1 Chronicles 5

Sukuma 2019

← Chapter 4 Jump to: Chapter 6 →

1Īyī mihayo ya bitūnja ba ng'wa Lubeni ū myalwa wa kwandya wa ng'wa Isilaeli. (Ū wei ng'hana walī myalwa wa kwandya, alīyo aho wisosohaja na ūmò wa bake ba ng'wa ise, ūtaajiwa ī likūjo lyakwe ī lya būbyalwa bo kwandya. Binhwa bitūnja ba ng'wa Yosefu ng'witūnja wa ng'wa Isilaeli, na lūūlū ū mu kahelelwe ka shibyalīlwe ū wei atahelilwe gīkī ntaale.

2Nū Yuda nūūlū īkī walī na būdūla kūbatinda pye a baana ba ng'wawe, hama nū ntongeeji ūfuma mulī wei, alīyo naheene ī likūjo lya būbyalwa wa kwandya lyalī lyamala kūja na Yosefu).

3Na lūūlū a bitūnja ba ng'wa Lubeni ū myalwa wa kwandya wa ng'wa Isilaeli baalī: Hanoki, Palu, Hezeloni na Kalīmi.

4A banhū ba shibyalīlwe sha ng'wa Yoeli baalī: Shemaya ng'witūnja wakwe, nang'hwe ūmyala Gogi, ū ng'wenūyo nang'hwe ūmyala Shimei.

5Shimei nang'hwe ūmyala Mika, Mika nang'hwe ūmyala Leaya, ū ng'wenūyo nang'hwe ūmyala Baalī.

6Ū ng'wenūyo nang'hwe ūmyala Beela ūyo akabiza ntongeeji wa banhū ba lūganda lwa ng'wa Lubeni. Alīyo ntemi Tigilasi-pilaseli wa Ashulu ūnsola ū Beela, ūnjana ūbiza ūmò wa basaamiwa.

7A badūgū ba mu lūdūgū lwakwe baalī bandīkilwe kūlondeela kihelele ka shibyalīlwe shabo; abo baalīho baalī: Yeieli ūyo walī ntongeeji wabo, ūlondeela Zakalia,

8na Bela ng'witūnja wa ng'wa Azazi, ng'witūnja wa ng'wa Shema, ng'witūnja wa ng'wa Yoeli. A banhū benabo bikalaga mu sī ya kūfumīīla Aloeli, kūja Nebo na Baali-meoni.

9Bakaja bakongejaga kwigalīhīja ī sī ū kū lwandī lwa kīya; nguno aho balī Gileadi a madaale gabo gakakūla no; na lūūlū bīdima ī sī yenīyo kwandīja kū mbalama y'itogolo īlo lījile lyūkashika kū mongo gwa Flati.

10Ī lipandī lya kīya ya Gileadi baalī bamala kūlīdima, nguno ū mu shikū ja būsugi wa ng'wa Saulo bakilwisha būlūgū na a Bahagīli, abo baalī bikaji ba mu sī yenīyo, aho baabapyeena bīīdima ī sī ya Bahagīli yūbiza yabo ī yose.

11A banhū ba lūganda lwa ng'wa Gadi baalī bazenganilwe na a banhū ba lūganda lwa ng'wa Lubeni; a bene baalī mu sī ya Bashani kūjūshika ipandī lya Saleka:

12Ū ntongeeji wabo ū mu sī ya Bashani walī Yoeli, ūlondeela Shafamu, hanuma Yanai na Shafati.

13A badūgū babo kūlenganīla nī ndūgū jabo baalī: Mikaeli, Meshulamu, Sheba, Yolai, Yakani, Zia na Eba; a bose banhū mpungatī.

14Aba baalī bitūnja ba ng'wa Abihaili ng'witūnja wa ng'wa Huuli, ng'witūnja wang'wa Yaloa, ng'witūnja wa ng'wa Gileadi, ng'witūnja wa ng'wa Mikaeli, ng'witūnja wa ng'wa Yeshishai ng'witūnja wa ng'wa Yahido, ng'witūnja wa ng'wa Buzi.

15Ū ntaale wa lūdūgū lwabo walī Ahi, ng'witūnja wa ng'wa Abudieli, ng'witūnja wa ng'wa Guni.

16A banhū ba lūganda lwa ng'wa Gadi bikalaga mu sī ya Gileadi na Bashani, hamò nū mu magūngūli ayo gaalī bbihī-bbihī ng'wenūmo; nū mu sī ja kūdīīmīla ī ja mu Shaloni ī yose ūmo yalī īgelelile.

17A bose benaba batūūlwa ū mu shitabo sha shibyalīlwe sha banhū mu shikū ja ntemi Yotamu wa Yuda, na Yeloboamu wa Isilaeli.

18A banhū ba ng'anda ja Lubeni, Gadi nī nusu ya Manase baalī na bashilikale shihūmbī makūmi anè na shinè, na magana mpungatī na mkūmi atandatū. A bose benabo baalī na būdūla wa kwilwisha būlūgū, nguno balangilwe ī mihayo ya būlūgū; baalī banhū ba nguzu badūgije kūbūūcha lūmūda na baalī badūgije kūdima shū mu būlūgū, nū kūtūmamīlī ū būta baalī badūgije.

19Na lūūlū bakabadumīla a banhū ba Hagīli, Yetuli, Nafishi, na Nodabu bilwisha būlūgū nabo.

20Ū mu būlūgū wenūbo ū Mulungu akabagunanha, nguno aho balī ū mu būlūgū bakanīlīīla; ūbatūūla a bana Hagīli na a babo baalī hamò nabo mu makono gabo.

21Ī mitugo ja banhū ba Hagīli būjidima jūbiza jabo; bakadima ngamīla shihūmba makūmi atanò, ng'holo shihūmbī magana abīlī na makūmi atanò, na nzobe shihūmbī shibīlī. Būdima na banhū shihūmbī igana, būbīīta kūbiza ndiing'wa jabo.

22Na a ba kūbabūlaga baalī bingī dūhū, nguno ū būlūgū bolī bo ng'wa Mulungu; na lūūlū ī sī yenīyo bīdima yūbiza yabo kūshisha ikanza lya kūsaamiwa kwabo.

23A banhū ba nusu ya lūganda lwa ng'wa Manase baalī bingī no, ū mu sī īyo bikalaga bookala pa, kwandīja Bashani kūshisha Baali-helimoni, hū kūhaya kūshisha Senili (Lūgūlū lwa Helimoni).

24A batongeeji ba ndūgū jabo baalī: Efa, Ishi, Elieli, Azilieli, Yelemia, Hodavia na Yadieli. A banhū benabo baalī bagosha bapandile ha sī, hangī baalī bakumūku no, na baalī batongeeji ū mu ndūgū jabo.

25Gwike bakajimīīja ū būshikaanu ū kūlī Mulungu wa bataale babo; bandya kwisosohaja mu nzīla ya kūlamya bamulungu ba mahanga ga mu sī yenīyo, abo ū Mulungu walī wabakenaagūla gīkī babīngīle a Baisilaeli.

26Na lūūlū ū Mulungu ūgūsaja ū moyo gwa ng'wa Pulu, ntemi wa Ashulu (h'ū ntemi Tigilasi-pilaseli wa Ashulu); ūbasola a banhū ba lūganda lwa Lubeni nī Gadi, nī nusu ya Manase, ūbatwala mu būtungwa. Akabatwala Halahī, Habooli, Hala, na kū mongo gwa Gozani; hū ūko balī nī lelo yene.

← Chapter 4 Jump to: Chapter 6 →