1 Chronicles 12

Sukuma 2019

← Chapter 11 Jump to: Chapter 13 →

1Ū Daūdi akaja kwikala Sikilagi nguno ya kūmpeela Saulo ng'witūnja wa ng'wa Kishi. A bagosha abo mina gabo gandīkilwe ha sīlīlī aha, bakaja koi kwikala hamò nang'hwe; (baalī bamò ba babo bakabiza bagunanhi bakwe ū mu wilwisha ūbo walī nabo.

2A boi baalī bamò ba badūgūye ba ng'wa Saulo, nguno baalī ba lūganda lwa ng'wa Benjamini. Bakaja koi na būta wabo; nīyo baalī bamanile no ū kūlasa, pyī nū kūtūmamīla nhaago kūluuta mawe, na baalī badūgije kūtūmamīla nkono gwa būlyo nūūlū gwa lūmoso).

3Ū ntaale wabo walī Ahiezeli, hamò na Yoashi ng'wana wa ng'wawe, bitūnja ba ng'wa Shemaa muna Gibea. Hūna biza bitūnja ba ng'wa Azimaveti, ba Yezieli na Peleti; hanuma Belaka, Yehu muna Anasosi,

4Ishimaya muna Gibeoni, munhū wa nguzu, ūmò wa babo makūmi adatū, na ūmò wa batongeeji babo abo makūmi adatū benabo. Hanuma Yelemia, Yahazaeli, Yohanani, Yozabadi muna Gedela,

5Eluzai, Yelimoti, Bealia, Shemalia, Shefatia muna Halufati;

6Elikana, Ishiya, Azaleli, Yoseza na Yoshebeamu; banhū ba numba ya ng'wa Koola,

7na Yoela na Zebadi, ng'witūnja wa ng'wa Yelohamu wa Gedooli.

8Ū Daūdi akīīta ūsaamīla kū ng'hambī ya kūpīlīla yalī kū masaka ga kwitogolo; banhū balebe ba lūganda lwa ng'wa Gadi būgalūka, būbiza balondeeji bakwe. A benabo baalī bashilikale bapile, badūgije kwingīla mu būlūgū, na kūdima lūmūda na machimu. Baalī na būshū bo makanji gītī bo shimba, hama baalī bapeeji kīngī nasho gītī laala mu matūmbī.

9Ū ntaale wabo walī Ezeli, ūlondeela Obadia, ū wa kadatū Eliabu,

10wa kanè Mishimana, wa katanò Yelemia;

11wa katandatū Atai, wa mpungatī Elieli,

12wa kanaane Yohanani, wa kenda Elizabadi,

13w'ikūmi Yelemia, wikūmi n'ūmò Makibanai.

14A banhū ba kūfuma mu lūganda lwa ng'wa Gadi benaba baalī bataale ba bashilikale; ū ngokolo gete ū mu bo ū būdūla wakwe walī gītī būdūla wa banhū igana; al'ū wa nguzu walī na būdūla gītī wa banhū shihūmbī shimò.

15A banhū benaba hū beene abo bakagūkīla ū mongo gwa Yolodani mu makanza ayo gwalī gūtaalile; būbapeeja pye a banhū abo bikalga mu ng'hilimva yago: ū kū ntambūko gwa kīya nī ng'weli.

16Na banhū bangī kūfuma Benjamini na Yuda nabo biza ū kūlī Daūdi, ū kū ng'hambī ya kūpīlīla ūko walī.

17Ū Daūdi ūbasūng'wanha, ūbawīla gīkī, “Ūlū muliza ū kūlī nene mu mhola, kūlwa kūnigunanha, nalī na būyegi ū kūng'wanukūla mubize hamò naane. Alīyo ūlū muliza mu wiba-wiba, gashi mulī na ng'hūmbū ja kūniijomboka munitūūle mu makono ga banishi bane aho gatī na būbi a makono gane, a henaho ū Mulungu wa bakūlūgenji bise ni agūlolage ū gwenūyo, amulamule.”

18Hūma Moyo ūng'wikīīla Amasai, ūyo walī ūmò wa babo makūmi adatū; ūhaya, “Ee Daūdi, a bise tūlībako! Tūlī hamò nang'ho ng'witūnja wa ng'wa Yese! Būlīho būtindi, būlīho būtindi ū kūlī bebe, nīyo būlī būtindi kū bose abo bakūkūgunanhaga; nguno ū Mulungu wako akūkūlwīlaga.” A henaho ū Daūdi ūbanukūla lūūlū a banhū benabo, ūbīīta kūbiza bataale ba magele ga banhū bakwe abo ng'hangala na ng'hangala bajaga kūdumīla banishi.

19Banhū bamò na bamò ba kūfuma mu lūganda lwa ng'wa Manase bakagalūka būnondeela Daūdi aho wajaga na Bafilisiti kwilwisha na Saulo. (Gwike aho gwahooyelwa ū mhayo gwenūyo, a basugi būnshosha kaya; na lūūlū ū wei atajile na a banhū bakwe ū kūbagunaana a Bafilisiti. Nguno bakiwīla gīkī, “Ū munhū ng'wenūyū ūlū ūngalūkīla ise būgonzo Saulo, ū būpanga wise būkūbiza mu kwihīga kūtaale no.”)

20Na lūūlū ū Daūdi aho alīshoka Sikilagi, a banhū ba lūganda lwa ng'wa Manase abo bakagalūka būnondeela baalī: Adina, Yozabadi, Yadieli, Mikaeli, Yozabadi, Elihu na Ziletai; būlī ūmò wabo walī ntongeeji w'ibità lya bashilikale shihūmbī ū mu lūganda lwa ng'wa Manase.

21Ū Daūdi ūbanukūla, ūbatūūla ha būtaale wa mabità gakwe ayo gilwishaga na banishi ūlū biza kūbadumīla, nguno a bose baalī bashilikale bakalī, ndūhū mhayo gwa kūbogohya; nīyo baalī batongeeji ū ng'wibità.

22Būlī lūshikū bizaga banhū ū kūlī Daūdi, kūshisha ūpandīka ibità itaale lya nguzu no.

23Aya h'a mabità ga banhū abo bakaja Hebuloni kūlī Daūdi hamò na shilanga shabo; baalī bamalīīlile nūūlū kwilwisha būlūgū, kūlwa nguno ya kūbūsaamya ū būtemi wīnge ū kūlī Saulo būngalūkīle Daūdi, gīt'ūmo Seeba walī ahayīlile.

24A banhū ba lūganda lwa ng'wa Yuda abo bakaja babūūkije mūda na machimu, na bamalīīlile kū būlūgū baalī shihūmbī shitandatū na magana anaane.

25A bashilikale ba mu lūganda lwa ng'wa Simeoni abo baalī bamalīīlile kū būlūgū, baalī banhū shihūmbī mpungatī n'igana līmò.

26A banhū ba lūganda lwa ng'wa Lawī baalī shihūmbī shinè na magana atandatū.

27Nū Yehoyada walīmo, ūyo walī ntongeeji wabo ū mu kaya ya ng'wa Alooni; walī hamò na banhū bakwe shihūmbī shidatū na magana mpungatī.

28Hamò na Sadoki, ūyo walī nshilikale ndiinha nkalī atachaamagwa, nang'hwe wiza na banhū makūmi abīlī na babīlī ba kūfuma mu kaya ya ng'wawe.

29Ū kūfuma ū mu lūganda lwa ng'wa Benjamini, biza banhū shihūmbī shidatū abo baalī badūgū ba ng'wa Saulo; bingī babo baalī badimanile nayo ī kaya ya ng'wa Saulo kūshisha ikanza lyenīlo.

30Banhū shihūmbī makūmi abīlī na magana anaane biza kūfuma mu lūganda lwa ng'wa Efulaimu; ū mu lūdūgū lwabo baalī bamanīkile gīkī balī bashilikale bakalī batī na booba wa mbika yose-yose.

31Ū kūfuma ū mu nusu ya lūganda lwa ng'wa Manase biza banhū shihūmbī ikūmi na shinaane, abo baalī bandīkwa a mina gabo gīkī bize kūntemya ū Daūdi.

32A banhū ba lūganda lwa ng'wa Isakaali baalī bagadeebile a makanza, nī yīyo yalī ībigeleelilwe a Baisilaeli kwīyīīta baalī bīdeebile. Na lūūlū ū kūfuma ū mu lūganda lwenūlo biza banhū magana abīlī; a bose batongeeji, būlī ng'wene wiza na badūgū bakwe, hamò na a banhū abo baalī ha sīlīlī ya būsugi wakwe.

33Ū kūfuma ū mu lūganda lwa ng'wa Zabuloni biza banhū shihūmbī makūmi atanò, baalī bashilikale bamanīlile ī mihayo ya būlūgū, hangī badūgije kūdima būlī mbika ya shilanga; bakiza ū kūngunanha ū Daūdi balī na ng'holò īmò, ītī ya magalū-galū.

34Ū kūfuma ū mu lūganda lwa ng'wa Nafutaalī biza banhū shihūmbī shimò, bataale ba mabità, hamò na bashilikale babo shihūmbī makūmi adatū na mpungatī; biza babūūkije mūda na machimu gabo.

35Ū kūfuma ū mu lūganda lwa ng'wa Dani, biza banhū shihūmbī makūmi abīlī na shinaane, na magana atandatū; bamalīīlile kū būlūgū.

36Ū kūfuma ū mu lūganda lwa ng'wa Asheli, biza banhū shihūmbī makūmi anè, bīmanīīlile ī mihayo ya būlūgū; nabo biza bamalīīlile.

37Ū kūfuma ū kū ntambūko gwa kīya ya Yolodani biza banhū shihūmbī igana na makūmi abīlī, ba kūfuma mu ng'anda ja ba Lubeni, Gadi nī nusu ya lūganda lwa ng'wa Manase; biza na būlī mbika ja shilanga.

38A bose benaba baalī bashilikale balwi ba būlūgū, abo baalī bifunya gīkī babize mo ū mu būlūgū; na lūūlū biza ī Hebuloni balī na ng'hūmbū ja kūng'wīta ū Daūdi abize ntemi wa Isilaeli yose. Na a Baisilaeli a bangī pye a bose baalī na ng'holò īmò ū mu kūntemya ū Daūdi.

39A banhū benabo bakikala ho a henaho shikū idatū balī hamò nū Daūdi bakūlyaga na kūng'wa, nguno ī ka ya jabo jalī jabinha shakūlya sha kwigela.

40Banhū bingī bizaga, bangī ba bbihī-bbihī kwenūko, bangī bafumaga Isakaali, Zabuloni na Nafutaali, a bose bizaga na shilīwa babūūkije ha nzobe, ngamīla, nzobe nhaale, nūūlū ha ng'ombe. Shalīho shilīwa shingī no gītī: būsu, matwajo ga mizeituni, matwajo ga mizabibu, divai, maguta, ng'ombe na ng'holo; nguno ī lyenīlo lyalī ikanza lya būyegi būtaale no ū mu Isilaeli.

← Chapter 11 Jump to: Chapter 13 →