1 Chronicles 4

Sukuma 2019

← Chapter 3 Jump to: Chapter 5 →

1A bitūnja ba ng'wa Yuda baalī: Pelezi, Hezeloni, Kalīmi, Huuli, na Shobaali.

2Leaya ng'witūnja wa ng'wa Shobaali walī ise wa ba: Yahati, ū Yahati ūmyala Ahumayi na Lahadi. Ī jenī hū jalī ndūgū ja Bazoli.

3Aba beena baalī bitūnja ba ng'wa Etamu: Yezileeli, Ishima, na Idibashi; ilūmbū lyabo witanagwa Hazeleliponi.

4Penueli walī ise wa ng'wa Gedooli, Ezeeli ise wa ng'wa Husha. A banhū benaba baalī ba shibyalīlwe sha ng'wa Huuli, ūyo walī myalwa wa kwandya wa ng'wa Efulata, na ise wa ng'wa Betelehemu.

5Ū Ashuli ū ise wa ng'wa Tekoa walī na bake babīlī: Hela na Naala.

6Ū Naala akamyalīla ba Ahuza, Hefa, Temeni na Hahashitaalī. A banhū benaba baalī ba shibyalīlwe sha ng'wa Naala.

7Abitūnja ba ng'wa Hela baalī: Zeleti, Zohali, Etinani

8na Kozi, ūyo walī ise wa ba Hanubu na Hazobeba na wa banhū ba ndūgū ja kūfuma mulī Ahaheli, ng'witūnja wa ng'wa Halumi.

9Yabezi walī akūjiwe kūtinda a baana ba ng'wawe; ū nina aho wamyala akang'wilīka ī lina lya Yabezi nguno akahaya gīkī, “Namyala mu makoye no.”

10Ū Yabezi ūnīlīīla ū Mulungu wa Isilaeli alīhaya, “Nalīlomba ūnīlūkīle mbango jako, ūninhe sī ngalī; nū nkono gwako gūbize hamò nane, ūnilang'hane natizūgwa mu makoye.” Ū Mulungu ūng'wigwa, ūng'wītīla gīt'ūmo kwalī kūlomba kwakwe.

11Kelubu ng'wana wa ng'wawe wa ng'wa Shuha, walī ise wa ng'wa Mehili; ū Mehili ūmyala Eshitoni.

12Ū Eshitoni ūbabyala ba Beti-lafa, Pasea, na Tehina ūyo akamyala Ili-nahashi. A banhū benaba baalī bana Leka.

13A bitūnja ba ng'wa Kenazi baalī: Osinieli na Selaya. A bitūnja ba ng'wa Osinieli baalī: Hatati na Meonotai.

14Ū Meonotai ūmyala Ofula. Ū Selaya ūmyala Yoabu, ūyo walī nkūlgenji wa banhū ba sī ya Ge-halashimu. Ī sī yenīyo yiitanagwa lina lyenīlo nguno a bajiga-jiga bamo baalī baakoolī ba kūbeeja shikolo.

15A bitūnja ba ng'wa Kelebu ū ng'witūnja wa ng'wa Yefune baalī: Ilu, Ela, Namu. Ū ng'witūnja wa ng'wa Ela walī Kenazi.

16A bitūnja ba ng'wa Yehalele baalī: Zifu, Zifa, Tilia, Aseleli.

17A bitūnja ba ng'wa Ezila baalī: Yeesa, Meledi, Efa, na Yaloni. Ūmò wa bake ba ng'wa Meledi akababyala ba: Miliamu, Shamai na Ishiba ise wa ng'wa Eshitemoa.

18(Ū Nke wakwe ū wa kūfuma mu lūganda lwa banhū ba Yuda ūmyala Yeledi ise wa ng'wa Gedooli, Heba ise wa ng'wa Soko, na Yekutieli ise wa ng'wa Zanoa.) Ū Bisia ū nshīke wa ng'wa Falao ūyo walī watoolwa na Meledi h'ūyo akababyala a baana benaba.

19A bitūnja ba nke wa ng'wa Hodia, ūyo walī ilūmbūye lya ng'wa Nahamu, ūmò wabo walī ise wa ng'wa Keila muna Galimi, ūngī walī ise wa ng'wa Eshitemoa munhū wa Maaka.

20A bitūnja ba ng'wa Shimoni baalī: Amunoni, Lina, Beni-hanani, na Tiloni. A banhū ba shibyalīlwe sha ng'wa Ishi baalī: Zoheti, na Beni-zoheti.

21A bitūnja ba ng'wa Shela ng'witūnja wa ng'wa Yuda baalī: Eeli ise wa ba Leka na Laada, ūyo akabiza ise wa ng'wa Malesha. Nī ndūgū ja banhū abo baalī bamani ba kūbeeja kitaani, abo bikalaga Beti-ashibea jikafuma mulī ng'wenūyo.

22Hamò na Yokimu na banhū ba Kozeba, na Yoashi, na Salafu ūyo akabiza ntemi wa Moabu na Yashubi-lahemu. (Ī mihayo yenīyī īfumile mu shandīkwa sha kale.)

23A banhū benaba baalī babūmbi bikalaga Netai na Gedela, bikalaga kwenūko bakūntūmamīlaga ntemi.

24A bitūnja ba ng'wa Simioni baalī: Nemueli, Yamini, Yalibu, Zela na Shauli;

25Ū Shauli ūmyala Shalumu, nang'hwe ū ng'wenūyo ūmyala Mibusamu, ū ng'wenūyo nang'hwe ūmyala Mishima.

26A ba shibyalīlwe sha ng'wa Mishima baalī: Ng'witūnja wakwe Hamueli, nang'hwe ūmyala Zaku, nang'hwe ūmyala Shimei.

27Ū Shimei akabyala bitūnja batandatū na bashīke batandatū, alīyo a baana ba ng'wawe batapandīkile baana bingī. Na lūūlū ū lūganda lwabo lūtagalīhile gīt'ūmo lwalī lwa ng'wa Yuda.

28A boi bikalaga Beeli-sheba, Molada, Hazaali-shuali,

29Biliha, Ezemu, Toladi,

30Betueli, Holima, Sikilagi,

31Beti-makaboti, Hazaali, Susimu, Beti-bili, na Sha-alaimu. Ī yenīyī yalī mizengo yabo kūshisha ikanza lya būsugi wa ng'wa Daūdi.

32A magūngūli ayo gaalī gabapīndīlīgije gaalī Etamu, Aini, Limoni, Tokeni na Ashani: magūngūli atanò.

33Na magūngūli gangī gaalīho ayo gaalī gīīpīndīlīgije ī mizengo yenīyo kūshisha kū nzengo gwa Baala. A genaya gaalī mapandī gabo, ūmo bikalaga. Hama baalī na shitabo sha mina ga ng'anda jabo; baalī bandīkilwe mo:

34Meshobabu, Yamuleki, Yosha ng'witūnja wa ng'wa Amazia,

35Yoeli, Yehu ng'witūnja wa ng'wa Yoshibia, ng'witūnja wa ng'wa Selaiya, ng'witūnja wa ng'wa Asieli,

36na Elionai, Yakoba, Yeshohaya, Asaya, Adieli, Yesimieli, Benaya,

37na Ziza ng'witūnja wa ng'wa Shifi, ng'witūnja wa ng'wa Aloni, ng'witūnja wa ng'wa Yedaya ng'witūnja wa ng'wa Shimuli, ng'witūnja wa ng'wa Shemaya.

38A banhū abo bahelilwe benaba baalī batongeeji ū mu ndūgū jabo; ī kaaya jabo jikongeja kūkūla na kūkīlanīja.

39A banhūbenaba bajaga bakūsaama-saamaga bakūkoobaga madīīmīlo ga mitugo jabo, nose būūkakandya kū sī ya Gedooli, kīya ya sī ya ntubīlo gwa kwenūko.

40Būbona sī nsoga ya madīīmīlo gawiza, hangī nīyo ngalī, hama nembeezu na mholo. Ī kwandya bikalaga mo banhū ba shibyalīlwe sha ng'wa Hamu.

41A banhū benabo bakabadumīla a ba shibyalīlwe sha ng'wa Hamu ū mu sī ījo bikalaga, pye na a Bameune; būbayagaja geete gīt'ūmo īlī ī mihayo kūshisha lelo īyī. Hanuma ya henaho hū bikala mo boi a ha ng'wanya gwabo, nguno walīmo būdīīmīlo bowiza bo mitugo jabo. A mina gabo ayo gaalī gahelilwe gakilonga mu shikū ja ng'wa Hezekia ntemi wa Yuda.

42Hanuma ya henaho bitūnja ba ng'wa Ishi ba Pelatia, Neali, Lefaia, na Uzieli būtongeela ibità lya banhū magana atanò kūfuma ū mu Basimeoni benabo būja kūdumīla sī ya Seili;

43būbabūlaga a Baamaleki abo baalī basaagīla, abo baalī bapūlūgūka; bikala boi ū mu sī yenīyo kūshisha nī lelo yenīyī.

← Chapter 3 Jump to: Chapter 5 →