢေႃႈ။-

21ၶဝ်ၼၼ်ႉပႅတ်ႈရုၵ်ႈထူႉၶဝ်ဝႆႉၵႃႈတီႈၼၼ်ႈလႄႈ တႃႇဝိတ်ႈ ဢိၵ်ႇတင်းၵူၼ်းမၼ်းၸိူဝ်းၼၼ်ႉ ဢွၼ်ၵၼ်ဢဝ်ၸိူဝ်းၼၼ်ႉၵႂႃႇဢေႃႈ၊

22လႆႈသမ်ႉ ပွၵ်ႈၼိုင်ႈ ၵူၼ်း ၽီႉလိတ်ႉတီႉ တင်းလၢႆ ဢွၼ်ၵၼ်မႃးထႅင်ႈလႄႈ ယူႇၸွတ်ႇတူဝ်ႈၵႃႈတီႈပၢင်ႇႁူၺ်ႈ ရေႇၽဵမ်ႇ ဢေႃႈ။-

23တႃႇဝိတ်ႈ ၵေႃႈ လဝ်ႊထၢမ်တီႈထႃႇဝရႃႉၽြႃးသေယဝ်ႉ၊ မၼ်းၸဝ်ႈမီးဢမိင်ႉလႄႈဝႃႈ၊ မႂ်းဢမ်ႇလႆႈၶိုၼ်ႈၸူး၊ တၵ်းလႆႈလဵပ်ႈႁွပ်ႈၽၢႆႇလင်ၶဝ်လႄႈ ၶီႇၵႂႃႇၽၢႆႇၼိုင်ႈပႃႇမႆႉမွၼ်း ၸူးၶဝ်ဢေႃႈ။-

24မိူဝ်ႈဢၼ်မႂ်းငိၼ်းသဵင်ၶီႇသိုၵ်းၵႃႈၼိူဝ်ပၢႆမႆႉမွၼ်းၸိူဝ်းၼၼ်ႉၸိုင်၊ ၵျူဝ်းၸႃးတႃႉ။ မိူဝ်ႈၼၼ်ႉ ထႃႇဝရႃႉၽြႃးတၵ်းဢွၼ်ႁူဝ်မႂ်းၵႂႃႇ ႁႂ်ႈလႆႈတိုၵ်းတေႃးယႃႉပႅတ်ႈ တပ်ႉ ၽီႉလိတ်ႉတီႉ ၼၼ်ႉဢေႃႈ၊ ဝႃႈၼင်ႇၼႆလႄႈ၊-

25တႃႇဝိတ်ႈ ႁဵတ်းၸွမ်းၵႃႈၼင်ႇဢၼ်မၼ်းၸဝ်ႈမီးဢမိင်ႉၼၼ်ႉလႄႈ တိုၵ်းတေႃးယႃႉပႅတ်ႈၵူၼ်း ၽီႉလိတ်ႉတီႉ ၸိူဝ်းၼၼ်ႉ ဢဝ်ၵႃႈတီႈဝဵင်း ၵေႇပႃႉ တေႃႇထိုင်ႁွတ်ႈဝဵင်း ၵႃႇၸေႇရႃႉ ဢေႃႈ။

← Chapter 4 Jump to: Chapter 6 →