1 Chronicles 20

Sukuma 2019

← Chapter 19 Jump to: Chapter 21 →

1Mu shikū ja matūja malaale, makanza ayo batemi bajaga kū būlūgū, ū Yoabu ūja na a mabità ga bashilikale, ūūkīkenaagūla gete ī sī ya Baamoni. Wīnga a henaho ūja Laba, ūūkagūdumīla ū nzengo gwenūyo, ūgūpīndīlīja na mabità. Alīyo ū Daūdi walī walekwa Yelusalemu; na lūūlū ū Yoabu ūgūkenaagūla gete ū nzengo gwenūyo.

2Ū Daūdi wīyīnja ī ngikili ya ntemi wabo a ha ntwe gwakwe; ū būdito wayo walī gītī kilo makūmi adatū n'inè, na yalī na būlenji bo mawe ga mpango ntaale, ūtūūlīlwa ha ntwe gwakwe ū Daūdi. Nīyo ū kūfuma ū mu nzengo gwenūyo ū Daūdi akasola shikolo shingī no;

3a banhū ba mu nzengo gwenūyo ūbafunya moi, ūbatūūla būtūmami bo milīmo; būyūtūmamīla misumeno, mbasa na sūlūlū, wīyīīta gīko pyī ī mizengo ya Baamoni. Hanuma ya henaho ū Daūdi nī libità lyakwe ī lyose būshoka kaya Yelusalemu.

4Makanza malebe bandya kūlwa būlūgū hangī na a Bafilisiti ipandī lya Geza. Ī likanza lyenīlo walīho ngosha witanagwa Sibekai muna Hushi ūmūlaga Sipai, ūmò wa banhū ba shibyalīlwe sha ng'wa Lafa; aho yaja gīko a Bafilisiti būhehenajiwa geete.

5Ikanza līngī baalī mu būlūgū na Bafilisiti, walīho ngosha lina lyakwe Elihanani ng'witūnja wa ng'wa Yaili, nang'hwe ūlībūlaga idaaji lī Lahimi, izunaye lya ng'wa Goliati wa Gaasi; lyalī n'ichimu, ū mpīni gwalyo līnang'ha itaale gītī ng'wīsī.

6Būlūgū būngī būkabūūka Gaasi, lyūsangwa līlīho idaaji lya nzwala itandatū būlī nkono na būlī gūgūlū; ī jose makūmi abīlī n'inè. Nalyo lyalī lya shibyalīlwe sha ng'wa Lafa.

7Aho lyandya kūbasondagūla a Baisilaeli lyūbūlagwa na Yonasani ng'witūnja wa ng'wa Shimea nkūlūye wa ng'wa Daūdi.

8A madaaji genaya gaalī ma muna Gaasi, ga kūfuma mu shibyalīlwe sha ng'wa Lafa; a gose gakagwishiwa na Daūdi hamò na banhū bakwe.

← Chapter 19 Jump to: Chapter 21 →