bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Sukuma
/
Sukuma 2019
/
1 Samuel 1
1 Samuel 1
Sukuma 2019
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 2 →
1
Walīho ngosha ūmò wa Lamasaimu-zofimu, ya kū magūlya ga sī ya banhū ba lūganda lwa ng'wa Efulaimu. Ī lina lyakwe walī Elikana, ng'witūnja o ng'wa Yelohamu, ng'witūnja o ng'wa Elihu, ng'witūnja o ng'wa Tohu, ng'wana Zufu; ūmò wa banhū ba lūganda lwa ng'wa Efulaimu.
2
Walī na mhalī ya bakīma babīlī; ūmò witanagwa Hana, ūngī Penina. Ū Penina walī na baana, alīyo ū Hana walī gūmba.
3
Ū ngosha ng'wenūyo būlī ng'waka wajaga Shilo kūnamya SEEBA Ndūji wa shose, na kūfunya shitambò kwenūko; bitūnja ba ng'wa Eli ba Hofuni na Finehasi baatūmamaga nīmo gwa būgabīji kū būtongi bo ng'wa SEEBA.
4
Lyabizaga ūlū lyashika ī likanza lya kūfunya shitambò, ū Elikana wang'winhaga ū nke wakwe ū Penina ibudīka lya nyama hamò na a baana bakwe bose pye, bagosha na bakīma, wabagabanhyaga būlī ng'wene ibudīka lyakwe.
5
Alīyo ū Hana wang'winhaga ibudīka lya būtaale wa ng'hangala ibīlī, nguno walī antogilwe no, nūūlū īkī ū SEEBA walī wanugalīla ū būbyīle.
6
Na lūūlū īkī ū SEEBA walī wanugalīla ū būbyīle, ū nke ng'wiye wampīnīhajaga no, kūlwa nguno ya kūmanūng'wikoloosha būlī makanza.
7
Yabīta myaka mingī akūkoyiagwa gīko. Būl'ikanza ū Hana ūlū waja ū kū numba ya ng'wa SEEBA, ū nke ng'wiye wang'wikolooshaga no, kūshisha walīla wakalemeelwa nū kūlya.
8
Ūlū wapīnīhala gīko ū ngoshi wakwe ū Elikana wang'wīlaga, “Hana nibūlī ūlīīlīla? Ni kinehe ūtūlyaga? Yapīnīhajiagwa kī ī ng'holò yako? Angū, ū nene natī wa mpango ntaale ū kūlī bebe kūtinda nūūlū kūbiza na baana bagosha mpungatī?”
9
Nose lwise lūmò aho balī Shilo, bahayūmala kūlya na kūng'wa, ū Hana ūbūūka. Ī likanza lyenīlo ū ngabīji Eli walī wigasha h'isumbī ha nyango gwa kwingīla mu hekalu ya ng'wa SEEBA.
10
Ū Hana wandya kūlīla na kūnomba ū SEEBA kūlwa būpīna būtaale ūbo wankoyaga mu ng'holò yakwe.
11
Ūlahīla shilahīlo alīhaya, “Ee SEEBA Ndūji wa shose, ūlū ūbūlola ū būpīna wa nsese wako ūnizūkwa nane, ooya ū kūng'wība ū nsese wako, alīyo ūng'winha ng'wana ngosha; a henaho nū nene nakūng'winha ū ng'wana ng'wenūyo kūlī SEEBA shikū jose ja būlamu wakwe. Na lūtalabīta lūgembe lose lose ū mu ntwe gwakwe.”
12
Aho akūlombaga, ū Eli walī wanola ū kū nomo gwakwe;
13
ū Hana walombelaga mu ng'holò, ī lilaka lyalī lītaafumaga, gwabeya beyaga nomo dūhū. Ū Eli wiganika gīkī ū nkīma ng'wenūyo walī wang'wa walwa ūleewa,
14
na lūūlū ūng'wīla, “Ū bebe ūkūyikala ūleebilwe kūshisha nanalī? Lekanaga nayo ī divai!”
15
Alīyo ū Hana ūnshokeja ūhaya, “Ītī gīko baba, ū nene nalī na būpīna no, natang'wile divai nūūlū walwa; naliita būpanga wane kūlī SEEBA dūhū.
16
Ūtizūng'wiganikīla ū nsese wako gīkī alī ūmò wa bakīma bahūnga; a henaha nalūlombaga kūlwa nguno ya kūzwangana hamò na būpīna wane.”
17
Hūna ū Eli ūng'wīla, “Jaga mu mhola, ū Mulungu wa Baisilaeli akwīlūkīle īyo wanombaga.”
18
Ū Hana ūshosha, “Ū nsese wako ni anukūlagwe ū mu miso gako.” Na lūūlū wīnga ho, ūja kūlya shilīwa, wiluguta nū būshū wakwe; būshila ū būpīna wakwe.
19
Ha ntondo yaho būmisha dilū būnamya SEEBA, hūna būbūūka bashokile kū kaya yabo Lama. Ū Elikana aho walaala nū nke wakwe ū Hana, ū SEEBA ūng'wizūkwa.
20
Aho lyashikīīla ī likanza ū Hana ūbūūcha nda, ūbyala ng'wana ngosha, ūng'wilīka ī lina lyakwe Sang'weli, akūhayaga, “Nguno nakanomba kūlī SEEBA.”
21
Hūna ū munhū ng'wenūyo ū Elikana ūja nī kaya yakwe ī yose kūjūfunya shitambò sha būlī ng'waka kūlī SEEBA na kūshikīlīja shilahīlo shakwe.
22
Alīyo ū Hana atajile; ūng'wīla ū ngoshi, “Ū nyanda ūlū alaagile nakūntwala nakantūūle kūlī Seba, wikale kwenūko shikū jose.”
23
Ū ngoshi ū Elikana ūng'wīla, “Ītaga yose yose īyo ūlībona īlīkūbeelela; ikalaga ūlembeele kūshisha ūngije ū nīgīnī, gwike dūhū ū mhayo go ng'wa SEEBA ni gūshikīīlage.” Na lūūlū ū nkīma ng'wenūyo wikala ha kaya, ūng'onhya ū ng'wana kūshisha ūngija.
24
Aho wangija ūntwala, nūūlū īkī walī ataalī ndo; ūjana na nzagamba ya myaka idatū, hamò na'idebbe lya būsu, na shisaabo sha divai; shose ūshijana Shilo ū kū numba ya ng'wa SEEBA.
25
Aho baamala ū kwīsīnza ī nzagamba, būntwala kūlī Eli ū nyanda.
26
Ū Hana ūshika ūhaya, “Kūlaga ūhangame baba; ū nene hū nalī nkīma ūyo naalī nīmīīla henaha bbihī nang'ho nakūlombaga kū būtongi bo ng'wa SEEBA.
27
Nanombaga ū SEEBA aninhe ū ng'wana ng'wenūyū, na ng'hana ū SEEBA waninhile gīt'ūmo naalī nanombela.
28
Na lūūlū ī haha nalīng'winha kūlī SEEBA ū nyanda ng'wenūyū; ū mu shikū jose ja būlamu wakwe wabizaga o ng'wa SEEBA.” Ū nyanda wikala kwenūko ūbiza namya o ng'wa SEEBA.
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 26
Chapter 27
Chapter 28
Chapter 29
Chapter 30
Chapter 31
Chapter 2 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31