1 Chronicles 26

Sukuma 2019

← Chapter 25 Jump to: Chapter 27 →

1A balang'hani ba Hekalu baalī bagabanhyiwa mu magele kūlondeela ndīīma jabo. Ū ng'wigele lya ng'wa Koola walīmo Meshelemia ng'witūnja wa ng'wa Koole; nang'hwe walī ūmò wa banhū ba shibyalīlwe sha ng'wa Asafu.

2Ū Meshelemia walī na bitūnja: Zakalia, myalwa wakwe wa kwandya; wa kabīlī Yedieli wa kadatū Zebadia, wa kanè Yasinieli.

3Ū wa katanò Elamu, wa katandatū Yehohanani, wa mpungatī Eliehoenai.

4Ū Obedi-edomu nang'hwe walī na bitūnja: Ū myalwa wa kwandya walī Shemaya, wa kabīlī Yehozabadi, wa kadatū Yoa, wa kanè Sakali, wa katanò Nesaneeli.

5Wa katandatū Amieli, wa mpungatī Isakaali, wa kanaane Peuletai. (Ū Mulungu walī wang'wīlūkīla mbango no ū Obedi-edomu).

6Ū ng'witūnja wakwe ū Shemaya nang'hwe walī na bitūnja; nabo baalī banhū ba būdūla būtaale, na lūūlū ū kū shikū ja kū būtongi bakatūūlwa būtongeeji ū mu ndūgū ja numba ya ng'wa saabo.

7A bitūnja ba ng'wa Shemaya benabo baalī: Osini, Lefaeli, Obedi, na Elizabadi. Na badūgū bakwe walī nabo, mina gabo ba Elihu na Semakia; nabo baalī banhū ba būdūla būtaale.

8A bose benaba baalī banhū ba shibyalīlwe sha ng'wa Obedi-edomu; nīyo pye a boi hamò na a bitūnja babo na a badūgū babo, baalī banhū ba būdūla na nguzu ja kwīta milīmo. A banhū ba shibyalīlwe sha ng'wa Obedi-edomu a bose baalī makūmi atandatū na babīlī.

9Ū Meshelimia ū ng'wene a bitūnja bakwe, kūbasanja na a badūgūye a bose, baalī ikūmi na banaane; nabo baalī ba būdūla mu milīmo.

10Ū Hosa wa mu shibyalīlwe sha ng'wa Melali walī na bitūnja: ū ntaale wabo walī Shimili (gwike a hene ū wei walī atī myalwa wa kwandya, alīyo ū ise walī wangūngūhya ūng'wīta kūbiza ntaale).

11Ū wa kabīlī Hilikia, wa kadatū Tabalia, wa kanè Zakalia. A bitūnja na a badūgū ba ng'wa Hosa a bose baalī ikūmi na badatū.

12A balang'hani ba Hekalu benaba baalī bagabanhije mu magele, būl'igele na ntongeeji walyo; na būlī lyene lyalī na lūdīīma lwa kūtūmama ū mu hekalu ya ng'wa Seeba gīt'ūmo bīītīlaga a badūgū babo a ba kale.

13Pye a balang'hani ba ha nyango, babize bataale nūūlū bado, basolagwa bo mbale mu būlenganīja, kūlondeela kaya jabo.

14Ī mbale ya nyango gwa kū kīya īkangwīla Shelemia. Hanuma ya henaho nū ng'witūnja wakwe ū Zakalia ūsolwa bo mbale. Ū munhū ng'wenūyo walī ndeeba mu kūganikīla banhū, ū ng'wene ī mbale yūngwīla ya kū nyango gwa sukuma.

15Ū Obedi-edomu ūgwīlwa mbale ya kūlang'hana nyango gwa dakama; a bitūnja bakwe yūbagwīla mbale ya kūlang'hana nyango gwa ha chumba sha kūtūūla shikolo.

16Ī mbale ja kū mita gwa ng'weli nū gwa Shaleketi, ūyo gūlī kwikūūwa lya kūja kū ngūngūli, ī jene jūbagwīla ba Shupimu na Hosa; būlī ng'wene na lūdīīma lwakwe.

17Ū kū nyango gwa kīya balang'hanga koi Balawī batandatū būlī lūshikū, ū gwa sukuma banè, nū gwa dakama banè, a ha chumba sha kūtūūla shikolo baalī bahelilwe kūbiza hoi babīlī būlī ikanza.

18Ū kū ng'weli, a ha nzīla ya kūja ha gwalugwa, baalī bahelelwa hoi balang'hani banè, a ha gwalugwa henekīlī babīlī.

19A genaya h'a magele ga balang'hani ba Hekalu, abo baalī ba shibyalīlwe sha ng'wa Koola na Melali.

20A Balawī bichaabo baalī na ndīīma ja kūlang'hana ī chumba sha kūtūūla sabo īsho shaalī mu numba ya ng'wa Mulungu, nī chumba sha kūlang'hana shikolo īsho shaalī sheejiwa hūna shūtūūlwa kūlī Seeba.

21A banhū ba shibyalīlwe sha ng'wa Ladani, abo baalī ba kūfuma mu shibyalīlwe sha ng'wa Gelishoni, abo baalī bataale ba kaya ja mu ndūgū ja shibyalīlwe sha ng'wa Gelishoni, baalī Yehieli,

22bitūnja ba ng'wa Yehieli, Zetamu na ng'wana wa ng'wawe Yoeli. A benabo baalī balang'hani ba chūmba sha kūbīkīla sabo, īsho shalī mu hekalu ya ng'wa Seeba.

23Ū kūfuma ū mu ndūgū ja ba Amulamu, Iziha, Hebuloni na Uzieli, baalīho:

24Shubaeli, munhū wa sbibyalīlwe sha ng'wa Gelishomu, ūyo walī ng'witūnja wa ng'wa Musa; ū ng'wenūyo hū walī ntaale wa balang'hani ba chumba sha kūbīkīla sabo.

25A badūgūye mu nzīla ya ng'wa Elieza baalī: ng'witūnja wakwe Lehabia, ng'witūnja wakwe Yeshaya, ng'witūnja wakwe Yolamu, ng'wigtūnja wakwe Zikili, ng'witūnja wakwe Shelomitī.

26Ū Shalomitī na a badūgū bakwe baalī na ndīīma ja kūlang'hana ī shikolo pye ī shose īsho shalī shafunyiwa na ntemi Daūdi, nī shisho shalī shatūūlwa na bataale ba ndūgū jabo, abo baalī bataale ba mabità ga bashilikale shihūmbī-shihūmbī, na ga bashilikale igana-igana, na a bataale ba mabità a bangī.

27Shikolo shimò na shimò īsho shalī shading'wa mu būlūgū baalī bashitūūla ho kūlwa nguno ya kūbeegelegeja hekalu ya ng'wa Seeba.

28Ī shikolo pye īsho shalī shatūūlwa na ng'hangi Sang'weli, na Saulo ng'witūnja wa ng'wa Kishi, na Abneeli ng'witūnja wa ng'wa Neeli, na Yoabu ng'wana Seluya, nī shikolo ī shingī īsho shalī shatūūlwa, shalī ha sīlīlī ya būlang'hani wa ng'wa Shelomitī hamò na badūgūye.

29Ū kūfuma ū mu shibyalīlwe sha ng'wa Iziha, walīmo Kenania na bitūnja bakwe; ū ng'wene akinhwa nīmo gwa kūtūmamīla kūle nī hekalu. A banhū ba shibyalīlwe shakwe binhwa milīmo ya mu ofisi, bangī bīītwa kūbiza balamuji ū mu Isilaeli.

30Ū kūfuma ū mu shibyalīlwe sha ng'wa Hebuloni, walīho Hashabia na badūgū bakwe; banhū shihūmbī shimò na magana mpungatī, a bose banhū ba būdūla mu milīmo. A benabo ū nīmo gwabo gwalī kwīlang'hana pyī ī milīmo ya ng'wa Seeba nī ya ntemi ū mu sī ya Isilaeli, ū kū nkīlo gwa ng'weli ya Yolodani.

31Ū kūlondeela kwihela kwa shibyalīlwe sha ndūgū, ū ntaale wa banhū ba shibyalīlwe sha ng'wa Hebuloni walī Yelia. Ū mu ng'waka gwa makūmi anè gwa būsugi wa ng'wa Daūdi, būkīītwa būgīsīlīja wa kwihela kwa shibyalīlwe; bilonga banhū ba būdūla ū mu shibyalīlwe sha ng'wa Hebuloni, bilongela Yazeeli ya Galilaya.

32Ū Yelia walī na badūgū bakwe shihūmbī shibīlī na magana mpungatī abo baalī banhū ba būdūla, na baalī batongeeji ba ndūgū jabo. Ū ntemi Daūdi ūbatūūla a banhū benabo kūbiza batongeeji mu banhū ba lūganda lwa ng'wa Lubeni, nū lwa ng'wa Gadi, nī nusu ya lūganda lwa ng'wa Manase; būbiza batongeeji ū mu mihayo yose īyo īng'wigeleelilwe Mulungu, nī yīyo īng'wigeleelilwe ntemi.

← Chapter 25 Jump to: Chapter 27 →